亂皂𥴊仔店 ⓂⒺⒾⓃⓀⒾⓄⓈⓀ

(2023.01.22 早起頓 Maultaschen 德國酸菜湯 + Ka-lí 雞豆湯 + Pē-kng 王梨 Sa-la/756kcal)

Uì 開始食三塊十箍 ê sio̍k-pháng 年代開始，露螺 pháng、波蘿麵包是三塊十箍內底逐擺一定 lóng-ē 出現 ê 基本盤。

行 ji̍p--khì tsit 間 tī 現代看起來真 buē 時行，tī 舊時應是鑠奅 ê 店，一位少年頭家用無啥物氣力 ê 氣口 kap gún 拍招呼。

平常時我家己買麭三分鐘就 ē-tang 解決，因為我 ài 食臺灣 tsit 款油光油光 ê 麭，所以入店進前，我家己 ē 先 tī 外口相好 kám 有我 bueh 買 ê Pháng。

若是佮 gún 翁做伙，我 tō ài 開淡薄仔時間 kā 伊紹介店內底 ê pháng。

Tī gún 翁某 tī 討論 pháng ê 過程，少年家問我「請問你們在說法語嗎？」

我幌頭 kóng m̄ 是「是德文」。

我 ê 回答可能有去揤著少年家佗一个開關，伊開始紹介 hia 連 gún 翁家己 lóng 無啥興趣 ê pháng。

Gún 恬恬仔聽伊-ê 分享，也分享 gún 家己 tī 德國食 pháng ê 習慣。

過無 luā-kú，一位序大人 uì 外口行入--來。

伊一看著 gún kóng「來坐-lah，bueh 食龍眼無，gún 家己種--ê」。

Tī 我 bueh 開喙時，少年家 kóng「人𪜶聽無台語-lah」。

我微微仔笑無接喙少年家 ê 話。

「多謝，真 tsuē 冬無機會食著 gîng 眼--ah，tī 外頭數念伊，tńg--lâi bueh 揣伊 iū-koh 定定 m̄ 著時，tsit 回著時 tńg--lâi suah buē-kì--tit ài 食伊」。

我 uì 序大人 hit 雙厚 koh 結趼 ê 手接過gîng 眼，紲手挈一粒問 gún 翁「Probieren，gîng 眼？」(bueh 試食龍眼無?)

Gún 翁問「臺灣荔枝？Litschi？」

「Tsia 無荔枝，bô-thang 請恁，真歹勢。」序大人 kóng。

聽了，我緊說多謝。

Tī gún 翁 tī 試食 gîng 眼時，序大人 kóng 一句，tsit 幾年 tńg--lâi 臺灣所發現 ê 代誌。

「小姐，你 ê 台語 kóng 了真輾轉，佗位學--e？」

「Tī 媽媽 ê 腹肚 tō tī 學--ah」我微微仔笑答，心肝蒂有 tsiok tsuē m̄-kam。

因為，我想--著 hit 年參朋友參加伊 ê 朋友 ê 烘肉會。

Hit-sî，有兩位96歲 hām 102 歲 ê 阿媽坐 tī 邊仔 na 開講，na 看 gún tsia--ê 囡仔 tī 烘肉。

可能是數念家己 ê 序大人，我行過 tsham tsit 兩位阿媽 phò-tāu。

兩位阿媽雄雄 tuì 我 kóng「小姐，你 m̄ 是 kóng 英文，台語 ná-ē tsiah 輾轉，比 gún tsia--ê 孫 koh-khah 𠢕」。

聽--著 tsit 句話，真 m̄-kam 阿媽。

因為，我想--著家己 ê 親情，有人 tsham 孫 kóng 台語 hōo  家己 ê 新婦 kóng ē hōo 囡仔 ê 英文腔口歹聽... 

Mā 想--著幾年前，gún 翁 ê 同事𤆬拄結婚 ê 臺灣太太來 gún 兜行跤花。

Tsit 位臺灣太太英文無幾句，德文無半句。

伊聽我 tsham 𪜶某冇談 ê 聲調，ná-tshan-tshiūnn 𪜶某 ê 阿媽 tī 講話 ê 聲調。

伊問我「你是 m̄ 是 kóng 台語？」

「是--ah，台語--ah」我答。

Gún 翁 ê 同事目頭 liap 一下，iōng 歹勢 ê 口氣 kóng「gún 某 kóng he 是無水準，無讀冊 koh m̄-bat 字 ê 人tsiah-ē kóng ê 話。」

我無回答伊所 kóng ê 問題，我問伊「你 kám-ē 感覺你所 kóng ê 德文是無文化 ê 人 tī kóng ê 話？」

「你知影 gún-ê 皇帝 tiàm 德國歷史非常重要，著 m̄ 著」伊問。

「你知影 m̄ 是 tiàm Google 翻譯揣 ē 著 ê 語言 tsiah 是語言，著 m̄ 著」我答。

Gún 翁同事笑笑無回答，我 mā 無 koh 繼續 tsit 个話題。

恬恬聽眼前 ê tsit 位德國新婦 ê 委屈代。

Tsham 𪜶翁 khì 別人兜，逐家 uī-tio̍h 伊 buē-hiáu kóng 德語，換談英語。

落尾 hōo 人發見，伊連英文 lóng 聽無半句。

伊感覺 hőng 看 buē 起 ê 代等等。

聽伊談 tsia--ê 代，我 tī 想 m̄ 知影伊按怎看待𪜶翁所 kóng ê 德語。

因為𪜶翁 hām 𪜶規家伙所 kóng ê 德文，德國學校應該無 tī 教，Google 翻譯 mā 揣無。

無文字著是無水準無文化 tsit 件代 hōo 我想--著，uì Ka-ná(Ghana)來 ê Anthony hām uì Eh-lī-tshuì-a(Eritrea) 來 ê 阿萬所分享 ê 話。

"

利便 ê 網路，人 hām 人 m̄ 免講話，只要有 Google。

Google 翻譯揣無 ê 話，tō 是無文化，無水準。

Tsit-sî，lán tsit 幾个人，每一个人 lóng 有家己  ê 語言。

有 ê ē-thong，有 ê buē-thong ，m̄-kò lán 猶原 ē-tàng phò-tāu。

Tse 是為啥物？

Tse 是 lán-ê 肥底成就 ê 美麗 hām 趣味。

Maultaschen 德國酸菜湯

...... 材料 ......

Maultaschen　300g

德國酸菜　500g

Thoo-má-tooh　300g

洋蔥，剁幼　1

芳料草

滾水　500ml

鹽 & 胡椒

...... 步數 ......

1. 洋蔥落鼎炒芳，落 Thoo-má-tooh 炒軟，滾水、酸菜、芳料草做陣摻落--去煮20分鐘，tiàu 寡鹽、胡椒。

2. Maultaschen 摻落--去，煮6分鐘，樂暢來食。

(22.01.2023 Frühstück Maultaschen mit Sauerkrautsuppe - Linsensuppe mit Curry - Ananassalat mit Speck/756kcal)

Ich habe meinen Mann gefragt, ob du zum Abendessen Maultaschen haben möchtest, und er hat ja gesagt.

Daraufhin dachte ich an dies.

Die Freundin meines Mannes sagt, sie mag keine Maultaschen, sie glaubt auch nicht, dass asiatische ' Maultaschen ' etwas Besonderes sind.

Aber sie liebt es, italienische ' Maultaschen ' zu essen und zu machen.

Dieser Vorfall erinnert mich an dieses Zitat.

In fremden Ländern ist der Mond voller.

Es bedeutet, dass es, egal wo wir stehen, nur einen Mond gibt.

Aber wir können weiterhin sagen, dass der Mond in unserem eigenen Land hässlich und der Mond in anderen Ländern schön ist.

Maultaschen mit Sauerkrautsuppe

...... Zutaten ......

Gekochte Maultaschen　300g

Sauerkraut　500g

Tomatensoße　300g

Wasser　500ml

Fein gehackte Zwiebel　1

Kräuter

Salz & Pfeffer

...... Zubereitung ......

1. Zwiebel in die Pfanne geben und anbraten bis sie goldbraun ist.

2. Sauerkraut, Tomatensoße, Kräuter, Wasser in die Pfanne geben auf mittlere Stufe ca. 10 Minuten kochen.

3. Mit Salz und Pfeffer abschmecken.

4. Maultaschen hinzufügen. Guten Appetit!

(01.22.2023 Breakfast Maulttaschen with sauerkraut soup - Lentil soup with curry - Bacon with pineapple salad/756kcal)

I asked my husband if you would like to have Maultaschen for dinner and he said yes.

Then I thought of this.

My husband's girlfriend says she doesn't like Maultaschen, she doesn't think Asian ' Maultaschen ' are special either.

But she loves to eat and make Italian ' Maultaschen '.

This incident reminds me of this quote.

In foreign countries, the moon is fuller.

It means that no matter where we stand, there is only one moon.

But we can still say that the moon in our own country is ugly and the moon in other countries is beautiful.

Maultaschen with sauerkraut soup

...... Ingredients ......

Cooked Maultaschen　300g

Sauerkraut　500g

Tomato sauce　300g

Water　500ml

Finely chopped onion　1

Herbs

Salt & Pepper

...... Method ......

1. Add the onion to the pan and fry until golden brown.

2. Add the sauerkraut, tomato sauce, herbs and water to the pan and cook on medium heat for about 10 minutes.

3. Season to taste with salt and pepper.

4. Add the Maultaschen. Enjoy your meal!

〈假青〉

Google 揣無 ê 翻譯

台灣教會公報投稿：2021.10

上刊時間：2022.03.10

期別：3654