亂皂𥴊仔店 ⓂⒺⒾⓃⓀⒾⓄⓈⓀ

(2024.04.22 早起頓 Khu-lì-mù 蘑菇雞肉 + 秮仔飯  + 洋刺波俗麭 + 優格/1004kcal)

提早歇睏無想 bueh 綴四常隨轉來厝祀佛公，就盤 Bá-suh 到 Marktkauf 揣寶。 

近來 m̄ 知是天氣 teh 張掇抑是超市 teh 張掇，架頂捷捷闊閬閬 hōo 我手一伸隨摸到底，這款狀況若是猶蹛 tī 全庄 kan-ta 一間 Lidl ê Greffern 我應當驚甲「吃手手」擘腹家己瘦過頭。

這久徙位到猶是庄跤 ê 大庄，搪著這款狀況我 kan-ta 這个狀態心安草厝穩，因為超市若荔枝一大捾，路邊無人看顧 ê 良心菜蔬舖 mā 是三跤一坎攤，不過我猶是意愛踅超市，愛踅超市 m̄ 是 uī-tio̍h 吹冷氣享受優美 ê 環境，是超市 ê 菜蔬比遮 ê 攤抑是舖大碗閣滿墘兼 ē-tàng 自在手賤 buē hőng tshînn。

Marktkauf 交 Lidl、 Aldi、Netto 遮 ê 平價超市比並伊 ê 價數 buē 講真吸消費者 ê 目睭仁，Marktkauf mā 知影這个問題，所以當𪜶落價，價數是媠甲連平價超市攏喝 buaih 綴，而且閣有 tsuē-tsuē 新奇好物，像 gún 捌 bué 著無到 0.4€ ê  BIO 牛奶佮無到 1€ 好食甲到今我猶流喙瀾 ê 阿拉伯甜路。

Marktkauf mā 是我想 bueh 探德國有啥新冊 ê 好角勢。

我愛踅德國冊店，總是 bueh 搪著中央車頭彼款據在你反、隨在你紮弓蕉入來閣 kā 紮出去 ê 店真少，特別是田庄所在，sóo-tí Marktkauf 就成做我探德國文學 ê 自在區。

是，我無法度一仙人行入去獨立冊店祀佛公，紲落來一屑仔攏無寄付。

(2024.03.27 早起頓 美國茄雞肉 Kari + 草莓俗麭 + 優格/1098kcal)

總算 tī Google Podcast 停止服務進前，我學 ē 曉按怎掠 tsuē-tsuē Podcast 其中一个 --- Spotify。

按無耐性轉做有耐心 ê 人，這愛感謝 YouTube，準做 tsuē-tsuē 人慣勢 tī YouTube 聽 Podcast，我猶是佮意無「臆你佮意」佮若豬母牽去牛墟 ê「推薦」ê kan-ta 聲音 ê Podcast 。

感謝 Google 感謝 YouTube，因為恁我 tsiah 有這个機會發現家己 ê 潛力(Tsiâm-li̍k)闊閬閬。🤣

是講 uī-tio̍h bueh 收聽 Podcast 我 mā 申請 tsuē-tsuē 佮我無底代 ê 口座，像「SoundOn」、「Firstory」遮 ê 我 kan-ta bueh 成做聽眾 m̄-koh m̄ 知影佗一節脫(thut)箠，我 kan-ta ē-tàng 開節目 buē-tàng 收聽。

這个問題 hōo 我齷齪，起因我有這个癖，我無佮意抑是無 bueh 使用 ê 物就愛隨清掉 buē-tàng「收藏」來鎮地。

這个癖有好 mā 有䆀，總是好 ê 部份大過䆀，像露營車 Caddy，自我接手內底 ê 空間按一米闊變做十米闊 ê hōo 翁講家己講「我真正發覺我種著 gún 爸母 ê 譀想症。」

德國人 ê 露營車生做啥物款，Der Camping-Check 有真詳細 ê 分張。

(2024.04.04 早起頓 雞肉 Fricassée + 秮仔 + 洋梨仔俗麭 + 優格/998kcal)

YouTube 推薦我看  "Meet My Family" 那看那笑甲目汁生珍珠 mā 那隨想著做甲無真雙生仔 20% ê Frikassee，隨換菜單 mā 請教 Wikipedia 華文按怎 kā 定名，起因華文標題需要伊。

無請教無代誌，一請教我笑甲目汁㴙㴙滴 mā 隨決定照原名做標題。

Fricassée 是 17 世紀按 Ragout 演化 ê 法國料理，tī 18 世紀 ê 法國佮德國定名做 Fricassée 佮 Frikassee，英語 kā「é」ê 羽毛提掉成做 Fricassee。Fricassée ê 意思是切塊 ê 肉、菜蔬敆白色牽粉 --- Wikipedia。

2022 猶 teh 糋板膋驚食牽羮，2024 猶原 teh 糋板膋 m̄-koh 心安草厝穩知影「牽羮」窮實 buē hōo gún 目睭看 tī 粿，跤踏著火，只要 gún 知捌喙飽目睭枵 ê 後(hiō)果。

Mā 正經愛拆白講偷工減料 ê Fricassée 就敢若遮 ê 亞洲炒麵，你認為伊是你 ê 囡仔，事實你 mā 清楚伊並 m̄ 是你 ê 囡仔 ê  A.I. Artificial Intelligence。

(2024.04.01 Madras 魚サラダ + 糙米飯 + 洋梨仔俗麭 + 尖頭草花蘑菇炒 + 優格/1060kcal)

ZDFneo 放送《Lion》當 Saroo 綴火車來到 Kolkata 我想著翁按 Telegram 社團 ka̋ng 接收 ê 食譜冊 ' Currys - Spicy One-Pot-Wonders ' ê「Fisch-curry nach Madras Art」。

「有人 tī 社團分張無料食譜，你 bueh 佗幾本？」翁 kā kha-tá-lok-guh 直接𫞼 tī 我 ê 面頭前，那講那問。

「彼凡勢是囮」我 kā 手機仔掰掉繼續讀伊按公司紮轉來 ê 讀老人目 ē 增加頭 mā 抽抽痛，無讀德文字庫無法度增加到 D1 ê「Der Spiegel」。

「M̄ 是逐人攏按呢生啦」翁講。

「Gún 講有一就有二有二就三，無三就無成禮，這斗拄好第三斗」我繼續那讀現實 mā 那摸現實應。

(2024.03.17 早起頓 ひき肉 Budapest + 糙米飯 + 優格/841kcal)

「我 kā 你會失禮，我 kan-ta ē 曉剾洗你是圓仔花 m̄ 知䆀，大紅花䆀 m̄ 知 ê m̄ 捌愖過事實，buē 泅嫌溪狹 ê 人是我」踅翻頭 kā 食譜斟酌餾 tsiah 發見，人食譜寫甲遮爾仔明「Tomaten/Konserve」  我煞猶原堅持 kā Kam-má-tooh 當做菜蔬 teh 炒，做出來 ê 成品有法度按泔糜仔成做洘糜仔，彼是天落紅雨馬發角。

Tomaten/Konserve 表示罐頭遮 ê 利便包裝，進前我食著翁 ê 喙瀾看罐頭 Kam-má-tooh 無目地，舊年日子猶未徙跤到霜降 Kam-má-tooh 已經按我猶 ē-tàng 接受 ê 2.19€/公斤起價到 2.59€ hōo 我那 tuì 伊哭呻 mā 那咬喙根抉落去，等到 Chione 正經行跤到，我想 bueh 咬喙根 mā 無齒岸通咬 ê 一斤 3.69€ 起跳 mā 因為無齒岸通咬我 tsiah 無閣阿兄蹛樓頂，哥哥(高高)在上看罐頭 Kam-mâ-tooh。

拆白講，看罐頭 Kam-má-tooh 無目地窮實受翁 ê 影響無 tsuē，起因我無反對罐頭物食，認為罐頭物食無健康。

我看罐頭 Kam-má-tooh 無目地主要 ê 因由是，準做包裝寫 Italia 伊猶原 m̄ 是 Italia，伊是按無人權 ê 角勢到 Italia 換人權，準做伊正經 tī Italia 生產，伊 mā 佮遐 ê Made in Italy ê 衫褲仝款 kan-ta 賣 Italy 這个字名 ê 虛華，像阿麗。

「你蹛德國，你敢 ē-tàng 去恁厝邊遐 kā 我 bué Longchamp。」

「Longchamp 臺灣滿四界，臺灣 bué 就 ē-sái 矣。」

「彼無仝，彼是按法國來。」

(2024.03.11 早起頓 雙花仔菜カレー雞肉  + 秮仔 + 優格/1007kcal)

收到愛料理電子批見著𪜶加一个 TNL mediagene 我又閣成做貓綴連結行，紲落來整理菜股見著稗仔就挲掉，有柴草就燒掉。

我真享受這个過程，起因伊 hōo 我加一斗機會餾㧎㧎 ê 語法佮得著 tsuē-tsuē 想法，像華語 ê「羅勒」臺語按怎講？

我 ē 記得公視台語台台語智識辭庫網有「羅勒」ê 講法，隨請教正經有「羅勒」，就隨 kā 伊按 Königskraut 國王芳料草改做洋九層塔，紲落來愖華語 ê「櫻桃蘿蔔」臺語按怎講?

較早我是寫水菜頭，這个辭是循 Wiki 紹介來，總是這是無閣請教其他資料 ê 貧惰副本，sóo-tí 我感謝愛料理，因為伊我 ê 青光眼又閣回魂。

我愛食 ê 菜頭 tī 英文窮實無分甲遐爾仔幼，Radish 指細粒種粉紅色 ê 菜頭華語 a.k.a「櫻桃蘿蔔」頭前加 Green, Black 指較大欉 ê 菜頭，咱臺灣人食 ê 菜頭號做 Daikon radish。

德文 ê Rettich 是菜頭，Radieschen 意思是細粒子菜頭，華語 a.k.a. 「櫻桃蘿蔔」，咱臺灣人食 ê 菜頭號做 Winterrettich。

我是當時發見遮 ê 問題，特別是我掠做這个辭是按日文來 ê「櫻桃蘿蔔」tī 日文號做はつかだいこん(二十日大根/Hatsukadaikon)？

(2024.03.16 早起頓 寒人菜蔬雞肉 Tshí-sù 滷 + 莧仔米秮仔飯 + 優格/996kcal)

按公共冊櫥 kā 食譜冊紮轉來，攏有這个慣勢隨 kā 有興趣 ê 食譜練一回，紲落來 kā 伊記錄 tī Blog hōo 冊有機會繼續佮別人結緣。

總是有年冬，這久 ê 記持較無烏貓姊年間 ê 精光，sòo-pái mā m̄ 是逐本 ē 閣紮轉去公共冊櫥，不過這款現象是少甲比我頭殼頂 ê 白娘仔絲閣較少。

Leichter leben in Deutschland/掠肥食瘦德國生活是舊年踅街紮轉來 ê 食譜冊，彼陣綴 leh 做 tsuē-tsuē Frühstück/早起頓像鱷梨仔檨仔 Quark、Salat/サラダ像2月季節サラダ遮 ê 無講完全相𫝛 m̄-koh 絕對是照步數，無烏白亂舞，是講我 mā 無遐爾仔勥跤有法度家己變一份菜色，總是我猶原有法度 kā 寒人菜蔬轉做熱人菜蔬來款，像這項，第一斗料理是熱人就款番薑仔替代米蘭草花 ê 配色，雖罔德國熱人猶是有白草花通替換，總是我就是無愛白草花 ê 白汫無味。

2 月底米蘭草花沓沓仔按德國換做 Italia，愛食米蘭草花 ê 我 tī 2 月行到 3 月這段時間，那享受伊 ê 好味素 mā 那感覺佗落 m̄ 是勢，總是我是 buē 儉齷齪 ê 人，特別是這款準做捎無摠猶原 buē 三更半暝出世，亥(害)死人 ê 事項，就 kā 准過。

近來熥食譜巡文章，巡著這篇 tsiah 想著，這篇食譜 ê 主角是寒人菜蔬「米蘭草花」m̄ 是熱人菜蔬，隨決定隔轉日 ê 早起頓就是這篇敆莧(hīng)仔米。

啥物是莧仔米？

(2024.01.18 チーズカレー米蘭草花白銀魚糋 + 糙米 + 優格 + 藍莓俗麭/851kcal)

Gún 蹛 ê 城邦 tī Fastnacht 這段期間推捒「Ein Kuss」唚一个無料參觀城堡，gún 就四界「唚一个」參觀城堡。

一日踅到歷史感情較倚法國 ê 城市，建城 mā 比現此時 ê 首都，gún 蹛 ê 所在有兩个首都，m̄-koh 行政權猶是 tī 後來成做德國歷史上重要 ê Hohenzollern 家族徛家這爿。

Gún 翁某一个喙白兼驚食 buē 飽，一个驚開錢食外口，sóo-tì gún 攏真慣勢早早出門早早轉來食下昏頓，出發 RESIDENZSCHLOSS RASTATT 彼日 gún bueh 坐 ê 車幫受著別搭鐵枝路著火暫時無通車，我隨 tuì 翁講「這表示咱佮 Residenzschloss Rastatt ê 緣份無夠深，來轉。」

「德國鐵枝路 m̄ 是 kan-ta 南北兩爿 mā m̄ 是 kan-ta 一間公司 teh 運作，較停仔 ē 廣播新路線」翁應。

著謼，遮是德國 m̄ 是臺灣，德國 ê 高鐵無法動運作猶有其他 IC、IR、RE 通替換，臺灣 ê 火車系統一出問題彼日 ê 計劃百分之 90 全臭火焦無 teh 調整，10% 有法度調整是因為出發 ê 所在無蓋遠。

本底就挨挨陣陣 ê 車頭，這久因為車幫問題 hōo 伊愈成牽罟。

(2024.02.24 早起頓 三文魚 Kam-má-tooh I-tá-lih 麵 + 優格/975kcal）

Kā 家己種 tī 眠床 bueh 2 禮拜 ê 這久，偷走厝 ê 味覺(bī-kak)猶原猶未轉來，本底活潑 ê 腸仔 mā 猶原死殗殗無元気(Genki)，總是今仔日透早我有法度按食一粒白煠卵攏艱苦 ê 喙斗 kā 這盤料理規个食甲清氣啖啖，這正經是比得頭獎閣較快樂。

我 m̄ 知影偷走厝 ê 味覺佮腸仔當時 ē 轉來相揣，總是我清楚知影無好好仔食一頓飯，味覺佮腸仔愈 buē 轉來，踅神 ê 問題 mā buē 解決。

初初搪著伊感覺伊佮 Tagliatelle al salmone 𫝛款就隨看伊 buē 上目。

起因，Tagliatelle al salmone 咱 m̄ 知影已經食過幾百回 ê 𤺪，你 tī Italia 餐廳抑是土耳其烘肉店 mā 捷捷出現。

(2023.12.30 早起頓 菠薐仔雞肉カレー + 秮仔 + 王梨優格/705kcal)

翁較早無愛食菠稜仔，伊講菠薐仔 m̄ 是菜，伊是路糊仔糜。

這个菠稜仔 m̄ 是菜 ê 問題，tī 我熟似 ê 德國朋友箍仔內有誠 tsuē 人有相𫝛 ê 症頭。

Sòo-pái 自佮伊來往，我 m̄ 捌感覺佗位 m̄ 著勢，不過見佮遮 ê 德國人做陣食飯，我攏 ē 得著這个智慧「我 ê 修養真正蓋好」。

起因，𪜶凡勢真慣勢 iōng 這種方式來表達𪜶見著 buē 合軀抑是 buē 上目 ê 事項，愛覕喙兼激氣「Ne」buē 離來表示我上捌世間事佮享受，總是修養較好 ê 人 mā 應當無興一日到暗看人 tuì 家己「Ne」兼「覕喙」。

Sóo-tí 正經愛 kā 家己褒唆講我是修養蓋好 ê 人，起因我從來 m̄ 捌當場綴𪜶激面腔兼相激，我 kan-ta buē-su 一仙柴頭尪仔 kā 家己祀佛公放外外。

畢竟隨人有隨人 ê 喙斗佮脾土，像我愛食豆腐 mā 愛食印度料理，翁愛食チーズ佮パン，這兩个無相仝拄好掩來扯去 gún 兩人 tuì 生份食物 ê 智識，無啥人 ê 食食文化較贏面抑是低路。

我認捌 ê 德國人問題 m̄ 免閣咸豐三，講到今，sòo-pái 寫到遮為止。

(2023.11.16 早起頓 玫瑰草花雞肉 Alfredo + Pasta + Quark/974kcal)

玫瑰草花 tī 德國佮蚵仔菇 bueh 相仝無啥有人緣，另外伊佮我 ē 敆胃 ê 食譜 mā hōo 我做甲差不多就想講抑無來換英文食譜揣靈感。

總是，英語食譜凡勢 mā 是按歐洲生湠，我 ê 14 是講英語 ê 角勢大部份 mā 是按 Zeus 佮 Phoenicia 公主 Europa 生湠出來 ê 子民，𪜶 ê 喙斗猶原保留原生地 ê 脾土，sòo-pái 有興趣 ê 食譜佮德文窮實無宛2體 ê 精差 tī 號名。

揣食譜我慣勢直接踅相片，相片有合八字我 tsiah-ē 揤落去斟酌讀作法。

玫瑰草花按歐洲湠到美洲，sòo-pái 歐美兩搭 ê 食法 tī 網路攏無宛2體 ê hōo 我想 bueh 放棄繼續踅街，總是無宛2體猶原 ē 好玄啥物是「松阪豬(槽頭)」按呢。

Chicken Alfredo Brussels Sprouts，我捌雞肉 mā 捌歐盟首都之一 ê Brussels 佮玫瑰草花，總是彼个 Alfredo 是啥物碗粿。

本底掠做字捌深 ê 膨風隨綴這个「Alfredo」成做刣無肉 ê 四跤仔。

「你敢捌 Alfredo」我問翁。

(2023.10.06 青豆仁蘑菇雞肉 + 清飯 + 優格/892kcal)

食「秀珍菇」步頻想著伊 ê 德文 kan-na 是蚵仔 ê 意思，手頭 ê 碗放落桌徛起身踅去客廳反字典 hōo 家己險 bueh 德國時行 ê SOKO 現場。

華文 ê「秀珍菇」正經是德文 ê「蚵仔」(Austern) ，這个發現湠出其他 ê 好玄 --- 華文 ê「秀珍菇」是按佗落來？

華文 ê 外來物號名大多數 m̄ 是照日文就是順英文，先請教英文 --- oyster mushroom, oyster fungus, hiratake, or pearl oyster mushroom，tsiâu-tsiâu 攏蚵仔，英文受法文影響 mā tsuē 請教法文按怎寫 Pleurote en (forme d') huître 意思 mā 是蚵仔，歐洲久年 ê 三角戀愛攏寫「蚵仔」，按呢華文 ê「秀珍菇」到底是按怎來，日文？？？

日文讀無總是有和字 thang 理解平茸(Hiratake)、本平茸(Honhiratake) 扁 ê 菇，無「秀珍」2字，Ah，我講「阿珍仔」咱敢 ē-tàng hōo 我請教一下，你這个 ê 字名是按怎來？是按怎你無 bueh 照你舊底 ê 生張號名蠔菇？

わからない(Wakaranai)一聲隨放阿珍佮家己自由，huînn-ti̍t 咱文章拳頭茶 m̄ 捌半項 mā m̄ 是這久 tsiah 發生。

一戰是德國救命糧草 ê「蚵仔菇」伊 ê 運命 tshan-tshiūnn《驚驚袂著等》輯六、厝邊一間廟 ê〈 番薯遮爾仔無人緣〉𫝛款無人緣。

(2023.10.05 早起頓 五彩ひき肉法國焗 + 優格/998Kcal)

那款早起頓那聽ラジオ，聽著主持人請教 m̄ 知接受訪問 ê 人是出版社或是作者「以降價方式來揣讀者，你認為按呢 ê 做法敢有法度揣著閣較 tsuē ê 讀者？ 」

「Buē，因為環境已經改變咱 ê 閱讀慣勢。」

「價數無重要，重要 ê 是冊帶來 ê 價值」低路人若我 mā 綴 leh 提供我 ê 想法。

德國 ê 閱讀慣勢按設使一幫客滿 ê 火車大約有9成 ê 人 teh 閱讀，換做無夠一成 ê 人 teh 讀冊，這个現象 hōo 受法律保障 ê「固定冊數 」mā 沓沓仔 tī 討論「自由喝價」來救冊市。

按呢 ê 討論確實有發水泱(iann)，總是生理人自頭到尾猶是生理人，Radi 是 Rettiche，Rüben 是 Rote Beete ê 無宛2體，冊價降，稅金起 --- 7% 轉 19%。

按呢救市敢有應效？有應效ラジオ buē 專工做一集來討論。

我 tuì 德國冊市無理解 mā m̄ 捌骨力相伨，總是我正經認為價數無重要，重要 ê 是一本冊𤆬 hōo 讀者 ê 價值。

(2023.11.11 德國紅菜頭燖肉 + 清飯 + Quark/962kcal)

勞力．Danke --- 摎𠊎講「Mein Name ist Hase」，總--是敗勢 Ihre mˇ diˊm̄ 是 my duty。挑戰大武四界 m̄-thang kan-na bat「車頭」(Ich verstehe nur Bahnhof)。

你看我是天公 ê 數簿，大慼，我看你五錢豬仔掛一支喙。

這是按客語辭典學來 ê 客語寫食譜收著 ê 指教。

拄收著指教，拆白講風火著，總是歹肉無割，好肉未生，這款龜鱉叨趖拄 tsuē ē 成做「小暑大暑，有米也懶煮」無興繼續纏綴 Julia Child ê 筆友人生。

總是遮 ê 認定家己是歹面好交關 ê 人敢歹瓜厚子，歹人厚話煞 m̄ 敢繼續掛看板，這 mā 蓋有14。

M̄ 知敢是 Audrey Tang hōo 𪜶學著喙食 mā 愛 ē 曉拭喙？

(2023.06.21 Kheema Masala + 德國指頭仔麵猴 + 杏桃 Quark/1169kcal)

Ē 記得 tī 日本 ê Wiki 讀著「絞肉」mā ē-tàng 寫做「 挽肉/ひきにく/Hikiniku」就閣一斗請教日本 Wiki 得著 ê 答案是無剉(錯)，規欉好好。

M̄ 捌認真學習50音，向望頇顢 ê 咱 ē-tàng 迵過拍寫 Blog kā 伊沓沓仔鑿 tī 頭殼底。

起因，拆白講無「和字」後回 tsham 伊再相見我猶原 ē 請教伊「咱借問一下，請問你是 siáng」。

早起頓那食我愛食 ê Kheema masala 那配 【台灣新眼界】20230419 "土豆"=馬鈴薯爭議！外來語的交流佮侵略！臺灣按怎面對？我想著我按 Audrey Tang 遐學著 ê 副本留底佮是按怎 gún 翁𪜶老母 ê 衝突管理 ē tsiah-nī-á 䆀 ê 因端。

「阿母有病，伊需要醫生。」

我已經 buē 記得 gún 翁𪜶小妹是 uī-tio̍h 啥物代誌按呢 tuì 𪜶阿兄講，總是我 mā 講過相𫝛 ê 話，只是我無講甲遮直「我冊讀無 tsuē 無才調 kā 恁鬥處理恁佮恁爸母 ê 問題」來表示我無興趣成做恁家庭關係 ê 是石磨仔心 mā 點拄伊千萬 m̄-thang kā 𪜶兄妹 ê 慼湠到 gún-ê 姻緣 。

Kheema masala 佮台灣新眼界有啥底代？

(2023.10.17 早起頓 夏金瓜番薑仔雞肉 + 優格/1000kcal)

頂一站仔請教翁這件代誌。

Bueh 讀各國新聞除了迵過利便 ê 面冊敢閣有其他 ê 方式 ？

「發生啥物代誌？」伊問。

「無啥代誌，只是感覺面冊愈反愈成 teh 反天公伯 ê 數簿，大冊(大慼)」我講。

「敢有遮爾仔嚴重」伊笑應。

「是無遐嚴重--lah，總--是面冊愈反愈感覺家己 mā tī 搬《The Truman Show》佮 Stasi 猶 tī 咱 ê 四箍圍仔相放伴」我講。

「面冊確實有這个問題，sòo-pái 我無閣繼續使用」伊講。

(2023.10.14 玫瑰草花雞肉滷 + 水管麵 + 希臘優格/966kcal)

本底是想 bueh kā 德文食譜囥踮德文版本 ê Cookpad 成做掠外一个德語練習環境。

Tsiâ 知 APP tsiah 掠一半伊就懶屍 buē-tín-buē-tāng 隨放棄，總是我是𠢕反冊 ê 性地，一決定放棄 mā 反著近來發生 tī 美國免費網站 ê 個資漏洩佮二冬前我捌搪過 ê 問題，特別是 這件代誌是發生 tī 德國。

德國有一个聽講(𪜶家己分張 ê 紹介)是全歐洲上大上 tsiâu 全 ê 食譜網站，𪜶歡迎世界各國 ê 人踮𪜶遐寫食譜佮分張家己綴 leh 做 ê 相片，簡單講就是臺灣 ê Icook 精差語言需要使用德文佮每一份食譜佮相片攏愛經過𪜶 ê 審查，有通過 tsiah ē-tàng 上𪜶 ê 網站，這點佮愛料理就無相仝。

看起來真有規矩 ê 作法，窮實 mā 顯現一个人提著權利 ê 表現。

猶未參加愛料理進前，我就 tī 這个網站活動。不過，我較罕得寫食譜，起因德文無夠額，sòo-pái 我較捷分張綴 leh 做 ê 相片。

參加愛料理以後，我開始 kā 綴 leh 做 ê 食譜佮相片記錄 tī 愛料理 mā kā 原食譜連結佮 tī 頂頭 hōo 有興趣知影閣較 tsuē 資訊 ê 朋友有 thang-á 加一个所在做參考。

一日，我照四常 ê 慣勢 kā 相片寄 hōo 德國這个網站。

(2023.05.13 早起頓 蘑菇ひき肉 I-tá-lih 悶飯 + 草莓俗麭𩛩 + 藍莓 Quark/959kcal)

當我 buē 閣想 bueh 發表演講或是寫一篇作文 ê 時，我知影彼就表示我 tuì Mǹg-sǹg ê 出現 mā 已經成做四常 ê 無要意。

合該然按呢講，我知影伊 tī 我 ê 四箍圍仔 mā 拚勢想 bueh hōo 我驚甲失魂。

總是，這粒球 ê 年間 hē-hāng 一直 teh 改變，我 mā 𫝛款。

我 tuì Mǹg-sǹg ê 態度 buē 纏綴孔老夫子交代 ê 金言「敬鬼神，而遠之」。

起因，彼表示你原仔愛驚 Mǹg-sǹg m̄-nā 3分 niā-tiānn。

拆白講，讀過歐洲歷史 ê 人攏知，神抑是魔大多數 m̄ 是咱 m̄ 捌 ê hē-hāng 決定。

M̄ 信讀 Johannes Kepler ê 故事隨知。

(2023.05.08 早起頓 ひき肉烘 + 檨仔鱷梨仔 Quark/981kcal)

當初號名做阿表(A-Pió)，無啥特別 ê 因端，kan-ta 我無想 bueh iōng 本名本姓投稿 mā 無想 bueh 號一个假俳 ê 筆名佮 gún 翁 m̄ bua̋i hōo 我借伊 ê 姓投稿，我就想著 tsuē-tsuē 臺灣序大按捌字 hőng 準作 m̄ 捌字 koh 兼無水準 ê 低路人，阿表(A-Pió) 這个我捷捷 tuì 人講 gún 媽若無 tuì 人講伊疊翁 ê 姓，應當無人 ē 認為這 m̄ 是伊 ê 本姓。

這 m̄ 知影敢是 gún 阿公知影查某人嫁翁後愛疊姓，sóo-tí 查埔攏號雙字，查某號孤字，按呢日後成做人 ê 牽手疊姓較自然，唸起來 mā 較 buē 頓蹬㧎㧎。 

事實是 m̄ 是按呢，我 m̄ 知影，總--是自我捌代誌，大多數 ê 人攏掠做這是 gún 媽媽 ê 本字姓。

當然--lah，這是有年間 ê 差別，gún 媽媽𪜶彼沿--ê，一聽隨知影 gún 爸爸姓啥。 

2023.05.18 那款早起頓，頭殼 mā 一直烰詹美樹三字。

我想無詹美樹這 3字，總是我 tuì 這站仔無緣 mā 無想 bueh 佮伊接續緣份 ê 前男朋友一直來夢人行踏。

雖罔，我 tuì 伊 ê 造訪無印象，總是真無佮意媠媠 ê 眠又閣愛 tsham 伊米糕𣻸。

(2023.05.07 早起頓 2月季節生菜盤 + 魚指菜蔬盤 + 藍莓 Quark/1032kcal)

面冊口座刣掉，IG iōng 無到2禮拜隨 kā 口座刣掉，Blog mā 無四界去人兜拍廣告，uī-tio̍h bua̋i hőng 掠做 lán 是寄生仔掠外 tī 愛料理(I-Cook)開 ê 口座莫算在內，我應當算是一个無身份 ê 人(硬 bueh 學翻轉 ê 人 ê 氣口，冊讀煞我較佮意這个本底 ê 號名)，我 ê 意思是網路社會。

無 tī 網路行踏，朋友確實 tshan-tshiūnn 無人 bueh 採收 ê 葡萄按呢一葩閣一葩蔫去。

我 m̄ 知影其他 ê 人搪著遮 ê 狀況 ē 按怎想，總是 m̄ 管是熟甲 ē-tàng 穿仝一領褲 ê 人抑是 m̄ 免見過一支鼻空毛 ê 生份人𪜶無聲消失 tuì 我來講攏 buē 造成啥物困擾。

起因，我本底就 buē-su 卵清按呢透明，無味無素，除非有人 kā 我提去做寡雞卵糕、豉肉等等 tsiah 感受 ē 著我 ê 存在。

簡單一句，家己知影按怎佮家己鬥陣就 buē 擘腹四箍圍仔揣無一踏通倚靠。

近來 gún 翁分張新 ê 社群媒體(德國開發--ê)，問我有興趣參加 bő？

「無興趣」