亂皂𥴊仔店 ⓂⒺⒾⓃⓀⒾⓄⓈⓀ

翁講「這曷無啥特殊甲需要 kā 伊記錄。」

「後回你閣匪類兼茶鈷呻 buē 離，這是證據」我應。

猶未讀國校進前，我 m̄ 捌發覺家己無頭神，讀國校捷 hōo 老師叫去台頂成做讀書 m̄ 認真畢業去放牛 ê 見本，我開始培養這个習慣 kā 課本 ê 字抄二十遍，mā kā 家己抑是別人講 ê 話轉做文字成做無頭神 ê 點拄。這个自學生時代就培養 ê 慣勢 hōo 我正式踏入社會搪著食菜，食菜，食到肚臍為界𠢕 kā 白白布染到烏兼喙食，hōo 尻川坐數拍人喝救人 ê 問題有一个消災解厄 ê 寶，特別是搪著若中國，中國，花碌碌 kan-ta ē 曉交繃激派頭 ê 雙面刀鬼。

2021.08 自決定剾膩瓤我就開始 tī 簿仔紙記錄磅仔逐日 ê 變化，總是歲聲一年一年添，筆花一年一年減 hōo 我頭興興，尾冷冷無到一禮拜隨 kā 伊擲挕捒換來 Pixnet 痞客邦記錄。

這个臨時臨曜 ê 出癖是好決定，因為伊 hōo 我魚趁鮮，人趁茈到目今，猶原興趣趣。

(2023.11.08 早起頓　蘑菇挽肉醬 + 清飯 + 素食優格/921kcal)

無刁意故選食譜，總是自決定無 bueh 繼續記錄下昏飯彼日開始，「蘑菇絞肉醬」就是我決定 bueh 重攝相 ê 一份食譜。

雖罔早前記錄 ê 相片 mā m̄ 知影攝過幾仔斗，總是 Übeung macht den Meister 佮贏 teh 做寡肚臍空內點目藥 ê 代誌。

今仔日 ê 相片我 buē 講真滿意，總是捷講喙 ē 順，捷做手 buē 鈍，我無清碗盤是 bueh 按怎貯新 ê 物食，是 m̄。

2023.11.08 mā 是 gún 翁糋膩瓤滿 2 冬 ê 日子，71.6kg。

       (2023.01.20 早起頓 田庄早起頓 + Kam-má-tooh 湯 + 五彩西洋萵仔菜生菜盤 + 北蔥醬/1036kcal）

恭喜！

Tī 夏至出門歇寒（臺灣 - 德國 6點鐘），霜雪來行踏 ê 今仔日（臺灣 - 德國 7點鐘）。

達成目標72公斤。