亂皂𥴊仔店 ⓂⒺⒾⓃⓀⒾⓄⓈⓀ

我所認捌 ê 德國新豆腐目今有兩款，一款是濫加工烘肉醬 hōo 伊帶有烘肉氣味 ê 薰豆腐（Geräucherter Tofu），一款是傳統豆腐（Natur Tofu）。Tī 德國素食人口猶未行到目今 ê 闊度，想 bueh 食一塊傳統豆腐需要接受伊過鹹水成做框金閣包銀 ê 貴參參兼䆀味 ê 僫揣。這个僫揣交 gún 翁徛 ê 角勢有關係，所致我見著 ê 世界無表示伊是德國全樣。不而過 uī-tio̍h 止枵饞大大典典殘殘 kā 伊決落，厚度大細交大溪烏豆干無宛 2 體兼過鹹水按巴西來德國框金閣包銀 ê 傳統豆腐味素，伊特殊 ê 豆腐味素經過十外冬我猶是無才調 kā 伊擲挕捒。

按徛法國柴杙田庄徙位到有美軍駐軍 ê 角勢，超市按規庄一間生湠甲規庄六間閣有一間泰國太太開 ê 亞洲𥴊仔店，豆腐 mā 巴西轉做荷蘭來 ê 俗價，無掛奇妙味素 m̄-koh 若針對德國人喙斗改良 ê 酸豆腐猶是食 buē 敆喙，就此開始訓練轉脾土 kā 愛食 ê 魚臊、豆腐轉做牛豬肉豉仔抑是雞襟胸。

交 gún 翁來往伊清楚拆明「伊 ê 飯頓慣勢是無肉無麭無甜粅粅 buē 過日」，我交伊來往 m̄ 捌不三時提醒伊我無食啥交愛食啥，起因台灣食物選擇窒倒街，我食臭豆腐伊無愛，伊會使得去 7 𥴊仔店食伊愛 ê 美國煙腸敆麭。來德國談戀愛準做飯頓愛過這款勥母來恁兜「隨碗出」，我 mā m̄ 捌跟綴伊 ê 跤步燃茶鈷呻 hōo 伊聽，起因戀愛結束轉來台灣我 ê 飯頓又閣外甥仔點燈火，一切照舊。

2012 自來 m̄ 食菜愛食肉 ê gún 翁步頻寫批 tuì 我講食紅肉無健康愛換食白肉，而且愛食有機 ê 白肉，像有機雞肉，自熟似到今 m̄ 捌冤家量債 ê 飯頓問題開始開新戰場，不而過距離就是美感，伊寫伊--ê，我過我--ê，做陣生活伊跟綴心愛爸母 tuì 我傳世佛經，世世（踅踅）唸我就請伊家己出資款伊認為健康 ê 商品，然後送伊一句我 ê 人生興趣無包括 kā 藥仔當做啖糝來食。

家甲做來德國，自來 m̄ 食菜愛食肉 ê 伊凡勢見著同事一个仔一个捷出入病院，伊開始食老出癖想 bueh 轉做素食者 buaih 食半塊肉，總是理想交現實是兩塊鬥 buē 峇 ê 門扇枋，到今伊猶是 m̄ 捌成做素食者，像𪜶上𠢕顧健康 ê 爸母按呢，顧健康 ê 喙白到今一絲仔攏無改變，像有疼風 ê 人明明知機魚臊𤆬艱苦猶是 bueh 食 ê 先吞藥丸。

寫著這件代誌 mā hōo 我想著德國衛教節目腰子篇 ê 畫面，一位洗腰子 ê 病人倒 tī 眠床頂燃茶鈷 hōo 電視台講伊無想 bueh 過甲遮爾仔無生活品質，邊仔 ê 護理師頭犁犁認真 kā 伊攢早起頓 hōo 伊那食那洗腰子。這位無想 bueh kā 生活過甲無品質 ê 先生，伊 ê 早起頓是麭抹厚厚 ê Bá-tah 、加工肉片、Tshì-sù。

交德國人做朋友到今，身軀邊認捌 ê 素食者倒手手指頭伸出來算猶有賰，Covid-19 過後，我無感受身軀邊朋友𪜶食食 ê 變化，不而過徛家超市 ê 變化 hōo 我感受德國食素食人生沓沓仔 teh 生湠，起因 gún 遮 ê 超市十外冬來 kan-ta Erdi 有機超市有 teh 賣豆腐，其他超市除了交 WWF 合作 ê Netto 三時有陣有賣豆腐掠外，臨時臨曜想 bueh 食塊豆腐錢袋仔無夠深 ê 唯一選擇就是殘殘 kā 枵饞鏨掉。2022 年素食人口按 152 萬搝甲 812 萬，想 bueh 食塊豆腐免斬枵饞 mā 免驚食著歹味素，德國食品廠製造 ê 豆腐味素目今交亞洲已經 bueh 相𫝛 ê 好味素，不而過猶是保留德國特性 hōo 伊食甲來像骿條，無像咱亞洲食起來有三層 ê 口感。

2025 烏露戰爭 ê 第三冬，德國新政府宣佈 bueh hōo 德國工業再度偉大 hōo Made in Germany 重新行入德國人 ê 四常，這个想法誠好，不而過逐家攏清楚德國自核能發電廠一間一間關掉，塗炭發電 mā 沓沓仔禁止，向時俗甲若空氣無需要特別要意 ê Gá-suh 自烏露戰爭成做硩死 tsuē-tsuē 企業 ê 框金閣包銀，德國民生無發生車籠埔地震後 ê 地形變化通貨膨脹 hōo 錢變細圓就愛阿彌佛陀。 

烏露戰爭進前德國 ê 民生物價比波蘭貴，烏露戰爭開始波蘭 ê 物價寬寛仔 hōo 我這个外國人感覺伊 mā 勻勻仔跟綴德國四常，蹛德國 ê 波蘭朋友轉去波蘭有相𫝛 ê 感受，一場戰爭 kā 本底掠做強勢 ê 大圓慢慢仔行向細圓 hōo 四常無法度繼續快樂細百（Se-pah）過日子，像肉。烏露戰爭進前雞摸一公斤無到 3€，這久一公斤起甲 6€，豬肉向時一公斤 4€，這久起甲 bueh 8€，上恐怖 ê 是雞襟胸按 6€ 起甲這月日特價一公斤 12€，12€ 會使得 bué 3 隻烘雞 mā 會使 bué 一公斤目前是 8.99€ 4 ~ 5 尾一袋 ê 冷凍大西洋金頭魴。 新聞報導民生物價 buē 翻頭前 kan-ta ē 繼續向行前 hōo 本底一聽著豆腐隨講 buaih ê gún 翁隨講「我 bueh 跟綴你 ê 跤步食豆腐」，紲落來 ê 故事儉起來，直接進入暗時食西瓜，半暝仔反症。

2025.07.22 翁仔姐互相尊存對方 ê 生活慣勢，伊那𫝻電腦兼掰巧手機仔閣掛看電視節目，我那聽音樂那讀古蹟仙林衡道先生 ê《前夜》，伊無任何挨拶一聲隨 kā 我 ê 耳機提落來講「咱 m̄ 通閣食薰豆腐。」

「咱兜 kan-ta 先生你一位有 teh 食薰豆腐」我講。

「Huînn-ti̍t 你 m̄ 通閣 bué 薰豆腐」伊那講那 kā Der Vorkoster ê 影片分張 hōo 我看。

我那看影片那觀察家己 ê 情緒反應，起因伊講「你」m̄ 是「我發現薰豆腐 ê 烘肉醬按怎來，所致咱 m̄ 通閣支持薰豆腐。」

「頂年 Die Tricks 抑是 Lege packt aus mā 有做過相𫝛 ê 題目閣斟酌講歐盟已經禁止，只不過囥退跤步時間 hōo 工廠去改善這个問題」我發現經過 hōo 伊舞甲核子爆炸 ê 彼暝，我 buē 閣綿豉跟綴𪜶兜傳統做陣做 Mn̂g-sng 比賽 tsiâ 較𠢕見笑轉受氣。

伊 mā 若智覺家己又閣食著爸母喙，隨講「我無要求你倖豬夯灶，倖我做王，像 Supernanny The Ultimate Bossy Child 按呢」。

「按呢你愛換新牽手」我甜甜仔笑應。

「你無改姓所致咱兜是 End der Katzbuckelei 有樣免趁樣，我 ê 姓有一个隱形 ê 台灣姓 mā End der Katzbuckelei 免跟綴𪜶 ê 跤步」gún 翁發覺伊若綿精向望我跟綴𪜶兜傳統，伊 ê 姻緣 buē 行向睏破草蓆三領，猶是掠你心肝 buē 著，不而過伊 ē 行向𪜶小妹姻緣路，離緣。

我 tuì 伊僫改 ê 掠人出水交平白無故揣和尚頭掠蝨母 ê 慣勢 tī 彼暝伊 kā 我當做広島擲核子炸彈，我理解著愛 ê 真相交奈良美智 tī Baden.Baden 展覽 ê 圖相𫝛，和平是微微仔笑攑刀揬人 ê 和平。 伊慣勢這款愛，伊慣勢跟綴𪜶老爸 ê 跤步 kā 𪜶老母倖做天霸王，伊自然 mā 慣勢我 kā 伊成做天霸王 m̄ 是開時間去理解無相𫝛 ê 敆榫按怎來。

「平平是豆腐，我 buē 因為伊是薰豆腐就愛加一遍工，免煩惱」我甜甜仔講。

「想 bueh 健康食百二就愛改喙白」翁講。

Covid-19 kā 伊做二十冬 mā 按算日子行到滿二十冬彼工 bueh 照法律規定，提前退休要提早五冬申請 ê 計畫直接實踐，無想 bueh 閒閒跍踮厝 ê 伊選擇出門做長照機構 ê 司機小工，這五冬來伊見著 tsuē-tsuē 人因為無要意自來 ê 好資本 hōo 活水成做臭死水，伊開始相信𪜶爸母 ê 好䆀健康齊是妝娗在𪜶認定。伊無向望家己食甲猶未七十生活箍仔 kan-ta 厝一間，伊開始改喙白 mā 增加運動，2025 因為十塊豆腐俗過四塊雞襟胸，伊開始跟綴我食豆腐。初初開始伊猶是意愛有肉味 ê 豆腐，我因為慣勢豆腐 m̄ 是滷就是煮 buē 記得愛接受伊 ê 想法 tī 伊總算想著歐盟新規定決定改掉薰豆腐，我 mā 想著踮台灣罕得食不而麻雀會攏 ē 見著 ê 鹹酥雞豆腐糋。我迒 buē 過豆腐糋好油猶閣飽滇 ê 坎，隨想著敢若捌 tī YouTube 看過按美國來 ê 查某囡仔分張伊上愛 ê 豆腐食法，掜寡粉落鼎煎 hōo 赤赤「豆腐按呢料理味素交口感交豬排糋無宛 2 體。」

我 mā 來試看覓，麵粉濫寡芳料粉交芳料草，豆腐自來有水份就順遮 ê 水份做卵汁去掜粉，料想 buē 到煎出來 mā 麵皮交糋甜糕相𫝛，而且口感正港有像德國豬排。

「這是薰豆腐？」gún 翁一塊紲一塊那食那問。

「M̄ 是，伊是傳統豆腐」我家己 mā 一塊紲一塊那食那唱歌。

「這比薰豆腐閣較好味素」gún 翁講。

「我 mā 是按呢感覺。」

感謝天公伯，無 hōo 我跟綴伊 ê 情緒落湳 mā 無 hōo 我成做連我家己 mā 討厭 ê 形，田螺巡舊逝，較行 mā 仝逝。

 

豆腐北非小米沙拉

…… 材料 ……

豆腐，切片	2
北非小米	150g
地中海生菜	125g
甜番薑仔（紅），切塊	1
紅菜頭，礤簽	200g
紅洋蔥，刴幼	1
塗豆仁	30g
麵粉	30g
橄欖油	20g
Lê-bóng 汁	1EL
蜂蜜	1EL
燒滾水	250g
芳料粉
芳料草
蔥仔，刴幼
蒜頭，刴幼
鹽、胡椒

…… 步數 ……

1. 麵粉、芳料粉、芳料草、鹽、胡椒濫做伙抐 hōo 齊。

2. 北非小米、燒滾水濫做伙抐 hōo 收水，崁蓋，等 15 分鐘。

3. 豆腐掜粉落平鼎仔煎 hōo 赤赤，提出來。

4. 橄欖油、Lê-bóng 汁、蜂蜜、鹽、胡椒濫做伙抐 hōo 齊。

5. 紅洋蔥、蒜頭、蔥仔、紅菜頭、地中海生菜、番薑仔、北非小米、sòo-sù 濫做伙搜齊，豆腐、塗豆仁鋪頂懸，樂暢來食。

 

---

---

---

 

Mein Mann sagt, der geräucherte Tofu hat ihm nicht geschmeckt. Ich bin ein gute Frau, ich respektiere was er braucht obwohl ich mag keinen geräucherten Tofu. Ja, die Tofu schmeckt wie Rhein vor 1986, stinkt nach Chemikalien. Natur Tofu für mich ist noch nicht gut, aber ich verstehe hier ist Deutschland nicht Taiwan. Weil wir haben gleiches Problem mit dem Käse. So furchtbar.

Am 22.07.2025 Abend, ich lese das Roman meinen Mann das Fernsehen Programm schauen, wir respektieren jeder ist anders -- frei zu wählen das Leben mögen.

Okay, wir brauchen keinen geräucherten Tofu, sagt mein Mann.

Für mich, alles klar, kein Problem, weil ich mag kein geräuchert, aber du, anworte ich.

Ich weiß...sagt er.

Wenn er mir gesagt hat, dass er keinen geräucherten Tofu mehr essen will, ich bin ein Katz ich bin so neugierig, was passiert, er hat falsche Tablette gegessen (wenn die Menschen die Persönlichkeit nicht gleiche ist wie vorher, wir sagen hat falsche Tablette gegessen) oder plötzlich findet er ich bin ein gute Frau and sehr wertvoll?

Warum kein geräucherter Tofu, wir haben noch 2 zuhause, frage ich.

Zu viele Chemikalien und nicht gesund, sagt er.

Ich weiß, aber du liebst den Geschmack, sagte ich.

Nicht mehr, anwortet er.

Er zeigt mir WDR Der Vorkoster Programm, ach so, das Problem, letztes Jahr in Die Tricks oder Lege packt aus hat gleiche Thema für Zuschauer und zeigt wir sind die Zuschauer, sagte ich.

Ich weiß. sagt er.

Ich glaube meinen Mann hat Demenz und muss beim Arzt einen Termin machen, sagte ich.

Ich bin ganz gut, nicht besorgen, sagt er.

Bist du sicher? Frage ich.

Ich bin ganz sicher, sagt meinen Mann.

Ja, nach dem großen Streit möchte er wie seine Eltern leben, und ich gebe mein Leben auf – lass ihn gehen, ich habe meinen Frieden gefunden, weil ich kein Monster wie er und seine Eltern sein möchte.

Lieber Gott, danke dir, gib mir die Weisheit, dass ich nicht wie seine Eltern so aussehe wie geräucherter Tofu, Schmeckt gut aber giftig.

Der Tofu ist Natur, wegen mein Mann Geschmack brate ich den Tofu wie Schnitzel an. Und wie schmackt es?

Es schmeckt besser als geräucherter Tofu, sagt er.

Natürlich, die Natur Gewürz ist der beste Zauberer in der Welt, anworte ich.

 

Gewürzter Tofusalat mit Couscous

...... Zutaten ......

Tofu in Scheiben Schneiden	2
Couscous	150g
Pflücksalat	125g
Rote Paprika in Stücke geschnitten	1
Geraspelte Möhren	200g
Fein gehackte rote Zwiebel	1
Erdnuss	30g
Mehl	30g
Olivenöl	20g
Zitronensaft	1EL
Honig	1EL
Heißes Wasser	250g
Gewürzpulver
Kräuter
Fein gehackte Lauchzwiebel
Fein gehackter Knoblauch
Salz & Pfeffer

…… Zubereitung ……

1. Mehl mit Gewürzpulver, Kräuter, Salz und Pfeffer gut vermischen.

2. Couscous mit heißem Wasser gut verrühren, bis das Wasser verdunstet, abdecken und ca. 10 ~ 15 Minuten quellen lassen.

3. Tofu mit Gewürzmehl gut vermischen und in die Pfanne anbraten bis er goldbraun ist, dann rausnehmen.

4. Olivenöl mit Zitronensaft, Honig, Salz und Pfeffer gut verrühren.

5. Pflücksalat mit Couscous, Möhren, Knoblauch, Zwiebel, Paprika und Soße gut vermischen.

6. Tofu mit Erdnuss hinzufügen. Guten Appetit!

 

---

---

---

 

My husband says that he didn't like the smoked tofu. I am a good woman, I respect what he needs even though I don't like a smoked tofu. Yes, the tofu tastes like Rhein before 1986, stinks of chemicals. Nature tofu for me is not yet good, but I understand Germany is not Taiwan. Because we have the same problem with the cheese. So terrible.

On July 22nd, 2025 evening, I read the novel my husband watch TV program, we respect everyone is different - freely to choose life.

Okay, we don't need smoked tofu, says my husband.

That's fine with me, no problem, because I don't like smoked food, but what about you, I reply.

I know... he says.

When he told me that he doesn't want to eat smoked tofu anymore, I'm very curious to know what happened. Did he take the wrong pill (when people don't behave the same way as before, we say they took the wrong pill), or does he suddenly find me a good woman and very valuable?

Why no smoked tofu, we still have 2 at home, I ask.

Too many chemicals and not healthy, he says.

I know, but you love the taste, I said.

No more, he replies.

He shows me WDR's Der Vorkoster program. Oh, I see, the problem is that last year's Die Tricks or Lege packt aus had the same theme for viewers and showed that we are the viewers, I said.

I know... he says.

I think my husband has dementia and has to make an appointment with the doctor, I said.

I am quite good, not get, he says.

Are you sure? I ask.

I am absolutely certain, says my husband.

Yes, after the big argument, he wants to live like his parents, and I am giving up my life — let him go, I have found peace because I don't want to be a monster like him and his parents.

Dear God, thank you, give me the wisdom not to look like smoked tofu, like his parents. It tastes good but is poisonous.

The tofu is nature, because of my husband taste I fry the tofu like schnitzel. And how does it taste?

It tastes better than smoked tofu, he says. O

f course, nature spice is the best magician in the world, I replace.

 

Spiced Tofu-couscous Salad

...... Ingredients ......

Tofu cut into slices	2
Couscous	150g
Lettuce	125g
Red Bell Pepper cut into pieces	1
Grated carrot	200g
Finely chopped red onion	1
Peanut	30g
Flour	30g
Olive oil	20g
Lemon juice	1EL
Honey	1EL
Hot Water	250g
Spice Powder
Herbs
Finely chopped green onion
Finely chopped garlic
Salt & Pepper

…… Method ……

1. Mix the flour with spice powder, herbs, salt and pepper well.

2. Mix the couscous well with hot water until the water evaporates, cover and let it swell for about 10 ~ 15 minutes.

3. Mix the tofu well with spice flour and fry into the pan until it is golden brown, then remove it.

4. Mix the olive oil with lemon juice, honey, salt and pepper well.

5. Mix the lettuce with couscous, carrot, garlic, onion, bell peppers and sauce well.

6. Add tofu with peanut. Enjoy your meal!