亂皂𥴊仔店 ⓂⒺⒾⓃⓀⒾⓄⓈⓀ

自露西亞 kā 烏克蘭侵門踏戶，四季是若行灶跤 ê 洋刺波交藍莓 mā 沓沓仔跟綴這場戰爭行出灶跤，跟綴這場戰爭行出 gún 兜灶跤 ê 食物，窮實 m̄ 是洋刺波一味，猶有別味。

只不過，遮 ê 因為戰爭流浪到他鄉 ê 食物無一味 tshan-tshiūnn 洋刺波流浪到今 m̄ 捌轉來故里。

M̀，有偌久 m̄ 捌食過。

近來 tī Lidl 總算 hōo 我搪著一公斤減 6€ ê 洋刺波，隨捾兩盒轉來厝做甜路補喙空 mā 那聽候烏陰有一日按早起頓離開 hōo 我完成翻新 Blog ê 設定，總是大自然 m̄ 是咱人類，伊 hōo 咱 buē 節 buē 要求 buē 設定，按呢我 bueh 按怎做 tsiah 好？

暫時捎無寮仔門，先來舊文薅草先。

#記錄家己寫 tī Instagram ê 文章

早前 ê 相片看 leh 礙目重來一斗，想著 Phil Collins 接受西南電視台 ê 訪問隨笑出來「Wenn die Leute meinen Kleidungsstil kritisieren, sage ich einfach: WAS WOLLT IHR DENN? ICH HABE DIE EINE JEANS AUSGEZOGEN UND DIE ANDERE AN!」➀相攝煞，我 tuì 伊講，我無「Seinen Senf dazu geben」➁(總是我有「Übung macht den Meister」➂ hōo 家己 ê 寧靜日 m̄-nā「Das Auge isst mit」➃閣聽翁褒唆「Das ist zum reinsetzen」➄ 。

➀ 搪著別人 teh 剾洗我 ê 穿插，我 kan-na ē 按呢應，抑無你 bueh 按怎，我已經按這條牛仔褲換到彼條牛仔褲。

➁ 提別人 ê 芥辣醬 hōo 你食(發表個人意見)

➂ 捷講喙會順，捷做手 buē 鈍

十二月食菜頭，六月 tsiah 轉嗽窮實 mā buē 䆀，至少有掠著病灶。

自開始黜膩瓤油到今，寫 tsuē-tsuē 食譜 mā 掠定我決定 ē 逐篇攏刊出來。

讀著這句我笑甲歪腰。

「老實說因為我朋友很少，觸及率很低，但我更懷疑直接分享影片的流量會更加低，所以還是自己來打一篇。」

Tī 我猶原猶未參加社團進前，我 ê 面冊世界真簡單 kan-ta 幾个家己 uì 高職熟似到今 ê 朋友。

起因面冊是 gún 遮 ê 四散 tī 無仝地區 ê 人上蓋利便 ê 聯絡方式。

總是利便 mā 𤆬來 tsuē-tsuē 齷齪火，tshan-tshiūnn 時不時著愛搜揣理由來挨推 tsham 咱連一塊肉攏 m̄ 捌做伙烘過 ê 朋友 ê 朋友 ê 邀請。

天 uī-tio̍h 金烏佮月娘 ê 相逢沓沓仔點胭脂捊水粉 。

Gún 坐踮露台綴ラジオ ê 歌聲看一划做五划 ê 金烏沓沓仔划，看三步做一步緊緊仔走 ê 月娘 tī 柑透金 ê 軟晡遠遠仔相見。

Gún 講大暑，食王梨➀ mā 講小暑驚東風，大暑驚紅霞➁。

過幾日仔風颱 bueh 來矣，我那刣頂幾日仔阿羅分張 ê 鳳梨那講。

翁 tshan-tshiūnn 纏綴太陽餅 tī 踅 ê 鳥鼠，太陽餅賣到佗，伊就食到佗講「gún 遮講雨水若落無夠，大水風颱捲螺仔風連鞭到。」

文學是啥物？

M̄ 捌字智識低路 ê 我 m̄ 知。

M̄-koh，我知影當你攑著權勢 ê 拐仔，m̄ 管你講寡 lua̋-nī 無營養，伊猶原是上有營養 ê 物件。

我無向望家己是文學家 mā 無向望「文字」ē-tàng 𤆬 hōo 我名佮利，sóo-tí 拚勢寫。

我寫字 kan-na 因為伊是我 ê 興趣，tshan-tshiūnn 有 ê 人愛成做放送頭開喙按呢簡單。

#記錄寫 tī IG ê 文字

塗內佮塗肉林檎正當時。

Buē 曉法語 ti 法國點菜，有一斗看著 ＂Pomme ＂ 掠做是我 bueh 食 ê 物隨 kā 點落去。物件送來我規个人黑人問號，是按怎 ē 是甜路，想 bueh 請教餐廳一想著家己 ê 法語 kan-na ē 曉𠢕早/Bonjour，你好/Salut，多謝/Merci beaucoup... 就隨放棄請教，mā 清楚知影請教 mā 是白了工 ê 揣火來燒烙家己，sóo-tí m̄ 免無枷夯交椅。

按法國轉來到德國隨 kā 翁講這件代誌敨鬱卒。

「你知影遐是法國 m̄ 是德國，你 mā 知影 gún 攏按仝一个系統學習書寫，著 m̄」伊那講那笑甲目汁拭 buē 離 hōo 我隨知這決定有貓膩。

#記錄寫 tī IG ê 文字

世界大甲你永遠 m̄ 知影你 ē 搪著啥物有意思 ê 代誌。

鱷梨仔敆番薯佮挽肉是久年前，西語猶未 kā 伊放捒 hōo 伊綴風飛按 Colombia 朋友遐學來 ê 好滋味。

洋刺波弓蕉優格

#記錄寫 tī IG ê 文字

見若料理咖哩蘑菇攏 ē 想著 tī Bad Cannstatt 印度餐廳印度太太 ê 笑容「Gún 翁印度人伊 mā 無食薟」。世事 m̄ 是 kan-na 一款生張，gún 攏學著尊重別人 ê 死板免掛意，因為雞是討食焦，鴨是討食澹按呢簡單。

弓蕉王梨優格

...... 材料 ......

# 記錄寫 tī IG ê 文字

隨人有家己 ê 喙斗。

Tī Slovenská 料理雞豆一个5歲 ê 囡仔走過來講「我愛食雞豆」過無一睏仔哥哥來講 gún ma-ma 捷捷煮雞豆足好食，過無偌久 ma-ma 來破豆，這个畫面 hōo 我記牢牢，起因 tī 這个甘願佮手機仔盤撋 mā buaih 佮人接接 ê 年間這款交流誠實是提金仔來換攏無應效 ê 無價之寶。

鱷梨仔藍莓 Topfen

# 記錄寫 tī IG ê 文字

𪜶是敵人，m̄-koh 我猶原愛敵人

聽著翁用台語 ê 「Die」來造我 tuì 伊喙白不滿 ê 副本，除了笑甲軟骨 mā 甜粅粅。

弓蕉 Topfen

踅這間店我並 m̄ 知影𪜶是專門收人過往囝孫無 bueh 挃𪜶寶貝 ê 店。

起因，德國有呔 tsuē 這款物仔看起來攏齊新 m̄-koh 已經是2手貨 ê 店。

一日翁綴我聽 SWR1 ê Podcast 講著現此時 ê 衫店，因為半年就愛出一批新衫致到頂一批貨底猶有 tsuē-tsuē 寸尺著愛 hőng 拍掉做2手貨，伊隨喝一聲 mā kā 抄來 ê 地址提 hōo 我看「我一直想 bueh 招你做陣踅這間店。」

「啥物店？」我問。

「聽人分張講，伊若 Costco ê 賊仔市」伊講。

雲尪走去耍掩咯雞。

金烏 kā 伊 uì 北風遐 bué 來 ê 新衫穿出來品並。

我那款早起頓那看金烏敢 bueh kā 新衫 haînn hōo 北風。

那撋麵粞那聽ラジオ放送 ê 聲音。

青 tiānn 白 tiānn 一聲 óonn-óonn 響 ê 聲音迵過窗仔縫軁入來厝內。

已經 buē 記得我是當時收著這份按 Lidl 寄來 ê 食譜電子批，總是這斗 bué 著罐頭檨仔隨想著伊。

不過原食譜是 Porridge 我清楚知影我 tuì Porridge ê 興趣 tsham Brei 相𫝛。

你問我敢有鼻著鳥鼠無洗身軀，我 ē 應講鳥鼠有洗身軀 hōo 伊失去鼠(趣)味，按呢隨來換優格版本，𫝛款好食甲。

藍莓檨仔麥角優格

#記錄寫 tī IG ê 文字

聽專家分張，減重後3月日是重新歕雞胿 ê 體重格(格/keh)。

自2021年翁某 uī-tio̍h 健康開始牽手減重計較熱量到今，gún 翁已經行到減重結束 ê 第一年 -- 無歕雞胿。

我愛等到隔轉年 tsiah 滿一年。

我 m̄ 是專家，m̄ 知影計較熱量敢有應效，頂站仔讀著專家分張「食食算熱量窮實無啥準」，總是這个方式 tuì gún 來講應效真好，飽脹閣免逼家己愛喙白。

一直 teh 愖 tī 德國有厚厚印度佛教氣味 ê Bowl(素食) tī 台語 ē-tàng iōng 啥物辭形容較適合。

起因，我一直認為 iōng 碗來對譯誠實無合軀。

半冬後 ê 今仔日那寫食譜又閣那愖這 Bowl 愛按怎 tsiah-ē 合軀，m̄ 是 kan-ta 一个生張。

擔頭看台語活詞典，大力 tuì 頭殼碗拍落去，我誠實是大目新娘，有看鼎，無看灶隨上教典請教。

缽(Puah)泛指可盛酒、裝東西或洗滌東西的圓形金屬或陶瓷用具。例：研缽　gíng-puah(研磨藥材用的缽)。

這个世界蓋有意思，假--ê 成做真--ê 四界賴賴趖，真--ê 煞成做墓壙內底喝 buē 出聲 ê 蔭屍，總是成做蔭屍又閣 hőng 割舌 ê 印何闐 ē uì 墓壙行出來，咱人 mā 是。

早前踅唸看無家己 ê Blog，這久 m̄ 知啥物因端 hōo 我一𫝻隨看著家己，只不過活到這个歲數我真好玄 gún 阿母當時「抱」兩个我出來？

總是，我真清楚阿母無雙生仔我 mā 是 sóo-tí m̄ 免夯枷去考究。

Tshan-tshiūnn tī 希臘 bué 鉸刀，我看著 tsham 德國一模一樣 ê 雙生仔我 mā 知影彼 m̄ 是按德國 Solingen 來 ê 彼對雙生仔。

起因，一般無啥病痛 tshan-tshiūnn 老倒退 ê 人，無人 ē kā 家己 ê 名寫 m̄ 著掠外 mā buē 烏白寫家己 ê 家甲。

Tī Balkans 看著一四界 ê Pan con manteca y azúcar gún 翁遙念 ES 日子，我想著囡仔時上無敆脾土 ê 麭。

伊想 bueh hōo 某感受 Pan ê 好滋味骨力揣資料原仔是火燒罟寮，無網(望) ，不而過彼久踅網路 ê 跤跡成做番薯 kah 月桃掖落塗 ê Pan 引𤆬 gún 行向閣較豐沛 ê 生活。

這原仔是按 Pinterest 看來 ê 圖原仔 m̄ 知伊誠實 ê 滋味，總--是家己照圖變一份來食有一種 buē-su 家己是 Sherlock Holmes 佮 Arsène Lupin ê 膨風。

另外，見寫著「刺莓仔」就 ē 想著讀過 ê 這段話「較無法度成做大貨色 ê 青瓦厝 ê 安妮」。

我 m̄ 是文青高智識份子，我 tuì 啥物款 ê 書(文青愛講書 buē-tàng 講冊)佮作品 tsiah 有法度成做大貨色無彼个才調指指揬揬講東講西，總是我誠愛《青瓦厝 ê 安妮》。

搪著一位 uì 早起頓著開始喙白到下昏飯 ê 人，你 ē 按怎處埋？氣身惱命搬死人債 ā-sī 生頭清面訕削對方 m̄ 捌貨？

頂頭兩款戲齣厚性地 ê 我齊攏捌搬 hōo gún 翁看，總是我 ê 編劇漚甲猶未咖哩嗹囉伊隨講結局，閣無料分張三斑擾家拗蠻拗觸愛按怎搬 tsiah 敆喙。

Lieber Gott, danke dir, dass ich nicht so aussehe! 敬愛 ê 神，感謝你，我 m̄ 是這款人， 總是彼尾無人 kā 走私 ê 三斑猶原愛處理 hōo 三斑爸母 buē 累囡兒，三斑慣勢 buē 累龍鳳情。

我需要做囮 mā 需要 hōo 伊清楚伊閣繼續 m̄ 驚輸得苦，只驚斷了賭，四枝釘仔落霆 tsiah 知哭 buē 赴市。

「你知影我是牛食稻草，鴨食粟 ê 性地，你若綴恁爸母彼味 kā 牛柄股掛上牛肩胛頭 hōo 伊無犁也不能免，愛趁你 ê 意過日子，咱隨人落米隨人付鼎較輕鬆，畢竟我無出家又帶枷，像恁爸母像你按呢，逐家攏知影咱結婚矣。」

翁某做伙看 YouTube ê 客家電視台。

翁看我無 tshan-tshiūnn 看德語電視台遐爾仔注神「我敢 ē-tàng 請教你這个問題」伊講。

「請講」

「你 m̄ 是講你聽無客語？」伊講。

「我確實聽無客語」我應。