共你的生活寫出來，起大膽共告白啦！
von 老派紳士，林東榮先生
翁問講近來無啥機會 kā 你鬥巡德語，愖一下，確實是按呢隨翻頭看後台存檔，德文猶是有寫，只不過無閣 tshan-tshiūnn 較早按呢，德文跟綴台文行。
是按怎有這款變化，窮實 mā 無啥特別因由，不過清楚知影伊 m̄ 是按神魂來 ê 聲音，自然就 buē 行向彼條路，想 bueh 哭呻 hōo 外人聽，畢竟這是家內事 m̄ 是國家大事。
自德文記錄確定 buaih 閣愛哭愛綴路，我彼个風水一看好後跤就愛完成 ê 性地開始交順其自然勻聊仔來遏手把 hōo 我頭疼。另外年歲漸漸有，做過 ê 代誌無法度繼續 tshan-tshiūnn 烏貓年歲，過目 buē 擲後擴，所致需要緊跤記錄。總是，時間一日 tsiah 24 點鐘，準做無舞豬 mā 舞狗我猶是一日貼貼，而且貼甲連讀一本書 ê 時間 mā 揣無。呔討按呢生？我 m̄ 敢愖落去，畢竟我無後嗣，一日貼貼愛綴𪜶遨干樂。
我 ê 部落格無人來讀，準做有人來讀我 mā buē 致意我 ê 部落格敢有合𪜶 ê 喙斗，抑是需要順麭幼仔行踏回禮，起因我非常清楚遮是我 ê 弄舌盒子，gún 翁仔姐 ê 減肥食食記錄，交情緒避靜所。遮爾仔清楚家己 teh 做 ê 代誌，呔討猶原踅 buē 出去我想 bueh tī 24 點鐘 kā 記錄過 ê 大細項完成翻新，𫝛時 mā kā 楔 tī 檔案 ê 事項記錄踮遮？呔討按呢生？我需要解決。
按瑞典、挪威睏天路車日子轉來，Podcast 撨 buē 好勢 ê 迒區收聽設定，總算願意 kā 我鬥相共「請選擇收聽地區」，收聽地區一選好 Alle Folgen·Neueste 按空白轉做七彩萬色。來聽張博士講看覓 ê《科博做伙講》、果果 ê《台灣好代誌》、Hena Ma ê《台灣人台灣事》、烏白編 ê《公視台語台》、阿愷 ê《阿愷之聲》、亞特來開講 ê《亞特聊聊天》等等齊按一片空白轉做萬色七彩 hōo 我歡喜甲 buē 顧，𫝛時 mā 得著二本到今猶 buē 閱讀 ê 新冊《迷宮中的盲眼蚯蚓》（阿愷之聲 EP137 文學烏亂濺），交らしょうもん Rashōmon《羅生門》(台語話故事 | 【專訪】不服輸的老派紳士，亞特聊聊天)，紲落來按不服輸的老派紳士得著 Erleuchtung（啟示，啟發）mā 敨放彼个若ゆめ（夢）ê 磅空，我是請教長官我敢死亡 ê 懊落阿兵哥 mā 是 tuì kā 𪜶捒入戰場而對不住 ê 長官。
我柴樠點火較光油 ê 情緒是想 bueh 得著出口 ê 阿兵哥，我跟綴《拯救莎曼珊：逃離童年創傷的復原旅程》設立 ê 弄舌盒仔是對不住 ê 長官。專家分張 ê 心靈雞湯 kā 歹情緒做珍寶抾拾 ē kā 魂舒邊 ê 人掃了了。我好喙兼無歹情緒，總是我需要一个空間敨放 gún 翁到今猶若 Robert John Downey Jr ê 人生故事，Robert Downey Jr kā 老爸飼伊食毒當做是感情臍帶，gún 翁 kā 𪜶爸母食菜，食菜，食到肚臍為界 ê 假仙假觸當做是解決問題交紮來和平 ê 臍帶，押尾爸母成做伊隔山不見子，走船不等父一分熟 ê 生份人，gún-ê 會得兩人睏仝枕，較好露水凍花心 mā 按和齊睏仝枕勻勻仔行向露水凍花心，特別是我 kā 家甲做來德國以後。
我 ê 部落格代起先無寫寡一日食飽閒仙仙，頂家下家吐憐涎，我寫部落 ê 起因 kan-ta 耐心不足無法度交愛沓滴點拄台語無文字 ê 兔仔（Mein Name ist Hase, ich weiß von nichts➀）交陪盤撋，就順𪜶 ê 建議徙來操作利便閣簡單 ê 痞客邦練寫台文。
Covid-19 成做 21 世紀新 Pest（鼠瘟），我 ê 部落格 mā 開始出現一日食飽閒仙仙，頂家下家吐憐涎 ê 茶鈷呻，台文一逝，德文一逝，英文閣一逝，一篇文章愛呻三回，情緒猶是無得著兩抵償（lióng-tú-sióng）顛倒頭是頭較大身 kā 家己捒入去情緒烏空。愛一个人需要 kā 家己舞甲沓沓仔致帶身命，這無盤 m̄ 通繼續投資，交無講出喙 ê 拆破面 tī 2022 成做田無溝，水無流 ê 事實，只要做茶鈷呻我隨想著有喙講 gún 翁𪜶爸母啥物攏頇顢，獨獨欠錢怨債主，不孝怨父母 ê 咸豐三，講到今上蓋𠢕，卻無喙講家己到今猶原 m̄ 放家己煞 ê 恐怖，我隨鴨卵擲過山，好事，歹事，觀音佛祖免擺撥，我家己隨擺撥。總是一想著部落格猶有厚甲若波羅的海蠓 ê 過了代，我又閣刺疫骨力反變部落格內容到閱讀 Shiva Moon von Helge Timmerberg 這段話：
Warst du schon mal da? fragt Jaquelina.
你敢捌參加過？Jaquelina 問。
Aber ja.
有....
Angeben ist meine Schwäche, ich weiß, aber was soll ich machen.
臭頭仔包布，防蠅（防風）是我 ê 弱點，我知影，總是我會使得按怎做？
M̄ 知按佗落巡來 ê 文字並記錄踮部落格 ê「共你的生活寫出來，起大膽共告白啦！」成做 2025 解脫鼓仔燈其中一葩，像 Ich bin dann mal weg ê 這段話 ...der Idee vom Leid als dem Schlüssel zur Glückseligkeit.（齷齪是拍開幸福 ê 鎖匙），過了代是成長 ê 肥底，掩掩揜揜 buē kā 過了代 ê 齷齪擲過山溝甚至成做無影跡，唯獨起大膽 kā 告白，人生 tsiah 有法度繼續向前伐，像莎曼珊 tsiah 有才調真正向前伐，師父鐵冠子問杜子春：今後想欲創啥？伊的回答是：「毋管創啥，我干焦想欲做一个『人』，會當過正直的人生。」〈杜子春〉。
凡勢是芋仔爸交厝邊山東序大 ê 影響，凡勢是抗日電視劇 ê 影響，我自囡仔時代 tuì 日本文化一屑仔攏無興頭，除了漫画，所致學生時代擘腹人笑我是正港 ê m̄ 捌一箍芋仔番薯，準做掠無半隻無洗魂舒 ê 鳥鼠，我 mā 下性命骨力掠，總是我自本就無愛日本文學，所致過目隨擲火星，烌了了。簡單來講彼陣 ê 我 tuì 日本文學 ê 態度像《1984》「若是無意識，𪜶就袂造；若是無造反，𪜶就袂發展出意識。」，我 tuì 日本文學真正產生興趣是，聽人講去日本捌漢字比捌英文閣較利便 ê gún 翁，姑情我交伊做陣去日本行尞 tsiah 起變化。不而過我 mā 愛講若 m̄ 是讀著好讀文化出版 ê 我是貓（2017）我 ê 冊櫃合該永遠停跤 tī《神遺棄的裸體》（2014，大牌出版）、《伊拉克生死場：女義工、戰地、歷劫故事》（2008 商務），起因 kā 朋友借 ê 春上村樹讀 buē 敆喙，諾貝爾揣轉來 ê 芥川龍之界讀甲艱苦閣霧煞煞，像拆票看ゆめ（夢）仝款，我到底 teh 看啥物藝術。我低路人，ich weiß。
2025 迵過台語 Podcast 認捌羅生門出版台文版，順若龜 ê 閱讀速度交閱讀強迫症，慣勢按入門時間做閱讀階段，羅生門交迷宮中的盲眼蚯蚓，特別是華文版捌讀過 ê 羅生門 buē tī 2025 完成， 總是自 Podcast 恢復正常，台文版羅生門成做閱讀頭面頂百，紲落來 mā 影響比迷宮中的盲眼蚯蚓閣較晏到 ê《春光閘袂離》。 閱讀羅生門交春光閘袂離 hōo 我歹喙想 bueh 咸豐三，講到今，翻譯是一項工課 mā 是譯者人生過程 ê 倒影，我無法度理解早前所讀 ê 羅生門華文版作者是學院派抑是生活派，總是伊 ê 翻譯 hōo 我感覺生份，像彼本取英文做華文翻譯 ê Hermann Hess（赫塞）詩集 hōo 我自頭讀到尾 kan-ta 問伊這句話 Wer bist du，你是 tsiâ。
翻譯是 In Sprache veritas➁，語文交語文 ê 對譯 m̄ 是文字交文字纏綿就 ē 感動人心。
➀ 1855 一位名叫 Victor von Hase ê 法律系學生，伊因為風聲伊協助罪犯逃走需要上法院做解釋，伊 kan-ta 講這句「我號做兔仔，我啥物攏 m̄ 知。」，後尾 mā 轉化做啥物攏無做，到現代有人 kā 伊轉化做剾洗句「啥物攏 m̄ 捌」抑是「交我無底代」。
➁ 原文按拉丁語 In Vino veritas 酒內有真相轉化，語文有真相。
睏天路車日子 Camping mit Caddy (21)