Tsham 德國人盤撋十外冬，我 tuì 窒倒街 ê 草花(Kohl)猶是一屑仔興頭齊無，我想這个問題 ê 主因是我較按怎食，草花就敢若斯斯 kan-na 兩種，酸佮鹹，無別味。
這回行踏波蘭並停跤 tī 有提供早起頓 ê 旅舍，tī 遐我食著若彰化炕肉飯滷筍乾 ê 滋味 hōo 我暢甲隨 tuì 翁搭胸坎講「你有食福啊，轉來德國我 mā bueh 來攢一份。」
凡勢是聽我哭呻草花聽甲耳空生鉎無聽著我 teh 講啥，伊繼續食伊 ê 麭𩛩 Há-muh 無應話。
按波蘭轉來德國 ê 寧靜日，阿波羅 ê 頭鬃 tshan-tshiūnn 蜘蛛 teh 牽絲，一絲一絲按灶跤牽到食飯廳，gún 那食彼日 ê 約定那牽尪仔補雨傘談我近來 teh 興 ê 做議量投稿五四三佮參加線頂演講會聽人演講。
「先生今仔日無閣寫批來，m̄ 知敢是訂正過關」我講。
冊 ▪ Bücher ▪ Books (4)
