亂皂𥴊仔店 ⓂⒺⒾⓃⓀⒾⓄⓈⓀ

Gdańsk 前一个城市 Poznań 相𫝛，有 tsuē-tsuē 濟皂壁，遮ê 有交 tsuē-tsuē 角勢有伊特別 ê 意義 mā 有伊無兜無梢牽山伴林 ê 藝術發想。我是藝術悾戇人，看無藝術深含 ê 14 總是這張圖我知捌伊 tuì 波蘭交規个 hōo 惡霸關 tī 櫳仔內底 ê 人 ê 意義，就請東南西北分 ē 明 ê 翁𤆬我坐輕鐵過站斬路來到 Zaspa 看這張皂壁，順紲巡規个社區 ê 皂壁。

Zaspa tī 歐戰進前是一搭人口大約 1800 ê 田庄，因為軍事需求起造機場 tī 1914 畫入 Gdańsk 行政區。 1923 Zaspa 機場成做前往北歐丹麥、瑞典、挪威重要 ê 轉機機場。

二戰結束，因為城市土地無法度繼續提供機場楦闊計劃，1974 Zaspa 機場閉鎖。 Zaspa 目今 ê 建築多數起造 tī 1980，建築物頂 ê 皂壁出現 tī Y2K 2000 這跤兜。

Cieszyn 捷欣倚位波蘭南爿交捷克 ê Těšín tī 奧地利扞地年間屬 Schlesien 地區 mā 是波蘭交捷克目今 ê 柴杙城市。Cieszyn mā 是自學生囡仔到今記 buē 牢伊華語按怎講 ê Karpaten 喀爾巴阡山脈西爿 ê 一部份。

往過相𫝛 ê 城市 tī 歐戰到二戰結束進前是 Wer bin ich ê 今仔日是捷克人，明仔載是波蘭人，二戰結束 Cieszy 交 Těšín 順天然柴杙 Olsa(波蘭語：Olza，捷克語：Olše)成做雙生仔 ê 一人一家代，拆火灶。二戰結束拆火灶 ê 𪜶想 bueh 行踏對方火灶會使得順 Olsa 河頂三條路橋互相行踏。

Osla, Olza, Olše

「等你 80 歲記持猶原 ē 食餌，我包領你看著伊你隨泅去咱 tī 西元佗一年來 Mikołaj Kopernik 哥白尼 ê 家鄉行跤花」當我猶 teh 請花 kā 我鬥出主意，尻脊後真正出錢 ê 錢出主意並指這仙有掛喙罨 ê Printenmann 人模仔印。

出錢 ê 人已經主意，我這个無功不受祿 ê 人哪通無好喙水「God bless us, my lord➀。」

「我已經揣著我 ê 天佮主人」出錢 ê 人揹仔搝一下，學驢仔叫。

感謝 Shrek hōo 鈍喙成做喙花。

古都 ê 故事留 hōo 古都家己去說。

踮遮我 kan-na 想 bueh tuì 追求清芳氣息 ê 人致意。

有一句話三日無餾 peh 上樹，出門一逝轉來，竟然 buē-kì 愛按怎使用信望愛台文輸入法，tsit 个現象 hōo 阮翁笑講，sńg kah siunn 過歡喜。確實是有影，tsit 逝 ê 行跤花 hōo 我印象難忘。

除了，抾拾 ê 翁步頻煩惱錢，煩惱阮 khai siunn 濟錢食餐廳，我理解伊是一位抾拾 ê 人。

M̄-koh，伊 ê 抾拾有時仔會 tsiânn 做一个錢拍二十四結 hōo 我 tsiânn 做䆀猴 tsham 伊 sann-tak-tshuì。

不而過，減采是有歲數矣沓沓仔感覺 tsiânn 做 䆀猴 tsin thiám，tuì 翁仔某 ê 感情又閣無助益。Tsit 回我 kā 雙手佮雙跤伸 tshut-khì tuì 伊講，tiàm 臺灣阮會講 khì 人兜𨑨迌無 tsah 伴手號做兩莢弓蕉，lán 一逝路 uì 德國來波蘭行踏 tsah 四莢弓蕉，波蘭無棄嫌 lán 凍霜 koh 家己紮四項等路來歡迎 lán，你 kám buē 感覺家己是有福 ê 人有食閣有掠，m̄-bián 過 tsit 款人已經離開德國，猶原食德國煙腸 ê 日子。我 kā 倒手伸出來，大頭姆藏起來講「田園若有收，鳥隻食得偌」lán tsit 隻鳥仔 tsit 回 tsham 你做伙出門行踏 beh 一個月，食你 tsit 位大頭家4回，大頭家你若是感覺 lán siunn 𠢕食會 kā 你 ê 田園滿厝間食甲無半間，lán ē-tàng 買賣算分，相請無論，因為 lán lóng 食杮粿，雙爿囤家伙 ê 人。

早時，我 tī 車頂睏甲 kóng-kóng 叫，這久換翁踮民宿睏甲 kóng-kóng 叫兼陷眠。

日猶未斜西，一个人坐窗仔邊成做九月狗爁日，讀文佯青，那食 Ka-pi 那思路亂皂，家己就是 拍破臺語顛倒勇 2018諾貝爾文學獎得主：Olga Nawoja Tokarczuk(朵卡萩) mā 那愖翁 ê 頭燒燒，尾冷冷「我 mā bueh 跟綴你 ê 跤步踮 Pixnet 寫 Blog」押尾成做「無人來看」看我食麵綴 leh 喝燒 ê 心適興。

咂一喙交德國無宛 2 體 m̄-koh 互相客氣推捒「Gún m̄ 是 Naschkatze➀」ê Ka-pi 繼續乞食攑蠓捽，假做 Tokarczuk，一个放伊自由 ê 聲音踅翻頭轉交我挨拶。

Gún 爸爸就是這款個性，無人聽伊彈 ê 琴，伊原仔繼續做，這款態度引𤆬我成做這久 ê 我。代誌是 uī 家己做 m̄ 是 bueh 做 hőng 看抑是 uī 別人做。