亂皂𥴊仔店 ⓂⒺⒾⓃⓀⒾⓄⓈⓀ

1. 一个族群 ê 文化，你愛用伊 ê 語言思考《寶島鼓仔燈，公視台語台》
2. 『你或許不知道，這世界上最直接的咒，不是別的，就是名字。...你必須要從這個咒裡解脫出來。』《絕島之咒》

家甲猶未做來德國進前 tī 遮搪著 ê 無四序一上飛行機隨 kā 伊送 hōo 闊莽莽 ê 天去消化，家甲做來德國規身人宛然 buē 開花結子 ê 弓蕉 uī-tio̍h 適應德國環境骨力反變，總是閣較𠢕反變閣較𠢕樂觀猶是 ē 無細膩 uī-tio̍h 別人 ê 情緒激大派踅入這个無屬於我 ê 情緒烏空。

2023 交翁雙人以德語討論事項，一位交 gún 有短短緣份成做睏天路隔壁厝邊 ê 德國女性老師 tī 翁徛起身去貯水燃燒茶行倚問我一句話「你 buē 曉講德語 mā buē 曉講英語，著 m̄ 著」，自伊停跤到伊代我先離開 ê 這段時間，我相信伊請教 ê 這兩種語言攏有出現 tī 我 ê 喙，呔討伊 bueh 按呢請教彼久 ê 我一屑仔攏無要意這久愈 buē 顫悶，總是巡田園翻菜股 ê 這久讀著栽 tī 2021.02.02 ê 心情花 hōo 我成做貓想 bueh tuì 家己候脈，竟我真𠢕做枷車藤。 

「英語交德語攏 m̄ 是我 ê 母語，不而過合該猶有才調交逐家練仙破豆」這位德國老師以德語請教我 ê 頇顢我 mā 以德語回應伊 ê 請教。我 m̄ 知影伊按怎看待我 ê 回應，總是當尾句落塗，gún 露營地 ê 女主人 mā 開喙以少少 ê 英語請教 gún「敢有啥物代誌需要伊 kā gún 鬥相共--ê？」，我微微仔笑答「一切四序甲若轉來到厝，多謝你」，這位德國老師一句話攏無回應斡頭做伊走。有露西亞血統 ê 愛沙尼亞女主人以表情問我發生啥物代誌，我鴟鴞肩表示 m̄ 知影，女主人 mā tìm 頭表示理解微微仔笑表示按呢伊去無閒，有代誌需要鬥相共抑是 bueh 結數 gún 翁仔姐知影伊 tī 佗落。

紲落來 ê 睏天路車日子 gún tī 立陶宛出名 ê 墓曠閣搪著這位德國老師，不而過按伊見著 gún 步頻換 ê 跤路，我想伊該然認為沐著打馬膠（Pech gehabt/歹運），我個人因為樹頭徛有夠在，風颱直直剾樹尾猶原健欉，一屑仔攏無受著影響。

2025 睏天路車日子無人閣按呢請教我，不而過按魂舒氣質湠來 ê 氣味，伊完完全全宛然歷史老師呂捷分張伊去美國演講 ê 感受「你 buē 聽著歧視語言，不而過無聲 ê 恬靜 hōo 你現現知影輕視栽 tī 遐。  」

按病院坐輕鐵轉來厝 ê 過程步頻想著這件代誌。論真講，我應當`是 tui 遮 ê 一切感覺驚惶。因由遮 ê 一切 tuì 我來講是 m̄ 捌看告示，不過這个所在帶 hōo 我 ê 恬靜佮自在是彼个 tuì 咱 tsuē-tsuē 臺灣人 buē 講生疏 ê 角勢 m̄ 知幾仔倍，總是我 mā 是愛講我較頇顢 buē 曉 tsham 人盤撋...m̄-koh，踮這个 m̄ 免斟酌看就通知影我是外國人 ê 所在，準做我是 m̄ 捌字看告示 teh 盤車抑是踅街路，我攏 m̄ 捌 kā 心捾踮手頭 m̄ 放。

讀《台文通訊Bong報》石牧民老師文學káng「台」專欄〈看無台文ê人看台文khah無〉hōo 我想著蹛院無聊紮冊去讀 ê 鬼鬼祟祟、掩掩揜揜。

這款讀一本冊若 teh 做賊仔 ê 龜怪，窮實 mā m̄ 是第一斗出現，總是有法度自在 tī 公共空間讀一本冊 mā 是按蹛院 tsiah 消敨 ê 自在。

石牧民老師〈看無台文ê人看台文khah無〉討論 ê 問題 tuì 我來講 tshan-tshiūnn Sokrates 分張 ê 智慧，咱無一个人，有十全才調講，知機啥物是媠啥物是好 ê 隨人喙斗，m̄ 免 uī 這个話題踅金龜磨。 

不過石牧民老師這段話引𤆬我翻草徙岫德國前後 ê 讀冊變化。

遠兜 ê 花蕊猶原踮心頭勻勻仔分張伊 ê 清芳

猶未起行 ê 跤花，聊聊仔啉一甌茶，等伊開花，等伊蔫。

將伊 tsham 遠兜 ê 花蕊掖踮花圃，繼續清芳，繼續五彩。

聽作家顏冰心女仕分張伊 ê 換年有一項是目睭焦甲若火燒埔，聽歷史老師陳啟鵬老師分張伊 ê 換年拄著情緒懸低坎 ê 問題，我無確定我敢開始換年，總是我確定我 ê 來洗沓沓仔行向于美人捌分張 ê 本底一日五包，這久一年五包猶閣有三包通繼續使用。

我無確定我 ê 人生敢正式行入換年，總是這久 ê 我確定徛 tī 醫學設定 ê 換年年間。講醫學設定，起因朋友 ê 阿母無照大數據來換年，朋友 ê 阿母到六十歲 tsiah 開始換年，我 ê 阿母 45 歲進前就無子宮，我兩个阿姊一个 29 歲 hōo 塗牛𤆬去塗州賣鴨卵，一个認為只要保持身材翁婿就 buē 佮外口彼个夥計大麵炒粉圓，押尾翁婿猶原夥計膏膏纏，伊人無到 40 換來直腸癌尾期，按發見到離開無到半冬，伊透世人對抗 ê 夥計 mā tī 伊轉去塗州猶無到半冬就入𪜶翁 ê 家甲。

無日 m̄ 知晝，無鬚 m̄ 知老。雖罔，歲頭一直纏綴時間沓沓仔 tī 向前行，m̄-koh 記持煞 m̄ 捌纏綴歲頭向行前，tsuē-tsuē 代誌定定是一耳空入，一耳空出 hōo 家己無法得用這款態度「時到時擔當，無米 tsiah 煮番薯湯」來處理代誌，起因現此時 ê 家己捷捷是騎牛揣 m̄ 見牛。一个物件 tsiah 拄用過，後一秒著會揣甲心狂火著，氣怫怫、𧿳𧿳跳，所致我已經清楚知機家己有九月狗爁日，頇顢查某理 buē 直 ê 特性，趁這久記持 tsham 咱重重疊疊，緊用手刀 kā 伊寫落來。

　　故事1.

公寓 ê 外牆倚 bueh 二十冬 m̄ 捌換過新衫，厝頭家媽交油漆公司 kā 價數攏講定了後，油漆公司隨派專員來阮 ê 社區通知逐家𪜶底時 bueh 來開工。彼久捷 hōo 我笑講規年迵天 kan-ta 搪著跤球活動人 tsiah-ē 成做獅子王知機伊人猶閣活跳跳，賰 ê 時間齊是若輕兩相 ê 小金英一離開厝互相再相見愛看風吹 ê 方向 ê Daniel mā tī 厝，交伊做陣做厝邊倚 bueh 10 冬掠伊是出外人，想 buē 到伊交我 mā 有相𫝛 ê 狀況，搪著家己人 tsiah-ē 自在成做家己。

油漆公司專員來揤日 ê 彼日，專業是 thài-lù 師傅 mā 拄好收工轉來，油漆公司專員隨 kā 工程過程解釋 hōo 伊聽，紲落來 Daniel 成做我上熟似 ê 腔口 m̄-koh 捎無啥摠 ê Schwäbisch 交油漆公司人員開講，我微微仔 tìm 一下仔頭表示我 ê 部份已經理解清楚說聲 Danke, tschüß 離開這个美麗畫面。

法國 Wissembourg(Alsace)搪著 ê 古錐

〈渡自家行尞，行心 ê 路〉

朋友問我人 tī 佗落？

我講，人 tī 波蘭。

是按怎你 bueh 講台語？

天色是卵仁，大地發新穎

翁仔姐那行跤花那栽跤花

這秒 ê 家己成做頂一秒 ê 家己

翁仔姐那行跤花那栽跤花

偝仔內 ê 斯當時是 gún 翁仔姐 ê 現此時

• SEIN RAT IST WUNDERBAR und Er führt es herrlich hinaus/JESAJA 28/29 

伊 ê 建議真好，而且伊執行甲真好。

人生矣，

一暝睏醒，窗外白。

一暝睏醒，視雺雺。

那食下昏飯那聽 La-jí-ooh mā 那看露台影戲變化，本底佮 gún 保持社交距離 ê 厝鳥仔，這久見著 gún 按灶跤行到食飯廳 buē 閣 tshan-tshiūnn 較早按呢隨飛甲無半隻。

Gún 那食飯那享受遮 ê 無經過彩排抑是設計 ê 影戲，步頻西北雨來相揣，厝鳥無愛佮伊做朋友斡頭隨走，賰 gún 隔一个窗佮西北雨相向。

Gún ê 飯頓食 bueh 煞尾，西北雨 mā 若沓沓仔接受家己正港是無人緣臭乞食羶願意離開，「敢閣 bueh 食寡甜粅粅」我問 gún 翁。

「當然 mā bueh」伊笑甲裂獅獅，我隨窮碗箸準備換桌，一種我講 buē 出喙若日鬚勻勻仔趖入窗仔門 kā 我叫精神 ê 熟似 hōo 我自動反應越頭看窗仔。

「你 tī 看啥物？」翁問。

• 心神行跤花 1.

頂日恬寂寂 ê 部落格步頻加足 tsuē 號碼，我 tuì 全世界 kan-ta 伊知機我有 teh 寫部落格 ê 翁講「我 ê 部落格今仔日起德國蛟龍。」

「按呢誠好，表示你踮德國 mā 有讀者」翁笑講。

「我無啥確定恁德國人 ē uī-tio̍h 頂港無名聲，下港無出名連看板 mā 無興趣落落來 kā 伊摃一下 ê 人匪類伊交 Sandmann ê 美好時間」我講。

「啥物意思？」

「我部落格 ê 德國國旗按時間來推斷，是歐洲半暝，亞洲日時」我講。

Ich weiß nicht warum ich plötzlich an meinen Ex-Freund denke.

Ich suche Antworten.

Also...naja....

Mein Mann ist an meinen Augen vorbeigangen.

Ich sah meinen Mann an und plötzlich ich fand die Antworten.

• 陪伴你家己行你 ê 路

Geh deinen weg lass dich begleiten

我 tuì「數字」無感覺，所以從來 m̄ 捌要意部落格若股市 ê 線圖，夜間部同學 gún 翁就無這个想法，伊要意部落格 Meine Reisen ê 數字要意甲無人行踏隨 kā 拋荒到今。

伊這款態度 hōo 我愖著猶 tī 面冊沐沐泅 ê 過了代，有人 uī-tio̍h 成做桶箍骨力做蝶仔一四界飛去人兜挨拶兼栽喙花，有人 uī-tio̍h 美麗 ê 數字甘願 hōo mǹg-sǹg 龜鱉叨趖生毛帶角 ê 人侵門踏戶吵家抐計。

我食現實 buē 生龍銀 ê 事工 buē 沐，準做伊是金色 ê 驢仔摸一下隨生龍銀，這龍銀 buē 𤆬 hōo 我恬靜不過貿來規山坪 ê 刺鑿，我 mā buē 綿死綿爛交伊纓纏，畢竟落塗時八字命，我出世 ê 年閣 m̄ 是《臺灣女性人物群像》，我出世 ê 年閣是頭路 m̄ 驚覓無 ka̋nn 驚討食 m̄ 討趁。 

啉一杯咖啡，hōo 時間

精神，沓沓仔

Tshuā 我去散步

毋知風，到底是按怎？

一直來挵門

• Um das Gute zu lesen, ist eine Bedingung, dass man Schlechte nicht lese.

Bueh 讀出好 ê 代誌，一个條件，就是莫讀出歹 ê 代誌

Arthur Schopenhauer

Gún 翁仔姐無論感情抑是錢項齊行無仝爿 ê 有才調相佮牽手到目今，無一个人需要 kā 剖 buē 開 ê 橫柴捎來做練身體健康 ê 器具抑是 kā 開喙 ê 六月蛤捎來做飯頓食補，我想這交 gún 兩人經濟齊獨立，無一个人需要食對方 ê 月光下看人影交月光跤看人影，另外 mā 無一个人無要意出錢 ê 人伊趁 ê 錢是毛管空出汗 ê 錢 kan-ta 要意你交我牽手你就愛負責我 ê 大細漢，像𪜶兜透世人 kan-ta 結婚前捌做過幾冬穡 ê 勥母，想 bueh 挃 ê 物無 hōo 伊挃隨歹油厚滓，歹豬母厚面屎。  

德國 ê 法律確實有立法規定查某人做穡需要查埔人同意，總是勥母出世 ê 年代已經無這條法律，社會 mā 無時行查某人就是愛跍厝扞家。別人兜代閣講落去是歹瓜厚子，歹人厚語 m̄ 通熥 buē 離。

「你 bué 啥物冊」翁問。

「一本法國寓言，一本英國小說，一本著 tsuē-tsuē 文學獎 ê 𠢕人寫 ê 小説」我講。

「第三本 bué 了真好，按呢你 ē-tàng 按文學獎𠢕人 ê 作品揣著評審 bueh 愛 ê 氣口」伊講。

「我無遐爾仔欠錢，需要 kā 家己成做 Fraust」我應。

Buē 記得是 tī 當時收著電子批邀請我參加台語詩文學獎比賽，收著電子批清楚知機家己頇顢寫詩，準做寫 ē 詩我寫 ê 詩 mā buē 敆評審 ê 脾土就放棄，總是人就是行 buē 出虛華 ê 罩雺，電子批前一秒關掉，後一秒隨列印報名資料閣家己洗腦「是主辦單位主動來批邀請我參加 m̄ 是我圓仔花 m̄ 知䆀，大紅花䆀 m̄ 知。」

捷克 Babylon 露營地 2025.08

阿波羅金頭鬃是規年迵天幔雲紗僫見 ê 色緻，今呔會成做 Medusa ê 雙叉路。啉一喙 Ka-pi 越頭看疊甲若林檎葉仔酥 ê 被單枕頭，敢 bueh 無事惹事佇這个 m̄ 免刁工揣金色絲仔絨就 ē 隨做石頭 ê 芒種車日子?

節氣是黃道十二宮，慾望是時行 ê 鹿林長尾星一出門 buē 閣翻頭相借問，往過 ê 𥍉𥍉看這久那 ē 遮成連壁紙攏比伊閣較有價值 ê 阿爸戰士授田證。

原來煞心是陳世美 m̄ 是準做無人 bueh 行踏，伊猶原 ē 照地支摃銅鐘 ê 教堂鐘聲。烏仁目鏡掛咧，拍 buē 死，埋袂密 ê 烏面賊隨成做我 ê 樹蔭。葉仔酥𢯾咧三划做一划划向倉庫 ê 炸彈 m̄ 知底時 tsiah-ē 清 hōo 離 ê Balkan。

按德國划向銃藥囤較少 ê 羅馬尼亞上短 ê 路線是順多瑙河划奧地利佮匈牙利，我數念越南人 tī 捷克帶 hōo 我 ê 家鄉味，mā 貪戀一台牛車窒倒衫仔褲猶原 buē 俗物 bué 破家 ê Slovenská 賊仔市。

出門行跤花前幾日，m̄ 知啥物因端我 kā 翁借我讀資訊 ê 面冊口座按家己 ê 筆記註銷。

這久搜揣彼久 ê 心情猶原 m̄ 知呔討按呢決定，就 hōo 過了代跟綴消失 ê 時間旅行免閣 uī 伊踅金龜磨愖仔愖，總是目今 ê 變化 hōo 我好玄甲，伊是按怎培養交按怎慣勢？畢竟我是一个真𠢕 tuì 家己點磺火 ê 人。

這斗出門行跤花進前，準做出門忝甲貼貼轉來到厝，無牢 tī 遮我 buē 放家己收煞。

這斗出門行跤花轉來，準做規日閒甲貼貼 mā buē 閣情緒叨撚講「部落格猶有遐 tsuē 現世 ê 文章，是按怎猶有法度遮爾仔貧惰骨。」

是發生啥物代誌？畢竟我無要意數字。

Ich bin zu arm, ich kündige als Hausfrau für meinen Mann.

Uī-tio̍h gún 翁，我 kā 頭路辭掉，我有夠可憐

Ich bin zu arm.

我有夠可憐

Ich putze das Haus für dich immer kostenlos.

Tsuē-tsuē 代誌因為捷捷接觸成做慣性就 buē 理落心肝蒂 ê 礙謔。起因逐家攏按呢相𫝛免掛意，橫直一隻喙糊瘰瘰抑是盤喙錦猶原比頂真較有法得 hōo 成百成千 ê 目睭按咱遮炤過來。Iáu-m̄-koh，mā 有 tsuē-tsuē 代誌 ē 因為捷捷接觸反倒轉感覺理路無通就開始搜揣資料敨放拍結毬 ê 中氣。

像「阿表」這个字名 ê 台羅，寢頭我是使用「講我的名」標示 ê 「A-piáu」做書寫。不過便寫一回神魂就攑手問，這个生份人是 tsiâ？總是我在來 m̄ 捌管待伊 ê 攑手，起因「講我的名」就是按呢寫「Piáu」，一直到我發見講定 ê 筆名 hōo 人嫌水準無夠閣無經過我 ê 同意自動 kā 我換名，我 tsiah 因為這件喙講咱語言媠 m̄-koh 心看 buē 上目 ê 假仙受氣心狂火著 tsiah 步頻聽著遮 ê 聲音，這个「A-Piáu」是 tsiâ。

伊若是自水帕(phè) 就聽慣勢 ê 聲音是按怎樣我 ē 感覺伊遮爾仔生份。踅轉來 「講我的名」閣請教一擺，果真是我家己 ê 失誤。我 kan-na ē 曉 khop-pih buē 曉斟酌繩佮愖礙虐，大力按頭額𢼌落去 kā 阿母會失禮 mā 更加確定我無妝娗我 ê 驕傲佮歧視。只是我誠實對不住阿母 kā 伊 ê 名按呢豆乾 hàu 媽祖，清彩準過。

阿表(A-Pió)是 gún 媽媽 ê 字名，使用 gún 媽媽 ê 字名做筆名 kan-na 這个想法，我有法度成做佮伊無相𫝛 ê 查某人 m̄ 是我較勥跤是我比伊佮其他 hōo 人當做 kan-na 知按怎歹油厚滓，歹豬豬母厚面屎來處理代誌 ê 人較好字運。我字運較好無搪著冬瓜生 m̄ 著冬掠外，mā 感謝𪜶成做我上堅強 ê 後台 hōo 我行有跤步。

臺語敢有影無文字?我是 buē 了時間解釋這个問題，起因讀過歷史 ê 人攏知影希臘文字按佗落來，影響歐洲千外冬 ê 羅馬字又閣按佗落來，閣 bueh 講落去 mā ē-tàng 接續露西亞文字 ê 起源佮土耳其文字按怎轉化做仝文仝字，sóo-tí m̄ 免講遮爾仔 tsuē，起因咱大多數人攏生 tī 智識自由 ê 年間 bueh 得著啥物智識隨在個人 ê 選擇 m̄ 免加我一个成做三藏講經 hōo 猴齊天𪜶聽 。

平等公正 ê 態度面對各人差異…

若準一个人願意為國效勞，伊絕對 buē 因為家己 ê 環境比人衰尾䆀空就感覺餒志。

咱 tī 政治當中享有 ê 自由，𫝛款合用 tī 咱 ê 四常生活….

咱 buē 因為別人做家己佮意 ê 代誌就隨發性地。

 Perikles

• Nicht Erklärungen helfen uns weiter, sondern unser Wille voranschreiten

解釋 buē 協助咱向前行，是咱向前行 ê 意志

2023.12.31 tsham 翁 ê 朋友做陣迒年想著早前咱真愛講咱臺灣人攏按呢，人外國人 tsiah-buē 按呢 ê 故事。遮 ê 故事有偌 tsuē 是咱家己搪過，有偌 tsuē 經過咱家己斟酌愖過，我 m̄ 知影，總是聽翁 tuì 我按呢講，我想我這个智識無夠額 m̄-koh 有頂真纏綴𪜶兜 Nietzsche 這段話行 tī 哲學路有影響著伊。

「我 buē 閣若業務仔繼續推銷𪜶行 buē 去出 ê 箍仔。」

感謝我一直保持德語無輾轉 ê 慣勢，所擺搪著我無想 bueh 回答遮 ê mā 熟似 10 外冬一年凡勢 tsiah 見 2 ~ 3 擺面 ê 朋友就會使得自在成做 Ludwig van Beethoven kā 𪜶 ê 問題準過。