人 ê 慣勢正港 ē 互相影響，向時食偌 tsuē bué 偌 tsuē ê 我 mā 綿豉跟綴 gún 翁 ê 喙斗來心貪軁雞籠。
德國平價超市 ê 塗肉林檎賣法交咱台灣無相𫝛，咱台灣家己選算粒賣，德國無地選算斤賣，基本公斤數 2.5 公斤，公斤數愈懸價數愈好價。
我愛食塗肉林檎，總是 mā 清楚知機家己窮實無愛食甲三頓人生是烏白，所致 m̄ 管超市按怎 kā 伊大落價，我從來 m̄ 捌 tuì 2.5 公斤以上 ê 伊起心動念過。
這斗凡勢食 m̄ 著抑是 gún 翁 ê 魔音傳腦有應效，我竟然認同伊自認 ê 𠢕扞數萬事就是愛「大碗閣滿墘」人生財富 tsiah 有才調滿厝間 ê 歪理，無顧厝內 kan-ta 兩支喙，無顧厝間無地陷(hām)通保存塗肉林檎，全心全意跟綴 gún 翁 ê 跤步目睭掛斗概，看人物就愛。十公斤 3.99€，bué 啦！這久 tsiah 來投天告地講超市刁意故 hōo 我俗物 bué 破家。
塗肉林檎烘、塗肉林檎裙、塗肉林檎炒、塗肉林檎炕、塗肉林檎生菜盤齊做一斗，架仔內 ê 伊猶是遐勇健交我相𫝛無啥減著肥。當我起懊惱巧手機仔 ê Google 推薦敢若臆著我 ê 心事隨放送一葩德東傳統塗肉林檎食譜：Thüringer Klöße 塗肉林檎丸仔包麭幼仔餡。
Camping (19)
