歐洲上闊 ê 水沖 tī Kuldīga tī 西元進前就有人類 ê 跤跡。
1230 教皇 Baldwin von Alna 交當地頭人簽訂合約，Kuldīga 居民按自身信仰轉做基督信仰，合約簽訂後頭人 ê 領土 mā 按自身 ê 範圍楦閣到其他地區。
德國人捌 tī 遮 ê 記持
1242 利沃夫條頓騎士團行跤到 tī 領土戰爭取得勝利，隨起造軍事堡寨耶蘇堡(Jesusburg)後來號做哥丁根堡(Goldingen)➀。
Goldingen 堡 tī 1355 提著城市權，1368 成做斯當時歐洲上大 ê 國際貿貿組織成員 Hansestadt。
➀ 這座堡塞 tī 1801 已經成做透底 ê 斷籬倒壁
Kuldīga mā 是跟綴歷史塗牛翻身成做無仝生張 ê 國家之一 Kurland 庫爾蘭公國，伊 mâ 捌成做庫爾蘭公園短期 ê 首府。
2023 伊 ê 舊城區成做聯合國文化遺產。
自 1561 伊 mā 是波蘭王國庫爾蘭公國 Gotthard Kettler 大公 ê 徛家。
Gotthard Kettler 大公轉去塗州賣鴨卵了後，伊後繼承者 Jakob Kettler kā 伊按農業社會轉型到工業社會，像造船廠、麥仔酒廠等齊成立，遮 ê 變化 hōo 當地經濟按烏色轉做金色。
餐廳
市場交易 ê 金色猶原捙拚 buē 過戰爭交瘟疫，金色 ê Kuldīga 行過波蘭瑞典戰爭、大北方戰爭、著災繁華一切齊行入歷史 ê 流沙。
1721 尼斯塔德和平協議(Frieden von Nystad )簽定，庫爾蘭公國猶原是一个主權獨立 ê 國家，tī 這段期間 Kuldīga 成做管風琴製造中心。
舊城區
列強第三斗分割波蘭，庫爾蘭公國失去伊 ê 主權，伊成做露西亞領土 ê 一部份，Kuldīga 成做波羅的海三省庫爾蘭地區 ê 首府。
麭店
19 世紀因為番仔火枝 hōo 伊 ê 經濟市草再次鹹魚翻身，歐戰結束 Kuldīga 成做獨立 ê 拉脫維亞一部份。
市定古蹟
1939 Kuldīga ê 德國人口佔規个城市 ê 13%，1940 蘇聯紅軍侵入拉脫維亞，這座城市 ê 人口 mā 跟綴改變。
膨紗店
蘇聯期間 Kuldīga 是重要 ê 紡織、紅毛塗、柴箍供應地。
市政府
Kuldīga ê 舊街區大多數是柴枋起 ê 厝，歷史上久長 ê 柴枋厝是倚市政府附近 ê 厝宅，起造時間是 1670 年。
花店
這个歷來(li̍k-lâi) hōo 詩人佮畫家褒唆 ê 城市，一開始就是設定社頭趁墟 ê 所在。這个傳統設定到今 mā 猶原保存。
Ka-pi 店
人講人類 ê 歷史是彼个人這个去，這个搶彼个 buaih，行踏波羅的海三國，特別 tī 拉脫維亞我有一種敢若踅轉來台灣 ê 感受，有一陣人無認同拉脫維亞 m̄-koh 𪜶又閣 m̄ 願意翻頭轉去家己心心念念 ê 所在，這个感受 tī 第一斗行踏立陶宛交拉脫維亞首都感受無大，這斗勻勻仔上波蘭上北車日子，我紮紮櫼櫼感受波蘭 Suwałki 露營地主人家分張 ê 拉脫維亞哽 tī 嚨喉 ê 魚刺 mā 感受拉脫維亞人想 bueh kā 失去 ê 歷史，利沃夫條頓騎士團 ê 光輝揣轉來，總是徛家 hőng 佔領百外冬，台灣人 ê 語言文化無到一甲就收水甲賰個位數，hōo 露西亞扞權 ê 百外冬 ê 拉脫維亞敢有法度 kā 失去 ê 記持揣轉來？我一直想，一直想，想無一个答案通研究。
𨑨迌物仔店佮粿路店
一直到探訪 Kuldīga，見著交西歐 kiōng-bueh 無宛 2 體 ê 社群推廣，像拉脫維亞 ê 威尼斯，我想著阿愷之聲EP84 講鹿港說鹿港，鹿港說不盡：維也納的鹿港，鹿港的維也納 PART2 歐洲城市觀察，人失去 ê 自信心敢愛按別人兜揣轉來？
Latvijas ê Venezia(威尼斯)
往過聽人分張「這是咱台灣 ê 小瑞士」我感覺這是咱 tuì 家己文化環境 ê 褒唆，這久感覺彼是 tuì 家己鄉土 m̄ 捌一箍呼無靈魂 ê 妝娗。
拉脫維亞人敢有咱台灣人這款 ê 症頭？這逝上北交落南，我感覺拉脫維亞有，起因波羅的海三國照理講，拉脫維亞是利沃夫 ê 歷史要地，總是我感受 buē 著利沃夫 ê 特色，m̄-koh 外國氣味。
BALTIC TEACHERS' SEMINARY(波羅的海神學研究院)
本底掠做這是市政廳，順無鎖 ê 大門行入去練跤花 tsiah 理解伊是起造 tī 1878 年 ê 神學研究院，目今是教師會館交技術學院。
雙心天鵝佮神學研究有啥底代？
這搭按 1989 轉做技術學院 ê 前神學院有 tsuē-tsuē 木工雕刻，園內 ê 木工雕刻是短期展覽抑是長期展覽，無說明，不過見著 The Simpsons ê Bart 自在成做藝術品，我笑 tuì 翁講，拉脫維亞 ê 木雕藝術較好理解，一看就知影𪜶 bueh 表達啥物，我佮意。
露西亞東正教堂
我 tuì 教堂式樣無研究，不過我真𠢕看一个影生一个囝，因為利沃夫條頓騎士團捌 tī 遮，我隨講這是條頓騎士團起造 ê 教堂，有才調保存到今真厲害。
囡仔時因為捎無家己是天主教抑是路德教派 hōo 宗教課老師趕出去 ê gún 翁 mā 捎無，當 gún 你一句我一句討論伊是佗一式教堂，一位少年查某囡仔行倚講這是露西亞東正教堂，mā 請 gún 跟綴伊 ê 手攑看十字架。這个分張成做我日後認捌露西亞東正教堂 ê 老師。
這間教堂 ê 歷史交神學院相𫝛，只不過教堂有較特別寡，伊是請 Sankt-Peterburg ê 設計師來遮起造 ê 教堂。
Lativjias ê 波羅的海
低路人 tuì 波羅的海 ê 認捌 kan-ta 學生時代 ê「波羅的海三小國」賰 ê 齊 m̄ 捌一箍呼，這斗車日子露營那行尞那請教網路資料 tsiah 知影波羅的海是全世界鹹度上低 ê 海，隨啖一喙，正港 buē 死鹹 m̄-koh 足冰--ê。我 mā 因為這个發見漸漸仔理解呔討鹹 tī 遮是框金閣包銀，貴甲驚倒人。
Latvijas 東海海岸露營區
遮 ê 環境優美，露營價數包水包電 kan-ta 20€ 迷人甲 hōo gún 翁問我敢有按算踮遮停跤，東海 ê 風交北海 ê 有地捙拚，我交𪜶無地捙拚隨講「Buaih」，這久 ê 立秋猶未行跤到溫度已經行到若小雪(siáu-suat)，燒烙角勢交優美環境，我選擇燒烙。
確定放棄拉脫維亞首都里加(Rīga) ê gún，後一站 mā 是向時 ê Hansestadt 交蘇聯年閣重要 ê 海港 Ventspils 文次匹爾斯。
Ventspils ê 睏甲 m̄ 知狗
文次匹爾斯是 Ventspils 文塔河(Venta)入東海 ê 港喙，拉脫維亞第六城，向時 ê 利沃夫騎士團 ê 要地。城市名稱 tī 1253 以 Sagare 出現 tī 北庫爾蘭文件。
1290 利沃夫騎士團 kā 伊號做 Windau，1378 成做斯當時歐洲上大 ê 貿易組織城市 Hansestadt。
目今探訪 Ventspils ê 遊客多數 m̄ 是 uī-tio̍h 理解向時 ê 貿易組織，至少 gún 翁交路裡搪著 ê 德國朋友齊是 uī-tio̍h 好奇心，好奇向時 ê 露西亞軍港生做啥物生張。
Ventspils ê 造船技術 tī 露西亞猶未來遮生湠進前已經真發達，1642 庫爾蘭公爵 Jakob Kettlers 已經踮遮設立造船中心。 44 隻戰船，79 隻商船，一隻殖民艦隊駛向非洲甘比亞托巴哥島(1654 ~ 1659)。Tī 這段期間金屬、瑪瑙、柴 uī Ventspils 帶來交易 ê 城市市草。
現代傳統市場
1700 ~ 1721 ê 大北方戰爭規个城市按光映映行入烏暗 ê 落坐。1795 ê 分割波蘭 Ventspils 按獨立門戶行入人民公社 ê 城市，成做露西亞 ê 一部份。因為戰爭交瘟疫滯到(tù-tàu) ê 船業交海上貿易 tī 1850 重新發展，1890 連結莫斯科 ê 鐵路 mā 完成，一戰進前伊是露西亞上趁錢 ê 海港。
敢若阿媽年間有厝瓦 ê 第三市場
一戰期間 tsuē-tsuē 當地人 hőng 強逼家甲遷徙到露西亞，戰爭期間德國佔領過這个所在，1919 拉脫維亞按列強戰爭爭取獨立成功➀。
1939.10.05 Ventspils 因為德蘇互不侵犯條約簽訂，蘇聯以「保護」拉脫維亞 ê 海岸，大大典典登港保護拉脫維亞，𫝛月 tī 遮設立軍事基地。
➀ 1919.6月拉脫維亞佮愛沙尼亞仝心和齊 tī Cēsis kā 比𪜶強盛 ê 德國軍隊送轉去德國取得獨立權。
起甲媠媠，m̄-koh 無幾个擔 tī 排 ê 市場
1941 ~ 1945 換德國以「保護」名義登入 Ventspils，tī 這段期間 Ventspils 人又閣經歷一斗家甲大遷徙，遷徙到天堂，特別是有猶太血統 ê 居民。
二戰結束，蘇聯踮遮牽油線，Ventspils 成做蘇聯石油出口重要 ê 海港之一。因為油線，Ventspils 成做拉脫維亞收作上懸 ê 城市。因為 buē 堅凍 ê 海港 hōo 伊 mā 成做露西亞出口塗炭上重要 ê 海港之一。
我一直掠做愛沙尼亞 ê Narva 維瓦爾已經誠露西亞氣味，料想 buē 到 Ventspils 比 Narva 閣較露西亞氣味，規个城市 ê 沈重 buē 使得算 hōo 天氣，簡單一句敢若行踏露西亞文學 ê 氣氛，準做露西亞文學我認捌無幾本，總是這座城市自 gún 第一工停跤，我下性命想 bueh kā 莫名奇妙 ê 沈重気持ち捒 hōo 天氣，m̄ 管我按怎捒就是捒 buē 開跤到 gún 按這个城市離開，準做搪著大雨我 ê 心情猶原快樂甲若 Waling in the rain。
Lutherische Nikolauskirche/路德派教堂
波羅的海三國 ê 人口 hōo 露西亞大遷徙 m̄ 是 kan-ta Ventspils，總是探訪交伊有相𫝛運命 ê 愛沙尼亞 Elva 埃爾瓦，伊 ê 天氣是正港殕色無金烏 m̄ 是 uī-tio̍h 巧手機攝影色緻走精所妝娗 ê 殕色，交 gún 翁 tī Elva 行尞 ê 時間 gún m̄ 捌感覺心肝穎硩一粒石頭真僫喘氣，搪著 ê 露西亞人準做 m̄ 講露西亞語掠外 ê 語言，𪜶猶是熱情好禮甲 hōo gún buē 慣勢。
Ventspils 是跤踏拉脫維亞心踮露西亞，這是頇顢表達感想 ê 我唯一有法度 ê 形容，當然這是我個人感受無表示事實就是按呢生。
「立陶宛交愛沙尼亞 ê 露西亞問題較少，拉脫維亞彼就頭疼，恁愛較細膩」出發立陶宛進前 Suwałki 蘇瓦烏基露營地主人家閣一斗分張伊 tuì 波羅的海三國 ê 感想，彼陣我認為伊有露西亞症，畢竟我 tuì 拉脫維亞首都里加(Rīga)有好印象，搪著 ê 露西亞人 mā 客客氣氣，準做雞仔鴨仔講 buē 通。
這斗順首都路線探訪首都以外 ê 拉脫維亞，搪著 ê 露西亞人確實無首都搪著 ê 好鬥陣，總是按停跤 ê 人家厝 kā 拉脫維亞國旗用刀仔劌(kuì)甲花貓貓，蘇瓦烏基露營地主人家分張 ê 拉脫維亞露西亞問題雄雄轉做清楚 ê 畫面，行到市場見著齊是拉脫維亞文 ê 冊，聽市場露西亞語彼聲起彼聲落，我又閣想著第一斗行踏里加(Rīga)人家厝學習法律 ê 少年家分張 ê 一段話「Gún 拉脫維亞政府需要跟綴愛沙尼亞政府 ê 語言要求，按呢人 tī 遮，心 tī 露西亞 ê 人 m̄-tsiah 有才調融入拉脫維亞。」
「遮 ê 冊看起來誠新，閣齊無露西亞語，我想合該然交拉脫維亞 mā tuì 露西亞人實施語言認證 ê 關係」我想著人家厝 ê 囡仔發現 gún 聽無露西亞語轉拉脫維亞語，倚窗仔邊看電視 ê 老爸聽囡仔講拉脫維亞語隨大聲喝咻，囡仔隨離開 ê 畫面，遮是露西亞市場，規个書櫥齊是拉脫維亞文無半本露西亞文，我想著這句俗語「食人飯，犯人問」交「一人一家代，公媽隨人祀」，囡仔 ê 露西亞情緒感 ē 延續，我 m̄ 知機，總是我相信願意講拉脫維亞語 ê 囡仔交老爸已經行向無仝路途。
看遮 ê 文字看遮 ê 價數，我敢若 mā 看著露西亞人準做 m̄ 認同這塊土地原仔需要面對 ê 現實。另外，遮 ê 塗肉林檎呔 ē 遮爾仔大碗閣碗墘。正經無白賊 tī 立陶宛扞 ê Maxima 超市搪著一公斤帶塗 0.39€ ê 塗肉林檎已經 hōo 我笑甲無看目睭仁，遮 ê 塗肉林檎 m̄-nā 媠閣齊平大粒兼洗甲清氣啖啖一公斤 0.5€ hōo 我險險 buē 記持，gún tī 露營車日子 m̄ 是踮厝。
Liepāja 露西亞東正教堂
Liepāja 利耶帕亞是拉脫維亞第三大城 mā 是 gún 按算停跤 ê 城市，總是春天囡仔面，我 mā 是。當 gún 翁沓沓仔順地圖揣露營地，我 mā 順當地 ê 氣氛 tuì gún 翁講「我鼻無利沃夫條頓騎士團 ê 氣味 mā 揣無德國踮遮 ê 記持，露西亞文學氣氛 tī Ventspils 食甲哽胿矣，咱會使得直接轉去立陶宛停跤歇暝。」16 世紀有 tsuē-tsuē 德國人移民到遮。
「我 mā 按呢感覺，m̄-koh 離開前我想 bueh 看一下仔觀光碼頭」翁講。
巧手機仔地圖重新設計 gún 順巧手機仔揣觀光碼頭，見著這座金光閃閃 ê 露西亞東正教堂隨斡入去探訪。教堂 tī 大型社區內底，倚大通路 ê 公寓面肉無講新 m̄-koh buē hőng 感覺若貧民窟，順齊舖石磚 ê 車路斡入去教堂，gún 開始想著德國公共電視台放送 ê 北韓觀光，庄跤美麗 ê 厝宅 kan-ta 彼塊枋 ê 畫面。教堂附近 ê 厝宅 m̄ 是一塊枋，m̄-koh 伊 hōo 我想著菲律賓外地工作者聚集 ê 厝宅。
「你愛 kā 我翕 ê 相片囥去你 ê Blog」gún 假扮 uī-tio̍h 手機仔信號需要 kā 巧手機仔攑懸懸 ê 模樣拚勢攝影，我正越倒越看金光閃閃瑞氣千條 ê 教堂交若大姊講 ê 囡仔時，衫仔褲愛補甲無法度補為止 ê 公寓，我 m̄ 知影當地人敢捌咱這句俗語「先顧腹肚 tsiah 顧佛祖」，我 m̄ 知影當地人敢捌這句俗語，總是我清楚知影我 buē kā gún 翁所攝影 ê 光景囥踮遮。
離開拋荒 ê 觀光碼頭，bueh 送 hōo 厝邊 ê 拉脫維亞麥仔酒 bué 款好，連斡頭 tuì 這搭本底按算停跤 ê 城市 Say Goodbye ê 氣力齊儉起來，直透向交遮無到一點鐘車程 ê Lietuvos 出發。
睏天路車日子 Camping mit Caddy (21)