(2022.05.29 減肥下昏飯 橐袋仔麭 . Pita。中東口袋餅)
「話是風，字是蹤」佮人加話看 tsiâ 較𠢕一粒田螺煮九碗湯，不如揣答案。
因為翹頭查某我揣著掠做 phàng-kìnn ê 相片，因為 Muse 無 bueh 來泡茶，這久 ê 我捎無菜頭摠通挽就巡菜股翻田塗。
有 ê 菜股整甲媠噹噹，有 ê 菜股是稗(phuē)仔稻仔分 buē 清就據在𪜶生湠 --- 性命家己 ē 揣出路 tshan-tshiūnn 這菜股(麭.Brot.Bread)頂日仔 tsiah 整過，這久又閣踅翻頭整一擺，正經是食飽換枵，不過我愛我 ê 一尾蟲掠來尻川擽。
麭 tuì 我來講食無路，總是阿母有交代咱佮人牽手，咱愛入人門，順人意並尊存人 ê 一鄉一俗，sóo-tí 有一段時間我真骨力跟綴德國人食麭過日子，總是脾土這款物件就敢若離鄉，無離腔仝款，僫改。
豬屎籃仔 kā 提出來展一下 --- 進前做 ê 生鍋優格麭。
過了代 ê 食食歷史 m̄ 免咸豐三，講到今，不過我 tuì 華語講 ê『中東口袋餅』真有興趣，想 bueh 知影伊是按怎 hőng 翻譯做「餅」。
(2023.04.10 早起頓 牧羊人 Tshì-sù Pide + 卵包 + Bé-khòng + 兔仔耳紅菜頭生菜盤 + 檨仔優格/1021kcal)
那巡菜股那薅華稗(phuē)仔，我又閣成做一隻貓想 bueh 知影德文 ê Hirten，英文 ê Shepherd，華文 ê 牧羊人ㄇㄨˋㄧㄤˊㄖㄣˊ，Blog 跟綴線頂辭典寫 ê「看羊仔人」敢有新 ê 講法，起因「看羊仔人」這个辭目正經無敆喙斗。
教典自 2023-6-13 改版辭目新添 250 條到這久 ê 300 條，教典猶原若《倒風內海》沙喃 ê 族人 kā 人做犁翻田塗，自熟似教典就較罕得請教 ChhoeTaigi找台語 tī 這倚 bueh 2 冬 ê 這久閣 kā 伊請教一斗，當初這條「看羊仔人」辭目已經無法度再相見，換另外一个新朋友 hōo 我雙跤踏雙船，心頭亂紛紛，起因 tī 維基辭典 我 mā 揣著「牧夫/Bokufu」這个按日文來 ê 講法。
當心頭亂慒慒 kā 字唸出喙是上好 ê 解決方式。
牧羊人 Bo̍k-iûnn-jîn，綴愛台語 ê 發音唸，真紲喙。
牧夫 Bo̍k-hu 礙虐兼咬舌。
教典是沙喃 ê 部落，Google 是自荷蘭人行踏倒風內海 ê 萬千百樣。
(2021.11.01 減肥早起頓 Scottish Tattie Scones。蘇格蘭司康餅)
到今猶原 m̄ 捌行踏日不斜西，m̄ 捌去遐行跤花 ê 起因，我想應當是英鎊蓋貴。
總是，日不斜西猶原 ē 落山，現此時 ê 英鎊越來越細圓我原仔無出發是啥物因由？
窮實講我家己 mā 無啥清楚是按怎 ē 按呢生，總是我自囡仔時 tuì 𫝛款攏是講英語 ê 角勢就 kan-ta tuì 美國較有興趣，其他 ê 正經是鼻無佗一間厝有人放火 teh 燒。
是講，人生總有 hōo 你 buē 節 ê 意外，像 m̄ 捌 Malta(馬爾他) mā m̄ 捌認真研究英國文化 ê 我，人一行跤到 Malta 若 m̄ 是耳空猶閣利無重聽，我 ē kā Malta 準做是英國，是講，Malta 確實是英國 ê 楦闊，m̄ 管伊自本就情願抑是 m̄ 情願 tshan-tshiūnn 咱番薯島臺灣按呢，捷捷 hőng 當做是別人，總是 Malta 人若較成較愛家己，伊知影按怎順別人 ê 影湠家己 ê 實力，咱若較成 kan-ta 想 bueh 放捒家己隨成做心目中 ê 彼个人。
我 m̄ 知影 Malta 真實 ê 狀況敢是按呢，總是我搪著 ê Malta 人準做 ē 曉講英語 mā 是 kā 伊當做是外來語，顧腹肚需要 ê 語言無 tshan-tshiūnn 咱 buē-su ē 曉講這个語言就加足有氣質按呢。
我知影，我按呢講較無公正，總是這 mā 是事實，起因咱真比並語言 ê 懸低，敢 m̄ 是。
M̄ 捌行踏英國現此時綴 leh 做 ê 英國料理攏是按行踏 Malta 來，大部份 ê 英國料理佮我印象中 ê 記持無宛 2 體 ê buē 敆喙，準做是人人呵咾 ê 英國早起頓(Full English)我 mā 佮伊是門扇枋鬥 buē 峇 ê 食頭一日後尾 ê 早頓錢就 kā 伊當做寄付按呢安搭家己 ê m̄ 甘。
(2022.12.03 早起頓 羅馬萵仔菜生菜盤 + 麵生菜盤 + 鱷梨仔檨仔俗麭 + Oo-muh 卵/880Kcal)
拜六就是愛腥臊佮豐沛。
#記錄寫踮 IG ê 文字
鱷梨仔檨仔俗麭
...... 材料 ......
俗麭 4
(2022.11.26 早起頓 肉攕生菜盤 + 青豆仁卵燥𫝻 + 洋刺波俗麭 + 藍莓米芳麥角 Quark 甜路杯/1017kcal)
翁捷捷講俗麭 m̄ 是麭。
總是我 ê 耳空 tsham 伊相𫝛，總是一耳空入，一耳空出。
起因，俗麭若 m̄ 是麭是按怎德語 bueh kā 號做 Toastbrot。
這个問題 gún 進前捷捷 teh 討論，這久 ê 我𤺪甲連動一个仔喙唇攏貧惰。
原因，我已經理解這件代誌隨人有隨人 ê 廣東目鏡，我 m̄ 免遐爾仔要意每一个賣麵 ê 人按怎看人撒(suah)油。
1. Brot 就是麭。
2. 臺灣俗諺話：廣東目鏡 -- 隨人佮意
(19.11.2022 早起頓 水蜜桃俗麭 + 煙腸青豆仁湯 + 洋刺波鱷梨仔 Quark 甜路杯/1008kcal)
翁某做伙食早起頓，翁問「三十工結束，咱敢 ē-sái 閣來一擺這个挑戰？」
「按怎講？」我問。
「因為逐工攏有好食物」伊講。
「你意思是進前攏無好食物？」我問。
「M̄ 是--lah，因為這个挑戰 hōo 我發見家己一直蓋幸福，逐日攏有好食物，而且是媠某家己親手做--ê」伊講。
聽伊按呢講，我第一个想法想 bueh 刁意故訕削。
M̄-koh 這个想法 kan-na 一秒鐘，因為我清楚講遮 ê 話 tuì 我想 bueh 佮伊分張 ê 咱攏 m̄-thang hōo 固定 ê 印象掠鱟仔去 ê 想法是無任何幫贊。
(減肥早起頓 火舌烘餅。火焰烤餅)
我 ê 食食哲學 kan-ta 食了敢 ē 過敏佮喙尾食了敢有心花開。
翁 ê 食食哲學滓著𪜶爸母 ê 哲學，我上知影食食愛按怎食 tsiah-ê 健康綴我按呢食，我包穩你食 120。
事實敢是按呢，綴𪜶過日子就 ē-tàng 食 120？
我 m̄ 知影答案，總是我清楚知影，好里佳哉，早前 ê gún 一人蹛一位，我就 m̄ 免 uī-tio̍h 遮 ê 四常不時 teh 柴樠點火較光油。
2017 清楚知影手頭 ê 工課 m̄ 管我按怎栽欉伊猶原 buē 發穎隨辭頭路來德國好好做人某，sóo-tí 彼久掠做 m̄ 免要意 ê 門扇枋成做 gún 細膩莫去踏 ê 地雷。
總是，m̄ 管 gún 尤其是我，m̄ 管我較按怎細膩猶原捷捷 hōo 地雷彈甲跤斷一肢，手斷兩節按呢，不過我若蓋成有蟮尪仔 ê 體質，尾溜斷隨閣發出來按呢，規仙好好。
不而過，蟮尪仔做久 mā-ē 進化做有毒 ê 動物，我這支喙捷捷磕 buē 著就講寡剾洗 ê 話 hōo 我齷齪甲拚勢洗身軀，掠做按呢 ê 骨力 ē-tàng kā 身軀 ê 毒洗掉，總是代誌 m̄ 是戇人想 ê 遮爾仔簡單。
(減肥早起頓 俗麭弓蕉 Tsioo-kóo-lè-tò。香蕉巧克力吐司)
前幾日步頻發見現此時 ê 家己拍寫臺語 buē 閣 kan-ta 怙一項倉頡(Tshong-khiat)來拍寫台文，就隨放遐 ê 講「buē 曉羅馬字 ē 讀無台文 ma 掠無七聲八調」ê 壓力。
起因，學費撥落我 tuì 七聲八調猶原是菜頭捎無摠 m̄-koh 我有法度讀漢字 mā 有法度寫羅馬字，雖罔 m̄ 是百分之百，總是看寫踮遮 ê 文字無啥注記羅馬字就知影，漢字佮羅馬字 tuì 我來講 m̄ 是問題。
雖罔，我原仔 buē 曉標聲調 mā 走音。總是我講 ê 音敢誠實 m̄ 著，這無一个確定。
認捌這件代誌規个人輕蠓蠓甲連蠓仔攏比我較大隻，起因注音符號 tuì 我來講 mā 是鴨仔聽雷分 buē 清四聲按怎標，huînn-ti̍t 寫久伊 ē 家己倚過來。
接受家己 ê 問題，hőng 講咱 buē 曉呼七聲八調時，我 mā buē 閣有啥物特別 ê 情緒。
起因我清楚知影世間有 tsuē-tsuē 看無豆芽菜譜 ê 音樂家，𪜶無因為看無豆芽菜就寫 buē 出音樂。
(2022.11.27 早起頓 串仔 I-tá-lih 麵 + 玫瑰草花 + 藍莓寮仔 Tshì-sù 俗麭 + 藍莓檨仔麥角優格/1008kcal)
翁某做伙食早起頓我 tuì 翁講「我 buē 記得熥請 Google kā 我鬥寫 ê 英文，這久發見無人來交觀是一件好代。」
「我有來 kā 你交觀」翁笑應。
想 bueh 訓練家己 ê 筆力，一斗寫五種文字，前兩種文字猶算熟手 sóo-tí 寫甲順勢 buē 厭𤺪，換寫德文規仙人就隨開始刺疫更加免講紲落來 ê 英文。
總是英文無欠我 kā 伊鬥激頭腦，sòo-pái 德文一寫好勢，我就齊交 hōo Google kā 我鬥相共並信任 Google ê 專業。
Tsa̋ng 凡勢是揣著慢牛 sóo-tí 有耐性檢查伊 ê 厚屎尿，我一項一項繩，那繩那感謝遮是連蠓攏無興來 ê 角勢，起因紅字一大堆。
那改紅字，那繩怪怪 ê 家己是佗位 teh 怪。
頭一篇繩 buē 著，總是咱家己 ê 龜怪，總 ē 綴藥仔食 tsuē mā 升格做家己 ê 醫生節著脈。
（減肥早起頓 莓仔俗麭。莓果吐司)
我 m̄ 是超級食物 ê Fans。
不過，我 tuì 朋友分張 ê 超級食物總是保持 tī 火燒厝--有厝味(有趣味），比論講藍莓仔這類 ê 食物。
今仔日踮賣場看著落價 ê 有機藍莓仔隨捾一桶轉來 mā 隨 khop-pih 這份踅網路相片感覺伊誠媠誠有 14 就想 bueh 綴相片做來食 ê 俗麭。
我知，超級食物 ê Fans 若是看著我按呢食藍莓仔決定 ē 幌頭閣喝 M̄-THANG。
「你愛按呢食 m̄-tsiah 著」
「你愛按呢食 m̄-tsiah 健康」
「パン ē-tàng 食，總是食俗麭無好--lah」
(2022.05.04 減肥早起頓 墨西哥餅𩛩。墨西哥捲餅)
「料理無困難，因為你 ê 腹肚 ē kā 你講伊 ê 感想。」
這是按德國西南廣播電台 SWR3 讀著 ê 一段話，真佮意寫落來做記錄。
翁下願伊 bueh 食西班牙 Tortillas，我理解做伊 bueh 食墨西哥 Tortillas，竹篙鬥菜刀 ê 結果是兩个人攏揣著家己 ê 滋味。
雖罔，寢頭仔聽翁踅念我決定是刁意故 kā 伊聽做墨西哥版本起淡薄仔清瘼，不過，我清楚知影我 m̄ 是，sóo-tí m̄ 免 tsham 伊 ti 遐花這件代，我 kan-na 需要分張這件代「我 ê 西語若是遐爾仔勥，而且是勥甲 聽 ē 出腔口差，你敢著需要忍受情緒叨撚來成做翻譯，畢竟踮德國無啥物代誌是無料。」
伊聽我按呢講隨恬恬，無繼續剾烏枋 hōo 我慼。
「Mā--著，華文佮臺文我需要倚靠你，西文你需要倚靠我，咱無一个人刁意故 kā 情緒叨撚包裝做我遮爾仔愛你 ê 假仙假觸」聽伊按呢講，本底想 bueh 捎日本剾刀 kā 倒剾轉去 ê 我隨 kā 刀放下，成做喙抹蜂蜜 ê 人 kā 褒唆 mā 順紲呵咾家己 ê 貼心。
(減肥早起頓 Há-muh 水牛 Tshì-sù 法國俗麭。火腿莫扎瑞拉起司法國吐司)
收著光批請教我敢有意願接受訪問 mā 請我寫問卷。
四常 ê 我讀著光批抑是訊息 buē-su 火 bueh 燒到尻川遐爾仔趕 bueh 揣水來 kā 沃水 --- 隨讀隨回。
總是這斗狀況無相𫝛，這斗 m̄ 是四常五四三 ê 破豆，這斗是關係著 牛 m̄ 通𠢕行，人 m̄ 通出名 ê 大事件，特別是我這款歹戲鑼鼓濟，歹人家私濟 ê 人。
我知影有 ê 人準做家己 kan-ta 有豬屎籃仔 mā bueh 提出來品並，總是我較柝仔頭我無愛家己 ê 膨風水雞 hőng 刣無肉閣擲去大礐，這愛認真 kā 愖一睏...總是我是暗頭仔食西瓜，暝尾仔反症，食一喙茶隨有決定無米留人客，無食假拍呃 --- bueh 來捾豬屎籃仔 ka̋ng 品並。
Kā 我 ê 決定講 hōo 翁聽，翁隨講「我就講你是十肥九呆，無呆狀元才其中彼个無呆。」
「你足想 bueh 上電視--hooh」我笑應。
「想--ah，總是我清楚知影家己無彼个才調」翁講。
(2022.03.15 減肥早起頓 總舖師俗麭𩛩。脆脆三明治)
我愛食俗麭，翁看俗麭就敢若咱番薯島人 tuì 家己 ê 語言遐爾仔看 buē 上目閣刺疫。
早前，我認為凡勢是遮 ê 麭 tsuē 甲 hōo 伊 tuì 俗麭無興趣，尾來我發現我 kā 問題想甲傷過簡單閣樂觀。
伊無愛食俗麭 ê 理由真簡單，就是我頂頭寫 ê 句，準做伊講伊無按呢想，事實就是按呢。
「恁爸母 ê 德語較老抑是我？」一回 gún 翁又閣 teh 講「Gún 爸母 m̄ 是輕視....」跳過 m̄ 免閣餾，我直接 kā 𪜶爸母對待2樓序大挨拶 ê 態度搬 hōo 伊看，伊隨恬去。
大狗盤牆細狗趁樣，輕視者永遠 buē 承認家己看人 buē 上目 ê 月光下看人影
(2023.03.26 早起頓 土耳其 Tshì-sù Pide + 紫頭菜生菜盤 + 草莓優格/1035kcal)
Tuì Türkiye 料理有一款特別 ê 情感。
這个特別 ê 情感除了向時捌佮 Türkiye 人共事 tsuē-tsuē 冬掠外。
另外一个情感是有 tsuē-tsuē 按咱東爿來 ê 物食攏是愛按 Türkiye 超市 tsiah 有法度揣著敨放，敨放我 tuì 故鄉 ê 數念。
另外， Türkiye 超市抑是烘肉店 mā 是 hōo 我練習德文較無壓力 ê 所在。
這站仔 uī-tio̍h bueh 炸(tsuànn)油較罕得行踏土耳其超市揣寶抑是上餐廳享受較倚咱東爿 ê 脾土。
總是這回 tī 超市揣著低熱量 ê チーズ我想著 ê 法國焗料理 m̄ 是法國料理 ê Gratin dauphinois 是 Pide 。
(2022.05.16 減肥下昏飯 希臘餅𩛩 Πίτα。希臘皮塔餅/Pita)
今仔日是我第一回參加線頂交流會，寢開始真緊張。
因為，m̄ 知影 bueh 按怎關鏡頭佮 mái-kuah 緊叫無細膩行入鏡頭隨傱去洗頭鬃 ê 翁 kā 我處理。
不而過...hó-lí-ka-tsái，會議主持人有發現我 ê 頇顢隨 kā 我 ê mái-kuah 禁掉，真正感謝𪜶。
不過，押尾猶是請 gún 翁 kā 我關這爿 ê 鏡頭，畢竟我小面神歹勢出頭。
線頂交流會結束，我開始踅這个問題，咱若較成慣勢提一个角度來愖問題，tshan-tshiūnn 我並 m̄ 是刁意故 bueh 講臺語掠外 ê 語言，sòo-pái 無關 mái-kuah 抑是鏡頭，另外交流會 m̄ 是應當是交流呔 ē 蓋成學歷比並佮排斥任何 ê 可能性，tshan-tshiūnn 欠辭別人提供家己 ê 想去，主持者認為無適合隨刣掉閣加建議...
離開交流會我 kā 我 ê 感受講 hōo 翁聽 tshan-tshiūnn hőng 感覺傷過風神，伊講「彼是你 ê 人生分張 m̄ 是風神，總是我看你佮遮 ê 少年輩 mā 講甲真歡喜。」
「是--ah，是講甲真歡喜，綴𪜶 ê 跤步行就 ē 講甲足歡喜」我講。
(2022.05.24 減肥下昏飯 鱷梨仔寮仔 Tshì-sù 麭。酪梨新鮮起司麵包)
攢早起頓翁行過來講「你誠實是Grüne。」
「我 m̄ 是彼款捾籃仔假燒金 ê 人，我是 Blau」我講。
捎無某分張 ê 摠，總是一聽著 Blau buē 流清汗 mā-ē 隨倒退攄，總是伊知影某 m̄ 是彼款色 ê 人隨笑甲歪腰。
B1 ê 老師邀請 gún 遮 ê 捌 hōo 伊教過 ê 學生做陣參加 gún 倚位 ê 聯邦政府活動。
Gún 參加 ê 彼日，邦政府 ê 立法廳拄好開放民眾參觀，gún 遮 ê 參觀者就順導覽先生 ê 引𤆬踅入去四常真僫行踏 ê 立法機關。
邦政府工作人員簡單紹介民選 ê 代表按怎問政佮院長按怎主持隨邀請 gún 遮 ê 參觀者家己按目前 tī 邦政府運作 ê 政黨 --- 黃色(FDP)、紅色(SPD)、烏色(CDU)、綠色(Die Grüne)、藍色(AFD)組政府，我佮按 Ghana(迦納)來 ê 同學 m̄ 知按怎分組，押尾佮老師分做一組成做藍色政黨。
代起先，gún 三个人無一个人感覺佗位無對頭，等到其他政黨 ê 人笑講「向望有一日這个政黨真正有法度實踐這个畫面」gún 三个人 tsiah 鼻著鳥鼠(趣)味 mā 隨笑出來並認真向望有一日這个畫面正經 ē 實現。
冊 ▪ Bücher ▪ Books (4) 露營 ▪ Camping (18) 行跤花 ▪ Ausflug ▪ Field Trip (3) 掠肥食譜 ▪ Rezept ▪ Recipe (20) 板膋收冬寫真 ▪ Ergebnisse der Gewichtsabnahme ▪ Weight Loss Results (1) 行尞錄 ▪ Aufsatz ▪ Eassy (1) 翁拋荒 ê 日誌 ▪ M's Blog (1) 電台 教學網站 閱讀天地 Podcasts 台客雙語輸入法 台客德日辭典 電視 其他工具 咱 ê 䆀筆尾 
