亂皂𥴊仔店 ⓂⒺⒾⓃⓀⒾⓄⓈⓀ

(2024.04.25 早起頓 韭蔥荷蘭豆雞肉滷 + 糙米飯 + 俗麭 + 優格/1042kcal)

我愛食德文 uī-tio̍h bueh 區別蔥仔佮大蔥(我囡仔時攏聽序大按呢講) Porree，m̄-koh 翁嫌伊䆀味一直 m̄ 食 ê 韭蔥。

近來，凡勢真心接受食食是藥，灶跤是藥房伊開始接受這項 hōo 伊嫌甲臭頭 ê 韭蔥講「伊正經蓋好滋味，著時咱愛捷捷款轉來料理」。

往過聽伊按呢講我無講寡食甜食鹹，臭跤鼻臁(liâm) ê 話，我 ē 著蛆，這久我 buē 閣按呢做，起因我一想著家己 mā 愈來愈像𪜶兜 ê 副本，我就交懍恂。

Sóo-tí 自頂回好好仔佮伊斟甌仔茶講古，我就決定 buaih 閣纏綴過了代佮成做我家己 mā 無想 bueh 反 ê 天公伯 ê 數簿，大冊(慼)。

我 mā 確實無閣行這條路，像拜四伊家己 bueh 來車站接我去 bué 菜，轉來看著厝門口 ê 車位 hőng 停去隨講「後擺你愛較早寡」。

往過聽著這句話我 ē 一間貨賣了了佮伊冤甲通霄 m̄ 放伊煞，因為無想 bueh 成做𪜶兜 ê 副本，我恬靜無應話 kā 物件一項一項捾落車 mā 捾入厝排好勢，斟一甌茶等伊轉來。

伊門一拍開我知影伊 mā 發現問題想 bueh 會失禮，總是伊猶原愛纏綴爸母 ê 神魂承爸母 ê 瀾「後禮拜仝款落雨，咱駛車去 bué 菜」。

(2024.03.24 早起頓 秮仔美國茄紅菜頭 + 蔥仔絞肉醬 + 優格/1016kcal)

Weiß auf der Straße,

Dunkelheit am Himmel,

Mein Bauch ist warm,

Frühling in meinen Augen.

Tī A2 德語課搪著三位按伊朗來德國做穡 ê 朋友，雖罔我佮這三位朋友因為語言界限無法度自在冇談人生四常，總是𪜶按心肝穎湠出來 ê 笑容是彼陣若 hőng 關 tī 動物園聽遐 ê buē-su 關心，窮實是若阿里友善 ê 人上僫得 ê 人皮褪掉逐家攏相仝 ê 誠懇。

這三位伊朗朋友，兩位是綴人來德國做廚子，一位是佮 Aiko 有相𫝛四常 ê 伊朗太太，翁婿來德國公司做穡𪜶佮囡仔 mā 攏綴 leh 徙岫。

(2024.02.05 綠草花ひき肉炒 + 秮仔 + 秮仔麥角 Quark/992kcal)

佮白草花(Weißkohl)、米蘭草花(Wirsing)遮 ê 兄弟姊妹攏屬仝一家族 ê 綠草花(Grünkohl)，伊就若䆀鴨仔(Das hässliche Entlein) m̄ 管幼穎抑是老欉伊佮其他 ê 兄弟姊妹就是生做無相𫝛 ê 瘦抽無大頭 kan-ta 葉。

綠草花 tī 德國通用德語號做 Grünkohl 抑有其他 ê 講法 Braunkohl, Krauskohl oder Oldenburger Palme，伊愛食落霜，因為愛食落霜 hōo 伊食起來甘甜，屬十字花科植物 ê 伊 mā 有厚厚 ê 芥子油苷(Senfölglykosiden)佮飽滇 ê 維生素 - A, B2, E, K、B3，礦物質 - 鈣(kài)，葉酸，磷(lîn) 、鐵，纖維，卵白質 mā 比牛奶 tsuē ，牛奶100g/3.3g，綠草花100g/4.3g。

綠草花除了有以上 ê 營養 mā 有二級植物物質 a.k.a. 二次代謝物 tuì 免疫系統佮血油攏有真大 ê 幫贊，綠草花凡勢是按希臘湠到義大利，再按希臘湠到中西歐洲、北美洲佮東西非洲地區，栽欉時間自九月底到隔轉冬三月初，tī 德國伊 mā 有這个字名 Oldenburger Palme 是按北德 Ossietzky Universität Oldenburg(大學)生湠 ê 品種。

「照理來講德國南爿較𠢕落霜是按怎遮爾仔僫見著綠草花」愛食新沢綠草花無愛罐頭口味 ê 我請教德語比我較老較輾轉 ê 翁。

「Keine Anhnung/毋知」翁應。

「你捌喙白無」我刁意故問。

「這我就蹛 tī 巷仔內，內行」伊笑應。

(2024.03.09 早起頓 米蘭草花菜頭滷 + 糙米飯 + 優格/1082kcal)

我 m̄ 知影地球綴金烏已經踅過幾輾 tsiah 有法度踅到今仔日 ê 面水，不而過我清楚知影我 ê 耐性可比天頂 ê 河溪 m̄-tsiah 有法度醫治翁 ê 翁，而且 m̄ 捌發生 1789 事件，像𪜶兜按呢。

𪜶兜 ê 1789 到今猶 teh 發生，不過贏 ê 永遠是天霸王，是按怎 ē 按呢生，彼是別人兜 ê 問題 m̄ 免閣稽考 mā m̄ 免咸豐三，講到今。

我愛食菜頭，總是我清楚知影我愛 ê 菜頭 buē 合翁 ê 喙斗，德國人慣勢濫 khu-lì-mù 去𤉙 ê 滋味 mā buē 合我 ê 喙斗，所以愛食菜頭 ê 我見見著伊 buē-su Romeo and Juliet，因為家族問題無法度鬥陣。

窮實 mā 無遐爾仔無捨施，翁已經改掉承𪜶爸母 Ich habe die Hosen an，褲是我穿 ê 出錢 ê 人主意 ê 歹癖，總是我 mā 無興趣一塊桌無仝味，畢竟我 ê 興趣 m̄ 是扞廚房。

所以，見搪著菜頭準做價數媠甲 hōo 我挵著頂腹蓋，我猶是佮伊さようなら。

這久有機會搪著按巴基斯坦來德國生活 ê 媠姑娘，tī 伊遐我 m̄-nā 學著「紅菜頭」是按𪜶彼四箍圍仔湠到全世界 ê 新智慧 mā 學著手路菜，正經好食甲連喙白翁攏喝講「這愛定定煮來食」。

媠姑娘食素，我無食素 mā 驚無食 B12 ê 致著無頭神、𠢕起性搦地、跤手揻揻鑽遮 ê 問題，所以我添寡「ひき肉」來料理，另外媠姑娘是濫菠薐仔，我無菠薐仔我就濫寒人菜蔬「米蘭草花」仝款好食甲，明年寒人行跤到我閣 bueh 繼續佮伊大麵炒圓仔，膏膏纏。

(2024.01.31 綠草花ひき肉塗肉林檎法國焗 + 秮仔燕麥優格/977kcal)

收著愛料理 ê 問卷(Būn-kuàn)調查，我又閣成做貓一隻綴𪜶讀紹介，讀煞無想 bueh 繼續致著青光眼，隨踅翻頭轉去剷草、翻塗，順紲栽新欉，畢竟 Helge 有交代「一个圓按算 buē 清 ê 圓生湠」，波蘭天文學家 Jan Heweliusz mā 講「水，這个物質，從來 m̄ 捌固定」。

W wodzie, owej płynnej materii, nie ma nic stałego 

我 tuì 愛料理興趣猶原無，總是伊是一个媒界 hōo 無聲量僫生湠 ê 文字佮語言有機會迵過𪜶 ê 圓箍仔聊聊仔湠出閣較 tsuē ê 圓，所以 m̄ 免繼續牛就是牛，牽到北京也是牛。

我無反對愛料理 mā 無認為愛料理無保護我 ê 權利，像食譜規捾 hőng 𢯾去，𪜶攏 m̄ 處理遮 ê 問題，起因我真清楚這件代誌 bueh tī 網路走江湖就愛知影你 ê 拍 buē 死，埋 buē 密 ê 烏面賊 m̄ 是 kan-ta 綴你綴牢牢 ê 彼尊猶有別尊佮 tsuē-tsuē 尊。

雖罔，第一斗搪著烏面賊 m̄ 是這款伊是草花做 ê 物 buē 大箍(Das macht den Kohl nicht fett)一屑仔攏無要意，是衫仔領 kiōng-bueh 弓破(Jemand der Kragen platzen) ê 風火著規腹火，總是有歲仔較要意家己 ê 健康就 buē 綿精佮這个烏面賊拚輸贏，m̄-koh 愛明呼愛敨中氣 ê 事項 mā 是愛照行 buē-tàng 繼續食草花。  

這就是押尾踅去愛料理寫副本 ê 因由，總是我一直迒 buē 過 kna̋g 無料使用這件代誌，就規氣莫浪費人 ê 空間，這久收著𪜶 ê 電子批踅翻頭轉去看𪜶並無 tshan-tshiūnn 兔仔抑是獅按呢 Vicke 就隨上身，Helge 佮 Jan mā 倚偎來挨拶。

(2024.01.29 早起頓 カレー綠草花雞肉 + 糙米飯 + 秮仔燕麥優格/1031kcal)

印度人煮一頓飯平均 2 點鐘，德國人煮一頓飯平均 6 分鐘。

好食 ê 新沢綠草花無法度炒 mā 無法度煠 kan-ta ē-tàng 𤉙、煨。

Tī Marktkauf 搪著真僫見 ê 鮮沢綠草花，我 kā 按電視台學來 ê 智識講 hōo 翁聽，順煞掛踏頭話「一公斤一包 3.99€，掛電費凡勢愛加 1€，4.99€，我出資。」

「電費無鞏金，m̄-koh 健康一無去，金銀財寶攏 bué buē 著」翁隨紲喙講。

「準做你承恁爸母 ê 癖，我 mā buē 跟綴」我 kā 綠草花囥落捒車仔，那行那文文仔笑講。

翁 m̄ 敢閣接喙，起因伊清楚知影𪜶某無染著𪜶兜 ê 傳統 kā 俗物 bué 破家當做豬屎籃仔四界品並，m̄-koh 真𠢕 bué 俗貨 hōo 伊較免做工課。

像按呢一頓，1 公斤 7.99€ ê 雞襟胸拆三頓 2.6€，糙米飯 1 公斤 2€ ē-tàng 食 8 頓，1 頓 0.25€，優格 500g 0.69€ 拆二頓，一頓 0.35€，麥角 500g 1.79€，ē-tàng 食 50 頓，一頓 0.04€，弓蕉近來攏維持 tī 1公斤 1.19€，大約 5 只，一只 0.24€，遮 ê 基本 ê 配備 3.48€ 二个人，一个人 1.74€ hōo 伊食甲 m̄-nā 飽脹哽胿閣較免驚惶超磅連鞭來抑是 Omega-6 陰鴆陰鴆，咬人三寸深 hōo 伊綴人喝「我 bueh kā 健康揣轉來」ê 漫画。

(2024.03.14 早起頓 紅菜頭ひき肉焗 + 優格/1079kcal)

頂站仔看 DOC Fischer 分張紅菜頭智識，其中講著一段我 m̄ 捌聽過 ê 新智識 --- 顧胃腸隨請教 Google 大神，大神 mā 真聖賜  hōo 我這兩篇資料 1. Mit Karottenkur Magen und Darm stärken 2. 腹瀉便秘交替~~吃紅蘿蔔搶救敏感腸道 隨想著這篇 2021.07.19 記錄 ê 食譜，不過彼久 ê 文字齊是茶鈷 teh 呻翁要求我保守秘密越頭隨成做爸母好囝 ê 問題。

遮 ê 問題這久閣餾是 2356789 ê 揣無 1 佮 4 ê 無意無思免閣保留，起因記錄踮遮進前我已經 tī Telegram kā 伊詈甲叫阿爸阿母 mā 無較縒。

「你 m̄ 是交代 m̄ 通 hōo 恁爸母知影你愛 hőng 𠞭膽，是按怎恁爸母這久 ē 敲電話來請教，我是按怎顧𪜶後生」我較按怎驚死後 hőng 割舌，猶原無法度接受這款春天後母面，bueh 變一時間 ê 講鬼話。

過了代 ê 代誌免閣熥清飯，這久 kan-ta 需要 kā 精神囥 tī 這原生 tī 這久 ê 伊朗佮阿富汗地區 ê「紫色」菜頭。

菜頭 tuì 我來講就敢若「感冒用斯斯（用斯斯）、咳嗽用斯斯（用斯斯）、鼻塞鼻炎用斯斯⋯⋯ ê 斯斯有兩種」 白佮柑仔兩色，來到德國見著「紫菜頭」規个人 buē-su Colombo 發現新大陸按呢歡喜甲一四界展風神，這久較 ē 曉成做貓 tsiah 知影 Ach so... ' dass Bugs Bunny an einer violetten Karotte knabbert. Hätte der Comic-Hase im 16. Jahrhundert gelebt, wäre das normal gewesen.... '(你敢有法度想像漫画 ê 兔仔喙咬 ê 菜頭是紫色，不過這个畫面 tī 16 世紀是四常代) ê 見笑代，總是人攏愛經過落(lak)臉 tsiah 有法度換新面肉 --- 胡蘿蔔為什麼多數都是橘色的？傳說跟荷蘭皇室有關？

我自本就愛食紅菜頭，總是我認捌 ê 紅菜頭 m̄ 是煮 Kari 就是荷蘭豆遮 ê 配角，準做伊無較俗，像皇宮菜、菠薐仔、蕹菜遮 ê 捷是死豬仔價，三把 100 抑是 50 按呢賣，伊猶原是我上愛 ê 菜蔬佮果汁，準做 tsuē-tsuē 人嫌紅菜頭汁䆀味。

我愛食 ê 菜蔬自捷到德國行灶跤，伊 mā 綴往過癮甲無去食 ē 著蛆 ê「龐德羅莎」 仝款攏成做食甲 ē 綴 Olga 成做波蘭佮波羅的海 ê 阿菇。

(2024.01.26 韭蔥尖頭草花ひき肉滷 + 紅米糙米飯 + 秮仔燕麥 Quark/899kcal)

四常無 teh 要意膩瓤 ê 我步頻認真糋膩瓤兼認真寫炸(tsuànn)油日誌上主要 ê 起因是，當翁踅轉去𪜶爸母 ê 世界，我有一份資料通 hōo 伊做參考。

是講，我 mā 需要這份資料，準做我本底就有這个慣勢 kā 需要時間完成 ê 事項記錄 tī 紙本，總是樹 ē 大欉我 ê 記持 mā-ē buē 閣沿途吟唱「望你早歸」沿途收集你竹筏回航的引擎聲(記持開始食餌◎柯柏榮)。

翁爸母 ê 故事，品過 buē 閣餾就愛熥祖先交代 ê 未娶某 m̄ 通笑人囝枵。

兔仔年兜到今龍年新正，翁認定這久 ê 伊 m̄ 管按怎食甜食鹹攏 buē 破 72 公斤，sóo-tí 就做阿母 ê 乖囝順阿母交代「Weihnachtskalorien zählen nicht!」(聖誕節免減肥)食老母按北爿寄落來 ê 愛心佮伊講這攏是 90% 家己款 ê tsioo-kóo-lè-tòo。

我 m̄ 知影膩瓤需要偌 tsuē 時間 tsiah 有法度 tī 身軀起樓仔厝，總是我清楚知影今仔日無控制枵饞，明仔載隨膨風，磅仔一屑仔攏 buē hōo 我食一下仔秤頭。

伊自聖誕節進前收到阿母 ê 愛，逐日楔喙空 ê 照我所知影 ê 𪜶阿母透世人 m̄ 捌換過 ê 食譜來掠熱量，一塊佮豆乾 bueh 相仝大 ê 餅比過一碗飯 280kcal 按呢食，二月底伊開始問我敢有其他 ê 方式 ē-tàng tshan-tshiūnn 這久按呢三頓正常又閣逐項攏通食 m̄-koh buē 起磅 ê 油食秤頭方式。

(2024.01.25 早起頓 芹菜頭番薯烘 + 卵包 + 魚指 + 北蔥搵醬 + 秮仔優格/961kcal)

凡勢捷揣冊 sóo-pái Google 紹介我讀為何有錢人大多讀紙本書？書可以提升你的這項致富能力，影片、Podcast做不到，文章讀煞，我有一種「學英語 hōo 你變好額」ê 感覺，是講讀書 tī 咱 ê 文化，應當講 tī tsuē-tsuē 文化內底本底就設定 tī hōo 你成做頭人，準做是有啥物大志向像「平等」押尾 mā 是階級 ê 表現。

我按呢講較偏激，總是這是我個人 ê 感受，我 m̄ 捌因為讀書成做好額人抑是頭人，我 mā 好字運無 Pech gehabt 沐著打馬膠歹運出世 tī 阿爾巴尼亞、古巴遮 ê 字捌 tsuē 煞紮來凶年、散(sàn)凶遮 ê 腹肚若水櫃，胸坎若樓梯(獨裁者的廚師) mā 幸運無經過 ' 美麗鄉 Pú-á 寮「總統案」(鄉史補記◎陳雷) ' 抑是《來自清水的孩子》蔡焜霖前輩(Ruhe in Frieden)𪜶彼个年間 ，不過我個人確實是較佮意紙本冊無愛倚電 ê 電子冊，是按怎有這个癖，我家己 mā 捎無摠，總是我就是無法度過淘寶四常，我需要踅街仔揣寶。

《獨裁者的廚師》

《鄉史補記》

《來自清水的孩子》

(2024.01.23 にんじん芹菜頭雞肉カレー + 糙米飯 + 秮仔麥角優格/932kcal)

翁問明仔載 ê 早起頓咱 bueh 食啥？

我答猶原 tī 路--lih。

「攏好食，只要你做 ê 攏好食」話猶未落地伊隨反悔，起因芹菜頭直透佮伊翁某牽電線「你敢 bueh 煮這粒」伊 tshan-tshiūnn 想 bueh 離緣，某煞 m̄ 放伊煞 ê 苦情男子請教律師。 

「我確實 tī 揣芹菜頭 ê 食譜」我成做你若升級納鐘點費，我就 hōo 你正確答案 ê 假公益律師。

「無試 m̄ 知滋味，準做試過 mā buē-tàng 掠伊 buē 按䆀鴨咪仔成做天鵝」翁若看彼粒 tuì 我來講媠甲若楊貴妃，tuì 伊卻是真僫循圖想王昭君是美女 ê 芹菜頭。

論真講我真愛食芹菜頭，總是我食 ê 芹菜頭是 Suppengrün a.k.a 湯料菜蔬(Suppengemüse) ê 一小橛，sòo-pái m̄ 捌感受翁分張 ê「氣味」顛倒認為芹菜頭足好食，而且揣著 ê 資料攏講伊 tuì 身體真好，特別是伊 100g/27kcal 含水碳素 100g/2g 助消化又閣若鳥鼠肉無油脂是「食油秤頭糋膩瓤」ê 好跤手，精油飽滇 ê 伊 tuì 平穩情緒佮解酶(muî)有真大 ê 幫贊，像胃𠢕張𠢕起性地 ê 歹腹肚，敆有苦味 ê 伊 tuì 溢刺酸 mā 有相𫝛 ê 應效閣助消化，尤其是伊 ê 二級植物物質 - Apiin(芹菜苷/kam) tuì 改癀(hông)有真大 ê 作用。有厚厚纖維 ê 伊除了助消化 mā 治枵燥掠外,伊閣有厚厚 ê 鉀、鈣(kài)佮 tuì 降低 Parkinson's disease 風險 ê 類黃酮(tâng)、抗凝血 ê 維生素 K，除了以上 ê 紹介，伊猶閣有防癌、改善糖尿帶來 ê 無快活佮對抗少年老 ê 芹菜素 --- Knollensellerie – mehr als nur Suppengemüse。

Tī 臺灣 m̄ 捌食過芹菜頭，tī 德國 kan-na 食過無夠伊1/8 ê 湯料菜蔬，我一直掠做翁講 ê 芹菜味是 teh 講まんが，畢竟伊是 Naschkatze 致著甜路災 ê 人 m̄ 是「食菜人」，sóo-tí 伊分張 ê 菜蔬感想愛拍3折。

(2024.03.04 早起頓 䆀豆雞肉チーズ滷 + 糙米飯 + 優格/1006kcal)

德文䆀豆食譜無 tsuē 就請教英文食譜，無疑悟英文食譜 mā 是少甲 hōo 我又閣想 bueh 熥這句話按《驚驚袂著等》學來 ê 句，只不過這斗 kā 伊換軀新衫「䆀豆遮爾無人緣」，正經無滾耍笑 tī 這个英文窒倒街 ê 年間，德文佮英文 ê 䆀豆食譜平均起來，無夠疊(thia̍p)一个 20 尺 ê 無施捨。

雖罔按呢生，踅英文櫥窗猶是較有機會搪著 Muse，畢竟英文佮人敆線 ê 歷史比德文較久長，準做腹腸無德文遐爾仔闊閬閬猶是大目孔 hōo 鰮仔魚成做三文魚，像印度四常食食カレー tī 世界猶未成做啥物攏無啥稀奇 ê 年間，伊是印度人 ê 鰮仔魚，咱臺灣人 ê 三文魚。

是講，正經愛褒唆英國，我這个讀無 Hindī ê 青盲牛透過英國網頁捷捷搪著好食 ê 印度佮四爿厝邊料理。

凡勢一斗愛款雙人食額兼人又閣蹛 tī 德國 ê 入人門，順人意 ê 性地，致使我較 buē 綿爛認定甚至成做天霸王要求 gún 翁愛跟綴我自本 ê 喙斗，顛倒反是循𪜶 ê 喙斗款三頓，只不過較按怎循猶是無法度循甲峇峇峇，像「深圳「油畫村」，複製「梵谷名作」妙手畫師卻一輩子身無分文」m̄ 管你 ê Vincent Willem van Gogh 較按怎循你猶原 m̄ 是伊，sóo-tí 我無法度百分之百成做德國人喙斗 kā チーズ、パン當做牽手按呢意愛，翁 mā 相仝，伊無法度成做臺灣人 ê 脾土 kā 豆油、珍珠奶茶鏨落萬丈深坑 ê 胃腸。

Gún 有家己綿死綿爛 ê 主張 mā 有放伴 ê 相疼痛，雖罔一寢開始故事 m̄ 是按呢搬，總是我 m̄ 是天霸王伊 ê 頭殼 mā m̄ 是 A-ta-mah-khòng-ku-lī ê 一遍賊，百世賊 ê buē 曉軁鑽，gún tsiah 有法度 kā 伊慣勢 ê 三斑擾家、蜈蜞咬蛤(kap)送出門，畢竟這款天落紅雨 ê 代誌是無可能 tī 我 ê 身軀發生，kā 食蒜仔吐蕗蕎當做是寶 ê 褒唆，我 ê 耳仔生兩葉，家己看 ē 著。

無人緣 ê 䆀豆按德文徙來英文猶是這三款較 tsuē 1. 炒豆油 2. カレー 3. 德文佮英文攏紹介伊是傳統土耳其料理 ê 䆀豆 Kam-má-tooh 燉，我 tuì 料理煠、燉(tūn)、燖、煮、㴘、𤉙遮 ê 料理手路 m̄ 捌一个芋仔番薯，總是第 3.  項 tuì 我來講較成𤉙，起因照教育部臺灣閩南語常用詞辭典 ê 紹介伊較峇「燉」無適合「𤉙」，不過成果攏是若「豬跤𤉙甲爛爛爛」ê 無合 gún-ê 喙斗。

(2024.03.02 早起頓 チーズひき肉白花仔菜 + 糙米飯 + 優格/1048kcal)

熥食譜 tsiah 想著家己捌使用 IG，熥食譜 mā tsiah 發覺 tsuē-tsuē 代誌 m̄ 是迒 buē 過，是家己想 bueh 放伊過抑是 m̄ ê 問題 niā-tiānn。

當初步頻想 bueh 綴 leh 使用 IG kan-ta uī-tio̍h 這件代誌，翁 tī 網路看著我 ê 䆀筆尾〔行尞ⒸⓏ行跤花〕行涼心世界 ⋯ 捷克第皮賽克 · Písek, Česko，彼陣 ê 我就 tshan-tshiūnn tsuē-tsuē 捏死 m̄ 放問題 ê 人𫝛款，開始研究是按怎人 ē 遮爾仔 m̄ 知見笑 mā 開始愖我愛按怎 tsiah 有法度證明彼个人 m̄ 是我本人，就是按呢 ê 食飽傷閒無事揣事 ê 無議量 hōo 我申請 IG 佮愛料理(I-Cook)。

總是我較按怎食飽傷閒 mā buē 綿精 tī 這个譀譀仔世界，尾手就 let it go kā 遮 ê 事項當做是褒唆，畢竟咱 ê 物若無夠好呔 ē hōo 人數想，敢 m̄ 是?

窒牢 ê 水管無到三日月就清甲通通通，IG 口座隨刣掉，愛料理自舊年 kā 申請取消口座到今 m̄ 捌成功，我 mā 貧惰閣請教 ê 據在伊，huînn-ti̍t 我清楚知影家己 buē 閣使用彼个口座 mā buē 回應任何按遐來 ê 請教。

這份食譜𫝛款是按 Keto 生酮食食遐看來，只不過2冬前 ê 彼時 kā Keto 掠做是出名人 ê 名，2冬後因為好玄 Keto 你到底是佗一位出名人 tsiah 知影原來伊是早前猶 tī 面冊捷看人 teh 分張 ê 生酮食食。

2冬前佮2冬後我猶原 m̄ 知我綴 leh 做 ê 食食敢有 Keto 總是我知影一个 Keto 有 tsuē-tsuē 面容通變化，像這2冬前 ê チーズひき肉白花仔菜我嫌伊面肉䆀想 bueh kā 伊仕上げ一个就上 Google 請大神伊閣一擺 kā Muse 送 hōo 我，大神 mā 聖甲隨 hōo 我一个𫝛款 ê Muse m̄-koh 枝骨比進前 ê 較幼路 mā 較好妝娗 ê Keto。

按呢講真鬍 ê 不仁，不過這就敢若記錄青花仔菜蘑菇ひき肉仝款，一个國家目前搪著啥物問題就 ē 綴 leh 出現相干 ê 議題。

(2024.02.28 早起頓 青花仔菜蘑菇ひき肉 + 糙米飯 + 優格/963kcal)

Google ê Podcast 沓沓仔徙來 YouTube 這个變化 tuì 頇顢揣 Podcast 來聽 ê 我是一个好現象，起因迵過這个變化我 tsiah 知影引𤆬我行入寫台語文世界 ê 黃越綏老師 mā 有出 Podcast《恁祖媽來了》真好聽，特別是這集EP481 黃越綏｜【名人專訪】發生在台灣首席災難記者身上的靈異事件 Feat. 眭澔平，真向望眭教授 ē-tàng 閣上一改節目，伊 ê 人生故事正經是蓋精彩。

是講是按怎 ē 講黃越綏老師是我 ê 台語文𤆬路雞，這愛按《黃越綏的意外人生》講起，讀這本冊進前我 m̄ 捌啥物號做台語詩 mā m̄ 知影台語窮實有字通寫文章，總是愈來愈無頭神 ê 我猶 ē 記持第一斗佮這本冊 tī 諾貝爾相拄搪 mā 讀有黃老師寫 ê 台語詩，我 ê 心池就開始發水泱(iann)想 bueh 綴老師我口我寫 tshan-tshiūnn 寫德文、英文、華文按呢，只不過這段路我有 kā 伊行有較久淡薄仔，總是我猶是感覺家己足幸運，有機會搪著黃老師 ê 台語詩 hōo 我知影台語 m̄ 是 kan-ta 人講 ê 口說文化，伊 mā ē-tàng 成做展風神 ê 神奇符號。

一个食譜記錄寫到遮爾仔遠 mā 是有意思，總是這是我 ê Blog，我寫遮 ê 代誌 mā 決定有伊 ê 因由。

因為 Google 沓沓仔 kā Podcast 徙來到 YouTube 無訂閱像《華視潮台》這款網路節目 ê 我 mā 因為 Google 業務調整有機會聽著閣較 tsuē ê 節目。

是，YouTube tuì 我來講上大 ê 功能 m̄ 是看影片是聽影片/音樂。

Tsa̋ng tī Google 圖庫揣食譜 YouTube mā 隨紹介 Keto 料理佮影片，是講 YouTube 是按怎直直紹介 Keto 食食，這个因由到今我 mā 捎無摠，總是 tī 這段使用英文揣圖 ê 期間，我發見 Keto 食譜 tī 英文世界真時行。

Keto 食食法 tī 英文食譜真好搪著 m̄ 知敢有受著「超磅文化」ê 影響，起因頂站仔看 Abnehmen, um zu überleben | ARD Doku 分張各國縮胃手術比例，其中美國 ê pha̋-siàn-tòo 就 tshan-tshiūnn 𪜶家己製作 ê My 600-lb Life 仝款 ê tsuē。

(2023.12.24 早起頓 德國尖頭草花ひき肉チーズ醬 + 糙米飯 + 優格/919kcal)

米 tī gún 兜本底是有市無路，起因雙人一雙箸 bueh 食無仝味 ê 我 buē uī-tio̍h 這塊肉幼仔雞卵糕來一斗煮兩鼎，我想這佮我本身無遮爾仔依賴(I-nāi)亞洲食食有關係。

是講，無這个症頭凡勢是德國 ê 食食環境 tuì 我來講窮實無遐爾仔白汫無味，除了魚臊掠外，遮 ê 魚臊正經 bué buē 落手，總是這个問題 tī 臺灣 mā 相𫝛，厝內有牛肉抑是挪威三文魚彼決定是價數落甲 hōo 我滿意，我 tsiah-ē 冇手。

Sóo-tí 德國 ê 食食慣勢 tuì 我來講 buē 無聊，除了較無機會食餐廳這項。

是講，蹛臺灣 mā 罕得食餐廳，起因食來食去攏彼幾項，家己料理若較成有變化。按呢講真臭煬，總是我正經是按呢想，tshan-tshiūnn 這尖頭草花家己煮就 m̄ 免固定 kan-ta ē-tàng 食豉鹹 ê 酸菜抑是豉酸 ê サラダ敆馬鈴薯按呢 ê 無變化。

(2023.12.03 早起頓 䆀豆番薑仔卵燥𫝻 + 秮仔飯 + 優格/1006kcal)

經過一段時間 ê 搜揣，總算 hōo gún 揣著仝一个城邦無仝城市願意開放 hōo 𫝛城邦無仝縣市 ê 民眾跨區域踮𪜶遐注肺炎疫苗，雖罔，一逝路愛2點外鐘。

不過，踮這个 tsuē-tsuē 人 buē-su tī 九份仔挖金礦 ê 時間，gún 有法度 tī 這个金礦愈挖愈少 ê 年間挖著礦閣較遠 mā 是愛出發。

起因有注有保庇，有注心情 mā 較 buē 纏綴新聞數字 ti 遐 leh 五時做藥，六時做石➀。 

按申請到報到，所有 ê 鋩鋩角角攏是 gún 翁 teh 處理。

我 kan-ta 出一支喙回答伊遵照申請單提問 ê 問題，sóo-tí 等到人誠實到遐我 tsiah 開始擘腹。

我 tuì 疫苗無搭嚇，m̄-koh 我煞沓沓仔因為德語愛按四常破豆 ê 蹛 tī tueh 晉級到醫學專用名詞開始頭眩目暗。

當我 teh 吐氣敨放 B1 程度 ê 德語猶有法度通過第三關敢有過敏問題遮 ê 醫學問題，第四關門一開我決定這斗 buaih 閣開喙講德語。

(2023.12.18 早起頓 ひき肉米蘭草花白醬滷 + 清飯 + 優格/904kcal)

 Tī《讀台語,學科學科學，讀台語 Tha̍k Tâi-gí, o̍h kho-ha̍k》讀著〈是按怎來美國生活了後定定予人大箍？Sī-án-tsuánn lâi Bí-kok sing-ua̍h liáu-āu tiānn-tiānn hōo-lâng tuā-khoo〉我笑甲邊仔 ê 人掠做我見著啥物好笑 ê 影片 mā 文文仔笑 kā 目神細膩徒來我遮䀐。

轉來到厝，裘仔猶未褪隨 tuì 佮手機仔黏相倚 ê 翁講「我揣著一年膨風 15 公斤 ê 因端，起因我是泰國族群。」

「你底時又閣透著泰國血統」目 m̄ 捌離開手機仔 ê 翁問。

「咱攏 m̄ 知影咱有透著偌 tsuē 血統，總是按科學研究我有綴著泰國族群 ê 跤步」我講。

「Die Ernährungs-Docs 又閣出新 ê 集數」翁問。

「講臺語 ê Die Ernährungs」我隨 kā 手機仔畫面分 hōo 伊看。 

「彼是美國人」翁隨講。

(2023.12.01 早起頓 菜擴雞肉麵法國焗 + Quark/1004kcal)

「你敢 ē 驚人已經行到耳順這坎站」 邀請 gún 做陣迒年 ê 主人家輕輕仔幌一下仔頭兼峇文仔笑講「buē，m̄-koh 我足驚健康無去」話 tsiah 濆出喙紅酒隨斟落 hōo 我想著李勤岸教授分張 tī《青春寫真》ê 心梗塞故事 。

2023 熱人，翁 ê 這位朋友佮李勤岸教授仝款，天猶未光心臟就 kā 伊喝醒，因為伊有食薰 mā 捷捷 tī 三更半暝 hōo 雄雄挨拶 ê 嗽舞甲失眠，伊就起床一个人坐踮客廳那看電視那食四秀仔配一杯紅酒等拆箬。

四常 tī 伊 teh 等拆箬，伊猶有法度因為紅酒佮四秀仔 kā 睏神(Sandmännchen)唌過來 hōo 伊閣小小仔瞇一下，這斗 m̄ 管伊按怎延睏神，睏神就是 m̄ 來相揣，顛倒 kā 疫病神(やくびょうがみ/Yakubyōgami)揣來佮伊做伙喝拳拚輸贏閣喝甲電公電母 mā 來摻一跤，伊 tsiah 發見閣按呢家己節脈 m̄ 免 tuì 家己講慢慢仔是，免驚惶，是直接上車往西方，隨錢包仔提 leh 按病院出發。

人一到病院急診室猶未開喙講病灶，護理師隨叫先生來，先生 mā 隨問胸坎敢有疼，伊應有，就隨 hőng 送去開刀，紲落來 uì 手腕(uánn)囥引導管。

Tī 伊 teh 蹛院 ê 期間，伊無講著伊有心梗塞 mā 無講伊裝幾支弓仔，總是當 gún 翁 kā 伊蹛院佮治療 ê 狀況講 hōo 我聽，我第一个想著就是心梗塞，起因按《醫師好辣》看來 ê 智識有講著查某人因為ホルモン得著心梗塞 ê 機會較無查埔人遐爾仔懸，m̄-koh 這無表示查某人 buē 有這个病症，特別是有食薰 ê 慣勢。

彼日聽翁朋友按呢應，我 m̄ 知影是伊 tuì 家己 ê 健康真有把握抑是認為德國外科真正 Nummer 1.，總是我正經認為無改變生活慣勢，認為 ê 健康猶是拚 buē 過無聲 ê 水崩山佮塗石流(liû)，Nummer 1. ê 醫療無病人 ê 配合 mā 是無較縒，特別是身體素質、日常生活攏中獎閣 m̄ 願改變。

彼暝，那聽遮 ê 德國朋友喙講行到這个歲頭健康比錢閣較重要，喙繼續食酒、食糋、食甜，我感謝家己無愛食酒 mā 無彼个慣勢愛綴日子過啥物生活，sóo-tí 當我需要治療齒岸發癀，齒科先生一聽我糖尿、高血壓、高血油、高血糖隨講「Sehr gut，我隨 kā 你請保險」。

(2023.11.28 早起頓 雙菜頭雞肉滷 + 清飯 + 卵包 + Quark/955kcal)

雪走，霜倚，霜行，雨來。

發穎 tī 見日 ē 驚，見雨 ē 笑番薯島 ê 我沓沓仔感受著 hőng 欣羨 m̄-koh 卻是選擇自我了斷 % 上懸 ê Suomi 人是按怎 ē 按呢做，起因我 mā 開始感受一種無法度控制 ê 悲傷。

彼 m̄ 是青春少女 ê 無愁揣愁，彼是一種你雄雄感覺活 tī 這个世間蓋無味無素 ê 是按怎閣 bueh 按呢蹽落去 ê 無奈何。

我無鬱症，總是好好仔一个人開始綴這款想法踅 hōo 我開始好玄敢誠實是「日頭」曝無夠？

餾猶記 ē 牢 ê 科學檢驗，看家己 ê 皮膚變化，熱人 ê 跤跡猶印 tī 保守地區，按呢我並無嚴重 ê 欠 Vitamin D，當然這是我家己做王祿仔仙 ê 答案，無科學證據，總是我 m̄ 是烏肉底 hōo D 揣無所在上車。

猶未看德國醫學衛教研究報導進前，我一直掠做日頭猛 ê 所在，遐 ê 人無欠 D，看煞 tsiah 知影 D 就佮紅外線相仝有伊 ê 雞仔目。

總是我 m̄ 知影紅外線敢誠實有雞仔目，總是讀過 ê 文章猶 ē 記得有人捌分張紅外線搪著像《青瓦厝 ê 安妮》ê 頭鬃色緻隨成做雞仔目，寫著這件代誌，我想著囡仔時總是欣羨歐洲人有一對藍甲若海洋 ê 目睭，有機會佮遮 ê 目睭色緻較淺 ê 朋友盤撋 tsiah 知影咱欣羨 ê 美麗是𪜶 ê 欠點，像咱討厭 ê 烏是伊欣羨 ê 媠。

(2023.12.10 早起頓 玫瑰草花ひき肉馬鈴薯泥 + 木瓜/962kcal)

近來無事揣事愖，愖朋友 ê 齷齪。

做一件代誌 ê 因由佮初心是 uī-tio̍h 得著榮華富貴抑是 kan-ta 想 bueh 分張家己 mā 意愛又閣感覺遮爾仔好 ê 代誌無 kā 伊食好鬥相報 buē 得。

若是 uī-tio̍h 榮華富貴無人 bueh 來咱 ê 角勢行踏確實是愛擘腹，若是簡單 ê 食好鬥機報，搪著無人要意應當 buē 遮爾仔艱苦敢 m̄ 是，甚至 buē 風火著抑是中氣 buē 敨。

思仔思，愖仔愖，我想著這件代誌。

你呔 ē 無 bueh 使用面冊，按呢咱是 bueh 按怎連絡？

咱有電話抑是 Email。

面冊較利便--lah。

(2023.11.26 早起頓 德國尖頭草花ひき肉馬鈴薯法國焗 + 優格/1120kcal)

網路世界 m̄ 免擘腹「文字」。

前一暝寫寒人食食全全草花，隔轉工 Google 就分張食草花佮紫頭菜遮 ê 愛覕塗 ê 菜蔬，mā 好，省得我愖是按怎 Ka-pi m̄ 知食幾杯，Muse 猶未來相揣 ê 問題。

2023.03.15

想 bueh 試驗家己 ê 文學程度 sóo-tí 起手翻譯手頭有 ê 德文冊，自決定試驗 ê 彼日開始到今 kan-ta 翻譯二頁，這久步頻想著伊 mā 是受著 bueh 揣存檔(tsûn-tòng)資料 tsiah 想著家己捌做過這件代誌。

我 m̄ 知這敢有合專家 ê 標準，總是我是感覺家己翻譯甲 buē 䆀。

只是，我 buē 想 bueh 繼續落去，畢竟這 m̄ 是我 ê 專業。

另外，當興趣成做工課這 m̄ 是敨放壓力 ê 方式，sòo-pái 我抑是莫無枷夯交椅，戇猴搬石頭。