亂皂𥴊仔店 ⓂⒺⒾⓃⓀⒾⓄⓈⓀ

(2023.04.18 早起頓 小白銀卵燥𫝻 + 焦麵 + 敏豆炒/755kcal)

 M̄ 知影遐  ê 經過無四序 ê 人敢 tsham 我相𫝛，過了代 ê 代誌窮實原仔記牢牢，只不過 buē 刁工 kā 伊記甲清清楚楚 tshin-tshiūnn 數字。

這个現象是刁故意佯戇抑是激怐怐(khòo-khòo)，我家己窮實 mā 㨨無一絲仔線。

四常五四三鏨好勢，準備 bueh 𫞼出門品並，彼隻 m̄ 知走去佗落 ê 鹿仔按我 ê 頂腹蓋大力挵落去 hōo 我 m̄ 知 bueh 按怎止疼，就順這个疼做 Yoga --- Inhale, Einatmen, Exhale, Ausatmen 來捊若 hōo 海風吹甲自動成做毛(mn̂g)尾仔 ê 情緒。

今仔日是 9.21，一目𥍉 mā 22 冬，二个失去老母 ê 1歲佮3歲 ê 囡仔 mā 已經轉大人，一个查埔人 tī 某綴大牛換肩換去塗州，保險金遮 ê 一領 mā 隨 phàng-kìnn 有緣佮伊再相見，伊 ê 身軀邊 mā 已經有一个 buē 曉講咱話敆一个紅嬰仔 kā 阿母講「這是我 ê 囡仔，恁 buē-tàng kā 顧，我 bueh kā 𪜶𤆬走。」

阿母講 hōo 我聽 ê 悲傷原仔活跳跳，總是我 tuì 彼个二姊家己選擇 ê 查埔人無咸豐三，講到今 ê 興趣。

起因，囡仔本底就 m̄ 是我 ê，我 mā 相信性命有伊家己 ê 安排 m̄ 免我插手，只不過這个心領(líng)神悟(gōo) m̄ 是莫捎就有，sóo-tí 這久 ê 我正經愛 kā 家己拍噗仔。

「當我情緒落崎，我攏想著你，想你按怎行過彼條路，你若鮕鮘 ê 性命力成做我現此時 ê 見本，提醒我家己世間無啥物迒 buē 過 ê 情緒」

(2023.12.20 早起頓 米蘭草花卵燥法國焗 + 秮仔 + 優格/991kcal)

Tī Guteküche.at 見著伊隨想著囡仔時捷捷食 ê 高麗菜卵，總是又閣 buē 記得阿母是按怎料理，隨請教網路𠢕人，押尾 tī YouTube 揣著【蛋酥高麗菜】挑選更加清甜脆口！免油炸版蛋酥這樣做！｜阿慶師 想 bueh 綴 leh 做，總是欠一味 --- 豆皮隨放棄隨閣翻頭轉來看 Guteküche.at ê Wirsing mit Käse und Ei 手頭 ê 材料除了蔥仔無掠外其他全齊有，按呢就來綴 leh 做，不過我食 buē 慣勢。

食 buē 慣勢 m̄ 是原食譜䆀味，是我慣勢食卵包這款炒甲赤赤 ê 卵，sóo-tí 當卵愛成做若卵燥𫝻有淡薄仔水水 ê 口感，準做 gún 翁呵咾甲觸舌我 mā buē 繼續綴 leh 按呢做，起因彼 m̄ 是我慣勢 ê 喙斗。

食譜閣餾一斗確定家己無 kā 伊做甲重耽，按呢就繼續試落去，卵 ê 做法就 tshan-tshiūnn 阿慶師 ê 做法，先炒 hōo 好勢 tsiah 佮其他 ê 材料濫做伙，按呢 ê 做法 hōo 伊看起來無遐爾仔媠像原食譜按呢，總是足敆我 ê 喙斗 mā 合翁 ê 脾土，做菜正經是哲學。

米蘭草花卵燥法國焗

...... 材料 ......

米蘭草花，切絲　1/2

(2023.05.27 早起頓 蘑菇 I-tá-lih 麵猴焗 + 羅馬萵仔菜卵包 + 鰮仔魚生菜盤 + 王梨優格/1079kcal)

準備成做有宅無厝 ê 前一日，發見冰箱猶原有卵、生菜盤佮番薯頭殼隨閃過見若按呢出門攏 ē buē 記得 ê 見笑代隨按小面神成做大面神 ê 這項代。

起因，我 ē tuì 家己貼金箔，準做家己是 Bernard Moitessier。

卵是出外車日子無法度 kā 食食料理甲敢若 tī 厝內按呢 ê 豐沛佮有法度兼顧僫 bué 閣佮儉貴 som-som ガス罐上好 ê 一項物，伊 mā 是出門在外無好食著動物性營養上緊 ê 一味。

不過，伊 tuì 我來講上讚 ê 一件代誌是，伊 hōo 瘸手 ê 我 mā 有法得 kā 㾀勢妝娗甲若 Ingrid Bergman 按呢有地虛華有地激派頭張身勢。

羅馬萵仔菜卵包

...... 材料 ......

(2022.12.29 早起頓 番麥卵燥𫝻 + 煙腸馬鈴薯紅菜頭湯 + 白菜滷 + 清飯 + 王梨木瓜/829kcal)

翁捷捷問我這个問題，是按怎你無想 bueh 分張你 ê 作品。

我理解你無佮意面冊，總是愛料理敢有䆀甲若面冊按呢？

無--neh...愛料理無䆀甲若面冊按呢，我講。

若按呢 uī-hô 你 buaih 閣繼續 tī 遐分張你 ê 作品？

敢講受著彼張批 ê 影響，伊問。

彼款代誌連一塊雞卵糕 ê 肉幼仔攏無，我應。

按呢是 uī-tio̍h 啥物因端？

(2022.11.28 早起頓 番芫荽豆腐 + 卵包敏豆炒 + 越南米粉/809kcal)

糋膩瓤油這件代誌總是大碗閣滿墘又閣水龍車 bueh 拍火，一路底到通行無阻上得人心。

總是，拍火 ê 過程無可能攏是通行無阻，準做咱甘蔗隨目齧，剃頭照輪辦➀猶原 ē 著觸。

這久我唯一通做 ê 代誌 kan-ta 是 hōo 家己成做一隻水雞愖來久，跳來遠➁。

翁自頂年11月達成目標 kā 家己按81 糋甲賰 72 公斤就開始致心做水雞。

我自今年3月發見油敢若糋無啥會出來 mā 開始成做水雞，不而過我 kā 食食熱量按1500 khiú 到1700，gún 翁是 1500 搝到 2000~2500。

伊想 bueh 搝甲歐盟 ê 建議 2000，起因伊捷捷感覺伊若是無支持遐 ê 粿路或是甜路公司，遮 ê 公司就無法得看顧𪜶 ê 員工。

面對伊這款火車過了才歕觱仔 ê 興趣，我 mā buē 閣咸豐三，講到今。

(減肥早起頓 卵包鱷梨仔。荷包蛋佐酪梨)

這睏仔身體荏 kan-na 款早起頓，下昏飯就放牛食草。

這款看起來誠自然 ê 代誌 m̄ 知按怎直直 tī 我 ê 頭殼踅金龜磨。

我想決定是想著往擺 ê 故事，總是我無興咸豐三，講到今。

M̄-koh，我清楚知影遮 ê 往過是家己 ê 滇流佮洘流，我家己 mā 捷捷無事揣事三不五時伸手 kā 搣一下。

遮 ê 代誌 tuì 我來講窮實 buē 造成凝心抑是困擾，總是𪜶 tshan-tshiūnn 蠓，煩。

講著這感謝德國無啥蠓，至少 gún 蹛 ê 角勢無啥蠓，m̄-koh 熱人有足 tsuē 胡蠅。

起因，潘桶2禮拜收一改。

(減肥早起頓。串仔 Oo-mú 卵。鮪魚歐姆蛋)

翁出門步頻踅翻頭。

我問伊落勾啥物物件。

「伊佮郵差攏無落勾物件」隨 kā 白紙橐仔交 hōo 我。

見著伊若見著厝內 ê 人，雖罔我 m̄ 是教友。

總是，tī 家鄉無親人通相借問，猶原有人願意分張按家鄉來 ê 氣味是我 ê 福氣。

多謝教會公報按遠兜分享家鄉 ê 氣味。

(2022.12.13 早起頓 菜蔬印度卵カレー + 雞肉雞豆サラダ + 清飯 + 蘑菇敏豆炒/720kcal)

翁問「你感覺寫台文抑是華語佗一个較有機會 hōo 人有興趣來行踏？ 」

「毋mˇ 知 diˊ」我應。

「你無歡喜」伊講。

「想 bueh 寫 Blog 閣想 bueh 有 Fans ê 人是你 m̄ 是我，另外我 m̄ 是你 ê Fans 我無法度 uī 𪜶出聲」我講。

「你 mā ē-tàng 成做我 ê Fans...」伊有一个 buē 堪得 hőng 講佮驚得失人 ê 性地隨按呢回答。

我 mā 有一个性地，講過 ê 代誌無愛一直熥 buē 離「你是褪褲放屁 --- 講廢話」我應。

「牛瘦無力，人窮白賊，你若欠錢想 bueh 靠 Blog 起一座金山，寫華文是較有出路，畢竟講華語讀華文 ê 人比你德語德文閣較大四界」見伊無應聲，我直接 kā 問題畫箍仔表示 m̄ 免閣解釋一大拖，直接決定。

(減肥早起頓 紅菜頭卵燥𫝻。胡蘿蔔滑蛋)

𫝻著脾土 buē 合 ê 代誌，我 ē 熥「出出去！到世界逐角落生湠濟濟」。

我 m̄ 是教友，總是迵過這篇文章，我揣著家己 ê 盲點 mā 知影日後閣搪著生毛帶角抑是龜怪愛按怎進退。

窮實 buē-tàng 講進退，起因生毛帶角抑是龜怪 tuì 我無影響，總是我捷捷 ē uī-tio̍h 遮 ê 代誌 tuì 家己情緒叨撚。

這就真龜怪--ah。

我討厭這个感覺，sòo-pái 我需要搜揣答案。

這个答案 tī 我讀煞這篇文章，我 tsiah 發現窮實我早就知影答案，只是猶真慣勢這个態度。

我真慣勢搪著問題就會失禮，然後繼續會失禮準做我明明知影我並無做 m̄ 著代誌，我猶是感覺家己愛會失禮。

(減肥下昏飯  麥片卵餅𩛩。麥片煎餅)

一个人食早起頓，想著鳳飛飛小姐講過 ê 這段話。

食飯配鹹，m̄ 是鹹是淚珠。

Mā 想著往過，按外頭做穡 tńg--lâi 攏 ē 睏甲日頭曝尻川 tsiah 起床。

彼久 gún 媽媽攏 ē 講我來款 lán-ê 早起頓。

早前無法得感受鳳飛飛小姐佮 gún 媽媽講 ê 話。

今仔日綴愛早早出門 ê 翁起床精神款伊 ê 早頓。

款好伊隨出門，我一人坐踮客廳愖早起頓 bueh 款啥來食。

(減肥早起頓 麥片卵餅煎。麥片蛋餅)

Bueh「欠錢怨債主，不孝怨父母」進前，誠實愛目睭金金看、張持繩問題。

昨昏，tī Books 揣冊、注文。

一切是過五關斬六將 hōo 我這个電子青盲牛肚臍空插鎖匙歡喜甲 buē 顧--tit。

當我掠做我有法得輕輕鬆鬆行出山海關，彼號 ... m̄ 是講 ē-tàng īng 過數 ê 方式付數？

是按怎這馬點入去揣無𪜶 ê 口座？

Eh，可能是 Opera  ê 問題。

你看--lah，攏是你，詬唸 Google 無 tī 照護使用者 ê 隱私，莫 kā 使用較安全。

(2023.03.24 早起頓 甜椒敏豆卵燥炒 + 白麵 + 草莓優格/866kcal)

這月日體重無啥變化 hōo 我誠鬱卒。

不而過講無變化 mā m̄ 著。

起因，磅仔 ê 數字猶原有起落，只是無閣 tshan-tshiūnn 早前按呢順順仔落崎。

伊顛倒反是 peh 崎閣落崎，按呢 teh 踅金龜磨。

按呢磨到今 bueh  倚三禮拜，心情閣較牽挽 mā buē 堪得伊按呢磨。

我知影 tī 這4月日 ê 時間，我已經減掉本底體重 ê 10%，磅仔 ê 數字開始起性搦地是正常 ê 發揮。

總是我無想著這點，數字 ê 性地遮爾仔大，兩禮拜過去...伊 ê 火原仔柴樠點火較光油，油油油無變化 hōo 我慒心擘腹這葩火僫 kā 挓化(hua)。

(2021.11.21 減肥下昏飯 玉子焼き。玉子燒)

踮 mplus|云閱讀佮報導者讀著這兩段話，真佮意。

mplus|云閱讀

如果你的靈魂是冷的，你的頭腦是空的，即便自然賦予你美麗的雙眼，也沒有用。

--- Pierre Choderlos de Laclos，法國軍官、小說家，《危險關係》作者。1741-1803

報導者

教文化、不是教語言

自由與包容，幾乎是所有受訪者都提到的關鍵字。台語推廣者並非希望有朝一日能取代華語，成為國人語言使用的公約數；而是讓所有台語使用者，能夠不用受到歧視與拒絕，在任何情境下都能自在說台語。

(2023.03.20 早起頓  卵カレー + 米粉 + バター敏豆炒 + 果子優格/886kcal)

讀著這篇新聞誠有感觸。

起因，我想著我關掉家己 ê 面冊徙來 gún 翁面冊鵁鴒順便空 ê 往過。

Tī 我猶未參加任何面冊社團，我 ê 面冊信息總是是恬卒卒甲連蠓仔虼蚻攏 bueh 興來蹓蹓(lâu-lâu)hui-hui ê 所在。

尾來接受一位佮伊窮實無交情 ê 生份朋友 ê 邀請綴伊參加伊 ê 社團 mā 自接受邀請揤落去了後，我 ê 面冊 m̄ 捌閣恬靜過。

我無討厭這个改變，起因迵過社團我楦闊我 ê 世界。

總是，我討厭我無邀請別人來坐，家己卻開門入來坐 ê 人。

我知影我 ē-tang kā 遮 ê 人閘踮門口，總是我敢 m̄ 免出門。

(2023.04.21 番薑仔卵燥 + 白麵 + 魚指 + 優格/893kcal)

厝邊 uì 各路來。

Gún tī 遮攏是外埠人。

踮雞寮作穡按 Qazaqstan 來 ê 厝邊分張𪜶兜 ê 雞卵，踮果子菜蔬合作社作穡 ê 羅馬尼亞厝邊分張𪜶兜 ê 菜蔬。

Gún 翁某啥物攏無 kan-na 20 支弓蕉 thang 送。

Sóo-tí 見若收--著𪜶 ê 愛心等路，gún kan-na 有法度一个人出銀兩一个人出氣力來表達 gún-ê 感謝。

順紲 kā 𪜶 tuì 我這个比𪜶按閣較遠兜來到遮生活 ê 外埠人 ê 疼痛好好仔寶惜並食落腹。

(2022.01.13 減肥早起頓 Kam-má-tooh チーズ Oo-mù 卵。蕃茄起司歐姆蛋)

論真講，我 m̄ 捌 gún 爸爸 ê 話。

猶 m̄-koh，我 iōng 我記憶中聽伊細細聲 tsham 仝鄉 ê 人冇談 ê 語調稽考伊 ê 話。

我想應當是較 倚客話。

Sóo-pái，想 bueh 學客話、寫客文。

客家話 tuì 我來講 buē 生份，起因囡仔時捷捷 hōo 客家媽媽叫飼，讀書時 mā 捷捷去客家同學𪜶兜𨑨迌。

只是上熟似 ê 客話伊 m̄ 捌 tshan-tshiūnn 英語自動鏨踮心肝穎，顛倒 tshan-tshiūnn 雞摸 hőng 拎骨拎甲離離。

這个問題已經是熟甲 m̄ 免閣咸豐(Hâm-hong)三講到今，sóo-pái 我 mā m̄ 免繼續搜揣理由說明抑是 tuì 伊死𢯾苦情 m̄ 願放。

(2022.12.15 早起頓 敏豆豆腐麵 + 鬱金豆腐 + 麻油卵包 + 敏豆炒/875kcal)

細漢時，二姊若是煠麵，伊攏 ē kā 我 ê 麵加囥兩粒麻油卵包。

伊講，按呢我一斗食就 ē-tàng 食著兩款好味素。

一个是煠麵 ê 滋味，一个是卵包 ê 滋味。

二姊因為塗牛換肩先塗州賣鴨卵。

Hōo 我無機會繼續 tuì 伊司奶講人我腹肚枵甲 teh 挵鼓。

M̄-koh，我知影我 ē-tàng kā 伊帶 hōo 我 ê 幸福繼續湠落去。

(2022.11.26 早起頓 肉攕サラダ + 青豆仁卵燥𫝻 + 洋刺波俗麭 + 藍莓米芳麥角 Quark/1017kcal)

風水地理講，黃是土，土是氣，土閣晟養萬物。

寒--人 ê 德國，看無青、看無黃。

只有白銀 tī 閃爍。

敲幾粒卵，激家己是后羿。

金烏一粒一粒射，金烏一粒一粒貫，貫入家己 ê 脾土蒂。

青豆仁卵燥𫝻

(2022.12.03 早起頓 羅美生菜サラダ + 麵サラダ + 鱷梨仔檨仔俗麭 + 菜蔬 Oo-mú 卵/880kcal)

一个語言抑是文化 ē-tàng tī 孤𣮈 ê 文化 hőng 點油做記號，猶原是活力十足孤鳥插人群，做伊 ê 穡行伊家己 ê 路。

準做，別人笑伊是囝仔癉(tan)，講伊是需要擲㧒捔 ê 舊漚舊臭 m̄ 捌十八港跤行透透 ê 草地倯。

伊猶原 buē 怨嘆家己生做䆀，愛整容成做生份人。

起因，伊知影上重要 ê 代誌 m̄ 是用目睭看。

一枝草，一點露，媠䆀攏有好人才。

初寫台文捷捷搪著揣無規定內 ê 標準 hōo 家己愈寫愈行去無睏尾彼爿，想 bueh 成做慢牛厚屎尿。

想著英文雜菜麵 ê 一四界。

(2022.03.09 減肥早起頓。肉丸仔 oo-mù 卵，肉丸蛋煎餅)

食早起頓讀著這張圖 In virus veritas，喙內 ê ka-pi 險險噴出來。

雖罔，我並無真正理解伊 ê 意思，m̄-koh 看著熟似 ê virus 小可知影伊是 teh 講佗一項代誌。

Ūi-tio̍h bueh 確定家己想 ê 答案，將手機仔挈 hōo gún 翁看。

伊一看隨笑甲吭跤翹講；

這是真出名 ê 拉丁語俗語，原文是「In vino veritas」，意思是「酒內底有真相」。

聽了，換我斟酌繩我 ê ka-pi。

「你彼是 ka-pi，m̄ 是酒」翁講。