世界文化遺產 - Parthenon, Acropolis of Athens
Tī 遮聽著人講翕相 tuì 我來講無重要隨看著一陣人越頭揣聲音，看著這个畫面想著日本紅白大對抗。
離開希臘 bueh uì 山鷹之國 Albanien 駛去 ê 這日，本底掠做我投 ê 稿無機會閣刊登，起因新編輯新氣象，我 ê 文章按徵稿說明是提豆油濫雞卵糕 buē 敆，sóo-tí 我 tuì 舊編輯請我寄出去 ê 原稿並無向望伊有機會發表，這久猶有機會見著家己 ê 䆀筆尾，而且又閣 tī 希臘這个有眾神 ê 角勢 hōo 我歡喜甲 tuì 翁展風神「這決定是早起時搪著緣投仔骨牧師 ê 緣故。」
這段話猶 buē 落地，一隻蜂隨來挨拶 hōo 我想著青春少女年間愛看 ê 少年愛著神父 ê 影集。
咱平凡人 tuì 神真正 buē-tàng 烏白亂愖，是講東正教並無禁止神職人員佮人結緣，敢 m̄ 是...
翁聽我講故事笑甲反肚「你想過頭，這是希臘眾神送 hōo 你 ê 禮物因為你一直攏快樂做家己像𪜶 ê 子民仝款。」
論真講，我 mā 按呢認為，我足數念「économie」ê 自在。
世界文化遺產 - Erechtheion, Acropolis of Athens
人類 tī Aegean Sea 起造一座城市，智慧女神 Ἀθήνη(Athena)想 bueh 成做這个城市 ê 守護神，海神 Ποσειδῶν(Poseidon) mā 是，總是一山不容二虎，冤家量債 hōo 扞家 ê Ζεύς(Zeus) Panadol 食到暢 mā 無較縒，押尾 Zeus 想出一个 buē hōo 人講伊是賣麵 ê 看人撒油 --- 大細心 mā buē 繼續頭疼 ê 步數。
請𪜶展功夫，看𪜶啥人有法度展出 hōo 人類上讚 ê 祝福。
世界文化遺產 - Parthenon, Acropolis of Athens
Ποσειδῶν 展伊手頭彼支三叉按怎 tī 岩石一摃象徵戰爭 ê 戰馬隨走出來 ê 功夫，Ἀθήνη 展伊手頭彼支槍(tshiunn)按怎 tī 岩石一點就出現和平佮豐收 ê 欖橄樹，跟綴 Ζεύς 看神仙拚仙 ê 人類，一見著橄欖樹隨歡喜甲 buē 顧閣拚勢拍噗仔，就此 Ζεύς m̄ 捌閣食頭疼藥仔，人類 mā 得著 Ἀθήνη 豐年祝福，Ἀθήνη mā 成做這座城市 ê 保護神。
這是雅典城神話 ê 部份。
世界文化遺產 - Erechtheion, Acropolis of Athens
衛城 ê 歷史 mā 是人類宗教信仰 ê 跤跡。
Byzantine 拜占庭年閣 Parthenon 帕德嫩神廟供奉聖母瑪利亞，Osmanlı 鄂圖曼年間伊成做清真寺，遮 ê 跤跡，攏 tī Balkans 大合作 kā Osmanlı 送轉去厝以後，全數筅黗並恢復自身模樣。
世界文化遺產 - Parthenon, Acropolis of Athens
根據考古，西元 6千年前人類就出現 tī 遮。
這座城市，雖罔有得智慧女神 ê 祝福佮保護，猶是閃避 buē 過海神三叉 ê 點石，像 300 ê This is Sparta ê Battle of Marathon(Marathon 戰役)佮其他紲落來 ê 戰爭攏損蕩著這座城市。
不過，伊就敢若智慧女神送 hōo 人類 ê 祝福，只要根無爛，火燒過猶是 ē 發穎並飽漿。
世界文化遺產 - Parthenon, Acropolis of Athens
2022 是我第一斗行踏雅典，出發進前我 mā 清楚知影徛位 tī 塗牛身上佮經過遮 tsuē 斗戰爭 ê 衛城是修舊維舊 ê 狀況。
烏狗兄年歲 hōo 公司派來遮徛點 ê 翁分張「彼陣 ê 衛城總算有意願 kā 伊 ê 一磚一瓦沓沓仔疊轉來交維護...」
聽伊遮爾仔轉彎踅角 ê 分張 hōo 我又閣成做一隻貓好玄，申請交加入世界文化遺產 ê 規矩，不過 tī 人猶未行踏阿爾巴尼亞交北馬其頓進前，我是一个寮仔門攏無 kā 叫門。
開始 tuì 世界文化遺產叫門是跤跡踏入阿爾巴尼亞佮北馬其頓 ê Ohrid，我 tsiah 理解準做有文化 ê 遺產，橐袋仔猶原袋磅仔 mā 是無較縒一件。
世界文化遺產 - Theatre of Dionysus, Acropolis of Athens
希臘 tī 國家結束倒手交正手無法度互相合作 ê 搝大索，美國 mā 表示願意 kā 𪜶箍入 The Marshall Plan 馬歇爾計劃 ê 隨 kā 手䘼撆好勢準備 kā 消瘦落肉 ê 爸公業薅草翻塗。
1974 希臘軍政府倒台，雅典 ê Acropolis 開始整修，只不過建築究勘(kiù-khàm)做甲無蓋斟酌，像 Knossos 是按一位英國人 ê 認為 kā 伊修復做紅色。
17 世紀 hōo 威尼斯人損蕩甲揣無自本面肉 ê Acropolis mā 搪著相𫝛 ê 問題，特別是Parthenon 神廟。
讀著 ê 資料分張，Parthenon 神廟 ê 柱仔就敢若囡仔 teh 耍柴角仔，看起來勇跤 ê 伊窮實是荏身。
世界文化遺產 - Theatre of Dionysus, Acropolis of Athens
我 m̄ 是考古人員，m̄ 知影佗一份資料正確，總是見著 Acropolis 沓沓仔恢復自本 ê 面肉，這个畫面 hōo 我安穩，就 tshan-tshiūnn 見著囡仔時若廢所 ê 臺中林家厝宅沓沓仔成做宮保第園區按呢，心有一種講 buē 出喙 ê 感動，賰 ê 像 Knossos ê 柱仔敢是紅色，Parthenon 神廟虛荏遮 ê 問題，這久無法度解決，未來 ê 一日決定有法度揣著辦法調整，像向時 ê 高貴紫色是人類無法度按基本六色緻生湠 ê 色水。
世界文化遺產 - Theatre of Dionysus, Acropolis of Athens
行踏 Acropolis 是看袂著城內 ê 文物，bueh 看城內文物需要落山崙行到山跤 ê Acropolis 博物館。
當地食食
行踏雅典 ê 彼日 mā 搪著希臘少年人 uī-tio̍h 爭取自由交落身佮婚姻自由 ê 恬靜抗爭，見著這个無受大眾祝福 ê 抗爭，我 tsiah 想著成做臺灣人 ê 幸福。
咱番薯島捷 hōo 家己人剾洗無歷史無文化，這久見著這个無受祝福 ê 恬靜抗爭，凡勢是一種祝福，因為咱 m̄ 免交傳統這个夯踅金龜磨，mā 想著 tsuē 冬前看德國電影 24 WOCHEN 生湠 ê 討論 hōo 我想 bueh 行倚表示我 ê 支持，總是這是屬於希臘大眾 ê 議題，我 tuì 希臘文化無理解並我只是來遮車日子行跤花 ê 過路人，有 ê 代誌保持恬靜較 buē 湠事，就恬靜交翁 tsham 抗議者坐對面相看。
𪜶攑牌，我食物，雙爿行動無相𫝛 m̄-koh 向望相仝，祝福𪜶 ê 訴求有一日 ē 得著回應。
當地食食
我 tuì 這生甲若林檎派 ê 食物本底是一屑興趣攏無，總是綿豉 ê 無興趣猶原拚 buē 過價數𤆬來 ê 好玄隨冇手這味佮彼味，結數聽著數字掠做頭家講 m̄ 著數字，手指枋仔 ê 價數，這久頭家手指另外一塊枋 ê 價數。
莫怪無一个當地人行倚來交觀，隨撏錢解決這个捎希臘文來準做英文 kā 遊客搧大耳無老實 ê 頭家。
不過我猶是跟綴人 tī Santorini 聖托里尼搪著 ê 狀況以德語 tuì 頭家講；
Ich hoffe das Ihr Gott Ihre Lügen den Kunden nicht sagen und Ihr Geschäft läuft. Liebe Grüße.
我願你 ê 神 ē-hōo 你 ê 生理愈做愈大葩。
無四序 ê 情緒 m̄ 通儉來做寶收藏。
希臘 Gyros --- Αθήνα
按呢 ê 想法確實帶 hōo 我閣較讚 ê 味素，離開車頭順當地人紹介 ê 所在食在地 Gyros，我 tuì 翁講「是按怎好味素 ê 物一到恁德國齊變䆀味？」
「這是一个好問題」翁應。
我本底 m̄ 願點一份來食，總是見人客來來去去，我又閣成做一隻貓，然而這斗這隻貓無 hōo 我失望。
Tzatziki
聽人講希臘人 ê Tzatziki 佮德國賣 ê 無相𫝛，事實敢按呢我 m̄ 知影，因由我 m̄ 捌 tī 希臘試過，這斗車日子總算有機會試正港希臘人款 ê Tzatziki。
希臘 Tzatziki 交德國 Tzatziki 正港是兩回事。
這斗親身交伊挨拶，我總算理解翁講 ê 我愛希臘 Tzatziki。
來希臘只要食餐廳決定愛佮伊挨拶 ê 美國茄糋
Gún 是按 Κόρινθος(新約聖經 ê 哥多林)坐火車到雅典，紲落來敢是按 Κόρινθος 出發到這 Vonitsa, Βόνιτσα。
遮 m̄ 是受歡迎 ê 觀光地區，我 ê 14 是陸地活動，所以遮較無露營地通歇暝，m̄-koh 遮 ê 餐廳提供食一頓糜飯換一頓歇暝並通自在使用𪜶 ê 便所間。
Tī 上北阿爾巴尼亞這段僫揣露營地 ê gún 就 tī 這間提供食糜飯換歇暝 ê 餐廳停跤一暝。
海產總匯(Tsóng-huē)
Gún tī 軟晡未 5 點進前就行跤到，餐廳就準備 bueh 歇暝 hōo 主人家 tuì gún 歹勢仔講「遮倚 bueh 歇寒 sóo-tí 菜色有較減寡，恁若無棄嫌歡迎恁踮遮歇暝。」
洗面洗一爿，聽話聽一半 ê 我掠做無好物通食準備 bueh 張 hōo 堅持踮遮歇暝 ê 翁看，翁手一指海沙埔 ê 阿貓交猶原 teh 食糜飯 ê 私人遊艇人客，我隨換面腔講「無要緊，gún 清彩食」押尾 tī 遮真正踮遮清彩食甲哽胿。
「若閣有機會行踏 Gjirokastër 吉羅卡斯特咱愛來遮歇暝」這時巡田園，翻田塗翁見著遮 ê 相片講。
「我 mā 按呢認為。」
食一頓換一暝 ê 露營地
Ich habe jemanden in Athen sagen hören, dass das Fotografieren für mich nicht wichtig ist, ich habe sofort gesehen, dass viele Leute nach diesem Klang suchen siehe diese Abbildung, ich denke an eine japanische Gesangsshow, in der zwei Teams um den ersten Platz kämpfen.
Der Tag, an dem wir Griechenland in Richtung Albanien verließen, Ich dachte, der von mir eingereichte Artikel würde nicht mehr veröffentlicht werden, weil meine Artikel nicht für die neuen redaktionellen Anforderungen geeignet sind.
Ich erwarte also nicht, dass der Artikel, über den ich zuvor informiert wurde, veröffentlicht wird, als ich also meinen eigenen Artikel über den letzten Tag in Griechenland las.
Ich war froh, dass dies der Grund für die Begegnung mit dem gutaussehenden Priester heute Morgen war, eine Biene küsste mein Knie, nachdem ich dies gesagt hatte.
Ich dachte sofort an einen Film, den ich früher sehr mochte, in dem sich ein junges Mädchen in einen Priester verliebt.
Ich verfluchte mich selbst dafür, dass ich die Geschichte vergessen hatte, während ich Zahnpasta gegen den Schmerz auftrug.
Du denkst zu viel, aber es ist ein gutes Omen, sagte mein Mann und deutete auf den Artikel.
Dies ist ein Geschenk aus Griechenland, das dir sagt, dass du an dich selbst glauben und mit dem, was du bist, glücklich sein sollst, denn das tun sie auch!
Ja, ich bin auch ' économie ' - der Mann in Griechenland ist immer glücklich.
留言列表
冊 ▪ Bücher ▪ Books (4)
