亂皂𥴊仔店 ⓂⒺⒾⓃⓀⒾⓄⓈⓀ

根據科學研究，一頓飯頓時間上少愛食三十分鐘，大腦 tsiah 有法度理解咱食飽矣。

順這个科學研究，我成做一隻貓好玄，一頓飯頓 ê 內容若 tshan-tshiūnn 相片按呢生，大腦敢需要繼續開 30 分鐘 tsiah 有才調感受「咱食飽矣？」

我 ê 食飯時間 m̄ 捌窮時算秒，起因我自囡仔時食一頓飯至少 10 分鐘，無法度食過 10 分鐘規氣放棄。

高職三冬，因為導師紅龜生蟲，龜怪 ê 堅持，要求 gún 一粒便當 kan-ta 會使得食 5 分鐘，我規氣放棄訂便當，換 hőng 貼標仔講「無合作。」

這款舊漚舊臭，過了代放火燒，免閣喋。不過我想 bueh 知影家己 ê 大腦需要幾分鐘，起因我捷感覺家己食一頓飯頓，食甲 kiōng-bueh 揣 Sandmann 睏神交牙槽骨痠...

Tī-leh 款材料海馬泅轉去十外冬前，少年同事相招食人生在世決定愛食一斗 ê 香港茶餐廳，尤其是「彼項料理」。

彼久，我滿心期待 tsham 𪜶做陣去食「彼項足特別 ê 料理」。

Hōo 𪜶喙瀾講甲全波 ê 料理一出，我 ê 喙隨做六月蚶想 bueh 臭，總是咱 ê 年閣交𪜶 ê 年閣較實無相𫝛，隨食一喙茶汰洗六月蚶 ê 臭。

每一个人 ê 人生跤步無相仝，我認為 ê 白汫無素交好味好素無一定交別人相仝，對反別人 mā 相𫝛。

貧惰 ê 海馬 tī 新正年間步頻泅轉去十外冬 ê 記持 hōo 我想著遮 ê 氣象報告，逐年攏 teh 喝今年 ē 落大雪民眾愛細膩 ê 無影無跡。

Tsa̋ng 步頻想著這件代誌，想 bueh 綴《醫師好辣》推薦 ê 5:2 減肥法 mā 愛知影家己一日到底是食偌 tsuē 物件，抑無想 bueh 利用這个方式來食油秤頭 mā 是 kan-ta 做暢做心酸 niā-tiānn。

是講我本底 mā 無愖著這點，起因我 kā Feeling 做水尺，既然是遮爾仔大範 ê 腹腸是按怎雄雄鳥鼠趖竹篙，一目過一目 ê 斟酌？

講起來 mā 無啥物特別，就是 gún 翁講「糋膩瓤 m̄ 著簡單，只要願意做牛羊抑是成做厝鳥仔按呢食食，磅仔自然就 ē hōo 咱唬過。」

熟似伊 m̄ 是一工是十外冬，看伊一時仔是脯脯 ê 雞胿，一下仔 buē-su 趕 bueh 上夜市 ê 灌風雞胿，神經較大條 ê 人 mā 知影伊分張 ê 藥方若是有應效這久 ê 伊 m̄ 免綴我糋膩瓤，起因伊 ê 食食百分之 70 攏是牛羊佮厝鳥仔食食，另外成做牛羊若有法度保持瘦抽，伊佮伊做 100% 牛羊 ê 小妹早著瘦田𠢕欶水 ê 啥物號做肥朒朒圓棍棍 gún 攏 m̄ 捌。

伊 ê 雞胿人生成做我 ê 照妖鏡佮點拄，起因我 mā 好玄家己是按怎 tī 遮食甲比臺灣閣較少顛倒歕雞胿，而且冬外歕 bueh 15 公斤。

踅有機商店看著八紀年➀掛4冬猶未過伊又閣按向時 ê 舊漚舊臭斡一个身成做目今 ê 文雅大範食食 --- 無透牛奶 ê 素食麭丸子 hōo 我想著早前 tī SWR3(西南廣播電台第 3 台) 讀著 ê 評論，內容大概是按呢 --- 別人兜四常 ê 植物踮德國猶種 buē 出來，就是超級食物。未來 ê 好心人隨成做烏面賊交我徛倚倚，向頭隨 kā 請教「Ka-pi？➁」

手捾十子弓蕉入 Erdi 門，離開𫝛款是十子弓蕉，敲一通電話 kā 翁講「今仔日你得著一隻豬，專門賣孤門獨市兼健康 ê Erdi 無賣著時 ê 歐洲菜頭 m̄-koh tsuē-tsuē 需要生湠二氧化碳 ê 黃豆、烏豆、枸杞」。

「我交 E 真久無來往矣」伊笑應。

E 是 gún 翁交往 bueh 8 冬 ê 女朋友，伊是未來 ê 好心人忠實支持者，我是食物 kan-ta 分愛食無愛食佮 ē 過敏 buē 過敏這兩款，sóo-tí gún 兩人到今一直無法度成做朋友做陣食飯。

我一直想 bueh 試 Pastinak 歐洲菜頭 ，總是見見著伊隨 kā 伊認做 Meerrettich➂ 海菜頭閬過，因為我無食薟。

是眼前 ê 事項 hōo 我慼抑是 hoo-lú-bóng 使弄情緒海湧？

身體荏跍踮厝，彼个若牢根 ê 綴我來 tī 最後一喙 Ka-pi 猶末順舌滑到嚨喉管，我二手 Fujitsu 冊型電腦已經開始上班 hōo 我憢疑我是荏身抑是懶屍。 

水，這个物質，從來 m̄ 捌固定

這久 ê 元気佮敲電話彼時 ê 元気 mā m̄ 是固定，不過我非常確定 tī 無事 ê 日子，早起頓一結束，碗箸 mā 窮好洗好就隨田螺循舊逝，較行 mā 彼逝 ê 上 Pixnet 開始我一屑仔攏無費神 m̄-koh 自在享受屬於我家己孤𣮈十色五彩 ê 景緻 。

Pixnet 有「邦邦」，有「興趣牆」，有「APP」遮 ê 選項，總是我是田螺，田螺是我，m̄ 管 tī 遮幌幾冬，我較幌 mā kan-ta 幌入去我 ê 大頭相 ---「我的部落格後台」，我 buē 檢查敢有人成做我 ê 朋友 mā buē 刁工 kā 挨拶做囮招人來遮行踏，我 kan-ta 注心我家己 ê 十色五彩。

我看起來烏貓貓無媠，m̄-koh 保證好食甲 hōo 你擉舌

聽《公視台語台Podcast》S2EP16 - 出名人請借問 - 我們的島陳信聰談著有一个網站 ē-tàng 請教台語植物名 mā 談著𪜶 ē 分張這个網站 ê 連結，較無耐性讀紹介 ê 我，節目一收聽結束隨斟酌繩紹介兼揣連結，總是 m̄ 知影敢是我 teh 使用 ê Google Podcast 佮人佮無相仝，起因我揣無連結，m̄ 死心隨請教公視台語台 ê 面冊 mā 是揣無....

O.K. Das Schicksal wollte es so. 運命就是 bueh 按呢按排，我就莫遮綿精狗咬鐵釘，m̄ 願放。

起因， Es sollte so sein，時間一到自然 ē 相會。是講到今我猶 m̄ 捌佮𪜶相會，請教公視台語台 ê 新辭到今 mā 無聲無息。

Das macht den Kohl nicht fett，這按草花來 buē hőng 大箍，我請教 ê 辭 tuì 公視台語台來講凡勢是無重要 ê 代誌，我家己 mā 愛學 ē 曉莫免意這無聲無息 ê 請教。

烏牛大影，好看無好食。

我一直迒 buē 過我認定 ê 藝術又閣無興繼續攢這味就愛家己撨骨 hōo 家己有法度繼續臭頭包布，防蠅(風神)。

這斗 ê 做法是循往過行踏捷克無張持搪著 ê 好滋味，專門提供做穡人食頓 ê 食堂其中一項菜色酸菜炕肉，是講彼日 mā kan-na 這份菜色無別項。 我 tuì 酸菜 ê 印象按遮來巡 ē-tàng 看出伊 tuì 我有偌爾仔無路。不過自彼日 tī 捷克 tsham 伊相拄搪，酸菜成做我意愛 ê 菜色之一，不過 m̄ 管我按怎跟綴 Google 籤詩來 ê 煮食，伊猶原是一粒田螺煮九碗湯 ê 無味無素 hōo 我憢疑家己 ê 舌，凡勢出問題。總是，好里佳哉，捷克無偌遠，波蘭 mā 是，見感覺家己 ê 舌有問題 mā 有機會行踏這兩个角勢就隨款酸菜來試鹹汫，見試無一擺無想著囡仔時上愛 ê 鹹菜鴨。

我 m̄ 知影德國酸菜敢是自較早就遮爾仔酸，總是我清楚知影德國 ê 食品加工厲害甲 hōo 你食甜猶原感覺食酸，像這份報導罐頭草花。另外，我 mā 一直掠做草花料理攏愛切絲 tsiah 有好滋味，押尾 tsiah 發現代誌 m̄ 是戇人我想 ê 遮簡單 mā 漸漸揣著逐條幼甲若絲佮逐條若指頭仔無仝大條 ê 滋味有啥物精差。

這篇記錄原本是記錄白草花炕肉，總是這按 Google 求來 ê 籤詩無敆我 ê 喙斗，我就愛 kā 換新衫。

家己 ê 臭頭囡仔嫌伊 buē 食相，隨趁這个攄 APP 菠薐仔減 40% 價數 ê 機會緊閣 kā 伊重新妝娗一斗，總是食食 tshan-tshiūnn 化妝仝款，彼時愛 Gothic 這久愛若無頓粉 ê 紅嬰仔妝。

四季按夏至行到秋分，猶原著時 ê 菜擴 m̄ 知敢 mā 驚寒，菜架 ê 貨色愈來愈細粒，細粒甲 hōo 我皮一削掉 mā 賰無三塊肉通 𤉙 ê 額。本底瘦抽躼跤 ê 菜頭煞愈來愈像咱番薯島 ê 菜頭圓棍棍 hōo 我一句話攏無請教翁敢 bueh kā 你 ê 敵人拆食入腹隨揀一支上有我緣 ê 菜頭轉來做伴。

今仔日 ê 攝相猶是無滿意，總是我家己 mā 清楚愛我撏錢添虛華，彼是較早較有暝 ê 代誌。另外，整理相片佮揣記錄 tsiah 發見原本記錄是挽肉做伙煮，新 ê 攝相是菜肉隨人落鼎落人付米，各自獨立無交插，隨想 bueh 掠外生一份記錄，總是枝骨本底就相𫝛，精差啄鼻轉做凹鼻，烏頭鬃 kā 染做金頭鬃按呢 niā-tiānn，是按怎 bueh 閣加一遍工，是閒甲掠虱母來相咬是 m̄，我無 ka̋ng 改甲 m̄ 成人閣講伊是仝一个人 ê 性地。

菜擴佮菜頭 tuì 我來講攏相仝，雞肉佮挽肉 tuì 我來講 mā 無宛 2 體 ê 佗一味價數合軀就款彼軀轉來料理。

這久 ê 手頭無挽肉就換雞襟胸，雞襟胸我閣愛食煎 ê，按呢就 kā 拆做兩份來加一層新味素，好食兼滿足甲免翁褒唆我家己隨褒唆兼想著愛按怎 kā 號名。

按相片揣著家己 ê 變化是一件真趣味 ê 代誌。

彼款感覺就 tshan-tshiūnn 喙䫌彼粒 m̄ 知是啥物 ê 粒仔。

伊步頻出現，步頻閣消失𤆬 hōo 我 ê 心情變化。

應當是十冬前，四常無 tī 要意皮膚狀況 ê 我，彼日 m̄ 知影搪著啥物問題步頻要意家己 ê 皮膚並開始沓沓仔落妝揣問題。

M̄ 知是我較有耐性一寡抑是目睭願意面對問題，sóo-tí...伊 hōo 我感受伊 ê 存在。

「咱敢 ē-tàng 三不五時料理這來做早頓食」翁問。

「Buē-tàng」我應。

「是按怎講？」

「Gún 德國人早頓無按呢食」我替伊翻頭成做德國人回應這个問題。

翁恬靜無出聲，起因伊清楚知影某真𠢕抾恨，sóo-tí 潑出去 ê 水 m̄ 通抾轉來資源回收加工製造，抑無 kan-ta hőng 𠞭甲閣較忝。

德國 ê 菜頭窒倒街，價數 mā m̄ 是死豬仔價 ê 鞏金，總是自人按臺灣徙岫到今，菜頭罕得出現 tī gún 兜 ê 廚房，這个因由我 ē-tàng kā 伊牽拖到翁遐去 --- 伊無愛食菜頭，總是這款白白布染甲烏我做 buē 來，起因我 tuì 翁某無仝喙從來 m̄ 捌要意過。

既然按生呢，菜頭是按怎遮爾仔罕得出現 tī gún 兜廚房，我家己 mā 是貓一隻，不過這个好玄是按這篇記錄 tsiah 開始，而且是按德文記錄開始。

自決定莫 tī 德文鏨寡家內事，我 ê 頭殼若冇粟，揣無粟，畢竟教人按怎煮食分張喙尾遮 ê 事工 m̄ 捌 tī 我 ê 世界栽過欉。 

這回 uī-tio̍h 記錄這篇文章，我認真愖我愛按怎落筆 tsiah buē hōo 伊 buē 牽磕著家內事，畢竟菜頭佮翁八字 buē 合是事實 m̄ 免咸豐三，講到今。 

是講，翁 mā 趣味，櫻桃菜頭 mā 是菜頭，伊佮櫻桃菜頭就敢若 Romeo and Juliet，見做伙去 bué 菜，無捾一葩櫻桃菜頭，伊隨若 Romeo 大聲喝「Juliet」ê 艱苦。

「我逐日 uī 伊款三頓，伊 m̄ 食就是 m̄ 食」老母按受氣行向無 ta-uâ tuì 人開拆厝內囡仔是按怎喙白，hőng 投喙白 ê 囡仔 mā tshan-tshiūnn 有耳目無喙 ê Hello Kitty 恬恬陪伴老母接受訪問。

「你敢 bueh 佮 gún 分張你無愛糜飯 ê 因由？」

「糜飯是苦毒 m̄ 是享受」囡仔無 tshan-tshiūnn 這个年歲 ê 囡仔，bueh 講實話進前愛先檢查爸母 ê 態度。

我 uī 這个囡仔感覺無捨施，總是我猶原無法度阻止目汁㴙㴙落 ê 笑聲。

「這个囡仔應當 hőng 投甲慣勢」buē-su 見著雙生兄弟 ê 翁 mā 笑甲反肚那講。

接續頂一篇 Bé-khòng 紺草花 ▪ Rotkohl mit Speck ▪ Red Cabbage with Bacon 猶未完成 ê 草花故事。

照實講，自本 tuì 紺草花無啥物好印象。

這个原因，除了我本身無愛食𠕆硞硞 ê 食物掠外，德國味素 ê 紺草花 mā hōo 我蓋䆀 ê 印象，這个蓋䆀 ê 印象佮 Hema Ma 分張 ê 學生食堂味素相仝，伊 m̄ 是傷酸就是傷甜抑是𠕇。

紺草花上讚 ê 味素 mā tshan-tshiūnn Hena Ma 分張猶是「冷拌生食」較好食 mā 較好有法度得若 Hena Ma 分張 ê 營養素，像Vitamin C、Senföl(芥辣油) 佮助消化➀。

紺草花 tī 德國目前上大 ê 種作地 tī 北爿，北爿因為塗質較酸 sóo-tí 種出來 ê 紺草花色緻是偏紅色，南部因為塗質酸度低，種出來 ê 色緻是藍色，按葉仔就看 ē 出差別➁。

讀台灣人台灣事【台語。生活】第13期：Tī Youtube頂 ê 藍春瑞老師 part 灶跤煮食：紫色 ê 高麗菜 hōo 我想著古錐 ê 阿母 uī-tio̍h 德國囝婿專工去菜市仔款一粒紅草花轉來炒，押尾投這菜炒 buē 爛 ê 故事。

Hena Ma tī 電子報有紹介 Rotkohl 佮 Blaukraut；

Tsit項料理有夠樸實，hām號名就省起來，直接叫菜 ê 名 — Rotkohl（紅高麗菜），bē 輸tsit款高麗菜干焦有1款煮法。

而且咱看伊紫色ê菜，tī 德國北部kā號做紅高麗菜，到南部變做藍高麗菜（Blaukraut）。In德國人m̄是色水分bē清，ē南北無仝色是有原因ê。咱講ê紫色是無煮過ê色，in講ê紅色kah藍色lóng是煮熟了ê色。北部人煮ê紅高麗菜有摻phông果，所以色就較紅。南部人無摻別款物件煮出來就較深色 ---《台灣人台灣事》【台語。生活】第13期

近來 Muse 無 bue̍h 相借問，我就順這个機會巡菜股，翻田塗，讀著 Hena Ma 紹介這草花隨想著 uī-tio̍h bueh 消敨翁詬詬唸這草花好食，我認真跟綴德國食譜煮兩鼎手工佮罐頭 ê 味素 hōo 伊明明白白知影，伊認為 ê 好滋味是透濫偌 tsuē 糖出來 ê 好味素，德國公共電視台捌疊過 hőng 參考，這久揣無影片，就按呢準過，起因這 m̄ 是重點，因為伊 m̄ 管透濫啥物芳料 tuì 我來講就是白汫無味。

每一个事項攏特殊，無任何一个事項是舊漚舊臭需要擲挕捒。

Alles ist etwas Besonderes, nichts davon ist Abfall und muss weggeworfen werden。 Everything is special, none of it is waste and needs to be discarded。Todo es especial, nada es basura y debe desecharse

近來捷想，款一頓飯至少愛點外鐘，按呢食一頓飯愛偌久？

食飯飽 ê 窮碗箸洗碗箸到真正有時間成做家己 ê 時間是偌久？

「電視分張早起頓愈早食愈健康」翁指 Visite | NDR.DE 講。

「Vielen Dank」那說多謝頭殼那繩這尖頭草花 m̄ 是愛甲 6 月 tsiah 有法度種作，而且是罩被 ê 彼款。

厝邊看我 buē-su hōo Μέδουσα 䀐著隨講「Tschüss」，我緊出聲講「我 tī 電視台看著你。」

厝邊因為我 ê 石化掠做我無想 bueh tsham 伊盤撋，隨踅翻頭笑應「因為 gún 是南爿主要 ê 合作社其中一个。」

「一看著田園我隨想著恁兜，一聽著合作社字名我隨百分之 90 確定這是咱遮，看著你 100% 確定」我 buē-su 見著明星按呢講。

「電視台無棄嫌我 ê 德語」捌接受共產教育致使較無慣勢 tī Karl der Große ê 面形鬥『微笑老蕭』招牌 ê 喙角沓沓仔成做菱角謙虛仔講。

人生世事誠實有濟濟 hōo 家己料想 buē 到 ê 代誌，tshan-tshiūnn 人生第一斗搪著身體病疼需要理解別人愛講啥 ê 語言 m̄ 是家己慣勢 ê 語言是佮咱家己一屑仔攏無啥熟似 ê 德語。

不而過，我 ē 講有這斗 ê 經驗，我發覺語言確實 m̄ 是遐爾仔重要，另外我 ê 德語窮真 mā 講甲若醫生 ê 褒唆，我 ê 德語講甲確實 buē 䆀閱讀 mā 是。

起因，我有法度一个人 tī 無網路通請教 ê 狀態 kā 開刀文件讀甲 hōo 護士小姐 m̄ 免揣人專工 uī 我解釋，這正經是無簡單 ê 代誌。

雖罔，自開始確定愛開刀就有淡薄仔出箠，總是彼 kan-ta 文化慣勢無相仝，像褲褪落來，我隨 kā 牛仔褲佮衛生褲攏褪掉賰一領內褲，押尾迵過醫生若 Dame Jane Goodall teh 佮猩猩互動，我 tsiah 知影，我 kan-ta 需要 kā 褲褪甲無四序 ê 角勢 hōo 伊檢查。

是講穿裙應當 buē 出現這个 tsin 想起猶原歹勢 ê 代誌 ，總是裙無合我 ê 喙斗，我是 Yves Saint Laurent ê 信徒....

巡菜股翻田塗 tsiah 發見我成做 Medium Daily ê 釘仔戶。

巡菜股翻田塗，翻著這个跤跡，我又閣成做一隻貓好玄家己是按當時加入，是 uī-tio̍h 啥物因端加入 Medium Daily，起因我清楚知影家己有這个癖，遮 ê 網路環境除了 Pixnet 痞客邦是我家己自動加入掠外，賰 ê 攏是做人情，像面冊。

若按呢，我是 uī-tio̍h 啥物代誌加入這个我自根頭攏 m̄ 捌 ê 社群環境？

這時四常亂皂記錄就是我上好 ê 翻草，因為伊是我 ê 人生大舞台，苦齣笑料攏公開。

原來如貓，我是跟綴台文里長伯鄭順聰先生 ê 跤步加入 Medium Daily，莫怪 ē 佮伊遮爾仔無到分。

我愛食德文 uī-tio̍h bueh 區別蔥仔佮大蔥(我囡仔時攏聽序大按呢講) Porree，m̄-koh 翁嫌伊䆀味一直 m̄ 食 ê 韭蔥。

近來，凡勢真心接受食食是藥，灶跤是藥房伊開始接受這項 hōo 伊嫌甲臭頭 ê 韭蔥講「伊正經蓋好滋味，著時咱愛捷捷款轉來料理」。

往過聽伊按呢講我無講寡食甜食鹹，臭跤鼻臁(liâm) ê 話，我 ē 著蛆，這久我 buē 閣按呢做，起因我一想著家己 mā 愈來愈像𪜶兜 ê 副本，我就交懍恂。

Sóo-tí 自頂回好好仔佮伊斟甌仔茶講古，我就決定 buaih 閣纏綴過了代佮成做我家己 mā 無想 bueh 反 ê 天公伯 ê 數簿，大冊(慼)。

我 mā 確實無閣行這條路，像拜四伊家己 bueh 來車站接我去 bué 菜，轉來看著厝門口 ê 車位 hőng 停去隨講「後擺你愛較早寡」。

Weiß auf der Straße,

白蔥蔥 ê 街路

Dunkelheit am Himmel,

暗暗 ê 天

Mein Bauch ist warm,