亂皂𥴊仔店 ⓂⒺⒾⓃⓀⒾⓄⓈⓀ

(2024.03.26 早起頓 Rigatoni Tshì-sù 法國焗 + 串仔生菜盤 + 洋梨仔俗麭 + 優格/1102kcal)

我慣勢綴食譜出菜 mā 慣勢 tī 仝一个時間無出相𫝛 ê 菜色，所以 tī 這出菜出現進前 Muse 窮實無來相揣，總是我 mā 已經學 ē 曉放過家己莫情緒叨撚 -- 招姜子牙佮周公做陣行棋。

 「今仔日早起頓愛較晏食」我那𫝻手機仔那講。

「食啥攏好，只要你出 ê 菜攏好食」翁 mā 那𫝻伊心愛--ê 那應。

「當然 mā 是按呢生，我出 ê 菜攏好食，總是德國人講 ê 話 buē-tàng 認真，抑無按怎死攏 m̄ 知影，像彼對母女 hőng 請出去就隨倒塗跤 m̄ 捌閣𬦰起來」我刁意故講。

M̄ 敢保領實膜(tsa̍t-mo̍oh) buē 來行踏 ê 翁恬靜接受我 ê 日本剾刀，倒剾。

按德國 Google 趨湧到以英語做通用語言 ê 國家，猶是若 Fernão de Magalhães 猶未出帆進前 ê 茫茫渺渺，好玄海 ê 另外一爿 ē 是啥物面肉。

喙焦來食一杯燒茶燒烙這个 hőng 倖歹 ê 千金小姐 --- Tsa̋ng 猶閣 tsham 逐家歡喜食太陽餅，今仔日隨曝杮粿做杮霜。

(2024.03.20 早起頓 鰮仔魚麻仔葉 I-tá-lih 麵 + 優格/880kcal)

愛是...

伊看起來就是伊。

M̄ 是你意愛看著 ê 伊。

愛是 hōo 每一个人自在成做伊家己。

.(2024.03.06 早起頓 番薑仔ひき肉粟仔麵 + 草莓優格/1083kcal)

頭一擺見著伊是腹肚正枵又閣無想 bueh 食傳統 Balkans 料理 -- 肉、肉、肉佮 tshan-tshiūnn「Papa」四界生湠 ê 義大利料理雄雄一踅身 tī 一間看起來若猶生活 tī 阿祖年間 ê 餐廳門跤口看著一桌三个人食肉閣配一盤飯隨決定踮遮飼枵。

因為店東 buē 曉講英語 gún mā buē 曉講希臘(Hi-lia̍p)語，菜單又閣讀無路來就 iōng 上原始 ê 語言比跤畫手，先送一个笑容 hōo 彼桌 hōo 我停跤 ê 朋友挨拶(Aisatsu)紲落來開始遮比遐指，サラダ、Πίτα、肉...Mo？Me？Kônn？確定選牛、選羊、選豬，久無見著米 ê 我呔 ē-tàng 無來一盤飯隨 kā 手指過去。

店東佮三位 uī-tio̍h hōo 我 buē 點 m̄ 著菜 ê 朋友敢若知影我 ê 想法隨開始比跤畫手 hōo 我掠做傷晏來，清飯已經 Nóo-sut 隨表示按呢無要緊，我 mā 綴猶是男朋友 ê gún 翁食 Πίτα 就好隨 kā 手閣按 Πίτα 指過去，表示閣一份。

店東 kā 手頭 ê 紙條囥踮桌頂，手綴指我本底 bueh 點 ê 物食講「Kein Problem」這 hōo 我楞去捎無摠通搝，隨越頭請教翁德文後 ê 14。

「Kein Anhnung」伊應。

聽伊按呢應，我隨反白睚(píng-pe̍h-kâinn) hōo 伊食。

「我捌 tī 遮上班無表示我 ē 曉講希臘語，另外我上班 ê 公司是德國公司 」伊講。

(2024.02.26 番薑仔三文魚麵 + 優格/921kcal)

當胃腸願意沓沓仔佮食物鬥陣，我又閣搪著另外一个問題，一个自我有印象開始 m̄ 捌搪過 ê 問題 --- 頭殼一直踅神兼戇神。

我 buē 講家己是冊迷，總是我 mā m̄ 是彼款見冊隨慼無法度讀字 ê 人。

這斗 kā 家己種 tī 眠床 bueh 2 禮拜 ê 時間，搪我掠做家己精神較好想 bueh 繼續讀陳雷醫師 ê《鄉史補記》，我竟然無法度讀字，而且是一讀頭就隨眩(hîn)目就隨抽。

這个現象 hōo 我驚甲咬舌，畢竟無啥特殊才能 ê 我，唯一猶有通佮人競爭 ê 一步取(tshú)就賰好好仔讀一本冊 ê 耐性。

冊無法度讀，手機仔 leh？

緊 kā 離跤手 ê 手機仔揣轉來開始𫝻，畫面 tsiah 拄拍開我 ê 頭仝款眩，目仝款抽疼 buē 離閣兼想 bueh 吐 buē-su 若有身仝款。

(2023.12.05 早起頓 菜蔬ひき肉麵湯 + Quark/938kcal)

近來寫著「Tsiâ」想著三冬前 ê 故事。

四邊無一倚踮遮又閣無 tsham 有法得佮我冇談𫝛話 ê 人交陪，sóo-tí tsuē-tsuē 話原仔 ē 曉講，m̄-koh buē 去發覺佗落無對頭，我意思是我慣勢 ê 腔口。

2019年迵過面冊社團牽線，一位來德國行跤花 ê 朋友，見面破豆豆 tsiah 拄擘幾無粒，伊笑講「你中部人--hooh」。

我問伊按怎發覺？

Gún 後生 tī 中部讀書，gún 慣勢講「Suî」，m̄-koh 現此時 ê 伊攏講「Tsiâ」。

這件代誌 hōo 本底 tuì 學習「羅馬字」無興頭 ê 我，隨成做火燒厝：有厝味(有趣味)閣改變我寫台文佮拍台文 ê 方式。

羅馬字正經蓋重要。

(2023.09.24 早起頓 白菜ひき肉 I-tá-lih 麵焗 +  果子麥角優格/1209)

聽無《台灣新眼界》總是綴我看久 mā 知影愛按怎掠重點發問，tshan-tshiūnn 2023.03.01 恬靜殺手肺腺癌！無薰嘛會致著！基因.族群.環境.性別 著癌機率無仝? 當譚敦慈老師手揤 123 仝桌同學隨問譚老師 teh 講啥。

「逐日食一碗青色菜蔬，ē-tàng 降低50% 著癌 ê 風險，白色十字花科 ê 草花、白花仔菜，有 β營養素 ê 紅菜頭、金瓜佮トマト、卵白質」話聲猶未行到塗跤，喙 teh 窒白色十字花科 ê 仝桌同學隨講「這碗攏 tsiâu-tsuân，To-siā。」

聽伊講「To-siā」我 ê 笑脈 buē-su hőng 揤著笑甲 kiōng-bueh 變蝦(痚)佮龜(呴)。

我笑甲 kiōng-bueh buē 喘氣 m̄ 是歧視，伊 mā 知影我笑 ê 因由是離鄉，無離腔 ê 臭奶呆實在太古錐。

「這久臺語又閣加一个腔，DE腔」伊笑講，紲落來認真講「物件燒度已經低過65度，咱愛較緊食」YouTube 隨閣揤落去「咱繼續看專家 ê 分拆」。

德國佮臺灣攏有相𫝛 ê 症頭，真愛綴專家講「這 ē-tang 食，彼 buē-tàng 食，食這較健康，食彼 ē 破病」，德國佮臺灣 mā  𫝛款 teh 推捒「我 ê 碗盤」，德國佮臺灣 mā  teh 放送醫療衛教節目。

(2023.06.19 胭脂麵 + 芳料白花仔菜 + 杏桃 Quark/1163kcal)

Kam-má-tooh 醬透寮仔チーズ佮牛奶，宛然黏 tī 樹蔭歇涼 ê 肉豉煨(gún 厝邊 ê Leonberger)按烘爐轉做冷氣遮爾仔透心涼。

麵濫落去，隨个仔隨个成做 thenn tī 紅霞海沙埔等待情郎 ê 美人魚。

美人魚遮 tsuē 个，情郎 buē-tàng kan-ta 一个，搣一把金甲若 Apollo 頭鬃 ê チーズ tsham 𪜶相會。

客鳥 m̄ 免來造橋，隨个仔隨个雙雙對對沈入愛琴海。

愛情 ê 熱度，tshan-tshiūnn 六月天 ê 火燒埔，燒甲 hōo 我成做夸父 tuì 𪜶走。

按「 Tolle Snacks」看來 ê 食譜號名做「Überbacknene Nudeln」。

(2023.06.10 早起頓 番薑仔蘑菇ひき肉麵 + 弓蕉鱷梨仔 Quark/1014kcal)

這窮實已經熥過幾仔斗，總是見用 Ikea ê 瓷仔盤攏感覺誠無合軀就無 kā 攝相做記錄。

前站仔按車頭划巷路轉來厝，tī 倚家庭科醫師遐 ê 人家厝見著「Zu verschenken」就隨倚過去看敢有啥物有趣味 ê 物。

素食食譜冊，德國人 ê 素佮我意愛食 ê 素無相𫝛，教人按怎飼馬佮照顧馬，彼佮我徛傷遠，茶甌仔有意思 m̄-koh 呔 ē 囥遮下底...

O.K.  彼个名連我 mā 無愛看無愛講，按呢就無啥有趣味 ê 物。

當我準備 bueh 翻頭踅轉去本底 ê 路線，見著一箱 mā 是「Zu verschenken」ê 箱仔囥踮回收柴枋 ê 掠外一爿。

因為見著彼个名 hōo 我淡薄仔驚驚，畢竟我是外埠人 m̄ 是本地人。

不過，我呔 ē-tàng iōng 一个人 ê 名來決定遮 ê「Zu verschenken」絕對是仝一个性地。

(2023.05.25 早起頓 五彩螺仔殼麵 + 鱷梨仔王梨蝦生菜盤 + 王梨優格/839kcal)

「你 bué 啥物冊」翁問。

「一本法國寓言，一本英國小說，一本著 tsuē-tsuē 文學獎 ê 𠢕人寫 ê 小説」我講。

「第三本 bué 了真好，按呢你 ē-tàng 按文學獎𠢕人 ê 作品揣著評審 bueh 愛 ê 氣口」伊講。

「我無遐爾仔欠錢，需要 kā 家己成做 Fraust」我應。

Buē 記得是 tī 當時收著光批邀請我參加台語詩文學獎比賽。

我真清楚家己足頇顢寫詩，寫出來 ê 詩 mā 決定 buē 合評審 ê 脾土。

總是，一想著人𪜶專工寫批來邀請咱投稿，我 ê 虛華就崁過我 ê 頇顢，準做我家己知知主辦單位 m̄ 是 kan-ta 邀請我一人 niā-tiānn。

(2023.04.22 早起頓 野菜雞肉焗 + 卵包+ 藍莓 Quark/1161kcal）

走相掠 ê 經絲

久年 ê 珍珠

猶原幔 tī 目墘 ê 烏紗

宛然六合黃道十二宮

綴月鏡起隨月鍥落

久年想 bueh tuì 你說 ê 抱歉

宛然流水滇

(2023.02.24 早起頓 王梨林檎紅菜頭生菜盤 + 敏豆 Tshì-sù 厝鳥麵 + 杏桃 Kefir 麥角糜/965kcal)

前幾日踮愛料理又閣收到 blah blah blah ê 信息，照實講讀著猶原感覺鑿目，不過 kan-na 一秒 niā-niā 隨 kā 批刣掉。

批刣掉 tsiah 想著呔 ē 逐改攏遮爾仔衝碰無耐性，緊踅轉去愛料理看信息敢閣猶原𫞼 tī 遐。

感謝對方敢寫 mā 敢𫞼牢牢，因為伊 ê 勇敢 hōo 我 m̄ 免 tuì 家己起毛敲油呔 ē 遐爾仔衝碰受人影響閣無地熥智慧。

Kā 翕一張仔相留底隨 kā 伊 tsham 一聲歹勢攏貧惰發出喙做陣囥 tī 多謝你 kā 我講，你是「兔仔」hōo 我 m̄ 費神看顧你^^➀彼格，然後繼續你 ê mˇ diˊm̄ 是 my duty ê Das ist mir egal。

➀ Mein Name ist Hase, ich weiß von nichts.

(2022.11.01 早起頓 玫瑰草花 Bé-khòng 麵 + 水蜜桃麥片 Bowl/790kcal）

敢是我寫 ê 文章誠實遐爾仔龜怪到連家己 mā 揣無家己？

M̄-koh 揣無家己 uī-hô 到今我遮猶原看 ē-tio̍h 生份人來行踏？

是按怎？

Warum?

Why?

どうして?

Por qué?

 (2022.10.28 早起頓，青花仔菜雞肉麵佮甜路/855kcal)

踅 Bosch ê Simply Cookit 看著這篇材料攏齊全 m̄-koh 無鼻著火燒過 ê 厝(味)想 bueh 換位搜揣靈感無張持𫝻著四常 buē 讀 ê 部份 -- 評價隨揣著火燒過 ê 厝(趣)味 mā 決定隔轉日 ê 早起頓就是這味。

只是我誠好玄，我是受著啥物因端 ê 影響雄雄 tuì 伊產生遮爾仔大 ê 趣味，總是黛安娜已經拍獵拍甲深山無見光，我 ê 目睭 mā 揣無光，時到阿波羅就會來炤(tshiō)光，隨 kā 資料收好纏綴日本電影ゆめ揣夢。

我 ê 作品無照起工行，不過滋味 hōo gún 翁呵咾甲我掠做家己是總舖師又閣 buē 記得愛搜揣好玄。

不過，記持 tshan-tshiūnn 胃 teh 拍鼓 ê 貓，時間一到 m̄ 免我發聲自動行跤到。

Tsham gún 翁做陣去 Česko 行跤花攏 ē 先買這粒パン 來補數念，紲落來 tuì 家己講轉來德國決定愛家己烘一粒來食。

只不過，見若離開  Česko 轉來德國伊隨成做囥踮博物館 ê 恐龍，緣到 tsiah 閣相見。

這回面冊 ê 生份人青磅白磅捎德國新婦分張 ê 「德國麭」食譜愛我回答伊 ê 問題。

 (2022.12.02 早起頓 鱷梨仔米粉 + 番麥娘仔瓜サラダ + 魚指/892kcal)

M̄ 知影「旅遊生活」敢閣有佇放送「儉錢王」這个節目。

我是𪜶 ê Fans。

Tī 德國，雖罔無通 khop-pih 美國 ê 儉錢王。

總是，搪著落價抑是攄 App 就 ē-tang 換無料 ê 物食攏 ē hōo 我暢甲敢若得頭獎。

Tshan-tshiūnn 這斗攄 Lidl ê App 隨 ē-tàng 換一粒貴參參 ê 鱷梨仔，這就是我 ê 儉錢王副本。

鱷梨仔米粉

(2023.02.11 早起頓 魚指 I-tá-lih 麵焗 + 番薯洘湯 + 優格/986kcal)

已經 buē 記得我 tī 佗位認捌「菊花夜行軍」，我 kan-na 知影一聽--著 tshan-tshiūnn 囡仔時 ê 相借問目珠內久年 m̄ 捌發穎 ê 葡萄規捾規捾按焦土結果落地。

最後成做我 tī 他鄉是故鄉上好 ê 陪伴。

特別是思念天頂 ê 阿母佮其他 mā 轉去塗州賣鴨卵 ê 親人佮其他 hōo 風吹甲無見一粒子 ê 鉛粉就 kā「菊花夜行軍」揣出來，kā「風神125」一遍閣一遍熥 buē 離 ê 放送。 

凡勢是 Menopause teh 起風做浪，我捷會 tsiah-nī-á 捷踅轉去大牛換肩 ê 故鄉，揣遐 ê hőng 笑講𪜶是五音不全卻是我 tī 世間聽--過上媠 ê 歌聲。

阿爸阿母無 tī 厝秀鳳阿姨攏 ē 來喝講「來食飯(siid fan) 」，農伯伯 ê Pangcah 牽手教 gún 按怎縛毛尾仔，小鳳 Paiwan ê 獨立佮滿滿 ê 樂觀引𤆬我享受孤鳥插人群 ê 恬靜。

我足數念小鳳......

凡勢是 Menopause teh 起風做浪 hōo 我想 bueh 迵過「日久他鄉是故鄉 」來安搭一波閣一波 ê 海湧。

(2022.12.22 早起頓 ひき肉野菜 I-tá-lih 麵焗 + 白花仔菜焗 + 鱷梨仔兔仔耳サラダ + 杮仔 Quark 甜路杯/1025kcal)

「逐回結束，我攏感覺足 Blue」那食飯那 tuì 翁哭呻問題。

「發生啥物代誌」伊問。

「我 ē-tàng 理解運動者 ê 熱情，總是歷史已經證明 tshan-tshiūnn 布爾什維克 ê 社會改革無路行，總是 ē-tàng 確定 ê 代誌是敢若人民聖殿教這類 ê 放送猶誠時行」我講。

「我 kan-ta 聽有布爾什維克...」伊講。

「歹勢，我按呢講誠觸意，m̄-koh 逐回參加彼个活動，我攏掠做家己是 2 戰 ê 猶太人」我講。

「按呢莫閣參加這个活動」翁規个臉皺做一片。

「我 mā tī 按呢愖，特別是今仔日完完全全出現若 Sebastian Haffner 佮 Ronen Steinke ê Der Muslim und die Jüdin ê 故事，復健科 tsiânn-tsò 外科，作穡人 tsiânn-tsò 法官...」話猶未講 tsiâu-tsn̂g，我 mā 已經揣著答案。

(2022.12.14 早起頓 菜蔬甜麥麵そば Soba + 青花仔菜雞肉サラダ + Frikassee/745kcal)

讀這篇文章感觸誠深，雖罔我 m̄ 知有偌 tsuē 人 kā 遮 ê 代誌當做是真 ê 科學智識 tī 看。

不過，我清楚知影 tī 我孤𣮈 ê 箍仔有 tsuē-tsuē 朋友是 kā 遮 ê 影片當做智識 tsham 我冇談 Nietzsche。

代起先，我是感覺誠礙虐不過猶原認真分張家己少少 ê 智識 tsham 𪜶做陣討論交流。

落尾手我發見遮 ê 朋友並無興趣 tsham 我交流，畢竟𪜶攏是留學海外 ê 學霸曷我只不過是一个 m̄ 捌上過大學 m̄-koh tsham gún 阿母相比並我較好字運有機會學習這久主流智識 ê 低路份子。

Sóo-tí 我清楚知影遮 ê 朋友有興頭 tsham 我冇談 Nietzsche kan-ta 這个因端，gún 翁是德國人 tshan-tshiūnn 彼日 tī 猴樹港(嘉義東港)搪著 ê 先生相𫝛。

伊有興頭 tsham 我冇談是翁婿致蔭我抑無人伊是扞大位又閣十八港跤行透透，30分鐘 ê Frankurt 行跤花認捌全德國 ê 阿舍兼狀元才 ê 人 呔 ē 分時間看我這个倒吊墨水無汁 ê 人 leh 變猴弄。

論真講少歲搪著這款代誌我 ē 孔明氣死周瑜，這久 ê 我是據在遐 ê 總是認為別人分張 ê 代誌是孔子媽教 ê ê 經絲。

(2023.02.16 早起頓 蜂蜜芥辣雞肉麵 + 法國洋蔥湯 + 林檎 Tsioo-kóo-lè-tòo/815kcal)

物食是我 ê 𤆬路雞𤆬我轉去久年 ê 彼早起 tsham 3 个按澳門佮香港來 ê 少年家做伙食早起頓 ê 記持。

「這是我食過滋味上蓋讚 ê 炒麵」按澳門來臺灣𨑨迌 ê 少年家那食那講。

「這滋味蓋好 m̄-koh gún 較意愛你 ê 德國パン」按香港來 ê 姊妹仔講。

「感謝恁 ê 無棄嫌，後回有機會閣來臺灣，歡迎恁閣來 gún 兜做客 hōo 我苦毒」我笑甲著內傷回應𪜶 ê 褒唆。

這是久年前轉去台灣五月日彼跤兜，無事揣事綴人參加 Airbnb ê 記持。

寧靜日(Ruhetag) 那食早起頓那佮翁冇談彼久 ê 龜叨鱉趖佮捷捷凝心想 bueh tuì 應好 ê 朋友講歹勢咱無方便款待。

總是，一想著日後目睭瞌起來無搪著 Engel(Angel) m̄-koh 搪著范謝將軍𤆬我轉去見閻王....... 我就隨 kā 家己當做金鑲玉(新龍門客棧) 。

(2022.12.15 早起頓 敏豆豆腐麵 + 鬱金豆腐 + 麻油卵包 + 敏豆炒/875kcal)

Reisnudeln ist der Bach

米粉是溪流

Tofu ist eine Klaviertastatur

豆腐是鋼琴鍵

Die Bohne ist eine Orgelpfeife

敏豆是管風琴

Ich bin ein Hund, Sonnenbad in Juni.

(2023.01.25 Bé-khòng 蘑菇炒 + Bé-khòng 德國麵猴 + 馬鈴薯湯 + 藍莓麥角優格/1022kcal)

2019大暑 tī 網路無意中揣著「iTaigi 愛台語」規个人敢若 tī 罩霧看著日花仔按呢清楚著頭並纏綴「愛台語」ê 文句寫台文。

仝年年兜按中央社「做伙走台步」這本冊讀著姚榮松教授 ê 故事，我 kan-ta ē-tang iōng 這个辭來形容我 ê 心情。

《做伙行台步》

疼入心肝的24堂台語課

㊓ 中央社

ⓦⓦⓦ 博客來