亂皂𥴊仔店 ⓂⒺⒾⓃⓀⒾⓄⓈⓀ

有一句話三日無餾 peh 上樹，出門一逝轉來，竟然 buē-kì 愛按怎使用信望愛台文輸入法，tsit 个現象 hōo 阮翁笑講，sńg kah siunn 過歡喜。確實是有影，tsit 逝 ê 行跤花 hōo 我印象難忘。

除了，抾拾 ê 翁步頻煩惱錢，煩惱阮 khai siunn 濟錢食餐廳，我理解伊是一位抾拾 ê 人。

M̄-koh，伊 ê 抾拾有時仔會 tsiânn 做一个錢拍二十四結 hōo 我 tsiânn 做䆀猴 tsham 伊 sann-tak-tshuì。

不而過，減采是有歲數矣沓沓仔感覺 tsiânn 做 䆀猴 tsin thiám，tuì 翁仔某 ê 感情又閣無助益。Tsit 回我 kā 雙手佮雙跤伸 tshut-khì tuì 伊講，tiàm 臺灣阮會講 khì 人兜𨑨迌無 tsah 伴手號做兩莢弓蕉，lán 一逝路 uì 德國來波蘭行踏 tsah 四莢弓蕉，波蘭無棄嫌 lán 凍霜 koh 家己紮四項等路來歡迎 lán，你 kám buē 感覺家己是有福 ê 人有食閣有掠，m̄-bián 過 tsit 款人已經離開德國，猶原食德國煙腸 ê 日子。我 kā 倒手伸出來，大頭姆藏起來講「田園若有收，鳥隻食得偌」lán tsit 隻鳥仔 tsit 回 tsham 你做伙出門行踏 beh 一個月，食你 tsit 位大頭家4回，大頭家你若是感覺 lán siunn 𠢕食會 kā 你 ê 田園滿厝間食甲無半間，lán ē-tàng 買賣算分，相請無論，因為 lán lóng 食杮粿，雙爿囤家伙 ê 人。

「M̄-bián 買賣算分，相請無論」阮翁笑答。

「恁牽手 ê 掠漏方式你 kám 有佮意 iā-sī 你較意愛䆀猴來厝內行踏」我笑問。

「我愛 tsit 款掠漏方式」阮翁應答。

一人煩惱一樣，無人煩惱親像，感謝 hām 我門扇鬥 buē 峇 ê 大家 hōo 我看著欠錢怨債主，不孝怨父母 ê 見本開始思考，我若是 koh 按呢䆀猴落去翁仔某 ê 感情會舞甲親像小姑按呢頭較大身，有父母情，無父母行。另外，我 mā 無愛翁仔某做伙牽手 suah 是 hit 款睏破三領草蓆，掠你心肝掠 buē 著 iū-koh 一日到暗請人啉茶 m̄ 關 tshan-tshan-kiò ê 茶鈷。

所致，真心感謝四常 ê 見本𤆬我去思考問題無理解無處理，伊 buē 家己水頂船浮，搪著問題 buē-tàng kan-na 會曉 tiàm 肚臍空內點目藥，按呢 kan-na 會得到落水平平沉，全無重頭輕。

Tsit 逝 ê 行跤花，翁某猶原吵吵鬧鬧，不而過一切猶原幸福佮快樂。起因，有人願意 tsham lán 做伙拍喙鼓 m̄-sī kā 問題抨 tī hia m̄-guān 談 m̄-guān 處理互相徛黃到入土。

Tsit 回來波蘭，徛 tiàm 國王已經遠走 ê 東海(德文：Ostsee，英文：Baltic Sea，波羅的海）目睛金金相，想 beh 按 tsia 看去德國 ê 東海，啥物 lóng 看無，除了風 tuì 我講 Vox et praeterea nihil (除了聲音，啥物 lóng 無)，越頭看 peh 過山頭 beh 75冬 ê 國王(德文：Königsberg/國王山，俄文：Калининград，波蘭語：Królewiec），東海透過風 tuì 我講「Ich kam, ich sah, ich siegte 」(我來，我看，我征服）hām 濟濟 ê 悲歡離合 lóng 會化做坱埃。

越頭看濟濟跤步行踏 ê Królewiec hām 看無人行踏 ê  Калининград ê 海沙埔，我想著阿母在生時講過 ê tsit 段話「無論悲傷 iā-sī 無奈，lóng ài 鴨卵擲過山頭，其他新 ínn tsiah 有法得 puh-gê。 」

我 ànn 頭看跤踏 ê 坱埃，看 hia--ê hōo 風吹甲腰骨 kiōng-bueh 斷去 ê 花蕊 hām 其他草木，理解問題，才有法得 kā 鴨卵擲過山頭 hōo 伊 tsiânn 做養飼萬物 ê 肥底。

Tsit 逝行跤花除了認捌 m̄-bat 聽過 ê 大家官故事(大家官是出生 tī Ostpreußen／東普魯士，現今波蘭)掠外，另外一个上大 ê 收成 tuì 我來講是有機會食著按 Georgia (喬治亞共和國)來德國作穡 ê 朋友所分享 ê 家鄉美味。

麵體表示停 tiàm 黑(Hik)海大大小小 ê 船，雞卵表示天頂 ê 金烏 hām 白雲「Chatschapuri 」

臺灣教會公報/TÂI-OÂN KÀU-HŌE KONG-PÒ

台灣教會公報投稿：2021.10.02

刊登日期：2022.01.22

期別：3647

Chatschapuri

...... 材料 ......

高黐麵粉　500g

...... 步數 ......

𤆬我來轉，民宿主人家 ê 阿貓

In Taiwan wir sagen, die Dinge, die Sie kennen, werden Sie in drei Tagen vergessen, ohne die Übung zu wiederholen.

Ich habe das Problem nachdem wir nach Polen gereist sind. Ich vergessen, wie man in Taigi tippt.

Mein Mann lacht und sagte, das ist gut, du hast eine gute Reise in Polen.

Ja, das ist stimmt.

Ich liebe die gute Reise. Obwohl mein Mann musst den guten Moment kaputt machen, weil er das Geld sorgt, ich habe viele male im Restaurant gegessen.

Ich verstehe dass er ein sparsamer Mensch ist, aber Sparsamkeit ist nicht gleich Geiz und, Wahrheit ist...Wir haben zwei Hände, zehn Finger.

Ich zitiere einen von ihnen, um die Anzahl der Male zu berechnen, die noch übrig sind in dieser 3 Woche.

Aber, ich muss sehr ehrlich sagen, das ist ein normales Leben, weil, wir könnten von das Problem zu kennen, obwohl, das Problem ist schon über 10 Jahre.

Aber, für mich, das Leben ist kein Ponyhof, mein Mann bringt mich zum denken und fühle diesen Satz ' Was mich nicht umbringt, macht mich stärker', obwohl, auf dieser Reise streiten wir noch, und das streiten macht das ich sofort nach Taiwan fliegen will. Aber, wir sind noch gut wie die Ostsee, egal was gibt, Glücklich oder Traurigkeit．

Sie wird immer noch zu ihrer ursprünglichen Ruhe zurückkehren, weil sie liebt alles.

Ich liebe diese Reise, und ich liebe was ich gegessen habe:Chatschapuri und Khinkali.

𤆬我來轉，民宿主人家 ê 阿貓

掠漏 ê 幸福是 Blog 本底 ê 號名 mā 是我寫 Blog ê 目的，彼陣 ê 我 hōo m̄ 徙岫 ê 杜鵑舞甲 bueh 離緣。總是，彼陣 ê 我猶未行出規家伙賰我一人 ê 驚惶，Blog 成做我上𠕇篤 ê 堡寨 hōo 我有氣力佮杜鵑拚輸贏，sóo-tí 當我行踏這座 uī-tio̍h 對抗猶原 hōo 德國押做情人所翻新 ê Gdynia 真有感受。

彼陣 ê 我規心 kan-ta 要意家己 ê 代誌，sóo-tí 目睭看 buē 著別物，總是這久巡菜股翻田塗，規腹內猶有若塗肉變化 ê 故事通翻塗並補塗。

尪姨厝

Gdynia, Sopot 佮向時 hōo 德國押做情人 ê Gdańsk(德：Danzig)號做三城市➀，𪜶是波蘭上饒裕(liâu-lū) ê 地區 mā 是波蘭全境搪著佮西班牙、摩洛哥想 bueh kā 徛𫝛位 ê 土地揣轉來 ê 角勢之一。

雖罔按遮行到康德 ê 故鄉 Königsberg 猶有 75 公里左右，總是無法度自在按家己土地接家己 ê 土地是一件紅龜生蟲，龜怪 ê 代誌敢 m̄ 是？

政治傷過複雜，歷史 buē 改變，未來 mā buē hōo 歷史停跤，未來 ê 遮 ē 成做啥物生張 hōo 伊家己決定。

Gdynia 自 13 世紀就行入歷史 ê 跤跡，總是伊佮歐洲 tsuē-tsuē 倚海 ê 漁庄𫝛款無人加持 buē 按塗炭仔成做皇后。

Gdynia 開始成做波蘭歷史重要主角之一，猶原是按厝邊德國遐來 ê 加持。

1926 Gdynia 成做波蘭對抗德國重要港埠之一。

1939 ~ 1945 伊成做德國反抗美軍佮英軍主要 ê 港埠 hōo 美軍佮英軍擲炸彈擲甲 kiōng-bueh 認 buē 出人。

戰爭期間保護人民 ê 波蘭軍艦到今猶靠岸 tī 遐，提醒人民自由 m̄ 是按天頂來 ê 甜蜜。

喬治亞餐廳 ê Chatschapuri

Gdynia 自伊出現 tī 歷史 ê 跤跡一直是樸實 ê 漁庄，有機會第一斗按塗炭仔成做公主是歐洲結束。

歐洲人開始發見歐洲 ê 北海重要，歐洲 ê 東海 mā 是，開始建設這搭本底無人 bueh 行跤到 ê 漁庄並按漁庄成做歐洲上重要 ê 國際碼頭。

寫到遮，想著打狗，咱臺灣 ê 漁庄比 Gdynia 閣較早發展 m̄-koh 城市面肉敢若有較頓蹬無閣向前行。

我 tuì 臺灣海港最後一斗 ê 印象是高雄，現此時 ê 高雄敢猶頓蹬無向前行，我 m̄ 知影，總是遮 ê 文字記錄是我個人 ê 記持 。

第一斗 tī 歐洲見著囡仔時 ê 記持，紅豆雞卵糕

這座城市 mā 行過 tsuē-tsuē uī-tio̍h 追求民主自由生湠出 hőng 看 buē 著 ê 紅河。

Tī 德國第三帝國佔領這座城市期間 tsuē-tsuē 智識份仔 mā 成做𪜶訓練槍法 ê 器具，押尾德國人 mā 因為領導者 ê 一句話，這座城市佮 Danzig 攏是咱自古神聖無法度分割 ê 領土 hōo tsuē-tsuē 人 uī-tio̍h 伊 ê 戇想提早消失 tī 這个世界，遮 ê 人 mā 包括對抗德國 ê 露西亞人。

這座城市 mā 佮其他歷史城市仝款，歷史算啥物，我講了 tsiah 準算 kā 伊按美人變甲秘雕，遮 mā 是平靜捒倒牆主要城市之一。

喬治亞 Lê-bóng 汽水，足合我 ê 脾土

這个城市佮波蘭其他捌有德文城市名稱 ê 角勢相𫝛，往過對立無離開 ê 族群成做這時 ê 族群，往過 m̄ 捌加入 ê 族群跟綴歷史變化成做這个族群 ê 一部份。

Tī 波蘭搪著喬治亞人 ê 比率，應當是我行踏歐洲各國上 tsuē ê 一搭，mā 因為這个原因 hōo 貧惰動手做喬治亞料理 ê 我有機會用零星價數食著好滋味，像這看起來若鼎泰豐小籠包 ê Chinkali 佮 Chatschapuri。

ხინკალი/Chinkali/Khinkali/卡里餃

歷史 m̄ 捌複雜，複雜 kan-ta 人類彼永遠食 buē 飽 ê 空思夢想，感謝 Gdynia ê 包容 hōo 我省去認真搜揣隨有機會窒數念並紮飽脹甲若九月 ê 腹肚繼續向 Sopto 出發。

St. Georg 教堂 (Kościół garnizonowy św. Jerzego)

我 tuì 海沙埔抑是游泳無興趣，sóo-tí tī gún 猶未見著彼間設計特別 ê 百貨中心進前，我一直 tuì 翁目頭結結講「水療中心德國滿金界，白沙 ê 海沙埔西班牙抑是法國攏比伊燒烙，無差咱兩人」押尾 tī Danzig 見著冰箱吸石隨成做有紅嬰仔聲 ê 人講「遮是佗，咱愛來去行行看看」hōo 伊笑講我 mā 是五時做藥，六時做石，一日三市。

Sopot 自 13 世紀出現 tī 歷史跤跡，伊是漁庄 mā 是宗教要地，伊 ê 主權扞 tī Danzig sóo-tí 伊 ê 歷史發展 mā 佮 Danzig 縛 bueh 600 冬。

17 世紀 ê Sopot 一位女性 hőng 講做尪姨隨成做烌，18 世紀 ê Sopot 一位醫生踮遮開醫生館並 kā 東海成做水療中心，就此 Sopot 按有尪姨 ê 海沙埔在升格做通人捌 ê 有醫療效果 ê 海沙埔。

Sopot mā 是德意志帝國(1871 ~ 1920)上重 ê 運動舉辦地，遮 ê 逐年 7 月攏 ē 舉辦若奧運 ê 比賽。

二戰期間 Sopot mā 是德國第三帝國重要 ê 造船要地。

一戰進前舉辦體育活動 ê 要地

Sopot 佮 Gdynia hām Gdańsk 相仝 tī 二戰受著嚴重 ê 破壞，不過重要 ê 歷史 m̄ 捌因為人為 ê 破壞就 kā 伊擲挕捒。

現此時 ê Sopot 有淡薄仔新 mā 有淡薄仔舊，不過百外冬前 ê 醫療驗證到今 m̄ 捌消退，規个海沙埔是人洘秫秫 hōo 無愛佮水大麵炒圓仔，膏膏纏 ê 我 mā 綴 leh 試驗百外冬前 ê 醫療。

無鹹水 ê 海，若正經比北海較燒烙而且 buē 咬皮膚。

Sopot tī 二戰進前號做 Zoppot，二戰後根據 Potsdam 會議 kā 名改轉來做 Sopot。

巡田園，翻田塗寫到遮想著咱番薯島，當時 tsiah 有家己真正 ê 名。

➀波蘭語號做 Trójmiasto，德語號做 Dreistadt，英語號做 Tri-City

栽欉 --- 2021.09.14

翻田塗 --- 2024.10.05