Gún 翁愛食包餡 ê 麵皮，像水餃。拄徙岫到德國猶原 teh 揣喙斗 ê 我 mā 確實捌包過幾斗我論真講無遐迷 ê 水餃。
近來凡勢受伊參加社團 ê 影響，伊問「你敢 bueh 包水餃？我會使得 kā 你鬥煠水餃。」
伊 tī Telegram 參加偌 tsuē 社團我 m̄ 知機，總是無事不登三寶殿我真知機隨微微仔笑講「恁歐洲 mā 有水餃，咱去超市款一包轉來煠比家己動手做 ê 省時間、省水電錢 ê 一兼二顧摸蜊仔兼洗褲。」
伊知影牽手日本剾刀攑懸懸，倒剾伊 ê 一个錢拍 24 个結，不過 uī-tio̍h 虛華張面皮準做臭頭仔免包布伊 mā bueh 包布，防蠅(風神)，伊繼續喙抹蜜甜粅粅講「你包 ê 水餃無人通比並。」
我清楚知影家己 ê 斤兩 mā 無幻想世界，文文仔笑講「是你過謙 m̄ 甘嫌，我無遮爾仔厲害啦」斡頭伐向廚房準備伊隔轉日 ê 飯包，伊 mā 知影迷湯閣灌 mā 無較縒 ê 放伊自由莫綿死綿爛。
「今仔日呔 ē 想著這味」翁問。
「閣 kā 你飼米抑是秮仔，你 ē 綴 leh 喝講，不可思議，十外冬攏是仝一个查某人，愛換人。」
「我若繼續喙白，真正 ē hőng 換掉....」
「知影就好。」
這 tī 往過三不五時就款來食，自跟綴醫師好辣聽來 ê 1400kcal/日，我就 m̄ 捌 hōo 伊出現過，起因我保存 ê 食譜是一斗 250g 麥片敆 100g Tshì-sù，這兩項敆做伙隨超磅。
逐頓飯頓食飯飽我齊問 gún 翁這出菜敢有敆你喙斗？這出菜敢合咱美食家 ê 脾土？這出菜咱美食家敢有啥物建議？今仔是德國 ê 安息日，貧惰六分鐘出好料 mā 無才調一點鐘出六分鐘好料 ê 我見著廚房猶有一袋夏南瓜就捎來礤簽敆寡麵粉、卵做煎餅 hōo 伊做早起頓。
餅煎好請伊來食頓見伊若囡仔見著無佮意 ê 物又閣驚 hōo 大人罵就攕仔 tī 遐反來反去 hōo 我想著飯桌戰爭，伊佮意承𪜶兜 ê 喙斗，糜飯齊食甜粅粅，隨感受腹內萬物齊力挓火，總是𪜶兜家內事 tuì 我來講已經無要無意，我就捾一桶水 kā 大家下性命挓 ê 火廕掉，據在伊去 hōo 時間引𤆬我行出龍鳳生活 ê 雺煙散霧。
早起頓食飽，我田螺循舊逝，較行 mā 仝逝問伊這出菜敢有敆喙，敢有意見 bueh 分張，交我呔討 bueh 出這出菜 hōo 伊理解，我是經過思考佮顧慮，當然這个思考佮顧慮包括我家己，畢竟尊存別人 ê 喙斗 mā 愛尊存家己 ê 喙斗，畢竟這是人生上重要 ê 自然交造物者賜 hōo 咱人類 ê 幸福，咱 ê 舌有法度感受 ê 豐沛是 tsuē-tsuē 生物無法度做伙比並。
「我窮真無愛食夏南瓜，起因伊無味素」翁那咂一喙茶那分張伊見著夏金瓜煎餅 ê 躊躇，聽伊按呢講我 tsiah 想著，確實自交往到龍鳳生活，我從來 m̄ 捌見過𪜶老母抑是伊 ê 朋友出過夏金瓜，頭隨敧一爿，雙目 tuì 伊金金相。
「你 ê 好玄 m̄-nā 成貓 mā 像狗」伊看我若狗仔 ê 好玄笑甲吭跤翹，我無紲喙恬靜聽伊分張心路。
麥片底時出現 tī 我 ê 性命？敢是芋仔爸第三斗中凡，二姊順醫生建議 bué 一大包麥片轉來 hōo 芋仔爸食彼時陣？
記持 buē tshan-tshiūnn 露螺循舊逝，較行 mā 仝逝，芋仔爸轉去塗州賣鴨卵 bueh 30 冬，二姊 mā 是，我 tuì 𪜶 ê 記持 m̄ 管我按怎循舊逝猶原若減一塊鬥圖片仔 ê 鬥圖。麥片 tī 底時出現 tī 我 ê 生活，我揣無路通循舊逝，不過我有才調順鬥圖 ê 愈來愈殕 ê 色緻靜靜回想芋仔爸交阿母 ê 麥片粥。
我無愛食麥片，徙岫到麥片窒倒街 ê 德國，麥片成做紅菜頭、林檎、塗肉林檎、紅菜頭山 ê 一部份 hôo 無佮意囤物件 ê 我開始起清瘼，想空想縫解決 gún 翁分張 ê「麥片是健康物，咱 buē 使得無食伊」ê 喙講健康 buē 使得無食伊，押尾是一喙齊無食伊 ê hōo 我確定伊是心肝無趁喙，以健康來妝娗伊 ê 倉鼠行為。
我是底時確定麥片交糜無相𫝛？這久愈來愈殕色 ê 鬥圖記持揣無一絲空縫通染色，所致 gún 翁彼漚甲無建設性 ê 麥片粥若你愛食 ê 糜相𫝛會使得直接擲潘桶，不過彼疊若冊緟 ê 麥片猶原愛解決，gún 翁分張 ê 課本智識 tuì 我無路，按呢換來反 Google 這本冊，這出菜就是按 Google 劃紅線 ê 重點。
Gún 翁講伊想 bueh 紮麵粉類做飯包，我敢會使得 kā 伊鬥相共？
彼曷著愛講，我無𪜶兜勥母 ê 大石頭硩毛蟹，凡事你講無準算，萬事我講是道理，照我行。
我無𪜶兜勥母 ê 喙斗，總是我有家己 ê 歹症頭，我願意 kā 伊鬥相共 m̄-koh 10% niā-tiānn。我無可能 uī-tio̍h 伊 ê 願望骨力撋麵抑是煎卵餅紲落來骨力包餡，這久 ê 我 kan-ta 想 bueh 出一鼎隨做菜蔬餅 ê 料理。
啊，我想著矣，彼出按「廚房裏的人類學家」學來 ê 美國菜色。無事無事巡食譜，無事無事攑香綴拜一斗，果真是保持記持 ê 好助手。
拆白講 Phián-khè-khò 交格仔餅無敆我 ê 喙斗，因為甜度超過若大象身材 ê 我有才調接受 ê 範圍。無愛食𪜶 mā m̄ 是驚大象行向恐龍，是甜路 tuì 我正港無路。
部落格捌記錄我學習做麭 ê 因由，這久 ê 我開始愖無愛食甜路呔討做甜路 ê 因端，順記持麭幼仔行轉去 2012 我揣無在水 ê 記持，不過我想合該然交死愛面子佮張面皮有相干，特別是參加面冊煮食社團 ，ē 曉扞鼎是四常，ē 曉做麭做甜路是十八港路行透透 ê 𠢕人。
我無興成做出名人 mā 無彼个才調成做出名人，總是人 tī 羊仔世界無成做羊仔是 Mission impossible，特別是人 tī 虎尾合同廳社讀著「分享文化的溫度」無骨力跟綴煮食社團做羊仔誠對不起逐家。這久順記持 ê 麭幼仔行轉去攑香綴拜 ê 日子，感覺是舞豬舞狗，不過人生本底就愛舞豬舞狗 tsiah 有才調行向閣較好 ê 家己，像人生食過龍眼好食核烏烏，搪著相𫝛 ê 問題 buē 閣翻頭行仝條路 m̄-koh 知機按怎處理 hōo 家己莫閣成做別人 ê 喙邊肉，委屈過日。
寒人 ê 德國塗肉林檎大出，一袋一袋 2 公斤賣，一袋一袋無夠 1€，特別是外表較無遐媠 ê 塗肉林檎。今年這款塗肉林檎又閣特別 tsuē，所致價數閣較媠，媠甲 hōo gún 翁又閣認為伊是𠢕拑家 ê 人一斗捾 5 公斤轉來講，林檎𠢕囥，免驚。
塗肉林檎 tuì 我來講是飯食過幾仔斗 tī 伊猶未成做 Mn̂g-sng 進前 kā 伊安搭 ê 莫無枷夯交椅 ê 食物。
翁愛食煎餅，馬鈴薯煎餅、菜蔬煎餅、馬鈴薯菜蔬煎餅遮 ê 需要礤簽 ê 物，我 mā 愛食遮 ê 物，總是我 ê 愛無夠額到願意骨力 uī 伊礤簽，所致見聽伊講煎餅好食，我 ê 耳空隨關門聽無伊講 ê 講話。
伊知影牽手有這款性地，所致他 mā 真蠻皮，一支喙若魚仔喙踮我面頭前開合，總是我比伊閣較蠻皮。
這斗翁仔姐做陣散步去 Marktkauf 款物件，照慣勢菜蔬區，準過，肉區，準過，啥物攏準過，第一个報到 ê 角勢就是敗價區看有啥物心適物通試鹹汫抑是抾著四常 bué buē 落手 ê 寶。
「今仔日有馬鈴薯簽通做馬鈴薯煎餅」我那巡若花車大拍賣 ê 物那講。
「我佮意咱家己礤簽 ê 馬鈴薯煎餅」翁講。
今仔日是狂歡節(11.11)，tī 德國鏡報讀著匈牙利政府決定限制 tī 𪜶 ê 世界無法度接受 ê 權利。
Kā 新聞囥一邊 ê 我，那烘卵餅皮那想著彼年踮西班牙聖母堂外口步頻想著愈來愈殕 ê 伊就 tuì 聖母講 m̄ 知影伊這久過了按怎 ê 代誌。
那烘餅那問已經坐 tī 食飯廳等食 ê 翁「你敢有讀著匈牙利這條新聞？」
「有--ah，過站仔歐盟 ē 講話，因為這違背歐盟 ê 政策」翁講。
「向望每一个佮咱慣勢 ê 社會形態有頗略無相𫝛 ê 人攏 ē-tàng tshan-tshiūnn Sphan 按呢，粉紅仔粉紅」我講。
Gún 翁講「我需要食麵粉」，我講「你需要減肥」，「你 mā 是」伊應。
囡仔時 m̄ 捌聽過食飯 ē 大箍 kan-ta 聽過有飯通食這久 m̄ 食有一日無飯通食你就知苦，押尾認捌無食飯 ê 知苦是大姊 uī-tio̍h 翁婿愛牽女瘦瘦 ê 喙斗，開始 m̄ 食飯二十外冬，到伊想 bueh 食一喙飯 mā 食 buē lueh，起因化療 hōo 伊無胃口，準做伊知影這久 ê 免驚大箍猶是一喙食 buē 落喙，目睭金金看翁婿交外口彼个交伊少年時一模模一樣樣肨奶 ê 夥計恩恩愛愛。
大姊 ê uī 愛付出 hōo 我清清楚楚認捌 m̄ 食飯正港 ē 行入序大講 ê 知苦。
台灣人底時愛食麵粉，我 ê 14 是 kā 麭當做飯頓食？低路人 m̄ 捌準時綴時行順記持 ê 麭幼仔來揣線索，我想合該然是「胖達人」彼時陣。我身軀邊一堆本底 kā 炒麵、飯丸、糜做早起頓 ê 朋友開始講食遮 ê 物無健康，愛食麭，紲落來閣有人專工駛車去高雄 bué「吳寶春麵包」講食伊做 ê 麭健康閣養生。
麭 tuì 我來講是囡仔時食下昏飯進前止枵 ê 𨑨迌物 m̄ 是正飯頓，來到德國交 gún 翁談戀愛發見食歐洲麭若正港健康，呔討德國人家己 mā teh 推廣減食麭換食馬鈴薯、五穀、糙米，另外我身軀邊 ê 德國朋友真少無人 40 歲無夠魂舒猶原四序。我 ê 台灣朋友 mā 是，有人 ê 火燒心愈燒愈旺。總是𪜶攏講彼是米造成 ê 問題 m̄ 是麭。後來參加面社煮食社團發見目今 tsuē-tsuē 家庭 kā 雞卵糕做飯頓食，講歐洲人 mā 按呢食，誠健康。這个想法按佗落發穎定根我 m̄ 知機，總是我清楚知影以德國人來講，若是按呢食正經健康，這久 ê 𪜶 buē uī-tio̍h 囡仔肥胖症交大人 ê 糖尿病等等食出來 ê 健康問題頭殼𢯾 leh 燒。
咱台灣紅菜頭算枝賣，德國算包閣算斤賣。我愛食紅菜頭，總是我無愛食甲一斗 bué 一公斤。是，德國 ê 紅菜頭基本消費 1 公斤。
是講，德國超市 mā 有算枝賣，m̄-koh 彼是框金閣包銀，我 ê 褲袋仔已經袋磅子 m̄ 通 uī-tio̍h 紅菜頭 kā 家己舞甲食蒜仔吐蕗蕎，所致我需要揣辦法治療我 ê 症頭，物件一囤心頭就齷齪。
「我知影我屬兔，總是恁德國 mā 免遮好禮」我交逐日銷猶原看無伊消風 ê 菜頭講。
「這是德國四常，另外兔仔 ê 食物 m̄ 是孤紅菜頭一味」翁笑應。
「恁知影兔仔 ê 特性閣按呢 kā 創治真 m̄ 通」我講。
我數念阿媽 ê 菜脯卵，總是遮是德國 m̄ 是臺灣。
我數念阿媽 ê 菜脯卵，總是我 mā 無彼个骨力 uī-tio̍h 菜脯卵四界揣菜脯抑是家己豉菜脯。
我數念阿媽 ê 菜脯卵就 kā 德國人 ê 田庄早起頓塗肉林檎煎餅當做菜脯卵來窒數念，準做味素無相仝猶是補我滿滿 ê 數念。
塗肉林檎煎餅
美國電影《Forrest Gump》有一句話「人生 tshan-tshiūnn 一篋仔 Tsioo-kóo-lè-tòo，你永遠 m̄ 知影你會挈著啥物款 ê 口味」。
這个食譜就若阿甘講 ê 這段話。
Tī 東西兩德，因為經濟社會環境無相仝，致使仝款 ê 食物 mā 綴環境成做無相𫝛 ê 妝娗。
第一擺試這个食譜請翁鬥試鹹汫伊猶未試進前就隨「Ne(Buaih)」。
Tī 往過看伊成做𪜶爸母 ê 副本，我 ê 反應是隨搬一齣趒童戲 hōo 伊看，總是歲數 ē 添，我 ê 智慧 mā 是，我無想 bueh uī-tio̍h 別人 ê 喙斗抑是特殊 hōo 家己斷腦筋抑是致病。
厝猶閣有番麥粉就來試墨西哥 ê 番麥餅。
餅烘好 kā 伊挈來抺西班牙 ê Aioli，翁食甲笑咍咍又閣喙舌觸 buē 離一直 kā 我褒唆；
Tī 這段無法--得自在四界行踏 ê 期間，這塊餅引𤆬我行轉去墨西哥旅行 ê 時間 mā 引𤆬我踅轉去囡仔時綴父母蹛踮西班牙 ê 滋味。
番麥煎餅
睏天路車日子 Camping mit Caddy (21) 閱讀行跤花，心行尞 Buch (3) 城市閱讀 Stadtlesen (4) 輕兩想 ê 食食遶山花 Rezept (22) 板膋收冬寫真 ▪ Ergebnisse der Gewichtsabnahme (3) 侘寂貓事 Kreis von Kreisen (1) 翁拋荒 ê 日誌 ▪ M's Blog (1) 電台 教學網站 閱讀天地 Podcasts 台客雙語輸入法 台客德日辭典 電視 其他工具 弄筆尾展文墨 鵁鴒順便空 ▪ Meine Reisen 
