亂皂𥴊仔店 ⓂⒺⒾⓃⓀⒾⓄⓈⓀ

近來貧惰鬼上童，出門 ê 目的 kan-ta uī-tio̍h 做小工，所致菜櫥菜蔬無夠額齊交 hōo gún 翁去處理。

「咱最近 ê 四常過甲若對面 ê 放送頭阿媽」翁笑講。

「確實有像，不而過我無放送頭阿媽遐爾仔厲害，一日貼貼黏踮厝猶有才調四界放送厝邊大細事」我那看伊款啥物菜蔬轉來那講我 tuì 放送頭阿媽四常 ê 觀察。

「隨人有隨人 ê 藍區人生實踐，放送頭阿媽 tī 社群連結這項做甲誠好」翁笑應。

放送頭阿媽因為骨頭嚴重含梢無出門，唯一行出大門是去病院，所致𪜶兜 ê 四常大細項代齊是退休翁婿出門打揲。這陣 ê 我 m̄ 知是 Hoo-lú-bóng 影響抑是身體 buē 堪得若囡仔性 ê 熱人，規身人莫名其妙淡薄仔𤺪透紺。

我所認捌 ê 德國新豆腐目今有兩款，一款是濫加工烘肉醬 hōo 伊帶有烘肉氣味 ê 薰豆腐（Geräucherter Tofu），一款是傳統豆腐（Natur Tofu）。Tī 德國素食人口猶未行到目今 ê 闊度，想 bueh 食一塊傳統豆腐需要接受伊過鹹水成做框金閣包銀 ê 貴參參兼䆀味 ê 僫揣。這个僫揣交 gún 翁徛 ê 角勢有關係，所致我見著 ê 世界無表示伊是德國全樣。不而過 uī-tio̍h 止枵饞大大典典殘殘 kā 伊決落，厚度大細交大溪烏豆干無宛 2 體兼過鹹水按巴西來德國框金閣包銀 ê 傳統豆腐味素，伊特殊 ê 豆腐味素經過十外冬我猶是無才調 kā 伊擲挕捒。

按徛法國柴杙田庄徙位到有美軍駐軍 ê 角勢，超市按規庄一間生湠甲規庄六間閣有一間泰國太太開 ê 亞洲𥴊仔店，豆腐 mā 巴西轉做荷蘭來 ê 俗價，無掛奇妙味素 m̄-koh 若針對德國人喙斗改良 ê 酸豆腐猶是食 buē 敆喙，就此開始訓練轉脾土 kā 愛食 ê 魚臊、豆腐轉做牛豬肉豉仔抑是雞襟胸。

交 gún 翁來往伊清楚拆明「伊 ê 飯頓慣勢是無肉無麭無甜粅粅 buē 過日」，我交伊來往 m̄ 捌不三時提醒伊我無食啥交愛食啥，起因台灣食物選擇窒倒街，我食臭豆腐伊無愛，伊會使得去 7 𥴊仔店食伊愛 ê 美國煙腸敆麭。來德國談戀愛準做飯頓愛過這款勥母來恁兜「隨碗出」，我 mā m̄ 捌跟綴伊 ê 跤步燃茶鈷呻 hōo 伊聽，起因戀愛結束轉來台灣我 ê 飯頓又閣外甥仔點燈火，一切照舊。

2012 自來 m̄ 食菜愛食肉 ê gún 翁步頻寫批 tuì 我講食紅肉無健康愛換食白肉，而且愛食有機 ê 白肉，像有機雞肉，自熟似到今 m̄ 捌冤家量債 ê 飯頓問題開始開新戰場，不而過距離就是美感，伊寫伊--ê，我過我--ê，做陣生活伊跟綴心愛爸母 tuì 我傳世佛經，世世（踅踅）唸我就請伊家己出資款伊認為健康 ê 商品，然後送伊一句我 ê 人生興趣無包括 kā 藥仔當做啖糝來食。

德國（西德）自 1970 開始推捒無肉人生到今倚 bueh 一甲子 ê 時間，因為動物權利(Tierwohl)交選擇回歸祖先植物食食 ê 族群愈來愈 tsuē，hōo gún 這个連郵便利 mā 選擇退場 kā 業務交 hōo 車頭𥴊仔店為民服務 ê 田庄超市，mā 沓沓仔出現向時 kan-ta ē 出現 tī 鞏金閣包銀有機商店 ê 豆腐。

這款現象 tuī 盡心推捒減肉食食 ê 醫療是好 ê 開始 mā 是加吞頭疼藥 ê 開始。起因倚 bueh 一甲子 ê 植物食食 tī 這十外冬 mā 勻勻仔增加醫療負擔，特別是現此時 ê 素食現象 Like Meat, Like Fish（素肉）造成 ê 新陳代謝症 ê 增加已經無比傳統 kā 肉做飯食 ê 人閣較少。簡單一句咱番薯島面對少子化 ê 國安問題，德國是面對 tsuē-tsuē 囡仔猶未轉大人就得著二期糖尿病 ê 國安問題。

Gún 翁第一斗來台灣牛郎織女會見 gún 兜 ê 食飯桌是 gún 阿母一碗白飯敆牛肉青菜，我一碗白飯敆豆腐青菜，伊掠做我 uī-tio̍h 伊踮德國做素食者感動甲目箍紅，押尾發見代誌 m̄ 是伊想 ê 遐爾仔甜蜜隨講一堆食肉健康顧身體，青菜豆腐白汫無素伊無愛。食食足個人，我無回應伊 ê 交代，起因尊存是按心 ê 目睭開始 m̄ 是按喙像𪜶兜 ê 愛。只不過這个按心 ê 目睭 ê 尊存愛經過十外冬伊 tsiah 有才調理解。這久翻頭看這條上四常 ê 寧靜食食革命，我真正欽佩家己。

Tī 素食市場猶未楦闊到 Lidl, Netto 遮 ê 平價超市，來德國牛郎織女會我 buē 專工 uī-tio̍h 一塊豆腐盤 40 分 ê 車幫去中央車站 ê 中國超市 bué 豆腐，自家甲做踮遮我較按怎好喙斗入人門，順人意食在地好料，屬於我自來 ê 喙斗猶是逐暝來相揣 hōo 我骨力盤車去中央車站 bué 豆腐。總是綿豉捙拚 buē 過年歲交人兩跤，錢四跤 ê 現實，我就沓沓仔改豆腐換食肉。

2017 辭掉頭路來德國好好做一位好牽手到 2024 ê 這段期間合該然是我人生食上 tsuē 肉 ê 日子，起因德國 ê 魚臊是連蹛海港 ê 人 mā 講食 buē 起 ê 貴參參。正經無白賊以這期 ê Lidl 做比喻，三文魚一公斤 23€，豬肉豉仔一公斤 4.58€，牛肉豉仔一公斤 7.99€，雞襟胸一公斤 8.19€，平平是肉當然 mā 是食肉較顧錢袋仔。

每一个人攏 Wunderschön(獨一無二 ê 美好)。熱人電影院看煞 ê 隔轉工田螺循舊路，較行 mā 仝路跟綴每一个獨一無二 ê 自然美好成做鰮仔魚泅入 S-Bahn，揣無角勢通讀閱讀 ê 我雙目注神眼前 ê 變化，2022 上戲院 ê Wunderschön uī-tio̍h 別人眼光險險行 buē 出陰曹地府 ê Julie 重生後 ê 影片「這是我 ê 故事」交押尾決定 buaih 閣接受親人情緒叨撚 ê Leyla 自在享受棒球帶 hōo 伊 ê 快樂，我雄雄想著 tī 人猶未徙岫到德國，逐年 ê 牛郎織女會 hōo 我 tuì 這个國家每一个角勢興趣趣，自家甲做踮遮連期待 ê 膨鼠 Guten Morgen mā 成做無鹹無纖 ê 香腸。

我 ê 手機仔無安裝網路，德鐵 ê 無料網路是美麗 ê 胭脂水粉無敆逐人 ê 面肉，台灣軟晡紅霞滿天 ê 天色 tī 若楓仔葉 hőng 蟲豸咬甲像 Galaxy Quest《驚爆銀河系》想 bueh 消滅 Mathesar 族群 ê 龍蝦(?) ê 德國熱人，無 S-Bahn ê 烏暗透光捷 hōo 我掠做眼前 ê 天色猶是透中晝想 bueh 牛聲馬喉日若 ē 遮爾長，白汫無味 ê 日子呔討猶未反頁。

• Kein Genuss ist vorübergehend; denn der Eindruck, den er zurückläßt, ist bleibend.

Johann Wolfgang von Goethe

「我向望我會使得較早解決這个問題」我 kā 門關甲賰一个貓仔目縫微微仔笑看伊目頭結結若有千斤重 ê 罪過需要 tuì 牧師告解 ê 表情。

「免擘腹，我已經按磅空行出來矣，順行無送」我笑甲裂獅獅 kā 門關起來，電鈴隨喨，我隔一个門問「落勾啥物物件？」

「Gún 兜牽手」翁應。

「我 bueh 來款起早頓，歹勢，順風，無送」斡頭牛聲馬喉唱大聲金罵無ㄤ做我伐去廚房無閒按算 ê 飯頓，豆腐煮珠仔豆佮鴟鴞喙豆。

需要點外鐘𤉙 ê 山珠仔豆先落湯鍋仔，電爐揤 3 hōo 珠仔豆沓沓仔交水融做一體變膨皮，豆腐落焐甲燒燒 ê 白鐵仔做 ê 平鼎仔煎 hōo 兩面赤赤酥酥挈出來，落刴甲若肉幼仔 ê 洋蔥交蒜頭，電爐揤 5 kā 伊炒甲芳芳，禁火，斡頭繼續牛聲馬喉兼搖尻川快樂伐向棧房 kā 事先款好 ê 鴟鴞喙豆提出來，大力親一喙，輕輕仔按壁敲兩下，關甲密喌喌 ê 鐵蓋仔隨開，我喙角那做菱角形 mā 喃講「tsiâ 講開罐頭就愛用開罐頭家私 tsiah 有才調開」。鴟鴞喙豆渧水，斟一甌茶伐向客廳交難得 ê 日頭花做陣 kā 讀台文冊。

往過看豆腐料理 buē 感覺伊有啥物特別。

一目𥍉二十冬，早前認為 ê 無特殊成做現此時上僫揣 ê 天星。

因為伊是鹿林長尾星，伊 kan-ta ē 出現 tī 咱 ê 身軀邊一擺。

伊 buē tshan-tshiūnn 其他 ê 長尾星纏綴金烏，一擺閣一擺向金烏辭別靜候掠日再相會。

鮮沢番麥筍僫 bué，換罐頭來鬥 mā 是好味素甲 hōo 我感受鹿林長尾星從來 m̄ 捌離開我身邊。

我愛食豆腐，總是頇顢煮出台灣 ê 氣味，所致換手路窒相思。

阿母猶未轉去西方進前，我一直掠做家己有才調頓頓做老外，畢竟需要上班 ê 日子人一行出門喙，無興做老外 mā 愛做老外特別是中晝頓。

阿母無病無疼轉去西方無人通 hōo 我點菜，家己又閣貧惰骨就跟綴多數獨身過日子 ê 人 kā 自助餐 、麵擔仔做廚房行踏，總是我較無食福食無兩月日就放棄，紲落來想著阿母交代 ê 話「你愛趁我我猶 tī-leh 好好學習扞鼎，抑無有一工我轉去矣，你就無話通挨推，呔討去德國做人牽手 m̄ 免扞鼎。」

阿母果然是老先覺清楚知影查某囝 ê 喙斗有一个期限，期限一過愛我交 gún 翁快樂牽手做田螺巡舊逝，較行 mā 仝逝，彼是較早睏較有眠 ê 代誌。

阿母轉去西方兩月日，我 ê 老外人生透德國頓頓是煙腸 ê 食食生活行到 Ich habe die Nase Voll, die machen mich fertig ê 階段，我需要揣先生處理 hōo 我心狂火著 ê 塞鼻，總是我自來是鹹掛澀閣愛家己做醫生 ê 性地，愛我跟綴兩位 mā tī 西方 ê 阿姊𪜶 ê 跤步去冊局 bué 菜譜冊轉來學習，我甘願繼續做老外。每一个人有家己 ê 收藏癖 tī 菜譜猶未行到今仔日 ê 窒倒街，伊一直 m̄ 是我書櫥 ê 收藏品。所致真心感謝部落格 ê 發明。

豆腐 tuì 翁來講 m̄ 是 Tshì-sù，Tshì-sù tuì 我來講 m̄ 是豆腐。

兩支喙，兩个胃。

四常做陣食𫝛味，だいじょうぶ(daijoobu)。

總是，大丈夫有一日 mā 是 ē 張 mā 是 ē khiau-khi。

Sóo-tí，搪著無法度 sann-kap ê 大丈夫隨人食孤盤是上好 ê 祝福佮分張。

拄著兩個人又閤是大人愛趁錢，囝仔愛過年 ê 時陣，bueh 按怎才好？

無問題，繼續一人興一味，毋免仝雙箸。

翁繼續食伊 ê  Tshì-sù 配馬鈴薯，我繼續食我 ê 咖哩豆腐配米粉，圓滿!

咖哩豆腐

踅網路冊局見著得癌 ê 癌友分張伊抗癌 ê 過程交按怎改變食食來保健康 ê 短篇紹介，鬱金炒豆腐就是按這段無料閱讀得來 ê 靈感交新味素，美味しい。

鬱金豆腐炒

...... 材料 ......