亂皂𥴊仔店 ⓂⒺⒾⓃⓀⒾⓄⓈⓀ

巡田園翻田塗讀著這篇 #記錄寫 tī IG ê 文字

Tsa̋ng(12.07) uī-tio̍h 一篇 m̄ 知結果 ē 如何 ê 稿規日貼貼到暝半。透早一精神隨感覺食力，鼻頭薟薟腦 tun-tun 嚨 ta-ta，這凡勢是文昌帝君 teh kā 我點拄「你無 hit-loo 2步7仔。」

吐一口氣，承認家己 ê 頇顢枵狗痟想豬肝骨，枵貓痟想海底魚就走甲遠遠遠 ê 承認家己是冇蟳無膏，m̄ 通繼續按呢舞豬舞狗 kā 家己舞甲一暝無暝，三暝補 buē 盡。我又閣成做貓我是 uī-tio̍h 啥物代誌舞死家己？台文寫甲攑蠓捽仔行雲頂 hōo 家己捎無摠，看德文 #Aufzeichnung der auf Instagram geschriebenen Wörter

Gestern probiere ich ein Artikel zu schreiben, das ist nur eine Aufsatz, aber ich schreibe über 12 Stunden und heute fühle ich mich so müde, ich meine Körper ist müde mein Geist nicht.

Ich liebe den Artikel zu schreiben, aber ich denke ich habe kein Talent, oje, ich probiere ein Aufsatz schreiben für kleines Geld zum neuen Bücher aus Taiwan zu kaufen.

•  W wodzie, owej płynnej materii, nie ma nic stałego 

水，這个硞硞流 ê 物質，伊從來 m̄ 捌固定

Jan Heweliusz

這幾日因為預防射規仙人𤺪 tú-tú，m̄ 是䖙 tī 眠床就是佮往過無啥交插 ê 電視圓仔炒麵線，膏膏纏。德國 ê 電視節目 m̄ 是無好看，是 gún 翁 m̄ 願加撏錢 bué 節目，所致 gún 兜通看 ê 節目永遠是彼幾台坐無到五分鐘隨 hōo 電視看 ê 節目。

這斗 ê 無四序無法度以睏來消敨預防射帶來 ê 無四序，手頭 ê 冊 mā 因為紅龜生蟲，龜怪 ê 気持ち hōo 我看一字生五百个影 m̄ 知家己 teh 看啥物就致心看無五分鐘就 hōo 電視看 ê 德國節目。

這台踅過彼台，彼台踅過這台一个若 Don Matteo ê 節目吸引我 ê 目睭仁，本底若驢仔骨力做穡 ê lī-móo-khòng mā 跟綴我 ê 好玄停跤歇睏。

• Freiheit ist immer die Freiheit der Andersdenkenden

自由交咱認為 ê 永遠攏無相𫝛

Rosa Luxemburg

無事揣事愖

我 tī 想， kan-ta「作文」是用台語其他 ê 齊是華語，tshan-tshiūnn 是按怎 bueh 按呢寫佮寫作 ê 起因，是因為驚大眾讀無路來抑是 tī 𫝛款 ê 文學內底已經揣無空間通成做出名人？畢竟，逐家攏是鰮仔魚，鰮仔魚 bueh 按怎成做白腹仔(看新聞挖挖哇，按澎湖來 ê 小花講，白腹仔愈來愈少)就愛先試這件代誌，看家己敢有法度按鰮仔魚轉做紅鰱魚，無法度轉做紅鰱魚，至少原仔是一尾 m̄ 驚 hőng 看 buē 著 ê 鰮仔魚。我 m̄ 知影，起因目前我 kan-na 捌 tī 亞特聊聊天聽過「台語話故事」出版社不是影印店，這集聽過前衛出版社 ê 總編輯鄭清鴻先生分張《復活的人》佮《幻影號的奇航》ê 作者胡長松先生 ê 分張。

• Von allen Welten, die der Mensch erschaffen hat, ist die der Bücher die Gewaltigste.

Tī 人類創造 ê 世界，上強大 ê 是冊

Heinrich Heine

看冊 ê 慣勢是照冊行跤到 ê 時間來讀，《我隨意，你儘量》照這个慣勢應當是排到明年 tsiah-ē 讀 ê 冊，起因手頭猶有足 tsuē 請臺灣e店佮聚珍臺灣 kā 我鬥相共寄 ê 冊。

既然我有這个癖是按怎這久 ê 我有法度寫一篇文章來展冊？癖是死--ê 人是活--ê，按呢簡單 niā-tiānn。

Tī 面冊看我無𤺪，我看伊猶 buē 慼，一日貼貼 ê 閒縫我真愛踅作者 ê 面冊讀伊 ê 文章綴伊 ê 筆花感受生活佮我 m̄ 捌 ê 智識，像作者寫「高雄椅條」(我 ê 記持若無豬母牽去牛墟，kā 城市記 m̄ 著位)故事 hōo 我想著發財仔車 ê 奇幻世界，我看 buē 著 ê 物，一問發財車主人就隨出現 ê Surprise 抑是佮芋仔爸做陣扛伊 ê 讀冊椅抑是我 ê hōo 發財仔車主人修理 ê 記持。

• 部落格是窗仔，每工 tī 遮心神遶山花，有人讀有，有人讀無，不管讀有讀無，花欉落塗，心內就無事。

2021 冇蟳夯籠 m̄ 知見笑，冇蟳無膏 m̄ 驚人笑 tī 台語社團以低路 ê 智識分張法國作家紀德 (André Paul Guillaume Gide)《一粒麥子》(紀德逝世六十五週年紀念．人生二部曲之一)，我 ê 低路智識 mā 順這本冊成做落塗 ê 麥仔發穎生湠，台文里長伯鄭順聰先生分張《拍破臺語顛倒勇》，拍破臺語顛倒勇 ê 紀德篇生湠到顧德莎 ê《我佇黃昏的水邊等你》，按顧德莎我認捌著詩人寫一首押韻，格律整齊 ê 作品，講伊 m̄ 是詩，是小說，小說家寫一篇無押韻，無格律 koh 無分行寫 ê 作品，講伊 m̄ 是詩。是詩，m̄ 是詩，自 19 世紀就花 sah-sah➀。

冊櫃有一堆台語詩，除了《 iPad kap 杯仔》佮《我佇黃昏的水邊等你》讀有意思賰 ê 齊是青盲牛捌字 m̄ 捌意，這敢是《台灣人台灣事》【台語。生活】電子報「做伙來讀〈13，15 hia〉」：「Tsit-má逐家上欠缺ê就是 你ē當講出一句好ê台語，正確ê台語，若是咱有能力寫一篇文章iah是一句完整ê話，m̄免用詩ê表現來表現ê時陣，我感覺對推展台語較有幫助。」（249 【台語女性書寫】 王薈雯， 6:58）ê 一粒麥仔無落塗，猶原是一粒麥仔，一粒麥仔準做落塗，無按 Einkorn（一粒麥仔）湠做 Emmer（鐵殼麥仔）, Dinkel（斯佩爾特麥仔）等等 ê 後代，伊猶原行向死亡，像二戰後 ê Dinkel。

厝內空間有限，書櫥腹肚 mā 有制限，無想 bueh 掠外添書櫥，沓沓仔交無料收藏 ê 食譜冊斷、捨、離 mā 殘殘 kā 當初 ê 驚惶，驚惶無 kā 台語詩鬥相伨，伊就走甲連一絲仔風 mā 揣無 ê 台語詩送入紙箱。

作家 ê 任務是 kā 大眾講出重要 hām 必要 ê 代誌，那疊書，托爾斯泰步頻徛在眼前，收入紙箱 ê 冊一本一本挈出來，閣殘殘 kā 伊分類，這兩本詩 m̄ 是詩是行入我心肝穎 ê 愖，是我心目中 ê 行向台語文學彼條湖邊的路。

我 buē 曉寫詩 mā buē 曉讀詩，總是我有才調 kā 詩讀做 m̄ 是詩。我 buē 曉寫詩 mā buē 曉讀詩，總是我想 bueh kā 伊翻譯做生份 ê 語言，因為我愛這卷詩。

我是低路老青 tuì 作者無一个印象，準做作者上熱 ê 年間 mā 拄拄好是我一日愛讀三份報紙上骨力 ê 年歲。

逐禮拜日 ê 透早，教堂 ê 鐘仔聲 tī 8 點呼逐家上教堂做禮拜，敆我喙斗 ê 電台 mā tī 𫝛時放送教堂禮拜，屬世俗人 ê 我 tī 音樂這條路是田螺循舊逝，較行 mā 仝逝無法度換台收聽十條歌有九條是弄舌 ê 電台就 kā 意愛 ê Podcast 會合 tī 這个時間做伙收聽，Hena Ma ê 聲音就此成做人 tī 厝做禮拜 ê 儀式之一。特別強調「之一」決定表示有之二交之二 hām 之四。

作者廖玉蕙先生是何人？像起頭 ê 自白我 m̄ 捌一箍芋仔交番薯，準做跟綴 Hena Ma ê 聲音泅轉去作者上熱 ê 年間，我猶是捎無一个摠，呔討按呢生？我想 bueh 搝出一條絲，隨請教網路眾神，「劉墉」兩字一出現，我隨理解無印象 ê 因端，彼陣 ê 我痟外國文學，尤其是翻譯小說，所致台灣 ê 華文作品交外國翻譯小說互相比並，華文作品 m̄ 驚無路通讀閣通讀無料，外國翻譯小說 m̄ 是逐本齊有翻譯本，閱讀心神自然就全數囥踮外國翻譯小說 buē 去要意台灣作家 ê 變化。

2025.5 月聽《台灣人台灣事》第 338 集廖玉蕙《彼年春天》我順 Hena Ma ê 聲音泅轉去閱讀感受。我 tuì 這本散文集 ê 感受猶是焦甲若門埕 ê Bach（溪流）聽 buē 出 Air on the G String，呔討按呢生？聽 buē 出 Bach ê 變化 敢是因為伊按華文轉過來？起因 m̄ 捌讀過 ê《愛母語，毋是愛選舉》329 集就 hōo 我跟綴 Hena Ma 媽 ê 聲音行入李江却台語文教基金會執行長陳豐惠老師 ê 故事，特別是傳後嗣這件代 hōo 那抐鼎那聽故事 ê 我聽甲耳空覆覆。334 請聚珍臺灣 kā 我鬥揣冊，押尾猶是花缽仔種菜：無緣 ê 柳清亮《批字紩出飛絲》mā 是聽甲相𫝛 ê 感受，呔討這本 hōo 文青褒嗦講意愛台語文學 ê 朋友決定愛收集 ê 台語散文集 hōo 我一絲仔情緒齊無？Keine Ahnung ê 歸類讀冊 mā 愛有冊緣，交廖玉蕙老師𫝛款按華文轉台文 ê 劉靜娟老師，伊寫 ê《驚驚袂著等》交 《落西北的下晡》hōo 我 tī 部落格展博士博 ê 時捷想著伊，像記錄 bué 番薯搪著 ê 故事隨想著〈番薯遮爾仔無人緣〉，㨨挐氅氅 ê 過了代想著〈見著表姊妹〉，𫝛款 ê 華文作家 tī 人生行到七八十轉台文書寫，一个文字活跳跳 hōo 我自動切換做影片讀，一个是若人 tī 剃頭店反雜誌，反過隨 buē 記，呔討按呢生？ Keine Ahnung，不而過會使得確定 ê 代誌是文字交語言一直是馬花糋，準做你 kā 手術 hōo 伊成做無仝人，𪜶猶原是雙生仔。

低路人頇顢講閣大舌興喋，所致文字敲到遮猶原愛寫這段「這 m̄ 是讀冊心得，更加 m̄ 是冊評，伊 kan-ta 是一篇挽瓜揫藤呔討按呢生 ê 閱讀行跤花。」

Hegel（黑格爾）講 Kreis von Kreisen「圓湠圓」我按一篇少女是讀字 m̄ 捌意 ê 紀德(André Paul Guillaume Gide)《一粒麥子》(紀德逝世六十五週年紀念．人生二部曲之一)翻草湠出《拍破臺語顛倒勇》交我生份 ê 作者洪明道醫師 ê 等路。人生正經愛 Geh deinen weg lass dich begleiten 陪伴家己行家己 ê 家路 tsiah 有彩卵通揣。不過 Meta 遮 ê 若 7-11 ê 角勢猶是無適合我就順其自然，順家己 ê 心揣家己 ê 彩卵。像 2023 上北波羅的海進前，專工去捷克越南市場剪頭鬃搪著 ê 露營區。

「你若 kā 伊鋪去社區抑是露營區地圖，飯頓家己攢。」我愛這个順大路無經過任何設定 ê 相借喙 ê 歇暝。

踮超市那巡架頂 ê 報紙佮雜誌那等翁來遮交我會合鬥款物件轉去厝，目那巡心那詬詬唸，田庄閱讀敢若較讀 mā 讀 buē 出名人閒事掠外 ê 世界，RTL➀ 實境秀明星又閣按怎生，跤球明星呔討 buiah 有後嗣，英國太子妃時行啥物穿插....臺灣人閱讀慣習愈來愈成死海 ê 海拔，德國人 ê 閱讀慣習 mā 紅海愈分愈闊。

遮 ê 閱讀本 tuì 我來講是閱讀死海 mā buē 撏錢 ê 紅海，buē 撏錢就莫手賤伸手 kā 摸一絲毛管空。 手機仔準備捎出來寫 Telegram 問驢仔伊人 tî 佗落，一聲 buē-su 發現新烏空閣驚人知 ê 聲音按我 ê 後擴生湠到耳空「我一透早就讀著這葩新聞，m̄-koh 無交你分張。」

聽著熟似閣清楚分別 bueh hōo 德國人知交 buaih hōo 德國人知 ê 語言慣勢，無想 bueh 因為伊 ê 認為 hőng 感覺外國人就是按呢頇顢 buaih 入人門，順人意有目的，越頭以肉跤 ê 德文回答「ich verstehe nichts 啥物意思？」

「Tsit-má逐家上欠缺ê就是 你ē當講出一句好ê台語，正確ê台語，若是咱有能力寫一篇文章iah是一句完整ê話，m̄免用詩ê表現來表現ê時陣，我感覺對推展台語較有幫助。」（249 【台語女性書寫】 王薈雯， 6:58） 

　　von 台灣人台灣事 x 培鈺工作室《台語.生活》電子報第05做伙來讀〈13，15 hia〉

2019 讀無朋友踮面冊分張 ê 台意華文，小面神歹勢 kā 𪜶齪嘈請教 14 ê 我第一个想法是成做北美偝鼠假死無讀著，總是這款駝鳥心態無才調維持一世人，特別是目今 ê 空氣城堡➀大過真實城堡 hōo 每一个 tī 空氣城堡認真做孤鳥 ê 人 mā 無法度好好做隻孤鳥，除非你飛離雺霧豆仔鳥 ê 領地➁。

台語是我自帕水猶未出世就聽著 ê 歌聲，照理來講讀「母湯」這類 ê 台意華文比讀《我是留德華：海獅的德國奇幻旅程》捷出現 ê「Der」夠較好理解伊 ê 14，我卻見讀見捎無寮仔門通入門交朋友抱團𤲍燒 hoo 我想著，這个德文明明就讀有，呔討捎無意思，越頭請教翁，伊講「Google」ê 晝面隨向頭請 Google 引𤆬我出帆並向望伊 ê 致蔭 hōo 我有機會 tī 茫茫網海撈著「台語字典」。自撈著 iTaigi愛台語，我就一路跟綴 iTaigi 愛台語寫台文，紲牽藤到揣台語台語辭典，然後 Es sollte so sein 鉛粉掖有夠額 tī 齊是華文 ê 面冊社團收著國校台語老師 ê 留話「目今 ê 台語行入校園，這是教育部設立 ê 台語辭典 hōo 你罔做參考」就此台文用字 ê 三心兩意，心頭亂操操 m̄ 捌閣相揣。

真心感謝這位交我只有短短這段文字緣份 ê 台語老師，無伊 ê 及時雨，以我細漢煩惱伊 buē 大，大漢煩惱伊未娶 ê 性地，以全台文做部落格主體行 buē 久長，畢竟我足頇顢認人...

下昏暗讀王秀蓉老師《我咧唱歌》，其中一段「會記得我起床無洗面，佇喝欲揣衫進前，我是坐佇戶橂咧扒糜。我想講欲出門，上無面嘛愛小「𫝻」一下。」

我理解這段話 ê 意思，m̄-koh 我足想 bueh 確定伊敢是記憶中 ê 字，隨請倉頡鬥拆字骨，拆無字，請教字典，拆字爿猶是揣無字。

按呢愛來請教 QR Code 聽聲揣羅馬，隨請無 3C 元神就敢若 hōo mǹg-sǹg 食去 ê 翁，「我性命上親愛 ê 翁婿，你敢會使得 hōo 我齪嘈一下？ 」

「免齪嘈規仙人通借你，唯獨無錢通借，請講」翁學 tsuē 冬前翁仔姐做陣去南投九份二山看伊好玄 ê 地牛翻肩，押尾牢 tī 路標雙叉路心頭亂操操，一位古錐阿伯行倚我隨講「阿伯，歹勢 kā 你借問一下」，阿伯笑微微講「無問題，hōo 你借 kan-ta 無仙通借」兩人隨笑甲吭跤翹放伊一个人捎無寮仔門，問一个路呔會 tsiah 歡樂。

「感恩--hah」我笑甲目汁㴙㴙落 mā 想著彼日 ê 奧妙。

「你 kám 有興趣投稿？」

有一回 tiàm 面冊社團搪著《落/Làu台語-瑞士ê台語社》ê 社長 A-kuan，伊問我 tsit 个問題。

彼久，我 tùi 台文 ê 印象猶原停 tiàm 「鄉土文學」，猶未迒到實櫼 ê 「台語文學」。

「我 buē 曉寫詩，buē 曉寫羅馬字，一切 lóng buē 曉，tsit 時 ê 文字是 ná 看線頂辭典 ná kā 四常 ê 話轉做文字按呢 niā-niā，猶無夠資格 thang 投稿...」

「有興趣，你 tsiâⁿ-si̍t ē-tàng 投稿 khì Bong報」。

故事講幾仔回，m̄ 捌搪過 ê 人抑是選擇致著失憶症 ê 人攏 ē 講「我聽你 teh 講漫画，咱臺灣呔有這款代誌」像咱臺灣從來 m̄ 捌食過美國炸彈 m̄-koh hōo 咱勇壯 ê 牛奶佮麵粉。

我 ê 睏眠時間真固定，較按怎成做暗光鳥 má 無法度渡過 12 點 tshan-tshiūnn 塗炭仔按呢。總是阿霞 ê 故事 kā 我規个情緒縛佮伊做伙 hōo 我雙目成做 m̄ 願開喙 ê 蚵仔 mā 硬 bueh kā 撬開閣𫞼撐篙。

冊讀煞，手機仔捎來看時間，夭壽骨，讀一本冊讀甲若 tī Bangkok 等紅目班機飛德國仝款忝頭，只不過這久 ê 忝頭閣添一味，茶鈷呻 buē 離 ê 哭呻。

作者呔 ē 遮爾仔無人情，無 bueh hōo 阿霞佮臺灣麵包樹成做龍鳳，是按怎 bueh 按呢 kā 𪜶拆做天間佮凡間，是按怎，是按怎，是按怎。

當我情緒叨撚，哭呻家己浪費唔唔睏 ê 時間來看一段無結果 ê 小說，我見著邊仔早就冷冷空空 ê 椅苴主人，伊 mā 猶未揣 Sandmännchen(德國睏神)。

春雺曝死鬼，夏雺做大水。倚位東海北極箍仔 ê 瑞典熱人一日變化 tuì 我來講就 tshan-tshiūnn 先人 ê 智慧 mā 真符合我現此時 ê 心情，一時足想 bueh 寫部落格一時閣足慼寫部落格 ê 齷齪，總是遮 ê 齷齪永遠比 buē 過放家己自由較好過日子。

瑞典佮挪威仝款 m̄ 是逐搭露營地攏有網路，所致準做我張使性地 mā 是無較縒 ê 起性搦地。

瑞典 ê 熱人短甲 tshan-tshiūnn 人 ê 青春遐爾仔短，瑞典露營區 ê 網路 mā m̄ 是逐个攏緊甲若高鐵仝款，這久徛位倚 Göteborg 等待雺開來曝死鬼搪著這逝跤花網路緊甲若美洲豹 ê 露營區，我煞無心緒想 bueh tī 遮栽新欉 mā 無想 bueh kā 紮來 ê 冊讀 hōo 煞，起因我無想 bueh「夯枷」。

是「夯枷」，渡假 ê 日子正經 m̄ 通讀寡 hōo 家己心情沈重 ê 冊 mā m̄ 通逼家己閒人 m̄ 做，牽豬哥漩𨑨迌。

我真佮意杜信龍先生 tī 台文博覽會 ê 成做一 ê 母語作家是(人生)上大 ê 投資演講，總是自第一篇推薦序到杜信龍先生 ê 自序我規仙人感覺肩胛硩石頭，本底齊是活水 ê 心臟隨貯死窟仔水 ê 無想 bueh 繼續讀落去。

• Die Weltgeschichte ist der Fortschritt im Bewusstein der Freiheit

世界歷史是自由意識 ê 進步

Georg Wilhelm Friedrich Hegel

聽《台灣人台灣事》230〈台語書裡的地景〉hōo 我心擽擽想 bueh 寄張電子批交 Hena Ma 賢仔媽分張《Thá-kheh》佮《灶雞仔》這兩卷冊，總是免用跤頭趺想 mā 清楚知影家己 ê 文筆是豬屎籃仔 kan-ta 有才調 tī 家己 ê 同溫層 tī 屬於我家己獨一無二 ê 部落格交家己 hâm 讀無四角字 ê 翁婿比並。

「Podcast 主持人請逐家分張有意愛 ê 冊，我想 bueh 分張這兩本冊」翁某做陣食早起頓，那看日鬚沓沓仔行入窗仔門 mā 那看受 S-Bahn 擴建需要換路線來 gún 遮揣出路 ê 人潮交車流，帶 hōo gún 啥物感想，畢竟前一段 ê Umleitung 車輛改道有居民掛白布抗議，生份人 ê 借過 ē 損害𪜶 ê 生活品質。

窮真，我 tuì 這本冊無興趣甲見擺見著臺文版攏 ē bué 轉來讀 ê 癖攏揣無一撇，這久是按怎生想 bueh 專工 uī 伊記錄一篇感想，講起來 mā 真簡單，伊牽我 ê 手做陣行轉去少女年間，我寶惜 ê 少女感情。

第一擺搪著《傲慢與偏見》是 tī 國校 ê 排冊擔仔，冊擔仔頂逐本若粗紙 ê 冊一本5塊，不而過冊皮若是有閣加貼一張紙條仔寫「世界名著」就隨愛加5箍，這就是我佮 Jane Austen Pride and Prejudice ê 第一擺接觸。

M̄ 知是年歲傷過細抑是冊 tshan-tshiūnn 台灣新眼界．文化新台灣 | 林文欽 臺灣意識佮智識的駁岸 前衛出版的堅心 20240122 社長林文欽先生談著《被出賣的台灣》「彼久 tī 我出版被出賣的台灣，阮 ê 版本進前，其實臺灣就已經有彼个，人印 leh 賣 ê 版本矣」sóo-tí 讀起來 tshan-tshiūnn tī 臺灣看 Forgetting Sarah Marshall 佮 tī 德國看 ê 精差。

印象中 DVD 無 Kuckuck，sòo-pái 當我 tī ZDFneo 見著 Kuckuck，我規个人隨按膨椅跳起來。

「你敢有看著 Kuckuck」我問翁。

• 自由的女性和輕佻的女人正好相反 -- 西蒙.波娃

十二月食菜頭，六月 tsiah 轉嗽。這是早前就寫好 ê 文章所致 tī 設定公開 ê 日期猶未出現進前，我 buē 閣專工餾一斗。

Tsa̋ng 下昏飯食飯飽無想 bueh 反冊 mā 無想 bueh 碰電腦，規个人隨閒甲連蠓仔攏掠無，按呢來 Blog 掠漏。一段一段繩，這斗 ê 文章寫甲誠通順 buē 㧎㧎抑是成做借殼寄生 ê 中國麋鹿。總是，世間有一个定律號做「Murphy's Law」串驚串著(墨非定律)，你掛吊 ê 事項 m̄ 是 buē 出現是機緣猶無夠額。當我 bueh 臭颺 tuì 翁講「我哪 ē 遮爾仔𠢕，掠無漏」就隨發見問題。

平和世代 ê 人準做厝內散甲賰壁紙(調整)

平和世代 ê 人就使厝內散甲賰壁紙(原句)

歹運就假若蜘蛛仝款會佇無意中出現佇花欉，看著，共掠走就好矣。

--- 溫柔的人

智識無夠額 ê 我 tuì 這本冊無才調 tshan-tshiūnn 𤆬讀一寫十頁，智識無夠額 ê 我自冊一反無 kā 名人推薦 ê 頁數算在內，自第一頁讀到放風吹 ê 這久倚 bueh 4 冬 ê 重新閱讀，伊猶是 hōo 我讀甲足艱苦。呔討按呢生？《幻影號的奇航》交這復活的人是仝一位作者呔討，幻影號的奇航 hōo 我讀甲 buē 想欲放棄，復活 ê 人停睏 4 冬重新閱讀猶原想 bueh 放棄，是佗一个環節（Khuân-tsiat）出問題，我需要揣出來。

翻頭踅轉去第一頁，順葉國典一路成做江文達，我總算理解讀甲艱苦想捌放棄 ê 原因，我 ê 台文閱讀已經慣勢教育部臺灣台語常用辭典 ê 用字，所致我真僫自由變化心情 kā「揪」讀做「khiú/giú」(搝) mā 無才調 kā 這个「揪」讀做「Tshiû」、「Tsiû」、「liû」遮 ê 按 ChhoeTaigi 台語辭典請教來 ê 解釋，起因順遮 ê 意思來連結文句是豬母牽去牛墟去，無一个峇。低路人無才調過目 buē 擲糞埽桶隨攑原子筆 kā「揪」這類交教典無相仝 ê 用字全部改寫，像《一桶蚵仔》按呢，《復活的人》hōo 我讀甲目 m̄ 甘𥍉，然後真真正正理解文字 ê 力量，準做你 ē 曉講這个語言，文字卻從來 m̄ 捌規範，伊交你猶是生份人，像《台語現代小說選》呂美親 | 編者導言 --- 讀者恐有疑問,同樣是日語,何需再「翻譯」？實際的狀況是：《源氏物語》當時寫就的語言和文字，都與現代日語落差極大，需以現代的規範用字、用語來改寫並加註解說，才能便於現代讀者閱讀理解。因此，說是「譯」，實亦可謂改字、新寫。

Tī《語言學家破解台語》這本冊掠外吸收作者劉賢承先生其他 ê 作品《翻身．番身》佮《倒轉：Voyu Taokara Lâu》這 2 本冊 hōo 我目睭隨金 mā 隨上網搜揣，最後 tī 本底掠做伊無閣接續海外訂單 ê「台灣e店」揣著這 2 本冊隨落單。

講著 ē 掠做「台灣e店」無閣接續海外訂單，彼是我家己 ê 竹篙鬥菜刀 kā 公告讀無 tsiâu-tsn̂g。

總是，我真歡喜家己有閣寫批請教店東確定海外訂單 ê 事項 m̄-tsiah 有機會繼續讀讀其他 ê 台語文作品，增加無仝 ê 眼界。

我 m̄ 知影其他國家 ê 文學是啥物生張，總是我真佮意德國文學 ê 生張，無冊腰無落落長 ê 𤆬讀。

講著𤆬讀，德國凡勢有，是我家己智識無夠 m̄ 捌拄搪 niā-tiānn。

• Den Stil verbessern - das heißt den Gedanken verbessern, und gar nichts weiter!

提升風格 --- 意思是革新思考按呢 niā-tiānn

Friedrich Nietzsche

朋友講「你敢正經 buaih 閣使用面冊抑是徙來 IG 交 gún 繼續圍爐？」

「正經」我應。

當初就是擘腹我閣繼續紅龜生蟲，龜怪落去 ē 佮遮 ê 規日纏綴面冊過日子 ê 朋友 ē 漸漸仔成做生份人，綿豉十外冬 buaih 行入面冊櫃檯申請口座又閣無 Line ê 我 tī MSN 確定行入歷史，向時互相敲電話確定食飯會 ê 慣勢成做 kā 人攪吵 ê 無禮數。

Kan-ta 知影情緒叨撚佮提情緒做劍之者，攏無法度佮理性做朋友，一个受人敬愛尊重 ê 人 m̄ 是一出世就有這款魅力，mā m̄ 是成做博士博或是十八港路行透透就有這个才調，彼是年久月深 ê 栽欉、翻草、薅草。

整理文章「鱈魚烘」想著 tsuē 冬前提 Cicero ê 句直透 tuì gún 翁講𪜶爸母 ê 病灶佮這站仔搪著 ê 代誌，遮 ê 代誌 mā 引𤆬我這件代誌，tī YouTube 搪著曾文溪電台 tī 曾文溪電台認捌韓滿老師，紲落來真好運 tī 博客來搪著老師 ê 作品《真情99》、《酒蜜100》。

酒蜜100是詩，我無仙氣兼頇顢100 pha 詩讀煞猶原若柴頭，無情緒。

韓滿老師是正式經過專業訓練 mā 是 tī 學校教學 ê 老師，m̄ 是咱這久手一伸出去就 ē 摸著 ê「老師」，凡勢是受著 Dr. 佮 Professor，Lehrer 佮  Meister 是無相𫝛分類 ê 影響，sòo-pái 我 tuì「老師」2 字 mā 有龜怪 ê 認定。

• To be ignorant of History is to be always a Child➀

一个 tuì 歷史懵懂(Bóng-tóng) ê 人永遠是囡仔

von Cicero

跤踏這塊土地卻 m̄ 捌這塊土地是一件真龜怪 ê 代誌，總是我 ê 龜怪佮其他角勢比並，窮實無算啥物。我知影按呢比並悲慘是一件真無仝理心 ê 態度，總是換另外一个樂觀 ê 角度來看這个「悲劇」猶是一件「喜劇」，起因我 teh 讀歷史翻草歷史 m̄ 是 kan-na ē 曉 hőng 飼佮等人育飼 ê 囡仔。

我 m̄ 捌這本冊，總是我相信冊交人相𫝛齊 ē 互相替人牽紅線。讀《語言學家破解台語》ê 作者紹介，我認捌著作者其他作品隨上台灣e店揣冊，紲落來 Es sollte so sein 鉛粉掖有夠額 hōo 我有機會跟綴這本小說行入雺煙散霧 ê 臺灣歷史。