歐洲上闊 ê 水沖 tī Kuldīga，Latvijas
這个城市第一回 hőng 提起是 tī 1242 年
1368 加入斯當時上大 ê World Trade Organization - Hansestadt
伊 mā 是聯合國文化遺產 ê 候選人之一
伊 mā 是綴歷史 ê 塗牛翻身成做無仝生張 ê 國家之一 Kurland
德國人捌 tī 遮 ê 記持
遮 ê 城鎮 m̄ 是 Orden tī 遮 tsiah 開始
遮 ê 城鎮 tshan-tshiūnn tsuē-tsuē 所在自遠古年間就有人 tī 遮
只是，斯當時 ê 人 m̄ 捌符號帶來 ê 力量
遮 ê 歷史佮隔壁厝邊攏相𫝛
行過德國走，波蘭來，瑞典走，俄羅斯來 ê 日子 hōo 伊成做 tsuē-tsuē 人 tuì 伊固定印象 ê 生張
市定古蹟
Tshan-tshiūnn 這德國人 ê 生張
餐廳
Tshan-tshiūnn 這，有人講是露西亞生張 mā 有人講是瑞典生張
總是，我感覺 m̄ 管伊是 tsiâ ê 生張伊就是一个地區倚彼个地區 ê 特殊所生湠 ê 生張
舊城區
Kuldīga ê 舊街區大多數是柴枋起 ê 厝
歷史上久長 ê 柴枋厝是倚市政府起 tī 1670 年
市政府
這个歷來(li̍k-lâi) hōo 詩人佮畫家褒唆 ê 城市
一開始就是設定社頭趁墟 bué 賣 ê 所在，這个傳統 mā 一直保留到今
パン店
Ka-pi 店
花店
膨紗店
鐵馬店
𨑨迌物仔店佮粿路店
遮 ê 城市生張確實是以社頭趁墟 bué 賣為主
總是，tī 遮行踏我一直想著這句話有百年厝，無百年主 mā 想著阿愷之聲
EP84 講鹿港說鹿港，鹿港說不盡：維也納的鹿港，鹿港的維也納 PART2 歐洲城市觀察
Wien 有 Habsburg 佮 UNESCO 唌人去遐食𫝛款 ê 料理做𫝛款 ê 代誌
遮綴 Wien 做 bueh 𫝛款 ê 代誌，消費者敢會坐單？
我是消費者我會講 buē，起因𫝛款 ê 食物我甘願等到轉來德國 tsiah 消費
Latvijas ê Venezia(威尼斯)
往過聽人講「台灣 ê 小瑞士」 ē 感覺這是褒唆
現此時聽遮 ê 話 ē 感覺彼是內山親家，無話揣松柏瘤(tshîng-peh-luî)佮揣無家己
總是，脾土在人意愛，歡喜就好
BALTIC TEACHERS' SEMINARY(波羅的海神學研究院)
起 tī 1878 年 ê 神學研究院一寢開始並無吸引 gún-ê 目睭仁
起因露西亞東正教堂看 tsuē ē 產生臺灣朋友一喋著パン喙角全全泡
我聽著、看著パン生研佮飫喙 ê 狀況，總是飫喙猶是會搪著驚喜 ê 滋味
雙心天鵝佮神學研究有啥底代？
是--lah，就是門埕口 ê 木刻吸引 gún-ê 目睭仁 tsiah 知影現此時 ê 伊已經 m̄ 是自本 ê 生張
伊 tī 1989 年按神學研究院轉做技術學院
遮 ê 藝術品 m̄-tsiah 有機會出現 tī 遮，包括 The Simpsons ê Bart
𫝛時起造 ê 露西亞東正教堂
Gún 本底掠做伊是 Orden 起 ê 教堂
一路按 Orden 行到露西亞成做 Kuldīga ê Aachener Dom
落尾認真 kā 資料讀 hōo tsiâu-tsn̂g tsiah 發見 gún 傷𠢕烏白亂皂亂牽電線
看一个 Orden 影就隨 kā 生百外个 Orden ê 囝
伊是 Sankt-Peterburg 來 ê 設計師所起 ê 教堂，伊佮 Orden 一屑仔底代攏無
Lativjias ê 波羅的海
冊讀無 tsuē ê 我 tuì 波羅的海 ê 認捌 kan-ta「波羅的海三小國」
這回利用車日子那行尞那讀資料 tsiah 知影德國講 ê 東海是全世界鹹度上低 ê 海
隨好玄 kā 手當做水𣁳仔𣁳一喙來食
阿娘--uê 誠實 buē 鹹篤篤，莫怪遮 ê 鹽是金包銀，足貴
Latvijas 東海海岸露營區
敢是海水鹹度低致使遮 ê 鹽貴甲若參仔，我 m̄ 知
m̄-koh，當翁問講「按波蘭行進前，講敢 bueh 踮遮露營一暝，20歐元」
「Buaih」我隨應，立秋猶未行跤到溫度已經若小雪(siáu-suat)
Tī 立陶宛搪著按芬蘭轉來 ê 德國朋友講「八月初 ê 芬蘭 Auxo 無停跤，溫度12 - 3度」
「Gún 好字運，行踏 Helsinki 彼日，落大雨 m̄-koh 猶原 18 度」入港隨灣，入港隨隨我 mā 開始慣勢冇談天氣跋感情
Ventspils ê 睏甲 m̄ 知狗
無 bueh 再次行踏 Rīga ê gún，離開 Kuldīga 後一站就是往過 ê Hansestadt 佮 Kurland ê Ventspils
現代傳統市場
Latvijas 整體生張 tuì 我來講較倚露西亞
Ventspils 也是 gún 第一斗 hōo gún 有機會行踏露西亞人扞 ê 人家厝仔
踮露西亞人家厝蹛一暝是一件足有14 ê 經驗
歐洲東方味 ê 建築，護龍正身 ê 格局，一句用臺語「Nge̍h」佮德語「Da」記 ê「Нет」、「Да」
hōo gún 按普通房升格有敆浴間仔 ê 套房
敢若阿媽年間有厝瓦 ê 第三市場
Ventspils tī 往過是露西亞真重要 ê 製船城鎮，總是世間事是有百年厝，無百年主
咱攏無一个人有法度清楚知影這百年厝 ê 未來 ē 成做啥物款生張
就敢若露營地實在 buē 敆逝橐袋仔又閣無閣深，只好選擇露西亞人家厝歇暝 ê 經驗仝款
踮遮搪著 ê 露西亞族群確實無好鬥陣，總是無表示規个族群攏無好鬥陣 tshan-tshiūnn gún-ê 人家厝主人家
起甲媠媠，m̄-koh 無幾个擔 tī 排 ê 市場
拄行踏波羅的海三國
我無法度清楚判斷佗一區是露西亞人 ê 社頭，佗一搭是當地人 ê 社頭
Sòo-pái 攏靠教堂做天線，不過這个方法 m̄ 是百分之百 ê 著組
不過，押尾迵過有徛德國 ê Lidi 佮瑞典 ê Rimi 沓沓仔有法度分別遮 ê 社群人口
有徛這兩間跨國超市，當地族群大多數是露西亞人
看遮 ê 價數 mā 若看著露西亞人準做 m̄ 認同這塊土地原仔需要面對 ê 現實
立陶宛扞 ê Maxima 馬鈴薯一公斤 0.39 歐元已經 hōo 我笑甲一直撏錢袋仔
遮 ê 馬鈴薯品種 tsuē 價數閣比大賣場媠 hōo 我險險 buē 記--得家己是 teh 渡假
看會出來市政府用心 teh 妝娗這个城市，總是人會老城市 mā 是
行踏這个市場 hōo 我想著久年前行踏新 ê 臺中建國市場
有美麗 ê 外殼，一切猶原外甥仔點燈火，一切照舊
揣無往過 mā 看無現代 ê kan-ta 一个白汫無味 ê Barocco
市場 ê 公共冊櫃
總是，遮 ê 消費文化一切照舊
不過，冊櫃就無閣一切照舊，本底上強勢 ê 文字成做四角愛揣一角 ê 文學
這是我家己 ê 觀察，無表示 tsiâu 是按呢生
Liepāja 露西亞東正教堂
Liepāja 是 gún 計劃停跤 ê 第三大城，總是計劃永遠趕 buē 赴現實 ê 跤步
Gún tī 這个 buē 堅凍 ê 海港城市感受 buē 著城市 ê 特殊 mā 感受 buē 著 tī Ventspils 搪著 ê 自在
就隨決定揣超市款ビール直接駛向 Lietuvos 以避免渡假心情規个害了了
⟡ ⟡ ⟡
後記
徛踮金光閃閃瑞氣千條 ê 教堂面頭前，我開始愖是啥物因端 hōo 人願意先顧佛祖 m̄ 顧腹肚
起因 tī Daugavpils 我至少見著相𫝛 ê 平等先顧腹肚 tsiah 顧佛祖
本底想 bueh kā gún 翁攝著有若乞食花仔布衫 ê 厝囥踮遮
總是，一想著隨人有家己 ê 想法，我認為無合理 ê 生活無表示別人 mā 是按呢認為
總是見著金光閃閃 ê 教堂佮若乞食花仔布衫 ê 徛家
這 hōo 我想著綴朋友是去聽師傅解運消災，𪜶願意了十外萬我 m̄ 願意 ê 因由
起因，我是堅持先顧腹肚 tsiah 顧佛祖 ê 支持者
留言列表
冊 ▪ Bücher ▪ Books (4)
