徛位 tī 歐洲東海(德：Ostsee，波羅的海)德國上大離島 mā 是渡假出名地 Rügen 一直是我足想 bueh 行踏 ê 角勢，雖罔耍水交成做白沙埔烏魚子齊 tuì 我無路，我猶是 tuì 伊煞心。
十外冬前來臺灣交女朋友盤撋 ê 翁按德國紮一本曆日送我，曆日分做四季，繡球花、指甲花、月來香、燒酒雞，Seebrücke Sellin 就是指甲花 ê 頭一頁 hōo 我就自 uī 病相思。
德國利便 ê 高鐵 hōo 我有法得完成一日上北閣落南，總是徛位 tī 東海 ê Seebrücke Sellin mā 交咱東部鐵路仝款，按臺中出發到台東就若 Shrek ê 丈人爸 ê 角勢。
這斗上北波羅的海三國，落南無順紲行踏這个 hōo 我日思夜夢 ê 呔 ē-tàng。
渡假公寓/飯店
第一斗交 Seebrücke Sellin tī 紙本相見，我就掠伊是王公貴族抑是國王起造 ê 城堡，決心 bueh 交伊好好仔戀愛 --- 拆票參觀。
這斗上北車日子順紲車數念 tsiah 理解，交翁 tī 渡鳥時期是翁生某旦，食飽相看 ê 目睭安電線，這久是翁生某旦，食飽莫相看較 buē 相拍雞。
無知是保存美好上好 ê 營養。
「照騙」一路盤車兼輦輪到 Seebrücke Sellin，翁猶未出喙，我就隨出喙。
「伊本底就是 uī-tio̍h 推捒觀光起造 ê 購物中心」翁笑甲反肚應。
徛懸山看 Seebrücke Sellin，我看著家己 ê 廣東目鏡 --- 歐洲就是美麗 ê 想像。
徛懸山看 Seebrücke Sellin 剾洗德國 ê「照騙」mā 佩服德國人綿豉精神，Seebrücke Sellin 自 1901 成做 Rügen 重要 ê 觀光景點，伊行過火刺身交寒人凍水 kā 伊凍甲崩橋，伊猶原 m̄ 捌因為遮 ê 復健問題成做臭生荒，特別是東德年閣。
雖罔當地人講目今 ê Rügen 交東德年閣 ê Rügen 是兩種生張，總是無綿豉 ê 傳承是 bueh 按怎延續伊 ê 美麗，敢 m̄ 是。
海雞母 ê 停機場
Rügen ê 歷史就敢若伊 ê 徛位，一四界攏有厝邊，遮 ê 厝邊 mā 齊 tuì 伊興趣趣 hōo 伊成做一个小小 ê 島有若歐盟各種語言𩛩共通語「通用德語」。
有分 FKK 佮無 FKK ê 海沙埔
按外埠頭來兼長期 kan-ta 學習通用德語 ê 我 tī 遮 ê 耳空 tshan-tshiūnn 踅轉去囡仔時 ê 豐沛 hōo 我足快樂，特別是當地人自在交自信講母語佮自在 tsham 外埠人使用共通語 ê 畫面 hōo 我欣羨甲喙瀾㴙㴙滴 mā 引𤆬加倍寶惜家己猶 ē 轉踅 ê 舌。
我 m̄ 知影 Rügen 有偌 tsuē 人猶 teh 講母語，總是 tī 遮 ê 期間， 我有一種出國 ê 感覺
。
Rügensche Kleinbahn
Rügen 無臺灣大 mā 無紅頭嶼 ê 細粒仔，伊猶原 m̄ 是一搭駛車環島一日就 ē-tàng 完成 ê 島，所以這斗 ê 車日子就順停跤 ê 露營地巡禮南爿，北爿就等候較飽滇 ê 後日。
時間分做東德兩德，東德因為經濟因數 hōo 𪜶無法得按近代工業升級到現代工業，sóo-tí 平平是水煙火車觀光，我個人一直較意愛德東 ê 行程。
這斗有機會行踏 Rügen，徛位 tī 東爿 ê Putbus 較遠 mā 愛交伊挨拶。
Putbus 站
Rügen 水煙火車是順東爿向北爿海沙埔巡禮，伊逐个車頭攏 ē 停車 hōo 人客上車落車，總是無確定拆票方式 ê gún，押尾猶是決定按比北爿閣較遠 ê Putbus 拆票。
Putbus mā 是水煙火車 ê 總站，遮 ê 停車位 mā 較好揣。
Rügen 南爿有一段田庄光景 hōo 聯合國收做世界遺產， 水煙火車經過 ê 田庄光景 tuì 我來講 mā 是媠甲目蚶 m̄ 甘合。
Rügen 水煙火車服務時間 --- 熱人，寒人 --- 歇睏。
無地拆票 ê Jadaschloß 站，入城堡參觀需要拆票，價數無研究。
火車觀光線路之一 Jadaschloß 站
露營日搪著 ê 鐵馬挑戰
Rügen 是德國上有日頭 ê 角勢，sóo-tí 伊 mā 成做鐵馬愛好者愛行踏 ê 所在。
德國上有日頭 ê 所在
這斗 ê 計畫是 m̄ 管北爿偌遠就是 bueh kā Rügen 一斗踅透透，總是人 ê 按算永遠趕 buē 著天公伯 ê 決定。
Tī 遮 ê 第四工 kā 挪威交瑞典落水(log suiˋ)落甲做大水 ê 烏雲 mā 沓沓仔向 Rügen 行軍 hōo gún 隨換按算並 kā 跤步放 hōo 冗，好好仔跟綴東海 ê 萬物欣賞這片土地。
一點一點 ê 白是海雞母
Kap Arkona 是比德國上有日頭 ê Rügen 閣較有日頭 ê 角勢，熱人罕得接雨水 ê 伊 tī gún kā 跤步放 hōo 冗沓沓仔跟綴海狗 ê 跤跡 kā 海岸線巡一遍結束，上有日頭 ê Kap Arkona mā 開始摔大雨。
人 ê 按算永遠無法度拚過天 ê 一目𥍉，享受當下比潦草一𫝻日後相見無相捌較重要。
這斗 ê Rügen 行踏 hōo 我認捌家己 ê 廣東目鏡兼無法度放冗 ê 跤步。
我無愛有壓力，總是一設計目標無 kā 完成隨 tuì 家己情緒叨撚。
這个怪癖我一直想 bueh 敨放，總是伊若蹛甲慣勢 m̄ 願搬厝，sóo-tí 這斗有法度接受北爿後回再相見是一件真無簡單 ê 進步，kā 家己拍噗仔
。
自然公園 ê 妝娗藝術 1.
自然公園 ê 妝娗藝術 2. Kapitän Blaubär
每一个倚海 ê 所在，目今 ê 面肉多數 m̄ 是往時 ê 生張。
現此時 ê 行尞出名地 Kap Arkona tī 向時是軍事禁地。
gún-ê 露營地
Gún 停跤 ê 露營地是一搭拋荒 tsuē 冬 ê 舊厝，按 Rügen 出世押尾 uī-tio̍h 追求自由食險草盤山過嶺到西德 ê 主人家 m̄ 甘故鄉 tsuē-tsuē 角勢面肉沓沓仔行向臭生荒 kā 手頭有法度 bué 幾仔間時行兼現代厝宅 ê 錢徙來遮，一磚一瓦沓沓仔 kā 起轉來，紲落來生湠跟綴年閣變化 mā 沓沓仔 bueh 消失 ê 相放伴文化交當地特有羊仔。
歐洲行向工業化 ê 變化是，逐个面肉愈來愈像，而且是像甲若 Ciper 佮 Siva 無阿媽分 buē 清 Tsiâ 是 Tsiâ。Sóo-tí 當我見著這 hőng 嫌舊漚舊臭 ê 牧羊人車，我感謝主人家 ê 綿豉，無伊 ê 綿豉我見 buē 著遮爾仔媠 ê 歷史見本。
按行向歐洲野牛 kiōng-bueh 消失，這久沓沓仔生湠做一大陣 ê 羊仔。
伊是山羊抑是綿羊，我分 buē 清，總是按翁 Google 來 ê 資料，我得著伊是波蘭東海地區交 Rügen 特有種。
徛位 tī 波蘭 ê 𪜶按代代湠沓沓仔行向歐洲野牛 ê 路途。
Rügen 是按行向歐洲野牛，沓沓仔 kā 伊恢復做代代湠，湠後代 mā 生湠市場。
這類羊隻 m̄ 驚剾風 m̄ 驚食蔫焦草，是 m̄ 免四界徙位交好育飼 ê 羊仔。
草仔無湠甲健欉伊猶是有法度食甲飽滇閣滿足。
遮爾仔好育飼 ê 羊仔是按怎險 bueh 斷根？
羊仔你是按怎行向這條路，我問羊仔。
羊仔無應話 kan-ta 兩蕊目睭交我金金相。
我 hōo 伊相甲 kan-ta 成做 hōo 林檎擲著頭 ê 牛頓。
羊仔遐爾款，無差你一款，我講。
羊仔咩一聲斡頭做伊去 buaih 閣交我金金相。
留言列表
冊 ▪ Bücher ▪ Books (4)
