Uì Toruń 來 Kraków
一路凡勢閒閒無代誌
所致，lán 開始綴來往 ê 車牌唸數字
先按 tsit-má khah tsia̍p 講 ê 德文開始唸到西文佮葡萄牙語去
Ná 唸 ein, zwei, drei，uno, dos, tres，one, two, three...
步頻想--著「It」、「Jī」、「Sam」、「Sì」、「gōo」hām 「tsi̍t」、「nn̄g」、「sann」、「sì」、「ngóo」
「Hit-lō...」
「你 bueh 揣便所？」翁問
「M̄ sī，我想 bueh tshiánn 你 kā 我聽 tsit 个音」
「It」tuì 「I」「E̍」tuì 「E」我講
「I 」著是 Ich ê「 I」
「E 」著是 Essen ê 「E」
Gún 翁講伊--ê，我講我--ê
一睏仔後，gún 翁若 tshan-tshiūnn 發見啥物代誌大聲 huah 講「你 ê I 佮 E 分 ē 清--ah」
「我一直 lóng 分 ē 清，是恁德語聲調狡怪」我笑應
「siōng 好是 án-ni」翁 buē-su 發見哥倫布發現新大陸仝款 ê 歡喜
我繼續餾「It」、「Jī」、「Sam」、「Sì」、「gōo」佮「tsi̍t」、「nn̄g」、「sann」、「sì」、「ngóo」mā tuì 翁講
Tī 我 leh 耍數字 ê 時，步頻想--著台語 ê 數字有兩種講法掠外
其中 ê「it」ê「i」gún 講「伊」，「é」gún 講「矮」按呢聯想 suî 解決我 ê 頇顢
講恁 ê 話講 kah kiōng-bueh 比家己母語台語 koh-khah 久長 ê 時間
Uân-á 掠𪜶 tsit 2个「I」佮「E」掠 buē 著 ê 著觸
我 ê 台語綴你講到今 mā 無你講 ê 德語 hiah-nī-á-tsuē
Mā buē hōo 任何人聽 ē 出我是啥物腔
你 ê 德語一聽 suî 知影「通用德語」就使你 mā-ē 綴 leh 講寡「Topfen」等等
Uân-á 是德國優勢腔
聽翁 tsiah-nī-á 無棄嫌 lán-ê 德語佮褒唆
Lán tsit 支喙 uân-á 㧎痰，無 kā 伊呸出來 ē 艱苦
「看起來，tsa̋ng 款 ê 粿路開始起應效--ah」
「德國佮波蘭 ê 粿路 lóng 好食」翁笑應
論真講，我個人 khah 愛波蘭 ê 粿路抑是甜路
Tshan-tshiūnn tsuē-tsuē 人講義大利佮法國菜好食
我個人 uân-á khah 佮意葡萄牙菜
無比並，kan-na 個人喙斗
自黑面抐桮來來去去歐洲到轉型 tsiânn-tsò 厝鳥
我 tuì 歐洲 ê 甜路抑是粿路一直食無路
因端無 tsuē kah 若蜈蚣 ê 跤𫝛款
Kan-ta tsit 个問題
合喙斗 ê 雞卵糕
甜 kah 連蜂 lóng-ē 掠做 tsia 是 m̄ 免認真走傱 tō ē-tàng 捾規桶蜜 tńg--khì 蜂岫 ê Ai-tiân(Eden)
無合喙斗 ê 餅路
m̄ 管別人按怎講 luā-ní-á 好食
我 lóng 感覺 buē-su teh 哺 Panzerplatten hiah-nī-á 焦燥
講著 Panzerplatten
Tse 是一件真趣味 ê 代誌
我 uī-tio̍h bueh 解決 tsuē-tsuē 人 ê「食好鬥相報，相報 koh 愛食」ê 問題
我想--著囡仔時學校 lóng-ē 分 ê「營養口糧」
我 m̄ 知影 uī-hô 學校 lóng 愛分 tse 餅
總--是，我 ē 記得餅分落--來，無食
老師 ē suî 倚過來 koh iōng buē-su 你欠伊幾百萬 ê 面腔 kah 13度 ê 聲調講
「討債囡仔，tse tsiah-nī-á 營養 koh hōo 恁食無料 ê 好物竟然 m̄ 食」
囝仔時 m̄ 知影 tse「營養口糧」kám tsiânn-si̍t tshan-tshiūnn 老師講--ê「是營養 ê 好物」
總--是，我知影無 kā tsit 个無合脾土 ê 物吞落腹
我著是歹學生不受教，無人 bueh 佮 lán 做朋友
因為 lán 是老師認證 ê 歹學生
半老歲數越頭 tńg--khì 搜揣問題
凡勢是 tsit 个因端 hōo 我 tuì tsuē-tsuē 人意愛 ê 餅路食無路
Tse 愛講 mā 是一件跋一倒，抾著一隻金雞母
起因，tsuē-tsuē 人 uī-tio̍h「甜粅粅」teh 拍拚搜揣方法 -- 噤喙
Tī 四常已經有夠額 ê 挑戰內底，我 ē-tàng 減 tsit 个額 hōo 家己 ê 肩胛頭 khah buē hiah-nī-á 重
愛來講一聲感謝，感謝老師 ê 教示佮關心
因為見食「營養口糧」
我 lóng-ē 想--著兵營演習庄頭 hōo戰車輾過 ê 街路，碎糊糊
我 ê 自尊心佮無受尊重 ê 心情 tō tshan-tshiūnn hōo 戰車輾過 ê 街路 mā 碎糊糊
Sòo-pái 搪著 uân-á teh 做兵仔 ê 阿爸紮「營養口糧」tńg--lâi
我 lóng-ē 先品好，我 buē 食「戰車餅」
囡仔時 ê「戰車餅」來到德國 tsiânn-tsò 德語無輾轉
iū-koh 歹勢 tuì kā 請人客食甜路抑是餅路當做是上重要 ê 款待方式 ê 德國人講「我無愛食 tsia--ê 物」上好 ê 解說
不過，tse 是經過 lán mā 知影愛按怎 tsham 𪜶分張 lán 慣勢 ê 甜路 tsiah 有法度 hōo 𪜶理解
M̄ 是 lán 歹鬥陣是喙斗 tsiann-si̍t 無相𫝛
簡單講，自 lán 分張臺灣 ê 綠豆椪、肉餅、王梨酥 tsia--ê 餅
紲--落來 tuì 𪜶講，m̄ 是𪜶款 ê 甜路無好食
實在是𪜶慣勢 ê 喙斗 tuì 我來講 buē-su「戰車餅」
一講大多數人 suî 知影我 ê 感受
因為，𪜶大多數人 mā 無愛食「Panzerplatten」
Tsiânn-tsiânn-si̍t-si̍t tō 號做「戰車餅」ê「Panzerplatten」
我 m̄ 知影波蘭人食 ê 甜 kám-ū 德國人食 ê hiah-nī-á 甜
不過，開始 tī 歐洲款甜路佮食餅路是按波蘭開始
舉一个例，德國 ê Eier Plätzchen 是𠕇 kah ē-tàng 提來摃核桃殼
我知影 tsit 个形容辭有 khah 譀古
不過 gún 翁家己 mā 同意，起因伊 m̄ 嫌𠕇 koh 焦燥
食一塊 Eier Plätzchen m̄ 免 koh 食飯，起因食一塊餅無配一鈷茶無伊法
波蘭 ê Eier Plätzchen tshan-tshiūnn tī tsia 出世，tī 臺灣賣波蘭雞卵糕 ê 波蘭爸爸蛋糕 ê 分張相𫝛
波蘭緯度懸，寒--人長 sòo-pái 𪜶 ê 食 si̍t khah 厚
Tshan-tshiūnn 雞卵糕 ē lām tsuē-tsuē バター佮クリーム
我 tuì 粿路做無路，m̄ 知影バター ê 比重懸有啥物影響
總--是，我愛講波蘭 ê 餅路 hōo 我一食 suî 牢
連本底認為波蘭人 ê Eier Plätzchen 絕對 tshan-tshiūnn 德國人 ê 脾土 ê gún 翁
Mā 開始綴我款餅 tńg--lâi 德國囤
另外，波蘭 ê 餅路有一項 hōo 我 tsiok 佮意--ê
He tō 是
𪜶 ē kā 一盒 ê 餅拆做一包一包來賣抑是一片一片賣
Tshan-tshiūnn lán-ê「𥴊仔店」抑是「小豆苗」按呢
Tsit 个方式 hōo 好玄想 bueh 試鹹汫 m̄-koh 無想 bueh 一斗 bué 規盒 ê 我暢 kah buē 顧--得
起因，tī 德國 tsia̍p-tsia̍p ē 搪著看 ê 佮食 ê 喙尾有距離
我 m̄ 是批評德國按呢無好
總--是，按呢 ê 買賣方式 hōo 我 buē 想 bueh 繼續冒險戇落--去
我已經 buē 記得行踏波蘭幾斗
總--是每一回 ê 行踏 lóng-ē 引𤆬我 tsuē-tsuē ê 驚喜佮新 ê 想法
Tshan-tshiūnn 行踏 Kraków 除了揣龍(Liông) mā 揣龍(Lîng)
Mā hōo 我 koh 一斗揣--著家己
M̄ 管你 ê 職位 luā 寡
你無誠心面對家己 ê 問題，接受家己 tsham 別人 ê 無相𫝛佮搜揣疑問
你永遠 tō 是活 tī hit 个圓箍仔底
M̄ 管你按怎妝挺家己 tuì 別人講我 m̄ 是你認為 ê hit 款人
你 iû-guân 是 hit 款人
文章標籤
全站熱搜
留言列表
冊 ▪ Bücher ▪ Books (4)
