亂皂𥴊仔店 ⓂⒺⒾⓃⓀⒾⓄⓈⓀ

本底掠做 gún 翁愛食西洋萵仔菜 ê 因由是大碗閣滿墘，押尾發見伊佮意食這味 kan-ta 因為我人無 tī 遮這味是上好處理 ê 菜蔬就開始大大典典遮試遐試，搪著伊成做茶鈷呻「彼足食塗，愛洗」隨好笑神紲話「大丈夫，我洗，免驚。」

烏露戰爭開始，德國欠電閣欠水 hōo 𠢕欶水 ê 西洋萵仔 mā 框金，一路按若跤球大細 0.59€/粒漲懸價甲若女子棒球大細 ê 1.59€/粒 hōo 我 ê 耳空清悠甲 tsín。

今年穀雨本底漲懸價 ê 瓜仔哖、Kam-má-tooh、番薑仔等等屬好鬥陣價數 ê 菜蔬又閣踅翻頭轉來到烏露戰爭進前 ê 價數，唯獨西洋萵仔菜猶原徛懸價 hōo 我又閣閒甲掠蝨母不三時行去超市 hui-hui 蹓蹓看伊 ê 銷路，烏露戰爭進前見交伊相拄搪是賰無好幾粒媠通揀，烏露戰爭到今是見交伊相拄搪伊敢若按媠囥甲䆀，紲落來規陣送去敗價區卸貨底。猶原漲懸價 ê 伊準做換牌價做促銷猶是稀微，無啥人 bueh 交觀。一直到頂禮拜 m̄ 知是財團包贌甲倒貼抑是 uī-tio̍h 摒貨底價數落價甲一粒 0.89€ 大細若跤球，喙斗牽 m̄ 行，價數牽溜溜行隨揀一粒轉來囥，囥甲伊看我 buē 生菇，我看伊阿菇大四界，齷齪，隨上網海請教網路眾大神賜我智慧，押尾發見猶是家己 ê 部落格較好請教。

2021.11.19 我捌記錄一篇敆荷蘭豆仁、紅菜頭、番麥 ê 五彩西洋萵仔菜生菜盤，彼張相片這久嫌伊䆀 tsi-tsi 愛換新拄好會使得徙來遮使用，彼久 ê 番麥這久欠貨，換林檎滿山坪...我痟貪軁雞籠，罕得食林檎見著無著時 ê 林檎凡勢 uī-tio̍h 摒二等貨底所致一公斤賰無到 1€ ê 0.89€，隨無要意彼一袋三公斤愛食甲底時，捾一袋轉來，押尾阿羅按合作社又閣𢯾一箱福利林檎 hōo 我，疊甲比玉山閣較懸 ê 林檎山拄拄好會使得做生菜盤。

這斗處理西洋萵仔菜，我想著捌看人用刀切絲隨上網請教眾大神敢有這个手路，網路眾神真聖一跋跤隨聖杯，就順這个方法處理西洋萵仔菜，那切那叨撚家己呔會遮爾仔頇顢 m̄ 較早學這招。刀仔切西洋萵仔菜，形 m̄-nā 仔媠閣緊。

冊有一版二版三版，我 ê 部落格有一改，再改，閣再改。

自無料使用 Pixnet (300mb?貧惰請教...閬過)到決定撏錢 bué 15G 儉相片，這 4 冬 ê Blog 四常成做我訓練家己食老較莫老倒頹(thē)佮增加智識 ê 好角勢，特別是貧惰寫字做筆記 ê 我迵過寫 Blog 總算有法度好好仔 kā 好玄 m̄-koh 無才調 kā 鏨 tī 海馬鉼針(Hippocampus)隨揣隨有 ê 資訊成做家己 ê 通書。

《我在西伯利亞的監獄》讀煞，四月芒種雨，五月無燒土，六月火燒埔 ê 黃酸雨成做內山出水(Sturzfluten/Flash Flood) hōo 芒雨望豐年 ê 向望成做失望，跤踏佮臺灣 bueh 佮臺灣 bueh 平大細 ê BW(Baden-Württtemberg)，一个圓箍仔兩種心情，耳那聽 Ingo(Tagesthemen) ê 專題報導，海馬鉼針 mā 綴遮 ê 報導開始踅圓箍，Schorndorf ê Gottlieb Wilhelm Daimler ê 古宅敢 mā 受災，若受災需要偌久 ê 時間 tsiah 有法度恢復自本 ê 面肉，耳那聽 Ingo 佮記者 ê 連線，本底恬靜 ê 海馬 mā 綴電視聲、窗仔外 ê 鳥仔歌聲、徛踮肩仔頭 ê 阿 bueh 佮阿 buaih tī 我 ê 耳仔邊比賽啥人較𠢕呲(tshū)。

「夏至到秋分，我搭胸坎保證你包穩 buē 讀伊一字」阿 buaih 翹跤撚喙鬚，那講那笑。

「你永遠 m̄ 知影，你 tī 當時 ē 閒甲掠蝨母來相咬 mā 無法度佮閒閒美代子好好做陣冇談」阿 bueh tshan-tshiūnn 永遠擘腹囡仔食無飽穿無燒 ê 阿母按呢溫暖。

不論扞鼎抑是無，我 ê 食食喙斗 m̄ 捌走過回頭車 ê 一日熥三斗抑是隔轉日接力走標繼續熥。

這是好喙斗抑是喙白，知食 m̄ 知訴喉韻 ê 我 m̄ 知機，總是我清楚知影無走回頭車 ê 食食慣勢 hōo 我白汫無素 ê 人生，有機會按舌楦到全世界 m̄ 是縛 tī 仝世界像大多數 ê 德國人，一塊麭餾三頓，閣按三頓餾一世人。

食食反應人生，人生反應食食，gún 翁 ê 心肝寶貝𪜶勥母就是上好 ê 見本，一塊麭餾三頓，閣按三頓一世人，人生大細事 mā 相𫝛，六十冬前 hōo 西班牙人建議改手路，六十冬後手路原在 m̄ 捌改變，建議 ê 人按西班牙人改做台灣人，伊四界投 hōo 人知 ê 理由猶原相𫝛 m̄ 捌改變，台灣人無食 ê 文化 m̄-tsiah m̄ 捌貨。一个人一世人有才調堅持 m̄ 進步 mā 是厲害。​

咸豐三，講到今，換題目。

驚蟄(kenn-ti̍t)交換手 hōo 春分進前，天無喙清甲淚珠㴙㴙落，不過依依難捨幔在眼前 hōo 合該是白清透光 ê 頂晡轉做文青 LOMO 風 hōo 我 Blue。 

「這瓷仔有毒。」

第一斗交伊見面，gún 翁隨 hōo 勥母上童聽我 ê 話食藥包穩你食百二閣 buē 食虧。

第一斗交伊見面見，準做我無信仰，我猶是順勥母 ê 乩身交伊保持距離，畢竟我跤踏 ê 萬項代伊上知機。

第二斗交伊見面，手猶未伸出去摸勥母隨來跳童，我斡頭問一句「這瓷仔有毒，伊呔猶原活跳跳，遮是德國，敢 m̄ 是？」邊仔掠做家己是神 teh 跳神舞 ê 勥母乩身隨退童問「敢 bueh 款幾个轉來做網衝?」

「伊 buē hōo 你做乞食，總是我交伊是花缽仔種菜，無緣」我應。

我一直掠做家己 m̄ 捌出過木瓜生菜盤，巡田園揣靈感 tsiah 發見二冬外前就捌出過菜。記持真正 buē 食餌，無 Blog ê 記錄，現此時 ê 我絕對一分田磅甲若甲 buē 講伊偌好味素 m̄-koh 寫一堆跤帛文。感謝阿羅交阿珊，無𪜶 ê 福利分張，這鞏金閣包銀 ê 木瓜無金色驢仔 kā gún 鬥相共，伊無啥機會通出現 tī gún 兜桌頂，養飼 gún-ê 腹肚捅仔。

2025 按算落南西班牙，向望翁分張 ê 西班牙木瓜有機會交伊相拄搪。

西班牙 tuì 我來講無算生分，總是往過捷是短短五工四暝 ê 趕火車行尞 m̄ 捌斟酌繩西班牙菜蔬果子面肉，頂回按電視看著龍眼出現 tī Islas Canarias 加納利群島交翁講我慣勢 ê 果子 tī 西班牙 buē 僫揣 hōo 我期待甲。

另外，我 mā 好玄，西班牙當地 ê 鱷梨仔敢有像德國按呢鞏金閣包銀 hōo 人 bué buē 冇手。目今 ê 西班牙 mā 有種鱷梨仔，總是價數比遠甲叫 m̄ 敢 ê 中南美洲，像智利、秘魯、哥斯大黎哥閣較金鑠鑠 hōo 我 m̄ 敢交𪜶相借問。

• Wer mit Ungeheuern kämpft, mag zusehn, dass er nicht dabei zum Ungeheuer wird. Und wenn du lange in einen Abgrund blickst, blickt der Abgrund auch in dich hinein. - "Jenseits von Gut und Böse" 

Tsiâ 佮妖怪戰鬥，愛張持 tī-leh 戰鬥 m̄-thang 綴伊成做妖怪。

當你年久月深 tuì 萬丈深坑金金相，萬丈深坑 mā teh tuì 你貓貓相。

Friedrich Nietzsche

雄雄想著這件代誌，我一直喋牛 m̄ 通𠢕走，人 m̄ 通出名，這久煞 tī 遮 m̄-nā 綿豉跟綴食譜冊出菜 mā kā 伊綿豉記錄踮愛料理，我按呢做敢 mā m̄ 是食菜食菜，食甲肚臍為界？

You and I, we were meant to be

I feel it in my soul

Feel it in my soul

芥辣 tuì 蜂蜜講，你佮我註好好

我感受你 ê 魂

田螺循舊逝，較行 mā 彼逝。人有半桶師，我是一跤跤桶齊無舊循 mā 舊逝 ê 低路師。

人 tī 臺灣罕得食菜擴，目今 tī 德國根莖菜蔬 tsuē 過葉菜類 hōo 菜擴成做食飯桌 ê 無伊 buē 慣勢，有伊嫌無局 ê 老伴。除了煮湯、炕肉、烘猶閣有啥物通變化？

「菜擴切片濫寡香油、薟椒、芫荽、豆油囥過暝，彼喉韻讚甲舌擉 buē 離」海馬聽著我 ê 哭呻隨按 A 區泅去 B 區，啊，呔無想著生冷這味素。

「多謝海馬 ê 骨力。」

「你愛感謝家己願意接受半生熟朋友 ê 面冊社團邀請」海馬笑應。

巡田園翻田塗，巡著這篇確定 buē 閣熥一斗 ê 食譜隨徙來迎新棄舊。

迎新棄舊想 bueh kā 舊文筅黗，總是過了代無表示伊 m̄ 捌跟綴咱生活，敢 m̄ 是？

雞毛筅仔按屜仔捎出來順坱埃一字一字筅黗 mā 筅近來滓著 ê 無枷夯交椅。

近來收聽風雅三姊妹《較停仔，講予你聽》hōo 我 tuì 這三位大學生生湠頂勻交下勻 ê 心適 mā 想 bueh 跟綴𪜶 ê 跤跡翻頭踅轉去 Instagram，總是一聽著 Instagram 壓力就若玉山。

Instagram ê 問題 mā 是熥甲比潘閣較䆀味 ê m̄ 通咸豐三，講到今，總是我清楚我有「社群媒體疲勞」問題。

寢幾日反 gún 翁無 bueh 穿 ê 衫褲做粗穿，順紲反著三領伊家己 mā buē 記得布料誠好 ê 牛仔褲。

問伊敢 bueh 囊看覓，伊應好隨囊 mā 隨做花枝一尾㽎 buē 離講「你有十冬前 ê 牛仔褲，我 mā 有(32腰)」。

看伊 tsiah 風神， 我講「咱來看你 ê 風神敢有法度擋一冬」。

話講無幾日，聖誕節過後隨講「我加 bueh 兩公斤...敢 ē-tàng請媠某繼續 kā 我鬥相共.....」

「Gún 德國人過聖誕節舊底就是愛食甜粅粅，而且我按怎食猶原無起磅」我應。

頂幾日磅仔 ê 數字一屑仔攏無變化 hōo gún 翁開始 tuì 醫師好辣看來 ê 5:2 食食慼心，我 mā 清楚知影 tī 這个崁站 tuì 伊講寡愛有耐性齊是提石頭擲 tī 水埤，無應效，隨 kā 耳仔鬥門枋較 buē 成做相拍雞，畢竟這个主意是我推薦 hōo 伊--ê。

寅(în)猶停跤，臺灣熱人 ê 卯(báu)已經行跤到 ê 德國天色今仔日敢若代先預知(ī-ti)逐日做陣讀夜間部 ê 人 bueh 燃一鈷茶請我啉，sóo-tí 到今猶原暗殕暗殕。

我無應話 mā 無深情交伊四目相看，欶一喙大氣 kā 家己當做貓仔交牛展筋骨，kā 呻 buē 離 ê 茶鈷聲轉做 Savasana ê 音樂聲勻勻仔跟綴恬靜起身划向客廳，看露台彼幾坩無人看顧猶原生湠甲若英國花園 ê 花草，彼欉茄仔花有 ET BOITE ê 色水。

啊，我 ê 青春，隨斡頭踅轉去房間開始揣彼領按人徙岫到德國 m̄ 捌閣囊過 ê 十外冬牛仔褲。

「你 teh 揣啥？」翁總算 kā 燃甲無水 ê 茶鈷禁掉。

我 ê Blog 就 tshan-tshiūnn 引𤆬德國按四散領土沓沓仔成做若一隻草鍥(kueh)仔 Friedrich der Große tuì Schloss Sanssouci 無愁宮 ê 設定 den, hier mus ein jeder nach seiner Fasson Selich werden tī 遮 ê 每一个人攏愛順家己 ê 意志得著快樂佮幸福。

Blog 是我自在成做茶鈷呻 buē 離 ê Sanssocui mā 是記錄目今、未來交翻草過去喙斗 ê Muse。

自交歐洲人來往到成做龍鳳十外冬，烏貓姊 ê 向望，有一日 bueh 行踏 In the Name of the Father 以父之名 ê 愛爾蘭交 hām 伊有交纏歷史 ê 007 故鄉英國到今猶未 hōo 伊按想法成做現實，是按怎 ē 按呢生，我無啥理解，總是清楚知影自 2008 按美東轉來臺灣，本底興趣趣 ê 英國火轉做廕火，愛爾蘭因為 Michael Collins 交 The Cranberrie, U2 帶 hōo 我 ê 翻草到今猶原 m̄ 捌洘流，總是想 bueh 行踏 ê 角勢 tsuē 甲若麻仔 hōo 我無法度成做愛哭愛綴路跟綴德國本底按算實施 ê 法令，𠕇仁 ê 包裝除了標示克重 mā 愛標示有幾粒 ê 閒甲掠蝨母 kā 時間分 hōo 愛爾蘭。

按臺灣徙岫到德國，愛爾蘭無閣 tshan-tshiūnn Fiona ê 徛家遐爾仔遙遠 mā 無閣一年 365 工 kan-ta 拜六交禮拜通歇睏交歇一个長假需要窮斤算兩交算日，我 tī 德國 ê 時間 ē-tàng 講是閒甲掠蝨母相咬 ê 閒仙仙，按算 ê 愛爾蘭猶原 m̄ 捌實踐，準做全球 uī-tio̍h Covid-19 無閒𩑾𩑾 hōo 我閣一斗學著人生千算萬算，m̄ 值天一劃 ê 智慧，我 tuì 行踏愛爾蘭 ê 綿死綿爛猶是瓊花一暝就散甲無見一片花瓣(bān)。

今年(2019)愛來愛爾蘭，機票一訂隨飛交英國 mā 是交纏 ê Malta 馬爾他。今年(2020)愛來冰島抑是愛爾蘭，歐洲鞏金 ê 飯店大落價一台 Peugeot 206 就 ē-tàng kā 荷蘭交比利時踅透透，出發。 今年愛來愛爾蘭抑是冰島，按馬爾他，荷蘭比利時，波蘭捷克(2021)，Balkans 巴爾幹半島(2022)，波羅的海三國(2023)到瑞典挪威(2024)，愛爾蘭逐年攏按算 mā 無一年有準算。

進前熥舊文就決定放棄逼虎傷家己 --- 硬 bueh 綴人成做文青讀遐 ê tsham 我無一倚 ê 冊，總是我就是愛佯青/星銅牙槽鐡喙齒 m̄ 相信家己無彼个斤兩，我掠做出門行跤花這囮(buê) ē hōo 我 kā 彼本冊讀甲齊齊無一屑仔肉幼仔通揣。

結果...我正經牛就是牛，牽到北京也是牛。

我甘願閒仙仙，閒到掠蝨母相咬 mā m̄ 願 kā 彼本冊提出來讀，這久寫 Blog 翻草 tsiah 掠著漏。

我愛黜臭別人十个臭頭，九个破豆，我家己 mā 是𫝛款。

不過，準做事實是按呢我原仔堅持愛佯青/星，起因十个囝仔十樣生。

M̄ 知影是減肥彼段期間食食無閣綴翁正頓 m̄ 食，激食點心，彼陪伴我久冬 ê 問題，伊發現猴踅桶，變無輦，包袱仔款款 leh 偷走厝，致使現此時 ê 我 ē-tàng 風神講「我誠實是一條腸仔迵尻川」總算，m̄ 免提錢買奴才來做。

不而過，我 ê 大腸頭現此時有法得遮爾仔輕蠓蠓 mā 愛感謝德國 ê 外科技術，無𪜶 ê 鬥相共，我 ê 大腸頭到今該當猶是滯甲若東石 ê 外傘頂浮崙 bueh 徙位愛等海波浪遮 ê 自然變化。

是啦，彼掠做無重要 ê 問題成做我跍便所上齷齪 ê 艱苦，彼弓蕉明明就 bueh 趖出來，糞口 ê 毋成囡仔就是 buaih 放伊出來 ê 風火著。

30 捅歲仔就知影家己有內痔，總是彼陣 ê 衛教資料無這久 ê 斟酌 hōo 我掠做內痔 buē 愈來愈大粒免去要意。

這斗因為醫師好辣 hōo 我知影內外痔 ê 變化，tī 彼粒 hōo 先生號做洋刺波 ê 內痔一走出來隨揣專門科來問診，總是遮是德國 m̄ 是台灣，電話、電子批敲甲寫甲我想 bueh 規去轉來咱番薯島處理，總算有一間專門外科有時間 hōo 我齪嘈並得著一隻德國豬(Schwein gehabt)先生隔轉工有時間 kā 我處理。

按 Google 臆你佮意遐看來 ê 食譜感覺有興趣隨看厝內材料敢有 tsiâu-tsn̂g。

有，雞心豆有，生菜葉有，白花仔菜 mā 有隨成做愛食愛綴路 ê 綴 leh 做。

白花仔菜 tī 烘箱烘，湯鍋仔 ê 番薑仔湯 teh 𤉙，手內 ê 生菜葉當 leh 佮橄欖油牽手唱相褒歌。

我是 Pflücksalat➀，借問阿哥你是 Tsiâ。

對乎，借問阿哥你是 Tsiâ？

翁兜勥母蹛院，勥爸敲電話來交代昨日講 ê 危險已經渡過就開始無話講茭荖，問 gún 遮 ê 天氣按怎，問 gún 明年車日子 ê 計劃就是聽無𪜶後生問一句「你過了好無」hōo 我感覺爸母做到這个程度實在足悲哀，總是𪜶兜 ê 囝仔有這款態度𪜶做爸母 ê 人愛負責任。

翁兜 ê 家事我這个外人無權交插，總是爸仔囝彼日 ê 對話 hōo 我感覺足悲哀，家己捏大漢 ê 囡仔竟然是上熟似 ê 生份人，𪜶兜 ê 生份 m̄ 是咱認定 ê 18 歲就獨立 ê 生份，是後生出門車日子轉來第一个敲電話講平安 ê 對象是伊熟似十外冬 ê 朋友 m̄ 是𪜶爸母。伊這款手機仔捎起來 m̄ 捌想過爸母 ê 生份 hōo 我想著 Gún 一家伙仔生份人 ê Strangers in the House，是講 gún 翁 ê 故事佮這本冊無相仝，總是𪜶兜 ê 問題佮伊搪著我 tuì 伊相踏脫 ê 反抗 mā 佮誠品 ê 這段話無宛 2 體。

衝突，在於父親對於兒子自我主體追尋中，展現的巨大巍峨身影；也在於身處以色列占領的歷史境遇下，巴勒斯坦人主體行動、思考的關鍵性抉擇。戰爭在此一如劇場，內爆、震動、陌生化了舞台上微小個人的情感良知，特殊如父子至親，卻又普遍如境內人民，以致同屬一家，卻彼此隔閡疏離。

聽無後生 ê 關心閣 m̄ 甘掛電話開始喋伊這月日 ê 四常變化，𪜶開始食寡較早 hōo 𪜶投我想 bueh 毒𪜶佮無尊重德國人食食文化 ê 物，這些物 m̄-nā 好食閣健康。後生恬恬仔聽無問傷 tsuē 問題，坐踮客廳無愛聽𪜶爸仔囝對話 ê 新婦，因為伊開擴音 hōo 我無法度無 kā 耳仔成做天線斟酌聽，特別是魚這項。

「恁兜 m̄ 是規家伙仔攏 tuì 魚臊過敏？」翁電話掛掉我隨大聲問。

因為捷克白草花 hōo 我按本底是 Es sollte nicht so sein 無緣 ê 白草花轉做 Es sollte so sein 有緣，這幾日𫝛款是無緣 ê 紺草花開始 tuì 翁上童並呻我是大細目，懸低耳。

「我 tsiah 無大細目，懸低耳，是你無鹹無纖」

「我 tsiah 無無鹹無纖，是你 buē 泅嫌溪狹」

「你 m̄ 通有 sui 無 kuānn，烏白講話」

「這是水晶鐘，照玻璃 ê 清清清，你講別人 A-ta-mah-khòng-ku-lī 你家己 mā 是」

按瑞典挪威轉來彼盤若生菜盤挐絞絞 ê 電線(Kabelsalat)總算 hōo 我搝著線來接 FM 佮 AM。

自猶未學習台文，我 ê 耳空 kan-ta 華文佮淡薄仔 ê 英、德文，自開始學習台文，我開始情緒叨撚事事項攏愛有台語 ê 氣口，這个從來 m̄ 捌出現 ê堅持成做綁跤帛 ê 阿婆行 buē 出門。我 ê 14 是當我認為是按呢，台文警總 ē 走出來講「台語無人按呢講」。

不過，這个「台語無人按呢講」已經 hōo 我送去火星，起因我 ê 想法佮阿愷之聲 Podcast ê 靈魂主角 mā 是台長 ê 阿愷 tī 台語話故事專訪 ê 一段話相𫝛，我無要意別人 ê 腔口佮講法，因為彼是伊文化 ê 一部份。

Tī《波士尼亞佮赫塞哥維納ⒷⒶ露營》來去歐洲交通巷路揣美人車日子  ⋯ 波士尼亞莫斯塔爾 ▪ Mostar, Bosna i Hercegovina 我有寫著這段心路過程 tī 遮就免閣咸豐三，講到今。不過想捌記錄 2024 行踏瑞典佮挪威 tī 這兩个 hōo 我掠做真文化語文攏誠獨立 ê 角勢引𤆬我生湠第三目看世界學，彼就是 m̄ 免要意彼是外來辭，因為咱使用 ê 語辭攏是互相照應栽出 ê 果。

Tī 這兩个角勢期間，gún 聽瑞典語掠伊做荷蘭語，瑞典人聽 gún 講德語掠伊做丹麥語，gún 翁聽挪威語步頻掠做是拆句聽有鬥做伙無半句 ê 母語，讀無丹麥文 ê 我目鏡無拭 hōo 清氣隨瓠仔看做菜瓜 tuì 翁哭呻「恁德國人是閒甲掠虱母相咬是 m̄，遮爾仔愛 kā 外國人考試。」

窗捲簾一搝 Uller 猶未出帆行尞，Idun mā 猶未來栽欉，露台花矸步頻出現一欉跟綴 Apollo 火鬚 ê Lê-bóng 芳料草恬靜佮 Hesse ê 罩霧烏陰，每一欉樹每一粒石頭攏寂寞 tsham 我挨拶。

雪一蕊一蕊按迵光 ê 寂寞重重疊疊落向驚花落甲滿世界隨縖頷垂 ê 街路，有白、有咖啡、有掠做立春隨探頭 ê 新椏成做記持 ê 粉圓蜜豆雪花冰，手頭 ê 西洋萵仔菜是阿母 tuì 囝婿 ê 惜花連盆，疼囝連婿。

一手西洋萵仔菜，一目記持 ê 粉圓蜜豆雪花冰那剺目那食恬靜 tī 2月初5迒過春夏秋冬天佮地、掰開烏陰恬靜 Somewhere in time。

這幾月日翁彼台 tsham 伊 kiōng-bueh 平歲 ê la-jí-ooh m̄ 知啥物佗一條天線安無好勢步頻按頭篩仔電台踅去「彼是咱頂一沿 tsiah-ē 聽 ê 頻道」，這个臨時臨曜 ê 變化 m̄ 知 tsham 我雄雄接受我窮實 mā 行向舊漚舊臭有相干無，總是聲一耳入，就 m̄ 捌閣按另一耳出 hōo 翁跟綴我成做阿貓貓貓問「這台敢 hōo 火燒過，抑無你呔 ē tuì 伊遮有興趣？」

「無，總是我佮意 Wolfgang ê 聲音佮伊迵入神魂 ê 我知影我理解 ê 真影非假影」我笑應。

我無 tuì 任何人放送我 ê Blog mā 無去任何社群媒體拍廣告。

Sóo-tí 我 tuì 來訪 ê 人攏準做是風這个媒人婆𠢕做親情 hōo 我 這个自囡仔就無人緣 ê 人，人 buē 到，緣先到，入大廳，得人緣 ê 疼痛。

M̄-koh，這站仔我這个恬甲一隻蠓佮虼蚻攏無興頭來行踏 ê 所在開始出現不明字跡，面對這款 buē-su 海底雞 kan-ta 包裝號名無相𫝛 ê 罐頭訊息，我第一个想法是刣掉，總是海底雞 m̄   捌落第 kan-ta 升級，我呔 ē-tàng 綴𪜶 buē 著陣。另外，bueh 做寡《我在西伯利亞的監獄》談著露西亞按怎抹烏一个人 ê 故事，我 mā 愛𠢕做囮 hōo 人看 buē 出是假影。

添歲猶是有較縒，tshan-tshiūnn Rügen ê LALA 一冬無見關節退化甲 hōo 伊無法度閣 tshan-tshiūnn 頂年按呢，物件食煞隨無見狗。

一字一字斟酌讀，咱感謝海底雞 ê 熱情知影咱 teh 糋膩瓤板膋 sóo-tí 無囥步，總是德國 m̄ 是台北抑是高雄，有法度 kā 長途轉做短途來走，我只好纏綴生份人成做海底雞踅金龜磨寫相𫝛 ê 句，總是我傷過頇顢 hōo 海底雞感受 buē 著我 ê 誠意食水甜，sóo-tí tī 伊一生懸命(isshō kenmei)紹介遐爾仔 tsuē 資料我猶原若罐頭 m̄ 捌調整鹹汫，我遮又閣踅翻頭到半隻蠓仔佮虼蚻攏無 bueh 來挨拶 ê 角勢。