亂皂𥴊仔店 ⓂⒺⒾⓃⓀⒾⓄⓈⓀ

(2022.12.17 早起頓 紅菜頭馬鈴薯雞摸烘 + Mozzarella Kam-má-tooh 番麥生菜盤 + 蒜頭優格搵醬 + 紅菜頭薑湯/771kcal)

日日應當攏是女人日

問我，第一位有印象 ê 紳仕是啥人？

Gún 爸爸。

自我有印象，gún 爸爸 m̄ 捌拍過某囝 mā m̄ 捌大聲 tuì 某囝喝來喝去。

除了彼改 hōo 皮蛇纏著 ê 伊，無代無誌按當 teh 讀小說 ê 我 ê 椅頭仔蹔落去 hōo 我規仙人按椅條仔倒頭栽，頭眩眩徛起身大聲 tuì 伊喝「我佗位做 m̄ 著代誌」。

伊無應話 kan-ta「哎」一聲，我 uī-tio̍h 這件代誌 tī 紲落來 ê 幾仔禮拜攏 buaih 佮伊講話 hōo 伊閣較捷「哎」。

這久想起來，彼陣 ê 伊應當是 hōo 蛇纏著失去理智，畢竟彼是伊第二擺 hōo 蛇纏著。

不過，三十外冬前醫學無遐爾仔發達，無人知影生皮蛇 ē 湠出啥物病症 kan-ta 知影 hōo 伊踅一輾，人就上西天，sóo-tí 大多數 ê 時間攏 teh 注意蛇趖到佗位佮愛按怎蹔蛇頭，無人斟酌糖尿病湠出來 ê 免疫力問題。

阿母見我按呢 m̄ 佮伊講話 m̄ 知影愛按怎做，押尾凡勢想著皮蛇病人 ê 無爽快 kā 我叫去開講「恁老爸若是無愛你，伊 buē kā 你換轉來閣 tuì 恁阿媽講，我是確實是向望查埔囡仔來，這久準做抱出來 ê 囡仔 m̄ 是查埔囡仔，我 mā buē uī-tio̍h 厝內愛有一个查埔囡仔 kā 我 ê 骨肉佮別人交換。」

從來 m̄ 捌聽阿母講過這件代誌 ê 我，一時 m̄ 知愛按怎反應，阿母接續講「若無恁老爸，我這久 m̄ 知你是生抑是死，畢竟無人有法度保證，別人 ē kā 咱 ê 囡仔惜命命，這 mā 是恁老爸 kā 恁阿媽講 ê 話，這久我 m̄-tsiah 免掛心恁過了好無。」

 知影家己險險成做別人兜 ê 囡仔，我愈 m̄ 知影 bueh 按怎反應，阿母紲落講「生皮蛇真艱苦，你愛體諒恁老爸 ê 無四序。」

我 m̄ 知影家己若牛若獅 ê 性地是種著 tsiâ，總是自佮阿母開講後，我又閣佮芋仔爸開講，做陣伊讀中央日報，我讀少女愛讀 ê 小說，紲落來 hōo 伊繼續「哎」伊無法度理解查某囝 ê 穿插，彼陣真時行穿 A-Line 敆運動鞋 mā 開始時行一日食一頓 ê 減肥法，61 歲 tsiah kā 我舞出來，我開始背骨伊已經退休踮厝照顧 gún-ê 三頓，見著有飯通食選擇 m̄ 食 ê 屘仔囡，伊除了逐日招做陣食飯紲落來就是「哎」ê tuì 我講「食飯 m̄ 是一件簡單 ê 代誌，愛寶惜。」

背骨少女呔 ē 管待遮 ê 代誌，背骨少女 kan-ta 要意別人 ê 喙 hōo 家己失去好好佮芋仔爸繼續 tshan-tshiūnn 囡仔時 ê 畫面，芋仔爸讀中央日報，我讀國語日報，並 kā 芋仔爸 ê 手路菜學起來。

人生矣，總是無法度閣再相拄搪 tsiah 發見伊 ê 寶貴。

阿母是芋仔爸綴部隊徙營熟似 ê 臺灣女子，不過這條線是愛交朋友 ê 大舅牽 ê 紅線。

阿母在生一講著阿爸來厝講親情，伊歹勢甲 m̄ 知影愛覕佗位，行過花甲 ê 伊猶原面紅紅，那講那笑，總是每一个佮老芋仔牽手 ê 臺灣查某攏有一个惡夢，這个惡夢我佮二姊 ē-tàng 理解，不過 gún mā 決定成做歹人 kā 中國大陸彼邊來 ê 批信燒掉，特別是阿爸轉去探親了後，gún 兜開始成做彼邊 ê 金庫。 

我 m̄ 知影別人 ê 芋仔爸按怎生，總是 tī gún 芋仔爸 ê 身上 gún 看著伊疼某疼囝 ê 恬靜，特別是 kā 別人 ê 查某囝疼入心。

仝母各爸 ê 大姊出嫁彼工，芋仔爸哭甲比阿母較淒慘 mā tī 大姊第一胎生無七月日又閣有身 tuì 大姊 ê 未亡夫講「你趕有遐爾仔趕？」

M̄ 甘查某囝身體猶未恢復元氣又閣愛來一斗 ê 伊 mā tuì 倚 bueh 40 歲無法度自然 kā 我生出來愛 hőng 抱出來 ê 阿母講「老 phóo 免驚，我 tī 遮。」

這句老 phóo 免驚 m̄ 是 kan-ta 出現 tī 阿母 uī-tio̍h 我愛 hőng 𠞭腹肚抱出來 ê 時，mā 出現 tī 日後每當阿母身體無爽快，人愛蹛院，某仔爸準做愛上班，一下班鐵馬踏 leh 隨去病房照顧阿母，一直到換伊身體無四序 tsiah 開喙要求 gún 接手伊 ê 位。

第二位紳士，我 ē 講 gún 翁，雖罔伊佮柴頭有拚 mā 捷 hōo 我氣甲火山爆炸，伊猶原是一位紳士，特別是伊尊存我佮伊無相𫝛 ê 想法。

這久想彼久，到今我猶原願意佮伊相黏蒂帶(tuà)，這个特別因由佔百分之 99.99999，準做伊佮我彼个無緣 ê 前男朋友有相仝 ê 症頭真聽爸母話，不過伊猶是清楚知影爸母 m̄ 是佮伊行透尾 ê 人。

總是我 mā 是愛講，感情是兩人 ê 問題，搪著問題 m̄ 解決 buē 佮咱冤家量債 ê 翁 mā 無較縒，另外家己 mā 愛知捌按怎節別人 ê 後生佮咱翁 ê 站節。

按怎節別人 ê 後生佮咱翁站節我猶 teh 學習，總是我清楚知影家己 ê 柴杙到佗一搭 mā 尊存翁 ê 國界，所以到今準做 gún 冤甲天篷 kiōng-bueh 藃起來，猶是有法度 kā 伊拗 hōo 平。

有一日若是無法度行透尾，我猶是認為伊是一位好紳士，只是伊佮意 ê 氣味無合我 ê 脾土。

「十个小旦九个枵鬼，十个三花九个愛媠，有一日咱行 buē 落去著是你猶 bueh 訓練我成做你 ê 副本去接受恁爸母 ê 壓霸，mā 愛我接受你慣勢 ê 假包龍鳳生活，準做你無認為恁爸母真假包」這是我自問題一開始就 tuì 翁講 ê 話。

Viva，世界女人日。

蒜頭優格搵醬

...... 材料 ......

優格　200g

蒜頭，刴幼　

Ma-ioh-ne-tsuh　1EL

醋　1/4TL

鹽、胡椒

...... 步數 ......

1. 材料做一伙抐 hōo 齊，樂暢來食。

(17.12.2022 Frühstück Hähnchenschenkel mit Kartoffeln und Möhren - Joghurt Dip mit Knoblauch - Mozzarella mit Tomaten und Maissalat - Möhrensuppe mit Ingwer/771kcal)

Heute ist Weltfrauentag.

Ich ueberlege, wer ist  der erste Mann der die Frau immer respektiert.

Mein Vater.

Wer ist zweite Mann die Frau immer respekt.

Mein Mann.

Obwohl, mein Mann manchmal macht mich wuetend.

Aber, ich weiss, das ist Kultur und Familien Bildung unterschidlich ist.

Ueber das, wir koennen diskustieren.

Obwohl, er ist wie Stein.

Aber, er ist noch ok.

Und wer ist der schlechteste Mann?

Mein ex-Feurend.

Das ist sicher.

Ich koennte das sagen, ich bin gluecklich.

Er ist schon weit weg aus meinem Lebens.

Aber, alles ist seine Schuld?

Nein.

Ich musste in der Beziehung auch Verantwortung übernehmen.

Weil ich weiss, wir haben grosse Probleme, aber ich sage mir immer.

Alles kann besser werden.

Aber, das ist nicht richtig.

Anyway, wir koennen nicht aendern was passiert in unserem Leben.

Aber wir koennen das Problem loesen.

Wenn wir genau sagen koennen, was wir moegen nicht. 

Wie mein Mann moechte mit mir  den deutschen Stil leben..

Ich sage Nein.

Und wenn er moechte nicht was ich zum esssen koche und sagt nein.

Ich bin nicht veraergert, ich sage nur, ok, sage mir was magst du.

Weil, ich mag niemals eine verrückte Frau sein.

Viva Weltfrauentag!

Joghurt mit Knoblauch Dip

...... Zutaten ......

Joghurt　200g

Fein gehackter Knoblauch

Mayonnaise　1EL

Essig　1/4TL

Salz ＆ Pfeffer

...... Zubereitung ......

1. Alle Zutaten gut mischen. Guten Appetit!

(12.17.2022 Breakfast Chicken Thighs with Potatoes and Carrots - Garlic Yogurt Dip - Corn Salad with Mozzarella and Tomatoes - Carrot Ginger Soup/771kcal)

Today is International Women's Day.

I wonder who is the first man to always respect women.

My father.

Who is second man who always respect the woman.

My husband.

Although my husband makes me angry sometimes.

But, I know that is culture and family education is different.

About that, we can discuss.

Though he's like stone.

But, he's still ok.

And who is the worst man?

My ex-boyfriend.

After many years, i muss say that i am very lucky.

He is already far from my life.

But is it all his fault?

No.

I also had to take responsibility in the relationship.

Because I know we have big problems, but I always tell myself.

Everything can get better.

But that's not right.

Anyway, we can't change what happens in our lives.

But we can solve the problem.

When we can say exactly what we don't like.

Ex:

For example, my husband wants me to live and eat like a German.

I say no.

And if he doesn't like the meal i'm cooking and says no.

I'm not upset, I'm just saying ok tell me what do you like.

Because upset or angry will not solve the problem.

Viva International Women's Day! 

Garlic Yogurt Dip

...... Ingredients ......

Yogurt　200g

Finely chopped garlic

Mayonnaise　1EL

Vinegar　1/4TL

Salt＆ Pepper

...... Method ......

1. Mix all ingredients well. Enjoy your meal!