Gún 翁 tī Telegram 舊物分張社團分張塑膠渧水籃隨有人講伊有興趣，兩人就開始討論交貨時間。
「對方是無國界組織彼類 ê 工作人員」我恬靜聽 buē-su 搪著大人物 ê 伊分張對方 ê 故事交伊上網看著 ê 相片頭殼那踅相踏黜 ê 機關。
「交田螺講話愛足斟酌，所致交你分張我 ê 想法進前我愛拆白，這是我 ê 想法你絕對會使得無同意」翁某又閣 uī-tio̍h 伊食爸母毒 hōo 伊 ê 六月芥菜假有心 teh 冤家量債，tuì 成做𪜶兜耳仔生兩葉，家己看 buē 著交田螺循舊逝，較行 mā 仝逝俱樂部一員非常無興趣 ê 我，直接攑關刀剖柴 kā 想法拆甲白白白。
「我個人認為伊來這个社團是 bueh 著無料廣告交招人客」我講。
「你想過頭矣」伊應，我無紲話，畢竟時到就知機。
Buē 記持紮卷冊出門，等車 ê 車頭拄好有網路通消敨等車幫 ê 閬縫，隨𫝻 hōo 我摒甲空空 ê YouTube 𪜶 tī 無關鍵字 ê 幫贊之下出啥物 Überraschung。
凡勢 Google Search 見我 ê lòo-kher 是田螺循舊逝，較行 mā 彼逝齊揣飯頓圖，所致交 YouTube 綁做伙 ê 伊順我 ê 麭幼仔推薦 DAY DAY 台語台「#陳隨意 #家常菜 #公視台語台 ê 泰式涼拌荷包蛋超級開胃又消暑！荷包蛋原來還可以這樣煎！｜隨意好料理｜幸福好厝邊｜陳隨意 營養師余朱青｜食譜 料理教室｜公視台語台。」
四月天 ê 德國天氣猶無夠燒熱，不過這是一份敆 gún 翁仔姐簽定飯頓和平協議 ê 菜色：早起頓做陣成做歐洲人，下昏飯做陣成做亞洲人。 出菜前又閣成做貓想 bueh 知影歐洲敢有相𫝛 ê 味素隨請網路大神賜我智慧生。
Spiegelei Salat 拍落下，隨現一捾交卵有相關 ê Salat，像 Sommersalat Bunter Mix mit Spiegelei, Rustikaler Salat mit Kartoffeln und Spiegelei 這類以關鍵字做拋魚交以原意做拋網 ê 結果是無宛 2 體 ê 交幸福好厝邊一屑仔攏無相仝，繼續拋網繼續罟魚，總算 hōo 我揣著店設 tī 荷蘭 m̄-koh 生理做甲德國 ê 網頁 Thai-Salat mit Spiegelei 順這个網頁 ê 泰文寫法 YAM KAI DAO 拋網，掠著 ê 魚 tsuē 甲 hōo 我笑咍咍。
我討厭 Google 厚甲若蠓 ê 廣告，總是 Google 猶是比 CCleaner 交 gún 翁近來痴迷 ê Mullvad Leta 閣較好罟魚。
Gún 翁 tuì 我這个性地 mā 是一隻 Moew 愛貓貓問「我理解你 tuì 面冊 ê 無意神，總是交面冊是行無相𫝛路途 ê 愛料理敢有䆀甲 hōo 你見著伊 mā 若見著 Mǹg-sǹg？」
「無。」
「按呢遮爾仔媠遮爾仔好味素 ê 食譜是按怎 buaih 閣繼續記錄踮愛料理，敢講因為彼張電子批？」
「我 m̄ 是恁爸母，一件代誌 ē-tàng 熥甲臭酸猶 teh 熥。」
聽牽手 kā 伊心愛 ê 爸母請出來，伊隨按貓成做 hőng 戴喙罨 ê 軍用狗 alias 檳榔狗。
M̄ 知影遐 ê 經過無四序 ê 人敢 tsham 我相𫝛，過了代 ê 代誌窮實原仔記牢牢，只不過 buē 刁工 kā 伊記甲清清楚楚 tshin-tshiūnn 數字。
這个現象是刁故意佯戇抑是激怐怐(khòo-khòo)，我家己窮實 mā 㨨無一絲仔線。
四常五四三鏨好勢，準備 bueh 𫞼出門品並，彼隻 m̄ 知走去佗落 ê 鹿仔按我 ê 頂腹蓋大力挵落去 hōo 我 m̄ 知 bueh 按怎止疼，就順這个疼做 Yoga --- Inhale, Einatmen, Exhale, Ausatmen 來捊若 hōo 海風吹甲自動成做毛(mn̂g)尾仔 ê 情緒。
今仔日是 9.21，一目𥍉 mā 22 冬，二个失去老母 ê 1歲佮3歲 ê 囡仔 mā 已經轉大人，一个查埔人 tī 某綴大牛換肩換去塗州，保險金遮 ê 一領 mā 隨 phàng-kìnn 有緣佮伊再相見，伊 ê 身軀邊 mā 已經有一个 buē 曉講咱話敆一个紅嬰仔 kā 阿母講「這是我 ê 囡仔，恁 buē-tàng kā 顧，我 bueh kā 𪜶𤆬走。」
阿母講 hōo 我聽 ê 悲傷原仔活跳跳，總是我 tuì 彼个二姊家己選擇 ê 查埔人無咸豐三，講到今 ê 興趣。
Tī Guteküche.at 見著伊隨想著囡仔時捷捷食 ê 高麗菜卵，總是又閣 buē 記得阿母是按怎料理，隨請教網路𠢕人，押尾 tī YouTube 揣著【蛋酥高麗菜】挑選更加清甜脆口！免油炸版蛋酥這樣做！｜阿慶師 想 bueh 綴 leh 做，總是欠一味 --- 豆皮隨放棄隨閣翻頭轉來看 Guteküche.at ê Wirsing mit Käse und Ei 手頭 ê 材料除了蔥仔無掠外其他全齊有，按呢就來綴 leh 做，不過我食 buē 慣勢。
食 buē 慣勢 m̄ 是原食譜䆀味，是我慣勢食卵包這款炒甲赤赤 ê 卵，sóo-tí 當卵愛成做若卵燥𫝻有淡薄仔水水 ê 口感，準做 gún 翁呵咾甲觸舌我 mā buē 繼續綴 leh 按呢做，起因彼 m̄ 是我慣勢 ê 喙斗。
食譜閣餾一斗確定家己無 kā 伊做甲重耽，按呢就繼續試落去，卵 ê 做法就 tshan-tshiūnn 阿慶師 ê 做法，先炒 hōo 好勢 tsiah 佮其他 ê 材料濫做伙，按呢 ê 做法 hōo 伊看起來無遐爾仔媠像原食譜按呢，總是足敆我 ê 喙斗 mā 合翁 ê 脾土，做菜正經是哲學。
米蘭草花卵燥法國焗
糋膩瓤油這件代誌總是大碗閣滿墘又閣水龍車 bueh 拍火，一路底到通行無阻上得人心。
總是，拍火 ê 過程無可能攏是通行無阻，準做咱甘蔗隨目齧，剃頭照輪辦➀猶原 ē 著觸。
這久我唯一通做 ê 代誌 kan-ta 是 hōo 家己成做一隻水雞愖來久，跳來遠➁。
翁自頂年11月達成目標 kā 家己按81 糋甲賰 72 公斤就開始致心做水雞。
我自今年3月發見油敢若糋無啥會出來 mā 開始成做水雞，不而過我 kā 食食熱量按1500 khiú 到1700，gún 翁是 1500 搝到 2000~2500。
這睏仔身體荏 kan-na 款早起頓，下昏飯就放牛食草。
這款看起來誠自然 ê 代誌 m̄ 知按怎直直 tī 我 ê 頭殼踅金龜磨。
我想決定是想著往擺 ê 故事，總是我無興咸豐三，講到今。
M̄-koh，我清楚知影遮 ê 往過是家己 ê 滇流佮洘流，我家己 mā 捷捷無事揣事三不五時伸手 kā 搣一下。
遮 ê 代誌 tuì 我來講窮實 buē 造成凝心抑是困擾，總是𪜶 tshan-tshiūnn 蠓，煩。
翁出門步頻踅翻頭。
我問伊落勾啥物物件。
「伊佮郵差攏無落勾物件」隨 kā 白紙橐仔交 hōo 我。
見著伊若見著厝內 ê 人，雖罔我 m̄ 是教友。
總是，tī 家鄉無親人通相借問，猶原有人願意分張按家鄉來 ê 氣味是我 ê 福氣。
𫝻著脾土 buē 合 ê 代誌，我 ē 熥「出出去！到世界逐角落生湠濟濟」。
我 m̄ 是教友，總是迵過這篇文章，我揣著家己 ê 盲點 mā 知影日後閣搪著生毛帶角抑是龜怪愛按怎進退。
窮實 buē-tàng 講進退，起因生毛帶角抑是龜怪 tuì 我無影響，總是我捷捷 ē uī-tio̍h 遮 ê 代誌 tuì 家己情緒叨撚。
這就真龜怪--ah。
我討厭這个感覺，sòo-pái 我需要搜揣答案。
一个人食早起頓，想著鳳飛飛小姐講過 ê 這段話。
食飯配鹹，m̄ 是鹹是淚珠
Mā 想著往過，按外頭做穡轉來攏 ē 睏甲日頭曝尻川 tsiah 起床。
彼久 gún 媽媽攏 ē 講我來款咱 ê 早起頓。
早前無法得感受鳳飛飛小姐佮 gún 媽媽講 ê 話。
Bueh「欠錢怨債主，不孝怨父母」進前，誠實愛目睭金金看、張持繩問題。
昨昏，tī Books 揣冊、注文。
一切是過五關斬六將 hōo 我這个電子青盲牛肚臍空插鎖匙歡喜甲 buē 顧--tit。
當我掠做我有法得輕輕鬆鬆行出山海關，彼號 ... m̄ 是講 ē-tàng īng 過數 ê 方式付數？
是按怎這馬點入去揣無𪜶 ê 口座？
論真講，我 m̄ 捌 gún 爸爸 ê 話。
猶 m̄-koh，我 iōng 我記憶中聽伊細細聲 tsham 仝鄉 ê 人冇談 ê 語調稽考伊 ê 話。
我想應當是較 倚客話。
Sóo-pái，想 bueh 學客話、寫客文。
客家話 tuì 我來講 buē 生份，起因囡仔時捷捷 hōo 客家媽媽叫飼，讀書時 mā 捷捷去客家同學𪜶兜𨑨迌。
細漢時，二姊若是煠麵，伊攏 ē kā 我 ê 麵加囥兩粒麻油卵包。
伊講，按呢我一斗食就 ē-tàng 食著兩款好味素。
一个是煠麵 ê 滋味，一个是卵包 ê 滋味。
二姊因為塗牛換肩先塗州賣鴨卵。
Hōo 我無機會繼續 tuì 伊司奶講人我腹肚枵甲 teh 挵鼓。
風水地理講，黃是土，土是氣，土閣晟養萬物。
寒--人 ê 德國，看無青、看無黃。
只有白銀 tī 閃爍。
敲幾粒卵，激家己是后羿。
金烏一粒一粒射，金烏一粒一粒貫，貫入家己 ê 脾土蒂。
一个語言抑是文化 ē-tàng tī 孤𣮈 ê 文化 hőng 點油做記號，猶原是活力十足孤鳥插人群，做伊 ê 穡行伊家己 ê 路。
準做，別人笑伊是囝仔癉(tan)，講伊是需要擲㧒捔 ê 舊漚舊臭 m̄ 捌十八港跤行透透 ê 草地倯。
伊猶原 buē 怨嘆家己生做䆀，愛整容成做生份人。
起因，伊知影上重要 ê 代誌 m̄ 是用目睭看。
一枝草，一點露，媠䆀攏有好人才。
食早起頓讀著這張圖 In virus veritas，喙內 ê ka-pi 險險噴出來。
雖罔，我並無真正理解伊 ê 意思，m̄-koh 看著熟似 ê virus 小可知影伊是 teh 講佗一項代誌。
Ūi-tio̍h bueh 確定家己想 ê 答案，將手機仔挈 hōo gún 翁看。
伊一看隨笑甲吭跤翹講；
這是真出名 ê 拉丁語俗語，原文是「In vino veritas」，意思是「酒內底有真相」。
Tī-leh 款起早頓 La-jí-ooh 拄好放送這首歌 Fall On Me。
物件做好，我隨上 YouTube 搜揣影片佮翁分享。
翁看了，我問伊，你有啥物想法？
「歌誠好聽」伊講。
「Sie sind ihrer Seele bester Freund➀」我講。
燒熱 ê 天，早起頓無想 bueh 食麭。
翁問「按呢咱早起頓 bueh 食啥？」
「Noch unterwegs(猶原 tī 路頭)」我應。
「你 ē-sái 掀食譜冊揣靈感」翁講。
「你四界𢯾轉來 ê 食譜冊誠 tsuē 是無相片通參考，無愛」我應。
睏天路車日子 Camping mit Caddy (21) 閱讀行跤花，心行尞 Buch (3) 城市閱讀 Stadtlesen (4) 輕兩想 ê 食食遶山花 Rezept (22) 板膋收冬寫真 ▪ Ergebnisse der Gewichtsabnahme (3) 侘寂貓事 Kreis von Kreisen (1) 翁拋荒 ê 日誌 ▪ M's Blog (1) 電台 教學網站 閱讀天地 Podcasts 台客雙語輸入法 台客德日辭典 電視 其他工具 弄筆尾展文墨 鵁鴒順便空 ▪ Meine Reisen 
