亂皂𥴊仔店 ⓂⒺⒾⓃⓀⒾⓄⓈⓀ

歐洲東爿 ê 人𪜶 ê 食食慣勢敢受露西亞 ê 影響？

慣勢早起頓萬項萬物齊食燒燙燙 ê 我第一斗 tī 波蘭 ê 飯店食當地早起頓見著麭敆煙腸酸菜湯，無感覺任何怪奇 ê 所在，押尾 tī 波蘭佮捷克搪著較成德國人喙斗 ê 早起頓，麭敆、Tshì-sù、Há-muh 這類生冷 ê 食食我就感覺龜怪矣，起因𪜶敆 ê 菜蔬 m̄ 是瓜仔哖、Kam-má-tooh 片、西洋萵仔菜是番薑仔，紅色、黃色佮一款 tuì 我來講有淡薄仔薟佮苦味薄黃色 ê 番薑仔。寫著這色番薑仔，伊 tī 德國框金 ê 價數 m̄ 知影是無啥人 tī 種交靠進口，所致價數框金，tī 波蘭、捷克、羅馬尼亞簡單來講向時 hōo 蘇聯箍牢 m̄ 放 ê 國家，這款番薑仔是俗甲若德國 ê 白草花。我愛食番薑仔，搪著這色番薑仔比大同仔閣較無伊法。

飯店抑是民宿 kā 番薑仔做早起頓 ê 菜蔬來敆 tī 我猶未交阿羅翁仔姐做陣食羅馬尼亞人慣勢 ê 早起頓進前，我掠伊是飯店抑是民宿 uī-tio̍h 成本控管，畢竟番薑仔交葉仔類 ê 生菜相比並伊 m̄-nā 好處理閣好保存。交阿羅翁仔姐做陣食過幾斗早起頓我發見代誌 m̄ 是我想 ê 遐爾仔簡單，番薑仔 tī 𪜶 ê 食食文化敢若果子醬 tuì 德國人無宛 2 體 ê 重要。我好玄想 bueh 請教𪜶翁仔姐，總是有 ê 好玄猶是留做揣 YouTube 刺膨紗 ê 靈感較適合。

我愛食番薑仔 m̄-koh m̄ 捌生食到第一斗交阿羅翁仔姐做陣食早起頓，阿珊準備一大盤番薑仔條做生菜盤，我小面神歹勢跟綴 gún 翁 ê 跤步直接 tuì 𪜶翁仔姐講我喙白就跟綴𪜶 ê 跤步掖寡鹽、胡椒那食麭那食番薑仔，一目𥍉仔盤底無賰半項番仔薑，我就紲手 kā gún 翁 buaih 食 ê 額徙過來家己 ê 盤，那食那做貓是阿珊𠢕款番薑仔抑是番薑仔自本就適合做生菜食。Uī-tio̍h 研究我斟酌請教網路眾神 ê 分張發現番薑仔生菜盤 tī Google 英、德版本真正有時行，而且閣有人 kā 伊變化做 Sa̋n-tóo-it-tsih 蓋興趣。

「你敢有興趣試番薑仔沙拉 ê 鹹汫」揣著 tsuē-tsuē 新食法 ê 我隨請教交番薑仔是對頭冤家主 ê 翁，伊 ê 反應免跤頭趺想 mā 知機 ê「Buaih」，不而過伊 buē 記持牽手 ê 性地，伊若回答「M̄ 知鹹汫如何，咱來試看覓」我絕對 buē 起交繃，伊回答 ê 隔轉工這味素隨上桌。

翁講食林檎蓋健康，所以愛 bué 一袋2公斤半。看伊又閣受著價數 ê 影響，我講「你想 bueh 閣耍一斗俗物食破家 ê 活動？」

「我是𠢕扞數 m̄ 是食破家」伊應。

「曷無咱閣來做一改試驗，看 tsiâ tsiah 是彼隻雞」我講。

「好，彼隻雞決定 m̄ 是我」伊拍胸坎掛保證。

「我 kā 你掛保證，這注絕對又閣是我贏」我 uì 伊 ê 胸坎仔輕輕仔頓一个印仔。

是啥物款 ê 味素 hōo 有體無魂 ê 柴頭尪仔步頻詩人神魂入體 uī 伊 ê 早起頓做詩?

你是我 ê 火，你是我 ê 神魂，你是胃腸 ê 愛人。

「我 ê 手藝無遐爾仔𠢕，總是我愛 Ode to Bread(Ode an das Brot)。」

「你是我 ê 胃腸，我 ê 麭。」

搝線 tī 北爿 ê 柴頭尪仔目𥍉仔按 Pinocchio 轉做人 hōo 我 buē 慣勢，隨 bueh 六月蚶，開喙臭，兩片澹澹掛燒烙 ê 鬆軟疊 tī 我 ê 喙脣講「你 mā 是我 ê 詩。」

林檎 m̄ kan-na 是 lìn-gòo。

Tī 超市 bué 菜，翁看著林檎 ê 價數開始踅唸食林檎 tùi 身體好等等。

「葫蘆墩白米，無糙(錯)，總是你敢有法度 kā 林檎囥甲 bueh 歹去進前就食 hōo 煞？」我問。

「彼曷著問，包穩是食甲清氣啖啖 hōo 你揣無一屑仔肉幼仔通拭桌仔」伊講。

「天公有目喙➀，你 m̄-thang 又閣成做五錢豬仔掛一支喙➁」我 kā 手按一盒六粒裝 koh 盒子セット(setto)甲宛然 Barbie ê 林檎指過。