亂皂𥴊仔店 ⓂⒺⒾⓃⓀⒾⓄⓈⓀ

露營地主人家 River Side Camping ê Meow

Tshan-tshiūnn 牧羊者按這綠徙到彼青，愛琴海 ê 山嶺沓沓仔 kā 我徙到上押尾 kā 共產主義擲挕捒 ê 阿爾巴尼亞。

「Gún 啥物攏無 m̄ 過真𠢕掠兔仔」總舖師 ê 話佮 Taken ê 畫面宛然78轉踅 buē 離，等到跤踏入這个國家隨笑家己綴影戲有影無影攏生囝。

凡勢是划國旗 ê 雙頭鷹是15世紀抵抗鄂圖曼帝國象徵 ê 路線，所擺見著 ê 世界佮總舖師 ê 記持無相𫝛。好玄是隻貓，tī Berati ê 街路徛踮 Margarita Tutulani 面頭前，我問伊見著以早 ê 反抗成做今仔日 ê 交易鬧熱是啥物心情，伊無應話，「先 hōo 一部份 ê 人好額先」卻𤆬我行入總舖師分張 ê 山鷹子民是按怎 uì 基督徒成做穆斯林 ê 過程。

先顧腹肚，tsiah 顧佛祖是天性 m̄ 是反抗落塗時八字命 ê m̄ 願。

歷史有百年厝，無百年主，划向𫝛款 hōo 鄂圖曼帝國借蹛 500 冬 ê 北馬其頓 ê 半中站...《心行尞》Kreis von Kreisen ▪ 翹頭查某, Au revoir ▪ 車日子

世界文化遺產 Berat 舊城

Kultur entsteht, indem man eine mit der anderen teilt, dass das Endergebnis ist etwas Besonderes für jeden Einzelnen.

Danke meinem Mann zeig mir die Welt, und danke an die Freunde, die wir unterwegs getroffen haben, lass meine Welt mehr Farben annehmen, als ich mit vorstellen konnte.

世界文化遺產 Berat 舊城

文化 ê 形成是按彼个湠過彼个，押尾成就隨人 ê 特別。

感謝翁 ê 貼心𤆬我四界行跤花認捌世界，mā 感謝願意 hōo 我掖鉛粉 ê 朋友，因為恁 hōo 我 ê 跤花世界有閣較 tsuē ê 色緻。

13 世紀 Byzantine/拜占庭聖三一教堂(Die Kirche der Heiligen Dreifaltigkeit)

倚位 tī Osum 河，國土若海馬南爿 ê Berat 培拉特是 Margarita Tutulani ê 故鄉，Margarita mā 是阿爾巴尼亞按 Osmanlı 鄂圖曼脫離並簽定獨立宣言 Dhimitër Tutulani 者之一 ê Tsa̋ 孫。

世界文化遺產 Berat 舊城

Berat mā 是阿爾巴尼亞第二个因為對頭者 Osmanlı 鄂圖曼建築保留完整，成功加入 World Heritage 世界遺產 ê 城市。

阿爾巴尼亞第一个世界文化遺產 tī Gjirokastër 吉羅卡斯特, 2005，Berat 培拉特 2008。

世界文化遺產 Berat 新城

阿爾巴尼亞 ê 歷史佮世間 tsuē-tsuē 角勢相𫝛，這个人來彼人人去，獨立後 ê 1939 換 Italia 無問伊敢 bueh hōo 𪜶來行踏，就講遮是 gún 兜 ê 一部份。

13 世紀 Byzantine/拜占庭聖三一教堂(Holy Trinity Church)

Berat 這个名上早是按古斯拉夫語來，落尾隨在地人沓沓仔變化做今仔日 ê 生張，意思是白色城市。

Mā 有人主張伊是按希臘語 Ἀντιπάτρεια 來，tī 拜占庭年間伊號做 Πουλχεριόπολις，紲落來根據中世紀拉丁文考證，伊按上代起先 ê Belogradum, Bellegradum 沓沓仔綴族群變化成做今仔日 ê 字姓。

世界文化遺產 Berat 舊城

Tī 我猶 m̄ 捌阿爾巴尼亞進前，我 tuì 伊 ê 印象 kan-ta 共產國家、伊斯蘭、貧凶國家，沓沓仔有機會迵過別人認捌這个歐洲角勢，伊𤆬 hōo 我 ê 印象是共產國家、碉堡規四界、散凶國家，等到有機會真正認捌阿爾巴尼亞人「食飯是一件足重要 ê 代誌」。

「散凶 ê 逐家無宛2體，準做你有機會選擇家己想 bueh 挃 ê 職業你猶原散凶甲動物攏無興倚靠」按阿爾巴尼亞來德國做穡 ê 總舖師，烏狗兄 ê 面容猶原戴爸母彼沿 ê 驚惶峇微笑接續講「gún 阿爾巴尼亞按一个黨執政到猶原仝一个家族執政，gún 猶原散凶，總是 gún 總算 ē-tàng 自在選擇宗教，甚至相信宗教。」

「恁 m̄ 是自古就是伊斯蘭教？」

「我 ê 祖公交爸母攏是基督教，tī 宗教信仰恢復自由身，𪜶選擇繼續成做傳統 ê 基督教徙，我選擇成做伊斯蘭教徙。」總舖師那講祝福語那 kā 開齋節點心 Tsioo-kóo-lè-tòo 展開請我交伊做伙感受幸福。

世界文化遺產 Berat 舊城

Gún 爸母 tī 獨裁離開，淡薄仔自由行徛 ê 年間繼續成做傳統 ê 基督徒 hōo 我這个掠做有讀書，窮真是 m̄ 捌讀過書 ê 人 tī 這个世界 tuì 咱番薯島猶原歡迎 ê 年間親身行一逝阿爾巴尼亞，認捌這个生份甲 kan-ta 捌一四界齊碉堡交 Taken 即刻救援 ê 山鷹之國。

世界文化遺產 Berat 新城街路

行踏阿爾巴尼亞進前，按厝邊 ê 當地教育我學習著希臘是基督教 ê 東正教，東正教分做羅馬尼亞東正教、露西亞東正教、塞爾維亞東正教，Osmanlı 行踏東正教進前是 Byzantine 東羅馬文化....

伊斯蘭按土耳其朋友分張 ê 智慧，伊 ê 起源落 tī 7 世紀這跤兜，彼陣 ê Constantinople 君士坦丁堡猶是 Constantionpole m̄ 是我這个年閣 ê Istanbul 伊斯坦堡(1930)，繼續請教資料，阿爾巴尼亞交阿丁分張 ê 敍利亞歷史相𫝛，現此時 ê 面肉齊是 5,6 百冬前 ê 變化，紲落來成做唯一 ê 歷史標準化。

一部歷史正經是凡勢無到 3 个人做伙編寫 ê 鬥片仔冊。

現此時我目所讀 ê 資料敢正確， 𠊎毋知，總是歷史是看人撒藥並暗頭仔食西瓜，半暝反症重重疊疊 ê 點拄。

世界文化遺產 Berat 舊城

按文獻資料，Berat 本底是一个交易 ê 城市 Osmanlı 一入城鬧熱交易隨成做落坐並死殗殗，紲落來受著扞權人 ê 看重，按落坐閣一擺成做鬧熱並交易 ê 城市。

這个變化 hōo 我想著咱番薯島四百外冬 ê 變化，荷蘭人年閣交易 ê 台南交日本年閣到目今 ê 台北，敢 m̄ 是扞權 ê 人主意。

世界文化遺產 Berat 舊城

「阿爾巴尼亞現此時 ê 穆斯林齊是散凶人口 uī-tio̍h 食一喙飯接受鄂圖曼經濟救助 ê 後代。」

行踏 Berat 搪著 uī-tio̍h 食一喙飯 ê 當地人遠遠按英語交 gún 挨拶並詳細紹介自家手工蜂蜜交果子醬，等 gún 無法度閃避路線需要經過伊，伊一聽著 gún 翁仔姐講德語隨換聲線講德語，聽著 gún 翁刁意故講西班牙語，伊 mā 隨換西班牙語 hōo 我想著阿爾巴尼亞總舖師分張 ê hōo 人一喙飯是上簡單 ê 身份認同清洗。

按新城入舊城見著牛交馬互相對看並交保持距離，我想著德語課土耳其人看敍利亞人 ê 態度，準做 m̄ 是每一个土耳其人攏按呢生，總是敍利亞確實 kā 鄂圖曼 500 冬歷史成做𪜶唯一 ê 正史 hōo 𪜶成做講阿拉伯語 ê 土耳其人，紲落來一个階級生湠另外一个階級 ê 恁 ê 文化交歷史齊是 gún 兜 ê 糜鹿四不像。

咱 ê 番薯島 mā 有相𫝛 ê 問題，敢 m̄ 是?

世界文化遺產 Lini/Lin

... tī 這个離臺灣千里 ê 懸山山鷹田庄見著家己 ê 字姓 Lin 成做別人 ê 庄名，喙裂甲獅獅獅，世界是圓--ê。

北馬其頓是冷戰期間無想 bueh 坐飛船或是坐大船渡海到希臘上主要 ê 山線，遮有一个懸山淡水湖，淡水湖邊仔有一个水清甲連日頭 mā-ē 成做 Narcissus 直直照家己緣投 ê 世界文化遺產 Ohrid ---《心行尞》Kreis von Kreisen ▪ 翹頭查某, Au revoir ▪ 車日子。

M̄ 管伊是 Lin 抑是 Lîm 伊交倚 Ohrid 生活 ê 百姓仝款，齊是一个名 Lini & Lin。

Lini/Lin

1939 無請問家己來 ê Italia 有伊 ê 文藝復興，阿爾巴尼亞 mā 有伊家己 ê 國族復興，這个 tī 19 世紀發穎 ê 國族復興重要角勢就踮 Osmanlı 年間真重要 ê Berat。

2 戰年間遮 ê 穆斯林 mā 提供猶太人庇護所並提供清真寺 hōo 𪜶做禮拜，彼陣 ê 故事就敢若現此時 ê Hagia Sophia 𫝛款，有基督徵象徵 mā 有伊斯蘭教象徵，遮 ê 歷史 mā tshan-tshiūnn Hagia Sophia 仝款按建築巡，巡 ē 著彼陣 ê 互相幫助。

綴世仇跤步成做觀光地區 ê Lin

阿爾巴尼亞佮北馬其頓(Pak-má-kî-tún/Nordmazedonien) ê 冤家量債是一部真僫解釋 ê 歷史，低路 ê 我 mā 無彼个才調通解釋到一支毛，就按呢準過寫重點。

Lin 是 Ohrid 湖一个半島，伊 mā 是 Qafë Thanë ê 門喙口，Lin 本底是一个無啥建築 ê 小庄頭，因為厝邊世界文化遺產 Ohrid hōo 伊按 kiōng-bueh 消失 ê 田庄成做有飯店、有餐廳 mā 有別 ê 庄頭欣羨 ê 大馬路佮迷人 ê 經濟發展。

按阿爾巴尼亞行踏北馬其頓 Ohrid 市，窮實無需要特別行踏 Lin 總是旅行社需要一个彩卵 hōo 觀光客，像行搭克羅埃西亞 ē 加送一个國家波士尼亞，行踏瑞士 ē 加送一个 Liechtenstein。

Lin 這个需要掠外駛 35 公里 ê 庄頭 mā 是照這个資本市場需求產生 ê 市場，gún mā 是照這个資本市場箍仔行踏 Lin

路裡搪著 ê 阿爾巴尼亞景緻

根據考古，這个佮我華語字姓羅馬字寫法相𫝛 ê Lin tī 史前年間就有人類 tī 遮停跤，因為這个發見，考古學家推斷這个現此時人口凡勢無到100人 ê 田庄是歐洲上早蹛人 ê 角勢。

路裡搪著 ê 阿爾巴尼亞景緻

Lin 這个貓仔凡勢攏比人 tsuē ê 田庄，目前有一个上出名 ê 考古遺址。

徛位 ê 山頂尾溜 ê 有一踏現此時已經無法度完整看出向時 ê 美麗 --- 起 tī 6 世紀  ê Byzantine 基督教堂，Lin 這个 kiōng-bueh 滅庄 ê 田庄，因為這座拜占庭年閣教堂 hōo 伊按塗炭仔成做皇后 --- 聯合國 Ohrid 阿爾巴尼亞地區世界文化遺產。

飯店兼餐廳 Leza 食著 ê 瓜仔哖優格生菜盤

阿爾巴尼亞 ê 食食佮臺灣相𫝛 tī 外來政權 ê 年閣揣無一个定位，不過阿爾巴尼亞 kan-ta 沓沓仔按暗殕揣著日鬚，咱番薯島猶原 tī 暗殕踅金龜磨，我家己 mā 是。

囡仔時食 ê「肉餃」、「菜餃」有人講伊號做「臺灣水餃」mā 有人講伊是「水晶餃」hōo 我一粒頭兩粒大，不過我清楚知影我無愛火鍋 ê「水晶餃」我愛炊 ê「肉餃」交「菜餃」mā 願意 tuì 人紹介伊是「臺灣水餃」，像阿爾巴尼亞人搪著交希臘無宛 2 體 ê 食食，𪜶 ē 講「這是阿爾尼亞尼 ê 希臘菜色」。

按呢 ê 講法交法式、中式、德式有啥無相𫝛？

請家己愖。

餐廳 Leza 食著 ê 菜蔬烘

阿爾巴尼亞自 1991 實施民主化 mā 搪著相𫝛 ê 問題，早前 ê 人無機會交外埠接觸，sòo-pái 面對凡勢是較新款食食，大多數攏 ē 照彼个國家 ê 名紹介，總是料理久 mā-ē 生湠出家己 ê 味素。

像 gún tī 點菜老輩紹介這是希臘料理，少年輩菜捧來隨紹介這是阿爾巴尼亞新菜色，一份結合厝邊佮家己傳統 ê 新菜色。

認捌家己 mā 接受時間引𤆬 ê 變化，自然 buē 囊別人 ê 衫來展自信。

餐廳 Leza 食著 ê 瓜仔哖 Kam-má-tooh 生菜盤

我無好食福認捌 ê 料理 mā 是涵空龜等級，總是以我小小 ê 世界來分張，我窮真無遮爾仔要意遮 ê 差別，畢竟人類 ê 生湠自本就是按這个湠過彼个 ê 互相成做副本。

不過我真感謝阿爾巴尼亞 ê 物價，因為俗物 buē 食破家 hōo 翁某起冤家，gún tī 遮 ê 車日子我行灶跤 ê 機會少甲倒手五肢指頭仔捎來算猶有賰。

因為糜飯齊靠當地人 kā gún 鬥相共，我 tsiah 知影，阿爾巴尼亞料理手路足敆我 ê 脾土，菜蔬 ê 選擇 mā 歐盟厝邊 tsuē。

這个狀況 hōo 我想著古巴，交古巴攏行過枵甲連葡萄柚攏 ē-tàng 煎做若牛排 ê 日子，阿爾巴尼亞人 mā 絕對寶惜有物通生湠 ê 機會。

莫看我細隻，我是刺耙耙甲 hōo 你驚

歐洲自本就有貓，總是貓敢有厚甲若蠓按呢，我就 m̄ 知影。

以厚甲若蠓來形容 Balkans ê 貓是有較譀古寡，總是貓 tī Balkans ê 地位 m̄ 知敢有受著𪜶 tī Osmanlı 年閣替𪜶主持正義有關係？

貓 tī Osmanlı 年閣是 In Time ê Raymond Leon 鳥鼠是 Will Salas

阿貓 kā Raymond Leon ê 角色搬甲非常之好

--- 講古者，詹美樹之翁

Uī-tio̍h 一頓飽，伊看起來客氣閣好禮 mā 愛準備 --- 戰鬥

Balkans ê 街路阿貓阿狗一直是德國人無法度接受 ê 部份，總是每一个生物本底就有伊生湠 ê 權利 m̄ 管是飼 tī 厝抑是自在踅街 ê 動物。

這日行踏 Berati 搪著兩隻用咱人類 ê 角度來看是可憐 ê 幼貓仔，tuì 阿貓仔來講是可憐抑是自在我 m̄ 知影，總是見著這幕(bōo) hōo 我忍 buē 牢想 bueh kā 𪜶翕一張相，起因這隻較大隻 ê 貓 teh uī 比伊閣較細隻 ê 貓仔徛衛兵 hōo 伊有通仔好好食人家厝分張 ê 菜尾。

算你有好目色，知影我足刺

我愛貓，飼貓 ê 想法 mā 佮囡仔時飼過貓 ê 翁 ê 想法無相𫝛，伊見著當地人家厝攢 lê-bóng 片、骨頭、菜葉遮 ê 咱人類食賰 ê 食物 hōo 阿貓講按呢 ē 害𪜶破病，我認為阿貓佮人仝款，玻璃厝飼佮放牛食草飼 ê 抵抗力，一个感冒就看出精差。

另外，用家己 ê 角度想代誌進前 mā 愛思考這个角勢 ê 往過佮目今。

Tī 人愛提木麻黃(bo̍k-muâ-hông)做主食 ê 年間，遮 ê 阿貓阿狗猶有法度四界生湠，這比愛攢啥物 hōo 食 tsiah 健康閣較重要。

細隻阿貓 teh 食飯，我知影 buē-tàng kā 攪擾，不過見𪜶遮爾仔古錐就徛五步緊翕相收藏𪜶 ê 古錐。

Shkoder --- 拄熟似就若我飼 ê 阿貓

這隻阿貓佮頭一張相片 ê 阿貓攏是露營區主人家飼 ê 貓，這隻阿貓佮我 ê 緣份 kan-ta 一頓早起頓，起因伊來行踏 ê 彼日 mā 搪著 gún bueh 離開阿爾巴尼亞。

是講，本底想 bueh 繼續跍 tī Shkoder 總是天公伯 m̄ 願 hōo gún 日頭伯，時間有限就齒根一咬放棄這个有佮 Mostar bueh 相仝影色 ê Ura e Mesit。

離開露營區彼時，露營主人家見雨來天 gún 步頻 kā 車停 tī 櫃檯外掠做 gún 有啥物代誌 bueh 請教，押尾見我 m̄ 是行向櫃檯是行向車斗，好玄行到亭仔跤等我，見著我 kā 伊 ê 貓攬牢牢 buaih hōo 伊沃著雨，這款簡單 ê 動作 m̄ 免特別講寡啥，總是我得著阿貓 ê 愛，主人家 ê 笑容 mā hōo 我規日好心情。

多謝你做我 ê 貓 --- Berati

這隻阿貓 mā 是露營區 River Side Camping 主人家飼 ê 貓，伊按怎 ē 出現 tī gún-ê 露營車，聽翁講伊坐 tī 椅仔頂𫝻手機，阿貓直接倚來 kā 伊當做膨椅歇睏，就按呢這隻阿貓成做我飼 ê 阿貓，像相片按呢逐暝佮 gún 誠懇睏做伙 hōo 我一失神掠做伊正港是我 ê 貓 bueh 𤆬伊轉來德國，失神猶是愛回魂，阿貓需要空間活動佮伊有主人我 buē-tàng 因為這3工 ê 快樂造成別人 ê 痛苦。

Bueh 離開 Berati ê 彼暝，這首按 YouTube 推薦 ê 鋼琴曲 mā 成做我思念阿貓 ê 解方 Ólafur Arnalds - This Place is a Shelter (Soft Piano)。

栽欉 --- 2022.10.05

翻田塗 --- 2024.12.05