世界文化遺產 - Tempel des Apollon/阿波羅神廟
Wir müssen aber nicht extra dorthin fahren.
Das ist alles, was ich über die Reise sagen kann, meine Ohren sind taub.
Ich kann meinen Mann nicht hören, der mir Lorelei vorsingt, die Geschichte hier ist für Europa von großer Bedeutung, aber wir können auf dem Campinggelände bleiben.
Ich bin wirklich sehr glücklich, Ich war plötzlich taub und konnte nicht mehr hören, was er sagte.
世界文化遺產 - Tempel des Apollon/阿波羅神廟
這逝旅程我 kan-ta 會使得講，好里佳哉，我 ê 耳空有夠重無 hōo gún 翁牽魔神仔去。
「遮 tuì 歐洲A歷史遮重要，總是 mā m̄ 免綴 leh 𤲍燒咱留踮遮著好」翁講。
正經是好里佳哉，我 ê 耳空夠重聽無伊講 ê 天語。
世界文化遺產 - Tempel des Apollon/阿波羅神廟
本底號做 Pytho (Πυθώ) ê Δελφοί 佮斯斯有兩款𫝛款，一位是徛位 tī Parnass ê 古典 Δελφοί，一个是徛伊西爿 ê 現代 Δελφοί。
Δελφοί 這个名辭是按「子宮」演化，意思是大地之神 Gaia，紲落來成做 Python，蟒(Bóng) ê 意思 mā 有人講是龍 ê 14，起因伊是有翼股 ê 蛇。
世界文化遺產 - Schlangensäule/蛇柱
Python 是 Gaia ê 查埔囡仔，伊有一雙千里眼並蹛 tī 後來號做 Delphi ê 角勢，Gaia 預測伊𠢕目空赤 ê 查某孫 Hera ê 競爭對手 Leto ē 生一對雙生仔 - Apollo 佮 Artemis(Diana)，這兩个囡仔 ē 比伊 ê 囡仔閣較勇壯、厲害。
世界文化遺產 - Theatre of Delphi
Gaia ê 後生 Python mā 讖這兩个囡仔 tī 未來 ē tuì 伊不利，所致開始追殺 Leto，不過這个計劃無成功，起因 Leto 覕 tī Delos 島，Apollo 出世大漢 mā 綴 Python ê 跤步開始追殺伊，最後，Python hōo Apollo 刣死 tī 伊蹛 ê 所在 --- Delphi，伊 ê 血湠滿地。
這个土地因因為伊 ê 血得著千里眼 ê 功能，Apollo mā 因為按呢取代 Gaia tī 遮 ê 地位，成做 Delphi ê 保護者。
世界文化遺產 - Tempel des Apollon/阿波羅神廟
遮又閣是按怎無號做 Apollo bueh 號做 Delphi？
根據詩歌記錄 Apollo 是以海豬 ê 模樣泅來到遮，Delphi 這个地名 mā 因為詩歌記錄成做人類記憶 ê 地名，英文 ê Dolphin mā 按 Delphi 來。
是講這个 Delphi mā m̄ 是英語專有，德語 mā 是按這个辭來 Delfine。
世界文化遺產 - Tempel des Apollon/阿波羅神廟
Apollo 神廟是古典希臘 mā 是現代希臘上重要 ê 文化資產，這个重要性包括人類按天地自然萬物崇拜到獨尊偶像(ngóo-siōng) ê 崇拜。
羅馬行跤到，希臘 ê 天地信仰 mā 行向北歐多神教成做非我族類需要禁止 ê 信仰。
世界文化遺產 - Tempel des Apollon/阿波羅神廟
行踏 Apollo 神殿，我 buē 講需要真好 ê 體力，總是 tī 遮見著 tsuē-tsuē 人猶未行到蛇柱就斡頭落山 hōo 我想著 tsuē 冬前 tī 宜蘭太平山看著 ê 畫面，梯𬦰無到十坎就喘甲叫 m̄ 敢 --- 閣繼續𬦰落去規條命 ē 休去。
我感謝家己有耐性減肥 mā 無活 tī 家己 ê 世界。
世界文化遺產 - Tempel des Apollon/阿波羅神廟
Tī 太平山看著 ê 畫面是一陣應當是 uī-tio̍h 體格媠，無啥 te̍h 食飯 ê 少年囡仔，tī 遮看著是一陣應當活 tī 騙家己，騙甲 buē 騙 vanity sizing 虛華寸尺 ê 人。
不過，這斗 ê 行踏上蓋有意思 ê 畫面猶是，我總算知影網衝是按怎創作𪜶 ê 作品，看網衝創作我又閣成做一隻貓好玄，目今 ê 電視台敢 mā 按呢運作？若是按呢運作，莫怪電視台遐爾仔興裁員。
看網創校長兼摃鐘，化妝、換衫、取景無囡仔時看百戰百勝 tī 亞哥花園 ê 勢面誠實是不可思議，不過我 mā 好玄，一人公司敢有法度飼腹肚？
這个時行 ê 新工課，m̄ 免我這个 LKK 兼田庄倯 ê 人 uī 𪜶操煩，不過我足想 bueh uī 遮 ê 古物出聲 「看告示 m̄ 捌字無要緊，看告示 m̄ 捌圖就真害。」
看網衝 uī-tio̍h 相片抑是影片 m̄ 管管制大大典典行入禁區攝影抑是攝相，本底 ê 媠甲 hőng 呵咾 ê 小美人魚隨做烏蘇拉想 bueh 𢼌落去。
世界文化遺產 - Tempel des Apollon/阿波羅神廟
網衝 ê 大大典典看起目睭疼，越頭巡管理員。
見管理員遮觱彼觱，我想著德國二戰後 ê 鵁鴒順便空，因為戰爭離開徛家 ê 空厝，鵁鴒永遠趕 buē 了。
感謝家己 tuì 這類自媒體無啥熱情，抑無我 mā 是毁壞古物 ê 幫兇。
世界文化遺產 - Tempel des Apollon/阿波羅神廟
Delphi 是古希臘重要中心角勢。
傳說 Zues 有兩隻鷹，𪜶按正爿佮倒爿飛到世界中心點會合，彼个會合點就是 Apollo 神廟 ê Delphi。
世界文化遺產 - 山頂 ê 運動埕
Apollo 神廟上尾溜是羅馬人起造 ê 運動埕。
這搭羅馬人起造 ê 運動埕 m̄ 知是較無攝影景點抑是徛懸山 hōo 人猶未行到搭就上山，所以人少由若海翁 tī 大海按呢遐爾仔自在。
世界文化遺產 - Tempel des Apollon/阿波羅神廟
Apollo 神廟 ê 收藏，目今攏齊收藏 tī 山跤 ê 博物館，按山跤𬦰遮會使得順崎落山直接行到博物館，m̄ 免翻頭行原路落山閣 khau 一大輾接博物館。
世界文化遺產 - Theatre of Delphi
「恁比 gún 較晏離開，呔 ē 遮緊出現 tī 博物館」tī 運動埕搪著 ê 美國翁仔姐問。
「Gún 順邊仔 ê 落崎行過來」gún 講。
這个落崎窮實無講僫見，總是伊 ê 步道無觀光路線 ê 四序，凡勢是這个因由 hōo tsuē-tsuē 人選擇順原路行轉去博物館。
世界文化遺產 - Das Schatzhaus der Athener/雅典娜珍寶之厝
Apollo 神廟敢有導覽，𠊎毋知，總是大月 m̄ 驚揣無人通導覽，起因美國團洘秫秫。
不過，跟綴美國團聽歷史無法度無料聽到山頂尾溜就是。
希臘燉肉
按 Delphi 落山到 Ιτέα/Itea 揣店食中晝，見著街仔路無啥當地人 tsiah 想著遮是希臘，遮 ê 人佮西班牙仝款愛歇晝，不過有行廟有保庇 tī gún 準備 bueh 斡頭轉去家己煮頓，gún 看著當地人猶 teh 食晝隨落車請教店頭家敢猶有 teh 開門？
聽無英語好笑神 ê 店頭家隨 tìm 頭表示有，手指向內表示這个時間有營業 m̄-koh 簡單物，我順店頭家 ê 手看菜色閣順家己 ê 目尾看一桌三个圓滾滾 ê 人客，𪜶桌頂 ê 菜色隨表示大丈夫。
等待菜單上桌我 tuì 翁講「頭家應當無親情踮德國。」
知影牽手話仁 ê 翁笑甲吭跤翹講「這就是希臘遮爾仔吸引德國人 ê 原因之一，下晡點心猶有腥臊通食。」
這逝進前罕得食希臘料理，所致 tuì 希臘傳統料理無一个認捌，總是店頭家講 ê 簡單物齊食入我 ê 心，像這盤交葡萄牙 bueh 相𫝛 hōo 我記到今 ê 燉肉。
傳統希臘食食Taramosalata
Tī Ναύπλιο 納夫普利翁食無敆喙 ê Taramosalat 柑仔蜜生菜盤來到遮，按試一喙鹹汫試甲規盤無想 bueh hâinn hōo 翁。
高麗菜捲
這看起來若彰化肉圓 ê 高麗菜捲，m̄ 知影敢是觀光客 kā 伊投甲店頭家拒絕出菜，總是我就想 bueh 試鹹汫，m̄ 管店頭家按怎「No, no, no」我 mā 一直指隔壁桌「Yes, Yes, Yes」，店頭家講 buē 過我請隔壁少年查某囡仔詳細分張餡交啥物材料，出菜無偌久 mā 隨行倚請教「敢有敆喙。」
這个現象 hōo 我想著，德國人，店頭家合該 hōo 德國人投甲一聽著德語隨死龜講甲成活鱉，無愛出這項菜。
「Sehr lecker 非常好食」掛一支大頭姆，店頭家笑甲喙合 buē 起來直講「Danke」，隔壁桌 ê 人 mā 笑咍咍手指讚。
「規欉好好就是恁德國人惹出來 ê 喙白」我手指較食 kan-ta 食燉肉 ê 翁講。
露營區主人飼 ê 貓
Delphi 有 tsuē-tsuē 露營區，總是提希臘經濟狀況來做比並，遮 ê 露營區設施無夠𪜶 ê 定價，所致 gún 就紲 Delphi ê 名成做海豬繼續向前泅，泅到倚神廟 bueh 40 分鐘車程九月日猶 teh 營業 ê 露營區。
希臘 ê 經濟來源倚靠觀光，8 月一過隨做小月，所致誠心感謝猶 teh 營業 ê 店頭家，無伊 ê 露營區，gún 凡勢愛食罰單。
希臘允准非觀光地區 ê 路邊露營，m̄-koh 這是一个有爭議 ê 允准，因為你永遠 m̄ 知影幾台露營車算 tsuē。
露營區主人飼 ê 貓
希臘海岸線 ê 露營區多數隱私無允准 hōo 人入園參觀 mā 真僫 hōo 人按外口看營區設備，當 gún 翁仔姐停車向內貓貓相，三位曝甲若烏魚子 ê 少年兄笑微微仔講「這搭 buē hōo 恁失望。」
希臘標準交德國標準無相𫝛，無燒水洗碗箸 m̄-koh 需要燒水洗身軀 ê 我膽膽繼續向內看，三位少年兄 mā kan-ta 掠著我 teh 想啥隨講「營區有燒水，一暝 15€。」
聽𪜶按呢分張 hōo 我歹勢甲，不過準做日頭赤焱炎，我猶是無才調洗冷水過日。
希臘有 tsuē-tsuē 倚海岸 ê 露營區無提供燒水 hōo 人洗魂舒。
露營區主人飼 ê 貓
這搭臨時臨曜停睏 ê 露營區本底按算歇一暝，因為環境交阿貓貓 hōo 我張翁繼續蹛兩暝。
露營區主人飼 ê 貓
本底掠做遮 ê 貓是主人飼 ê 貓，押尾見主人家一屑仔攏無要意 gún 清彩 kā 貓飼敏豆、卵遮 ê 德國人講無適合貓食 ê 物 tsiah 知影遮 ê 貓是一隻有路無宅 ê 貓，生一窩貓仔囝感覺就四序就蹛落來，主人家 mā 因為𪜶 ê 加入 uī 𪜶設立阿貓遊樂園交攢三頓。
露營區主人飼 ê 貓
「貓仔是看人 ê 動物，你交𪜶有緣」露營主人家那剪橄欖枝那講。
「遮 ê 人來來去去，貓仔看久合該 buē 驚生份人」我講。
「咱人交人接近看個性，貓仔狗仔 mā 是，像我交恁翁就僫講話」主人家笑講。
「我交伊 mā 僫講話」我笑應。
露營區
Gún 翁本底無 bueh 選這角，我因為孤𣮈無愛交人盤撋堅持選這角 hōo 飼狗 ê 主人家笑講一个性地像狗，一个性地像貓，這遮適合貓。
彼陣我無理解這段話，等到步頻鼻著核彈級 ê 屎味 tsiah 知影遮是阿貓遊樂區，隨決定停睏踮這搭並享受難得 ê 阿貓人生。
露營區
親愛 ê 阿貓交美麗 ê 露營地，向望未來有機會再相見。
留言列表
冊 ▪ Bücher ▪ Books (4)
