亂皂𥴊仔店 ⓂⒺⒾⓃⓀⒾⓄⓈⓀ

(2024.03.25 雞肉菠薐仔醬 + 秮仔 + 優格/647kcal)

階段，層次

Tshan-tshiūnn 每一蕊花，每一个少年

Tī 無相𫝛 ê 年歲，無相𫝛 ê 人生階段 ē 成做一朵新嫣 ê 花蕊

每一種智慧佮美德攏 ē 開花

Tī 伊 ê 年間 buē 接續透流

每一擺 ê 四常呼喚，心攏愛 

準備離開，重新開始

(2024.03.12 早起頓 蘑菇醬 + 德國麵猴 + 三文魚 + 優格/1067kcal)

熥食譜 mā 是一件有 14 ê 代誌，伊 hōo 我餾彼陣 ê 氣持ち mā hōo 我有機會停睏跤步踅翻頭看往過 ê 手藝敢有進步。

不過，自開始寫 Blog 我上大 ê 感受 m̄ 是遮 ê 事項是我若春天後母心，欲變一時間 ê 性地 tī 這段時間揣著四伨。

我𠢕衝碰 mā 𠢕衝動，sóo-tí 捷捷纏綴過了代 teh 踅金龜磨，我 ê 14 是 tuì 無佮意 ê 物抑是認為無重要 ê 物就隨 kā 伊擲糞埽桶清掉 ê 癖。

我 buē 講這个癖無好，總是我若 ē-tàng 閣小停跤愖一下，我 ê 頭殼就 ē-tàng 免踅翻頭愖遮 ê 代誌抑是捶心肝，呔 kā 擲掉抑是無予備(教典解釋日文是預備，不過我按厝內序大學著存後步，華語 ê 備份，英語 ê Copy)。

Blog 寫到今，無佮意 ê 物就愛清掉 ê 癖猶是佮我大麵炒圓仔，膏膏纏，不過 tī 這段期間我 mā 學著歐洲人 tuì 舊物保存 ê 態度，m̄ 是逐項舊物攏愛留，總是 bueh 摒進前愛停跤愖一下 m̄ 是隨擲掉。

寫 Blog 我 mā 學著心情放 hōo 冗，跤步放 hōo 慢，熥舊文大丈夫 ê 成做家己比設定我愛成做啥物款人來苦毒家己閣較重要。

像本底綿爛愛照曆日來鋪文，這久據在伊，起因有 ê Muse 猶 Unterwegs/半中站，buē 趕得。

(2023.12.16 早起頓 德國尖頭草花ひき肉蘑菇醬 + 優格/960kcal)

我無囡仔規日 m̄ 知 uī-hô 總是貼貼。

想 bueh 逐日讀淡薄仔書，時間已經 bueh 三更。

想講，敢是我開傷 tsuē 時間 tī 遮趖。

愖一下，mā 無。

透早起床款早起頓，窮碗箸、洗碗箸無偌久就閣 bueh 款暗頓。

Tī 遮趖 ê 時間，大部份攏是 bueh 倚軟晡。

按呢，我到底 tī 無閒啥物？

(2022.10.26 早起頓 酸 Khu-lì-mù 搵醬/172kcal)

一直掠做我 ê Blog 有鬼。

按呢講家己是較龜怪，總是我又閣揣無一絲線頭通解釋我這 hőng 投講 m̄ 知 tī 寫啥物碗糕 ê Blog 三不五時猶原有人來踅 hōo 我好玄甲一直按磅空行。

不過，m̄ 管我按怎行按怎走我猶原 tī 磅空底 m̄ 捌行出來。

總是，一粒石頭(Einstein)有講過，時間是品質上讚 ê 篩斗，伊 ē uī 咱篩選㧎牢 ê 問題。

Tshan-tshiūnn 這久 m̄ 知 uī-hô 又閣雄雄感覺家己閒甲 ē-tàng 掠蝨母就隨請教 Google 這个問題。

Google hōo 我足詳細 ê 答案，總是我頇顢讀無。

不過，我有搝著線頭。

(減肥早起頓 Lê-bóng 醬。檸檬醬)

踮這个小暑 bueh 行到大暑 ê 日子，醬料冰冰仔搵，蕃薯涼涼仔食，生菜淋寡橄欖油佮醋清清仔哺，一頓熱人 ê 早起頓除了消敨 tī 灶跤舞甲規身軀全重又閣有法度食傷青臊閣飽脹，這誠實是美麗 è 早起就按早起頓無毋著(moˇmˇcog)，另外按呢 ê 簡單食猶是食著我 ê 碗盤 ê 大四項 - 鱷梨仔是油，番薯是米糧，魚指是肉，ソース是優格(iu-keh)，正經蓋好。

不過而上美好 ê 代誌是按呢食，磅仔原仔一直 tuì 咱「食秤頭」hōo 咱暢甲 buē 顧得，繼續成做臭耳聾某聽 buē 著翁 ê 一日愛食六頓 ê 向前行。

是--lah，拄徙岫來遮 uī-tio̍h gún 翁 ê 喙白佮喙斗我有放棄家己 ê 四常來配合伊 ê 堅持 ，總是我猶是我，彼久 ê 放棄 m̄ 是表示我接受這个委屈，是我家己 mā 足好玄我敢有法度 kā 本底是食米 ê 喙斗轉做食麭。

一段時間 ê 探索我發見我 ē-tàng 按呢過四常，m̄-koh 這款四常猶原是接續 tī 臺灣 ê 日子，麭 tuì 我來講是啖糝、四秀仔 m̄ 是三頓，理解這个問題，這个佮翁對頭 ê 食食問題就 m̄ 捌閣纓纏哭呻 m̄ 願離開。

今仔日食這，翁講愛有麭，我講麭 tī 灶跤家己提，另外你若是嫌一透早就食魚，你 ē-tàng 家己款早起頓，起因我無彼个癖興 kā 人款三頓閣禁止別人食伊無愛食 ê 物。

Lê-bóng 醬

(2023.04.02 早起頓 菜蔬ひき肉焗 + 白醬 Gnocchi + 草莓弓蕉優格/1099kcal)

我是誠愛白醬，不過我 tuì 彼款敢若阿春姨肉羹 ê 白醬食無路來 mā 貧惰做。

一回踮遮看人料理，總舖師講伊誠愛白醬 m̄-koh 伊無愛白醬彼款𣻸甲若漉糊仔糜 ê 白醬。

Sóo-tí 若是伊家己 bueh 食 ê 白醬，伊 ē 按呢做。

就按呢，這份食譜陪伴我到今 mā 解決見若煮 Maggi 看著 gún 翁食無了一支喙 ē 詬唸 buē 離 ē 歹症頭。

只是我捷捷 ē 儉這个工 hōo 伊看起來無遐爾仔𣻸...

Iōng Blender 抑是果汁機 kā 伊閣絞 hōo 較滑溜 tshan-tshiūnn 印度カレー按呢。 

另外，我感覺寮仔チーズ比クリーム閣較著味。

(減肥早起頓 甜椒醬。彩椒醬)

踮灶跤款翕早起頓，伊翁倚過來講「angeben(展風神)」。

「Heh-me! So angeberisch(足愛展風神)」我應。

「自底就是愛 kā 展」翁知影我 tī 講啥 mā 綴 leh 造句。

正經是按呢，我寫 Blog ê 目的是 bueh 訓練家己 ê 筆尾 m̄ 是 uī-tio̍h 成做網衝，sòo-pái 我 buē 受著連蠓仔攏 buaih 來行踏 teh 鬱，起因我家己 mā 知影家己無彼號才調做網衝。

清楚知影家己 ê 問題，總是搪著相片我猶原無法度圓仔花 m̄ 知䆀，大紅花䆀 m̄ 知按呢賣茶講茶芳，賣花講花紅。

我按呢寫 mā m̄ 是 bueh 妝娗家己 ê 無無米留人客，無食假拍呃，枵鬼假細膩，假鬼假怪，我只是老實面對家己 ê 愛看媠 ê 虛華。

Tshan-tshiūnn 這份料理，本底掠做伊無啥特別就無想 bueh kā 攝張相做記錄。

(減肥早起頓 鱷梨仔 Quark 醬。酪梨起司醬)

Tsuē-tsuē 人講，看家己 ê 阿母抑是姊妹隨知影查某囡仔攏 ē 搪著 ê 問題「換冬」➀。

Gún 阿母 tī 我來洗進前身體猶少年，總是子宮荏就 hōo 伊提早下班歇睏，我兩个阿姊天公伯傷疼痛𪜶 mā 早早 kā 𪜶招轉去塗州賣鴨卵。

Sòo-pái，我無見本通參考來洗換冬 ē 生做啥物款。

總是，現代醫學發達佮人人攏是放送頭 hōo 我有機會認捌來洗準備 bueh 換冬進前 ê 症頭。

Tshan-tshiūnn 衛生棉 ē 愈來愈省。

我知影現此時有 ê 人 ē 講紮布，總是我 ê 年間無人 bueh iōng 阿媽年間 ê 物，sóo-tí gún 攏講衛生棉。

Mā 有人分張講身體 ē 捷捷感覺懶屍佮氣持ち磕 buē 著就起磅、睏 buē 落眠等等。

(2022.12.21 早起頓 鱷梨仔番薯烘 + Bombay 醬 + 林檎兔仔耳サラダ + 青豆仁湯/1021kcal)

當初參加 Medium 是踮鄭順聰先生 ê 面冊讀著伊 ê 台語文，sóo-pái 我就跟綴伊 ê 跤步加入這个生份甲㨨無線 ê 環境。

不而過，Medium ê APP 佮我一直是門扇枋鬥 buē 峇，致使我到前幾日 tsiah 有機會沓沓仔讀鄭順聰先生 ê 文章。

Tsa̋ng 讀著一篇「書」ê 文章 hōo 我感觸真 tsuē，因為我 mā 是一本冊 ē 讀幾仔个版本 ê 人。

不而過，現此時 ê 我 buē 閣 tshan-tshiūnn 往過按呢，一本冊 bué 幾仔个版本，起因國際運費足傷重。

Tshan-tshiūnn 這幾日想 bueh 注文寡冊來遮讀，冊費 buē hōo 我躊躇，運費 hōo 我想空想縫洗柝仔頭，像遮 ê 冊無 bué 真無彩，所以運費無算啥物。

我知，uī-tio̍h 運費 teh 艱苦罪過是 bueh 按怎佮人成做「文青」，總是祖先有交代凡事著愛先顧腹肚，才顧佛祖，我是乖囡仔一直遵守這个規則，準做冊錢 m̄ 是我出，我 mā buē 做阿舍冇手。

Kā 冊籃 ê 冊閣一斗排轉去冊櫥隨 tuì 出資者翁講「文青 buē-tàng 做飯食，準做錢 m̄ 是按我褲袋仔撏出去。」

(2022.12.28 早起頓 菜擴烘 + 馬鈴薯紅菜頭湯 + Quark 搵醬 + 菜蔬圓茄烘 + 鱷梨仔木瓜生菜盤 + 藍莓優格/739kcal)

透早讀著這條新聞 Ende der Katzbuckelei。

想著華語 ê 意思是『蕭規曹不隨』。

台語愛按怎講?

請教網路，捎無摠。

我想著這句 tī 《奪人 ê 愛》學著 ê 句 -- 隨人落米，隨人付鼎。

起因，𪜶是兩个完完全全無相𫝛理念 ê 政黨。

『蕭規曹不隨』佮「隨人落米，隨人付鼎「有像，鐵仔猶縛 tī 遐，只是設計改變。

(減肥早起頓 芳料草芥辣醬。香草芥苿醬)

早前撨 buē 好 ê Medium Daily。

今仔日透早青磅白磅來相揣。

我那看畫面那踅這一冬來我是 kā 啥物物拍交落。

按呢踅，時間竟然一目𥍉加一歲。

煞煞去，免想遐爾仔濟。

㧎牢 ê 步數現此時已經解決。

好好仔享受我追蹤 ê 文章較重要。

(2022.12.19 早起頓 番麥生菜盤 + 芳料草優格醬 + 煙腸林檎金瓜烘 + 果子生菜盤/883kcal)

無地選擇時，四常看 buē 入眼 ê Fish and chips 是珍饈(Tin-siu)。

認為白汫無味 ê 芳料草優格搵醬是伊 ê 神魂牽手。

芳料草優格搵醬

...... 材料 ......

優格　200g

芳料草　1EL

厝附近 ê 超市。

𪜶 tsit 禮拜推捒厝邊豐沛閣青臊 ê 料理。

Lán 逐項逐項斟酌看，逐項逐項細膩思量。

思量到落尾，無買半項。

起因 lán 知影，家己有相趁相喊 ê 歹癖。

所致，目睭 tō 愛擘 hōo 金、認真 tsîn，tsiah buē kā 驚驚 buē 著等囥 m̄ 著所在去。

紲來 tsiah 來想空想縫 sueh 苦尾 káng 扴味，來 si-á-geh 家己 ê 討債。

Lán ê 三千煩惱絲，已經 hōo 娘仔 tuà 一段時間 ah。

(2022.04.05 減肥早起頓 Tshì-sù 搵醬。起司沾醬)

讀著這條新聞，想著家己 tī 三十歲彼冬，我 ê 衫仔櫥清甲賰3領仝色牛仔褲、五領𫝛形 ê ua̋i-siat-tsuh、3領無仝色 ê T-Shirt、 一雙烏皮鞋、一雙白色運動鞋。

就按呢，仝形 ê 妝娗一路循環到今。

按呢敢 buē 傷過無聊？

Buē----neh~~~~~

我愛這款四常。

Tshì-sù 搵醬

(2022.12.17 早起頓 紅菜頭馬鈴薯雞摸烘 + Mozzarella Kam-má-too h番麥生菜盤 + 蒜頭優格搵醬 + 紅菜頭薑湯/771kcal)

日日應當攏是女人日

問我，第一位有印象 ê 紳仕是啥人？

Gún 爸爸。

自我有印象，gún 爸爸 m̄ 捌拍過某囝 mā m̄ 捌大聲 tuì 某囝喝來喝去。

除了彼改 hōo 皮蛇纏著 ê 伊，無代無誌按當 teh 讀小說 ê 我 ê 椅頭仔蹔落去 hōo 我規仙人按椅條仔倒頭栽，頭眩眩徛起身大聲 tuì 伊喝「我佗位做 m̄ 著代誌」。

伊無應話 kan-ta「哎」一聲，我 uī-tio̍h 這件代誌 tī 紲落來 ê 幾仔禮拜攏 buaih 佮伊講話 hōo 伊閣較捷「哎」。

這久想起來，彼陣 ê 伊應當是 hōo 蛇纏著失去理智，畢竟彼是伊第二擺 hōo 蛇纏著。

(2022.04.20 減肥早起頓 優格醬)

那煎紅菜頭餅那想等下愛配啥物款 ê 搵醬 tsiah-ē 敆味？

想仔想，啊，我想著矣!

來做 tī 德文有簡單做閣好食 ê  Ratzfatz 版本：優格醬。

優格醬《Ratzfatz》

...... 材料 ......

酸奶膏　200g