亂皂𥴊仔店 ⓂⒺⒾⓃⓀⒾⓄⓈⓀ

熥食譜餾文章又閣踅 buē 出彼个敢若設定好勢 ê 這是食譜，你是按怎見寫就寫寡交食譜無底代 ê 代誌？

窮真，我 buē 要意遮 ê 問題，總是有 ê 糞埽是 m̄ 管你較按怎骨力 kā 筅，伊猶原黏牢牢 tshan-tshiūnn 塗粉蝨(thôo-hún-sat)，伊 tuì 你 buê 造成困擾 m̄-koh 伊三不五時 hōo 你慼，起因你 uī-tio̍h 伊需要三不五時摒厝內。

是講，我一向無要意豬母牽去牛墟 ê 問題，畢竟物是死，人是活，像 Sir Issac Newton 牛頓 ê 故事數學543：因蘋果落地發現地心引力？一个烏白亂皂 ê 故事成做人類追求未知 ê 動力。

遮 ê 按面冊湠來 Blog 部落格 ê 塗粉蝨，有一日 ē 成做一月日無洗頭鬃 mā buē 要意 ê 自在，另外遮 ê 故事 tshan-tshiūnn Hena Ma 台灣人台灣事 x 培鈺工作室《台語．生活》第21期「性命故事讀kah寫」這段摘要(tiah-iàu)；

像影片、電視劇，有影有聲ê文化產品`會予咱看著另外一个（無的確是真ê）世界，知影有人蹛誠大間厝、知影in去𨑨迌ê所在、in食啥物好料？這款認捌，對經濟消費ê成長有幫贊。讀個人ê性命故事ē予咱知影有人有無平凡ê理想、in按怎做決定、in遇著啥物阻礙？知影遮會增加咱人面對未來ê智慧kah信心。

目睭已經慣勢手機仔一𫝻攏是若 VOGUE、GQ 遮 ê 食食面肉，準做我憢疑這久敢有人 ē 按呢食一頓飯，像一碗湯邊仔囥一支生 ê 蔥、生 ê 馬鈴薯、生 ê 蘑菇，總是遮 ê 相片就是媠甲 hōo 你 buē 去愖好心 m̄ 免食菜，朋友好 m̄ 免結拜 ê 一跤好鼎比過萬矸花瓶(hue-pân)。

我 m̄ 知影全世界 ê Google 敢相𫝛，我 ê 14 是巧機仔一𫝻隨見 Google 誠實是大神，伊 kā 你猶未抽籤算命 kan-ta tī 心肝穎愖 ê 秘密臆甲聖聖聖並攢甲齊齊齊，你心適 ê 新聞，你 bueh 揣 ê 食譜，tī 你猶未請教伊進前一斗齊款 hōo 你。

我知影 Google 有法度成做大神主要是演算法，總是我 ê 網路社群 kan-ta tī Pixnet 痞客邦這个敢若較無 hōo Google 看上目 ê 社群。

M̄ 著，毋著mˇcog，是我 ê Blog 無 hōo Google 上目 m̄ 是 Pixnet。這个複雜 ê 問題冇蟳無膏 ê 我猶是莫討論揣頭疼，特別是目睭 ê 世界 mā 成做 Roberto 姑娘看著 ê 世界。

本底掠伊是麻煩，這久擘腹玻璃罐仔沓沓仔 teh 收水我愛按怎 kā 伊飼甲膨皮交肨奶，本底掠做莫 kā 紮出門就 buē 因為伊來心狂火著，押尾猶是千萬算萬，m̄ 值天一劃。

上北瑞典挪威車日子翁按 Action 捾一包生雞心豆轉來講「這比罐頭俗價閣輕兩想咱 ē-tàng 紮去車日子」，我目頭隨結伊隨知影 Die Lage ist ernst 代誌 m̄ 是掠做 bué 著寶 ê 伊所認定 ê 美好。

「伊厚工閣𠢕食足電 hām Gá-suh 是 m̄？」

我無應話 kan-ta tìm 一下仔頭，伊隨驚甲流清汗細聲問「按呢你敢 bueh kā 伊紮出門？」

「你按算換牽手，咱 ē-tàng kā 伊紮出門」我峇微仔笑應。

公視台語台 S4EP11 - 出名人請借問 - 台語話恐龍其中一段話 hōo 我想著咱是 bueh 生湠語文抑是限制語文 ê 過了代 mā 想著早前孤一人 tī 法國 ê 見笑代。

過了代 ê 記持無興閣熥，法國 ê 見笑代 ē-tàng 閣提出來笑笑並楦闊家己 ê 語文區。

教育部臺灣台語常用詞辭典 kā 馬鈴薯號做馬鈴薯(Má-lîng-tsî)，我 mā 捌跟綴這个新辭 kā 伊記錄踮遮，總是我個人猶是佮意我自本就講慣勢 ê 台語辭塗肉林檎。不過一寢開始我 m̄ 是按呢 kā 號名，起因做穡人 ê 穡我 m̄ 捌一箍芋仔番薯，我就照家己 ê 想法 kā 伊號做塗內 ê 林檎，一直到我 tī 臺灣台語常用詞辭典讀著塗肉 tsiah kā 伊改做塗肉林檎，起因法文佮德文攏有相𫝛 ê 講法，特別是林檎。

德語                              法語

Erdapfel                      Pomme de terre

猶未 kā 伊寫做一篇食譜，我 m̄ 捌嫌伊䆀。自 2021 kā 伊寫做一篇食譜，我定定嫌伊㾀勢無法度出門 tsham 人比賽。

這款心態 hōo 我拚性命 kā 熥 kā 餾，總是 m̄ 管我按怎熥按怎餾，伊猶原 m̄ 捌按塗炭仔成做皇后 hōo 我足怨慼。

Tsa̋ng 暝(10.22)下昏飯翁仔姐做陣 kā 明仔載 bueh 食 ê 早起頓攏商詳好勢，人猶未行到廚房隨看著彼粒𫞼甲好好 ê 鱷梨仔隨越頭 tuì 翁講「德國獅仔頭猶有時間，鱷梨仔無時間矣。」

「出菜 ê 人主意」伊笑應。

「放一百个心，我 buē kā 你克虧」我刁意故𥍉一下仔目尾斡頭行入廚房開始攢料。

翁問講近來無啥機會 kā 你鬥巡德語，愖一下，確實是按呢隨翻頭看後台存檔，德文猶是有寫，只不過無閣 tshan-tshiūnn 較早按呢，德文跟綴台文行。

是按怎有這款變化，窮實 mā 無啥特別因由，不過清楚知影伊 m̄ 是按神魂來 ê 聲音，自然就 buē 行向彼條路，想 bueh 哭呻 hōo 外人聽，畢竟這是家內事 m̄ 是國家大事。

不過自らしょうもん Rashōmon《羅生門》出現在眼前，這个無自然 ê 設定成做「共你的生活寫出來，起大膽共告白啦！」總是，告白真正 m̄ 是一件簡單 ê 代誌，所以，我猶是捎留底文章來做修改，畢竟四常 ê 龜鱉叨趖，生毛帶角 tuì 我來講多數是灌/煙腸➀一枝 ê 無鹹無纖。下跤 ê 四常是早前 ê 心情記錄，這久拄好成做揣無 Muse 啉 Ka-pi ê 好告白。

透早 ê 手機仔輕輕仔 teh 唱歌，本底掠做倒手一伸，大頭拇一揤，二指一𫝻，規仙人就成做 bueh 出世 ê 紅嬰仔離開拉圇仔燒 ê 帕水，行向人生新頁。

總是，意志永遠拚 buē 過軟汫，零下 11 度 ê 7點，Diana ê 數念猶原停跤，Apollo ê 馬車已經行跤到，我 ê 貧惰 mā 跟綴 Apollo ê 頭鬃四散 tī 這烏𪐞紅 ê 空間，自由自在成做這个空間 ê 𩛩肥。

三冬過去，我 ê 西班牙語猶無進步。

三冬過去，彼久 hōo 翁嫌甲臭頭無夠膏 ê 林檎紅菜頭湯已經膏甲 hōo 伊 m̄ 敢掠做家己是 L'aile ou la cuisse。

「你 ê 湯愈煮愈有歐洲味」翁那食那褒唆。

「水囥較少寡，湯自然做羮 hōo Maggi 抑是 Knorr 一屑仔機會攏無。」

翁愛食羮湯，這个慣勢是按𪜶老母遐來，我愛食湯總是認捌 ê 羹湯 kan-ta 大麵鹼抑是肉羮湯，sóo-tí 有一段時間一直掠做番麥羮湯這類 ê 食食是𪜶老母 ê 手路菜。押尾有一斗 mā 是 gún 無閣交葛(kat) ê 彼斗，四常 buē 趖入廚房 ê 我聽翁講冰箱有菜蔬通食隨跟綴伊 ê 跤步趖入𪜶老母 ê 禁區食唯一一頓有菜蔬無甜粅粅 ê 糜飯，早起頓，我 tsiah 知影𪜶勥母 ê 手路菜 mā 佮我無宛 2 體，就是是捎 Knorr 透滾水，只不過伊較𠢕 3 分鐘就好勢 ê 湯，伊愛煮一點鐘。 

3 冬前款這碗湯，翁 ê 態度佮恁老母掠著牛肉麵內底有薟隨做出「我誠知機你想 bueh 毒 gún 翁」ê 表情，3 冬後因為我 ê 痟貪險 bueh 軁雞籠進前想著 Blog 有記錄一篇番仔薑湯隨搜出來消化彼袋 3 公斤 1.99€ ê 番薑仔。遮 ê 番薑仔金常一袋 500g/1.59€(特價)，烏露戰爭拄開始捌起甲紅色規包 2.29€，三色番薑仔 3.49€。

3 冬後湯款好我無特別交代主要食材是啥物 hōo 翁家己去愖我葫蘆內底賣啥物藥，起因我 tuì 彼个表情佮態度到今猶是彼陣 ê 反白睚 buē 跟綴伊 ê 話踅金龜磨。

「番薑仔湯好食」翁食一喙隨笑微微 kā 我褒唆。

我清楚知影這是商詳後必捧 ê 客氣話「你若無佮意 ē-tàng 家己攢糜飯」我那食家己 ê 額那應。

有嫌有哭呻果真有差，林檎總算無閣 tshan-tshiūnn 水龍車 bueh 拍火一路無擋按呢直直衝衝衝 hōo 我 kā 林檎當做架頂鼓仔燈一爍紅一爍青順伊 ê 青紅燈變化平安行過斑馬線(pan-má-suànn)。

這禮拜(10.7~10.12) Lidl lohnt sich 總算正經 lohn sich(大碗閣滿墘)，林檎無分紅皮抑是青皮齊 1 公斤/1€，遮爾仔迷人 ê 數字無傱去款一袋轉來囤呔 ē-tàng 隨佮翁商詳伊 bueh 佗一色，畢竟林檎踮 gún 兜 tuì 伊較有銷。

色緻商詳好勢，伊向東軁，我向西飛，翁仔姐仝心成做豬仔鼠囤貨(Hamsterkäufe)。

按自本 ê 性地林檎一斗愛 bué 2 公斤 tī 翁猶末開喙我 ē 隨講「德國林檎窒倒街 m̄ 免痟貪」經過 2 冬 m̄ 捌 tī 寒人款林檎 ê 我 m̄ 免翁開喙家己隨開喙「這禮拜 ê 林檎價數誠媠 bueh 囤貨無？」

2 公斤 ê 林檎十外粒，無愛甜粅粅 mā 無愛生食 ê 我，除了濫優格佮煮湯猶閣有啥物滋味通變化？

近來翁 teh 挐我家己做優格，我知影這个挐是按𪜶小妹遐來，𪜶小妹開六月日做一塊 Weißerkäse 兼攝一張若 LECKER ê 相 hōo 伊參考，這个尾句我窮真是想 bueh 寫風神 m̄ 是參考。

這段文字真正是脫褲放屁 ê 無聊，總是無 kā 我心內真正想 bueh 講 ê 聲音記錄出來，我 ē 著蛆。

「人類是按怎 bueh 按農業行向工業」我問翁。

「提升咱人類 ê 生活品質並享受生活」翁講。

我無接喙翁隨知影 hőng 洗面兼剾洗伊 ê 虛華隨講「咱家己做較健康 mā 省錢。」

整菜股，有 ê 文字有法度接枝繼續生湠，有 ê 文字無適合 mā 揣無角勢通徙岫就 kā 伊𫞼原搭成做裝置藝術，畢竟遮 ê 文字攏是我 ê 圓湠圓。

整菜股翻田塗 mā 發見，來送罐頭个人，知著走錯地方，自家會同地圾帶回轉 ~ Wunderbar!!!

Wer mit Ungeheuern kämpft, mag zusehn, dass er nicht dabei zum Ungeheuer wird. Und wenn du lange in einen Abgrund blickst, blickt der Abgrund auch in dich hinein. - "Jenseits von Gut und Böse" 

Tsiâ 佮妖怪戰鬥，愛張持 tī-leh 戰鬥 m̄-thang 綴伊成做妖怪。

當你年久月深 tuì 萬丈深坑金金相，萬丈深坑 mā teh tuì 你貓貓相。

越轉身讀2冬年前 ê 家己 --- Sauer macht lustig.(酸製造歡樂)....

早起頓 ê 莓果酸甲我成做 Troll。

Gemischt Sprache ist auch lustig.(透血 ê 語言 mā 𤆬 hōo 人快樂)

透血 ê 語言 hōo 我宛然露台頂 ê 厝鳥，安然自在食遮食遐一霎仔攏 buē 喙白。

Tsa̋ng 是歐州跤球賽上落尾一局。

敏豆或是敏豆仔？

蘑菇 bueh kā 寫做羅馬字抑是漢字？

華語的炒米粉 tī 台語愛成做米粉炒 tsiah 是名詞，綴華語講 ê 炒米粉是動詞...

我自囡仔時攏講「阿春姨，我 bueh 米粉」，上𠢕炒米粉 ê 屘妗 mā 是攏按呢問「bueh 食米粉 bő」m̄ 捌加一个炒，除非食「澹--ê 」--「米粉湯」。

這是參加線頂活動捷捷搪著 ê 建議，我無反對遮 ê 建議，起因加一个建議加一个智識，總是我 tuì 我講 ê tsiah 準算真反感，反感甲本底想 bueh 佮遮 ê 人做朋友，押尾連䀐一下攏無興趣。

後台原仔有 tsuē-tsuē 食譜，總是這久 ê 心情 tsham 彼久 ê 心情已經無相𫝛，sóo-tí buē 閣想 bueh 繼續寫食譜。

不過，食食 ê 相片猶原愛翕。

我想愛翕 ê 緣故應當是迵過相片 ē-tàng 發見家己 ê 食食變化 mā ē-tàng 發見家己自寫 Blog 以來 ê 改變。

清彩到計較，計較甲學習按怎搝絚佮放冗。

這款問題喋甲生菇 ê 𤺪，總是 mā 是 buē-tàng tsua̋nn 按呢抨 leh 無 kā 處理。

Bueh 出門處理病灶進前，gún 翁又閣 uī-tio̍h「一仙」無儉著 teh 跳童，我猶原想 bueh 維持 gún-ê 姻緣 sóo-tí 欶一口氣隨 kā 耳空門關起來。

伊見我無出聲掠做 ē-tàng 繼續成做茶鈷呻 buē 離，就繼續呻。

雞卵密密也有縫，睏去 ê 火山 mā 有精神 ê 時陣「我無霸佔你攄 APP 就 ē-tàng bué 俗價衛生紙 ê 時間」看伊彼支喙已經成做𪜶老母 ê 魚仔喙，我按馬西馬西醒過來，因為我清楚知影我家己無𪜶老爸 ê 好性地，有法度看𪜶老母按呢規世人。

「Gún 講一擺做忌，一擺少人，伊 ê 意思是講越來越無仝心，咱現此時 ê 狀況 mā 差不多 bueh 行到完全無仝心」我講。

翁有一个朋友願意行踏東爿就是 m̄ 願行踏𪜶家己厝內 ê 東爿。

一回翁某做陣去𪜶兜做客，聽伊分張伊佮男朋友行踏柏林 ê 感受 hōo 我一直想 bueh 開喙，總是我清楚知影我講出去 ê 話 tuì 伊是六月蚶 ê 臭，就綴東柏林成做伊 ê 新婦仔恬靜按呢聽伊講故事。

「M̄ 管是 DDR、BRD、Preußen 攏已經成做是歷史名辭，恁朋友煞猶原 teh 佮遮 ê 歷史計較，車到遐是 DDR 愛翻頭轉來 BRD 是有遐爾仔痴迷 Deutschland 83~89 是 m̄」我講。

翁無應話起因早前 ê 伊 mā 是𫝛款 ê 態度「Wir sind das Volk」kan-ta tī BRD，總是我 ē-tàng 理解翁彼久 ê 想法，畢竟伊成長 ê 環境是冷戰年間 mā 無親人 tī 東爿，伊 tuì 德國 ê 想法就 tshan-tshiūnn 我囡仔時搪著 tsuē-tsuē 排斥按中國來抑是芋仔番薯 ê 人相仝，有伊固定按教育來 ê 想法。

是講，呔 ē 無事寫翁朋友 ê 代誌？

翁無 tī 厝 ê 早起頓竟然比伊踮厝閣較僫款，不過 m̄ 管僫款抑是好攢，我猶原意愛食燒唿唿、熱 phut-phut 又閣 ē 哽胿 ê 早起頓，抑無規日 ē 成做鴨母喙叨仔叨。

總是這斗 mā 笑詼，翁 ê 便當攢好勢煞換我踅神 m̄ 知愛 uī 家己款啥物款 ê 早起頓隨反紙條揣記持 tsiah 發見，我 mā 得著阿母症凡事 uī 囝兒設想煞 buē 記持家己 ê 需求。

 這 buē 挃--leh，照顧伊 ê 需求 mā 愛照顧家己 ê 需求，特別是食食這項，我若繼續按呢 uī 伊設想無戰車基因 ê 我 m̄ 免三冬，一冬就隨做半丁。 

煠越南米粉?

食甲淡薄仔𤺪。

Das ist zum reinsetzen

好食甲喙舌觸 buē 離

拜六，歇睏日。

翁某做伙食早起頓，翁雄雄發出這句話 hōo 我心花開。

不而過，我六月蚶，開喙臭，無成做日本剾刀規身軀 ē 起清瘼。

生活是藝術，m̄ 是商品。

前站仔讀《拋荒 ê 故事》其中有一葩故事寫著這 hōo 我感受深甲若黑水溝，順紲引𤆬我踅翻頭看彼段 uī-tio̍h bueh 結束過冬鳥 ê 日子生湠 ê 記持。

彼久那做那罵家己是惹蝨上頭扒，食飽傷閒。

離開以後，彼段時間成做一面鏡提醒我，m̄ 通跟綴䆀猴龜叨鱉趖。

這久翻草看彼久，真心感謝遐䆀猴 ê 藝術品，無𪜶我學 buē 曉用心 ê 目睭看世界、品藝術。

愛看閣嫌飫。

M̄ 知 uì 佗落揤著雷公摃歹人 ê 頻道，不而過自揤著就牢 tī 遐。

雖罔，我無讀「出師表」m̄ 知頭尾 m̄ 知頭摠猶原綴 leh 逐戲，而且逐甲歡喜甲，這个現象 hōo 我想著 Tagesschau 抑是 Tatort 一出現隨無見人 ê 朋友。

「遮敢有遮好看？」無一个朋友 hōo 我答案，我想厚讉損凡勢就是按呢，無看日做代誌 ē 著蛆。