亂皂𥴊仔店 ⓂⒺⒾⓃⓀⒾⓄⓈⓀ

Apollo 神廟 --- Αρχαία Κόρινθος

Als wir den Ort besuchten, sagte mein Mann, wird man Ihren Titel auf Griechisch lesen?

Ich frage, bist du es wegen der Vorlieben anderer Leute, dann änderst du deine Einstellung.

Natürlich, nein.

Bist du sicher? Alles in allem: Ich weiß, was ich will.

Wenn ich etwas mit dem Schreiben eines Blogs erreichen wollte, ich schreibe nicht in dieser Sprache, eine Sprache, von der viele sagen, dass sie für sie nutzlos ist.

Du bist dir dieser Angelegenheit bewusst, ich erwarte nicht, dass du meine Vorlieben unterstützt.

Aber du willst, dass ich tue, was du willst, schnellerer Wechsel der Ehefrau.

入城主要紹介佮拆票所在 --- Αρχαία Κόρινθος

踅科林斯 ê 時翁問「你提希臘文做標題敢有人來看？」

「你食飯是揀家己意愛 ê 物抑是食別人愛看 ê 物？」我問。

「當然 mā 是家己佮意 ê 口味」伊講。

「你敢講我 m̄ 敢聽，不過我真清楚家己寫 Blog ê 想法佮因由」我講。

「我若想 bueh 迵過 Blog 得著啥物，我 bueh 選擇這个 hőng 認定爛塗 buē 糊得壁 ê 語言。」

「這點你比啥人閣較清楚，我 m̄ 捌向望你成做學堂邊 ê 豬母 buē 讀 mā-ē 講經，所致你 mā 免向望我 ē綴你行。」

「你 ê 向望較早睏，較有眠。」

「我知」翁應。

 Αρχαία Κόρινθος/Ancient Corinth

倚 Αθήνα(雅典)75公里 ê Korinth 是聖經新約 ê ΠΡΟΣ ΚΟΡΙΝΘΙΟΥΣ Β' mā 是 gún 翁講甲喙角全泡「遮有出名運河 - Diolkos」ê 角勢。

拆白講伊講甲喙角全泡我聽甲無見波，遮 ê 聽無 mā 若黑貓姊彼時，逐家綴《索多瑪城》leh 做文青講天語。

我無綴朋友讀《索多瑪城》m̄-koh 我有跟綴《娥摩拉》看電影佮讀《娥摩拉罪惡之城》。

一个城市寫甲一大拖沙想 bueh 表達家己真有料抑是認捌真 tsuē 像索多瑪城彼久 ê 評論之一？

我是真知家己 ê 重量，sóo-tí buē 無毛雞假大格，無米留人客，無食假拍呃，寫《索多瑪城》、《娥摩拉》kan-ta 這項代誌，人行到遮 tsiah 想著伊若佮《索多瑪城》、《娥摩拉》相仝，押尾請教資料，確實伊佮《索多瑪城》、《娥摩拉》相仝，這是我 tuì 這个城市唯一 ê 印象。

 Αρχαία Κόρινθος/Ancient Corinth

Korinth 是古希臘上大閣重要 ê 城市，西元前 146 年羅馬人行跤到，Korinth 按厝瓦相扯成做四散 ê 缺角 ê 石頭，遮 ê 石頭一直等到西元前 44 tsiah 閣成做柴角仔一塊一塊疊起來。

根據 Pausanias 編寫 ê 希臘神話故事，Korinth 是 Zues ê 後生 Corinthus 建立 ê 城市，總是希臘神明遮爾仔 tsuē mā-ē 傳承到羅馬年間，像 Apollo，所致 mā 有神話記錄伊是 Titan Oceanus ê 查某囝 Ephyra 創立。

 Αρχαία Κόρινθος/Ancient Corinth

現此時規个城敢若開放隨人考古 ê Korinth tī 往過是世界上大瓷仔出口城，講伊若開放隨人考古，是因為遮 ê 探訪舊時已經完成 bueh 9 成左右，所致 tsuē-tsuē 所在並無𫞼杙仔禁止參觀者行踏。

Αρχαία Κόρινθος/Ancient Corinth

另外，遮 ê 城市容貌 mā 無有綴雅典衛城 teh 修老補老，所以 hōo 我又閣成做一隻貓想 bueh 知影，伊是因為啥物因端成做索多瑪合娥摩拉，總是遮 ê 文物就 tshan-tshiūnn Türkiye ê Troy 佮 Pergamon 仝款，你看 ē 著外表 m̄-koh 你捎無寮仔門開。

是，這个考古遺址團隊 mā 是德國人，Korinth ê 文物無 tshan-tshiūnn Troy 佮 Pergamon 齊 tī 德國館藏，Korinth ê 考古文物收藏 tī 拆票亭仔跤邊仔 ê 博物館(Gún 無行踏)。

 Αρχαία Κόρινθος/Ancient Corinth

講著考古想著這件有 14 ê 代誌，往過讀考古遺址紹介攏 buē 愖文字紹介除了當地語文佮現今世界通用 ê 英文掠外，是按怎又閣有另外一个語文。

這斗行踏希臘 tī Δελφοί 聽著法國太太因為需要 Google 翻譯成做茶鈷一路呻「是按怎無法文」我 tsiah 想著，著---neh，考古遺址除了當地語文佮英文，捷捷 mā-ē 出現另外一个較無普遍 ê 語文，不過我是按呢補腦，法國遊客 ê 總數猶無慣勢講英語 ê 人 tsuē，法文紹介自然就無遐爾仔 tsuē。

 Αρχαία Κόρινθος/Ancient Corinth

總是代誌 m̄ 是戇人想 ê 遮爾仔簡單，按考古遺址出現 ê 少數語文就 ē-tàng 知影考古團隊按佗落來，Korinth ê 第三語文就是德文「這區考古遺址團隊是德國負責」翁看我見著德文隨解釋，起因 tuì 我來講遮 ê 美國遊客比德國遊客 tsuē，照理講應當希臘文佮英語就夠額。

 Αρχαία Κόρινθος/Ancient Corinth

因為這區是德國負責，所致我比別人較幸運有法得知影無紹介 ê 區域用途，起因 m̄ 免我請教，gún 翁自動成做放送頭紹介 buē 離，總是我有法度記牢偌 tsuē 看文字記錄就知影少甲可憐。

總是，這 mā 正常，畢竟伊 m̄ 是我 ê 文化 mā 交我 ê 徛地無遐爾仔倚，所致我 kan-ta 有才調莫 kā 家己成做死觀光客，kan-ta ē 曉展風神，賰 ê 攏無。

 Αρχαία Κόρινθος/Ancient Corinth

千外冬前 ê Korinth 是交易甲愛 hōo 保羅以文字記錄，現此時 ê Korinth 是一个無這搭遺址規个城應當 ē 閣較落坐(loh-tshē) ê 城市，不而過我愛這座城市，起因伊無偏僻甲僫過四常行踏觀光景點 mā m̄ 驚成做觀光鰮仔魚：𤲍，像雅典，mā hōo 觀光客有機會親身感受希臘東正教交德國天主教宣禮 ê 無相𫝛。

我交 PI 𫝛款無任何堅定宗教信仰，總是 tī 遮停跤露營 ê 時間，我感受家己 mā 是教徒之一，以人為聲 ê 宣禮聲比以電子敲鐘 ê 宣禮聲閣較吸引我 ê 平靜。

不過這个以人為聲 ê 宣禮聲 m̄ 是四常代，伊是順疫情調整 ê 變化。

 Αρχαία Κόρινθος/Ancient Corinth

寫著露營地，頂站仔聽翁講露營主人家新起 ê 露營地已經開始營業，向望主人家 ê ' économie ' 愈來愈好。

露營地 ê 主人是兄弟，兩人行過希臘無穩定 ê 年間 mā tshan-tshiūnn tsuē-tsuē 生活 tī 政治經濟無穩定 ê 國家人民𫝛款，uī-tio̍h 生活飼家，一个人需要放棄自本 ê 按算出外討趁，一个人需要留踮厝看顧一切。彼陣 ê 𪜶，大兄出外法國做穡，小弟留踮希臘讀書看顧序大。所致 tī 這个露營區搪著大兄 m̄ 管你佗一國，國際語言齊是法語，面對這个比德語閣較弱勢 ê 語言，逐家 mā 是大丈夫，溝通無障礙。

語言是工具，心無紮耳講相𫝛 ê 話 mā 是無較縒。

語言是工具，乞食硬 bueh 攑蠓捽，假仙假觸 mā 是無較縒交卸世眾。

 Αρχαία Κόρινθος/Ancient Corinth

一日一位德國先生佮意大利太太搪無著扞店交講英語 ê 小弟納數，隨揣阿兄，數納煞想 bueh 知影按怎上高速公路去雅典，起因路標無統一，一个雅典有四種寫法，有古希臘文，現代希臘文，希臘文羅馬化交英文。遮是希臘，路標以希臘文為主。

意大利太太凡勢 m̄ 知阿兄講法語，所致以英語請教得著法語答案 hōo 伊目頭結一秒鐘隨知影，以母語交對方請教問題。

德國先生知影阿兄 ê 國際語言是法語，猶原堅持以無輾轉 ê 英語交阿兄請教 hōo 我想著這件代誌，德國人看起來自信飽滇，窮真是無自信，交台灣人 bueh 相仝，掠做別世界語言就 buē hőng 看無起。

意大利太太得著答案滿面笑容離開，德國先生下性命請教猶原是豬母牽去牛墟 kiōng-bueh 上童，一對法國翁仔姐行倚以法語表示𪜶 bueh 納數，這位古錐 ê 阿兄隨交這對翁仔姐那破豆，那談法國新政局，我順𪜶 ê 對面想著意大利太太交古錐阿兄 ê 對話。

語言 tshan-tshiūnn 接力走標，一標紲一標，紲甲有 ê 猶原跟綴車母，有 ê 敗馬成做另外一个生張。

像法語 m̄ 捌幾字 ê 我，按第一斗鴨仔聽雷聽著  ' économie ' 隨知影阿兄 tuì 我交代，碗箸洗好無 bueh 紲落洗衫等等，勞煩 kā 電火禁掉，因為 ' économie '，這交英語有 90% 相𫝛 ê 語句，押尾 tī 𪜶兄弟開講 ê 字句 mā 聽著，tī 意大利太太請教雅典高速公路 mā 聽著，成做我這久 ê 肥底。

希臘語 ê 經濟是 Οικονομία，意大利語 ê 經濟是 Economia。

歐洲文化按希臘開始，羅馬接希臘，法國承羅馬...阿娘喂，閣寫落去我 mā 上童 hōo My Big Fat Greek Wedding 我 ê 希臘婚禮 ê 古錐阿爸上童。

 Αρχαία Κόρινθος/Ancient Corinth

Tī 遮露營 ê 日子 mā 因為希臘活歷史 hōo 我認捌著我掠做政治穩定 ê 希臘窮實並無我想 ê 遐爾仔穩定。

「馬克宏較穩抑是雷朋較穩」古錐阿兄請教法國翁仔姐法國近來政治變化，法國翁仔姐回答「馬克宏是無魚蝦 mā 好 ê 比選擇共產黨閣較好 ê 決定」，一直笑微微 ê 古錐阿兄面隨沈講「共產黨 m̄ 通選擇，共產黨無好。」

因為這段話 hōo 我想 bueh 了解希臘內戰 ê 故事，隨斡頭問翁希臘 ê 改革敢交葡萄牙相𫝛，翁若牛目 ê 雙目瞪甲大大蕊講「你聽有法語矣？」

「馬克宏，雷朋，共產黨，經濟，表情，手勢交一堆 Non 就是我 ê 法語」我講。

「我 ê 希臘史交你 ê 法語相𫝛」翁笑應。

 Αρχαία Κόρινθος/Ancient Corinth

Korinth 是按怎 mā 佮索多瑪、娥摩拉徛相位，按揣來 ê 資料講，伊佮 Pompeii 龐貝𫝛款有挖出暗間仔。

行踏 Korinth ê 這日，我認真揣暗間仔，不而過揣無若 Pompeii ê 遺址。 

 Αρχαία Κόρινθος/Ancient Corinth

揣無暗間仔這件代誌又閣 hōo 我成做一隻貓，往過 ê 文明 tuì 人類需求遮爾仔開放，呔討這久 ê 文明 ē 遮爾仔排斥(thik)這个人類基本需求？

是人類良心發現，發現人生而平等，下令這个基本需求轉型？

是佗一个，智識無夠額 ê 我愖無一个索，不過按遠古 ê 壁畫紀念品我理解，這个世界 ê 情慾 m̄ 是男佮女一款生張 niā-tiānn。

尊存每一个人事物 ê 無相仝，是實踐生而平等 ê 第一步。