(2023.05.21 早起頓 蘆筍肉丸 + 鉛筆麵 + 林檎洋刺波優格/981kcal)
2024.05.05 Westpol - Die Luxus-Schleuser 報導猴穿衫做走水 ê 新聞 hōo 我想著阿度 ê 故事，𫝛時想著 tsuē-tsuē 臺灣人一聽著 gún 翁是德國人隨認定我因為這个德國翁婿 mā 綴 leh 成做德國人 ê 故事
。
遮 ê 故事無啥物通好喋詳，不過新聞事件 ê Die Blaue Karte EU 拄好 ē-tàng hōo 捎出來熥。
提碗想阿貓 --- Tī Herceg Novi, Crna Gora 1.5€ bué ê 瓷仔碗
提碗想貓-- Restella Camp, Montenegro.
食 Kari 想殘殘脆脆拒絕 Blue Card ê 阿度。
碗是按 Budva, Montenegro bué--ê，一塊 1.5€。
Blog 寫 bueh 5 冬開始翻田塗整菜股 tsiah 發見看 buē 順眼 ê 落䈄(làu-ham)佮實䈄(tsa̍t-ham)，只要 kā Format 換做 Normal 就隨解決，有一種...總算 m̄ 免繼續食通血路 ê 藥仔 ê 快活。
十二月食菜頭，六月 tsiah 轉嗽窮實 mā buē 䆀，至少有掠著病灶。
自開始黜膩瓤油到今，寫 tsuē-tsuē 食譜 mā 掠定我決定 ē 逐篇攏刊出來。
料想 buē 到記錄食譜 mā 是哲學，後台 ê 食譜 m̄ 捌減少過，總是舊底 ê 齷齪火煞因為 uī-tio̍h bueh 記錄食譜那寫那來恬靜。
(2023.06.18 早起頓 五彩ひき肉焗 + 鱷梨仔檨仔 Quark + Tortellini + 優格/1316Kcal)
讀著這句我笑甲歪腰。
「老實說因為我朋友很少，觸及率很低，但我更懷疑直接分享影片的流量會更加低，所以還是自己來打一篇。」
Tī 我猶原猶未參加社團進前，我 ê 面冊世界真簡單 kan-ta 幾个家己 uì 高職熟似到今 ê 朋友。
起因面冊是 gún 遮 ê 四散 tī 無仝地區 ê 人上蓋利便 ê 聯絡方式。
總是利便 mā 𤆬來 tsuē-tsuē 齷齪火，tshan-tshiūnn 時不時著愛搜揣理由來挨推 tsham 咱連一塊肉攏 m̄ 捌做伙烘過 ê 朋友 ê 朋友 ê 邀請。
講著這件代誌 mā 是蓋有意思，我清楚知影 m̄ 免要意這款代誌，iáu-m̄-koh 我就是足愛 tuì 家己情緒叨撚。
今仔日 m̄ 知啥物因端 hōo 我有機會讀著這篇佮我無相交插 ê 文章，而且又閣拄好出現這段重點 hōo 我甲腹肚疼。
(2023.05.20 早起頓 Pizza Legumi + 冰海蝦果子生菜盤 + 王梨麥角 Quark/1056kcal)
天 uī-tio̍h 金烏佮月娘 ê 相逢沓沓仔點胭脂捊水粉 。
Gún 坐踮露台綴ラジオ ê 歌聲看一划做五划 ê 金烏沓沓仔划，看三步做一步緊緊仔走 ê 月娘 tī 柑透金 ê 軟晡遠遠仔相見。
Gún 講大暑，食王梨➀ mā 講小暑驚東風，大暑驚紅霞➁。
過幾日仔風颱 bueh 來矣，我那刣頂幾日仔阿羅分張 ê 鳳梨那講。
翁 tshan-tshiūnn 纏綴太陽餅 tī 踅 ê 鳥鼠，太陽餅賣到佗，伊就食到佗講「gún 遮講雨水若落無夠，大水風颱捲螺仔風連鞭到。」
誠實，歐洲 ê 熱人 lú 來 lú 像咱臺灣，只是體質猶未撨到有法得栽寡王梨、鱷梨仔...就使西班牙講按非洲飛地來 ê 鱷梨仔 mā 是 tī 歐洲栽歐洲出產，歐洲 ê 熱 tshan-tshiūnn 日本想 bueh 栽橄欖樹，總是橄欖樹 ê 體質猶未調整甲有通撇一線。
我那刣王梨話 mā 那講甲 buē-su 家己是翻天割角廖添丁遐爾仔恬卒卒 hōo 翁行入來問「我耳仔成做大象原仔聽 buē 著你 teh 講啥隨窒一喙王梨「酸...」。
(2022.12.12 青花仔菜雞豆 + 魚指 + 塗肉林檎羮湯 + 弓蕉藍莓優格/961kcal)
文學是啥物？
M̄ 捌字智識低路 ê 我 m̄ 知。
M̄-koh，我知影當你攑著權勢 ê 拐仔，m̄ 管你講寡 lua̋-nī 無營養，伊猶原是上有營養 ê 物件。
我無向望家己是文學家 mā 無向望「文字」ē-tàng 𤆬 hōo 我名佮利，sóo-tí 拚勢寫。
我寫字 kan-na 因為伊是我 ê 興趣，tshan-tshiūnn 有 ê 人愛成做放送頭開喙按呢簡單。
(2022.12.19 早起頓 林檎ひき肉 Kari + 德國馬鈴薯丸仔 + 林檎青花仔菜生菜盤 + 弓蕉林檎鱷梨仔優格/1014kcal)
塗內佮塗頂 ê 林檎正當時。
Buē 曉法語 ti 法國點菜，有一斗看著 ＂Pomme ＂ 掠做是我 bueh 食 ê 物隨 kā 點落去。物件送來我規个人黑人問號，是按怎 ē 是甜路，想 bueh 請教餐廳一想著家己 ê 法語 kan-na ē 曉𠢕早/Bonjour，你好/Salut，多謝/Merci beaucoup... 就隨放棄請教，mā 清楚知影請教 mā 是白了工 ê 揣火來燒烙家己，sóo-tí m̄ 免無枷夯交椅。
按法國轉來到德國隨 kā 翁講這件代誌敨鬱卒。
「你知影遐是法國 m̄ 是德國，你 mā 知影 gún 攏按仝一个系統學習書寫，著 m̄」伊那講那笑甲目汁拭 buē 離 hōo 我隨知這決定有貓膩。
「我知影恁兄弟 buē 合 ê 仝款無仝師傅」我目睭沙微仔沙微 kā 相。
「法語 ê 蘋果號做 Pomme，馬鈴薯號做 Pomme de terre，德語 ê 法國糋號做 Pommes，林檎 ê 通用德語號做 Apfel 咱蹛 ê 遮 ē 講 Erdapfel(塗內 ê Lìn-gòo)，Pommes 減一个 S 是法國人 m̄ 是德國人 」伊笑講。
「正經，是按呢」我應。
#記錄寫 tī IG ê 文字
(2022.12.08 早起頓 ひき肉白菜滷 + 清飯 + 弓蕉王梨優格/901kcal)
見若料理カレー蘑菇攏 ē 想著 tī Bad Cannstatt 印度餐廳印度太太 ê 笑容「Gún 翁印度人伊 mā 無食薟」。世事 m̄ 是 kan-na 一款生張，gún 攏學著尊重別人 ê 死板免掛意，因為雞是討食焦，鴨是討食澹按呢簡單。
# 記錄寫 tī IG ê 文字
這是近來踅公視台語台辭庫網新辭 ê 想法。
(2022.12.06 早起頓 ひき肉蘑菇雞豆飯 + 菜擴白醬湯 + 鱷梨仔藍莓 Topfen/661kcal)
每一个人有家己 ê 滋味。
Tī Slovenská 料理雞豆一个5歲 ê 囡仔走過來講「我愛食雞豆」過無一睏仔哥哥來講 gún ma-ma 捷捷煮雞豆足好食，過無偌久 ma-ma 來破豆，這个畫面 hōo 我記牢牢，起因 tī 這个甘願佮手機仔盤撋 mā buaih 佮人接接 ê 年間這款交流誠實是提金仔來換攏無應效 ê 無價之寶。
# 記錄寫 tī IG ê 文字
(2022.12.14 早起頓 捲心白酸滷 + 敏豆ひき肉炒 + 弓蕉 Topfen + 清飯/849kcal)
𪜶是敵人，m̄-koh 我猶原愛敵人
聽著翁 iōng 台語 ê 「Die」來造我 tuì 伊喙白不滿 ê 副本，除了笑甲軟骨 mā 甜粅粅。
# 記錄寫 tī IG ê 文字
弓蕉 Topfen
...... 材料 ......
(19.11.2022 早起頓 水蜜桃俗麭 + 煙腸青豆仁湯 + 洋刺波鱷梨仔 Quark/1008kcal)
踅這間店我並 m̄ 知影𪜶是專門收人過往囝孫無 bueh 挃𪜶寶貝 ê 店。
起因，德國有呔 tsuē 這款物仔看起來攏齊新 m̄-koh 已經是2手貨 ê 店。
一日翁綴我聽 SWR1 ê Podcast 講著現此時 ê 衫店，因為半年就愛出一批新衫致到頂一批貨底猶有 tsuē-tsuē 寸尺著愛 hőng 拍掉做2手貨，伊隨喝一聲 mā kā 抄來 ê 地址提 hōo 我看「我一直想 bueh 招你做陣踅這間店。」
「啥物店？」我問。
「聽人分張講，伊若 Costco ê 賊仔市」伊講。
「賊仔市閣較慢牛厚屎尿 mā bueh 去」我隨 tìm 頭應好。
出發彼一日 m̄ 知是腹肚貯甲傷飽滇抑是甜路正經有食較 tsuē 寡，規逝高速公路我竟然想 bueh 掠兔仔。
(2022.11.22 早起頓 王梨洋刺波米芳優格 + 蒜芳 I-tá-lih 麵 + 玫瑰草花雞肉炒/838kcal)
雲尪走去耍掩咯雞。
金烏 kā 伊 uì 北風遐 bué 來 ê 新衫穿出來品並。
我那款早起頓那看金烏敢 bueh kā 新衫 haînn hōo 北風。
那撋麵粞那聽ラジオ放送 ê 聲音。
青 tiānn 白 tiānn 一聲 óonn-óonn 響 ê 聲音迵過窗仔縫軁入來厝內。
窗仔門拍 hōo 開，一粒頭敢若暗光鳥遮踅遐轉，押尾注目 tī 彼台 m̄ 知底時 tsiah bueh 出發 ê 露營車。
Óonn-óonn 一粒頭又閣綴 leh 踅，ah~市政府已經來收潘按呢較停仔 ē-tàng kā 桶仔收轉來囥。
(2022.11.01 早起頓 水蜜桃麥角缽/255kcal)
當奢華成做湳塗 ê 慣性，
當慣性成做湳塗 ê 好玄，
四常是花 lo̍k-lo̍k ê 虹抑是九層酒漏仔。
In Essen veritas 食食有真相，
Die Wahrheit hat Gedanken 真相有數念。
我愛你想你，
Tshan-tshiūnn 紅霞軁過雲尪搜揣夸父 ê 頭鬃。
(2022.12.25 早起頓 番薯兔仔耳卵生菜盤 + ひき肉白菜焗 + 藍莓檨仔優格/952kcal)
這个世界蓋有意思，假--ê 成做真--ê 四界賴賴趖，真--ê 煞成做墓壙內底喝 buē 出聲 ê 蔭屍，總是成做蔭屍又閣 hőng 割舌 ê 印何闐 ē uì 墓壙行出來，咱人 mā 是。
早前踅唸看無家己 ê Blog，這久 m̄ 知啥物因端 hōo 我一𫝻隨看著家己，只不過活到這个歲數我真好玄 gún 阿母當時「抱」兩个我出來？
總是，我真清楚阿母無雙生仔我 mā 是 sóo-tí m̄ 免夯枷去考究。
Tshan-tshiūnn tī 希臘 bué 鉸刀，我看著 tsham 德國一模一樣 ê 雙生仔我 mā 知影彼 m̄ 是按德國 Solingen 來 ê 彼對雙生仔。
起因，一般無啥病痛 tshan-tshiūnn 老倒退 ê 人，無人 ē kā 家己 ê 名寫 m̄ 著掠外 mā buē 烏白寫家己 ê 家甲。
感謝 tsa̋ng ê 無張持，因為伊引𤆬我按罩霧行出來。
雖罔我看伊看甲足扴目，我 mā buē 閣綿精往過那看喙那詬唸「呔有人 ē 遮爾仔 buē 見 buē 笑」，這久 ê 我 kan-na ē 徛踮門口埕瞭就隨斡頭去別搭行踏。
(2022.10.31 早起頓 洋刺波優格/199kcal)
Tī Balkans 看著一四界 ê Pan con manteca y azúcar gún 翁遙念 ES 日子，我想著囡仔時上無敆脾土 ê 麭。
伊想 bueh hōo 某感受 Pan ê 好滋味骨力揣資料原仔是火燒罟寮，無網(望) ，不而過彼久踅網路 ê 跤跡成做番薯 kah 月桃掖落塗 ê Pan 引𤆬 gún 行向閣較豐沛 ê 生活。
這原仔是按 Pinterest 看來 ê 圖原仔 m̄ 知伊誠實 ê 滋味，總--是家己照圖變一份來食有一種 buē-su 家己是 Sherlock Holmes 佮 Arsène Lupin ê 膨風。
另外，見寫著「刺莓仔」就 ē 想著讀過 ê 這段話「較無法度成做大貨色 ê 青瓦厝 ê 安妮」。
我 m̄ 是文青高智識份子，我 tuì 啥物款 ê 書(文青愛講書 buē-tàng 講冊)佮作品 tsiah 有法度成做大貨色無彼个才調指指揬揬講東講西，總是我誠愛《青瓦厝 ê 安妮》。
《青瓦厝 ê 安妮》
(2022.10.28 早起頓 洋刺波早起頓 + 青花仔菜雞肉麵/855kcal)
青盲 牛 m̄ 驚生驚
Tī 愛料理寫這篇食譜想著這篇隨捎出來改，起因車日子 ê 彼段時間 kan-ta tī 奧地利讀較有目睭看著 ê 文字賰 ê 齊齊是 m̄ 捌字看告示，總是我 mā buē uī-tio̍h 這款代誌 tī 遐 m̄ 捌戲文，大氣捎咧歕，起因 Google 窒倒街，靜候我去踅。
2020.05.22
這久越頭轉去看彼久 īng 青盲牛 m̄ 驚生驚 ê 態度讀作者分享 ê 食譜正經愛 kā 家己拍噗仔，因由看無字就請教字典教咱字 buē m̄ 捌字，看告示，我想這佮我無想 bueh 迵過寫食譜得著啥物蓋有關係。
雖罔，我確實捷捷 hōo 生份人講甲憢疑家己寫字正經是有目的，不而過，m̄ 管我按怎綿精綴𪜶踅金龜磨我猶是 A-ta-mah-khòng-ku-lì、頇顢閣小面神 ê 性地 m̄-koh 知影愛按怎敨繚索，sòo-pái 時間一過我就 buē 閣繼續佮遮 ê 五四三膏膏纏。
雖罔，我 ê 德語到今猶原 tī 路頭 hōo 做出來 ê パン抑是食物捷捷出箠，Iáu-m̄-koh 遮 ê 一切猶原比硬 bueh 成做十个臭頭，九個破豆 m̄ 捌假捌閣較好。
(2022.10.26 早起頓 洋刺波寮仔 Tshì-sù)
本底無想 bueh 閣踮愛料理(I-cook)寫寡啥，起因我又閣想著我無納錢 hōo 人。
我知影 bueh 解決這个問題真簡單 --- 納錢成做 V.I.P 問題著 ē 解決，總是我就是迒 buē 過這个崁 --- 我啥物冊攏想 bueh bué kan-ta 菜譜冊抉 buē 落手，簡單一句，隨人有隨人 ê 脾土佮問題，清楚家己 ê 問題並解決問題比綿精綴問題踅金龜磨閣較重要，雖罔到今我猶未揣著合家己 ê 解決方法，總是我 mā tī 挐氅氅閣拍規毬 ê 膨紗球內底揣著摠。
現此時 ê 我是按怎愖家己 ê 問題，愛料理是無感情 ê 文字記錄，遮是有家己認真揣問題、愖問題、討論問題 ê 文字記錄，這久就先按呢，未來 ê 毋知就交 hōo 未來去處理。
𫝛款，紫色 ê 字辭攏是按公視台語台辭庫網讀著 ê 新辭。
(減肥早起頓 草莓麥角優格。草莓玉米麥片優格)
搪著一位 uì 早起頓著開始喙白到下昏飯 ê 人，你 ē 按怎處埋？
氣身惱命搬死人債 ā-sī 生頭清面訕削對方 m̄-bat 貨。
頂頭兩戲齣，我 tsit 个厚性地 ê 人 lóng bat 搬過 hōo gún 翁看過。
Iáu-m̄-koh tsit 種戲齣，伊自囡仔時看到大漢。
致到，伊 ê 耳空 tuì 牛聲馬喉已經 kài 慣勢，慣勢 kah 伊聽著聲音噪耳，伊 ê 耳空 ē 自動 tsiânn-tsò 貝多芬。
面對伊 tsit 款態度，寢開始我是認為伊是好性地。
落尾手有機會 hām 伊 ê 父母做伙食飯，我 tsiah 透底理解 gún 翁是按怎人 buē 老著已經食老耳空重 ê 因端。
冊 ▪ Bücher ▪ Books (4) 露營 ▪ Camping (18) 行跤花 ▪ Ausflug ▪ Field Trip (3) 掠肥食譜 ▪ Rezept ▪ Recipe (20) 板膋收冬寫真 ▪ Ergebnisse der Gewichtsabnahme ▪ Weight Loss Results (1) 行尞錄 ▪ Aufsatz ▪ Eassy (1) 翁拋荒 ê 日誌 ▪ M's Blog (1) 電台 教學網站 閱讀天地 Podcasts 台客雙語輸入法 台客德日辭典 電視 其他工具 咱 ê 䆀筆尾 
