亂皂𥴊仔店 ⓂⒺⒾⓃⓀⒾⓄⓈⓀ

(2021.12.19 下昏飯 馬鈴薯泥)

小馬兄是阿奧紹介伊來 gún 兜借蹛 ê 英國少年家。

(2024.03.18 早起頓 䆀豆塗肉林檎 + 卵包 + 魚指 + 西洋萵仔菜 + 優格/1035kcal)

當我 teh 款早起頓，浴間仔 ê 磅仔 mā 綴我手頭 ê 物件 teh 行徙，我知影有人 uī-tio̍h 數字 tī 無閒，想 bueh 六月蚶，開喙臭，我討厭 ê 魚仔喙按我 ê 頭前泅過，隨關殼恬靜等待有緣人來 kā 咱挖，浴間仔 ê 人 mā 凡勢鼻無著臭，所以磅仔愈徙愈大聲。

「你敢無鼻著鳥鼠味」浴間仔 ê 人隔一堵壁喝。

「咱兜 ê 鳥鼠一直攏無洗身軀(有趣味)」我咂一喙茶清一下仔嚨喉大聲講。

「磅仔起磅.....」聲音愈來愈清，愈來愈明，越頭見著前幾日猶 teh 展風神講「Tsiâ 講糋膩瓤較莫食寡冰淇淋(ping-kî-lîm)」ê 人已經按浴間仔徙位到廚房。

「磅仔歹去，我較停仔來 Rossmann bué 台新 ê 」我紲伊猶未講齊 ê 話。

「磅仔無歹，我歹去矣...」

「你德國戰車 buē 歹，磅仔 tsiah-ē 歹，較停仔飯食飽我隨來 Rossmann」我這支喙無臭一下猶原 ē 著蛆。

(2023.10.27 早起頓 塗肉林檎ひき肉炒 + 玫瑰草花 + 優格/1001kcal)

那食下昏飯那聽廣播 mā 那看露台影戲變化。

本底佮 gún 保持社交距離 ê 厝鳥仔，這久見著 gún 按灶跤行到食飯廳 buē 閣若較早按呢按呢隨飛甲無半隻。

Gún 那食飯那享受遮 ê 無經過彩排抑是設計 ê 影戲，步頻西北雨來相揣，厝鳥無愛佮伊做朋友斡頭隨走，賰 gún 隔一个窗佮西北雨相向。

Gún 鹹 ê 食 bueh 煞，西北雨 mā 接受家己正經是無人緣臭乞食羶願意離開。

「敢閣 bueh 食寡甜粅粅」我問翁。

「Bueh」聽伊應 bueh 開始窮碗箸 ê 我雄雄感受一个熟甲若火炭 ê 感覺隨 kā 頭擔起來揣「感覺」。

(2022.11.16 早起頓 Mozzarella 果子盤 + 鹹水塗肉林檎 + 白草花 Bì-lù 煙腸湯/928kcal)

Bué 著落價 ê 烏森林煙腸隨想著 tī Cieszyn(PL) 食著 ê 好滋味 --- 白草花 Bì-lù 煙腸湯，m̄-koh m̄ 知愛敆啥來食，起因我無想 bueh 食麭。總是人生 tshan-tshiūnn 早前寫 ê 一段話，一暝睏醒， m̄ 知隨知。咱愛歇睏 Muse mā 是～delicioso。

鹹水塗肉林檎

...... 材料 ......

馬鈴薯，削皮　1kg

鹽

（2023.03.19  早起頓  菠薐仔塗肉林檎 + 魚指 + 果子優格/955kcal)

龜山誠實 ē 越頭，雖罔我 m̄ 是素食者。

M̄-koh，自囡仔時我就無啥 teh 食肉，無啥 teh 食肉 m̄ 是 gún 兜散赤無錢通 bué 肉來食，是我個人自細漢就愛食豆腐做 ê 物食。

因為這个意愛致到見若 tsham 朋友做陣去自助餐買晝抑是 bué 糋路佮我較無遐爾仔熟 ê 朋友攏 ē 掠做我是歹勢 tuì 𪜶講我食素，sóo-tí 綴𪜶食鼎邊素。

我 ê 頭家，gún 翁。

伊是無肉、無パン、無馬鈴薯、無チーズ就 ē 感覺腹肚空空生活無味無素 ê 人。

我是無肉無要緊，食パン ē-tàng m̄-koh 無法度逐日食 3 頓閣兼 Ka-pi 時間(Kaffeezeit，下晡茶，Tea time) tshan-tshiūnn 𪜶老母按呢，tuì チーズ mā buē tshan-tshiūnn gún 翁見著豆腐隨著猴詬詬唸，總是チーズ m̄ 是我自細漢食甲大漢 ê 物食 sòo-pái 愛看款，若是馬鈴薯我就 tuì 伊一點仔意見攏無。

兩个淡薄仔 bueh 相𫝛又閣無相仝 ê 脾土 bueh 按怎調整 tsiah 有法得互相平和做陣行仝條線，因由愛我調整家己 ê 脾土成做 gún 翁𪜶爸母 ê 方式，一個逐日起童來得著權利，一個逐日 kā 目屎按腹內食來保持 gún 是幸福翁某 ê 假影過日子，愛我按呢過姻緣也是 kā 伊放水流較自在，畢竟爸母無法度家己選擇，總是牽手是咱家己選，這个 buē 合猶閣有其他 ê 選擇 m̄ 免纏綴紅色高棉「卵臭臊照食」。

(2022.12.23 早起頓 玫瑰草花塗肉林檎ひき肉炒 + Bé-khòng 白花仔菜焗 + 洋刺波時計果麥角優格/1002kcal)

因為無收著水道電錢帳單，gún tsiah 知影厝稅 Oma 佮 Opa 兩个人 tī bueh 相𫝛 ê 時間轉去咱人自本 ê 所在。

聽著這件代誌有一怪奇 ê 感受 tī 心肝穎，m̄-koh 捎無摠。

一直到這幾日出門 bué 物件 gún 翁破著伊出門露營搪著 ê 序大人，我笑講「你敢有 kā 留地址，因為 Opa Zwerge 沒機會 tuì 伊攄肉」我 tsiah 理解彼个怪奇 ê 感受是啥。

我感謝厝稅 Opa ê 溫暖，雖罔 gún m̄ 捌捷捷接觸 m̄-koh 第一擺見面，伊 hōo 我想著家己 ê 阿舅。

「你確定伊是西德人」

Opa Zwerge 因為稅 gún 厝，伊愛成做 gún 結婚文件 ê 序大人，這「序大要求」 m̄ 是證婚人是 tuì 政府講「Gún 厝頭家厝稅 hōo 啥物人」。

Bueh 登記 ê 彼日 gún 去 Opa Zwerge 𪜶兜揣四常攏是伊 tī 扞稅厝大細事 ê 查某囝，Opa Zwerge ê 查某囝已經出門去田 neh 作穡賰 Opa Zwerge 一人踮厝 。

 (2023.02.15 早起頓 菜蔬塗肉林檎 + 林檎串仔生菜盤 + 優格搵醬 + Tsioo-kóo-lè-tòo 優格/982kcal)

咱認為 ê 自由佮關心總是 tsham 別人坐無𫝛條船

„Freiheit ist immer die Freiheit der Andersdenkenden“

                                                                                         ---Rosa Luxemburg

你是啥物色？

Tī 我猶原猶未寫台語文進前，因為 gún 爸爸 ê 關係大部份 ê 朋友掠準我自本就是藍色。

開始寫台文，大部份 ê 朋友直透講我是背骨 ê 綠色。

我是啥物色？

(2022.04.17 減肥早起頓 塗肉林檎焗。焗烤馬鈴薯)

“For to be free is not to merely cast off one’s chains, but to live in a way that respects and enhances the freedom of others. “

--- Nelson Mandela

我非德文佮其他語文專門科，見擺若是搪著講究文法專門科 ê 朋友開始深談德文是愛照規矩來談 ê 語言。

我就會想著「Flasche leer」，然後本成有 ê 刺鑿就會由在對方叨(lo)。

起因，語言是活--ê m̄ 是死--ê，總是原仔愛講我是福氣飽滇之人，踮這个無閒 tshì-tshì ê 年間，猶原有人願意 tsham 我分張伊 ê 專業 hōo 我有機會增加智識，減少 m̄ 捌字看告示 ê 捷 teh 看戲卻因為 m̄ 捌戲文，大氣捎咧歕 buē  離 ê 齷齪，我正經愛感謝遮 ê 朋友 m̄ 管舊底就熟似抑是自來無相捌 ê 生份人。

雖罔，我原仔 ē uī-tio̍h 遮 ê 並無捷捷出現 tī 我四序箍仔 ê 事項感覺刺鑿，總是我愛提醒家己「m̄ 通怨嘆生做䆀，媠䆀攏有好人材」佮「離鄉，無離腔」纏綴當地人談 ê 語言說語言。

比論講，我所蹛 ê 角勢講著「看電視」是講「Fernsehe schauen」m̄ 是課本寫 ê「Fernsehe gucken」，開始做一件代誌 ê「開始」有朋友講「Ab geht's」有朋友講優勢腔口 ê「Los geht's」遮 ê t講法 tuì 我來講攏著，我正經 m̄ 免 uī-tio̍h kan-ta ē 曉一種講法 ê 人 teh 鬱卒，抑是綴𪜶認真認定家己 mā 是竹篙鬥菜刀。

(2022.12.08 早起頓 ひき肉馬鈴薯 Tshì-sù 滷 + 水牛 Tshì-sù 菜蔬生菜盤 + 藍莓優格/901kcal)

翁 tuì 錢項佮感情 ê 想法是行正爿，我是行倒爿。

兩个想法無相𫝛 ê 人有法得相佮牽手到今，無一个人需要 kā 橫柴剖 buē 開當做練身體或是 kā 歹話當好話聽當做是食補。

窮真講我個人是認為佮我家己 m̄ 免蹛人 ê 砛簷跤討食有關係。

起因，gún 兩个人攏無彼款，拜堂後 m̄ 管水較按怎淹到鼻空攏愛繼續齊行仝命到透尾。

總是，拆白講無這款想法 ê 人是我，m̄ 是 gún 翁。

我 ê 意思是門扇枋鬥 buē 峇，我 buē uī-tio̍h 落塗紙頭無姓，紙尾無名這款問題 tuì 家己講搪著 ê 問題攏是有彼號喙無彼號心來解釋落塗時八命字。

我 ê 四常真簡單。

(2023.04.14 早起頓 寮仔 Tshì-sù 塗肉林檎 + 敏豆鰮仔魚生菜盤 + 果子優格/982kcal)

「若是寫臺文敢有人 ē 來我遮看影片」翁問。

「我 m̄ 知影，m̄-koh 你 ē-tàng 參加臺灣人 ê 社團」我講。

「啥物意思?」伊問。

「參加臺灣人 ê 社團你就知影答案」我應。

「我無 bueh 成做網衝」本底猶中氣十足 ê 聲音瞬間成做貓仔聲。

「歹勢，我耳空重，你敢 ē-tàng 講較大聽寡」我講。

「你若是無佮意我請你寫華文直接講就 ē-sái...」伊 ê 聲音愈來愈細聲，我 ê 耳空 mā m̄ 知發生啥物代誌，步頻成做順風耳。

(2023.04.11 早起頓 Tshì-sù 馬鈴薯條 + 紅菜頭雞肉炒 + 優格/971kcal)

計畫永遠趕 buē 著變化。

安息日前一暗頓印仔講好 bueh 攢鰮仔魚 I-tá-lih 麵。

隔轉工跤猶未行到灶跤隨 kā 燒燙燙 ê 約定化做烌。

起因，我 ê 胃 kā 我講伊想 bueh 食馬鈴薯。

食譄參考 Herzhaftes aus dem Backofen ê Käsekartoffeln 佮 Das Goldene Kochbuch ê Rosmarinkartoffeln。

Tshì-sù 馬鈴薯條

(減肥早起頓 鱷梨仔醬塗肉林檎。酪梨醬馬鈴薯)

媽，

無機會 kā 你司奶到今一目𥍉 mā bueh 11冬，你好無？

我知影，咱攏誠好，sóo-tí 咱某囝按行無仝途彼日，咱就 m̄ 捌 tī 夢中相見。

今仔日有一件大代誌 hōo 我暢甲想 bueh 敲電話 kā 你講，m̄-koh 我知影彼是犀牛望月，總是我知影你穩當知影我 bueh kā 你講 ê 代誌。

3月16 踮社會組讀著家己 ê 字名佮字姓。

我規仙人 buē-su hōo 雷摃著隨按椅仔跳起來揣電話，電話揣著隨笑家己 tī 台灣已經四邊無一倚是 bueh 敲 hōo tsiâ。

Peh 起身那唱近來足愛唱 ê《心酸酸》那行到窗仔邊請闊莽莽 ê 世界 kā 我 ê 快樂講 hōo 阿母、阿爸佮阿姊聽。

(2023.01.05 早起頓 敏豆ひき肉塗肉林檎炒 + 菜擴塗肉林檎湯 + 計時果 Ricotta/858kcal)

Also das Essen bei Euch sieht wirklich gut aus und man sieht an Kleinigkeiten, das A-Pió das mit Liebe.

翁 bué 一支新手機仔，𪜶阿爸問伊手機仔 ê 相機按怎樣，翕出來 ê 相片色緻敢有媠。

做後生 ê 伊 m̄ 知是刁意故抑是貧惰 uī 𪜶阿爸翕一張仔相 hōo 伊參考，伊就清彩寄一張伊 mā teh 記錄 ê 四常食食相片 hōo 𪜶阿爸參考閣 kā 𪜶阿爸 ê 回批展 hōo 我看。

「你絕對選上䆀閣 buē 傷害恁老母感情 ê 相片，王梨酥皮餅」我講。

「這 mā 有....」

伊 tuì 家己講 ê 話 mā 聽 buē 落去，我就 m̄ 免繼續歹心 tuì 伊講「月光下看人影是看 buē 著影，特別是 kan-ta ē 曉要求別人成做伊 ê 烏面賊 ê 人」。

我 m̄ 知影別人翁婿 ê 爸母是啥物性地，總是 gún 翁𪜶爸母真特別，𪜶 m̄ 准別人比𪜶閣較𠢕，sóo-tí m̄ 管你按怎做𪜶攏有話講，tshan-tshiūnn 久冬前我照𪜶老母教 ê 手路做雞卵糕請𪜶食，𪜶爸母隨講我豬屎籃仔也敢提出來品並。

(減肥早起頓 卵包玫瑰草花馬鈴薯泥。球芽甘藍馬鈴薯泥佐荷包蛋)

新 ê 一年，心 ê 過火除了敨掉遐 ê m̄ 知愛按怎講 ê 龜怪掠外，我 mā 有氣力面對家己 ê 驚惶，孤單一个人。

我 m̄ 知影我是按怎步頻有氣力面對這个問題，總是我一直相信困擾 ê 世間事，只要家己願意面對這時 ê 捎無摠，無代表永遠捎無彼个寮仔門。

我 m̄ 知影 gún 翁敢誠實理解 gún-ê 問題，畢竟我 buē 慣勢 ê 問題無表示伊 buē 慣勢抑是感覺𪜶，𪜶爸母徛 m̄ 著位。

新 ê 一年閣熥遮 ê 清飯實在足厭(ià)𤺪，不過我清楚家己 ê 想法好過成做𪜶老母 ê 副本，掠做天霸王逐家攏 ē 寶惜伊 ê 無見一人 bueh 佮伊徛較倚 ê 一日到暗若茶鈷按呢四界呻 hőng 聽閣無應效。

翁猶是人徛倚 m̄-koh 心 m̄ 知飛去佗落去，兩个囡仔有法度莫佮𪜶見面就莫見面。

新 ê 一年，我學 ē 曉放手就是愛 ê 祝福，畢竟愛我學𪜶人前規家伙仔攏和樂，人後是比上海王星閣較生份 ê 生份人，我無法度。

阿爸阿母猶在世，我 ê 想法閣較按怎無法度佮𪜶相疊，冤家了猶原是一家伙 buē tshan-tshiūnn 𪜶按呢 uī-tio̍h buaih hőng 發見𪜶 ê 問題 kā 無合理當做愛，像一个人講我 tuì 海產過敏，規家伙攏綴伊過敏，離開伊逐个攏好甲海產 m̄ 知食幾斤去，猶原好甲若一尾活龍 ê 假仙假觸。

(2021.12.05 減肥早起頓 Tshì-sù 塗肉林檎。起司馬鈴薯)

「Mit dir ist es fast so schön wie alleine」(佮你做伙 tsham 孤寂做伙 bueh 相𫝛好)

Tī 北德公共廣播電台《N-JOY》讀著這段隨記錄 tī 簿仔紙順紲寫臺文佮英文。

翁看著英文版本講「這我愛掰會一下，因為德文 ê 意思 m̄ 是按呢。」

「我知影」我應。

「M̄-koh，別人 m̄ 知影」翁關心別人 ê 需求 tsuē 過分張者我本人 ê 想法。

腹內火沓沓仔 teh 挓，總是我 m̄ 是彼款耳空兩生兩葉，家己看 buē 著 ê 人，越頭捾水桶 kā teh 著 ê 火沃寡水越頭文文仔笑講「按呢講 mā 著，總是恁德文 mā 有一句話 Durch die Blume 轉灣踅角，敢 m̄ 是」我講。

翁隨恬寂寂無出聲，起因伊知影家己 ê「點拄」hōo 某 mā teh Durch die Blume kā 伊剾洗「你 mā 知 gún 德國人講話是一條腸仔通尻川，m̄-koh 卻是句句是哲學」。

(2023.05.27 早起頓 蘑菇 I-tá-lih 麵猴焗 + 羅馬萵仔菜卵包 + 鰮仔魚生菜盤 + 王梨優格/1079kcal)

翁某做陣行踏別踏 ê 城市(Neckartenzlingen)踅賣場。

賣場賣 ê 物件佮價數 tsham gún 捷捷行踏 ê「PicksRaus」無啥精差，不過原仔愛講遮較古早味一寡。

起因，踮遮竟然有機會搪著凡勢是連德國少年家攏 mā m̄ 捌聽過 m̄ 捌食過 ê「Frühstücks- Kuchen(早起頓雞卵糕)」。

這个意外 ê 拄搪 hōo 我隨捾一條行到 gún 翁 ê 面頭前講「Ich glaube, ich spinne➀」翁隨問好--ê 抑是䆀--ê。

「Das Auge isst mit」我笑應，翁隨問 bueh 紮幾條轉來囤，起因 gún 無可能 uī-tio̍h 這雞卵糕捷捷來遮行踏。

隔轉日早頓食飽隨踅轉去古早時，那食雞卵糕那配公共電視台台語台 YouTube 直播《海稻米的願望》mā 那看淚珠那㴙㴙滴。

久年 m̄ 捌聽著 ê 聲音迵過影片一个一个迒過時間、空間 tsham 我聊聊仔開講。

(2023.02.01 早起頓 塗肉林檎炒 + 煙腸 Glausch + 西洋萵仔菜生菜盤 + 洋刺波優格/891kcal)

寢幾日，tī Telegram 讀中央社 ê 新聞，步頻想著這件代誌。

中央社既然 bueh 使用 Telegram 是按怎新聞內容猶原愛連轉去𪜶 ê 網頁？

一想著這點，我隨踅轉去面冊看中央社 ê 迷眾頁。

中央社囥踮面冊 ê 新聞佮 Telegram 相𫝛攏愛連去𪜶 ê 網頁。

我...拍結矣。

M̄ 是講 Blog 已經無時行？

因為中央社，我好奇 Telegram 敢有社群抑是迷眾頁，隨閣緊踅轉來請教 Google，Google mā hōo 我答案隨點入去看，遮 ê 迷眾頁佮中央社無宛 2 體.

(2023.09.25 早起頓 馬鈴薯泥焗 + 雞肉糋 + 紺草花 + 弓蕉優格/1209kcal)

荷蘭薯沙 tuì 歐洲人來講，其實無啥特別。

Tuì 我這位身為馬鈴薯國新婦來講，伊 mā 是無啥特別。

M̄-koh，無特別無代表伊無啥物特殊 ê 代誌 thang 記錄佮紹介。

阮翁有一个朋友，伊 ê 男朋友是前東德人。

有一年伊來臺灣𨑨迌借蹛佇阮兜。

彼時，猶原健在 ê 阿母，想著這位朋友參伊彼个真歹奉待 ê 囝婿𫝛款是德國人。

(2022.02.18 減肥早起頓 煙腸馬鈴薯條。香腸薯條)

塗肉林檎舊底 tuì 我無市，起因較食 mā kan-ta 彼幾味カレー抑是馬鈴薯條，押尾 ē 成做伊 ê Fans 是按行踏德國開始。

自本 mā 無愛食 Mayo ê 我來到德國 mā 成做伊 ê Fans，不過這段歷史已經倚我愈來愈遠，起因有歲仔烏貓姊年間，糋 ê 油 ê 按喙入去到出來 m̄ 免超過一工，這久不止需要三天，而且胃腸閣 ē 趁這个時間作怪，先生講早前食無問題，無表示現此時食無問題，確實有影。

本底我掠做我較狡怪嫌臺灣 ê 馬鈴薯條佮 Mayo buē 敆喙，押尾有機會 tī 遮熟似一寡仔臺灣留學生 tsiah 發現逐家佮我攏有相仝 ê 想法，德國 ê 馬鈴薯佮 Mayo 好食。

是講，人 tī 德國我 mā 無綴當地人分品種，佗一款落價就 bué 彼款，只要品質無䆀甲 buē-tàng bué。

煙腸馬鈴薯簽

...... 材料 ......