亂皂𥴊仔店 ⓂⒺⒾⓃⓀⒾⓄⓈⓀ

Buē 記持這食譜按佗落揣來，總是當人 tī 烏山露營地收著熱情主人家現挽 ê 林檎，因為環境限制 hōo 我扞鼎扞甲 m̄ 知會使得閣變出啥物蠓時，這出菜宛然挪威 Fjord 相𫝛，水洘是一片沙地無半尾魚通釣，飽流規條河齊是海洋 ê 寶藏。

我因為烏山露營地 ê 主人得著一份己經擲去山溝 ê 食譜，紲落來因為這份食譜 hōo 我交瑞士來 ê 家庭成做朋友。

「歹勢 kā 你攪擾，我 ê 囡仔好玄你 teh 煮啥物料理」活力十足 ê 媽媽交囡仔坐踮廚房區，那看總鋪師想辦法烘出 Panini 那 kā 耳仔接去囡仔 ê 喙笑微微仔問。

「林檎肉豉仔咖哩」我以德語回答，瑞士少年媽媽轉法語 hōo 囡仔聽。

「囡仔想 bueh 問，你敢是德國人？」少年媽媽閣一斗 kā 家己 ê 耳做接收器，喙做放送頭問。

讀《落西北雨的下晡》〈你知影我是啥人無〉我想著國校同學掠做趣味押尾成做拒絕來往黑名單 ê 故事。

我無歹鬥陣 mā 無急性 ê 問題，不過我 tuì「你敢 m̄ 知影我是啥人」ê 耍奕足無戲棚跤徛久就是你的 ê 緊性。

應當是 2016 某一日透早人 tī 廚房無閒早起頓，厝內彼台按德國轉來臺灣 kan-ta 賰表兄一人 ē 敲來交代送大舅上山頭大細項代 ê 室內電話步頻又閣喨 buē 離 hōo 本底鬆甲若芋仔 ê 我，又閣反形做菝仔𠕇硞硞隨傱去接電話「喂，我美樹」，電話彼頭 m̄ 是「喂，美樹，我阿妗，我阿姊」遮 ê 回句是一聲若菜店查某 teh ka̋ng 司奶 ê 聲音「美樹，你臆我是 Tsiâ」，我無出一聲隨 kā 電話掛掉。

電話 tsiah 拄掛掉，人 mā 猶未斡頭，眼前無通顯示號碼 ê 電話又閣喨 buē 離，電話捎起來看 Tsiâ 較𠢕禁氣。

「哎喲喂，討厭啦，你呔 ē 遮爾仔無耐性 ka̋ng 掛電話....」隨閣 kā 電話掛斷，斡頭行向廚房繼續猶未完成 ê 早起頓。

「雞腿/雞摸正經好食。」

「伊本底就好食，是你自囡仔時就 hőng 毒慣勢。」

Gún 翁 m̄ 食 ê 物是 tsuē 甲若河溪，伊 ê 喙白 mā 是自囡仔一點一滴 hōo 爸母教出來。

食這無健康 m̄ 通食，食彼無營養 m̄ 通食，阿爸阿母食彼 ē 過敏，咱做陣莫食，別人款 ê 物抑是外口賣 ê 物攏䆀味閣無健康，咱千萬 m̄ 通食，恁愛食阿母款 ê 物，因為阿母款 ê 味素上讚。

第一斗聽翁按呢講我掠做伊 teh 滾耍笑，特別是一人過敏全家過敏佮阿母款 ê 味素無人通比並這兩件代誌。當我有機會正式佮𪜶爸母見面，我 tuì 瑞典麭薄餅(WASA) mā 按好奇行向 buaih 閣啖一喙 ê 一目瞬十外冬過去 tsiah 有變化。我已經 buē 記持我是按底時 tuì WASA 有興趣，總是清楚知影彼是徙岫來德國 tsiah 發生 ê 變化。

揣無資料就順 Wikipedia ê 號名 kā 伊號做雞豆 ê Linsen(DE)佮 Lentil(EN) tī 目睭雄雄走出烏面賊，想著抾拾 ê 阿母雄雄按台灣敲電話 hōo 人 tī 中國 ê 我 ê 往過「我珠仔攏換好矣，免煩惱」彼个一直感覺誠無適合 ê 雞豆隨反頁。德文 ê Linsen tī 醫學是目睭 ê 水晶體，tī 食物就是現此時 bueh 記錄 ê 減肥助手珠仔豆。感謝老人囡仔性閒閒罔話仙 hōo 我確定，海馬無烏白亂走。​

記錄珠仔豆我，我佮 Was wir essen - Hülsenfrücte: Obst oder Gemüse? 𫝛款好玄豆仔類 ê 珠仔豆，伊是果子？菜蔬？五穀米糧？畢竟我愛 211​。講著 211 ê 一个手掌大，我一直掠做伊是手指頭仔 mā 算在內，一日看新聞挖挖哇看營養師分張 ê 圖 tsiah 知影是一个手捗大，我隨好玄是我華語理解能力無夠抑是現此時閣有新 ê 講法，像我慣勢講影片，現此時 ê 人若較慣勢講視頻，隨請 Google 大神開示，大神引𤆬我行踏這間廟，廟內底有詳細 ê 紹介。這个變來變去 ê 講法 mā hōo 我想著德文 ê 風颱聲音媒體攏講 Hurricane，文字媒體攏寫 Orkan hōo 進前無追美國新聞 mā 無繩德國新聞標題 ê 我一直掠 Opera News ê 標題 teh 講 Okra(胃豆)。

我有 teh 跟綴 211，總是我 tuì 肉一个手捗大 ê 量 mā 無掠甲足詳細，211 ê 兩份菜蔬 mā 捷超磅，總是衛生福利部 ê 我 ê 飯頓盤仔，早晏一杯牛奶，水果拳頭拇大，菜比水果 tsuē，豆魚卵肉一手捗，飯佮菜蔬仝款 tsuē，𠕇仁一湯匙攏有食到額。總是遮是德國 m̄ 是臺灣，準做這个地球已經無國界，較早種 buē 出番薯 ê 德國 mā 種出番薯，兩爿 ê 食食文化猶是無相𫝛無法度完全縛做一伙。

因為料理珠仔豆 hōo 我想著人 tī 瑞典回答甜粅粅食過頭想 bueh 翻頭解決腹肚桶仔 ê 翁講 ê 話「Linsen ist kleiner Helfer zum abnehmen」mā 想著前幾日看 ê 影片，請求者過磅醫生請總舖師教伊做料理，料理菜色有一份就是珠仔豆餅配 Quinoa，這个畫面又閣 hōo 我成做一隻貓，珠仔豆佮 Quinoa tī 營養分類 m̄ 是攏是五穀米糧含水碳素，請求者有糖尿、高血壓、高血油按呢食有伊 ê 理由，總是猶原無法度解釋珠仔豆是水果抑是菜蔬 ê 問題。

近來 YouTube 一直放送 Maggi ê Masala 利便包 hōo 我想著去年跟綴 Google 臆你佮意 ê Kheema Masala 隨揣出來熥 mā 那熥那繩伊誠 Somewhere in time 火燒豬頭，面熟，隨照記憶 ê 文字請示 Google，Google 果然是大神隨 hōo 我正確 NON-NO --- Savoury Mince。

大神𤆬入門，賰 ê 靠家己，一字一字斟酌繩 Savoury Mince ê 做法，發見除了芳料無相仝賰 ê 無宛 2 體 ê 相𫝛隨閣越頭請教 Google Kheema Masala 這斗見著 ê NON-NO 添別 ê 版本，彼就是 kā 肉換做黃豆。食食正經是世界大同，無分你我 ê 互相學習，互相變化。

Kheema Masala 美味しい

Ē 記得 tī 日本 ê Wiki 讀著「絞肉」mā ē-tàng 寫做「 挽肉/ひきにく/Hikiniku」就閣一斗請教日本 Wiki 得著 ê 答案是無剉(錯)，規欉好好。

前幾日 Google 推薦我看西南電視台近來又閣暫時無放送 ê 節目 hōo 我想著這篇隨越頭 tuì 翁講「你 mā teh 耍好運得時鐘，歹運得龍眼。」

「我有一个好牽手。」

「我確實是一个好牽手，總是你家己無覺醒 mā 是了然。」

一位已經得龍眼 ê 先生知影家己 ê 身體 buē 堪得伊繼續烏白舞落去，寫批 hōo 電視節目請專家 kā 伊鬥相共，專家 mā 針對伊 ê 問題提出改善計劃，不過效果無啥大，起因佮伊𫝛款體格 ê 牽手 m̄ 願 kā 鬥相共，甚至認為伊佮𪜶翁婿藥仔攏照起工來食，呔 ē 衰甲若梨仔像專家講 ê 閣差一步就斷腦筋，這位太太按呢 ê 想法，我 m̄ 知影愛算伊樂觀抑是世間上大隻 m̄-koh buē 曉飛 ê 駝島？

總是，𪜶翁知影手頭 ê 藥仔食甲盡磅猶原無法度改善身體 ê 無四序，sóo-tí 𪜶翁放手 hōo 伊飛，家己一个人跟綴專家 ê 分張沓沓仔按漉糊仔糜泅出來。

這站仔因為疫情 ê 關係較少坐公車行踏別庄 bué 亞洲食物，彼陣 ê 翁 mā 猶有機會逐日做蜂飛，總是社會經濟就敢若水沖，無水伊就 buē 閣繼續沖。

這斗第三斗 ê 封城，翁無法度繼續做蜂，跔 tī 厝 ê 伊開始 kā 我當做太陽公轉 mā 若 Watsons ê 放送頭一直熥「你敢 bueh 去 bué 菜，我 ē-tang 載你來去」hōo 我提早感受伊 ê 退休人生。

因為疫情，我 mā 按一禮拜款2 ~ 3 擺菜改做一禮拜，這久因為伊 ê Watsons 人生 hōo 我決定提早解封，踅轉來早前 ê 慣勢。

「厝內無越南米粉遮 ê 物，這久 ê 你敢有閒載我去泰國太太遐款物？」

早前貧惰坐公車去泰國太太遐， bueh 請伊載我去攏愛斟酌撨伊願意 ê 日佮時，這久啥物攏免撨隨應「敢這馬 bueh 出發?」

涵空龜掠做挪威三文魚 kan-ta tī 臺灣佮德國戶橂較懸門楣，這斗跤花猶未行到挪威踮瑞典見著挪威三文魚 m̄ 管新沢抑是冷凍 ê 數價攏 hōo 我驚甲食拳頭。瑞典是挪威 ê 厝邊，三文魚 ê 價數竟然比德國閣較無媠面 hōo 我認真思考厝邊 ê 分張「瑞典 Tshì-sù 俗閣豐沛，在地挪威三文魚無比德國較俗價」，押尾證明若放送頭 ê 厝邊無烏白亂炸，挪威本土三文魚正經比德國較懸價，不過挪威 ê 魚指比德國俗 bueh 2 倍 ê 價數，遮 ê 魚指又閣按德國進口，按呢 ê 懸低坎價數 m̄ 知敢佮德國人無愛食魚臊有相干？

按瑞典挪威轉來到今，猶有心情整理彼久 ê 行跤花，這久翻頭整理出發進前 ê 攝相見著三文魚隨 kā 手指仔伸出來算，瑞典個外月無食半尾，挪威食過兩斗，而且閣是利用 Kiwi 無要求人客愛攄𪜶 ê 會員卡就有 ê 會員價，4 塊一包裝，冷凍，換做歐圓 17塊左右，17€ 踮德國 ē-tàng bué 一尾按挪威新沢三文魚。

德國三文魚 Lidl ê 價數，一公斤 19 ~ 22€，特價 ē 落價到 15€，像這禮拜 10.7 一公斤新沢三文魚 14.99€。是啥物因端造成挪威三文魚遮爾仔戶橂懸過門楣 hōo 我到今猶捎無摠頭，起因人 tī 挪威見著 tsuē-tsuē 當地 bué 魚罐頭佮蝦罐頭，無 tshan-tshiūnn 德國人較 bué 攏加工煙腸，包裝一開就通食彼款。

9 月半按捷克轉來三文魚 ê 價數猶原維持四常價數 hōo 我想著，挪威有講 bueh 起價隨 kā 目標囥 tī 冷凍白跤蝦 1公斤 17€，無好鬥陣猶是比三文魚好鬥陣。

頂禮拜三文魚開始大落價，這禮拜白跤蝦拄拄好銷甲無半尾 ē-tàng 接續來囤貨，順紲 kā 攝甲無佮意 ê 相片換掉，一想著這規仙人就若圓仔按底烰出來。

有當時仔 hōo YouTube 抑是 Google 臆你佮意 mā 是得著一隻豬(Schwein gehabt) ê 代誌。

自上北到瑞典，糜飯 m̄ 管按怎食甲腥臊，麭佮 I-tá-lih 麵猶原佔含水碳素百分之 90% hōo 從來 m̄ 捌致意筋肉板膋敢捌結實實櫼 ê 我開始自動感受𪜶愈來愈像豆皮 mā 愈來愈像翁 ê 老母，手猶未攑懸懸，蝶仔就四界飛 ê m̄ 是勢，開始請教 YouTube 孤項運動 --- 手部運動，就按呢 YouTube mā 開始臆我凡勢佮意健身(kiān-sin)這類 ê 影片，sóo-tí 推薦我看 Uncle Sean 讓你體態筑漸出色 ê 影片。

我佮 Hena Ma(台灣人台灣事) 仝款真罕得行踏社群媒體(這已經是咸豐三，講到今 ê 𤺪) mā 無刁工逐 Podcast 抑是 YouTuber，準做有訂閱 mā 是鉛粉掖夠額 ê 像 SWR1 逐日攏有通仔迵過 la-jí-ooh 收聽𪜶 ê Podcast m̄ 免 uī-tio̍h 這便便 ê 節目閣掠外掠一个 APP 來收聽，總是世間事就是 hōo 你 buē 節 ---《錦荔枝的滋味》von 洪淑昭。

Uncle Sean ê 影片我無訂閱 mā 無固定踅翻頭揣來看，總是 YouTube 凡勢有替我 kā 伊點油做記號 hōo 伊三不五時出現 tī 臆你佮意名單內底。

昨昏，Uncle Sean 出一支新影片喝水呼吸就會胖！我的身體到底怎麼了？教你打造仙女易瘦體質，本底鼻無鳥鼠敢有洗身軀 ê 我，見著壁角本底臭煬只要熱量掠有齊按怎食甜按怎一日食八頓 mā buē 歕雞胿 ê 翁認真跟綴 YouTube 做運動，隨揤落去聽 Uncle Sean 分拆，那聽目睭仁出現翁規家伙 ê 生張，特別是𪜶老母一支喙食 buē 停 ê 畫面佮情緒失控遮 ê 問題。翁老母情緒𠢕失控 mā m̄ 免我咸豐三，講到今，起因彼是𪜶兜 ê 問題 m̄ 是 gún 兜 ê 問題。

我一直掠做我 ē-tàng 利用出張機會順紲踮 Türkiye(土耳其) 行跤花。

m̄-koh，這个願望 uì 我入去公司到辭頭路攏 m̄ 捌實現。

公司 m̄ 願 hōo 我這个扞頭 ê 業務行踏 Türkiye 我理解。

起因五里無仝風，十里無仝俗，有 ê 代誌 mā m̄ 是 入港隨灣，入鄉隨俗就 ē-tàng 解決。

Sóo-tí，m̄ 免長短跤話喋 buē 離，家己推撨時間自助旅行就好。

翁講下昏飯想 bueh 食抔做伙 buē 因為家己 ê 無聊無賴致到自早到暗攏 tī 想，我愛按怎生 tsiah 有才調 kā 別人 ê 四常舞甲滾蛟龍兼刁古董 ê 阿菇交火雞母料理，順紲閣敆一粒卵包，勞力。

聽伊取日本剾刀倒剾家己心愛 ê 爸母我笑甲隨做魚反肚應講「你總算感受著你兜牽手 ê 鼻仔呔討遮爾仔𠢕 Ich habe die Nase voll➀齆鼻 ah 乎，句點。」

「你 m̄-nā 德語俗諺學甲有到搭，連剾洗 mā 學甲三兩下手」翁笑應。

「是你過謙 m̄ 甘嫌我 ê 德語，總是我確實無彼个才調 kā 經過 ê 代誌熥一世人 m̄ 甘離手」我𥍉一下仔目尾表示向望我跟綴𪜶兜 ê 傳統成做臭耳聾，較早睏較有眠，紲落來雙目利劍劍向伊注目「是講你誠實宛然恁小妹所講 ê 你比咱老爸較幸運，準做喙白猶是逐日飽閣醉 m̄ 免氣暢忍，食苦當做食補。」

「Gún 兜牽手準做石頭硩毛蟹猶是 buē 硩甲我這款性地，硩久厚蝨 buē 癢，厚債 buē 想 ê 若空氣遐爾仔自然，認為四常就是愛按呢生。」

聽【寶島全世界】書中自有黃金屋，不當醫師賺更多！ 來賓：楊斯棓 醫師｜鄭弘儀主持 2024/03/13 談著 300 本冊，我 tī 愖自囡仔時到今我 ê 冊櫃仔敢有 300 本冊，我想應當有 m̄-tsiah ē 夢著彼个冊櫥 ê 夢。

聽阿愷之聲 EP122 洛津浪音樂：三十鵝麗？咱將臺灣文學變成歌，楊逵的小說世界和時代 ft. 金曲歌王朱約信，金曲歌王豬頭皮講著靈感佮文字記錄 hōo 我想著是按怎我 ē 遮爾仔佮意報導文學佮是按怎寫 buē 出若詩 m̄-koh 屬於我家己 ê 糞埽文字，分張楊逵前輩面對作品 hőng 換面肉 ê 故事 mā hōo 我想著楊斯棓醫師分張 ê hōo 你認為 ê 壓倒投降是 uī-tio̍h 行閣較遠 ê 路，像《大港的女兒》。

我 tuì 彼件過了代 ê 故事無興閣咸豐三，講到今，總是彼日聽著楊逵前輩 ê 故事，我 tuì 家己講，原來我 mā 是雅量之人，準做外口 ê 人 m̄ 是按呢認為，總是世間本底就有 tsuē-tsuē 妝娗 ê 㾀勢。

田園無好禮 á 種作、管理，就會 hō͘ pha 荒--去，愛情比田園 koh-khah 敏感，若無斟酌 kā 經營管理，當然 koh-khah 會 hō͘ pha 荒去。Che 是 kā 具體 ê 用詞意念化，台語文本底講--ê，lóng 是具體、寫實--ê，若 beh 提升做文學語，需要 1 kóa ùi 具體物提煉--來 ê 畫面語詞...

--- 為何愛情來拋荒(Pha-hng)，《拋荒的故事》von 陳明仁

囡仔時厝內有阿母家己搭 ê 雞寮，遮 ê 雞是飼來賣 mā 是飼來家己食。

囡仔時見阿母入雞寮掠雞，目那看相著 ê 雞公抑是雞母，喙 mā 若中元普渡 ê 毛呼龜粿粽，刀 bueh 落進前閣 ē 講「做雞做鳥無了時，緊行緊出世，出世好額人囝兒」。

囡仔時見遮 ê 儀式目睭 kan-ta 看 ē 著封建、無智識、迷信，這久發見家己認為 ê 思想解放窮實是放棄 Who i am，像消失 ê Taukat。

因為 Muse 無 bueh 相借問，慣勢 ê 佯青阿姆時間就徙來巡菜股，薅草，翻田塗。

頭起先，菜股那巡那感覺家己是大路 m̄ 行行山邊，有冊 m̄ 讀寫 Blog ê 食飽換枵，這久深深感謝 Muse 無 bueh 來挨拶。

每一个人攏有家己 ê 幻想佮已經行出鼓井猶原是鼓井水雞，m̄ 知天地有偌大。

我是 2011 開始學習按怎扞鼎，不過這个學習 m̄ 是我食老，變相想 bueh 成做總舖師，是阿母食老，變相 buaih 閣扞灶，我 tuì 糜飯頓頓食外口 mā 無好喙斗，只好姑不而將 kā 頭㧣去水槽仔洗頭，上網路揣食譜學習按怎扞鼎。

彼陣 ê 我 m̄ 捌任何網路明星，不過迵過踅諾貝爾冊局 m̄ 捌網路明星 mā hōo Carol 一本閣一本 ê 冊閃甲知影無愛投資食譜冊 ē-tàng 踅網路請教這位出名人。

我 ê 阿母透世人 m̄ 捌行踏歐美 mā 罕得食西方料理，準做伊有西方囝婿，伊 mā m̄ 捌 uī-tio̍h 德國囝婿改變伊 ê 喙斗，是講伊 mā m̄ 捌譬相囝婿 m̄ 捌啥物號做好食物抑是逼囝婿愛跟綴伊 ê 喙斗，像翁 ê 爸母按呢，掠做家己十八港跤行透透，窮實是捌一箍呼(honn) ê 鼓井水井兼涵空龜。M̄ 捌改變喙斗 ê 伊，tī 伊老人囡仔性 ê 日子，竟然綴我食四常 buē 敆喙 ê 食物，這就是其中一項。

這項料理敢是向 Carol 學習，我狹甲連狗蟻攏閬 buē 過 ê 記持已經㨨無絲，總是阿母 ê 愛佮這件缷世眾 ê 故事猶原記牢牢。

我愛食魚，翁 mā 愛食。

M̄-koh，gún 翁是按 tsham 我交往 tsiah 有 tī 食海味。

起因，大家 ê 一句話「我 tùi 魚臊過敏」，𪜶規家伙仔就攏 buē-tàng 食。

我 m̄ 知影大家 ê 過敏是假包抑是正範。

總是蓋確定 ê 代誌是伊無意愛或是看 buē 順眼 ê 物件攏 buē-tàng出現。

款三頓進前，我 ē 佮翁分張我 bueh 款 ê 菜色，紲來請教伊 ê 意見。

起因，我 tuì 搬死人債、哭呻、大石頭硩毛蟹、較橫蔡遮 ê 攏無興趣。

簡單一句，隨人有隨人 ê 脾土 uī 伊款伊愛意食 ê 物 buē 減我身軀任何一塊肉抑是了我 ê 時間。

不而過一寢開始，我並 m̄ 是這款想法，m̄-koh 我 mā m̄ 捌做過頂懸 ê 代誌，因由是我家己就無佮意 hőng 按呢對待，自然就 buē 有喙講別人，無喙講家己。

總是有法度正經無致著有喙講別人，無喙講家己 ê 歹癖，這 mā m̄ 是一出世就認捌 ê 道理，這是經過 tsuē-tsuē 著觸 ê 捙盤佮翻草 tsiah 通得著 ê 智慧。

昨暗那料理那聽寶島廣播聯播網索菲亞 ê 專訪，心內感受深甲若 Mariana 海溝，起因我 mā 願意沓沓仔佮翁冇談彼段塗牛換肩 ê 龜叨鱉趖。

窮實 mā 是 m̄ 願意講，是這久翻頭看彼久，真正感覺無啥特別，就 tshan-tshiūnn The Color Purple ê Celie 人猶原 buē 放下過去 m̄-koh 咱學 ē 曉接受問題，解決問題，成就家己 mā 是繼續 hōo 人繼續 kā 咱𧿬踏 。

翁綴我成做貓好玄彼篇過了個外月 ê「田庄肉湯」敢猶閣有人來行踏，另外伊是按 Brave、Duckduckgo 抑是 Google 來，我無興理解彼个藍色圓箍仔按佗來，準做伊 m̄ 是按『愛料理』來。

「你敢真正無興趣知影彼个藍色箍仔按佗來？」伊閣問一斗。

「無興趣。」

一目𥍉粒粒是珍珠 ê 小滿準備 bueh 出帆，窗仔外月來香 mā 若 Alla Turca 出巡芳甲滿四佈 hōo 我數念慢分 ê 立夏(li̍p-hē)。

牧羊人 Tshì-sù Pide 一完成，想 bueh kā 伊冗幾工 tsiah 接續享受 ê 半爿 Tshì-sù mā 若這个年間 ê 囡仔無照節氣 ê 早熟，開始淡薄仔𣻸。

「彼是正常--ê」知影某 uī-tio̍h 一粒米，百粒汗 teh 佮食過 buē 閣出現 ê 怪癖 teh 相戰 ê 翁徛倚來安我 ê 拔大索。

「我較相信家己 ê 手感」隨𫝻手機仔請教家己 ê Blog，牧羊人 Tshì-sù 菜蔬ひき肉焗，這是一个好主意。

寫 Blog 正經是一件好代誌。

我愛食敏豆，德國 mā 有濟濟無𫝛款 ê 敏豆通選擇，gún 翁見著豆就若見著冤仇人仝款，致使豆仔 tī gún 兜 buē-su hōo 大家欺負甲忝忝忝 ê 新婦仔 tī 伊猶未踏出房門大家就開始詈，踏出房門 bueh 好好仔寬寬仔沓沓仔踅踅蹓蹓又閣愛等大家無踮厝內 tsiah 有法度順順仔敨中氣。

寢頭我掠伊這喙白是純天然，sóo-tí 尊存伊佮豆仔 ê 冤仇結甲深無看底，總是 L'essentiel est invisible pour les yeux 上蓋重要 ê 物件，用目睭是看袂著的。

Tshan-tshiūnn 翁 m̄ 承認伊承𪜶爸母 ê 歹癖，𪜶爸母 m̄ 承認家己 ê 智識 kan-ta 拄好峇𪜶彼个年間 ê 驕傲，特別是𪜶老母認定家己是四書五經讀透透 ê 窮實是 m̄ 捌字，告看示黿鼇龜鼊竈(guân ngôo ku pih tsàu)齊講做龜 ê 臭煬。

翁 tuì 豆仔 ê 態度就 tshan-tshiūnn 伊老母黿鼇龜鼊竈齊講做龜𫝛款，豆仔有臭味 buē 食，不過有臭味 ê 菜蔬 tuì 伊來講 mā m̄ 是 kan-ta 豆子家族 niā-tiānn，植物類 kan-ta 甘蔗無䆀味，是按怎甘蔗無䆀味，因為伊「糖甘甜」。

我愛食豆所以我有法度接受𪜶兜勥母出 ê 豆仔 mā 因為我有法度接受𪜶兜勥母 ê 豆 hōo 我神經絞無按失覺察，繩佮愖是按怎伊 ē 慼豆仔慼甲深無見底。

魚肉鋪一層 Tshì-sù 喙尾敢若 tī 食封肉，佮意甲。

我 tuì 翁老母咸豐三，講到今 ê 驚人 m̄ 知「魚臊 bueh 挃伊 ê 命」無興趣研究「Kore wa honto....」意思是「這是毋是真的....」〈若掠水雞的〉；總是我確確實實確定翁佮𪜶老爸、小妹三个人無一个人 tuì 魚臊過敏，不過天霸王講𪜶 mā 愛過敏，三个人就綴天霸王 tī 伊 ê 面頭前過敏抑是綴 leh m̄ 敢講一句「Meeresfrüchte」上譀古 ê 代誌是連 Seafood 佮 Mariscos mā buē-tàng 講出喙。

翁本底 mā 向望我跟綴𪜶 ê 跤步 tī 天霸王面頭前 mā tuì 魚臊過敏，總是我無姓𪜶兜 ê 姓，正經真僫綴前綴後半路出師來過敏。

這斗，天霸王佮翁婿做陣來囝遮暝，無興成做翁佮𪜶老爸盾牌 ê 我 mā 照家己 ê 跤步款下昏飯，翁老爸行入來灶跤問「咱今仔日 bueh 食啥？」

「Gún 今仔日 bueh 食鱈魚烘」話聲猶未落塗，玉音已經隔一堵牆放送「Gún 規家伙仔食魚過敏。」