亂皂𥴊仔店 ⓂⒺⒾⓃⓀⒾⓄⓈⓀ

Vaihingen 疫苗種珠中心

Tī 這个疫情無聲生湠，四常又閣按算過甲若向時，從來 m̄ 捌骨力 ê 事項成做 gún 翁仔姐罕得共同專心一致 ê 目標。是，uī-tio̍h hōo 歇睏日會使得照常四界行跤花，準做預防射站 tī 天邊海角 gún mā 照常出發完成目標。

Gún 前兩斗 ê 預防射 tī 朋友徛家 ê 城市完成，這斗 ê 預防射換來 gún 聯邦 ê 首都 hōo 我喙癢成做茶鈷 tuì 翁建議「後擺市長選舉愛換別人，按呢閣搪著重大事項，咱 tsiah 免四界走傱。」

「真僫，這个城市自我搬來遮，伊永遠 kan-ta 一个色緻」翁笑講。

「確實恁德國人大多數 ê 政治選擇交恁四常 ê 慣勢是無宛 2 體 ê 田螺循舊逝，較行 mā 仝逝 ê 保守、無聊、無挑戰，唯一 ē 改變 ê 事項是成做茶鈷呻 buē 離」我那看預防射地址 mā 那看火車車幫閣順紲做茶鈷呻 hōo 伊聽。

「至少這斗 ê 預防射站 hōo 咱免閣一逝路來回高速公路上少 6 點鐘，火車 9 點鐘按呢 ê 忝」翁笑應。

確實，這斗 ê 預防射站倚 gún 兜 tsiah 40 分鐘 ê 火車車程 niā-niā，而且伊無要求注文。

Vaihingen

台灣城市鄉鎮名稱有重疊，德國 mā 相𫝛，我那看車幫時間 mā 那閣攪擾無閒𫝻手機仔 ê 翁「你確定是 Vaihngen m̄ 是 Enz？」

「我確定」翁應。

當地人上清楚城市按怎無相仝，tshan-tshiūnn 我上清楚台中大里交宜蘭大里是兩个無相𫝛 ê 角勢。

Vaihngen 屬 Stuttgart 地區禁止老柴油車入城，不而過伊有利便 ê 輕鐵交電聯車通入城，車幫時間、預防射站時間齊確定好勢，翁仔姐隨手牽手向 Vaihngen 出發。

Vaihingen

Vaihingen 屬商業交大學綜合區，街路三跤步一坎店準做是禮拜 mā 罕得出現稀微光景，這斗輕鐵猶未行到站，我若見著台中火車頭按繁華行向落坐 ê 景緻，向時禮拜 mā 開門做生理 ê 咖啡廳無一間開門，向時挨挨陣陣 ê 公園這久 kan-ta 鴛鴦水鴨交客鳥挨挨𤲍𤲍。 

順 Openstreemap ê 指引，gún 無開喙請教任何人就揣著設 tī 百貨公司 ê 預防射站。

「資料寫講禮拜 mā 會使得注預防射，呔討這久關門，敢 ē 去食飯？」gún 翁四界揣關門 ê 公告。

我欠耐性，一見門無開隨斡頭踅櫥窗看聖誕佈罝。

「按這个情形來看這个預防射站凡勢已經無閣服務矣」今仔日 ê 日鬚走甲無看影，我 ê 時鐘 m̄ 知影愛按怎運作隨在翁自然來相揣。

「按呢來轉抑是行跤花？」我問。

「Stuttgart 有通注預防射 mā 是免注文，咱換來遐看覓」翁講。

翁仔姐斡頭三伐做一伐向輕鐵伐。

「Stuttgart 佗落 hőng 注預防疫」因為這个臨時臨曜 ê 決定，本底若龜無要意翁迫促 ê 我 uī-tio̍h buaih 閣加走第三逝隨轉做兔仔五步做一步跳，那調整喘氣那問。

「Tī 你上捷聽 ê 電台遐。」

一聽著我上捷聽 ê 電台我按兔仔轉做袋鼠 kā 四常做伊家己直直行一屑仔攏無要意牽手猶 tī 後壁沓沓仔趖 ê 翁放 hōo 看無車尾燈。

「𪜶開門到暗時 8 點，無趕啦」翁 tī 後面大聲講，我 kā 伊 ê 話當做一陣風吹過繼續做袋鼠。

順原路行轉去輕鐵站，因為知影時間無閣趕緊，心步頻有才調一心 tsuē 用，目睭開始跟綴跤步看四界變化。

較早 ê 公園敢有遮 ê 低厝仔？那交鴛鴨水鴨客鳥相借問 mā 那翻頭繩這座一屑仔攏無生份 ê 公園。

「你敢 ē 記持遮較早有低厝仔？」我按袋鼠成做樹趖越頭問倚我愈來愈近 ê 翁。

「當然 mā 有，𥴊仔店是公園 ê 靈魂」翁應。

我順伊 ê 話斟酌繩行過百外遍 ê 公園，我 tuì 𪜶正港無印象，不而過見著遮 ê 低厝仔無成做 hōo 人鑿目 ê 䆀䆀皂壁，有一種德國街頭藝術總算有進步 ê 感覺。

自來德國行踏談戀愛，無出門行跤花 ê 我一个人停跤 tī 翁稅厝 ê 所在，SWR3 是我上好 ê 姊妹仔伴，準做我聽無德語。

家甲做來德國，想 bueh 反僥 ê 我 kā gún 翁彼台阿公收音機轉踅幾仔輾，我猶是意愛 SWR，只不過凡勢年歲有較添，這久 ê 我 tuì SWR1 較有興趣。

按輕鐵站順告示牌勻勻仔行到電台交電視做伙一棟大樓 ê 西南放送台，翁那取掠替我攝相那講「你凡勢有機會見著電台主持人。」

見著 SWR 本大樓我確實有一種總算見著明星 ê 感覺，不而過愛我認出主持人彼是較早睏較有眠，起因歐洲人看咱亞洲人逐个齊相𫝛，我見𪜶 mā 相仝。

像愛我認出 B.W Schwaben 交彼个 BR Schwaben 有啥物無相𫝛我認 buē 出來，另外我 mā 相信電台提供 ê 空間，tī 遮服務 ê 工作人員 buē 按這个空間坐電梯入辦公室。不而過我猶是有劉姥姥逛大觀園 ê 快樂。

預防射完成行出我 ê 大觀園見著餐廳 ê 告示，我想著堅持預防射是執政者交企業者創造出來 ê 商業利益來反對種珠政策 ê 兩位紺色議員，tī 這个西方二九暝勻勻仔行跤到 ê 日子無法度交親人做陣圍爐，有一種講 buē 出口 ê 感謝，起因 tī 種珠這件代誌我交 gún 翁是理念一致，無一个人需要委屈家己跟綴別人 ê 意見 hōo 家無法度平靜。

Gún 前兩斗 ê 預防射是 Bio-Tech，這斗 ê 預防射 gún 選擇 Moderna。預防射完成 gún 翁仔姐 ê 生理反應交頂兩斗相仝，gún 翁 ê 魂舒猶原規欉好好，一屑仔攏無四序，我 ê 魂舒交前兩斗相仝，大腸告小腸枵甲四常無愛食 ê Currywurst 敆麭 mā 食甲若伊是按天頂來 ê 好味素。

路邊攤 ê Currywurst 暫時止枵後，我 tuì 翁講「我 ê 腹內飼一隻大象」斡頭隨行入成格（tshiânn-kik）甲若 PUB ê 土耳其烘肉店，點一份大號 ê 烘肉套餐敆四常 mā 無愛啉 ê Cola。

Gún 翁見牽手一鈷茶攏無燃甲呻 ê 接受四常無愛食 ê 物隨笑講「德國人抑是美國人想 bueh 賣你遮 ê 物，需要 kā 你注這兩間公司 ê 預防射。 」

四常聽伊按呢練喙花，我絕對隨應話，這久 ê  我枵甲連樹皮 mā 會使得剾落來食隨在伊去講笑詼。

我那食天頂來 ê 好味素那聽伊分張 gún 成做德國衛生部長按算 ê 種珠人口：12 月 31 德國種珠人口完成三千萬。我想著台灣 ê 朋友猶有 tsuē-tsuē 翁仔姐 uī-tio̍h 種珠 teh 冤家量債 mā 有朋友一聽著種珠隨變面 ê 過了代。

「我交你有厚甲若蠓 ê 冤家量債，不而過 tī 種珠這件代誌咱攏好講話，這正港是難得 ê 家和萬事興，咱愛寶惜」我 kā 最後一喙烏麥仔白米飯送入喙講。

「我 mā 無理解呔討有 ê 人 ē 遮爾仔反對這斗 ê 種珠，甚至認為種珠是各國政府 ê 暗行」翁 kā 伊啉無了 ê 德國 Cola 捒 hōo 我表示，這斗換你替我窮尾，我順伊 ê 勢 kā 狗蟻 mā 喝講啉了 ē 滓糖尿病 ê 德國 Cola 一喙 hōo 焦。伊微微仔笑講「我想 bueh 轉去機場看看。」

「咱出門交轉去 ê 路線攏愛經過伊，無差這一站」徛起身表示我去便所間，你去做金主納數。

Stuttgart 向時 ê 旅遊冊 kā 伊翻譯做司徒加，這久有人 kā 伊寫做斯圖加特，Wiki 百科 kā 伊寫做司徒加特，伊 ê 華文寫法到底是佗一个，順我向時 ê 世界觀我絕對 bueh 揣出一个標準答案，這久順 gún 翁分張德國 tuì 外來語 ê 想法「遐 ê 物件自本就 m̄ 是 gún-ê 呔討需要 kā 伊轉姓」kā 伊以原姓做記錄。

Stuttgart 機場是德國少數非軍事機場轉型做國際機場 ê 商業機場，伊 ê 航線無 Frankfurt 法蘭克福遐爾仔 ê 交易，不而過伊是人貧惰若我這類按臺灣飛來德國已經十外點鐘，無耐性接續盤 2 ~ 3 點鐘車幫到 Stuttgart 上好 ê 選擇。Gún 翁 ê 機場生涯 tī Covid-19 mā 大部份停跤 tī 遮，所致我 tuì 這个機場 ê 面目無算生疏，總是當 gún 落車順電扶梯慢慢仔加速向機場大廳行，向時交易 ê 越南餐廳、咖啡廳齊成做空間，向時無到人洘秫秫 mā 挨挨𤲍𤲍 ê 機場大廳，曠閣甲無現代設備 ē hōo 我掠做人 tī 蒙古大草原。

交 gún 翁順鏨 tī 神魂 ê 記持行向捙拚 buē 過疫情 ê 角勢，寬寬仔回想向時 ê 鬧熱，想著世間事正港是千防萬防，防 buē 過瘟神來相借問。

按智利來德國做航空公司櫃檯人員 ê M 這久 m̄ 知影敢猶 tī 德國，因為捙拚 buē 過疫情交翁相𫝛需要成做公司放棄員工政策之一 ê 德籍土耳其裔 ê 少年阿爸敢有接續伊心目中意愛 ê 航空工課，tsuē-tsuē 熟似 ê 形影 mā tshan-tshiūnn 這間向時是人插插插 ê 麥仔酒餐廳遮爾仔寂寞無見半人來探訪。

疫情四界生湠，人類 ê 遷徙猶原愛進行 hōo 固定 ê 無固定繼續伊 ê 無固定。Sixt 交 Eurocar 因為這場疫情 kā 本底兩塊 tha-thá-mih 大細 ê 空間轉做曠床大細，本底𫞼相片看板 ê 角勢換做實實在在 ê 車體展示。

向時提供旅客補充精神 ê 咖啡樓梯間 mā 轉做聯邦工業象徵 ê bèn-juh tī 接機大廳笑微微成做迎賓大使。

我順熟似 ê 樓梯行向翁 ê 工作區，見著向時罕得見人出入猶原徛挺挺 ê 精品店成做空間並貼字條招商，三伐做一伐見著陪伴我等待翁婿下班 ê 冊店猶原徛挺挺 m̄ 捌變化，hōo 我 tuì Covid-19 ê 惡霸不爽有較減寡。

M̄ 知影別人敢有這个慣勢，四常無愛食美國速食 tī 機場搪著伊，總愛 bué 一份來食 ê 慣勢？我有這个慣勢 tī 機場見著漢堡王抑是麥當勞 tī 人登機進前無去食𪜶 ê 漢堡總感覺舒魂欠一味。 

這斗陪翁探訪伊工課十外冬 ê 環境，鏨 tī 魂舒 ê 路線宛然田螺順舊路慢慢仔按漢堡王行向麥當勞閣按麥當勞行過漢堡王。

「大腸猶 teh 告小腸？」翁問。

「我 m̄ 知影」uī-tio̍h 確認我 ê 問題我繼續按四樓行，見著無見半人 ê 航空公司貴賓室關甲密喌喌，越頭看闊莽莽 ê 機場大廳，我揣著捎無摠 ê 枵。

「我 ê 枵是假--ê」我越頭 tuì 準備撏錢納數 ê 翁講。

麥當勞新添 ê 空間向時是挨挨陣陣 ê 旅行社辦公室，我這久見著麥當勞交漢堡王 ê 枵是向時 ê 慣勢 teh 挨拶。 

按這爿行過彼爿，停跤 tī 機場正中央，向頭看來來去去 ê 旅客，悲傷宛然海底地震引起 ê 海湧無聲無說絞過來，我 kā 翁 ê 手牽牢牢，起因 tī 這个時間你 m̄ 知影這斗 ê 攬抱敢是上押尾 ê 一斗，起因你知影你 ê 敵人是 tsiâ mā 清楚知影伊 tī 身軀邊，你卻無才調清清楚楚掌握伊 ê 來去。這款無確定比千算萬算，m̄ 值天一劃 hōo 人感覺更加無常。

我順彼對行到檢查站雙手猶原 m̄ 甘放 ê 情侶抑是翁某 ê 視線看向身軀邊 ê 人，我感謝天，感謝地，這斗 ê 無常我 ê 身軀邊猶有塗豆通擘殼來揣愛仁(愛人) 。