亂皂𥴊仔店 ⓂⒺⒾⓃⓀⒾⓄⓈⓀ

「你 kám 有興趣投稿？」

有一回 tiàm 面冊社團搪著《落/Làu台語-瑞士ê台語社》ê 社長 A-kuan，伊問我 tsit 个問題。

彼久，我 tùi 台文 ê 印象猶原停 tiàm 「鄉土文學」，猶未迒到實櫼 ê 「台語文學」。

「我 buē 曉寫詩，buē 曉寫羅馬字，一切 lóng buē 曉，tsit 時 ê 文字是 ná 看線頂辭典 ná kā 四常 ê 話轉做文字按呢 niā-niā，猶無夠資格 thang 投稿...」

「有興趣，你 tsiâⁿ-si̍t ē-tàng 投稿 khì Bong報」。

陳耀昌醫師 ê 福爾摩沙三部曲按2019年 uì 臺灣飛來德國一頁攏 m̄ 捌掀過。

寢站仔書櫥按 Books 買 ê 冊 90%是台文詩讀甲人真厭𤺪，揣著 ê 新冊店踮遐注文 ê 冊猶原 tī 路頭 m̄ 知底時 tsiah ē 到位，想 bueh 問翁敢有閒載我去抾字紙遐揣冊來讀，當 bueh 開喙問一想著最近來 ê 疫情隨放棄，斡頭行向書櫥 kā 按台灣坐 FedEx 來德國至少 2、3 冬猶原新嫣 ê 冊熥一斗 tsiah 想著《福爾摩沙三族記》遮 ê 自 2019 坐 FedEx 過來德國 ê 冊猶有 tsuē-tsuē 本若祀佛公 m̄ 捌摸過，隨雙目瞌瞌，點落點叮噹，看 Tsiâ 上歹空。

哦，是你，真歹勢我猶是愛退貨，畢竟現此時 ê 我 tuì 華語若《百年孤寂》ê 小說暫時鼻無鳥鼠無洗身軀，有鼠(趣)味。吐一氣大氣閣點落點叮噹，看 Tsiâ 上歹空，向時 hōo 我讀甲若 teh 食大麵鹼遮爾仔愛 ê 歷史、人文 ê《半島之龍》、《庫德的勇氣》、《門》這久 ê 𪜶宛然德國窒倒街 ê 甜粅粅 hōo 我感覺飫。

手氣無啥好，離開現場換一个仔氣，離開現場進前目尾䀐著《邦查女孩》這本因為「帕吉魯」交「阿霞」無法度成做龍鳳隔海喃作者你呔 bueh 按呢安排，YouTube 交網路新聞步頻若波蘭 Antonin 蠓遐爾仔厚 ê《斯卡羅》按正腦走過倒腦閣按倒腦走過正腦，啊！我 ê 地區限制我成做戲箱，啊，呔無點著 Books 推薦 ê「福爾摩莎三部曲」，離開䆀就是聰明，離開齷齪果然有新世界，我順「福爾摩莎三部曲」ê《福爾摩沙三族記》行入去 Delft(台夫特) 露營 ê 日子 mā 行入去囡仔時掠做厝邊阿媽是 teh 做道教儀式，開始接觸台灣歷史就知影厝邊阿媽所做 ê 儀式是平埔尪姨文化，也行入歐洲 kā 女子當做精牲 teh 拍獵 ê 年閣；「荷蘭人 kā 尪姨送去諸羅山。」

較早傍別人 ê 圖，今仔日成做自立一人。

故事講幾仔回，m̄ 捌搪過 ê 人抑是選擇致著失憶症 ê 人攏 ē 講「我聽你 teh 講漫画，咱臺灣呔有這款代誌」像咱臺灣從來 m̄ 捌食過美國炸彈 m̄-koh hōo 咱勇壯 ê 牛奶佮麵粉。

我 ê 睏眠時間真固定，較按怎成做暗光鳥 má 無法度渡過 12 點 tshan-tshiūnn 塗炭仔按呢。總是阿霞 ê 故事 kā 我規个情緒縛佮伊做伙 hōo 我雙目成做 m̄ 願開喙 ê 蚵仔 mā 硬 bueh kā 撬開閣𫞼撐篙。

冊讀煞，手機仔捎來看時間，夭壽骨，讀一本冊讀甲若 tī Bangkok 等紅目班機飛德國仝款忝頭，只不過這久 ê 忝頭閣添一味，茶鈷呻 buē 離 ê 哭呻。

作者呔 ē 遮爾仔無人情，無 bueh hōo 阿霞佮臺灣麵包樹成做龍鳳，是按怎 bueh 按呢 kā 𪜶拆做天間佮凡間，是按怎，是按怎，是按怎。

自由的女性和輕佻的女人正好相反 -- 西蒙.波娃

十二月食菜頭，六月 tsiah 轉嗽。

這是早前就寫好 ê 文章，sóo-tí tī 設定公開 ê 日期猶未出現進前，我 buē 閣專工餾一斗。

Tsa̋ng 下昏飯食飯飽無想 bueh 反冊 mā 無想 bueh 碰電腦，規个人隨閒甲連蠓仔攏掠無，按呢來 Blog 掠漏。

一段一段繩，這斗 ê 文章寫甲誠通順 buē 㧎㧎抑是成做借殼寄生 ê 中國麋鹿。

揀冊 ê 時掠做伊是台文冊，我 ê 意思是 iōng 台語書寫。

冊按臺灣飛來德國，讀第一頁久年 m̄ 捌比過佮講過 ê 中指話隨倚來挨拶(aisatsu)。

起因，這 m̄ 是第一本 hōo 我感覺吊牛頭賣馬仔肉 ê 台文冊。

不過，我知影是我家己猶原分 buē 清啥物號做台文冊，sóo-tí buē-tàng kā 咱 ê buē 爽攏囥 tī 出版社抑是作者。

那讀這本台語晶晶體 ê 小說，歹勢 iōng 晶晶體形容這本冊，m̄-koh 我誠實感受 buē 著作者分張 ê 台華濫糝書寫體。

夏目漱石(Natsume Sōseki) ê 人生3部曲總算讀煞。

講總算 buē-su 伊 ê 作品真僫讀，事實卻 m̄ 是按呢。

是我一直掠做這本猶未讀 ê 冊 mā hōo 我 tī 2018 kā 紮轉去臺灣。

疫情進前，準做踮臺灣已經四邊無一倚，我原仔 ē 轉去臺灣行行看看。

轉去 ê 時 mā 真慣勢 kā tī 遮 bué ê 物件紮轉去臺灣，相𫝛 ê 態度我 mā 真慣勢 kā 按臺灣紮來遮 ê 冊閣紮轉去。

越南...

是按底時 tuì 越南興趣趣?

我想應當是準備按臺灣徙岫到德國 ê 2017年閬縫。

Tī leh 等待出發到 tuì 我來講並 buē 生份 ê 德國 ê 彼段期間，我 ê 心情一直浮浮 buē 定致到本底掠做 ē 讀 ê 冊成做冊桌 ê 妝娗。

心浮浮 buē 定又閣捎無浮 ê 寮仔門，上網踅旅行社是我上佮意 ê 事項。

有當時我會按呢想，德國 ê 自省教育敢正經有應效?

起因，搪著 ê 人無分年歲抑是階級，𪜶若是認為你是低路人，就使𪜶 mā 無幾支毛通品並，𪜶 mā 猶是有法度 kā 豬屎籃仔提出來品並。

Tshan-tshiūnn 彼日按呢，一个德國人大大典典 tī gún 遮 ê 人客目頭前 īng 懸目看 tsham 伊相𫝛攏是仝階級 ê 義大利人殕殕。

我 ê 語言無分佗一路攏低路，我無法度 kā 義大利朋友鬥贊聲，其他 tsham 我相𫝛攏 m̄ 捌 tī 遮食過頓➀ ê 朋友，gún 逐家攏成做無氣味無色水 ê Bach➁ 按眼前 ê 溪划過，不而過我知影 Bach ē 揣--著 ê 溪流 ê 出口。

起因，逐家攏知影按怎引𤆬脹膿 ê 人去看醫生，在水 buē hōo 家己穢著 tshan-tshiūnn 翁公司 ê 少年查某囡仔，無佮意 D ê 大嚨空隨投去總公司，總公司隨派人來調查頭尾。

簡單想 bueh 寫寡感想卻發現寫這篇若蓋成 ē hőng 看做看票揣位 ê 感覺。

總是，冊讀煞 mā 搪著這篇早就設定好勢 ê 文章，愛我 uī-tio̍h 這款 m̄ 知按佗來 ê 情緒叨撚 teh 無枷夯交椅並違背家己 ê 個性莫寫一篇感想，彼 m̄ 是傷過假仙，彼是出家又帶枷 ê 無聊。

無聊歸無聊，總是拆白講我 mā m̄ 是自底就是按呢 ê 性地，起因我真清楚準做我已經按《後天美女製造機》升級到 m̄ 免閣倚靠機器來展現家己，總是《靈魂裏的胖女孩》猶原三不五時傱出來揣我𨑨迌。

每一个人有伊家己犯官欺，m̄ 通犯眾議 ê 想法，總是我這輩 ê kan-ta 若啥物攏驚，啥物攏 m̄ 敢做，閣 kā 無合理 ê 事項當做燉補來食，這正經是龜怪。

我猶 teh 揣神魂 ê m̄ 知是熊抑是虎，總是我知影跤步踏無出去，kan-ta bueh 按呢雙跤踏雙船，心頭只有亂紛紛，無法度粗糠還(huān)粗糠，冇粟還冇粟來做代誌。

書讀無半撇 m̄ 知論文生做啥物生張，總是規本冊讀煞，我 ē 感覺讀「論文」mā 是一件有意思 ê 代誌。

第一擺看著這本冊 ê 興趣無大，起因冊名就敢若作者 ê 後記「這本書是從我的碩士論文改寫而成」。

「論文」是 hōo 學問飽滇 ê 研究者來讀文寫文閣論文言文 m̄ 是 hōo 我這款倒吊無墨水 ê 人 kā 伊當做暝時尪仔冊來讀消遣。

不過，當我 uī-tio̍h 運費姑不而將閣踅翻頭 kā Books ê 冊櫃閣搜一斗原仔揣無家己意愛 ê 讀本，我想著德語課按 Iraq 來 ê Kurds 同學。

這位 Kurds 同學 uī-tio̍h 未婚妻願意重餾 A1.1 佮已經 tsham 我 tī 無相仝時間上課 ê 伊佮牽手兩人 tshan-tshiūnn 往過按呢，手牽手專工坐公車來我上課 ê 所在分張𪜶成做龍鳳 ê 快樂 hōo 我隨踅轉去 冊櫃揣這本冊讀紹介 tsiah 發見伊是 tsuē 冬前捌 tī gún-ê 箍仔討論 ê「愛情故事」。