亂皂𥴊仔店 ⓂⒺⒾⓃⓀⒾⓄⓈⓀ

透早讀著 Ende der Katzbuckelei，頭殼第一个閃過 ê 辭意思是「蕭規曹不隨」，繼續愖台語....白旗仔隨攑出來，投降。

巧手機仔請出來「蕭規曹不隨台語怎麼說」揤落去，豬母牽去牛墟無一个著，隨在伊，有著來，無著汰，有著食，無著煞，鉛粉掖有夠額伊隨來。

鍋仔捎出來，隔一堵壁請教翁「早起頓食米 bueh 無，若 buaih 咱會使得隨人付米，隨人付鼎，遮是咱兜 m̄ 是恁兜」話一講煞隨感覺「隨人落米，隨人付鼎」有峇緊寫落來。

Katz 是阿貓，buckelei 是按 das Buckel 來，das Buckel 就是錦痀，添 ei 兩字成做認真工作，認真工課 ê 阿貓 hōo 我想著土耳其通人知 ê 阿貓故事，土耳其 tī 中世紀有法度閃避烏死病就是阿貓認真工課 ê 結果。

德國新上任 ê 外交部長講伊 buaih 飼阿梅飼 bueh 20 冬 ê 貓，這个決心敢有法度實實櫼櫼實踐？

Die Loreley 

羅麗萊

Ich weiß nicht, was soll es bedeuten,

M̄ 知是啥物款 ê 因由，

Daß ich so traurig bin;

頂幾日佮翁冇談面冊股價大落，凡勢有一日伊 ē 成做一陣風飛到別 ê 世界。

今仔日 2022,02.13 早起頓一款好勢照順慣勢先 kā 手機仔拜候一下，tī Google 大神猶未放送新信息進前，gún 翁 kā 我安 ê Operas News APP 已經放送面冊新玉音，𪜶 buē 離開德國抑是歐盟。

昨日 ê 放刁猶原燒唿唿，一暝睏醒呔隨《零下六十八度》....管待恁歐盟公民 bueh 使用抑是 buiah 使用 gún 面冊「啊，只要你繼續使用 gún 財團任何一項商品就好.....」

面冊恐喝德國𪜶 bueh 離開應當講是歐盟，我無研究呔討面冊 kan-ta 針對德國，總是自伊唱聲，德國 ê 厝邊隔壁像法國 mā 隨跟綴伊開喙「面冊，gún 法國 mā 歡迎你按 gún 遮出帆。」

面冊 tuì 德國唱聲所發 ê 水泱 hōo 我想著《驚驚袂著等》ê〈番薯遮爾無人緣〉，總是人番薯是「可能逐家攏想起伊艱苦時代食物的身份，無想欲和伊有牽連啦。」面冊是〈我有共你 Line〉ê m̄ 是逐人攏愛交人設 Line 群組，至少我就 m̄ 是。我佮意舊漚舊臭 ê 挨拶交有生份 ê 落䈄(làu-ham)交情。

「Beleidigte Leberwurst」一句德國人家己 kiōng-bueh buē 記得 ê 話重出江湖，這決定愛寫落來提醒家己 m̄ 管言論有偌爾仔自由，剾洗別人抑是威脅別人 ê 話齊 buē 使得大大典典 kā 伊成做言論自由 mā 提醒家己智識是引𤆬咱楦闊心眼界 ê 工具 m̄ 是展示驕傲 ê 字捌深，人帶屎。

烏克蘭大使 uī-tio̍h 德國若龜 ê 奧援講德國總理是肝煙腸 hōo 我想著教育部臺灣台語常用辭典 ê 造句：彼个囡仔磕 buē 著就挐頭使性地，實在足 m̄ 是款。

我知影按呢形容烏克蘭大使誠無客氣，總是向望得著奧援 ê 人是烏克蘭 m̄ 是德國，而且德國總理 mā 無六月棉被，揀人蓋 ê 特殊像匈牙利一屑仔攏無要意烏克蘭 ê 需求。

牽過頭，總是成做一個 tī 德國 ê 外國人聽烏克蘭大使按呢講，確實 mā 感覺誠無妥當，準做伊 ê 德文老甲若德國人。

Beleidigte Leberwurst 照字面來講是 hőng 觸意 ê 肝煙腸。