亂皂𥴊仔店 ⓂⒺⒾⓃⓀⒾⓄⓈⓀ

你敢有遮 ê 問題，你跟綴健康資訊過日子，押尾煞行入雺煙散霧行 buē 出來？我有這个症頭。

M̄ 通按呢食，你 ê 盤無肉，肉是卵白質掌管筋肉，無食肉筋肉就 buē 生，無筋肉舒魂就無氣力。M̄ 通按呢食，你 ê 盤已經有豆仔佮米，這兩項是含水碳素，含水碳素食過頭，醣份會過額，按呢 tuì 健康無好閣 tuì 體重管理無幫贊。

我想 bueh 按呢食 kā 豆仔做肉食，畢竟豆仔是素肉，不過豆仔 mā 是含水碳素......呔討遮 ê 問題 ē 遮爾仔石磨仔心我捎無一扇寮仔門，總是我又閣清楚知機遮 ê 問題 tuì 我來講窮實無遐爾仔重要，畢竟目今 ê 我 kā 家己照顧甲猶原 buē 䆀無 hōo 高血壓、高血油、高血糖來挨拶，m̄-koh 一想著年歲沓沓仔行到換年，一个無細膩體重 mā 纏綴伊換年，我就叨撚家己，這款人生小事一點仔攏無才調忌喙，誠實了然。

我敢誠實了然，我家己非常知機，一屑仔攏無，我若正港了然 gún 翁 buē 褒嗦講自牽手徙岫到德國，我 ê 健康檢查 m̄ 捌閣浮紅字，體重 mā 順利仔落崎到今 m̄ 捌翻頭重新𬦰崎過。

德國衛教療節目捷講厝內有健康 ê 扞鼎者 tsiah 有健康 ê 厝內人，這點我非常同意，gún 翁按無同意 mā 轉做百分之兩百 ê 同意，起因自伊離開自學生時代就 tī 遐實習 ê 公司，伊無想 bueh kā 日子全數投入工課就開始揣小工，伊目前做上久 ê 小工是𤆬養老院佮療養院 ê 人去看醫生，自伊做這份小工，伊總算理解伊 ê 好字運，畢竟 m̄ 是逐个人有伊 ê 好字運，身體按呢匪類猶無致著歹物，像「彼个人猶未 50 歲因為糖尿病雙目青盲閣行動無啥方便，厝內人無時間照顧伊 m̄-tsiah hőng 送來養老院。」

啥物因端 hōo 你起心動念開始寫部落格？你敢捌想過這个問題？這个問題自 2019 以我自帕水就認捌 ê 歌聲記錄雨堡 Regensburg➀行跤花心行尞，伊就宛然秤繚 hōo 我不斷輪迴 tī 秤錘佮秤盤揣平棒。

自第一篇文章恬靜出現 tī 痞客邦，自海明威 ê 中畫有才調以帕水 ê 歌聲一字一字以倉頡輸入法記錄踮遮，自意愛 ê 食譜有才調轉做帕水 ê 歌聲記錄踮遮，自發見帕水 ê 歌聲 m̄ 是此在此山中，雲深不知處(tshú-tsai-tshú-san-tiong，hûn-tshim-put-tì-tshú)偏僻甲無地通請教，倚 bueh 半老老萬事 ē 做 m̄-koh 那做那無攬無拈 ê 元気總算免閣倚靠酸素罐 hōo 家己嚓嚓趒，像窗仔外 ê 膨鼠。

自 2019 接受生份人 ê 建議 bueh 分張𪜶讀無 ê 文字請到部落格分張，我按一日一篇到現此時有著來，無著汰，有著食，無著煞，隨緣交有樣看樣，有例趁例，巡田園，翻田塗，接新枝。

2025 翻頭看 2019 uī-tio̍h 相片風格交向時分張 tī 面冊社團是日月蚶 ê 一面白，一面紫棕色 ê 白汫無素交挽頭折脰，無人 kā 我囉 kā 我噪耳，我卻成做家己 ê 相拍雞仔一日到暗交家己掰手面。

相片遮爾仔䆀閣敢豬屎籃仔也提出來品並，現世。M̄ 驚虎生三支喙，只驚人有兩樣心，遮 ê 白汫無素呔 ē 䆀。

今仔日上大 ê 快樂是 kā 所有 ê「Nein」做七聲八調，上、下、平、仄 tī 阮翁 ê 面頭前「Nein」來「Nein」去。

「Nein」了，我問伊，需要德國 ê 聲調 bő？

「M̄ 免，遮 ê Nein 有才調擋一年」伊應。

「這，我就 m̄ 知--looh，不過我知影，tsa̋ng 有一个人保持門風 tī 番薯行出烏暗 thenn tī 窗仔邊曝日頭隨講『gún 德國人透早時仔無 tī 食番薯』兼覕喙。」我順記持 ê 覕喙搬一斗 hōo 伊補數念，隨閣換面，畢竟彼款覕喙需要功夫，我功夫無夠額。

「恁 ê 食食文化我無研究，總是這份食譜是按恁百年𥴊仔店看來，你 bueh 寫一張封 kā 𪜶糾正講『咱德國人透早時仔無 tī 食番薯』無？」

「你敢捌斟酌這个講法」翁仔姐做陣食早起頓，那討論對面美國太太倚 bueh 2 禮拜無見人，凡勢去安胎，那討論車庫有三台 Bián-juh 厝頂又閣一堆太能陽枋 ê 放送頭阿媽落樓梯 ê 動作敢若閣較無四序，翁食菜 ê 小妹步頻徛在我眼前 hōo 我成做貓，好玄伊 tuì 小妹 ê 想法，起因我個人認為人 ê 食食態度是自來性地 ê 牽藤。

「牛奶按動物來，我無啉，我啉豆奶。」

交翁來往，我隨知影翁有一个無蹛德國 hōo 𪜶爸母投講是了尾仔囝 ê 小妹，這个小妹 uī-tio̍h 動物福利(Tierwohl)選擇做素食者。

初聽翁分張小妹 ê 愛心，我規个人感受著伊無私 ê 愛，押尾感覺這个素食者交阿媽 ê 屘囝屘姨無宛 2 體 ê 啥物是素食，啥物 m̄ 是素食齊𪜶講了準算，無地參詳，簡單一句無順𪜶 ê 意，你就是刁工 kā 揣麻煩。

自囡仔時代就認捌阿媽 ê 屘囝我愛叫阿姨 ê 屘姨伊 ê 特殊，一搪著素食者我無第二句話 ê 倚遠遠遠來表示我 tuì 𪜶 ê 尊重。簡單講隨人付米，隨人落鼎，食食慣勢無相仝莫硬愛相疊，除非做陣食飯 ê 人是食方便素，抑是無要意臊素齊囥一桌 ê 素食者。

我 tuì 煮洗摸磨(buâ)款飯頓無熱情，m̄-koh 我 tuì 試鹹汫誠有熱情。

這个 m̄ 驚試鹹汫 ê 熱情 tuì gún 翁來講是一件好代，因為逐日過甲若神 tī 法國➀，tuì 我來講這就...愛按怎形容這个感受 tsiah 敆喙？簡單來講就是，Muse 來相揣一切大丈夫，Muse m̄ 來相揣是烏空是刺疫，因為 gún 翁 ê 腹肚 buē 得通空。

無啦，我 ê 腹肚 mā buē 得通空，特別是家甲徛 tī 煙腸窒倒街 ê 德國。

凡事有結束，只有煙腸兩條➁，煙腸 tuì 德國偌爾仔重要，看俗諺就知。

這是一个煙腸交肉少缺 ê 國家。

德國人底時時行啉紫頭菜汁我無研究，總是見總舖師教人絞紫頭菜汁，我 ê 反應交攝影工作員𫝛款，紫頭菜就 hōo 伊跍 tī 菜蔬區莫越界成做果汁。

三个試驗者，三个無佮意，準做總舖師講營養豐沛，三个試驗者猶是講「菜蔬歸菜蔬，果汁歸果汁，營養有 tsuē-tsuē 路途通得。」

寫著紫頭菜汁我又閣成做貓好玄，臺灣敢有綴著遮 ê 時行食優格粉？隨向 Google 跋筊，Google hōo 我象桮，臺灣 mā 綴著德國時行。

臺灣 ê 優格敢閣 tshan-tshiūnn 向時按呢，齊是優格奶，倚 bueh 7 冬 m̄ 捌轉去臺灣無理解，總是優格 tī 德國是少缺，遮 ê 人鮮沢優格 m̄ 食，食加工優格粉，這....別人兜 ê 代 m̄ 免我加講，總是一想著紫頭菜汁試驗者 ê 反應交回答，我 mā 好玄，好好食一項物件敢有遮爾仔困難？我 ê 意思是，無欠喙齒 ê 人呔討 kā 遮 ê 湯湯水水當做飯頓來食？

囡仔時 kan-ta 𣁳一湯匙入碗做飯湯食，阿母就隨講「你敢 mā 跟綴恁阿媽無牙愛透湯 tsiah 有才調好好哺一頓飯」阿母講這段話 m̄ 是剾洗阿媽，是 bueh 提醒我按呢食飯 tuì 胃無好。現此時 ê 醫學發達 mā 證明，食物無哺 hōo 幼幼直吞閣較勇健 ê 胃腸 mā buē 堪。

2024 挪威車日子露營，tī 挪威惡魔之舌 Trolltunga 彼跤兜露營，挪威人露營敢若較慣勢家己紮 Gá-suh 出門，所致當挪威成做 gún 遮 ê 外國人一心向往(hiòng-óng) ê 露營勝地，自本在額 ê 設備成做無夠額。

自搭布棚晉級到 Caddy，gún-ê 露營裝備 mā 齊有 Gá-suh 通款飯頓，總是一搪著「無料」準做廚房遠甲若臺灣去阿根廷，準做廚房需要排隊我 mā 願意排隊，畢竟錢四跤，人兩跤，一个錢無拍二十四個結 buē 使得。

瑞典交挪威 tī 疫情進前，罕得聽德國人分張，疫情開始挪威交瑞典因為露營制度交德國無相𫝛，一時間成做露營七星寶地 hōo 德國人成做烏仔魚搢水，拚勢上北露營。

Gún 自本就按算去挪威交瑞典行跤花，一見德國人如此熱情斡頭隨落南交向東行，等待這波熱情洘流 tsiah 出發。

2024 熱人，本底猶無按算 ê 瑞典交挪威露營車日子，因為慢牛總愛厚屎尿 hōo 我正式提出離緣，慢牛 uī-tio̍h 安搭這个問題隨 kā 綿豉熥 m̄ 知幾百冬 ê 西班牙車日子露營換做伊寶惜 ê 牽手心所向望 ê 瑞典交挪威。

Sonne kann nicht ohne Schein, Mensch nicht ohne Liebe sein. 

金烏 buē 使得無金光，人 buē 使得無戀愛，

Mein Magen kann nicht ohne dein kochen sein.

我 ê 脾土 buē 使得無你 ê 料理。

Können wir das Brot zuhause backen,bitte?

這站仔翁某做陣減肥，海馬青磅白磅泅去彼區舊漚舊臭 ê 倉庫 hōo 我成做貓 tuì 海馬 Miau buē 離「這斗減肥，我敢捌 hōo 你大腸告小腸過？」

相罵無好言，相打無好拳，心適 ê 人出門𤆬三隻獅，看東看西，食東食西，bué 東買西。無味 ê 人出門 mā 𤆬三隻獅，嫌東嫌西，怨東怨西，罵東罵西，buē 曉泅水 ê 人 m̄ 管 mā kan-ta 莫管(mog-gonˋ)  年歲按怎疊猶原外甥仔點燈火，一切照舅(舊) ê 膠多毋黏，話多毋甜，門關起來伊 ē-tàng 繼續 Seinen Senf dazu geben 繼續發表伊 ê 意見，我 buē 閣 uī-tio̍h 伊 ê 含血霧天來艱苦罪過。

海馬吐一支番仔火，我 kā 牢 tī 身軀外口 ê 臭殕褪 hōo 清氣交門疊做糞埽山，汽油淋落去，番仔火一戛向三下咬，無見餡 ê 家庭說免來食飽換枵，你交我 ê 緣份單淨(danˊgiang)彼九冬。

人講夢是 buē 記持整理 ê 屜仔，按呢透中晝 ê 陷眠是搪著 Mǹg-sǹg？

我 m̄ 知影，總是我清楚知影這久 ê 我搪著 Mn̂g-sng 就敢若《鯤島計畫》ê 肚綰腸duˋgonˋcongˇ alias 盲腸仝款，是𪜶愛驚我 m̄ 是我愛驚𪜶。

• In Vino veritas, Im Karton Anregung.

酒內有真相，厝邊 ê Hellofresh 有靈感。

Gún 3 樓 ê 厝邊是一位 Z 世代緣投少年兄，自伊三冬前交 gún 成做厝邊，伊 ê Hellofresh 箱子就成做見箱知人 Hamlet 哈姆雷特 ê 你看 buē 著伊，我看 ē 著伊。

綴 buē 著時代 ê 我 mā 因為厝邊 ê Hamlet 新智識。原來如貓，掠做若雜菜麵 ê 外送平台 mā 敆無料食譜網站 hőng 參考。 

交 Z 世代緣投兄成做厝邊三冬外，相借問 ê 機會倒手攑起來比 V 就夠額，Hellofresh ê 箱仔又閣無提供菜單 hōo 我自動成做阿貓想 bueh 揣答案，Hallofresh ê 味素敢有好甲連 Kebab 攏捙拚 buē 過？

頂站仔聽【新聞挖挖哇】黃越綏多年恩怨全說了！台灣人中年危機三大隱憂！費盡三十年才領悟的殘酷真理？黃宥嘉喊話從政怕像柯文哲？人生勝利組中年為何出家？20241030，其中一段黃越綏老師談著人生活到 80 歲是滿足，活過 81 是趁著是掠外 ê Bonus。

自二姊 28 歲 hōo 大牛揣去佛祖身軀邊，大姊因為大腸癌 tī 40 歲生日進前恬靜一个人 tī 厝成做無病無疼 ê 人，我開始愖土耳其朋友分張 ê 死亡是啥物，咱是按怎愛遮爾仔驚惶死亡。

咱人按帕(Phè)水泅出海面行入塗岸死亡就註好好，總是咱若較慣勢死亡是老歲仔人 ê 專利，sóo-tí 搪著年歲猶未夠額 ê 人轉去塗州賣鴨卵就 ē 相拍電。是講，按呢寫 mā m̄ 著，高職一年，仝班同學 tī 歇熱交人騎 oo-tóo-bái 出門𨑨迌，一个頓窟仔三个人齊頓落塗跤，其中兩个人 12345 頓到無代誌，一个青春永遠停頓 tī 彼暝。Tsuē 冬翻草這个記錄，我 ê 情緒交出代誌 ê 隔暝接著班長一个一个敲電話通知 ê 情緒相𫝛，連一个水泱攏無發。

二姊 hōo 大牛𤆬走，我 ê 情緒海湧絞 bueh 20 冬 tsiah 平靜。人真正是別人 ê 囡仔死 buē 了。高中同學 ê 青春美麗停跤 tī 16 歲，我無任何感觸，二姊 ê 青春停跤 tī 28 歲，我 ê 感觸一直若 Marianengraben, Mariana Trench 馬利亞納海溝深無看底。有人講我這是鬱症 ê 一款需要看心理科，我個人是認為伊是 Hegel 分張 ê 智慧 Kreis von Kreisen 圓湠圓，頇顢 ê 我愛行到阿母 mā 轉去塗州賣鴨卵我 tsiah 理解，C'est la vie, das ist Leben, 這是四常。

二姊 hōo 大牛𤆬走，大姊 mā 因為翁婿長年重情重義重粉味，愛鄉愛土愛查某 kā 翁婿 ê 借口當做點拄來拚性命減肥 ê 結果就是連愛食 ê 彰化肉圓攏無法度食，翁婿 mā tī 伊上山頭無到半冬就交夥計成做龍鳳 hōo 我面對現今 ê 問題 buē 閣 tshan-tshiūnn 往過按呢吞忍 kā 食蒜仔吐蕗蕎當做是人生功課 ê 磨練(buâ-liān)。

M̄ 知這位 hōo 中國人號做阿福 ê Peru 同學猶閣 tī 德國開 Ka-pi 廳，總是近來準做無 teh 追踪這葩新聞，手機仔佮電視齊自動放送黎巴嫩佮以色列 ê 戰爭 hōo 我想著阿公𤆬規家伙仔按黎巴嫩徙岫到 Peru 定根生湠 uī-tio̍h 囡仔 mā 跟綴阿公 ê 跤步 ，按 Peru 徙岫到德國 ê 伊。

我佮這位同學窮真講無熟似，起因 gún 無跟綴別人 ê 跤步 hōo 一个老師按一年𤆬到六年，gún mā 清楚知影除了上課 4 點鐘有機會做伙破豆，賰 ê 猶是孤人過孤人 ê 四常，畢竟 gún m̄ 是留學生，逐人 ê 素質 mā 無一个固定，我 ê 14 是這款德語課無分語言基礎，sóo-tí 大多數 ê 人猶是 tsham 家己相𫝛語言 ê 人做伴 buē 佮其他 ê 人盤撋。

我 m̄ 知影別 ê 人敢有我這款情形，總是我佮 Peru 同學 hām 加拿大同學攏有相𫝛 ê 經驗，下課捷是一个人等十分鐘過。

我 m̄ 知影這位 Peru 同學敢猶閣 tī 德國，總是見款番麥抑是花豆攏 ē 想著伊，特別是最後一工伊攢一份 Peru Ceviche(Lê-bóng 魚刺身冷盤)閣敆一大份肨奶甲若龍眼 ê 番麥講「你知影薑按秘魯來 m̄-koh 我相信你 m̄ 知影 gún Peru 有這款番麥」當做 gún 有緣再相 ê 相辭禮。

我 m̄ 知影這位 Peru 同學敢猶閣 tī 德國，總是伊分張 hōo 我 ê 故鄉特色是點拄我，準做十八港跤行到到，世界猶是曠闊甲 hōo 我 m̄ 知伊是啥 ê 隨時愛做貓，m̄ 通 hōo 慣勢飼甲 buē 記持好玄是啥物。

「食著藥，青草一葉，食 m̄ 著藥，人參一石」

Tsa̋ng 按車頭轉來踅去 Aldi 揣寶，揣著佮往過按 ES，PT 來𫝛價數 m̄-koh 體格無 tshan-tshiūnn 這遐爾仔大龐(phiāng) ê 美國番薯隨 kā na̋i-lóng 袋挈出來 kā 伊貯 hōo 滇滇滇樂暢來轉。

轉到厝無偌久翁 mā 行到厝隨問暗頓 bueh 食啥。

「Das Abendessen ist noch unterwegs, aber das Frühstück ist schon da」(下昏飯猶原 tī 路頭，早起頓已經行跤到)我講。

「Was du kochst, alles ist lecker, nur bitte nicht mir sagen ～ tsò-sian」(你款 ê 料理攏好食，只要莫叫我做仙)伊笑應。

大暑越轉身歇年節，交換手 hōo 立秋來出菜。

春夏秋冬四位總舖師，手路菜隨碗出。

青臊閣豐沛 ê 菜色 hōo 我無法度殘殘 kan-na 食一項菜。

月斜西貓霧仔光，我一人扞鼎灶佮天地萬物合唱四月望雨。

唱仔唱，目睭猶原 leh 沙微 ê 翁，m̄ 知 tī 底時來相伴。

凡勢是歐洲中心設 tī 愛呂蘭 Ireland 所致 kā 德文當做英文，近來 Google 大神不三時款寡英國無料食譜來門埕 hōo 我成做一隻貓想 bueh 知影英國食食敢真正遐爾仔䆀味。

我 m̄ 捌行踏英國，m̄-koh 捌食過幾間正港按英國來 ê 餐廳，我 buē 講英國餐廳䆀味，總是食來食去就是彼幾味 --- Fish and Chips ê buē 敆喙。

我已經 buē 記得這出菜敢是按 BBC GOOD FOOD 抑是 BBC Food 看來，總是我清楚伊是按英國遐來。

我 tī 英國網站學著 tsuē-tsuē 好食 ê Kari 像美國茄咖哩，這出菜窮實 m̄ 是按英國網站看來，不過伊 mā 佮英國有相干，簡單一句美味しい甲。

寫著美國茄 Kari hōo 我想著出這出菜 ê 雙跤踏雙船，心頭亂紛紛，出美國茄 Kari 我搪著牽粉 m̄ 牽粉 ê 心頭亂紛紛，出這出菜我 mā 搪著將士象車馬炮 bueh 出佗一子 teh 紅肉 64 綴 leh 𤉙 buaih 綴 leh 𤉙 ê 頭疼。

「比並是人 ê 本性，m̄-koh 悲傷拗鬱攏 buē-tàng 捎來楔一世人嫁一个翁，不二嫁(價)，日時搬布袋戲，暗時暗歌仔戲顧面子 ê 有量就有福。」

本底無 bueh 聽EP486 黃越綏｜【名人專訪】來自愛爾蘭的鐵粉 Feat. 蔡雅芬，畢竟人攏愛看籠面頭篩仔，不過我又閣愛做貓，押尾猶是揤落去無拍斷任何一分鐘。

雅芬 ê 外國人生，我這个佮伊𫝛款攏是外國人新婦 ê 人，聽著伊分張「伊第一斗起跤動手，我就拆白講，第二斗就 m̄ 免閣參詳」我隨笑出來，這个笑 m̄ 是取笑是一種我 mā 是這款態度 ê uī 伊佮我杯底無飼金魚 ê tchin-tchin。

我 tuì 現此時 ê 少年人按怎對待龍鳳生活無理解，總是國校六年 ê 我，身軀邊有太 tsuē kā 食鬱當做仙丹來練 ê 朋友，sóo-tí 當我聽雅芬按呢分張，我有一種驕傲，驕傲 gún-ê 勇敢佮獨立。

囡仔時阿母捷講「查某人 ē-tàng 無翁 buē-tàng 無岫」這久翻頭去想，阿母正經智慧飽滇，雖罔囡仔時捷感覺這就是無受教育 ê 人 ê 貪，這久理解 m̄ 是𪜶無受教育，是𪜶 ê 學習環境佮我無相仝，另外，人生智慧 m̄ 是影印課本就 ē-tàng 一帆(phâng)駛甲到 buē 落湳。

第一擺見著 Chili con Carne 是 tī 16 台 ê 喝玲瓏。

彼陣我一直掠做這絕對無人 bueh bué，伊決定 ē hōo 古錐 ê 主持人 tuì 觀眾司奶講「害仔，今仔日 Feierabend 煞鼓來轉免賣」結果目猶未𥍉，走馬燈 ê 數字按 300 包走到無賰半包 hōo 我下頦落到塗跤，開始成做一隻貓是按怎伊 ē 賣甲遮爾仔好。

 不過，彼陣 ê 我是按呢認為，bué ê 族群 m̄ 是德國人，是𪜶 ê 厝邊奧地利人、盧森堡、瑞士遮 ê mā 講德語 ê 族群。

德國喝玲瓏台 m̄ 是 kan-ta 賣德國 mā 賣厝邊 ê 物，而且市草好甲連波蘭 mā 綴 leh 來叫花、洗花、卡花、收 花➀。

我 m̄ 知影臺灣有偌 tsuē 物理仔台，總是 gún 兜見 ē 著 ê 喝玲瓏就有五台。

翁寄若沙漠 ê Congee 出現 tī 𪜶 ê 電視台 ê 影片 hōo 我，隨 kā 揤 Play。

無揤無驚奇，一揤奇甲 m̄ 知影反應，總是每一个地區有家己 ê Exotisch。

M̄-koh 愛我照𪜶 ê 脾土按呢煮糜，我甘願成做 Hesse 筆尾內底彼个哭呻婦仁仁 kā 米煮甲若 Brei hōo 伊慼 ê 人。

不而過原仔愛講著生驚 mā m̄ 是一件歹代，起因伊 hōo 我想著阿母在生時看著就 ē 吼，吼 buaih 食 ê 番薯飯。

講著阿母 ê 番薯飯德國老輩 mā 有相𫝛見著隨吼 buaih 食 ê 番薯飯 -- 蚵仔菇。

今年 tī 德國看著美國掠外 ê 番薯 hōo 本底 tuì 番薯 kiōng-bueh 無興趣 ê 我，目睭開始金爍爍。

按埃及來 ê 番薯，細粒子 m̄-koh 誠甜足合味。

按葡萄牙來 ê 番薯外皮滑溜，若是小可仔無 kā 斟酌繩會掠做伊是柑仔色 ê 「豆仔薯」。

葡萄牙番薯 ê 外形雖罔無 tshan-tshiūnn 美國按呢遐大欉 mā 無 tshan-tshiūnn 埃及按呢遐細粒子，總是 mā 是甜甲足合我 ê 喙斗。

這擺踮超市看著按西班牙來 ê 番薯隨請教翁，細漢蹛踮西班牙 ê 你敢捌食過番薯？

早起頓聽翁褒唆我 ê 手藝想著作家劉靜娟女仕《驚驚袂著等》ê〈番薯遮爾仔無人緣〉mā 隨想著彼日 tī Aldi 搪著 ê 趣味。

「番薯敢誠實遮爾仔好味素」一位按非洲來 ê 朋友看我揀伊食甲厭𤺪番薯揀甲遮認真 tìm 一下仔頭挨拶笑問，這个笑容佮問句 hōo 我想著按 Togo 來德國做穡 ê 阿麗搪著人建議伊「肉 m̄ 通食傷 tsuē」伊 ê 標準回答「你敢知影肉 tī 非洲 m̄ 是鞏金是金仔？」

咱攏慣勢提家己 ê 角度來看別人 ê 世界 mā 好玄咱慣勢 ê 料小是按怎成做別人 ê 特殊。

按番薯島來 ê 我 tuì 番薯 ê 感情就敢若翁 tuì 馬鈴薯 ê 目尾免徙 mā 看 ē 著伊 ê 料小少缺，總是這久 m̄ 是彼久，我 ê 料小少缺成做鞏金物，翁 ê 料小少缺猶原是窒倒街 ê 飽滇 hōo 我見著番薯 mā 成做攑香對綴 ê 人，無綴人 bué buē-tàng，特別是落價。

「你知影番薯 tī 臺灣就 tshan-tshiūnn 你 ê 白草花遐爾仔少缺 ê 無人緣，m̄-koh 自出名人 kā 伊當做保健食品來食，伊隨按吳郭魚成做臺灣鯛按呢身價反幾仔倍，恁德國決定有食著 gún-ê 喙瀾」我刁意故講。