(2024.03.29 早起頓 美國茄ひき肉雞心豆 Kari + 草莓鱷梨仔生菜盤 + 洋梨仔俗麭 + 優格/954kcal)
疫情期間 bué 著一月日食到飽 ê 連鎖飯店優惠票就隨出門四界蹛。
這本食譜冊就是疫情期間 tī 徛位踮萊茵河彼搭，一間四星飯店附近田庄紮轉來 ê 食譜冊之一。
講之一是因為我 m̄-nā 紮一本，是紮足 tsuē 本，只不過押尾留踮廚房冊櫥 kan-ta 賰伊一本，賰 ê 又閣 kā 伊送轉去 gún 遮 ê 公共冊櫥 hōo 伊有較 tsuē 機會 tsham 人結緣。
我 bué ê 冊習慣，除了無愛 bué 有一仙人成做冊皮掠外，食譜冊 mā 是其中一項，這个慣勢凡勢是按 gún 老爸遐來。
囡仔時老爸𤆬我去冊局 bué 冊，伊攏會講「bué 你讀了 ē 閣繼續反 ê 冊」。
囡仔時 m̄ 捌伊 ê 14 kan-ta ē 曉認為伊是柝(kho̍k)仔頭，大漢 bué 一堆穿插雜誌，bué 讀 kan-na 反反 suah 就隨送伊去糞埽桶 tsiah 理解伊 ê 14。
冊是一項無形抑是有形 ê 投資 m̄ 是虛華佮時行 ê 品並。
(2022.03.14 減肥下昏飯 雞心豆餅生菜碗。油炸鷹嘴豆餅沙拉)
我足愛食雞心豆做 ê 料理像雞心豆沙(Hummus)、雞心豆餅(Falafel)遮 ê 物食，總是若是 bueh 講我佮雞心豆料理 ê 第一回接觸，應當是按人 tī 印度 tsiah 開始。
不而過，彼陣 ê 我 tuì 世界 ê 認捌是十八港跤行透透，月光下看人影 ê 水仙(Narcissus)，看印度食物 kan-ta Kari niā-tiānn ê 無，後尾綴著《田蛤 á 王子》ê 跤步是人 tī 非洲佮中東行跤花。
總是彼陣頭殼 kan-ta「華腦」、「英目」，準做雞心豆 hōo 我煞心 hōo 我挵著頂腹蓋，見佮伊見面我猶是「借問咱啥人？」
我愛食雞心豆餅 tī 臺灣 m̄ 捌見過伊，行踏德國 mā 慣勢攢超市版本來食，sóo-tí tī 我猶未行踏東非 Äthiopien/Ethiopia/衣索比亞(I-sik-pí-á)餐廳進前，伊 ê 名佮講法 m̄ 捌鏨 tī 我 ê 心肝穎。
「請問你敢 bueh 開始點菜？」店東問。
「Bueh，我 bueh....」喙講 buē 出伊 ê 名，目 mā 讀無伊 ê 名，越頭指隔壁桌 ê 食物「我 bueh 一盤彼」，店東文文仔笑講「Falafelsalat」成做一面鏡 hōo 我照家己 ê 四書捷甪甪,十句九句不，掠做家己𠢕甲 ē-sái 上西天，窮實是猴穿衫掛目鏡假紳士 ê 假仙假觸兼冇腹，真正感謝這个經驗引𤆬我認捌家己 ê 不足 mā 感謝店東無料分張 hōo 我揣著人 tī 非洲抑是中東食著 ê 味素 --- 無油臊味。
(2022.12.16 早起頓 林檎金瓜烘 + 頭目萵仔菜生菜盤 + 德國煙腸卵包 + 莓仔 Quark + 寮仔 Tshì-sù 果子醬俗麭/843kcal)
自寫台文捷捷成做貓，自寫台文認捌 tsuē-tsuē 新世界，準做這个新世界 tī 台語辭庫猶揣無「定案」hōo 小面神 buē 堪得 hőng 講，你是博士博，博甲戴紙橐 m̄ 敢烏白主意，總是這个驚惶 mā 引𤆬我成做愖題人，像「Mozzarella」tī Wikipedia 猶未出現，Blog 已經出現，彼陣有人 kā 伊號做「義大利水牛起司」mā 有人照倚音 kā 伊號做「莫茲瑞拉起司」，這久因為演算法 m̄ 管拍 Mozzarella、莫茲瑞拉、馬蘇里拉奶酪攏齊出現「莫札瑞拉起司」，除非你拍「義大利水牛起司」tsiah 揣有義大利餐桌上會牽絲的cheese-馬自拉乳酪Mozzarella，這當然 mā 是我笨跤笨手 buē 曉使用網路 ê 結果，總是遮 ê 變化 tuì 我來講就是 Evolution，Mozzarella tī Italia 已經定案，tī 華語世界 mā 定案，tī 台語猶未，這 hōo 我想著生物學者發現新物種抑是搪著舊物種演化做新物種 ê 快樂佮激頭殼。
Tī 我猶未成做坱埃(ing-ia)我 ê Blog tī 大環境已經成做烌，準做按呢我敢 bueh 放捒家己 ê 演化？
當然 mā buaih，Kreis von Kreisen，一个大圓是按算 buē 清 ê 圓生湠，準做我个圓 buē 成做一个大圓，我猶是這个世界一个圓。
德語 ê Kopfsalat(DE) = Häuptelsalat(AT)，英語 ê Butter lettuce = Bibb Lettuce tī 台語 ē-tàng 按怎形容？
我 m̄ 知影英語 ê 號名是按伊 ê 學名做分類抑是喉韻(âu-ūn)若 Bá-tah 來形容，總是我照德文 ê 解釋來號名 kā 號做頭目萵仔菜，名詞， 植物靠近根部的第一個節目。
Die Sprossachse ist stark gestaucht, so dass die Blätter einen dichten, rundlichen „Kopf“ bilden.(Wikipedia)
感謝愛料理(Icook) hōo 我有機會閣一擺成做 Le Penseur 愖問題 m̄ 是堅持 bueh 致青光眼。
(2023.05.25 早起頓 五彩螺殼麵 + 冰海蝦鱷梨仔王梨冷盤 + 王梨 Yogur/839kcal)
舊年9月拄做阿爸 ê 阿羅歇中畫轉來看嬰閣按工課 ê 合作社捾兩盒整理好 ê 果子 tsham gún 分張。
說多謝 mā 隨想著蹛雲林 ê 大姨，往時經過石榴(Tsio̍h-liû) 攏 ē 講一段 tsham 石榴 kan-na 有關係 m̄-koh 名聽起來無相𫝛。
Uī-hô 大姨愛講這，起因 tsham 阿母相𫝛出世 tī 日本年間 tī1949年後 m̄ 捌閣有機會學習新符號 ê 𪜶直接 hőng 分類 tī「m̄ 捌字兼無衛生」 ê 伊迵過後生 tuì 伊講這 mā 是「石榴/Sia̍h-liû」，「國語」ê 石榴火車頭佮食 ê 石榴 ê「石榴」就此牢牢蹛 tī 伊 ê 世界。
我這个真𠢕夫字做天，馬字作蔫(ian) ê 人 mā 因為大姨，認捌著食 ê 石榴佮火車站 ê 石榴 tī 台語是2種無仝 ê 音，特別是「石」。
我無愛食石榴，想--著大姨 ê 故事開始擘腹愛按怎處理伊，起因物件好好隨 kā 擲糞埽桶，我做 buē 出來。
總是，現此時 mā 捎無寮仔門通 kā 處理，按呢就放伊去歇睏，我 mā 是。
無日 m̄ 知晝，無鬚 m̄ 知老。
(2023.05.07 早起頓 2月季節生菜碗 + 魚指菜蔬盤 + 藍莓 Quark/1032kcal)
雄雄想著這件代誌，我一直喋牛 m̄ 通𠢕走，人 m̄ 通出名，這久煞 tī 遮 m̄-nā 綴食譜出菜記錄並 tī 愛料理做相𫝛 ê 代誌，我按呢做敢 m̄ 是食菜食菜，食甲肚臍為界 ê 假包？
無，我無假包。
Pixnet 自本就 teh 記錄遮 ê 若 Julie & Julia ê 543，sóo-tí 並無食菜食菜，食甲肚臍為界，愛料理若有呢。
無，我無，我 kan-ta 想 bueh 理解這件代誌是按怎別人揣 ē 著我，我煞揣 buē 著家己，特別是我 kā「台語食譜」這四个字提掉，是講我 mā 無確定敢是「台語食譜」四个字 hőng 揣著，紲落來成做面冊 ê 糞埽魚一尾，我已經 buē 記得，因為彼已經是 4 冬前 ê 故事，而且是一位熱情 ê 面冊生份人無私分張，我 tsiah 知影這件代誌。
啊，遮 ê 故事 mā 是清飯熥甲臭酸 ê m̄ 免閣愖，網路有伊家己 ê 演算法，我無想 bueh hőng 揣著就莫 tī 網路走跳抑是公開口座。
是講，我 mā 無要意 hőng 揣著，只不過當家己照鏡照 buē 著家己，別人煞有法度見著我 hōo 我又閣成做一隻貓想 bueh 知影因由，總是揣 bueh 3 冬猶是揣無答案，我放棄據在伊，huînn-ti̍t 我清楚知影我 m̄ 是假人。
我 ê 半仙攏無到額 ê Julie & Julia，簡單好味素
。
(2023.05.06 早起頓 マス敏豆冷盤 + 麭生菜碗 + 卵包 + 優格/942kcal)
讀網路推薦 ê 無料新聞，我 ê 態度大多數是秒看標題隨換逝。
起因，我無想 bueh 成做大數據其中一粒星。
雖罔，無揤落去原仔 ē 成做大數據一粒星，總是無揤心猶是較在。
這斗𫝻著這 pha 新聞，內容 tuì 我無吸引力，總是真久無見著俗諺語出現 tī 新聞標題 ê 我隨起心動念，做別人 ê 工課練家己 ê 工夫。
die Katze aus dem Sack lassen - Kā 貓按麻布袋仔 khe̍h 出--來
這句俗諺語佮 die Katze im Sack kaufe 有關係，tī 中世紀 bué 賣博覽會 ê 諞仙仔 ē 狸貓(lî-bâ)換太子 kā 兔仔、豬仔囡換做貓仔來賣。
另外一方面，kā 貓按麻布袋仔挈出來 mā 表示諞仙仔 ê 秘密煏空、黜破、掠包。
(2023.04.27 早起頓 雞肉林檎紫頭菜サラダ + 人参馬鈴薯烘 + 檨仔 Quark/931kcal)
坐輕鐵搪著幾个應當是國中年歲 ê 查埔囡仔，我 m̄ 是愛雜插兼鴨母喙愛叨(lo) ê 性地，總是這幾个囡仔 teh 破 ê 豆 hōo 我實在是無法得無 kā 耳仔覆過，起因實在是太有意思。
「Mein Wunsch in diesem Jahr ist eine Hautfarbe wie Bronze」(我今年 ê 向望是 kā 家己曝較成鐵牛運功散 ê 色緻)。
人自囡仔時攏是 teh 比賽這个歇熱愛按怎 hōo 家己成做白銀魚按呢白鑠鑠(siak)無曝烏，𪜶是拚勢 bueh 曝甲若一尾烏魚遐爾仔烏金誠實是無法得順手提著 ê 物件上珍貴。
總是，人𪜶愛曝烏 mā buē 嫌家己䆀 tsi-tsi 愛舞甲 buē-su 是按外國轉來 ê 人按呢乞食攑蠓捽仔，假仙假怪。
不過，彼驅烏是一種 m̄ 免喙講 ê 認證，gún 兜有夠額。
世間 ê 規定真正是隨較惡 ê 人喝。
我儘量保持規矩，我無偷聽 mā 無好玄𪜶 teh 做啥，總是當𪜶 kā 手骨伸出來互相比色水。
(2023.04.23 早起頓 王梨紫頭菜サラダ + 青豆雞豆飯 + 花飛 + 果子 Quark/1111kcal)
自2019年起頭寫第一篇文章到今，一目𥍉 mā bueh 4冬。
這 4 冬有足 tsuē ê 變化，像擘腹別人讀無我寫 ê 物件隨閣掠外寫一逝華文，落尾手發見彼正經是無枷夯交椅隨放伊自由。
是講，彼陣 ē 按呢寫是攑香綴拜，起因讀著 ê 臺文作品就是按呢寫，一逝漢羅、一逝羅馬字閣一逝華文。
選字，彼陣 m̄ 知啥物字愛寫漢字啥物字愛寫羅馬字就綴台文出版品跤步 kā m̄(毋)、lán(咱)、tsit(這)、tse(這)...遮 ê 捷讀著 ê 羅字綴 le̍h 寫，總是沓沓仔發見有 ê 台文出版品有意見領袖 ê 態度佮堅持𪜶 ê 腔口 tsiah 正範 tsiah 準算，我就無閣綴 leh 做𪜶 ê 副本，行家己 ê 路像這个「親像」我是講「tshan-tshiūnn」m̄ 是「tshin-tshiūnn」我就以羅馬字來表示我 ê 腔口，其他 ê 就齊漢字，起因我正經無認為寫羅馬字有啥物特別。我講羅馬字無啥特別主要是我 ê 四箍圍仔攏是寫羅馬字 ê 族群，我逐日 mā teh 寫羅字，sòo-pái 羅馬字 tuì 我來講正經無特別，不過羅馬字真重要，伊是學習台語上讚 ê 工具，buē 曉讀寫日文五十音 ê 我，學習日語文 mā 是齊靠羅馬字來記和字佮漢字 ê 差別。
外來辭 ê 部份，一開始我 mā 是照呼音抑是愛台語氣口 ê 方式 teh 講，像 Waffel kā 伊號做格仔粿、格仔餅尾手我猶是佮意綴原音 Waffel 行，雖罔捷捷 kā 伊按英語講做德語，特別 tī Fel ê 部份，總是大多數 ê 人一聽攏知影我 bueh 愛啥物，至於(tsì-î)「鬆餅」我 kan-ta ē tuì kan-ta 捌這个語言 ê 人按呢講，聽起來真臭屁，是 m̄ 是?
總是我清楚知影，m̄ 是，m̄-koh 我清楚知影我非常尊重別人聽有 ê 講法，起因若是閣有其他 ê 講法我 mā-ē 綴 leh 講，是講現此時(2023.12.21)寫著 Waffel hōo 我 mā 好玄公視台語台 ê 新辭庫敢有收這个辭隨請教，有 neh 公視台語台有收，伊號做 uá-hòo，美國 ê Pancake 號做 Phián-khè-khò 誠有 14--neh，我 ē 綴 leh 講佮寫。
押尾猶原愛寫著是按怎無 bueh 寫白話字?
(2022.12.08 早起頓 絞肉馬鈴薯佮寮仔チーズ醬 + 野菜 Mozzarella サラダ + 藍莓優格/901kcal)
Tsa̋ng(12.07) uī-tio̍h 一篇 m̄ 知結果 ē 如何 ê 稿規日貼貼到暝半。透早一精神隨感覺食力。
鼻頭薟薟腦 tun-tun 嚨 ta-ta。
這凡勢是文昌帝君 teh kā 我點拄「你無 hit-loo 2步7仔」。
Mā 著我煮食就 leh tsiah 頇顢閣敢枵狗痟想豬肝骨，枵貓痟想海底魚。
總是，我 mā 清楚知影家己 m̄ 捌痟想過豬肝骨佮海底魚，我只是大面神 m̄ 願承認家己窮實是圓仔花一蕊 。
#記錄寫 tī IG ê 文字
(2022.11.16 早起頓 Mozzarella 果子盤 ＋ 鹹水馬鈴薯 ＋ 德國草花ビール煙腸湯/777kcal)
人真龜怪。
向時，開電腦哭呻遮 ê 人是閒甲掠蝨母相咬是 m̄，抑無呔有遮 tsuē 時間 tuì 人指指揬揬。
這久開電腦、𫝻手機仔哭呻我哪 ē 遮爾仔 無人緣。
四常時仔聽我哭呻總是恬卒卒 ê 四常問「我 m̄ 是你，m̄ 知影 uī-hô 你 ē 齷齪，你敢 ē-tàng 分張你 ê 鬱心 hōo 我知影?」
「我......我.....我.......」聽伊按呢問，一時講 buē 出話 ê 我斡頭隨走。
窮其，我知影我 ê 問題，只是，我 m̄ 願面對 niā-niā。
我哭呻別人無事揣事來相嚷，這久 ê 家己敢 mā m̄ 是按呢。
(2023.06.23 下昏飯 花飛サラダ + 冰海蝦 + 夏金瓜烘/608kcal)
我 ê 親人攏 tī 天頂過四常，無人通按臺灣寄物件 hōo 我，sóo-tí 我足期待逐回 ê 郵差來揤鈴，雖罔遮 ê 物件齊是我家己寄 hōo 家己，總是我原仔寄甲歡喜甲。
多謝每一間願意 kā gún 遮 ê 僫揣人 mā 無資本一直走國際線 ê 人 kā 冊寄到遠兜 hōo gún ê 冊店。
另外，陳柔縉老師 Ruhe in frieden.
多謝你 ê《人人身上都是一個時代》等等 ê 冊引𤆬我認捌 lán 家己跤踏 ê 土地。
是講《走揣小封神的傳奇》m̄ 知愛去 tueh 買台語版。
不過，無要緊~緣份若到自然 ē 相拄搪。
我靜心等待。
(2022.12.09 早起頓 林檎絞肉カレー + 馬鈴薯丸仔 + 林檎青花仔菜サラダ + 林檎弓蕉鱷梨仔優格/1014kcal)
進前熥舊文就決定放棄逼虎傷家己 -- 硬 bueh 綴人成做文青讀遐 ê tsham 我無一倚 ê 冊，總是我就是愛佯青/星銅牙槽鐡喙齒 m̄ 相信家己無彼个斤兩，我掠做出門行跤花這囮(buê) ē hōo 我 kā 彼本冊讀甲齊齊無一屑仔肉幼仔通揣。
結果...我正經牛就是牛，牽到北京也是牛。
我甘願閒仙仙，閒到掠蝨母相咬 mā m̄ 願 kā 彼本冊提出來讀，這久寫 Blog 翻草 tsiah 掠著漏。
我愛黜臭別人十个臭頭，九个破豆，我家己 mā 是𫝛款。
不過，就使事實是按呢我原仔堅持愛佯青/星，起因十个囝仔十樣生。
這味無合我 ê 脾土無代表伊無合別人 ê 脾土，sóo-tí m̄ 免看低家己 mā m̄ 免 uī-tio̍h m̄ 捌戲文，大氣著愛捎 leh 歕 buē 離。
(早起頓 紅鰱魚鱷梨仔サラダ。鮭魚酪梨沙拉)
德國衛生部長 Lauterbach tī iáu-buē tsiânn-tsò 部長 ê 時，伊就著是通人捌 ê 醫學專家。
近來食冷盤抑是サラダ定定無濫鹽佮其他 ê 調味。
這个無頭神 ê 狀況 hōo 我想著伊猶未成做部長 ê 彼當時，媒體請教伊四常食食問題伊 ê 回答。
「我無食鹽」
伊 ê 回答 m̄ 是 kan-na 這句 niā-niā，伊分張一个人一日需要偌 tsuē 鹽佮現代大部份 ê 人迵過利便 ê 生活方式已經有法得食著偌 tsuē 鹽佮 uī-hô 伊選擇無食鹽 ê 因端。
總是，大部份人 tsham gún 翁相𫝛 kan-na 聽著「食鹽無健康」就開始關心 gún 一日食偌 tsuē 鹽。
我知影伊誠愛穢𪜶父母 ê 症頭「聽我講包領你上青天」我都自動 kā 伊 ê 關心按一耳空入一耳空出按呢準過，抑無彼 m̄ 是天蓬會掀 ê 代誌遮爾仔簡單。
(2022.10.29 早起頓 魚指鱷梨仔サラダ缽/863kcal)
想 bueh 寫--ê tī 愛料理大致完成，總是愛料理 m̄ 是寫文章 ê 所在，所致我猶原有一部份無寫著，彼就著是展我按希臘(Hi-lia̍p)款轉來 ê 瓷仔。
不過， 這瓷仔 tsham 我現此時 ê 展寶無想𫝛，伊 m̄ 是刁意故款轉來伊是我 tī 遐發見，希臘𪜶有一種優格 kan-ta 貯 tī 瓷仔而且價數閣無比塑膠杯仔較貴隨款一碗來試，試了正經是無試無捶心肝，試了拚勢捶。
Tsuē 冬前 tī 波士尼亞看著這瓷仔就足佮意 mā 隨 bueh 款幾跤轉來德國，總是我 tī 德國錢趁較無 gún 翁 tsuē mā 認定這款物愛伊出錢，sòo-pái 當伊講這無淋碭 mā 無碭光 ê 瓷仔有毒，我隨 kā 瓷仔囥轉去，畢竟出錢 ê 人主意。
是講，德國 ê TEDI mā 有 teh 賣這款瓷仔，若伊正經有毒是按怎 TEDI ē 排出來賣，而且閣賣甲削削叫。
這是事後話，tī 彼當時我規个頭殼 kan-ta teh 濆火，無想著這，這久 ē 想著這件代誌是當我挈瓷仔貯物來食，伊無哭呻半句「這瓷仔有毒」隨 hōo 我想著彼冬 ê 賣油 ê 人撒油 --- 大細心，這喙無 kā 剾一下 ē 著 tshì。
「這瓷仔有毒」我講。
(減肥早起頓 夏金瓜サラダ。櫛瓜沙拉)
見講「保加(ka)利亞」攏 ê 憢疑家己 ê 台語有問題，起因 tsuē-tsuē 人 m̄ 是講「台語無這个講法」就是愛講「保加(ke)利亞」，落尾閣搪著有人講愛講「勃牙利/Pu̍t-gâ-lī」。
保加(ka)利亞是我按囡仔時綴序大講到大漢 ê 講法，勃牙利佮保加(ke)利亞這兩个講法是自開始接觸台語文書寫 tsiah 知影 ê 變化。
加有分文、白音，厝內序大 tī 遮講「加(ka)」是文音，是直接綴字唸無踅做白話講法，tshan-tshiūnn 關公 ê 赤兔馬，有人講愛講「胭脂馬/ian-tsi-bé」，有人講直接綴字齊唸做文音 ê「赤兔馬/tshik-thòo-má」，我 m̄ 是語言專家，總是有一套標準通綴，我就綴這套標準，雖罔我 tuì 文白音猶原捎無啥摠頭，起因無 tī 斟酌背遮 ê 無相𫝛，總是近來看《全家有智慧》大約仔知影「照字讀」愛唸「文讀(tho̍k)音」，加一个「仔」動詞隨成做名詞，像捊頭鬃需要 ê 家私「捊仔」。
文讀音開(khui)拆 --- 《全家有智慧》精選EP265｜臺語心花開VS臺灣好歌聲
動詞成做名詞開拆 --- 《全家有智慧》精選EP274｜美女媠噴噴vs朋友人巧巧
自囡仔到開始寫和樂文 m̄ 捌讀過「勃牙利」隨上網請教伊按佗落來，tī ChhoeTaigi 台語辭典⁺ 揣著答案 mā 揣著「保加(ka)利亞」，總是字典並無詳細紹介伊 ê 起源，我 ê 14 是準做 iōng 原文「България」來講伊 ê 音 tuì 我來講 mā 較成「puh-ka-lī-á」揣無「勃牙利」後尾迵過別人分張 tsiah 知影，漢字箍真愛 kā 日本借漢字，這个勃牙利就是按日文來，總是日文 mā 有這个講法「勃爾瓦利」發音相仝，寫法無仝。
講著保加利亞就 ē 想著 gún這个朋友 A-kun，五歲 hōo 父母倩人按保加利亞「送」來前西德。
(減肥下昏飯 魚指鱷梨仔サラダ。魚柳條酪梨沙拉)
今仔日收著批想講 m̄ 是講 10 月 tsiah-ē 通知，是按怎這久就通知，我敢誠實有寫甲 tsiah 䆀才，m̄ 著，應當是我無 kā 伊斟酌繩清楚愛閣看一擺。
早頓食飽隨閣熥一斗電子批文件，果真，葫蘆墩白米，無錯(糙) 我 kā 豬母牽去牛墟看 m̄ 著。
認真 kā 文字繩 hōo 齊隨想 bueh kā 伊放風吹，畢竟我手頭 ê 剃頭刀有法度 kā 樹剉掉，彼是奇蹟。
當我按呢想隨看著 Muse 手捾五彩繽紛 ê 花草行跤到閣 kā 𪜶送 hōo 我，我目箍含真珠說(suat)多謝，隨越轉身行入灶跤將珍珠落鼎烰閣那烰那敆手頭 ê 花草。
一睏仔久後，一鼎我家己感覺滋味上讚 ê 真珠奶茶已經貯 teh 甌仔內 bueh 請遠兜 ê 生份人客閣試一斗滋味。
翁行倚來講「你 m̄ 是喝 Muse 無來行踏，你寫 buē 出來今呔 ē 遮爾仔緊就寫好勢。」
「你永遠 m̄ 知影你 ē 提著啥物口味 ê tsioo-kóo-lè-tòo」我笑講。
(減肥下昏飯 紅點三文魚サラダ。紅點鮭沙拉)
Ē曉食魚無啥 m̄ 捌魚。
寢幾日仔買著落價 ê 這尾魚，步頻想著伊若是按溪來是按怎 m̄ 捌 tī 溪看著？
另外，伊 ê 價數呔 ē tsham 𫝛款是按溪來 ê マス較有參仔氣？
請教無所不能無所不知 ê Google，伊 hōo 我這个答案伊是18世紀按北美洲湠來歐洲 ê 魚種。
伊需要足清氣 ê 水源，讀甲遮隨理解 uī-hô m̄ 捌 tī 德國 ê 溪看過伊。
M̄ 是講德國 ê 溪無清氣，只是這魚佮鰻魚有淡薄仔相𫝛 ê 性地，總是伊又閣無 tshan-tshiūnn 鰻魚遮爾仔神祕。
雖罔伊按溪來 m̄-koh 伊 mā 誠適合 tī 湖水生活，tshan-tshiūnn マス按呢。
(減肥早起頓 果子サラダ。水果沙拉)
轉去 hōo 先生看，一个人坐火車、輕軌、踅街，遮 ê 四常攏是我 ê 平常，平常甲我 m̄ 捌感受伊帶 hōo 我 ê 變化。
Tsham 先生又閣約好後一回 ê 三月日，跤步隨成做 Ballet 輕蠓蠓跳甲車頭按這搭看彼頭 ê 輕軌站，腹內 ê 尾蝶 teh 展翼跳 Salsa，嚨喉 ê 半天鳥挵鼓成做 Rocker，煙火自晶珠一層一層湠到烏仁。
2 伐當做 3 伐又閣按車頭跳 Ballet 跳甲輕軌站外圍，徛好位順金烏彼頭金鑠鑠 ê 頭鬃擔頭看遠遠 ê 告示牌，往市區 ê 月台 m̄ 是 tī 這搭，隨按指示徙位 mā 遵照家己 ê 意識 kā 喙罨掛好掛牢 tsham 其他 mā 是遵照家己 ê 意識選擇 m̄ 掛喙罨 ê 人徛踮家己自在 ê 箍仔做家己。
「Das ist feriheit」
我想著透早那款早起頓那聽廣播放送「敨放喙罨」 ê 第一日報導隨笑出來。
原來，做家己 m̄ 是一件簡單 ê 代誌，需要面皮厚甲敢若象皮按呢耳空 mā 愛生趼(lan) tsiah 有法得大紅花 m̄ 知䆀，圓仔花䆀 m̄ 知成做一个安心自在 ê 大面神。
我愛這个時間，逐家 tī 這个月台享受家己 ê 安心佮自在 mā 尊存逐人無相𫝛 ê Feriheit。
(2023.02.10 早起頓 雞肉馬鈴薯サラダ + 卵包 + 甜椒湯 + Yogur 搵醬 + 弓蕉 Tsioo-kóo-lè-tòo Yogur/947kcal)
Gún ài 食豆菜，德國 mā 有 tsuē-tsuē 豆菜。
不過，價數無 lán 臺灣 hiah-nī-á 唌人。
Tsit 斗有機會搪著豆菜 teh 拍折，suî 提三盒 tńg--lâi 做料理。
Bueh 做料理進前，gún 翁問「lán-ê 喙斗無相𫝛，tsia--ê 豆菜價數 hām 斤兩 tsham 臺灣無相𫝛無法度 hōo 你做䆀 suî koh-khì 款來試別味，án-ni 你 bueh 按怎料理 hōo lán buē 相觸」。
我知影伊 tsiok 驚我款「炒豆菜」tsit 類 ê 食物 iū-koh 驚拆白 tuì 我講伊無 ài tsia̍h hit 味 ē hōo 我哭呻兼剾洗，伊佮𪜶 Pē-bú 相𫝛 kan-ta ē-tàng 食德國味。
「窮實...」伊目睭 the kah 若牛目鼻空門關 kah 密喌喌等我 ê 停睏。
「你 mā 知影 lán tī 臺灣食「大象」我 m̄-bat 提過 Sa-la 來食，起因我無 ài 食豆菜芽」我講。
冊 ▪ Bücher ▪ Books (4) 露營 ▪ Camping (18) 行跤花 ▪ Ausflug ▪ Field Trip (3) 掠肥食譜 ▪ Rezept ▪ Recipe (20) 板膋收冬寫真 ▪ Ergebnisse der Gewichtsabnahme ▪ Weight Loss Results (1) 行尞錄 ▪ Aufsatz ▪ Eassy (1) 翁拋荒 ê 日誌 ▪ M's Blog (1) 電台 教學網站 閱讀天地 Podcasts 台客雙語輸入法 台客德日辭典 電視 其他工具 咱 ê 䆀筆尾 
