亂皂𥴊仔店 ⓂⒺⒾⓃⓀⒾⓄⓈⓀ

讀《庫德的勇氣》想著德文課 ê Iraq 伊拉克同學 mā 想著 Syrien 敍利亞佮 Türkiye 土耳其 ê Kurds 庫德族同學，紲落來交翁討論𪜶分張 ê 問題 hām 作者分張 ê 內容，然後以這句按話山話山話玲瓏學來 ê 句 tuì 翁講「這个族群想 bueh 改變千年 ê 問題，第一件代誌愛愖𪜶愛按怎一盤魚 kan-ta 一粒頭 ê 問題，這个問題無解決 m̄ 管𪜶按怎 kā 沙攪做堆猶是放尿攪沙 buē 做堆。」

「德國真早就發見這个問題，應當講是西方世界」翁應。

我無法度講一个詳細 ê 面肉，總是跟綴作者 ê 跤步行踏這个民族 ê 歷史閣翻頭愖這三搭 ê 庫德族同學，感受深甲若地球上深 ê 海溝，準做我 tuì 這个民族無一个認捌，按這三搭同學 ê 人生態度我看著一人一家代，公媽隨人祀僫行向美國抑是德國 ê 路途。

這是一个複雜 ê 問題就 hōo 伊交 hōo 庫德族人民家己去斟酌，踮遮我 kan-ta 想 bueh 跟綴作者 ê 跤步踅轉去記持 ê Naan --- 鹽、麵粉、水佮耐性 ê Naan，印度烘餅。

近來看 Die Tricks(應當是這个節目)談著德國 tuì 全麥麭 ê 規定 hōo 我想著勥母哭呻我做 ê 印度烘餅無健康隨斡頭看勥母心肝寶貝，勥母心肝寶貝 tī 我猶未成做六月蚶，開喙臭進前開始先檢討「我交𪜶齊是無米有舂臼，無囝抱新婦𠢕陷眠。」

每一个角勢有按環境定根 ê 喙斗，像翁是歐洲人伊慣勢食麭 tsuē 過食飯，𫝛款按亞洲來 ê 我慣勢食飯交米粉 tsuē 過麭。

自二戰到今，德國人 m̄ 管是好命底，王仔舍，本性是一日討海，三日曝網抑是一日食飽 m̄ 討趁 ê 貧惰骨攏有社會福利鬥相伨 hōo 𪜶本底猶算瘦抽 ê 體格 tshan-tshiūnn 火箭直直向天鑽 hōo 𪜶漸漸仔喪失賣茶講茶芳，賣花講花紅有喙講美國人肥朒肭，無喙檢討家己 mā 大肥 ê 恥笑。我家己 tī 減肥 sóo-tí 驚沃肥 tī 這三冬交翁愛食 ê 麭是 kiōng-bueh 田無溝，水無流 ê 喙白 hōo 翁沓沓仔 bueh 攑軍旗仔 tuì 我起義。

這回上北瑞典挪威車日子，因為高物價交天氣，特別是天氣 hōo 人 buē 節，好攢好敆生菜 ê 麭就成做 gún 上捷食 ê 糜飯。寢頭仔按呢食，心肝膽膽，押尾發見 kā 麭成做我慣勢 ê 糜飯 m̄ 是問題，有問題是 kā 麭款做若四秀仔來食糜飯，彼 tsiah 是大問題。

拄按臺灣徙岫來德國，見德國人 kā 麭做糜飯我 mā 跟綴，總是這款攑香綴拜 m̄ 捌愖平平 kā 麭款做糜飯 ê 法國人是按怎較瘦抽 ê 後果，就是我 mā 跟綴德國人若食若大肥，而且肥甲跤後蹬若有針 teh 揻揻鑽。彼陣 ê 我掠做跤穿 ê 鞋 buē 峇專工走去鞋店 bué 符合家己跤形鞏金 ê 鞋，押尾證明大肥無改善，鞏金 ê 鞋猶是無較縒。

這兩三冬 gún 遮 ê 全麥麵粉沓沓仔按有機商店湠到 Lidl, Aldi, Penny 遮 ê 平價超市 hōo 我翻頭繩德國醫師好辣、57健康同學會 ê 食食推薦，往過捷鼓勵德國人食五穀米糧 ê 醫生專家，這久敢若認捌著這點，遮是歐洲 m̄ 是亞洲，愛𪜶 ê 請教者較捷食糙米、番薯、塗肉林檎這類需要時間處理 ê 食物，這 tuì 時間就是錢 ê 德國人來講就敢若劉怡里營養師分張 ê 故事「病人攏 ē 直接講規氣莫食較緊」𪜶開始教育請教者有法度家己做麭，麵粉 ê 第一選擇 --- 全麥麵粉，無法度家己做麭 tī 超市、麭店 bué 麭，第一个選擇猶是全麥仔麭，紲落來菜蔬愛食到額，肉愛食原全 m̄ 通孤食 Há-muh 敆麭兼敆果子醬。德國有一个出名食食號做 Butterbrot，Butterbrot 本身無問題，有問題是 tsuē-tsuē 德國人 kā 伊當做主要營養來源，自早到晏 ê 糜飯 kan-ta 無別項。別人兜 ê 問題 m̄ 通閣喋，我 kan-ta 需要注心家己按怎按食德國麭健康過食米 ê 罩雺行出來。 

大自然正經是上𠢕畫圖 ê 𠢕人。

Pide 完成，金烏 mā 拄好 kā 鬚伸入來窗仔門，我想 bueh 徙位翕相，一想著遮爾仔 tsuē 碗盤，規仙人就生鉎(𤺪)，想 bueh 放棄翕相做記錄，一想著早前翕 ê 圖無合脾土，這回 m̄ 攝相後回再相見 m̄ 知何年何月。

金烏凡勢有聽著我 teh 燃滾水，伊隨成做人 tī 埃及拄著 ê 媠姑娘，一條烏紗巾伴若 Blaubeuren ê 雙目 hōo 我痴迷，相機捎 leh 隨翕相。

我是尊存別人文化 ê 人，埃及 ê 媠姑娘 ê 媠，我無捎相機 kā 翕，我 kan-ta 用雙目 kā 翕相。

因為 YouTube ê Shorts 我認捌著 My 6 Month Transformation Challenge，我無訂閱伊 ê 影片，總是逐家攏知影，準做無訂閱，只要𫝻過一擺影片，YouTube 就 kā 你算做影片 ê Fans，sóo-tí 下跤記錄 ê 文字是按我不足 ê 腦力搜著 ê Shorts。

食食部份，我無佮熱量計較，我知影這是上緊 mā 是上有應效 ê 方式，總是伊無適合我，起因每一个人有家己 ê 興趣，當興趣成做壓力想 bueh 做 ê 事項 buē 成功。

我佮意 mā 享受食物件，起因伊是敨放壓力上讚 ê 方式，這是我早前 ê 食食(全速食，無菜蔬)，這是我現此時 ê 食食(有菜，有肉，有米糧)。

巡菜股，翻田塗人又閣成做貓，好玄 Nutella tī 中文世界按怎講，畢竟自我認捌伊 kan-ta ē 曉這句連阿母 mā 知我 teh 講啥 ê「Nutella」mā 好玄公視台語台台語新辭庫敢有收這个辭。

Nutella Wikipedia kā 伊定名做『能多益』掛『是義大利廠商費列羅（Ferrero）生產的棕櫚油巧克力榛果醬』讀著這段紹介含 tī 喙內 ê  Lê-bóng 茶若洘旱 ê 山壁，拄著西北雨隨成做若瓊花 ê 水沖，我清楚知影這个態度有家己 ê 驕傲，我 kā 你會失禮。

我真罕 tuì 外人講 Nutella 這个名辭 sóo-tí 我 m̄ 知影當我講 Nutella 華語使用者 ē 按怎反應，總是我清楚知影第一斗佮阿母講 Nutella 我是按呢紹介「Nutella 是一種濫有西方塗豆仁 ê Tsioo-kòo-lé-tóo 醬。」

彼陣 ê 我 m̄ 知咱臺灣有種榛樹 mā m̄ 知德文 ê Haselnuss 英文 ê hazelnut 伊愛按怎講，唯一想 ē 著 ê 牽聯就是伊 mā ē-tàng 做油，塗豆仁是上簡單 ê 解釋。

巡菜股，翻田塗，成做貓，好玄 Nutella tī 中文世界按怎講了後，我又閣好玄按阿喬遐學著 ê 新智識，咱臺灣 mā 有『榛樹』佮『榛果』 ê『榛』tī 台語按怎講，請教教典，教典無收這个辭 m̄-koh 單字 tsin，後回轉去臺灣我知影愛按怎講佮阿喬講，彼欉號做 Tsin-kó，寫 Blog 正經是一件好代誌。

凡勢一个錢拍 24 結 mā 凡勢慣勢厝內攏按怎料理，sóo-tí 我 tuì 生鍋煎鼎 ê 興趣大過平鼎仔。

這斗 uī-tio̍h 魚 Kari kā 生鍋煎鼎讓 hōo 伊，kā Naan 徙來平鼎仔沓沓仔烘，那烘那想著早前捌過看 ê 討論，討論生鍋煎鼎合平鼎仔受熱佮傳(thuân)熱 ê 差別，越頭大聲 tuì 猶原倒 tī 眠床做皇帝 ê 翁喝「娶一个好某 hōo 你 ê 錢 m̄-nā 拍 24 个結」。

「啥物 14？」

「一跤生鍋煎鼎 hōo 你省去跟綴恁老爸 ê 跤步，投資恁兜勥母一年換 24 个鼎。」

印度烘餅正經猶是落生鍋煎鼎烘較媠，較有𩚨 té-té ê 滋味。

沓沓仔款上北 ê 物件，頭殼不知不覺踅去瑞典佮土耳其微妙(bí-miāu) ê 融合佮緊張，跤步 mā m̄ 知 tī 底時行向自剾板膋真久 m̄ 捌相借問 ê 麵粉。

250g ê 麵粉 ē-tàng 出 6 塊 Pide，一塊 68g/190g，差不多半碗外飯 ê 量.....

550、405，405、550....加 0.4€，減 0.4€，bué buaih bué...啊，人生哪 ē 遮複雜！！！

「揀食，無物通食你就知」序大無色無味無形 kā 𪜶 ê 提醒順空氣輕輕仔送到我 ê 耳空仔鬼。

無聊，曷 m̄ 是逐日若神蹛 tī 法國➀，準做無法度食甩走瘦 mā 愛享受掠肥食瘦。

「話是風，字是蹤」佮人加話看 tsiâ 較𠢕一粒田螺煮九碗湯，不如揣答案。

因為翹頭查某我揣著掠做 phàng-kìnn ê 相片，因為 Muse 無 bueh 來泡茶，這久 ê 我捎無菜頭摠通挽就巡菜股翻田塗。 

有 ê 菜股整甲媠噹噹，有 ê 菜股是稗(phuē)仔稻仔分 buē 清就據在𪜶生湠 --- 性命家己 ē 揣出路 tshan-tshiūnn 這菜股(麭.Brot.Bread)頂日仔 tsiah 整過，這久又閣踅翻頭整一擺，正經是食飽換枵，不過我愛我 ê 一尾蟲掠來尻川擽。

麭 tuì 我來講食無路，總是阿母有交代咱佮人牽手，咱愛入人門，順人意並尊存人 ê 一鄉一俗，sóo-tí 有一段時間我真骨力跟綴德國人食麭過日子，總是脾土這款物件就敢若離鄉，無離腔仝款，僫改。

豬屎籃仔 kā 提出來展一下 --- 進前做 ê 生鍋優格麭。

到今猶原 m̄ 捌行踏日不斜西，m̄ 捌去遐行跤花 ê 起因，我想應當是英鎊蓋貴。

總是，日不斜西猶原 ē 落山，現此時 ê 英鎊越來越細圓我原仔無出發是啥物因由？

窮實講我家己 mā 無啥清楚是按怎 ē 按呢生，總是我自囡仔時 tuì 𫝛款攏是講英語 ê 角勢就 kan-ta tuì 美國較有興趣，其他 ê 正經是鼻無佗一間厝有人放火 teh 燒。

是講，人生總有 hōo 你 buē 節 ê 意外，像 m̄ 捌 Malta(馬爾他) mā m̄ 捌認真研究英國文化 ê 我，人一行跤到 Malta 若 m̄ 是耳空猶閣利無重聽，我 ē kā Malta 準做是英國，是講，Malta 確實是英國 ê 楦闊，m̄ 管伊自本就情願抑是 m̄ 情願 tshan-tshiūnn 咱番薯島臺灣按呢，捷捷 hőng 當做是別人，總是 Malta 人若較成較愛家己，伊知影按怎順別人 ê 影湠家己 ê 實力，咱若較成 kan-ta 想 bueh 放捒家己隨成做心目中 ê 彼个人。 

我 m̄ 知影 Malta 真實 ê 狀況敢是按呢，總是我搪著 ê Malta 人準做 ē 曉講英語 mā 是 kā 伊當做是外來語，顧腹肚需要 ê 語言無 tshan-tshiūnn 咱 buē-su ē 曉講這个語言就加足有氣質按呢。

拜六就是愛腥臊佮豐沛。

#記錄寫踮 IG ê 文字

鱷梨仔檨仔俗麭

...... 材料 ......

翁捷捷講俗麭 m̄ 是麭。

總是我 ê 耳空 tsham 伊相𫝛，總是一耳空入，一耳空出。

起因，俗麭若 m̄ 是麭是按怎德語 bueh kā 號做 Toastbrot。

這个問題 gún 進前捷捷 teh 討論，這久 ê 我𤺪甲連動一个仔喙唇攏貧惰。

原因，我已經理解這件代誌隨人有隨人 ê 廣東目鏡，我 m̄ 免遐爾仔要意每一个賣麵 ê 人按怎看人撒(suah)油。

Nikolaus bueh（12.6） 行跤到，咱掛慮伊看著咱 ē kā 咱當做是半天鳥仔按呢可憐代，sóo-tí 咱決定 m̄ 管今仔日是 m̄ 是 拜六抑是禮拜咱攏愛繼續 kā 腹肚桶仔貯甲滇滇滇。

#記錄寫 tiàm IG ê 文字

弓蕉藍莓俗麭

...... 材料 ......

翁某做伙食早起頓，翁問「三十工結束，咱敢 ē-sái 閣來一擺這个挑戰？」

「按怎講？」我問。

「因為逐工攏有好食物」伊講。

「你意思是進前攏無好食物？」我問。

「M̄ 是--lah，因為這个挑戰 hōo 我發見家己一直蓋幸福，逐日攏有好食物，而且是媠某家己親手做--ê」伊講。

前幾日步頻發見現此時 ê 家己拍寫臺語 buē 閣 kan-ta 怙一項倉頡(Tshong-khiat)來拍寫台文，就隨放遐 ê 講「buē 曉羅馬字 ē 讀無台文 ma 掠無七聲八調」ê 壓力。

起因，學費撥落我 tuì 七聲八調猶原是菜頭捎無摠 m̄-koh 我有法度讀漢字 mā 有法度寫羅馬字，雖罔 m̄ 是百分之百，總是看寫踮遮 ê 文字無啥注記羅馬字就知影，漢字佮羅馬字 tuì 我來講 m̄ 是問題。

雖罔，我原仔 buē 曉標聲調 mā 走音。總是我講 ê 音敢誠實 m̄ 著，這無一个確定。

認捌這件代誌規个人輕蠓蠓甲連蠓仔攏比我較大隻，起因注音符號 tuì 我來講 mā 是鴨仔聽雷分 buē 清四聲按怎標，huînn-ti̍t 寫久伊 ē 家己倚過來。

接受家己 ê 問題，hőng 講咱 buē 曉呼七聲八調時，我 mā buē 閣有啥物特別 ê 情緒。

Tī 鄭順聰先生 ê 面冊讀著伊將華文「人和刺蝟是無法溝通的」轉譯做五組台文句 hōo  逐家做選擇。

我個人是選B「人和針鼠袂參詳得」。

一个若是連「參詳」攏無法得接受，伊應該是意神 tī 半暝看天 ê 聬儱䆀猴，致到佮伊參詳 ē tshan-tshiūnn 請老人食紅蟳仝款白請(白講)。

真佮意這段話就紲手將伊翻譯做德文佮英文。

德文

「料理無困難，因為你 ê 腹肚 ē kā 你講伊 ê 感想。」

這是按德國西南廣播電台 SWR3 讀著 ê 一段話，真佮意寫落來做記錄。

翁下願伊 bueh 食西班牙 Tortillas，我理解做伊 bueh 食墨西哥 Tortillas，竹篙鬥菜刀 ê 結果是兩个人攏揣著家己 ê 滋味。

雖罔，寢頭仔聽翁踅念我決定是刁意故 kā 伊聽做墨西哥版本起淡薄仔清瘼，不過，我清楚知影我 m̄ 是，sóo-tí m̄ 免 tsham 伊 ti 遐花這件代，我 kan-na 需要分張這件代「我 ê 西語若是遐爾仔勥，而且是勥甲 聽 ē 出腔口差，你敢著需要忍受情緒叨撚來成做翻譯，畢竟踮德國無啥物代誌是無料。」

伊聽我按呢講隨恬恬，無繼續剾烏枋 hōo 我慼。

收著光批請教我敢有意願接受訪問 mā 請我寫問卷。

四常 ê 我讀著光批抑是訊息 buē-su 火 bueh 燒到尻川遐爾仔趕 bueh 揣水來 kā 沃水 --- 隨讀隨回。

總是這斗狀況無相𫝛，這斗 m̄ 是四常五四三 ê 破豆，這斗是關係著 牛 m̄ 通𠢕行，人 m̄ 通出名 ê 大事件，特別是我這款歹戲鑼鼓濟，歹人家私濟 ê 人。

我知影有 ê 人準做家己 kan-ta 有豬屎籃仔 mā bueh 提出來品並，總是我較柝仔頭我無愛家己 ê 膨風水雞 hőng 刣無肉閣擲去大礐，這愛認真 kā 愖一睏...總是我是暗頭仔食西瓜，暝尾仔反症，食一喙茶隨有決定無米留人客，無食假拍呃 --- bueh 來捾豬屎籃仔 ka̋ng 品並。

Kā 我 ê 決定講 hōo 翁聽，翁隨講「我就講你是十肥九呆，無呆狀元才其中彼个無呆。」

我愛食俗麭，翁看俗麭就敢若咱番薯島人 tuì 家己 ê 語言遐爾仔看 buē 上目閣刺疫。

早前，我認為凡勢是遮 ê 麭 tsuē 甲 hōo 伊 tuì 俗麭無興趣，尾來我發現我 kā 問題想甲傷過簡單閣樂觀。

伊無愛食俗麭 ê 理由真簡單，就是我頂頭寫 ê 句，準做伊講伊無按呢想，事實就是按呢。

「恁爸母 ê 德語較老抑是我？」一回 gún 翁又閣 teh 講「Gún 爸母 m̄ 是輕視....」跳過 m̄ 免閣餾，我直接 kā 𪜶爸母對待2樓序大挨拶 ê 態度搬 hōo 伊看，伊隨恬去。

大狗盤牆細狗趁樣，輕視者永遠 buē 承認家己看人 buē 上目 ê 月光下看人影

(2021.10.10 Ein Geschenk für unseren Nachbarn aus Rumänien)

2021.10.10

我是有福氣 ê 人 tsiah 通收著遮爾仔 tsuē ê 等路。

頂日做歹 ê 麭，今仔日完成。

今仔日是我第一回參加線頂交流會，寢開始真緊張。

因為，m̄ 知影 bueh 按怎關鏡頭佮 mái-kuah 緊叫無細膩行入鏡頭隨傱去洗頭鬃 ê 翁 kā 我處理。

不而過...hó-lí-ka-tsái，會議主持人有發現我 ê 頇顢隨 kā 我 ê mái-kuah 禁掉，真正感謝𪜶。

不過，押尾猶是請 gún 翁 kā 我關這爿 ê 鏡頭，畢竟我小面神歹勢出頭。

線頂交流會結束，我開始踅這个問題，咱若較成慣勢提一个角度來愖問題，tshan-tshiūnn 我並 m̄ 是刁意故 bueh 講臺語掠外 ê 語言，sòo-pái 無關 mái-kuah 抑是鏡頭，另外交流會 m̄ 是應當是交流呔 ē 蓋成學歷比並佮排斥任何 ê 可能性，tshan-tshiūnn 欠辭別人提供家己 ê 想去，主持者認為無適合隨刣掉閣加建議...