亂皂𥴊仔店 ⓂⒺⒾⓃⓀⒾⓄⓈⓀ

世界文化遺產 - Parthenon, Acropolis of Athens

Tī 遮聽著人講翕相 tuì 我來講無重要隨看著一陣人越頭揣聲音，看著這个畫面想著日本紅白大對抗。

離開希臘 bueh uì 山鷹之國 Albanien 駛去 ê 這日，本底掠做我投 ê 稿無機會閣刊登，起因新編輯新氣象，我 ê 文章按徵稿說明是提豆油濫雞卵糕 buē 敆，sóo-tí 我 tuì 舊編輯請我寄出去 ê 原稿並無向望伊有機會發表，這久猶有機會見著家己 ê 䆀筆尾，而且又閣 tī 希臘這个有眾神 ê 角勢 hōo 我歡喜甲 tuì 翁展風神「這決定是早起時搪著緣投仔骨牧師 ê 緣故。」

這段話猶 buē 落地，一隻蜂隨來挨拶 hōo 我想著青春少女年間愛看 ê 少年愛著神父 ê 影集。

咱平凡人 tuì 神真正 buē-tàng 烏白亂愖，是講東正教並無禁止神職人員佮人結緣，敢 m̄ 是...

世界文化遺產 -  Ἐπίδαυρος

恁 ê 文化實在是不可思議，無像 gún tsiah 短短兩百外冬，聽著美國遊客按呢 tuì 導遊講

文化 ê 定義佮深度正經是在人講，紲落來 ê 年間挖塗研究這个文化是按怎 ē 消失

M̄ 知這敢 mā 是哲學思考 ê 一款

Παλαμήδι/Festung Palamidi/Palamidi 堡寨

「應當有三十冬我一个人來遮，彼久 ê 遮歇寒無開門」

「因為你 teh 等我佮你做伙來」我講

「著，我 tī 聽候媠某做陣行跤花 ê 彼日」

Romantik 佮快樂，捷捷攏愛家己製作 tsiah buē 走精，家己製造浪漫 mā 是幸福

Apollo 神廟 --- Αρχαία Κόρινθος

踅遮 ê 時翁講「你提希臘文做標題敢有人來看？」

「你食飯是揀家己意愛 ê 物抑是食別人愛看 ê 物？」我問

「當然 mā 是家己佮意 ê 口味」伊應

「你敢講我 m̄ 敢聽，不過我真清楚家己寫 Blog ê 想法佮因由」我講

世界文化遺產 - Tempel des Apollon/阿波羅神廟

這逝旅程我 kan-ta ē-tàng 講，好里佳哉，我 ê 耳空有夠重無 hōo gún 翁牽魔神仔去

「遮 tuì 歐洲A歷史遮重要，總是 mā m̄ 免綴 leh 𤲍燒咱留踮遮著好」翁講

正經是好里佳哉，我 ê 耳空夠重聽無伊講 ê 天語

 希臘 Ιερισσός/Ierissos 東正教堂

「踮希臘行跤花時間 ē 比其他國家較久寡」本底猶精神飽滇 ê 我隨成做 hőng 注一針愛睏射仝款，無攬無拈(ne)

M̄ 是希臘白汫無味是海 m̄ 免浸偌濟鳥鼠，我就是鼻無鼠(趣)味

是，gún 翁𤆬 hōo 我 ê 希臘 kan-ta 海邊佮海邊，總是我 tuì 希臘 kan-ta 這个偏見無較 tsuē

Tī 露營區搪著仝款是按德國來 ê 先生，伊佮我 mā 有𫝛款 ê 偏見，m̄-koh 伊閣加一項