亂皂𥴊仔店 ⓂⒺⒾⓃⓀⒾⓄⓈⓀ

世界文化遺產 - Kotor

「寧靜是世間上僫得著 ê 寶物」

我 tuì 烏山 ê 歷史無認捌，總是聽著主人家笑笑仔回答瑞士朋友 ê 問題 hōo 我足想 bueh 吼，mā 感謝 m̄ 捌 ê 力量 hōo 我交烏山 bueh 相𫝛年歲 ê 朋友行無相仝 ê 路。

離開露營區 ê 彼日我 m̄ 知影 ē-tàng 講寡啥，sóo-tí 我 mā 用恬靜 ê 方式祝福主人家佮𪜶 ê 土地，拍斷手骨顛倒勇 ê 愈來愈好像𪜶 ê 露營區十二月甘蔗，倒尾甜。

世界文化遺產 - Kotor 堡寨

Ruhe ist das Schwierigste, was man erreichen kann, ich weiß nicht viel über die Geschichte von Montenegro, aber nachdem die Gastfamilie lächelte und die Frage ihres Schweizer Freundes beantwortete, ich fühle mich traurig.

Dank der Macht des Unbekannten muss ich nicht denselben Weg gehen, den sie in einem ähnlichen Alter gegangen sind.

An dem Tag, als ich ging, wusste ich nicht, was ich sagen sollte, ich kann meinen Segen nur im Stillen geben, mögen ihr Land und ihre Familien, alles wird immer besser, wie z.B. der Campingbereich.

世界文化遺產 - Kotor 舊城

地中海向時重要港埠佮交易市場 ê Kotor，伊除了是烏山重要文化資產 mā 是聯合國世界文化佮自然遺產之一，加入時間 1979。

Kotor 除了是 Kotor 天主教主要教區𫝛時 mā 是塞爾維亞東正教中心地區，Kotor 上出名 ê 景緻 mā 是 gún 這逝上重要 ê 跤花，順懸 1894 呎 ê 山脈綴深水灣循禮。

世界文化遺產 - Kotor 堡寨

Kotor tī 西元 3 世紀進前就有人類 ê 跤跡，押尾成做一个市是按羅馬皇帝 Kaiser Diokletian tī 西元 3 世紀尾兜 ê 定奪，紲落來 Kotor ê 歷史就佮美國移民歷史仝款，tsuē-tsuē 族群來遮定居 mā tsuē-tsuē 人想 bueh 咬這地土塊。

世界文化遺產 - Kotor 堡寨

歐洲 tsuē-tsuē 城市攏是按一个軍事需求堡寨開始，紲落來綴人類 ê 心世界生湠枝骨。

Kotor 第一个堡寨起造 tī Byzantine Empire(拜占庭)年閣，紲落來跟綴斯當時 ê 大國撚寶 tī 西元 9 世紀佮 13 世紀成做倒離顛斗，特別是 14 世紀 ê 海權爭拚。

西元1185 塞爾維亞大公國來遮，我來，我見，我征服，Kotor 成做塞爾維亞大公國重要 ê 高雄港，1355 扞權 bueh 200 冬 ê 塞爾維亞大公國斜(tshiâ)西，匈牙利王國佮 Adria 海對面 ê 厝邊威尼斯共和國隨跟綴 Gaius Iulius Caesar 名句，我來，我見，我征服 hōo Kotor tī 1371 佮 1384 成做阿不倒仔，倒來倒去，tī 這段期間 1384 到 1391 閣有聲稱家己是塞爾維亞大公國繼承人 ê 波士尼亞來遮發行紋銀。

經過無一人相借問 ê 日子，1391 Kotor 總算恢復獨身成做家己 ê 主人成立共和國。Tī 獨身 ê 這段期間，伊時不時愛佮 Balšići 互展火藥閣愛面對喙飽目睭枵 ê 鄂圖曼，伊只好姑不而將倩鬼拆藥單，tī 1420 成做威尼斯共和國其中一个城市。

1420 到 1797 Kotor 是威尼斯共和國阿爾巴尼亞省 ê 一部份，這段威尼斯年閣建築 mā 成做 Kotor 目今上重要 ê 遺產。

1797 威尼斯共和國斜西，換奧地利 Habsburgermonarchie(哈布斯堡君主國)成做伊 ê 扞權者，1805 到 1814 換法國成做伊 ê 君主，1815 又閣換做奧地利一直到 1918，成做奧匈二元帝國三个重要海軍基地之一，伊 mā 是德國鐵血宰相 Bismarck 預言 ê 未來是獨立火藥庫重要角勢之一。

歐戰(一戰)結束 Kotor 成做南斯拉夫聯邦一部份並按 Cattaro 定名做目今 ê Kotor。

二戰結束，遮 ê I-tá-lih 裔居民 mā 行向排義道路放棄久年 ê 爸公業重新飼家，起家，栽新欉，生枝骨。

世界文化遺產 - Kotor 主教座堂

Kotor 是 Adria 海(地中海)按中世紀到今面肉猶原保存甲往過無宛 2 體 ê 城市。

1979 已經成做文化佮自然遺產 ê Kotor tī 我巡田園翻田塗進前，我 ê 記持 kan-ta 䀐一下就大約仔理解伊是歐洲幾个帝國 ê 烏面賊佮二戰後地球分佈上闊 ê 戰爭 - 前南斯拉夫聯邦獨立戰爭。

烏山是前南斯拉夫聯邦上押尾脫離聯邦 ê 國家 mā 是歐元區唯一一个 m̄ 是歐盟會員 ê 國家，前踏這个國家進前，我 tuì 伊 ê 印象佮波黑(hik)相𫝛平靜 ê 海浪有看 buē 著 ê 海湧，跤花正式栽到遮，感受愈強烈，特別是彼暝交瑞士少年阿爸做陣聽少年頭家 ê 故事，我 ê 頭殼一直轉踅 Bismarck tuì Balkans ê 形容，遮是一个火藥庫免人點火，伊隨時就 ē 自我挓火 ê 無穩定 mā 開始愖當我需要面對現實佮理想，特別是交鐵佮血隔一塊薄枋 ê 我 ē 按怎選擇。

這个問題到今我猶原無法做選擇，感謝天公伯。總是我願一家三代目二代上戰場 ê 少年頭家一家伙一切平安健康順序，tshan-tshiūnn 𪜶 ê 露營地十二月甘蔗，倒頭甜。

Herceg Novi 城門𫞼旗仔彼位

  徛位 tī Kotor 灣入口 ê Herceg Novi 是正港 ê 倚海食倚，倚海 mā 靠海沙埔吸引觀光客目仁 ê 城市，遮 ê 海沙埔受地理限制，伊 ê 砂質較像臺灣東爿砂石海岸，耍水曝人肉乾 tuì 我無路加上人 tī 遮 ê 時間天 mā 烏絲巾幔 buē 離 hōo 我有一个上媠氣 ê 借口 kā 愛海沙埔 ê 翁講「人正經足想 bueh 陪伴你行踏這美麗 ê 海岸，總是天公 m̄ 答應...」

Herceg Novi 出名 ê 景點，除了美麗 ê 海沙埔猶有一个因為波士尼亞國王無想 bueh 跟綴若瑞典 hōo 丹麥 - 挪威 tī 歐洲東海 hőng 捏頷頸 tī 1382 起造 ê 舊城。 

Herceg Novi 舊城區

Herceg Novi 按一片海沙埔成做交易 ê 角勢，主要是波士尼亞國王 Tvrtko I. uī-tio̍h 海權自由 buaih 閣受 Kotor 交 Dubrovnik ê 干涉所起造 ê 貿易港口。

Novi ê 14 是新，意思就是遮是新 ê 城市，押尾跟綴無仝 ê 政權改做無仝 ê 名，總是 Novi 這个辭 m̄ 捌改變，一直到鄂圖曼 kā 伊列入正式城市名稱，伊 tsiah 成做目今 ê 字名 Herceg Novi。

Herceg Novi 佮地中海 tsuē-tsuē 角勢相𫝛攏按羅馬行過拜占庭，紲落來跟綴族群 ê 遷徙成做塞亞維亞大公國一部份。

伊交倚伊無偌遠 ê 貓城市 Kotor tī 塞亞維亞大公國斜西後，無成做威尼斯共和國 ê 一部份，伊 tī 1482 到 1687 成做鄂圖曼 ê 一部份。

1687 Herceg Novi 成做威尼斯共和國阿爾巴尼亞省 ê 一个市，1798 換奧地利哈布斯堡來扞權一直到歐戰結束，成做前南斯拉夫聯邦一部份。

Herceg Novi m̄ 是 gún 設定 ê 跤花一，sóo-tí gún tī 遮 ê 時間 kan-ta 順舊城形體循禮，並跟綴當地人跤步行踏 tī 德國僫見 ê 交易 ê 魚市場，順紲踅 Tedi 佮 Euroshop 攏無 bueh 來設點，當地人家己開一間 10 箍商店揣寶。

這塊碗就是按 Herceg Novi 款轉來俗物一屑仔 buē bué 破家，媠閣好用 ê 寶。

Adria 海上古老 ê 城市 Budva 出名景點之一 Sveti Stefan Island

根據希臘神話 Budva 是希臘腓尼基國王 ê 後生 Agenor 起造 ê 城市 mā 是行踏烏山 Kotor 線上重要 ê 一搭停跤角勢。

Budva 佮烏山 tsuē-tsuē 角勢相𫝛攏搪過塗牛翻肩路崩厝倒 ê 歷史，總是 Budva 敢若較無 Tyche ê 緣，1979 規个城市 hōo 塗牛舞甲 kiōng-bueh 認捌出人，不過伊猶原是烏山上受歡迎 ê 觀光地區。

Budva 自西元 4 世紀就成做羅馬帝國一部份，1186 成做塞亞爾亞大公國 ê 一部份，1442 成做威尼斯共和國 ê 一部份到威尼斯共和國斜西，換奧地利哈布斯堡成做伊 ê 扞權者到歐戰結束。

Budva 成做烏山重要觀光財源收入之一，伊佮 Kotor 歡迎觀光客 ê 方式卻是無相𫝛。Kotor 是規年迵年攏有法得無料參觀舊城，Budva 是除了島上工作人員佮飯店人客 ē-tàng 出入，想 bueh 行踏這个充滿歷史跤跡 ê 島需要拆票，拆票時間 mā kan-ta 熱人，開放時間需要請教飯店管理者。Gún 行踏 ê 期間 Sveti Stefan Island 無開放就徛懸山看島攝相。

貓 ê 城市 Kotor

猶未行踏 Kotor 抑是其他 Balkans 角勢，我一直掠做全世界 kan-ta Istanbul 是貓 ê 城市(Istanbul, Stadt der Katzen/ARTE 360° Reportage)，押尾發現希臘、阿爾巴尼亞、克羅埃西亞、烏山 mā 是 hōo gún 翁轉來德國進前逐日檢查，車頂敢有蹛阿貓戇戇跟綴 gún 行跤花。

貓 ê 城市 Kotor

我愛貓 mā 足想 bueh 請阿貓成做我 ê 囡仔，總是一想著二樓厝邊 ê 阿貓十外冬 kan-ta 見過伊一擺面，賰 ê 齊是飼料包糞埽抑是伊 ê 貓砂，我就放棄。

畢竟，阿貓需要自由，我 buē-tàng 因為家己 ê 自私 kā 𪜶成做私奇，總是我感謝翁 ê 鬥相共，伊 kā 我 ê 數念珍惜 tī 相片內底 hōo 我有機會三不五時 tuì 阿貓金金相並訴相思。

阿貓，我足思念你 

Ich vermiss dich so sehr

Hōo 翁一日到晏要求伊愛減肥 ê 烏山露營地兜 ê 阿貓，2 歲。

栽欉 2022.10.06

翻田塗 2024.07.26