Die Weltgeschichte ist der Fortschritt im Bewusstein der Freiheit
世界歷史是自由意識 ê 進步
--- Georg Wilhelm Friedrich Hegel
我真𠢕做寡白痴 ê 事項 tsiah-ē 發覺你 ê 感動是別人眼內 ê 豬屎籃仔也提出來品並
。
總是無做寡白痴代呔有節著脈掠做筋撨著骨，敢 m̄ 是？
陳老師 ê 成長背景佮我無仝沿，總是小說 ê〈灶雞仔〉、〈師生〉、〈管區--ê〉攏是一面鏡引𤆬我轉去彼个愈來愈殕卻 m̄ 捌忘 buē 記 ê 記持。
因為有記持所以想 bueh 寫寡啥 mā 想 bueh 佮作者分張啥物家己 ê 感受，總是一想著「有 ê 人掠做 ē 曉講台語，台語文就在水寫甲足媠氣...」hōo 我隨放棄，起因我 ê 台語文寫甲足䆀 buē 讀，猶是莫做見笑代。
窮真，我 tuì 這本冊無興趣甲見擺見著臺文版攏 ē bué 轉來讀 ê 癖攏揣無一撇，這久是按怎生想 bueh 專工 uī 伊記錄一篇感想，講起來 mā 真簡單，伊牽我 ê 手做陣行轉去少女年間，我寶惜 ê 少女感情。
第一擺搪著《傲慢與偏見》是 tī 國校 ê 排冊擔仔，冊擔仔頂逐本若粗紙 ê 冊一本5塊，不而過冊皮若是有閣加貼一張紙條仔寫「世界名著」就隨愛加5箍，這就是我佮 Jane Austen Pride and Prejudice ê 第一擺接觸。
M̄ 知是年歲傷過細抑是冊 tshan-tshiūnn 台灣新眼界．文化新台灣 | 林文欽 臺灣意識佮智識的駁岸 前衛出版的堅心 20240122 社長林文欽先生談著《被出賣的台灣》「彼久 tī 我出版被出賣的台灣，阮 ê 版本進前，其實臺灣就已經有彼个，人印 leh 賣 ê 版本矣」sóo-tí 讀起來 tshan-tshiūnn tī 臺灣看 Forgetting Sarah Marshall 佮 tī 德國看 ê 精差。
印象中 DVD 無 Kuckuck，sòo-pái 當我 tī ZDFneo 見著 Kuckuck，我規个人隨按膨椅跳起來。
「你敢有看著 Kuckuck」我問翁。
「有啊，彼有啥物通大驚小怪」翁應。
彼確實無啥物通大驚小怪，m̄-koh 若無閣看一斗我正經 ē 掠做彼个 phà-phà-phà ê 聲音就是 kan-ta ē-tàng 想 buē-tàng 看 ê 畫面，這个畫面 Wikipedia ê 忘掉負心女有紹介著。
按查某囡仔轉少女 tuì 愛情有 tsuē-tsuē 若霧 ê 想像，聽著身軀邊 ê 人講 Gone with the Wind mā 有人講著 Pride and Prejudice 我又閣揣冊來讀一斗，總是青春愛做夢 ê 我 tuì Vanilla Ice 演 ê Cool as Ice 比彼陣 tsuē-tsuē 人攏講浪漫閣好看 ê The Sound of Music 閣較有感覺。
„Freiheit ist immer die Freiheit der Andersdenkenden“
無事揣事愖
我 tī 想， kan-ta「作文」是 iōng 台語其他 ê 齊是華語，tshan-tshiūnn 是按怎 bueh 按呢寫佮寫作 ê 起因，是因為驚大眾讀無路來抑是 tī 𫝛款 ê 文學內底已經揣無空間通成做出名人？
畢竟，逐家攏是鰮仔魚，鰮仔魚 bueh 按怎成做白腹仔(看新聞挖挖哇，按澎湖來 ê 小花講，白腹仔愈來愈少)就愛先試這件代誌，看家己敢有法度按鰮仔魚轉做紅鰱魚，無法度轉做紅鰱魚，至少原仔是一尾 m̄ 驚 hőng 看 buē 著 ê 鰮仔魚。
我 m̄ 知影，起因目前我 kan-na 捌 tī 亞特聊聊天聽過「台語話故事」出版社不是影印店，這集聽過前衛出版社 ê 總編輯鄭清鴻先生分張《復活的人》佮《幻影號的奇航》ê 作者胡長松先生 ê 分張。
--- 寫台語確實是較無市場，m̄-koh 這 mā 表示空間原仔闊莽莽 ---
原句 m̄ 是按呢講，總是這是我家己濃縮 ê 蜂蜜。
我無心望成做作家或是出名人，總是聽著這段話 hōo 我言行一致 m̄ 是乞食攑蠓捽仔，假仙。
歹運就假若蜘蛛仝款會佇無意中出現佇花欉，看著，共掠走就好矣。
--- 溫柔的人
智識無夠額 ê 我 tuì 這本冊無任何感想，起因，自一提著冊讀無夠100頁(無包括 bueh 10頁 ê 名人推薦) 就放風吹 m̄ 捌閣摸過。
放伊風吹 tsuē 冬後又閣 peh 樹揣伊 ê 跤跡 kan-ta 因為雄雄想著伊 m̄ 是綴咱按臺灣紮過來 ê 冊，伊是 hōo 咱開懸懸 ê 運費佮進口關稅 tsiah 有法得送到位 ê 智識，這久 ê 我呔 ē 遮爾仔討債 m̄ kā 讀 hōo 齊。
只不過，第二斗 tsham 伊做陣開講我原仔愛講，我讀甲足艱苦。
不過，我知影這是我個人水準無夠額 ê 問題 m̄ 是作者 ê 問題。
總是，冊讀煞無感想猶是有感想，彼就是「標準化」足重要。
《Tò-tn̄g 倒轉》
㊔ von Voyu Taokara Lâu
㊓ 李江却台語文教基金會
ⓦⓦⓦ 台灣e店
Tī《語言學家破解台語》這本冊掠外吸收作者劉賢承先生其他 ê 作品《翻身．番身》佮《倒轉：Voyu Taokara Lâu》這 2 本冊 hōo 我目睭隨金 mā 隨上網搜揣，最後 tī 本底掠做伊無閣接續海外訂單 ê「台灣e店」揣著這 2 本冊隨落單。
講著 ē 掠做「台灣e店」無閣接續海外訂單，彼是我家己 ê 竹篙鬥菜刀 kā 公告讀無 tsiâu-tsn̂g。
總是，我真歡喜家己有閣寫批請教店東確定海外訂單 ê 事項 m̄-tsiah 有機會繼續讀讀其他 ê 台語文作品，增加無仝 ê 眼界。
我 m̄ 知影其他國家 ê 文學是啥物生張，總是我真佮意德國文學 ê 生張，無冊腰無落落長 ê 𤆬讀。
Den Stil verbessern - das heißt den Gedanken verbessern, und gar nichts weiter! (提升風格 --- 意思是革新思考按呢 niā-tiānn)
朋友講「你敢正經無 bueh 閣使用面冊抑是徙來 IG？」
「正經」我應。
當初就是擘腹我閣繼續按呢龜怪落去 ē 佮遮 ê 規日纏綴面冊 ê 朋友關係 ê 拍歹去，所以堅持十冬 tsiah 綴 leh 使用面冊，使用十冬 mā 發見面冊並無需要我，我 mā 無需要面冊，按呢就放伊自由開始 bueh 一个仔一个通知「我 bueh 離開面冊」。
開始執行通知，我 tsiah 發現朋友無超過60个正經蓋好，是講我本底 ê 朋友無超過20个是按怎步頻湠甲 bueh 60个。
好玄是一隻貓，開始綴名單踅，這是學生時代就真 Má-tsí ê 朋友愛通知。
這个 tī 學生時代就無啥盤撋 ê 同學是按怎 tī 名單內底，起因我真清楚我 buē 烏白揣朋友來箍，除了彼年因為 bué 無票只好徛踮 Templo Expiatorio de la Sagrada Familia(西班牙聖家堂)附近若 kā 金金相那佮翁分張記憶中 ê 故事，
Kan-ta 知影情緒叨撚佮提情緒做劍之者，攏無法度佮理性做朋友，一个受人敬愛尊重 ê 人 m̄ 是一出世就有這款魅力，mā m̄ 是成做博士博或是十八港路行透透就有這个才調，彼是年久月深 ê 栽欉、翻草、薅草。
整理文章「鱈魚烘」想著 tsuē 冬前提 Cicero ê 句直透 tuì gún 翁講𪜶爸母 ê 病灶佮這站仔搪著 ê 代誌，遮 ê 代誌 mā 引𤆬我這件代誌，tī YouTube 搪著曾文溪電台 tī 曾文溪電台認捌韓滿老師，紲落來真好運 tī 博客來搪著老師 ê 作品《真情99》、《酒蜜100》。
酒蜜100是詩，我無仙氣兼頇顢100 pha 詩讀煞猶原若柴頭，無情緒。
韓滿老師是正式經過專業訓練 mā 是 tī 學校教學 ê 老師，m̄ 是咱這久手一伸出去就 ē 摸著 ê「老師」，凡勢是受著 Dr. 佮 Professor，Lehrer 佮 Meister 是無相𫝛分類 ê 影響，sòo-pái 我 tuì「老師」2 字 mā 有龜怪 ê 認定。
餾舊文想著韓滿老師 ê 文章就想 bueh kā 伊整理做一篇記錄，起因我真愛老師短短卻飽飽元氣 ê 四常散(Suánn)文。
短短飽飽元氣 m̄ 是 Die Philosophen haben die Welt nur verschieden interpretiert, es kommt darauf an, sie zu verändern(哲學家只是解釋這个世界，重點是愛改變這个世界)彼款 ê「心靈雞湯」是家己 ê 歷史是自由意識 ê 進步，tshan-tshiūnn〈啉咖啡〉下暗倒佇眠床頂，想講今仔日傱規工，定著會較好睏，毋過，煞反來反去睏袂去.....3點、4點矣猶閣咧篢更,到底是為啥代？較想嘛想毋知。啊！有矣，阮啉茶佮啉咖啡攏睏袂去，昨昏去咖啡廳啉咖啡，免講嘛就愛顧更。
餾舊文想著 Die Weltgeschichte ist der Fortschritt im Bewusstein der Freiheit mā 想著車日子㊡露營 tī Erfurt 搪著 ê 料小記持。
跤踏這塊土地卻 m̄ 捌這塊土地是一件真龜怪 ê 代誌，總是我 ê 龜怪佮其他角勢比並，窮實無算啥物。
M̄ 知影別人讀冊 ê 慣勢是按怎?
Gún 翁讀冊 kan-ta 讀伊有興趣 ê 部份，其他 ê 就放水流 buē 讀 buē 掀。
伊這款讀冊法捷 hōo 我笑講「無彩作者 ê 用心」，伊講「時間是錢，囉哩囉嗦 m̄ 免 kā 看」。
我看冊 ê 慣勢是冊一讀落去，m̄ 管愛開 luā tsuē 時間揣資料、請教字典彼字愛按怎讀佮彼是啥物意思，我攏決定 ē kā 伊 thang 篇讀 hōo tsiâu-tse。
Sòo-pái，讀小說我慣勢揣歇假日或是拜六佮拜日來讀，抑無照我這个若牛 ê 性地 ē 看甲翻點猶 teh 點燈膋(ting-lâ) kā 興趣成做苦毒。
寫著冊，我想著近來 teh 時行 ê 電子冊，試讀過一回，我猶原較佮意實體冊有 thang hōo 我劃巡，寫按原句牽藤 ê 葡萄。
另外，文學分類 tuì 我來講就敢若茶、Ka-pi、加味茶。
小說是烏龍茶需要時間回甘，詩是加味茶滾水一沖芳味隨現 mā 隨退，散文是 Express，小小一甌 si̍p 一喙酸甜苦汫透全身。
讀《拋荒的故事》第四輯，讀著「草囷/Tsháu-khûn」 hōo 我想著逐年熱人攏 teh 看 ê 麥稿，德文號做啥？
是--lah，buē iōng 就 buē 要意德文佮英文語辭愛按怎講閣較免講台語。
不過，我是連華語 mā m̄ 知 bueh 按怎講。
今若 m̄ 是 tī 拋荒的故事讀著草囷兩字，我 mā buē 好奇其他 ê 講法。
「親愛 ê George，我敢...」話猶未講甲畫圓箍仔(Punkte)，gún 翁隨紲喙講「我 ē 想辦法鬥相共。」
是--lah，George 是 gún-ê 暗號，我 mā kan-ta 有要事請教喙 tsiah-ē 遮爾仔甜 kā 伊叫 George Clooney。
「彼號德語 ê 草囷按怎講」我 kā 進前行尞翕 ê 相片提 hōo 伊看。
我離浪漫 ê 遠近就敢若地球佮海王星。
總是，我 ê 氣持ち tshan-tshiūnn 滇流洘流 tsiah-nī-á 豐沛。
詩我讀無路，m̄ 捌押韻，總是《愛情𥴊仔店》ê「夫妻」直透心肝穎生湠到 kā 人 Picasso ê 圖總是看做囡仔圖 ê 我，tī 天透殕閣濫金 ê 廚房見著自我求生存 ê 洋蔥隨想做 Bambai，想 bueh 軁入來做查某囝賊 ê 火鼠看做關老爺 ê 赤兔馬，窗仔外 ê 一葉一葉綴風飛 ê 葉看做法語講是冊，德語講是葉 ê 酥皮隨假包上身綴作者群寫詩。
整理文章讀著這篇佮《做伙走台步》𫝛時按臺灣寄來德國 ê 臺語文文學作品，有 tsuē-tsuē 感想。
外國文學冊櫥，詩本 kan-ta 彼本按公共冊櫥紮轉來 ê《Liebesgedichte》華文冊櫥無半本，台語冊櫥一大拖甲 hōo 我想 bueh 整理分張出去 hōo 家己有閣較 tsuē 空間囥日後行踏 ê 冊。
我無排斥詩，總是我 tuì 臺語文文學敢若敢 ē-tàng 用詩來表達...感覺...ok genug，後一位！
是，我 tuì 臺語文文學敢若敢 ē-tàng 用詩表達 ê 態度就 tshan-tshiūnn 讀著「毛毛 der、怪怪 die」仝款 buē 有啥物態度，起因我 m̄ 是彼支溫水罐 mā 無興 kā 家己縛 tī 仝一支柱仔。
詩文按怎寫，我 m̄ 是詩人 m̄ 是文學家 buē 曉分拆，總是迵過詩發表時間，有一種活 tī 原世界 ê 感覺。
小說好看甲無電影分鏡才調 ê 我有法度自動分鏡
窮實，我分 buē 清啥物是小說啥物是散文。
不過，我是按呢分類。
小說是虛構或是借魂踅殼 ê 寫作，散文是四常 ê 延續。
這幾日聽《阿愷之聲》EP73「文學烏亂濺」談著𪜶主持人阿愷家己佮溪州阿倫 tuì 小說 佮散文 ê 認知區別 hōo 我感覺，好里佳哉我 ê 認知無走傷遠。
這本小說 tī 我猶 teh 踅 Books ê 時就捌䀐(siam)過 m̄-koh m̄ 捌引起我 ê 興趣。
M̄ 捌引起興趣 m̄ 是羅馬字 ê 問題，起因 tī 遮一四界 tsiâu-tsiâu 羅馬字，連我 ê 名姓 mā 是羅馬字。
Sóo-tí 看著羅馬字 buē tshan-tshiūnn 見著 thi-bi 按呢著猴。
凡勢是年歲無相𫝛，搪著 ê 代誌 mā hōo 家己當做四常 ê huînn-ti̍t m̄ 管好佮䆀攏是鹿林長尾星一去 buē 閣翻頭，所以閣讀 Tagore 並無起 tsuē-tsuē 水泱(iann) tshan-tshiūnn 別人按呢。
Mā 有可能是家己 ê 雅氣無到彼个坎站，這久看彼久 m̄-tsiah 連佯青 ê 乞食攑蠓捽仔，假仙假觸、buē 博假博攏儉起來免捎魬(puánn)仔假赤鯮來賣。
既然按呢生，是按怎 bueh 閣寫糞埽話？
小鬼仔殼拔掉講家己話就是驚 hőng 笑咱無智識，遮爾仔優美雅氣 ê 詩，竟然讀甲無一屑仔挵著頂腹蓋。
是講，當翁綴 ' 新聞挖挖哇 ' 講「我後世人 bueh 閣佮你成做龍鳳」，失戀雜誌《幸福小鹿》彼段 hōo 我感動甲起雞母皮 ê 文句無閣倚來，德國現任外交部長 Annalena Baerbock 回答記者 ê End der Katzbuckelei 隨上身「你 ê 願望 m̄ 是我 ê 向望」。
烏貓姊年間 m̄ 管好䆀這世人就是嫁雞綴雞飛，嫁狗綴狗走一生伴一人，這久是等我成做尪仔冊 ê 女主角 tsiah 來實現這个藍色是天頂來 ê 保證(Das Blaue vom Himmel versprechen)。
這就是這个年歲讀浪鳥集翻頭看烏貓姊讀「漂鳥集」認捌著食老猶原愛戀愛 ê Johann Wolfgang von Goethe a.k.a. 歌德 --- Kein Genuss ist vorübergehend, denn der Eindruck, den er Zurückläst, ist bleibend(快樂無暫時，因為伊停跤 ê 印象是萬代久長)，人生無暫時，準做伊停跤 ê 印象是萬代久長 mā 無表示海水永遠是藍色。
智識無夠額，烏貓姊讀「漂鳥集」有讀 m̄ 知伊 bueh 表達啥，總是文字媠甲 hōo 我四界展風神「你敢有讀《漂鳥集》，你敢有讀」，中箍年歲讀「浪鳥集」文字就是記錄，就是 kā 往過快樂、悲傷遮 ê 人生記錄落來，無閣湠伊是媠 ê 語文，伊是雅氣 ê 文字，伊是...ABCDEFG，每一个年間有伊家己 ê 生張，遮 ê 生張終其尾就 tshan-tshiūnn 一粒石頭(Einstein) ê 智慧，時間是篩仔，伊 ē uī 我篩出答案，咱這久使用所講 ê 文字佮語言攏是時間篩出來 ê 頭篩仔、大色貨，總是遮 ê 頭篩仔佮大色貨按這个年間行尞到另外一个年間敢猶是頭篩仔、大色貨，時間 ē 決定，人類 mā-ē 決定。
我愛聽你唱歌，我 mā 愛唱，咱攏 leh 唱歌，只是咱 ê 懸低音無相𫝛按呢 niā-tiānn。
我 buē 講家己 ê 台語真𠢕講，總是伊是我自細漢講到今 ê 語言。
我 ê 年間無機會接受台語抑是客語教學，現此時有機會迵過教育部兩部辭典佮其他辭典學習台語佮客語，我感覺家己誠實是好字運。
雖罔，我 ê 客語自開始接觸學到今猶原離離落落，總是客語 mā 是我音樂庫 ê 一部份，而且有足 tsuē 美好 ê 記持。
自2019年開始寫台語文，我 buē 講家己 ê 台語文寫甲若 Johann Wolfgang von Goethe， 總是我 mā 無 kā 伊當做啥物形態 ê 品牌，我只是 kā 我上捷講 ê 語言寫落來按呢 niā-niā。
我家己 mā 知影，我有真 tsuē 文法纏綴華文書寫，認捌 ê 俗諺語 mā 少甲悲哀，總是我清楚知影每一个文字書寫攏是經過久長 ê 訓練，無一个人一出世就 ē 曉寫文章佮讀文章。
Sòo-pái 我真感謝家己出世 tī 這个年間，有機會學習 tsuē-tsuē 無相𫝛 ê 語言佮書寫，包括台語。
我唱過足 tsuē 歌，畫過足 tsuē 豆芽菜，現此時猶原有法度 kā 遮 ê 歌唱 hōo 較順，畫甲較媠寡--ê kan-ta Blog 書寫 ê 語言 - 臺灣台語、德國德語、無分類 ê 英語佮無 tī 書寫 ê 臺灣華語文。
聽亞特聊聊天「出版社不是影印社」其中一段，前衛出版社主編鄭清鴻先生分張伊希望台文冊未來有較 tsuē tshan-tshiūnn 愛情、推論小說 -- Scherlock Holmes 這類 ê 冊。
愛讀這類型 ê 我 mā tī 心肝穎大聲喝我 mā 是，我 mā 向望猶在世有機會讀 Arsène Lupin。
我 ê 第一本台文冊 m̄ 是小王子，是 tsham 伊同齊按臺灣注文 mā 請 DHL kā 我鬥寄到德國 ê 李恆德老師 ê 「彼年的熱天」。
李老師 ê 面冊是紲《我隨意，你儘量》作者王昭華 ê 面冊，我 mā-ē 去揣文章來讀 ê 迷眾頁。
雖罔，老師講彼是伊私人 ê 口座，總是無加伊面冊 ê 我是用 Fans ê 態度 teh 讀伊 ê 文章。
Sóo-pái 冊一寄到遮，我 tuì「彼年的熱天」ê 興趣大過 tsuē-tsuē 人討論佮推薦 ê 小王子。
讀冊無愛讀寫甲若「論文」ê「推薦文」、「𤆬讀」、「踏頭話」ê 我，因為好玄台語文 ē 按怎寫 sóo-pái kā 攢好 ê 頁數抽掉踅轉來「踏頭話」，無疑悟，無讀無代誌一讀雞母皮隨徛起來，規本冊猶未讀煞隨繼續上博客來揣其他 ê 台文冊 mā kā 面冊寫 ê 四常轉寫做台語文囥踮遮。
雖罔到今，我 ê 台語文猶原漚古 buē 輾轉，總是這是我 ê「臭頭仔囝嘛是家己的」，足愛老師 tī 踏頭話寫 ê 這段話。
Von allen Welten, die der Mensch erschaffen hat, ist die der Bücher die Gewaltigste.(Tī 人類創造 ê 世界，上強大 ê 是冊)
--- Heinrich Heine
看冊 ê 慣勢是照冊行跤到 ê 時間來讀。
M̄ 知影別人讀這本尪仔冊 ê 感想，總是讀這本尪仔冊 tuì 我來講是一帖十全大補湯，補我 ê 生疏。
特別是 tuì 囡仔時騎鐵馬經過攏 ē 好玄 ê 林家佮 tsuē 冬前綴朋友去踅萊園 ê 記持。
我 buē tuì m̄ 捌咱家己 ê 歷史感覺受氣，起因我原仔有機會認捌咱這塊番薯島 ê 歷史。
不而過原仔愛講，一寢開始我 tuì 這本冊並無好印象。
起因是白話字。
Tī 遮，我愛說明我 m̄ 是歧視或是討厭白話字。
不過，白話字 ê 使用者確實 hōo 我感覺...無好鬥陣。
我知影 buē-tàng 因為一个影生百个囝，總是早前猶原 teh 踅面冊，搪著白話字使用者誠實 ē hōo 人無想 bueh 著猴綴 leh 起童 mā-ē 起童。
M̄ 知影台語文愛按怎寫，總是讀《大士爺厚火氣》hōo 我想著 tsuē-tsuē 學語言 ê 人 ē 喋 ê 話題。
窮實 kā 法語佮德語學好，英語 mā 差不多精光--ah！
往過 kan-na 學過英語 ê 我對這款講法感覺傷譀古。
開始學德語聽法語、丹麥語佮德國 Sachsen 人講德語，我捷捷 ē 感覺若 teh 聽英國人講英語，只是聽無。
我 ê 意思是 tsuē-tsuē 法國朋友講 ê 法語攏 ē hōo 我想著英語，聽丹麥人講丹麥語佮德國 Sachsen 人講德語攏 ē hōo 我想著咱講 ê 雅緻英國腔。
這本《大士爺厚火氣》佮頂懸喋喋一大拖 ê 語言有啥物底代？
無底代，只是想著我 mā 真慣勢成做露螺 teh 循仝逝思考問題，像寢頭仔讀伊讀甲 tsham 賴和全集相𫝛 --- 袐結，起因我捎無愛揣台華佗一語來讀，雖罔伊有華文版，我就是無想 bue̍h 讀華文，畢竟伊 ē hōo 我願意撏錢就是因為伊有台文通 hōo 我練功，當然--lah，讀無伊佮作者一屑仔攏無底代，這 kan-ta 佮我 ê 語文深度有相干。
起因，我台語 lóo 華語 mā lóo 自然是讀甲一粒頭兩粒大 ê 無啥好做茶鈷呻呻呻。
非常好看 ê 小說。
按小說 ê 紋路 ē-tàng 看出語言 ê 變化。
雖罔，我並 m̄ 知影小說語法佮文字敢有調整到咱現此時 ê 語法，總是取台灣文學之父賴和先 ê〈一个同志的批信〉來做區別。
讀這本小說，我 ê 語言思路清清楚楚是台語，準做搪著日語 ê 部分 mā buē 轉過華文想法或是唸法。
讀《賴和全集》我愛拆白講，我智識無夠額，想 bueh 按台語思路讀，押尾齊齊 iōng 華文讀 tsiah 有法度理解佮讀甲順順。
是按怎會按呢?
わからない(Wakaranai/m̄ 知影) mā 無想 bueh 研究。
起因，讀魯迅 ê 阿Q 我 mā 讀甲足艱苦。
冊 ▪ Bücher ▪ Books (4) 露營 ▪ Camping (18) 行跤花 ▪ Ausflug ▪ Field Trip (3) 掠肥食譜 ▪ Rezept ▪ Recipe (20) 板膋收冬寫真 ▪ Ergebnisse der Gewichtsabnahme ▪ Weight Loss Results (1) 行尞錄 ▪ Aufsatz ▪ Eassy (1) 翁拋荒 ê 日誌 ▪ M's Blog (1) 電台 教學網站 閱讀天地 Podcasts 台客雙語輸入法 台客德日辭典 電視 其他工具 咱 ê 䆀筆尾 
