To be ignorant of History is to be always a Child➀
--- Cicero
跤踏這塊土地卻 m̄ 捌這塊土地是一件真龜怪 ê 代誌，總是我 ê 龜怪佮其他角勢比並，窮實無算啥物。
我知影按呢比並悲慘是一件真無仝理心 ê 態度，總是換另外一个樂觀 ê 角度來看這个「悲劇」猶是一件「喜劇」，起因我 teh 讀歷史翻草歷史 m̄ 是 kan-na ē 曉 hőng 飼佮等人育飼 ê 囡仔。
我 m̄ 捌這本冊，總是我相信人 ē 替人牽紅線，冊 mā 是。
《一桶蚵仔》是小說，是補記 tshan-tshiūnn 陳雷醫師 ê《鄉史補記》、《歸仁阿媽》、《阿春無罪》、《紅牡丹》等等攏屬於陳醫師伊彼个年間 ê 記憶，m̄ 是專屬少少一陣人利用𪜶 ê 職權傳播𪜶認捌佮合意 ê 歷史人物 hâm 事件。
每一个人有伊家己 ê 年間，我 ê 年間較沈重，寫 ê 文章 mā 較沈重...
這久 ê 年間佮我 ê 年間無相𫝛，所致寫作 mā 沓沓仔 ē 行向無仝 ê 路途，成做無仝 ê 年間記錄...
早前捌寫過，這久 ê 我真愛讀臺語文，總是若讀若感覺無啥新趣味。
這个因端除了迵過書寫《愛情𥴊仔店》發見臺語文文學自這本冊出版到今猶原是詩占大多數，紲落來就是政治文學抑是反對書寫。
反對書寫 tuì 我來講是因為一个名稱就喙講臺語有文有字，m̄-koh 通篇是華文 ê「因為沒有下載臺語文輸入法，所以以華文書寫...」
遮 ê mā 是咸豐三，講到今，別人凡勢 buē 感覺飫，我攏感覺飫甲連吐攏無想 bueh 吐。
總是，引用陳雷醫師 ê 意思 kan-ta bueh 表示，一本冊 ē 吸引讀者 ê 目仁，你無法度講彼無作者 ê 烏面賊。
Tshan-tshiūnn Hermann Hesse ê 小說是按怎 ē 吸引人，準做伊並 m̄ 是通用德語 ê 使用者，伊 ê 作品猶原受歡迎，起因伊寫 ê 故事是伊彼个年間 ê 烏面賊 mā tshan-tshiūnn hőng 講伊寫 ê 小說讀過笑過就無其他 ê Tommy Jaud 寫 ê Der Roman(小說)猶原是記錄我這个年間 ê 故事 m̄ 是 gún 爸母抑是千外冬年前 ê 故事。
1950出版 ê《一桶蚵仔》m̄ 知有偌 tsuē 臺灣人讀過伊，讀過伊 ê 人又閣是啥物感覺。
總是，我用我家己 ê 態度來分拆這本冊，我 tuì《邦查女孩》古阿霞 uī-tio̍h bueh hōo 帕吉魯保持精神 kā 藏好好 ê 悲傷妝娗做一个故事講 hōo 伊聽，其他在場 ê 人 mā 做伙聽 ê 發水泱比寶玉佮𪜶小弟比利押尾行向佮李流無相仝路途 ê 感受閣較大。
因為，古阿霞 ê 故事是發生 tī 我 ê 年間，我捌搪過 ê 故事，準做故事主角 m̄ 是我 mā 有人講咱 ê 年間無彼款代誌，彼猶是發生 tī 我四箍圍仔 ê 故事我 ê 年間。
Sóo-pái，當我讀著古阿霞佮帕吉魯 mā 行向人生無仝路途，我 ê 心就 tshan-tshiūnn RMS Titanic 沈落海𢯾冊罵作者無天良。總是，古阿霞佮帕吉魯就 tshan-tshiūnn 作者 tī「嗚謝」寫 ê 這段話；
是緣份使我們以文字在小說裡的必然遭逢，是她帶我走過無數的小說情節與冒險，歷經逃離、環島、登山與伐木林場的驚駭，看見她離去的背影，有著難以言詮的感受。願眾神祝福這塊土地上的古阿霞們，以及帕吉魯們。
西方文學慣勢悲劇，華文文學慣勢喜劇，這佮文化有關係 mā 無關係，至少我是按呢認為，m̄-koh 一个文學體現確實表現一个角勢 ê 文化。
Tshan-tshiūnn 意愛悲劇做起鼓，喜劇做煞鼓 ê 華文文學一部份 mā 表現咱佮意 tī 𫝛一个箍仔，伊按呢拍我表示伊愛我 ê 阿 Q 精神，食苦當做食補佮咱佮意使用 tsuē-tsuē buē 講出喙 ê 話 tī 文學內底。
我理解書面語佮口語有差別，總是書面語應當猶是交流 ê 工具 m̄ 是表現腹肚墨水有偌 tsuē。
Gún 這輩 ê 人，第一擺聽著228應當攏是前總統陳水扁先生堅持這一日愛成做紀念日 ê 吵家抐宅 ê 煩，現此時 ê 228 應當無閣 tshan-tshiūnn gún 這沿 ê 生份，總是伊 tuì 我來講又閣成做另外一種 ê 煩，一種咱愛纏綴露西亞款 ê 悲傷。
我知影按呢寫有 tsuē-tsuē 人 ē 講你捌一个芋仔番薯，我確實 m̄ 捌一个芋仔番薯，總是悲傷迒 buē 過，是 bueh 按怎繼續向前行。
臺灣人臺灣事【台語女性書寫】 王薈雯有一段談著語言成做一个工具 hōo 我真有感想 mā 想著譯者 ê 這段話；
台譯這本冊的主要原因，是欲傳達佮保存咱台灣文化佇白色恐怖的五十年代的社會史，尤其是用外國人的眼光來看台灣，這比咱家己寫的歷史閣卡有客觀的見證，是台灣文化史的文獻。
每一个語言我攏有興趣，每一个歷史攏 ē 引𤆬我行向好奇，準做從來 m̄ 捌搪過，總是迵過彼个年間遐 ê 人寫 ê 故事確實較有法度引𤆬我行入彼个年間。
最後，我 mā bueh 綴《邦查女孩》作者按呢寫；
向望臺灣這地土地 ê 文學 ē 有閣較 tsuē 故事通看見。
Mā 祝福古阿霞佮帕吉魯平安、順序。
Mā 願無才調 uī 這个世界做寡啥物代誌 ê 家己，時時提醒家己成做巴頓 m̄ 通成做麥克。
➀一个 tuì 歷史懵懂(Bóng-tóng) ê 人永遠是囡仔。
文章標籤
全站熱搜
留言列表
冊 ▪ Bücher ▪ Books (4)
