亂皂𥴊仔店 ⓂⒺⒾⓃⓀⒾⓄⓈⓀ

烏塗散，金花來

Dunkelheit geht raus, Helligkeit kommt rein

Darkness goes out, lightness comes in

窗一挩，一隻火鼠在眼前

Fenster auf, ein Eichhörnchen vor meinen Augen

Nicht Erklärungen helfen uns weiter, sondern unser Wille voranschreiten

解釋 buē 協助咱向前行，是咱向前行 ê 意志

2023.12.31 tsham 翁 ê 朋友做陣迒年想著早前咱真愛講咱臺灣人攏按呢，人外國人 tsiah-buē 按呢 ê 故事。

遮 ê 故事有偌 tsuē 是咱家己搪過，有偌 tsuē 經過咱家己斟酌愖過，我 m̄ 知影，總是聽翁 tuì 我按呢講，我想我這个智識無夠額 m̄-koh 有頂真纏綴𪜶兜 Nietzsche 這段話行 tī 哲學路有影響著伊。

「我 buē 閣若業務仔繼續推銷𪜶行 buē 去出 ê 箍仔」

翁某做伙食早起頓我 tuì 翁講「我 buē 記得熥拜請 Google 翻譯 kā 我鬥寫 ê 英文，這久發見無人來交觀是一件好代。」

「我逐日攏來交觀兼掠漏」翁笑應。

「承蒙你，按恁細」我講。

想 bueh 訓練家己 ê 筆力，一斗寫五種文字，前兩種文字華文交台文猶算在手，所致寫甲順勢兼較 buē 刺疫，按華文交換手 hōo 德文規身(sian)人就成做樹趖，按德文交換手 hōo 英文，我已經成做柴頭尪仔無想 bueh 動跤動手兼激腦筋就 kā 專業發包 hōo Google Übersetzer 翻譯。

Tsa̋ng 凡勢是樹趖駛 Bián-juh，我開始一篇一篇巡，一篇一篇繩，那巡那繩 mā 那感謝連蠓攏無興來，抑無正港是卸世卸眾，紅字一大堆，包括華文。

Why do I deserve the science

to feel better about you?

At a loss I lost my cool

I denied that I found you....

Manchester Orchestra - The Silence (Official Music Video)

Tsit 幾工正手爿 ê 肩胛頭痠 kah buē-su hōo 針 teh 揻，揻揻 tsǹg。

腦海開始 tī 踅 tsit 件代誌，ia̍h-bô 暫時 mài-koh 練習台文寫作。

按呢做，我肩胛頭 ê 痠無定 tio̍h ē 消失。

Tī 我猶原 teh 踅金龜 bō ê 時陣，做陣十外冬 ê 同事。

伊總算迒過 Telegram 無四方字 ê 戶橂願意 īng Telegram tsham 我做伙跨海 phò-tāu。

Tsa̋ng 下晡步頻摔大雨，根定 tī 電腦前 ê 人樹我隨抽根傱去磚坪 kā 楔 tī 花坩 ê 鳥飼料收起來，聽候雨落過田岸車路 tsiah kā 伊提出去分張。

德國 ê 雨罕得落西北雨 mā 罕得落查某雨，這雄雄來相借問 ê 雨敢是風颱雨？擔頭四界巡穹蒼(kiong-tshong)，天無一搭坐清，m̄ 管伊是啥物雨，只要莫做𤺪雨斡頭接紲 Werthers(維特) ê 世界。

人 bueh 挐，一時間，雨 bueh 停，也是一時間。尻川斗猶未坐 hōo 燒，走無見人 ê 金烏迵過窗仔一鬚一鬚牽藤到魂舒。出大日矣，鳥飼料會使得重新楔入花坩，徛起身行向磚坪，來報到 ê 厝鳥仔連隨喝解散。

「恁這連交膨鼠相𫝛，僫鬥陣」我慢聊聊仔伐向廚房提飼料那笑講。

這是照客語辭典書寫食譜收著 ê 指教。

收著指教 ê 當下気持ち䆀甲心狂火著 uī 伊寫一篇論文，這久翻頭看彼久正港是無彩咱真珠 ê 時間。

不過，彼久 ê 浪費時間成做這久 ê 智慧 --- Um das Gute zu lesen, ist eine Bedingung, dass man Schlechte nicht lese bueh 讀出好 ê 代誌，一个條件就是莫讀出歹 ê 代誌，所致感謝這位 Mǹg-sǹg 交其他 ê Mǹg-sǹg，無恁 ê 行搭低路人無才調按恁 ê 圓湠出另外一个圓 Kreis von Kreisen 並學習這項工夫，按怎 kā 鳥鼠仔屎囥甲變真珠，像這久頭殼空空隨有物通補腦空 hōo 納出去 ê 台票 599 無拍損。

勞力．Danke --- 摎𠊎講「Mein Name ist Hase➀」，總--是敗勢 Ihre mˇ diˊm̄ 是 my duty。挑戰大武四界 m̄-thang kan-na bat「車頭」(Ich verstehe nur Bahnhof➁)。

#記錄寫踮 IG ê 文字

#分張你佮意 ê 冊

我 ê 親人攏 tī 天頂過四常，無人通按臺灣寄物件 hōo 我，sóo-tí 我足期待逐回 ê 郵差來揤鈴，雖罔遮 ê 物件齊是我家己寄 hōo 家己，總是我原仔寄甲歡喜甲。

多謝每一間願意 kā gún 遮 ê 僫揣人 mā 無資本一直走國際線 ê 人 kā 冊寄到遠兜 hōo gún ê 冊店。

另外，陳柔縉老師 Ruhe in frieden.

你敢 ē uī-tio̍h 一項你無動著 m̄-koh 伊煞自動消失 ê 代誌掠狂心悶？

向時 ê 我誠𠢕 uī 這款無聊代成做 buē 記持禁火 ê 茶鈷呻 buē 離閣清飯熥 buē 離，這久搪著相𫝛 ê 問題，我 tuì 空空 ê 電腦資料篋仔交交相，一句歹話無講，一絲齷齪無倚 hōo 我深深感受離開䆀就是聰明 ê 益處。

2023.05.07 我 ê 電腦 m̄ 知佗落 m̄ 是勢，保存 tī 硬碟(ngē-tia̍p) ê 食食攝相齊偷走厝無見半張。往過 ê 我第一个動作是拚勢揣影跡，向望透過遮 ê 影跡 kā 𪜶揣轉來，這久 ê 我隨在伊，畢竟伊無 tshan-tshiūnn 目睭、跤腿、身體健康遮 ê 自來物遮爾仔珍寶。所致，m̄ 免 uī-tio̍h 伊 ê 成住壞空 kā 家己舞甲若阿修羅仝款。

時間短短愛 kā 成住壞空致意 tī 珍貴，像看一齣影戲，聽一首歌，讀一本冊。像這久巡田園，翻田塗，修舊枝，接枝湠新欉，總是有 ê 枝骨就是無好接枝，有 ê 田就是無好栽新欉，抑是按算 kā 拋荒 ê 無的確，m̄ 管佗一類形體我齊愛 mā 享受屬於我家己 ê 成住壞空交侘寂。

像這篇心情練花跤四常 ê 我 ē 順原文 kā 伊翻譯做台語、德文交英文，這久 ê 我意愛兩種人生 tshan-tshiūnn 天佮地，永遠有 hōo 人料想 buē 到 ê 新事物交舊事物 tī 𫝛一个空間恬靜完成自家(ka) ê 成住壞空並學習侘寂。

It was in Gdańsk that i met my wife Danuta, it was here that our children were born... And so i became a Gdańsker by choice.

--- Lech Wałęsa

自彼日再會一目𥍉仔已經倚 bueh 3 冬，踏出門埕若見著盤山過嶺蹽溪渡湳 ê 朋友，海馬總愛泅水，泅去 uī-tio̍h 自由 uī-tio̍h hōo 家己有出頭 ê 彼一日 m̄ 驚風 m̄ 驚雨 m̄ 驚未知 ê 後一秒，下性命成做烏仔魚搢水 ê 同學，這久 ê 𪜶敢猶停跤 tī 德國。

出世 tī 富裕 ê 西德，萬事齊愛趁伊意 ê 翁 tī 阿波羅金色頭鬃沓沓仔順德國鱟百(peh)冊關無峇 ê 閬縫勻勻仔牽藤到 gún ê 雙目，伊隨成做鬧鐘仔自動喨 buē 離「今仔日出大日，咱愛出門行跤花。」

入眠床，順睏神 ê 我跟綴 Warum Beethoven taub wurde 呔討 Beethoven ē 聽 buē 著 ê 智慧選擇聽 buē 著繼續 tī 烏空遊山耍水到巧機仔設定 ê 鬧鐘仔 kā 我吵精神，紲落來優雅款早起頓兼繼續成做 Beethoven hōo 翁某感情有法得無聲繼續牽手透流，畢竟這款詬詬唸無毒毒，若有毒 mā 加加起清瘼 niā-tiānn。

當奢華成做湳塗 ê 慣性，

當慣性成做湳塗 ê 好玄，

四常是花 lo̍k-lo̍k ê 虹抑是九層酒漏仔。

In Essen veritas 食食有真相，

Die Wahrheit hat Gedanken 真相有數念。

面冊口座刣掉發見家己 m̄ 管是目睭擘金抑是 bueh 睏進前，黏 tī 眠床頂 m̄ 願 kā 目蚶合起來 ê 時間沓沓仔愈來愈少。

面冊口座刣掉發見我這个𠢕起性搦地 ê 人 buē 閣遐爾仔磕 buē 著就綴面冊 tī 遐𬦰崎落崎。

 面冊刣掉發見往過磕 buē 著就想 bueh 寫寡啥物 ê 筆力若敢若擔頭看著日頭 bueh 落山，就隨轉來厝好好歇睏 ê 做穡人𫝛款，buē 閣若 buē 死心 ê Apollo 直透逐 Diana。

我 m̄ 知影家己是 tī 底時決定刣掉面冊又閣是 uī-tio̍h 啥物因端，總是我清楚知影我 tuì 遐 ê m̄ 管無料分張抑是家己出現 tī 門跤口 ê 萬項事 m̄ 是飫是感覺鳥鼠決定是有洗身軀 m̄-tsiah ē 無鼠味(無趣味)。

Tshan-tshiūnn 逐日攏看 ē 著 ê 德國超市紙本廣告𫝛款，𪜶愈櫼廣告單我就 tuì 𪜶兜 ê 物件愈無興頭。

(圖片來源：Wikipedia)

翁某做陣行踏別踏 ê 城市(Neckartenzlingen)踅賣場。

賣場賣 ê 物件佮價數 tsham gún 捷捷行踏 ê「PicksRaus」無啥精差，不過原仔愛講遮較古早味一寡。

起因，踮遮竟然有機會搪著凡勢是連德國少年家 mā m̄ 捌聽過 m̄ 捌食過 ê「Frühstückskuchen 早起頓雞卵糕」。

這个意外 ê 拄搪 hōo 我隨捾一條行到 gún 翁 ê 面頭前講「Ich glaube, ich spinne➀」翁隨問好--ê 抑是䆀--ê。

這久翻頭看彼久猶原行 buē 出世俗認定 ê 標準，我是豬母牽去牛墟。

徛起身行向廚房斟杯茶，目睭䀐著彼本看甲無意無意 ê 華文冊，隨笑家己𠢕哭呻別人是乞食攑蠓捽，假仙假觸明明就是中國糜鹿硬 bueh 講家己是臺灣水鹿 ê 假範，這久 ê 家己敢 m̄ 是 mā 按呢生，無法度認真面對自來 ê 家己，m̄-koh 下性命捎別人 ê 神魂來妝娗家己 ê 文字兼強調家己交別人 ê 無相仝，特別是得著主流支持 ê 舊漚舊臭。

我 ê 部落格無 uī 生份人書寫，無 uī 流量 hōo 家己透早是四跤杜定，暗頭是蟮蟲仔，這久 ê 我呔討趖入牛角並踅金龜磨？

我 m̄ 知機 mā 無興趣 uī 伊寫論文，起因我清楚知機遮 ê 問題自寢頭到目今 m̄ 捌成做橫扴 hōo 我齷齪，不過引𤆬我翻頭繩放伊自由 ê 斯當時。

露西亞講 U-kher-la-in kā 𪜶草踏甲四角磚踏無一角著，致到𪜶愛拚一帖白虎湯來解決 U-kher-la-in 造成 ê 病疼。

2024.05.05 Westpol - Die Luxus-Schleuser 報導猴穿衫做走水 ê 新聞 hōo 我想著阿度 ê 故事，𫝛時想著 tsuē-tsuē 臺灣人一聽著 gún 翁是德國人隨認定我因為這个德國翁婿 mā 綴 leh 成做德國人 ê 故事。

遮 ê 故事無啥物通好喋詳，不過新聞事件 ê Die Blaue Karte EU 拄好 ē-tàng hōo 捎出來熥。

提碗想阿貓-- Restella Camp, Montenegro.

食咖哩想殘殘脆脆拒絕 Blue Card ê 阿度。

碗是按 Budva, Montenegro bué--ê，一塊 1.5€。

頭家恁攏 teh 講啥物話，gún 攏 teh 講行仔內 ê 話。

安歇日翁仔姐做陣食早起頓翁講「咱 tī S 庄食 ê 挽肉 Tshì-sù Pide 實在 buē 食得，拜五咱有款一包赤膩瓤➀ Tshì-sù，我敢 ē-tàng 請媠某你 kā 我鬥相共款一份媠某牌 Tshì-sù Pide？ 」 

「大丈夫。」

我是按阿母轉去塗州 ê 隔轉年，心有一个大烏空行 buē 出來就聽朋友 ê 介紹交你做陣耍西洋啖糝物解心悶，朋友跟綴網路眾神學習做雞卵糕，我跟綴朋友分張 ê 𠢕人 Carol 自在生活部落格學習按呢以手撋麵粉做麭，紲落來按 Carol 自在生活交換手 hōo Plötzblog Selbst gutes Brot backen 學習做德國酸酵母麭，遮 ê 日子一目𥍉 mā 十外冬，tī 這十外冬我 mā 倚 bueh 6 冬 m̄ 捌行踏𪜶 ê 部落格，這个變化表示我已經行出心內 ê 烏空，準做我猶原數念塗州 ê 親人。

今仔日那款麵粉那 kā 滾水過磅，頭殼想著公視台語台《行仔內 ê 話》EP4 高雄燕巢(iàn-tsâu)幼麵 m̄ 是無遮 ê 辭是咱 m̄ 捌學過 ê「工夫話」，隨 kā 影片請出來餾，那撋麵粞頭殼 mā 若想，遮 ê 話愛 kā 伊記錄踮 Blog，畢竟人生 tshan-tshiūnn 大舞台，苦齣笑料攏公開，無 kā 𪜶成做文字記錄，𪜶 tī 我 ê 頭殼 tshan-tshiūnn 一陣風，一颺過面就無地揣。

我 ê 網路敢有安妮亞？抑無 YouTube 呔 ē 推薦我看交我八字無一撇 ê 范琪裴的美國時間 --- 離婚了...然後呢？

別人兜 ê 離婚代交我無底代，跳過。總是 YouTube 敢若驚我想 buē 開又閣捒這支影短片 --- 愛上一個人是天災 ....#關於離婚這件事，片頭縛毛尾仔 ê 女士「時間不會療癒人，就是你的覺醒才會療癒自己」kā 我按別人兜 ê 離婚代交我一屑仔攏無底代轉做 Meow 斡頭揣離婚了...然後呢？這支影片。

拉丁語有一句話 In Vino Veritas 酒內有真相，德文有一句 Wir machen kein Käse，字面意思是 gún 無做 Tshì-sù，實際 ê 14 是 gún 無做 m̄ 著代誌，感情這件代是一个唱曲，一个挨絃。

愛猶存，翁生某旦，食飽相看，目睭安電線 ê 翁仔某，褲帶結相黏。愛收水，只是花缽仔種菜faˊbadˋeˋzung coi --- 無緣moˇienˇ，免閣 kā 無味 ê 事項箍踮身邊 hōo 家己嫌東嫌西、怨東怨西、罵東罵西。 人自水帕(Phè)離開目𥍉仔又閣成做大自然 ê 營養之一，無適合 ê 放伊走 m̄ 免綿豉睏破三領草蓆，掠君心肝 buē 著。這是我個人 tuì 這支影片 ê 想法 mā 是家己 tuì 感情 ê 態度。

交 gún 翁來往無偌久我就知影外表獨立 ê 伊窮實是爸母囝，m̄ 通閣蹽落去，總是感情永遠有糊著蛤仔肉 ê 時，地理 ê 距離 hōo 我致著無頭神 buē 記得種田就愛好田底，交男朋友就愛看爸母這項教訓到成做龍鳳。

Vox et praeterea nihil 除了聲音，啥物攏無

除了文字，啥物攏無。

我 tī 遮 tsham 家己讀萬象，看萬物，愖白汫無味留存 ê nur heiße luft，喃來喃去 ê soliloquizing 佮 Monolog。

無𫝛箸無仝味。

想 bueh 迵過書寫，揣著德國佮臺灣 ê 四序。

讀《台文通訊Bong報》石牧民老師文學káng「台」專欄〈 看無台文ê人看台文khah無〉hōo 我想著蹛院無聊紮冊去讀 ê 鬼鬼祟祟、掩掩揜揜。

 這款讀一本冊若 teh 做賊仔 ê 龜怪，窮實 mā m̄ 是第一斗出現，總是有法度自在 tī 公共空間讀一本冊 mā 是按蹛院 tsiah 消敨 ê 自在。

石牧民老師〈看無台文ê人看台文khah無〉討論 ê 問題 tuì 我來講 tshan-tshiūnn Sokrates 分張 ê 智慧，咱無一个人，有十全才調講，知機啥物是媠啥物是好 ê 隨人喙斗，m̄ 免 uī 這个話題踅金龜磨。 

不過石牧民老師這段話引𤆬我翻草徙岫德國前後 ê 讀冊變化。

事實無一種語言、文字ê使命是beh hōo人聽有、看有。伊ê使命是hōo已經聽有ê人聽，hōo已經看有ê人看。若是無本底就聽有、看有，真歹勢，任何一種特定ê語言、文字無法度幫贊--你。你m̄是伊ê對象。Tsia有一个mê角值得lán來注意：「是iah m̄是」kap「好iah bái」，全然兩回事。是、m̄是，tse是客觀ê精差。好、bái，牽涉著你掠做標準ê價值。是，無法度phì-siùnn m̄是。準做「是台語人」竟然ē-tàng phì-siùnn「m̄是台語人」，kan-na一種可能性：台語khah高級別項，致使台語人mā khah高級別種人。若真正án-ne，就是講「台語乃是tsiânn做人ê標準」、「台語ê價值khah kuân別種語言」。也就是leh講：「你定著ài ē-hiáu台語tsiah ē-sái！」

喝收擔喝幾仔冬 ê 翁 ê 公司 tī 這斗 ê 疫情總算落決心 --- 收擔。

 我按呢講 buē-su 誠替翁歡喜仝款，總是我清楚知機 m̄ 是，不過我確實有一種「雜唸大家出蠻皮新婦」ê 態度，喝「𨑨迌」免致意。 

翁自學生實習(si̍t-si̍p)就敢若 Mistel 寄生仔白莓 tī 這欉百年大樹吸收養份到伊 mā 有才調 kā 養份分張 hōo 其他 ê 人，交伊做無仝途 ê 我 mā 因為這欉樹成做 gún 翁 ê 寄生莓仔，kā 家己若涵空龜 ê 人生提升到別人欣羨 ê 十八港跤猶未行透透 ê 好字運，總是我 mā 清楚這个好字運是人飼人，一支骨，天飼人，肥朒朒，伊 buē 遮爾仔好按算，tshan-tshiūnn 翁設定 ê 我 bueh 做到幾歲就 bueh 交伊 さようなら。

「Hōo 你哭呻 buē 離 ê 大家這久正經愛你去雲遊四海，你有啥物感覺?」自交伊熟似就聽伊「雜唸」到猶未徙岫就已經成做「蠻皮」ê 我問。

「我 buaih 遮爾仔早就 hőng 雲遊四海...」伊應。