亂皂𥴊仔店 ⓂⒺⒾⓃⓀⒾⓄⓈⓀ

德國有 30% ê 人身體無健康，德國有 4 千外萬人有半頭風問題，德國 ê 關節炎 kiōng-bueh 成做德國國病，德國人 ê 胃腸問題愈來愈 tsuē，德國人 ê 平均歲數比厝邊法國、瑞士等等相比並齊短歲壽，特別是食食文化交德國無宛 2 體 ê 瑞士，德國少年囡仔致著 ADHS(英語 ADHD) ê 比例 mā 逐年 teh 增加。

這幾日聽廣播聽著新聞講德國交法國 bueh 合作烘健康 ê 麭，初聽這段話我隨認定家己聽甲走縒，畢竟德國麭是健康 ê 代表。

第二斗聽著這段話，我想著早前 kā 社團面友無料翻譯 ê 新聞 mā 想著舊年行尞 Couleurs d'automne 秋天 ê 色緻食著交德國一模一樣 ê Croissant，德國交法國 ê 味素就是兩條無拍叉仔 ê 大通路。這个感受屬於我個人無代表事實就是如此按呢生。

交我仝途 ê 朋友聽市政府講我無 bueh 參加假日市仔隨來關心我呔 buaih 參加。我 tuì 伊講「gún 兜 ê 麭無夠市仔 ê 需求通排擔」，伊講「這 m̄ 好解決，一包配方透落去，平均 2 ~ 3 點鐘隨出一斗麭。」

我知影配方一透 ē-tàng hōo 家己褲袋仔袋龍銀 m̄ 是袋銀角仔，總是這無敆我 ê 性地，起因一粒材料純然 ê 麭，伊需要時間。

我是 Mayo.

媠某問「你確定 bueh 寫一篇。」

我講「確定，總是我頇顢弄筆需要勞煩你 kā 我鬥栽筆花。」

我是 Mayo ê 代筆者，伊褒唆 ê 媠某「意愛 hōo 勥爸勥母一日貼貼上童 ê 你罕得遮好禮，我無 kā 你鬥相共我 ē 犯你兜 ê 欹講我甕肚。」

「媠某有囡仔量。」

翁身軀邊有 tsuē-tsuē 追求超級食物顧健康抑是聽專家講 30% 家己做專家 100% ê 朋友，交伊遮 ê 朋友做陣食飯，我捷感覺家己 tī 杜鵑岫(Cuckoo's Nest)，看𪜶遮 ê 人一時仔成做病人，一時仔成做護士長 Nurse Ratched。

起因，𪜶 ê 健康生活是食酒、食煙、食甜粅粅齊大丈夫 buē 影響健康，食無敆𪜶喙斗 ê 物抑是無順𪜶推薦 ê 方式去採購是交健康交繃。

舉一个例，一个險 bueh hōo 心梗窒(sim-kénn-that)➀𤆬走 ê 朋友，認為食食齊款有機商店商品交 kā 薰改掉，心梗塞 buē 閣翻頭挨拶問伊 bueh 去塗州賣鴨卵無，就安心馬照常走，舞照常跳。

龍交龍，鳳交鳳，隱痀 ê 交侗戇，翁 ê 朋友是按怎有這个性特我無興研究，畢竟我 ê 研究者 hōo 我一日貼貼行 buē 開跤。

遠兜 ê 花蕊猶原踮心頭勻勻仔分張伊 ê 清芳

猶未起行 ê 跤花，聊聊仔啉一甌茶，等伊開花，等伊蔫。

將伊 tsham 遠兜 ê 花蕊掖踮花圃，繼續清芳，繼續五彩。

聽作家顏冰心女仕分張伊 ê 換年有一項是目睭焦甲若火燒埔，聽歷史老師陳啟鵬老師分張伊 ê 換年拄著情緒懸低坎 ê 問題，我無確定我敢開始換年，總是我確定我 ê 來洗沓沓仔行向于美人捌分張 ê 本底一日五包，這久一年五包猶閣有三包通繼續使用。

我無確定我 ê 人生敢正式行入換年，總是這久 ê 我確定徛 tī 醫學設定 ê 換年年間。講醫學設定，起因朋友 ê 阿母無照大數據來換年，朋友 ê 阿母到六十歲 tsiah 開始換年，我 ê 阿母 45 歲進前就無子宮，我兩个阿姊一个 29 歲 hōo 塗牛𤆬去塗州賣鴨卵，一个認為只要保持身材翁婿就 buē 佮外口彼个夥計大麵炒粉圓，押尾翁婿猶原夥計膏膏纏，伊人無到 40 換來直腸癌尾期，按發見到離開無到半冬，伊透世人對抗 ê 夥計 mā tī 伊轉去塗州猶無到半冬就入𪜶翁 ê 家甲。

Ich habe gedacht nach dem Pinterest, ich habe das Problem gefunden.

Aber, in Wirklichkeit das Problem ist noch da.

Ich kann meinen Blog nicht auf dem Google gesehen, aber mein Blog bekommt Besucher...

Warum?

Ich möchte eine Anworte.

Ich überlege lange wie ich Fischstäbchen in der Taiwanischen Sprache sage - Tâi-gí bis ich das Lied gehört.

Ich kenne das Lied nicht, weil ich habe die Sprache auch vergessen. 

Weil in unsere Kindheit, die Schule sagt, die Sprache ist nicht wichtig enthalten in meiner Vater und Muttersprache.

Ich glaube, das Problem ist nicht nur in Taiwan. Viele Länder haben das gleiche Problem.

So, ich bin nicht daran interessiert, darüber zu diskutieren, weil die Zeit ist vorbei.

寫 Blog 部落格正經是好代，伊 m̄-nā hōo 我敨中氣、翻草、學習跟綴 Auguste Rodin 羅丹 ê Le Penseur, Der Denker, The Thinker 愖題 mā hōo 我機會一通再熥一項料理有偌 tsuē 百樣手路交多樣講法，並將家己按水鬼升格做城隍並 kā 無事夯 ê 枷擲㧒捔。

Google 推薦我看 Lecker.de ê Spitzkohl-Spätzle-Gratin mit Hähnchen 尖頭草花厝鳥麵雞肉法國焗 hōo 我想著我捌跟綴這篇食譜出菜，不過成品無蓋滿意嫌伊是阿䆀。這久 ê Google tī 我無動手指頭仔隨推薦我看這篇食譜 hōo 我又閣成做一隻 Meow，我 ê Google 口座敢有《間諜家家酒》ê 安妮亞？抑無 Google 呔 ē 知影我拄好有一粒德國通用德語號做 Spitzkohl，gún 遮 ê 草地人講 Filderkraut ê Pointed Cabbage 尖頭草花 ê 聖聖聖，gún 兜冰箱 mā 拄好有一包 Fettarmer Käse 低膩瓤 alias 低脂肪(tsi-hong) ê Tshì-sù a.k.a Formage y Queso und Cheese。

Google 正經有讀心術交預知(ī-ti)，因為我 tuì 這个按算 Bamberger Kartoffelpfanne mit Hähnchen und Spitzkohl 班堡人塗肉林檎炒敆雞肉 hām 尖頭草花猶原 teh 試鹹汫、buaih 試鹹汫 ê 三心兩意。自Google 再次推薦這出菜，鹹汫免試隨落鼎 tsiah 來發見我有豬母牽去牛墟症。我一直掠做按算 ê 熥是雞肉法國焗是這篇，Konsequenz, Consequence，結果 m̄ 是這出菜是相片是佬仔，藝術是窮實 ê 寒人菜蔬，寒人米糧，寒人色緻到今猶 m̄ 捌生湠「美--a，啥物叫做 suí？」ê 智慧。

我猶是要意佬仔！！！

Oh, mein Gott!!!

情緒是玄學是未知 mā 是 hōo 我 tuì 鹹酸苦汫失智覺 ê 情緒叨撚 PUA。

本底掠做䆀 tsi tsi ê 排盤，換一个時間佮空間隨成做媠 tang-tang ê 作品 hōo 我想著舊年底 tsham 翁牽手做陣參觀藝術展，四常攏是伊尻川坐 buē 牢椅，入館無到五分鐘隨喝來去，你沓沓仔欣賞較晏 tsiah 相揣 ê 句交換手換我講。

「你 m̄ 是 tuì 遮 ê 物一直興趣趣」翁問。

凡勢受著皺痕無添家己添，老實樹 m̄ 願大欉 mā 愛接受家己窮真無遐爾仔興這味「你 mā 知身軀邊 ê 人 m̄ 是講劇就是踅園，我無攑香對拜就是冇蟳無膏」我講。

「我 m̄ 捌感覺你是冇蟳 mā m̄ 捌見過你冇蟳夯籠」翁喙抹蜜 kā 我豉甲甜甜甜。

照本底 ê 性地，這看起來殕殕 ê 相片 buē 出現 tī 遮。

照本底 ê 相趁相喊輸人 m̄ 輸陣 ê 驚人笑，逐張相片攏愛翕甲若 NON-NO ê 性地，這看起來料小閣無鹹無纖(siam) ê 攝相 buē 出現 tī 遮。

總是，樹仔 ē 恬靜添歲我 mā 是。

Tī 這个連蠓攏無興來行踏 ê Blog，我按猴神學 ē 曉挑花刺繡兼引述陳麗君老師《銀河鐵道 ê 暗暝》銀河鉄道 の 夜 ê 這段話；

阮 teh 翻譯 tsit 篇作品 ê 時，阮 ê 人生旅程也拄好 tshiāng 著選擇 ê 交叉路口、無主張、孤單 ê 心境，tng 翻譯過程漸漸行到尾站 ê 時，阮也 tshuē 著「kā ka-kī 放下」ê 領悟。

我慣勢綴食譜出菜 mā 慣勢 tī 仝一个時間無出相𫝛 ê 菜色，所以 tī 這出菜出現進前 Muse 窮實無來相揣，總是我 mā 已經學 ē 曉放過家己莫情緒叨撚 -- 招姜子牙佮周公做陣行棋。

 「今仔日早起頓愛較晏食」我那𫝻手機仔那講。

「食啥攏好，只要你出 ê 菜攏好食」翁 mā 那𫝻伊心愛--ê 那應。

「當然 mā 是按呢生，我出 ê 菜攏好食，總是德國人講 ê 話 buē-tàng 認真，抑無按怎死攏 m̄ 知影，像彼對母女 hőng 請出去就隨倒塗跤 m̄ 捌閣𬦰起來」我刁意故講。

M̄ 敢保領實膜(tsa̍t-mo̍oh) buē 來行踏 ê 翁恬靜接受我 ê 日本剾刀，倒剾。

愛是...

伊看起來就是伊。

M̄ 是你意愛看著 ê 伊。

愛是 hōo 每一个人自在成做伊家己。

翁講真愛今仔日 ê 對句，頭一段是 uī 網路讀來 ê 辭，後一段是按德國歷史作家 Sebastian Haffner ê 「Jedem das seine」改編。

頭一擺見著伊是腹肚正枵又閣無想 bueh 食傳統 Balkans 料理 -- 肉、肉、肉佮 tshan-tshiūnn「Papa」四界生湠 ê 義大利料理雄雄一踅身 tī 一間看起來若猶生活 tī 阿祖年間 ê 餐廳門跤口看著一桌三个人食肉閣配一盤飯隨決定踮遮飼枵。

因為店東 buē 曉講英語 gún mā buē 曉講希臘(Hi-lia̍p)語，菜單又閣讀無路來就 iōng 上原始 ê 語言比跤畫手，先送一个笑容 hōo 彼桌 hōo 我停跤 ê 朋友挨拶(Aisatsu)紲落來開始遮比遐指，生菜盤、Πίτα、肉...Mo？Me？Kônn？確定選牛、選羊、選豬，久無見著米 ê 我呔 ē-tàng 無來一盤飯隨 kā 手指過去。

店東佮三位 uī-tio̍h hōo 我 buē 點 m̄ 著菜 ê 朋友敢若知影我 ê 想法隨開始比跤畫手 hōo 我掠做傷晏來，清飯已經 Nóo-sut 隨表示按呢無要緊，我 mā 綴猶是男朋友 ê gún 翁食 Πίτα 就好隨 kā 手閣按 Πίτα 指過去，表示閣一份。

店東 kā 手頭 ê 紙條囥踮桌頂，手綴指我本底 bueh 點 ê 物食講「Kein Problem」這 hōo 我楞去捎無摠通搝，隨越頭請教翁德文後 ê 14。

「Kein Anhnung」伊應。

當胃腸願意沓沓仔佮食物鬥陣，我又閣搪著另外一个問題，一个自我有印象開始 m̄ 捌搪過 ê 問題 --- 頭殼一直踅神兼戇神。

我 buē 講家己是冊迷，總是我 mā m̄ 是彼款見冊隨慼無法度讀字 ê 人。

這斗 kā 家己種 tī 眠床 bueh 2 禮拜 ê 時間，搪我掠做家己精神較好想 bueh 繼續讀陳雷醫師 ê《鄉史補記》，我竟然無法度讀字，而且是一讀頭就隨眩(hîn)目就隨抽。

這个現象 hōo 我驚甲咬舌，畢竟無啥特殊才能 ê 我，唯一猶有通佮人競爭 ê 一步取(tshú)就賰好好仔讀一本冊 ê 耐性。

冊無法度讀，手機仔 leh？

近來寫著「Tsiâ」想著三冬前 ê 故事。

四邊無一倚踮遮又閣無 tsham 有法得佮我冇談𫝛話 ê 人交陪，sóo-tí tsuē-tsuē 話原仔 ē 曉講，m̄-koh buē 去發覺佗落無對頭，我意思是我慣勢 ê 腔口。

2019年迵過面冊社團牽線，一位來德國行跤花 ê 朋友，見面破豆豆 tsiah 拄擘幾無粒，伊笑講「你中部人--hooh」。

我問伊按怎發覺？

Gún 後生 tī 中部讀書，gún 慣勢講「Suî」，m̄-koh 現此時 ê 伊攏講「Tsiâ」。

聽無《台灣新眼界》總是綴我看久 mā 知影愛按怎掠重點發問，tshan-tshiūnn 2023.03.01 恬靜殺手肺腺癌！無薰嘛會致著！基因.族群.環境.性別 著癌機率無仝? 當譚敦慈老師手揤 123 仝桌同學隨問譚老師 teh 講啥。

「逐日食一碗青色菜蔬，ē-tàng 降低50% 著癌 ê 風險，白色十字花科 ê 草花、白花仔菜，有 β營養素 ê 紅菜頭、金瓜佮トマト、卵白質」話聲猶未行到塗跤，喙 teh 窒白色十字花科 ê 仝桌同學隨講「這碗攏 tsiâu-tsuân，To-siā。」

聽伊講「To-siā」我 ê 笑脈 buē-su hőng 揤著笑甲 kiōng-bueh 變蝦(痚)佮龜(呴)。

我笑甲 kiōng-bueh buē 喘氣 m̄ 是歧視，伊 mā 知影我笑 ê 因由是離鄉，無離腔 ê 臭奶呆實在太古錐。

「這久臺語又閣加一个腔，DE腔」伊笑講，紲落來認真講「物件燒度已經低過65度，咱愛較緊食」YouTube 隨閣揤落去「咱繼續看專家 ê 分拆」。

Kam-má-tooh 醬透寮仔 Tshì-sù 佮牛奶，宛然黏 tī 樹蔭歇涼 ê 肉豉煨(gún 厝邊 ê Leonberger)按烘爐轉做冷氣遮爾仔透心涼。

麵濫落去，隨个仔隨个成做 thenn tī 紅霞海沙埔等待情郎 ê 美人魚。

美人魚遮 tsuē 个，情郎 buē-tàng kan-ta 一个，搣一把金甲若 Apollo 頭鬃 ê チーズ tsham 𪜶相會。

客鳥 m̄ 免來造橋，隨个仔隨个雙雙對對沈入愛琴海。

愛情 ê 熱度，tshan-tshiūnn 六月天 ê 火燒埔，燒甲 hōo 我成做夸父 tuì 𪜶走。

這窮實已經熥過幾仔斗，總是見用 Ikea ê 瓷仔盤攏感覺誠無合軀就無 kā 攝相做記錄。

前站仔按車頭划巷路轉來厝，tī 倚家庭科醫師遐 ê 人家厝見著「Zu verschenken」就隨倚過去看敢有啥物有趣味 ê 物。

素食食譜冊，德國人 ê 素佮我意愛食 ê 素無相𫝛，教人按怎飼馬佮照顧馬，彼佮我徛傷遠，茶甌仔有意思 m̄-koh 呔 ē 囥遮下底...

O.K.  彼个名連我 mā 無愛看無愛講，按呢就無啥有趣味 ê 物。

當我準備 bueh 翻頭踅轉去本底 ê 路線，見著一箱 mā 是「Zu verschenken」ê 箱仔囥踮回收柴枋 ê 掠外一爿。

「你 bué 啥物冊」翁問。

「一本法國寓言，一本英國小說，一本著 tsuē-tsuē 文學獎 ê 𠢕人寫 ê 小説」我講。

「第三本 bué 了真好，按呢你 ē-tàng 按文學獎𠢕人 ê 作品揣著評審 bueh 愛 ê 氣口」伊講。

「我無遐爾仔欠錢，需要 kā 家己成做 Fraust」我應。

Buē 記得是 tī 當時收著光批邀請我參加台語詩文學獎比賽。

走相掠 ê 經絲

久年 ê 珍珠

猶原幔 tī 目墘 ê 烏紗

宛然六合黃道十二宮

綴月鏡起隨月鍥落

前幾日踮愛料理又閣收到 blah blah blah ê 信息，照實講讀著猶原感覺鑿目，不過 kan-na 一秒 niā-niā 隨 kā 批刣掉。

批刣掉 tsiah 想著呔 ē 逐改攏遮爾仔衝碰無耐性，緊踅轉去愛料理看信息敢閣猶原𫞼 tī 遐。

感謝對方敢寫 mā 敢𫞼牢牢，因為伊 ê 勇敢 hōo 我 m̄ 免 tuì 家己起毛敲油呔 ē 遐爾仔衝碰受人影響閣無地熥智慧。

Kā 翕一張仔相留底隨 kā 伊 tsham 一聲歹勢攏貧惰發出喙做陣囥 tī 多謝你 kā 我講，你是「兔仔」hōo 我 m̄ 費神看顧你^^➀彼格，然後繼續你 ê mˇ diˊm̄ 是 my duty ê Das ist mir egal。