亂皂𥴊仔店 ⓂⒺⒾⓃⓀⒾⓄⓈⓀ

波羅的海中心地區 Klaipėda

Lietuvos(立陶宛)第三大城 Klaipėda(克萊佩達)有 tsuē-tsuē 前身 --- Orden, Preußen、德意志帝國、Memel領地、立陶宛、蘇聯到目今 ê Lietuvos 立陶宛。

M̄ 管歷史按怎反頁，伊 tuì 波羅的海各國交立陶宛攏是歐洲東海上重要 ê 角勢，mā 是上有日耳曼碼頭家甲風格 ê 所在。

碼頭古錐 ê tsa̋u-gín-á

總是埠頭建築式樣交波蘭 Gdańsk 抑是北德 Stade bueh 相𫝛 ê 伊，並 m̄ 是我綿豉 tuì 翁挐頭 --- 你無𤆬我來遮栽跤花，我 bueh 佮你孤人飛一爿 ê 因由。

是按 Discovery 看來 ê 歷史跤跡引𤆬我成做一隻無來遮行踏 ē 因為好玄成做阿貓慄(lik)落去鋼琴 hōo 翁慄慄掣 --- 1945年 東 Preußen 撤退(Ostpreußische Operation)。

當年 Unternehmen Hannibal ê 所在

我 m̄ 知影翁 tuì 這段歷史 ê 感受，總是家己 ê 芋仔爸 mā 是一路盤山過嶺按中國遮跍遐跔遮有法度來到臺灣 hōo 我 tuì 這段按電視學來 ê 歷史有萬底深坑 ê 感觸。

Unternehmen Hannibal ê 故事隨人有隨人 ê 感受 tī 遮，我就莫詬唸 buē 離 kā 編做一本無價值 ê 歌仔冊。

海上餐廳

前踏這个按 Latvijas 語其中一支語源 kā 定名 ê Klaipėda 進前，我一直掠伊生做厚厚日耳曼透淡薄仔蘇聯風格來想像。

車猶未停好勢，雙目先按歷史跤跡巡航，我有一種龜怪 ê 想法想 bueh 請教伊，你敢有交臺灣𫝛款 ê 症頭，tuì 看 buē 入目抑是無意愛 ê 影跡就 kā 𠞭甲連骨攏無地看？

「遮是佗位」翁 kā 車停好勢我隨問。

「德國車牌一四界，你敢認 buē 出來」翁講。

「恁德國車牌 m̄ 是 kan-ta tī 遮滿四界。」

「Unternehmen Hannibal。」

凡勢記持有重耽，凡勢油醋添過雄，我大力 kā 目睭挼落去，掛 tī 凹鼻 ê 目鏡攄 hōo 清氣閣按埠頭認真巡一遍，我揣無記持中 ê 影片跤跡 m̄-koh 三分人，七分妝 ê 新面肉。

城市 ê 裝置藝術

順 Discovery kā Unternehmen Hannibal 巡禮，我想著 2019 ê 新聞 The G-spot of Europe 歐洲 G 點。

「我 tuì 露營地白甲若瓊花出名 ê 海沙埔 Gemeinde Neringa 佮 Palanga 是阿嬤你怎麼沒有感覺 ê 正常，是按怎來到這个若人類期待上月球 ê 角勢，我猶是阿嬤你怎麼沒有感覺 ê G 點你 tī 佗落。」

翁若搝著線隨哭苦「我就 kā 你講，西班牙較有意思。」

這逝車日子是我綿豉 bueh 來 m̄ 通承句，隨大划大划順觀光路標巡禮。

M̄ 知敢是 Klaipėda 較無首都 Vilniaus(維爾紐斯)懸房價 ê 壓力，sóo-tí tī 遮較見 buē 著若ハウルの動く城(霍爾移動的城堡) m̄-koh 貧民窟(貧民窟)版 ê 建築 hōo 我感覺若沓沓仔揣著 G 點。

人 tī 拉脫維亞 Liepāja 正面看金光閃閃瑞氣千條 ê 露西亞東正教堂 hōo 我認真斟這件代誌，世間敢有先顧腹肚 tsiah 顧佛祖這件代誌。

我 m̄ 捌露西亞歷史，總是我 tuì 露西亞人敢若 buē 行向法國大革命 ê 人生態度開始相信，一个人慣勢無公平 ê 態度是世代傳承 ê 慣勢 mā 是扞權者長期育飼 ê 白粉。

Vilniaus(維爾紐斯)因為房價問題，sóo-tí 市區建築猶原有 tsuē-tsuē 角勢保留蘇聯風格建築體我理解，總是交 Klaipėda 𫝛款是第三大城 ê Liepāja 猶原有 m̄ 求磚仔厝，只求有閘雨棚 ê 要求無法度理解。

別人兜 ê 經濟問題，我這个 m̄ 捌一个呼 ê 人免喋傷 tsuē，總是按一个城市 ê 蛻變 hōo 我感受無仝 ê 性命。

行踏埠頭掠外非觀光路標 ê Klaipėda，伊 hōo 我原仔感覺規个城市白汫無味，不過我足愛伊四界試無仝七分妝 ê 活力。

車日子露營食食 - 虎蝦生菜盤

平平是歐盟，平平是歐洲，平平使用歐元，𫝛款是按厄瓜多鮮沢空運來 ê 虎蝦價數 tī 波羅的海三國是媠甲 hōo 我食甲起清瘼 mā 甘願，特別是 Lietuvos誠好交虎蝦相拄搪。

虎蝦 tī Lietvuos 是按怎交拉脫維亞佮愛沙尼亞較好相搪拄，我想這交樹栽是按 Lietuvos 沓沓仔湠到厝邊有相關。

𫝛款徛位 tī 歐洲東海 ê 愛沙尼亞、拉脫維亞、立陶宛𪜶 ê 超市選擇無波蘭遐爾仔豐沛，有英國、法國、德國、西班牙，不過一間按在地生湠 ê Maxima 就好踅過頭前 ê 超市。

Gún 人 tī 愛沙尼亞、拉脫維亞、立陶宛三月日期間，需要任何物件齊是行踏 Maxima，除了彼个城鎮無 Maxima gún tsiah-ē 行踏價數交𪜶物價相𫝛 ê 瑞典超市 Rimi。

德國超市按德國湠到愛沙尼亞、拉脫維亞、立陶宛 mā 交瑞典 Rimi 仝款，齊是德國味 hōo gún 鼻無火燒厝，厝(趣)味。

露營區提供 ê 碗盤

行踏往過 ê 蘇聯佔領區我捷有這个疑問，遮 ê 露營設備交德國、法國、西班牙遮爾仔無相𫝛，敢是共產年閣傳落來 ê 慣勢？

我理解 Guest House 提供廚房 ê 因由，總是露營區 mā 提供真正 ê 廚房這就超級不可思議，至少 tuì 我這个涵空龜來講，我慣勢 ê 露營廚房 kan-ta 提供洗碗槽，無別項。

不過 mā m̄ 是逐搭蘇聯佔領區 ê 露營地有提供這个服務，總是按我 ê 經驗來計算有 95% 露營地齊有這个貼心 ê 設備 hōo 我 tuì 翁講「遮 ê 露營區是真正 hōo 人渡假 ê 所在 m̄ 是比並家私兼財庫大小 ê 臭頭包布，防蠅(風神)，驚人 m̄ 知」。

Kryžių kalnas(Berg der Kreuze/Hill of Crosses/立陶宛十字架山)

第一斗行踏立陶宛無論臺灣抑是德國朋友一聽著 gún 無來 Kryžių kalnas 行踏足講真無彩，我個人 tuì 這个無彩 ê 定義 tshan-tshiūnn 阿媽 hōo 孫騎鐵馬無細膩軋過 ê 阿嬤你怎麼沒有感覺。

緣份若是有夠額，我佮十字架山自然跟綴我交 gún 翁 ê 狀況，較遠 mā 相拄搪，花缽仔種菜 --- 無緣就 tshan-tshiūnn 幾米 ê 向左走，向右走仝款，隔一堵壁，永遠 buē 相遇。

自翁某決定無 bueh kā 時間撥踮 Latvijas 第三大城，翁隨那食比德國閣較合喙 ê Berliner 那請教法國交荷蘭兩大 ê 露營 APP 指南。

「你敢有興趣行踏 Kryžių kalnas？」

「無。」

「M̄-koh 我 tuì 這个倚伊點外鐘 ê 露營地有興趣」翁那講那設定 GPS。

就按呢，本底 m̄ 是 kan-na 花缽仔種花，無緣，是鼻無鳥鼠敢有洗身軀 --- 鼠(趣)味 ê Kryžių kalnas 成做 gún 這逝車日子新添 ê 光景。

Kryžių kalnas 有非科學通解釋 ê 傳說 mā 有目今較通人知 ê 意義 --- 反抗霸權，m̄ 管伊有啥物面肉，伊猶原無法度交社群媒體 Like/Gefällt 比並。

我 tuì 社群媒體無意見，總是遮 m̄ 是成做網路烏貓姊/烏狗兄 ê 所在。

Jakobsweg 搪著英國朋友 1975/8 露營車

順露營 Jakobsweg 指南出發到換翁無行跤到隨成做阿貓慄落去鋼琴頂 ê 露營區，我 tuì 露營區雲尪 ē-tàng 疊甲第幾層閣有新 ê 發現。

Gún-ê Jakobsweg

啥物號做徛踮雲尪第七層 Auf Wolken 7(天堂)，這个徛位 tī 無人熟似 ê 露營地就是上好 ê 說明。

伊佮愛沙尼亞 ê Eesti Nina 成做我這逝車日子 ê Auf Wolken 7。

廚房、食飯廳、浴間仔 tsiâu-tsn̂g

這个露營地翁仔姐 buē 曉半句英語，交人盤撋 mā 猶原保留蘇聯年間 ê 保持距離 hōo 我淡薄仔 buē 慣勢，特別是人佮人無法徛較倚這件代誌 hōo 我捷掠做家己 ê 慣勢無細膩 kā 𪜶觸意。

總是，若 m̄ 是時間 buē 逐 gún 老，我 bueh 踮遮跟綴主人家 ê 動物、植物、天頂 ê 河溪享受 Diana 一軀白娘仔絲 ê 貓霧仔光交 Apollo 金甲若火 ê 頭鬃輕輕仔捊過家己身軀。

左手爿柑仔色 ê 果子是洋刺波

這个露營地 ê 主人家是綴雞啼做穡，綴日頭斜西成做床眠 ê 恬靜，sóo-tí 遮並無安目今時行 ê 網路 hōo 我有機會摸飛到 m̄ 知愛款糜飯。

金烏猶未行跤到，天猶未幔紅霞巾，九月狗爁日，頇顢查某 buē 理 buē 直，菜蔬米糧款好齊隨三划做一划，那唱歌那划向四序甲若踮厝 ê 廚房款糜飯。

Plokštinės raketų bazė/Raketenbasis Plokštinė/Plokštinė missile base

相片落落長 ê 紹介是往過 ê 蘇聯軍事用地，目今 ê 立陶宛冷戰博物館 Cold War Museum。

我 tuì 冷戰博物館無理解，總是聽翁分張，往過 ê 蘇聯衛星國有兩搭這款設備，一搭 tī 波蘭一搭 tī 立陶宛。

我 tuì 冷戰 ê 印象無翁遐爾仔實櫼，這交咱 kan-ta 要意阿共 ê 教育敢有相關，我 m̄ 知影，總是我感謝每一个 uī 自由拍拚 ê 人，因為自由佮和平 m̄ 是桌頂拈柑。

四角草囷

四角草囷踮德國僫見踮波蘭捷見，不過波蘭 ê 草囷 m̄ 知受著啥物因端攏 kā 伊囥甲若一逝路那天遠 ê 僫翕，這逝車日子捷見著伊卻因為天總是殕殕 hōo 我無想 bueh uī 做攝張相做紀念，一直到車駛到倚波蘭柴杙，我 tsiah 敨放這个代誌美麗 ê 定義，手機仔隨撏出來 kā 伊攝一張相 uī 我 ê 記持停跤 mā 向 Lietuvos, Latvijas, Eesti 說聲牛郎約織女，咱後會有期。

這逝 tī Lietuvos 搪著 ê 好食啖糝