亂皂𥴊仔店 ⓂⒺⒾⓃⓀⒾⓄⓈⓀ

• 「沙拉」是十个囡仔十樣生

好玄成做貓，自囡仔看甲大漢 ê「沙拉」伊敢會變調，像講慣勢 ê「寂寞/Siok-bo̍k」講「寂寞/Tsik-bo̍k」？好玄引𤆬智慧生，請教教育部臺灣台語常用詞辭典，辭典收錄「沙拉油」無收錄「沙拉」，請教 ChhoeTaigi 有收錄「白醋」（嘉義特有辭）、「生菜餐」、「Sa-la」三个辭，敢猶有別 ê 辭？來向公視台語台〈台語新辭庫〉請教，「有一寡民眾會用沙拉代替正頓，希望會當有減重的效果，毋過醫生提醒講若欠碳水化合物，可能致使免疫力降低這寡健康問題。」

西瓜倚大爿，全家有智慧是二選一，我是三選一「沙拉」、「Sa-la」、「生菜餐」，我選自囡仔看甲大漢 ê 沙拉。我愛白醋敆白煠筍。

• 「冷麵」交「涼麵」ê 精差？

因為蕎麥仔麵一直煮 buē 敆喙，我 tsiah 想著「冷麵」交「涼麵」是兩个無仝系統 ê 麵。冷麵食起來確實冰冰冷冷，涼麵有歐洲麵沙拉 ê 風格，伊無冰冰涼涼，除非你囥冰箱冷藏。

好奇引𤆬人生智慧，冷麵台語敢是「líng-mī」？田螺循舊路較行 mā 仝逝，湠智慧寶典教育部臺灣台語常用詞辭典無收錄，台語新辭庫敢有收錄？

1. 佇南北韓高峰會的時，金正恩佮文在寅分享北韓出名好食物「平壤冷麵」，毋過煞因為食飯時間延延，口感就無遐好。聽講金正恩真失望。
2. 熱天的時，阿爸攏會替規家伙仔攢榨菜肉絲涼麵，食起來清爽開脾。
3. 對高雄鳳山來的牛肉麵師傅，共和風醬佮桂花汁閣有刀削牛肉冷麵敆做伙，變做使人驚喜的好滋味，上尾提著這改牛肉麵嘉年華的創意組冠軍。（這个例句收 tī 和風醬對應華語 kā 伊轉做涼麵）
   

統體以上三點，我得著不管冷麵抑涼麵，𪜶齊是冷 ê 麵，像歐洲 ê 麵沙拉。若 bueh 精確區別，我以個人經驗做區分，蕎麥仔麵交意大利麵適合做焦麵，白麵適合做湯麵交焦麵。蕎麥仔麵無適合做台灣炒麵，意大利麵 ê Spaghetti, Linguine 長條形 ê 麵齊適合做台灣焦麵，事實上遮 ê 人（德國） mā 捷取意大利麵出亞洲炒麵，我 ê 意思是四常家庭，畢竟意大利麵比亞洲黃麵大碗閣滿墘。

• 冷麵愛「煮」抑是愛「煠」？

台語 ê 煮交煠交德語 ê Müsen u. Brauchen 仝款 hōo 我霧 sà-sà，特別是台語我慣勢 ê 煠麵來食、煮/煠水餃來食齊成做一糊仔漉糊仔糜。

有人講麵是煠 mā 是煮，有人講水餃是煮 m̄ 是煠，佗一个正確我 m̄ 知影，總是我清楚知影「煠碗麵來食」tī 我 ê 語感是燒一鼎燒水，紲落來 kā 麵落鼎煮 hōo 熟，撈出來，「煮碗麵來食」就若煮泡麵仝款，有加料落去做伙煮。水餃是煠抑是煮，我個人認為齊會使得，起因有 ê 人確實 ē kā 水餃落去若羮湯做伙煮，我囡仔時上愛食 ê 酸薟湯水餃就是按呢處理。

啊，據在伊去，語言是家庭文化 ê 牽藤，你 ê 慣勢是我 m̄ 捌 ê 牽藤，像這久 uī-tio̍h 理解煠交煮敢有分鐘區別，請教 Google，Google 無賜我這个智慧，不而過賜我這个智慧。

「㴘」（bāu）代表用燒水 kā 食 ê 物件燙 hōo 燒，像「㴘麵」用燒水 kā 冷去 ê 麵閣燙 hōo 燒。順現代科技來講就是微波（bî-pho）一下。順這个理路行落去，冷麵手路愛用煮，煮好隨愛 kā 水渧 hōo 焦，紲落來敆醬做伙食，冷麵手路若用煮，伊食起來就若「㴘麵」像教育部臺灣台語常用詞辭典 ê 造句「㴘的無好食。」

• 「甜菜」交「甜菜根」

Hallo，甜菜你敢是我想 ê 彼个甜菜？Swiss Chard，台語講 ê 牛皮菜，德文講 ê Mangold，英語講 ê Chard？

Mangold & Chard 無 tī 我 ê 請教範圍，不而過台語新辭庫推薦我讀這條辭我就順伊 ê 建議讀落去，並 kā 相關影片揤落去，凡勢是我食無三把蕹菜，就 bueh 上西天 ê 趕緊緊無耐性，所致無讀著例句「今仔日的暗頓，我試用生的甜菜做一項沙拉，請阿爸阿母食，𪜶攏呵咾真好食。」ê 影片，所致 buē 使講這个「甜菜」若是取來做德語 Rote Beete 英語 Beetroot ê 對譯，彼是正港是天差地遠，起因 Chard 是 Chard m̄ 是 Beetroot 抑是 Beete，Root 交 Beete 特別加粗框，起因𪜶有「大頭症」，像菜擴、菜頭，牛皮菜無。

我無確定台語新辭庫 ê「甜菜」敢是我想 ê 牛皮菜，總是華語 ê「甜菜根」抑是「紅菜頭」(香港 ê 稱呼）我 buē 跟綴台語新辭庫 ê 講法，因為華語 ê「甜菜根」mā 是「甜菜」。這敢無耍文字遊戲？我個人是按呢認為，準做甜菜根交莙薘菜齊屬甜菜一款，𪜶猶是無仝人，一个是食葉，一个是食伊 ê 根。

華語 ê 甜菜根我個人順教育部臺灣台語常用詞辭典「大頭菜」ê 解說 kā 伊號做「紫頭菜」。

大頭菜：蕪菁。根莖類。根為扁球形，肉質為白色或紅色，球根及嫩葉可以食用。德語號做 Pflücksalat（葉沙拉），英語（歐洲） kā 號做 Mediterranean Salat 內底就有貴桑桑 ê 紫頭菜葉。