亂皂𥴊仔店 ⓂⒺⒾⓃⓀⒾⓄⓈⓀ

(2024.04.03 早起頓 ひき肉韭蔥 Tshì-sù 湯 + 洋梨仔俗麭 + 優格/838kcal)

整菜股，有 ê 文字有法度接枝繼續生湠，有 ê 文字無適合 mā 揣無角勢通徙岫就 kā 伊𫞼原搭成做裝置藝術，畢竟遮 ê 文字攏是我 ê 圓湠圓。

整菜股翻田塗 mā 發見，來送罐頭个人，知著走錯地方，自家會同地圾帶回轉 ~ Wunderbar!!!

Wer mit Ungeheuern kämpft, mag zusehn, dass er nicht dabei zum Ungeheuer wird. Und wenn du lange in einen Abgrund blickst, blickt der Abgrund auch in dich hinein. - "Jenseits von Gut und Böse" 

--- Friedrich Nietzsche

Tsiâ 佮妖怪戰鬥，愛張持 tī-leh 戰鬥 m̄-thang 綴伊成做妖怪。

(2024.03.26 早起頓 白鳳豆菜蔬魚湯  + 草莓俗麭 + 優格/1102kcal)

越轉身讀2冬年前 ê 家己 --- Sauer macht lustig.(酸製造歡樂)....

早起頓 ê 莓果酸甲我成做 Troll。

Gemischt Sprache ist auch lustig.(透血 ê 語言 mā 𤆬 hōo 人快樂)

透血 ê 語言 hōo 我宛然露台頂 ê 厝鳥，安然自在食遮食遐一霎仔攏 buē 喙白。

Tsa̋ng 是歐州跤球賽上落尾一局。

Italia 對 England

我聽 ê 電台自一透早就 tī 放送兩國人民 ê 想法 mā 一直 tī 毒兩國 ê 歌曲。

(2023.11.24 早起頓 варе́ник-Wareniki 湯 + Quark/1097kcal)

敏豆或是敏豆仔？

蘑菇 bueh kā 寫做羅馬字抑是漢字？

華語的炒米粉 tī 台語愛成做米粉炒 tsiah 是名詞，綴華語講 ê 炒米粉是動詞...

我自囡仔時攏講「阿春姨，我 bueh 米粉」，上𠢕炒米粉 ê 屘妗 mā 是攏按呢問「bueh 食米粉 bő」m̄ 捌加一个炒，除非食「澹--ê 」--「米粉湯」。

這是參加線頂活動捷捷搪著 ê 建議，我無反對遮 ê 建議，起因加一个建議加一个智識，總是我 tuì 我講 ê tsiah 準算真反感，反感甲本底想 bueh 佮遮 ê 人做朋友，押尾連䀐一下攏無興趣。

過了代 ê 代誌 m̄ 免咸豐三，講到今，總是頂懸 ê 哭呻 m̄ 是 teh 熥往過 ê 故事。

敢無熥哭呻，有，確實是有 teh 熥，不過彼是因為這篇無 bueh 愛 ê 食譜有這段「敏豆或是敏豆仔？」，「蘑菇 bueh kā 寫做羅馬字抑是漢字？」hōo 我認為伊峇這个食譜。

(2023.12.14 早起頓 野菜雞肉番麥洘湯 + 王梨鱷梨仔盤/908kcal)

Tsa̋ng 步頻想著這件代誌，想 bueh 綴《醫師好辣》推薦 ê 5:2 減肥法 mā 愛知影家己一日到底是食偌 tsuē 物件，抑無想 bueh 利用這个方式來食油秤頭 mā 是 kan-ta 做暢做心酸 niā-tiānn。

是講我本底 mā 無愖著這點，起因我攏 mā 捎 Feeling 來做水尺，既然是遮爾仔大範 ê 腹腸是按怎雄雄鳥鼠趖竹篙，一目過一目 ê 斟酌？

講起來 mā 無啥物特別，就是 gún 翁講「糋膩瓤 m̄ 著簡單，只要願意做牛羊抑是成做厝鳥仔按呢食食，磅仔自然就 ē hōo 咱唬過。」

熟似伊 m̄ 是一工是十外冬，看伊一時仔是脯脯 ê 雞胿，一下仔 buē-su 趕 buē 上夜市 ê 灌風雞胿，神經較大條 ê 人 mā 知影伊分張 ê 藥方若是有應效這久 ê 伊 m̄ 免綴我糋膩瓤，起因伊 ê 食食百分之 70 攏是牛羊佮厝鳥仔食食，另外成做牛羊若有法度保持瘦抽，伊佮伊做 100% 牛羊 ê 小妹早著瘦田𠢕欶水 ê 啥物號做肥朒朒圓棍棍 gún 攏 m̄ 捌。

伊 ê 自我感覺成做我 ê 照妖鏡佮點拄，起因我 mā 好玄家己是按怎 tī 遮食甲比臺灣閣較少顛倒歕雞胿，而且冬外歕 bueh 15 公斤。

我知影，查某人過一个歲數腹內 ê 柴樠較僫點火 hōo 伊光油，總是伊 mā 猶未行到連 kā 滴幾滴油猶原挓 buē 著，這其中決定有貓膩，只是頭腦無踅抑是無人點拄，人行入菜頭園較挽 mā 是挽無一欉 ê 無較縒。

Tsa̋ng 暝聽翁按呢講我想著 tsuē 冬前讀著 ê 分張，一个查某囡仔想 bueh 糋膩瓤 m̄-koh 無想 bueh 枵腹肚，伊就逐工記錄家己 ê 食食，我 ê 記持若是無走精去，伊彼陣 ê 食食熱量是一日無超過800卡，遮一塊 40g 脂肪(tsi-hong) 45% ê Butterkäse(チーズ.tshì-sù) 就132卡是半碗飯 ê 額，一想著這件代誌隨掠著一年膨風 bueh 15kg ê 漏 mā 隨決定 bueh  記錄家己 ê 食食，huînn-ti̍t 食譜 ē 照寫，加一个工記錄一下仔數字 buē 減我幾塊肉，另外有文獻記錄 mā tsiah 有資料通對照，是 gún 翁 ê 牛羊厝鳥食法較有應效抑是我 ê 豬仔無揀食食法較有應效 。

(2023.01.17 早起頓 Bé-khòng 梨仔金瓜サラダ + 雞肉サラダ + 青豆仁湯 + Stippmilch/933kcal)

後台原仔有 tsuē-tsuē 食譜，總是這久 ê 心情 tsham 彼久 ê 心情已經無相𫝛，sóo-tí buē 閣想 bueh 繼續寫食譜。

不過，食食 ê 相片猶原愛翕。

我想愛翕 ê 緣故應當是迵過相片 ē-tàng 發見家己 ê 食食變化 mā ē-tàng 發見家己自寫 Blog 以來 ê 改變。

清彩到計較，計較甲學習按怎搝絚佮放冗。

青豆仁湯

...... 材料 ......

(2023.01.16 早起頓 雞心豆 Kam-má-tooh 湯 + 豆腐蘑菇炒/660kcal)

這款問題喋甲生菇 ê 𤺪，總是 mā 是 buē-tàng tsua̋nn 按呢抨 leh 無 kā 處理。

Bueh 出門處理病灶進前，gún 翁又閣 uī-tio̍h「一仙」無儉著 teh 跳童，我猶原想 bueh 維持 gún-ê 姻緣 sóo-tí 欶一口氣隨 kā 耳空門關起來。

伊見我無出聲掠做 ē-tàng 繼續成做茶鈷呻 buē 離，就繼續呻。

雞卵密密也有縫，睏去 ê 火山 mā 有精神 ê 時陣「我無霸佔你攄 APP 就 ē-tàng bué 俗價衛生紙 ê 時間」看伊彼支喙已經成做𪜶老母 ê 魚仔喙，我按馬西馬西醒過來，因為我清楚知影我家己無𪜶老爸 ê 好性地，有法度看𪜶老母按呢規世人。

「Gún 講一擺做忌，一擺少人，伊 ê 意思是講越來越無仝心，咱現此時 ê 狀況 mā 差不多 bueh 行到完全無仝心」我講。

聽著雞母 teh 啼，伊隨講一大拖沙 mā 掠做我 ē 接受伊遮 ê 沙，我若猶閣 tī 悲傷內底我 ē 接受伊 ê 話屎，總是阿母轉去塗州賣鴨卵 mā 11 冬，閣較頇顢生卵 ê 鴨母 mā-ē 生卵，見伊猶是 buē 曉駛船嫌溪狹 m̄ 願講句「失禮，我又閣著猴、起乩」我學遮 ê 學生囡仔指二指表示我 bueh 出聲，伊彼支魚仔喙 tsiah 願意讓 hōo 我。

「你 ē-tàng 繼續喋你是 uī-tio̍h bueh hōo 咱有閣較好 ê 生活，總是我捌講過我 m̄ 相信遮 ê 錢有法度 hōo 咱儉著一間厝，起因你儉 ê 一仙拚 buē 過你送出去 ê 虛華。」

(2023.01.11 早起頓 紅菜頭雞豆湯 + 番薯飯 + 菜擴雞肉 + 弓蕉時計果優格/989kcal)

頂幾日佮翁冇談面冊股價大落，凡勢有一日伊 ē 成做一陣風飛到別 ê 世界。

今仔日讀新聞，我隨 tuì 翁講「臺灣有一句俗語，龍交龍，鳯交鳯，隱痀--ê 交侗戇。」

「啥物意思?」伊問。

「𤆬頭 ê 是這款龜鱉叨趖 ê 性地，伊 ê 花園是 bueh 按怎種出蓮花」我講。

面冊威脅 bueh 離開德國應當講是歐盟，雖罔現此時 ê 伊 tsiah tuì 德國一國喝聲，而且是針對德國無對其他國家，歐盟猶是有其他 ê 國家 mā 真期待面冊離開，像法國。

法國 tī 面冊 tuì 德國按呢「提醒」mā 隨發聲明歡迎面冊主動佮𪜶分手 hōo 面冊食 ê 塗愈厚。

面冊 ê 問題我無研究，總是我清楚知影自面冊要求歐盟使用者 bueh 使用 What's APP mā 愛使用「面冊」彼一日開始，伊 tī 歐盟 ê 業績就愈來愈少，愈來愈少，這久閣有底氣按呢喝聲，這底氣是按佗落來 hōo 我又閣成做一隻貓想 bueh 研究，不過這个想法 kan-ta 閃過一秒 niā-tiānn，起因這款耍法逐日攏 teh 看，而且看甲𤺪。

(2023.02.01 早起頓 德國馬鈴薯炒 + 煙腸 Glausch + 西洋萵仔菜サラダ + 洋刺波優格/891kcal)

翁有一个朋友願意行踏東爿就是 m̄ 願行踏𪜶家己厝內 ê 東爿。

一回翁某做陣去𪜶兜做客，聽伊分張伊佮男朋友行踏柏林 ê 感受 hōo 我一直想 bueh 開喙，總是我清楚知影我講出去 ê 話 tuì 伊是六月蚶 ê 臭，就綴東柏林成做伊 ê 新婦仔恬靜按呢聽伊講故事。

「M̄ 管是 DDR、BRD、Preußen 攏已經成做是歷史名辭，恁朋友煞猶原 teh 佮遮 ê 歷史計較，車到遐是 DDR 愛翻頭轉來 BRD 是有遐爾仔痴迷 Deutschland 83~89 是 m̄」我講。

翁無應話起因早前 ê 伊 mā 是𫝛款 ê 態度「Wir sind das Volk」kan-ta tī BRD，總是我 ē-tàng 理解翁彼久 ê 想法，畢竟伊成長 ê 環境是冷戰年間 mā 無親人 tī 東爿，伊 tuì 德國 ê 想法就 tshan-tshiūnn 我囡仔時搪著 tsuē-tsuē 排斥按中國來抑是芋仔番薯 ê 人相仝，有伊固定按教育來 ê 想法。

是講，呔 ē 無事寫翁朋友 ê 代誌？

Mā 無啥，就拄好款這碗按東爿學來 ê 食譜，就順手 kā 寫落來提醒家己 m̄ 通成做彼款 kā 家己 ê 好字運當做是理所當然來看人無目地 ê 人。

咱攏是人，m̄ 管咱疊啥物色緻，咱攏是人。

(2023.01.14 早起頓。Ka-lí 雞心豆 + 敏豆 Falafel/799kcal)

翁無 tī 厝 ê 早起頓竟然比伊 tiàm 厝 koh-khah 僫款。

不過 m̄ 管僫款 ia̍h-sī 好攢，我 uân-á 意愛食燒 hut-hut、jia̍t-phut-phut iū-koh ē 哽胿 ê 早起頓，Iah-bô 規工 ē tsiânn-tsò 鳥鼠 kap 狗。

總--是 tsit 斗笑詼--ah，翁 ê 便當攢好勢了後我 suah 踅神 m̄ 知家己 bueh 款啥物 ê 早起頓。

揣紙條仔 ê 記錄，lán kan-ta 寫翁 ê 部份無寫家己 ê 早起頓。

Tse 表示我 tsiann-si̍t 用心「以夫為貴」 -- tsiah 怪。

四常 lóng 是一斗款兩个人 ê 額真 hán 款一个人 ê 額，sóo-tí 久--來 tō tsiânn-tsò Übung macht den Meister➀...tsheh，烏白鬥句掠做家己真五仁。

不過，mā 是兩个人 ê 額攢 kah 慣勢 tsiah hōo 家己 buē-kì--tit 家己 ê 喙斗。Iáu-m̄-koh khah 大 ê 因端應當是 -- 我 tuì A-tsiu ê 食物無 hiah-nī-á 大 ê i-nāi。 

(2022.12.18 早起頓 Kam-má-tooh 番麥炒 + 菜蔬雞摸 lóo + Thoo-má-tooh 菜蔬湯/776kcal)

一目𥍉 Pixnet ê 口座 mā 開 bueh 3 冬，一目𥍉 tiàm 遮 mā 寫 bueh 500 篇 ê 文章。

這久越頭看彼久我 ê 感謝 tsuē 過規腹火。

我感謝彼久 hōo 我建議 ê 人。

雖罔，彼久 ê 我見讀𪜶 ê 「建議」見心狂火著甲吐血。

總--是，換另外一个角度遮 ê 建議 mā hōo 我發見我家己 ê 想法佮需求。

我 m̄ 是家己揣𪜶 ê 寶地，我是 hōo 𪜶箍仔內 ê 人 gún 朋友招去𪜶遐 kā 𪜶鬥伨鬥數字，我 tuì 迵過𪜶遐得著人望一屑仔 lóng 無興趣。

起因，我有家己固定 ê 工課，我 m̄ 免 uī-tio̍h 得著別人 ê 目睭仁 tī 遐舞 m̄ 知結果 ê 事項。

(2023.01.12 早起頓 煙腸サラダ + 番薯紫菜頭 + Kam-má-tooh 雞豆湯 + 寮仔チーズ醬/1089kcal)

陳耀昌醫師 ê 福爾摩沙三部曲按2019年 uì 臺灣飛來德國一頁攏 m̄ 捌掀過。

寢站仔冊櫥按 Books 買 ê 冊 90%是台文詩讀甲人真厭𤺪，揣著 ê 新冊店踮遐注文 ê 冊猶原 tī 路頭，m̄ 知底時 tsiah ē 到位。

想 bueh 問翁敢有閒載我去抾字紙遐揣冊來讀。

當 bueh 問一想--著最近來 ê 疫情隨放棄。

熥一斗冊櫥 ê 冊 tsiah 想著遐 ê 自2019年按臺灣寄過來 ê 冊猶有 tsuē-tsuē 本攏猶未讀，按呢我就清彩揀一本來讀。

講清彩揀一本 buē-su 家己偌爾仔厲害。

清彩揀一本是揀來揀去原仔 m̄ 知我到底 bueh 讀佗一本，起因 tuì 華語書 ê 興趣漸漸較無向時 ê 厚。

（5:2 減肥下昏飯。ベーコン林檎酸菜湯，培根甘藍酸菜湯)

Das ist zum reinsetzen(好食甲喙舌觸 buē 離)。

拜六，歇睏日。

翁某做伙食早起頓，翁雄雄 puh 出 tsit 句話 hōo 我心花開。

不而過，lán 六--月蚶，開喙臭，無 tsiâⁿ 做日本剾刀規身軀 tsiūnn。

Tse 號做鳥媠在毛彩，人爻在腹內➀(華：不可以貌取人)，我 kóng。

M̄-koh...

話一 kóng suah，我 mā 剾著家己。

(5:2 減肥下昏飯。Tik-kok 草花馬鈴薯湯，甘藍馬鈴薯湯)

生活是藝術，m̄ 是商品。

前站仔讀「拋荒 ê 故事」，其中有一葩故事寫著 tse hōo 我感受 tsiânn 深，順紲引𤆬我踅 tńg--khì 看 hit 段，因為 bueh 結束過冬鳥 ê 日子湠出--來 ê 記持。

Hit-久 ná 做 ná mē 家己是惹蝨上頭扒➀。

離開了後 tsit 段時間 tsiânn 做一面鏡提醒我，m̄-thang tuè tsia--ê 䆀猴做陣龜叨鱉趖。

Tsit 久翻草看 hia--ê 日子，真心感謝 tsia--ê 藝術品，無計較任何代價𤆬我看藝術品、品藝術。

➀華：自找麻煩

(2023.01.22 早起頓 Maultaschen 德國酸菜湯 + カレー雞豆湯 + Pē-kng 王梨 Sa-la/756kcal)

Ài 看 koh 嫌飫。

M̄ 知 uì 佗落揤著雷公摃歹人 ê 頻道。

不而過，自揤著就牢 tī--hia。

Sui-bóng，我無讀「出師表」，m̄ 知頭尾。

猶原按呢菜頭 m̄ 知摠 tuè lih 逐。

Hōo 我想--著時間一到，定著 ài 看 Tagesschau iā sī Tatort ê 朋友。

起因，tsit 規日我 mā 是按呢，tiàm YouTube 看著有雷公摃歹人，決定 ài 揤入--去看，無看 ē 礙虐。

(2023.01.21 早起頓 Pē-kng Bá-tah 菜蔬 Ì-tāi-lī 麵 + 番麥牛奶湯 + 刺莓仔 チョコレート Yogur/860kcal)

雪 m̄ 來，冬 bueh 至

日走覕，月 m̄ 妝

天鬱鬱，地澹澹

伊短䘼，我肉粽

坐𫝛椅，蓋𫝛被

伊充電，我褥紙

雙人一雙耳

(2022.12.28 早起頓 菜擴烘 + 馬鈴薯紅菜頭湯 + Quark 搵醬 + 菜蔬圓茄烘 + 鱷梨仔木瓜 Sa-la + 藍莓仔番麥麥片 Yogur/739kcal)

Tha̍k 著王力宏離緣 ê 消息，寫著大家 hām 新婦 ê 問題。

Sui-bóng，媒體 phīng 無寫著大家 kap 新婦之間搪著 siánn-mih 問題。

不而過，tha̍k 著 uī-tio̍h 序大人離緣，感受 tsiânn 深。

起因，我 mā 是 uī-tio̍h gún 翁𪜶娘彌 tsham 伊談離緣。

只不過，我凡勢 khah 好字運。

Tī 我按算 bueh suî 人付米 suî 人落鼎前，gún 翁家己先筅黗。

抑無，gún ê 翁某情 mā 是 ē uī-tio̍h 𪜶兜 ê 三斑魚舞 kah 離經。

(2023.02.16 早起頓 蜂蜜 Kài-lua̍h 炒麵 + 法國洋蔥湯 + 林檎 Tsioo-kóo-lè-tòo/815kcal)

朋友為著一个 hōo 生份人揤「無佮意」規仙人氣 tshuah-tshuah，四界揣人 tâu tsit 件代誌。

Lán m̄ 知其他 ê 人按怎回應，lán 是腸仔直透到尻川，lán buē 刁意故行過花園(Durch die Blume，轉彎踅角) ná 假看花 ná 講話。

「你 ē-tàng 四界 kā 生份 iā-sī 熟似 ê 人揤無佮意，別人 mā ē-tàng kám m̄ 是」lán 講。

「揤無佮意 ê 人定著無讀我寫 ê 物件」朋友應。

「別人 tsiah 寫三个字 ê 文章 tō ē hōo 你嫌鎮地浪費你 ê 時間，無的確 kā 你 揤無佮意 ê 人，伊家己 mā 有相𫝛 ê 問題，清彩揤」我講。

「啥人講我無讀，別人 ê 文章我逐篇 lóng mā 讀 kah tsiok tsiâu-ûn。」

我無想 bueh 浪費我 ê 時間 tsham 伊喋 tsia--ê 問題 suî 送伊一个笑面，紲--落來 tō 據在伊選擇 kám bueh 繼續 tsham lán 分張伊 ê 受氣。

(18.01.2023 早起頓 三文魚菜蔬烘 + ベーコン菜擴湯 + 雞肉卵 Sa-la + Tshì-suh Ì-tāi-lī 麵/1162kcal)

檢采是天氣 ê 關係，致到近來 ê 心情 tsia̍p-tsia̍p 起雺霧，tsia̍p-tsia̍p 有鬱雨， 罕得摸著日鬚。

我無鬱症 mā 無烏白亂想。

M̄-koh，tsit 段時間我 tsia̍p-tsia̍p tī 想，gún pā-pā 一个人 tī 台灣 hām 他鄉變家鄉 ê 過程。

想 bueh kā tsia--ê 心情寫落來 suah 捎無一个摠。

Pē-kng 菜擴湯

...... 材料 ......

(2023.01.25 Bé-khòng 蘑菇炒 + Bé-khòng 指頭仔麵猴 + 德國塗肉林檎湯 + 藍莓麥角優格/1022kcal)

目睭已經慣勢手機仔一𫝻攏是若 VOGUE、GQ 遮 ê 食食面肉，準做我憢疑這久敢有人 ē 按呢食一頓飯，像一碗湯邊仔囥一支蔥、馬鈴薯、蘑菇遮 ê 猶是生 ê 物，總是遮 ê 相片就是媠甲 hōo 你 buē 去愖好心 m̄ 免食菜，朋友好 m̄ 免結拜 ê 一跤好鼎比過萬矸花瓶(hue-pân)。

我 m̄ 知影全世界 ê Google 敢相𫝛，我 ê 14 是手機仔一𫝻隨見著 Google 推薦 ê 文章，像新聞、食譜遮 ê 推薦，起因往 tī 臺灣 bué ê 手機仔無這个服務 m̄-koh 面冊、IG 牢 tī 畫面，遮 ê 社群媒體 ē-tàng 刣掉是人徙岫到德國 tsiah 發見 ê 秘密，是講這敢是秘密，這只是家己無動頭腦愖問題 niā-tiānn，像阿駿分張 ê 奶喙仔理論 --- 別人窒啥，嬰仔就食啥 buē 反抗，甚至 ē 牢。 我無牢社群媒體，不過當人 tī 遮換新手機仔 tsiah 知影遐 ê 物件 m̄ 是巧機仔 ê 固定腳數，所以巧機仔 ê Google 服務敢全世界攏相𫝛，我 m̄ 知影，總是德國版本就是按呢，而且 m̄ 管行到佗落，永遠是德國新聞，不過有一站仔人 tī Ulm 走跳，彼陣 ê Google mā-ē 推薦法國新聞，Ulm 無倚法國抑是瑞士，是按怎捷 ē 出現法國新聞到今我猶是捎無摠，起因我是法語文 ê 青盲牛 buē 揣法文資料。

目睭已經慣勢 " Roberto " 內底 ê 姑娘目看著 ê 世界，所以當我見著完全無頓粉上胭脂 ê 推薦隨驚甲喝救人。

「發生啥物代誌?」翁隨按客廳過來房間問。

「我 ê 巧手機仔中毒」我隨 kā 畫面𫞼踮伊 ê 烏白目仁。

翁徙一下仔位斟酌繩一睏講「你 ê 手機仔完全無問題。」

「你確定」我目眉毛那挑懸，目那眯做一線問。