亂皂𥴊仔店 ⓂⒺⒾⓃⓀⒾⓄⓈⓀ

(2024.03.10 早起頓 菜蔬ひき肉番薯飯 + 優格/1011kcal)

「比並是人 ê 本性，m̄-koh 悲傷拗鬱攏 buē-tàng 捎來楔一世人嫁一个翁，不二嫁(價)，日時搬布袋戲，暗時暗歌仔戲顧面子 ê 有量就有福。」

本底無 bueh 聽EP486 黃越綏｜【名人專訪】來自愛爾蘭的鐵粉 Feat. 蔡雅芬，畢竟人攏愛看籠面頭篩仔，不過我又閣愛做貓，押尾猶是揤落去無拍斷任何一分鐘。

雅芬 ê 外國人生，我這个佮伊𫝛款攏是外國人新婦 ê 人，聽著伊分張「伊第一斗起跤動手，我就拆白講，第二斗就 m̄ 免閣參詳」我隨笑出來，這个笑 m̄ 是取笑是一種我 mā 是這款態度 ê uī 伊佮我杯底無飼金魚 ê tchin-tchin。

我 tuì 現此時 ê 少年人按怎對待龍鳳生活無理解，總是國校六年 ê 我，身軀邊有太 tsuē kā 食鬱當做仙丹來練 ê 朋友，sóo-tí 當我聽雅芬按呢分張，我有一種驕傲，驕傲 gún-ê 勇敢佮獨立。

囡仔時阿母捷講「查某人 ē-tàng 無翁 buē-tàng 無岫」這久翻頭去想，阿母正經智慧飽滇，雖罔囡仔時捷感覺這就是無受教育 ê 人 ê 貪，這久理解 m̄ 是𪜶無受教育，是𪜶 ê 學習環境佮我無相仝，另外，人生智慧 m̄ 是影印課本就 ē-tàng 一帆(phâng)駛甲到 buē 落湳。

我佮翁 ê 犀牛照角冤家量債寫甲 ē-tàng 成做波蘭森林 ê 眾阿菇，所以 m̄ 免繼續熥清飯來食，總是我 mā 好玄，慣勢成做爸母鳼鴒掠做家己是囡仔和尚，有口無心按呢傳世佛經，踅踅唸，窮實是歹瓜厚子，歹人厚話愛死蛇諍做鱔魚 ê 翁現此時 ê 恬靜敢猶是承𪜶爸母 ê 魔王嫁查某囡，假鬼假怪，總是這是一个好現象，伊 ê 乞食揹葫蘆，假仙 hōo gún 得著德國有 80% ê 人 Magnesium/鎂(bí)乏(ha̍t)帶來 ê 平和。

講著鎂我正經愛講自伊綴著老母 ê 跤步 hőng 𠞭膽閣看著爸母 ê Beschwerden(病痛問題)，伊開始接受像 Hello 醫師分張 ê 食物，特別是豆、米糧、菜蔬遮 ê tī 𪜶兜 buē 出現 ê 食物，德國人四常食啥 ē-tàng 參考 Die Ernährungs-Docs - Essen als Medizin，自伊接受遮 ê buaih 遮 ê 慼，伊確實 buē 閣若吳大獅看 m̄ 是勢面，雙跤 áu leh，tī 庄正身邊 tō 跪落。 Pa̍k 頭巾 ê 兄弟看盟主跪--落去,面向天,雙手伸長長 teh 拜，大家也 tuè 伊跪...(鄉史補記◎陳雷)按呢真𠢕気持ち交繃，我本底就無愛佮人捙盤 mā 愛平靜，自一日照鏡發見家己 mā 歹查埔厚同(tông)年，歹查埔厚姑姨，特別是這支喙愈來愈成𪜶小妹正剾金爍爍，倒剾一缺一缺，我隨 kā 佛祖點香會失禮兼頓手印 tī 香烌講「我 buē 閣一支日本剾刀攑 leh 四界倒剾。」

(2023.12.19 番薯薟肉醬 + 優格/999kcal)

第一擺見著 Chili con Carne 是 tī 16 台 ê 喝玲瓏。

彼陣我一直掠做這絕對無人 bueh bué，伊決定 ē hōo 古錐 ê 主持人 tuì 觀眾司奶講「害仔，今仔日 Feierabend 煞鼓來轉免賣」結果目猶未𥍉，走馬燈 ê 數字按 300 包走到無賰半包 hōo 我下頦落到塗跤，開始成做一隻貓是按怎伊 ē 賣甲遮爾仔好。

 不過，彼陣 ê 我是按呢認為，bué ê 族群 m̄ 是德國人，是𪜶 ê 厝邊奧地利人、盧森堡、瑞士遮 ê mā 講德語 ê 族群。

德國喝玲瓏台 m̄ 是 kan-ta 賣德國 mā 賣厝邊 ê 物，而且市草好甲連波蘭 mā 綴 leh 來叫花、洗花、卡花、收 花➀。

我 m̄ 知影臺灣有偌 tsuē 物理仔台，總是 gún 兜見 ē 著 ê 喝玲瓏就有五台。

我 ê 街仔路德語大多數 mā 按遮學來，特別是奧地利人叫花 ê 德語佮腔口。

我愛食花豆，總是食過德國人款 ê 花豆，我 mā 綴德國人開始 tuì 花豆喙白甲 ne ne ne buē 食、buē 食、buē-tàng 食。

(2023.05.03 早起頓 菜蔬番薯盤 + 花飛 + 莓仔優格/1040kcal)

你敢 ē uī-tio̍h 一項你無動著 m̄-koh 伊煞自動消失 ê 代誌掠狂心悶？

向時 ê 我誠𠢕 uī-tio̍h 這款代誌哭呻規半晡閣 ē 餾 buē 離，這久 buē 閣哭呻 mā buē 餾 hōo 我暢甲決定 bueh kā 這件代誌記錄落來。

起因這表示，我有 teh 進步 buē 閣 tuì 家己情緒叨撚𫝛時 mā 表示過了代 ê 代誌 tuì 我來講猶原重要 m̄-koh buē 閣敢若這句俗諺語未食五日節粽，破裘 m̄ 甘放。

我知影按呢鬥句真龜怪，總是我 m̄ 是田螺 buē 一直循舊 tsuā，語言 mā buē 較講 mā kan-ta 這个意思。

今仔日 2023.05.07 m̄ 知我 ê 電腦出了啥物代誌，我囥食食攝相 ê 檔案偷走厝走甲 hōo 我揣 buē 著伊。

往過我 ē 想辦法揣出兇手，揣無 ē 投天告地 buē-su 規个金庫 hőng 挖了了按呢艱苦。

這久凡勢是理解在生 m̄ 樂，死了 kā 鬼捾包袱➁，我無想 bueh 吩咐欲落柴➂哭呻衰䆀➃(Sue-bái)。

(2023.01.12 早起頓 煙腸生菜盤 + 番薯紫頭菜 + Kam-má-tooh 雞豆湯 + 寮仔醬 Tshì-sù/1089kcal)

「食著藥，青草一葉，食 m̄ 著藥，人參一石」

Tsa̋ng 按車頭轉來踅去 Aldi 揣寶，揣著佮往過按 ES，PT 來𫝛價數 m̄-koh 體格無 tshan-tshiūnn 這遐爾仔大龐(phiāng) ê 美國番薯隨 kā na̋i-lóng 袋挈出來 kā 伊貯 hōo 滇滇滇樂暢來轉。

轉到厝無偌久翁 mā 行到厝隨問暗頓 bueh 食啥。

「Das Abendessen ist noch unterwegs, aber das Frühstück ist schon da」(下昏飯猶原 tī 路頭，早起頓已經行跤到)我講。

「Was du kochst, alles ist lecker, nur bitte nicht mir sagen ～ tsò-sian」(你款 ê 料理攏好食，只要莫叫我做仙)伊笑應。

無人通佮我破台語我家己揣伴，雖罔我 ê 伴 kan-na ē 曉食飯佮做仙幾句仔簡單 ê 句，遮已經有夠消敨我 ê 病相思而且閣 buē 壓力若山遐爾仔大 -- 這 m̄ 是按呢講，你愛按呢講 tsiah 有台語味等等。

照實講，我講 ê 台語攏是按囝仔時講到大漢遮 ê 若 m̄ 是台語 ê 一部份，我 m̄ 知影啥物 tsiah 是台語 -- 哭呻結束。

(2023.01.11 早起頓 紅菜頭紅雞豆湯 + 番薯飯 + 菜擴雞肉 + 弓蕉時計果優格/989kcal)

翁寄若沙漠 ê Congee 出現 tī 𪜶 ê 電視台 ê 影片 hōo 我，隨 kā 揤 Play。

無揤無驚奇，一揤奇甲 m̄ 知影反應，總是每一个地區有家己 ê Exotisch。

M̄-koh 愛我照𪜶 ê 脾土按呢煮糜，我甘願成做 Hesse 筆尾內底彼个哭呻婦仁仁 kā 米煮甲若 Brei hōo 伊慼 ê 人。

不而過原仔愛講著生驚 mā m̄ 是一件歹代，起因伊 hōo 我想著阿母在生時看著就 ē 吼，吼 buaih 食 ê 番薯飯。

講著阿母 ê 番薯飯德國老輩 mā 有相𫝛見著隨吼 buaih 食 ê 番薯飯 -- 蚵仔菇。

這兩項我攏愛食。

歸結，我是好字運 ê 人。

(2022.11.05 早起頓  菜蔬番薯生菜盤 + 搵醬/582kcal + 甜路杯/209kcal)

踅超市看來 ê 食譜。

成品完成那食那感覺 tueh 怪怪隨揣海馬向望伊引𤆬我揣著答案。

泅仔泅...Also...我 buē 記得愛濫雞肉。

總是，這个無細膩 ê 結果 mā 是好食甲慣勢成做暴龍(Pō-liông)脾土 ê 翁自動要求 bueh 閣繼續成做劍龍(Kiàm-liông)。

另外，去2手市場(窮實 buē-tàng 講是2手市場，伊是專門 teh 收人往百年後厝內 ê 人無 bueh 挃 ê 物件)揣冊櫃，步頻想著德國人誠𠢕 bué mā 誠𠢕囤。

本成感覺無認真消費促進市場發達 ê 彼粒石頭隨徙位。

起因，我清楚知影家己 ê 需求。

(2022.10.27 早起頓 水牛 Tshì-sù 番薯生菜盤/871kcal)

大暑越轉身歇年節，交換手 hōo 立秋來出菜。

春夏秋冬四位總舖師，手路菜隨碗出。

青臊閣豐沛 ê 菜色 hōo 我無法度殘殘 kan-na 食一項菜。

月斜西貓霧仔光，我一人扞鼎灶佮天地萬物合唱四月望雨。

唱仔唱，目睭猶原 leh 沙微 ê 翁，m̄ 知 tī 底時來相伴。

看伊徛踮凝霜窗仔邊燒茶聊聊仔啉，宛然九月狗爁日懶屍閣滿足。

秋分挽 buē 回，寒露緊食認。

(2022.10.22 早起頓/783kcal  番薯簽佮酸クリーム搵醬)

我相信性命家己 ē 揣出路體重 mā 是。

自2月28磅仔 ê 數字出現51.9 to m̄ 捌閣出現低過 52 ê 數字。

這个過程 hōo 我誠齷齪，總是我 mā 誠清楚身體有伊家己 ê 決定我就隨緣。

10月21日出門三個月轉來 ê 第二工，gún 翁講三個月 kan-na tī 匈牙利磅過一改體重 m̄ 知影現此時 ê 冗剩(牛仔褲)敢是真 ê 冗隨磅體重喝講比出門前閣較減 2kg 左右。

聽伊按呢喝我 mā 足想 bueh 知影家己體重 ê 變化，因為本底囊 buē 落去 ê Tom Tailor tī 行跤花 ê 第三月日左右步頻囊入去而且閣冗冗一屑仔攏 buē penn-penn 隨綴 leh 徛起去磅仔頂。

夭壽骨，我 mā 減 2kg 外。

我 m̄ 知影這 2kg 敢是我 kā 體重放外外 ê 關係，總是我足清楚 tī 這段時間我 buē 因為一頓食甲傷 tsuē 隨禁嘴兩工 tshan-tshiūnn 少年時按呢苦毒家己，我猶原照起工來食逐日食2000kcal 左右。

(2022.12.01 早起頓 鱷梨仔番薯ひき肉炒 + 寮仔 Tshì-sù 娘仔瓜生菜盤 + 優格 de chocolate/877kcal)

今年 tī 德國看著美國掠外 ê 番薯 hōo 本底 tuì 番薯 kiōng-bueh 無興趣 ê 我，目睭開始金爍爍。

按埃及來 ê 番薯，細粒子 m̄-koh 誠甜足合味。

按葡萄牙來 ê 番薯外皮滑溜，若是小可仔無 kā 斟酌繩會掠做伊是柑仔色 ê 「豆仔薯」。

葡萄牙番薯 ê 外形雖罔無 tshan-tshiūnn 美國按呢遐大欉 mā 無 tshan-tshiūnn 埃及按呢遐細粒子，總是 mā 是甜甲足合我 ê 喙斗。

這擺踮超市看著按西班牙來 ê 番薯隨請教翁，細漢蹛踮西班牙 ê 你敢捌食過番薯？

「M̄ 捌，這番薯應當是這幾冬 tsiah 出現 tshan-tshiūnn 鱷梨仔」。

聽伊按呢分張，本底就有 ê 驚惶愈驚惶。

(2023.03.23 早起頓  番薯雞肉 + 圓茄烘 + 果子優格/1066kcal)

簡單好味素！

紫色 ê 字辭攏是按公視台語台辭庫網讀著 ê 新辭。

「優格」本底是寫「Yogur」，這是按 gún 二姊遐學來--ê，Yogur 是西班牙語，我想 bueh 保留這个講法，總是臺灣有家己 ê 講法，按呢我就照咱家己 ê 講法記錄，畢竟加一个語辭，加一个音階。

有新辭，免家己愖，蓋幸福。

(2022.12.21 早起頓 鱷梨仔番薯烘 + Bombay 醬 + 林檎兔仔耳生菜盤 + 青豆仁湯/1021kcal)

這站仔翁某做陣減肥步頻想著彼位交往 bueh 九冬 ê 初戀男朋友。

這位無緣 ê 過路人一出現，我好玄目一𥍉 ê 20 外冬是按怎又閣數念伊。

畢竟伊 tī 我 ê 世界已經霧甲若無見花逝 ê 車輪。

想仔想，愖仔愖，想著我這世人險險 kā 家己餓到致病著是伊 ê 這句話「你大箍甲 hōo 我𤆬 buē 出門....」

這久聽這句無感覺，總是彼陣 ê 我正青春正黑貓姊 buē 堪得 hőng 按呢呵咾隨甲家己變做仙敕空氣著會活 ê 仙。

活跳跳 ê 腦筋一屑仔攏 buê 輾一下，我 tsiah 46公斤是大箍到佗位去。

不過這就是人生，少年若無一擺戇，人生呔精光。

(2023.02.17 早起頓 Poulet à la Basquaise + 雙薯玫瑰草花/928kcal)

早起頓聽翁褒唆我 ê 手藝想著作家劉靜娟女仕《驚驚袂著等》ê〈番薯遮爾仔無人緣〉mā 隨想著彼日 tī Aldi 搪著 ê 趣味。

「番薯敢誠實遮爾仔好味素」一位按非洲來 ê 朋友看我揀伊食甲厭𤺪番薯揀甲遮認真 tìm 一下仔頭挨拶笑問，這个笑容佮問句 hōo 我想著按 Togo 來德國做穡 ê 阿麗搪著人建議伊「肉 m̄ 通食傷 tsuē」伊 ê 標準回答「你敢知影肉 tī 非洲 m̄ 是鞏金是金仔？」

咱攏慣勢提家己 ê 角度來看別人 ê 世界 mā 好玄咱慣勢 ê 料小是按怎成做別人 ê 特殊。

按番薯島來 ê 我 tuì 番薯 ê 感情就敢若翁 tuì 馬鈴薯 ê 目尾免徙 mā 看 ē 著伊 ê 料小少缺，總是這久 m̄ 是彼久，我 ê 料小少缺成做鞏金物，翁 ê 料小少缺猶原是窒倒街 ê 飽滇 hōo 我見著番薯 mā 成做攑香對綴 ê 人，無綴人 bué buē-tàng，特別是落價。

「你知影番薯 tī 臺灣就 tshan-tshiūnn 你 ê 白草花遐爾仔少缺 ê 無人緣，m̄-koh 自出名人 kā 伊當做保健食品來食，伊隨按吳郭魚成做臺灣鯛按呢身價反幾仔倍，恁德國決定有食著 gún-ê 喙瀾」我刁意故講。

「真有可能」翁笑應。

無人緣 ê 番薯是按怎按塗炭仔成做皇后，這窮實 mā 無啥特別，就請𠢕講話 ê 人出一支喙一直餾一直餾 tshan-tshiūnn 臺灣 ê《57健康同學會》，我 m̄ 是講《57健康同學會》kan-ta 出一支喙，我只是比喻 tsuē-tsuē hőng 認定是舊漚舊臭 ê 物，迵過專業者 ê 分張 hōo 咱有機會重(tiông)新認捌老朋友，這是一件真好 ê 代誌，只不過遮 ê 智識捷捷成做咱家己 ê 王祿仔仙，咱 kan-ta bueh 聽家己佮意 ê 物佮合社會溫度 ê 事項。

(2022.12.10 早起頓 番薯煙腸炒 + Mozzarella 瓜仔哖番麥生菜盤 + 洋刺波弓蕉優格/1050kcal)

無日 m̄ 知晝，無鬚 m̄ 知老。

雖罔，歲頭一直纏綴時間沓沓仔 tī 向前行，m̄-koh 記持煞 m̄ 捌纏綴歲頭向行前，tsuē-tsuē 代誌定定是一耳空入，一耳空出 hōo 家己無法得 iōng 這款態度「時到時擔當，無米 tsiah 煮番薯湯」來處理代誌，起因現此時 ê 家己捷捷是騎牛揣 m̄ 見牛。

一个物件 tsiah 拄用過--niā，後一秒著會揣甲心狂火著，氣怫怫、𧿳𧿳跳，sóo-tí，我已經清楚知影家己有九月狗爁日，頇顢查某理 buē 直 ê 特性，趁這久記持 tsham 咱重重疊疊，緊 iōng 手刀 kā 伊寫落來。

故事1.

公寓 ê 外牆 bueh 二十冬 m̄ 捌換新衫，厝頭家媽佮油漆公司 kā 價數攏講定了後，油漆公司 ê 人專工來阮 ê 社區通知逐家，𪜶底時 bueh 來開工。

彼久，Daniel mā tī 厝，四常攏聽伊 tsham gún 遮 ê 厝邊 īng 通用德語(Hochdeutsch) 破豆，彼日聽伊應答油漆公司人員 ê 字句，連我這个外國人攏知影伊 īng Schwäbisch 應答。

(減肥早起頓 豐沛外氣早起頓。元氣早餐)

翁看著我這連蠓攏無興趣來行踏 ê 角勢開始有人來行踏隨問「敢有留話？」

「無」我應。

「你感覺是啥物因由 hōo 𪜶攏 無 bueh 留話」聲音猶末成做水滴滴落塗跤，伊就隨知影伊是擔柴入內山，加講。

起因𪜶某 ê 答案在水是這句「你愛請教遮 ê 生份人」 。

過了代 ê 代誌，無興趣狗咬鐵釘 m̄ 願放，起因我家己清楚知影我是按怎 bueh tī 遮泅。

簡單一句，緣份天註定，m̄ 是我喙𠢕講，筆𠢕寫。

我愛我 ê 閒到掠蝨母相咬 ê 日子。

(2022.12.31 早起頓 番薯沙焗 + 蘑菇雞肉糋 + 計時果優格/902kcal)

見若 tī「Überbacken」(德文) 佮「Gratin」(英文)，我攏 ē 想咱臺語愛按怎講。

請教 Allwissend 猶原捎無一个摠。

落尾踮《台語活辭典》讀著「鹹焗雞」這个我已經 buē 記得 ê 辭，隨綴 leh 唸喙內 ê 喙瀾 mā m̄ 知發生啥物代誌竟然綴 leh 津。

詞目	鹹焗雞
音讀	kiâm-ko̍k-ke/kiâm-ko̍k-kue
釋義	菜名。將鹽均勻舖在鍋底，再將雞整隻攤平在鹽上，蓋緊鍋子，用小火乾烤，待六分熟時翻面再烤。起鍋前，用蔥油沾嫩表皮再灑上胡椒粉即可。

資料來源：教育部台語字典

喙瀾津甲規桌頂 ê 我猶原 m̄ 知影華文 ê「焗烤」tī 臺語愛按怎講，總是我個人感覺「焗」這个辭 mā 誠適合「Gratin」。

(2023.03.21  早起頓  青花菜雞肉炒 + 番薯烘/1000kcal)

讀這條新聞，心足激動。

伊 hōo 我想著有白人血緣 ê 澳洲原住民朋友伊 ê 願望。

這个消息 tuìi 伊來講慢真 tsuē 冬，m̄-koh 一切就 tshan-tshiūnn 伊 ê 分張。

你堅持 ê 代誌有可能無機會結子 mā 有可能 m̄ 捌現在你 ê 眼前。

M̄-koh，信念就敢若一欉樹。

你無栽一欉，你 ê 心 m̄ 是成做渡鳥著是水薸。

Sóo-tí，請保持信心佮樂觀。

(減肥. Gewichtsabnahme 番薯沙餅。地瓜泥餅)

自由是麗倒 ê 物件，伊 m̄ 是每一个人攏 ē 提供/Freiheit ist ein Luxus den sich nicht jedermann leisten kann.

--- Karl Max

千年根 萬年藤

番薯毋驚落塗爛

只求枝葉代代湠

---郭雨新

(2023.04.30 早起頓 Feta 紅菜頭番薯 + 鱷梨仔木瓜雞肉 + 果子 Quark/903kcal)

時間沓沓仔倚 bueh 3個月，在在按山頂尾溜落山 ê 數字 tī 這月日步頻成做故鄉 ê 山，需要𬦰起𬦰落 hōo 我開始擘腹按呢 ê 食油秤頭窮其無應效。

總是人生行到這个歲數我 mā 學 ē 曉按怎佮窮實有 teh 振動 m̄-koh 看起來煞一屑(sap)仔攏無 teh 走 ê 時間鬥陣 --- 順自然 kā 家己成做一欉樹等大欉。

總是成做一欉樹我猶是人，我有若海湧 ê 情緒，sóo-tí 當我搪著秤仔 m̄ 食油秤頭我就囊彼領，我一直掠做伊拍 m̄ 見 ê 十冬前 ê 牛仔褲來安搭愈來愈無恬靜 ê 海湧。

頂月日尻川斗猶繃繃，這月日數字無啥物化煞勻勻仔閬縫，糋膩瓤這件代誌正經 mā 是 teh 佮 Mǹg-sǹg 比賽 tsiâ 較有定性。

Feta 紅菜頭番薯

...... 材料 ......

(2023.04.20 早起頓 番薯菜蔬飯 + 花飛烘 + 圓茄烘 + 王梨優格/1072kcal)

頂站仔食歹腹肚 ê 翁喙一支喙 m̄ 願噤原仔若鴨母喙遮叨遐食 ê 結果，就是開雙倍時間 hőng 𠞭 hőng 洗胃腸佮 m̄ 免閣 hōo 我「食菜、食菜，食 kah 肚臍為界」按呢剾。

這幾日，伊原仔無法度踅轉去四常 ê 食法，sóo-tí 我就 m̄ 免 uī-tio̍h 伊 ê 喙斗調整我 ê 食食。

是--lah，搪著兩人一雙箸 bueh 食無仝味，我就順伊 ê 脾土調整我 ê 部份。

Tshan-tshiūnn 我愛食飯配豆腐，伊愛食飯配絞肉，我就煮一鼎カレー抑是 Kam-má-tooh 醬來解決伊捷搪著 ê 重敧爿，一人主意，眾人跟綴。

今仔日伊那做牛那看我款 ê 食食講「我知影盤仔底無肉 tuì 你無影響，m̄-koh 你一个人食飯正經無半塊肉」。

看伊 buē-su 發見天大 ê 祕密，我無應話 kan-na 反白睚(kâinn) hōo 伊做參考。

「我後世人閣 bueh 佮你牽手」翁食著進前看人 teh 討論 ê「若有後世人恁敢 bueh 繼續成做龍鳳 」ê 話。

(2022.02.20 減肥早起頓 豐沛外氣早起頓。元氣早餐)

M̄ 知 tuì 底時開始，我 ê 身軀邊有 tsuē-tsuē 人分享英國早起頓蓋好食，好食甲 m̄ 捌試過是蓋可惜。

M̄ 知影是 m̄ 是受著這句「無食過蓋可惜」 ê 影響，我 tuì 英國早起頓有一種莫名 ê 期待。

不而過，這个期待 tuì 烏貓少女行到 bueh 到陽婆婆牽手 ê 歲數。

猶原 m̄ 捌行踏英國，猶原 m̄ 知影英國早起頓有偌爾仔好食甲無食過 ē 捶心肝閣 ē 趒跤蹔蹄 ê 感覺。

2019年，翁某做伙去 Malta 行跤花。

翁選一間專門服務英國遊客 ê 飯店。

伊講，這間飯店 ê 設備是專門 uī 英國遊客設計，食食 mā 是標準 ê 英國口味。